Tungkulin

TUNGKULIN
ni greg bituin jr.
14 pantig

may dalawa tayong tungkuling pagpipilian
na sa mundong ito'y dapat isakatuparan

ang maging makasarili o para sa bayan
maging gahaman o maging makamamamayan

kung sarili lang natin ang pakaiisipin
ay wala tayong pakialam sa kapwa natin

kahit may naghihirap di sila papansinin
di tulad ng may pakialam sa bayan natin

ang may pakialam ay nag-iisip kung paano
sila makatulong sa kanilang kapwa tao

ihatid ba sila sa landas ng kabutihan
o ibulid sila sa bangin ng kasamaan

ngunit mas magandang pamana natin sa masa
ay dangal at patuloy nating pakikibaka

na tulungan sila patungo sa kalayaan
at ilayo sila sa dusa ng kahirapan