MAGDUGO MAN ANG UTAK
ni Gregorio V. Bituin Jr.
11 pantig bawat taludtod
ito lang ang ikinabubuhay ko
ang magsulat ng magsulat ng todo
kahit walang natatanggap na sweldo
patuloy ako sa pagkathang ito
ngunit paduguan ito ng utak
habang tumatahak sa lubak-lubak
hanggang imahe'y sa isip tumarak
hanggang ang diwa'y tuluyang magnaknak
ngunit kailangan ko itong gawin
upang limanglibong tula'y marating
bawat kataga nawa'y iyong damhin
at sasaiyo ang diwa kong angkin
ang makatang tulala't walang kibo
tutula pa rin utak ma'y magdugo
kahit pa sa gitna ng pagkalango
ikukwento ang tamis at siphayo
Walang komento:
Mag-post ng isang Komento