SA DAWAG NG KAWALAN
ni Gregorio V. Bituin Jr.
15 pantig bawat taludtod
iniwan ako ng ubod rikit na binibini
doon sa may dawag ng kawalang di ko masabi
sa iwi kong pagsuyo siya'y nag-aatubili
pagkat wala ni ginto’t namumuhay lang ng simpli
siya ang diyosang sa mundo'y pinipintakasi
sa natutulog kong puso'y mitsa siyang nagsindi
subalit payak lamang ang buhay kong mapagmuni
pagkat pinili kong sa obrero't dukha magsilbi
karangyaan para sa kanya'y di ko mabibili
ni walang pilak, ngunit kaibigan ay kayrami
huwag pintasan ang buhay kong pagani-ganiri
tula ang aking yaman kaya di ako pulubi
subalit hanggang ngayon ay di pa napapakali
pagkat harayang nakaalpas ay di pa mahuli
ngunit patuloy ang pagmumuni araw at gabi
upang akdang makatha'y ihandog sa binibini
Walang komento:
Mag-post ng isang Komento