"KAYO ANG BOSS KO" O UBOS KAYO?ni Gregorio V. Bituin Jr.
13 pantig bawat taludtod
sa kanyang pagkakaupo bilang pangulo
sa masa'y kanyang sinabi, "Kayo ang boss ko!"
tila baga ang bagong lingkod-bayang ito'y
isang pag-asang maglilingkod ng totoo
subukan natin siya kung boss niya tayo
simulan nang busisiin ang batas dito
at tanggalin ang mga kabulukan nito
tulad ng kontraktwalisasyon sa obrero
panlabas na utang, huwag munang bayaran
at itong pondo'y gamitin para sa bayan
edukasyon ay unahin munang pondohan
kaysa depensang lagi nang nasa unahan
kontraktwalisasyong salot, dapat tanggalin
tulungan yaong gumagawa ng pagkain
dating administrasyon ay papanagutin
sa mga nagawang sala sa bayan natin
itigil lahat ng klase ng demolisyon
at ayusin ang serbisyo sa relokasyon
pababain ang presyo ng bilihin ngayon
itigil ang pangungutang nang di mabaon
pagsikapan kaya niyang magawa ito
o bibiguin tayo ng bagong pangulo
boss niya tayo kung magawa niya ito
kung di magawa, baka tayo ubos dito
Walang komento:
Mag-post ng isang Komento