ANG TRAPO AT ANG GALUNGGONG
ni Gregorio V. Bituin Jr.
13 pantig bawat taludtod
ayon sa mangingisda, gunggong ang galunggong
kaydaling hulihin, lumalapit sa bitag
pag nahuli'y di tumatakas sa patibong
di na nagrereklamo, di na pumapalag
anang mangingisda, iba ang pulitiko
pagkat di raw mahuling nagsisinungaling
kayraming palusot ng magaling na trapo
nariyan ang ebidensya'y di umaamin
kaya nga gunggong ang galunggong, tangang isda
wala nang anumang palusot pag nahuli
kaiba ang matalinong trapong kuhila
kaydaming palusot kaya ngingisi-ngisi
trapo'y kayhilig bigkasin itong galunggong
sa kanilang talumpati sa sambayanan
batayan ng pag-unlad, presyo ng galunggong
pag tumaas ang kilo, kawawa ang bayan
Walang komento:
Mag-post ng isang Komento