Salamat at Paalam, Ina

SALAMAT AT PAALAM, INA
(pagpupugay sa namayapang pangulong Cory)
ni Gregorio V. Bituin Jr.

Payapa nang humimlay ang ina
sa kanyang huling hantungan
Ina ng demokrasya'y wala na
ngunit tuloy pa ang laban

Tuloy ang laban ng sambayanan
laban sa mga tiwali
Na ayaw umalis sa upuan
at nais pang manatili

Kaming anak nitong demokrasya
sa ina po'y nagpupugay
Paalam na, mahal naming ina
sadyang kami'y nalulumbay

Nalulumbay man ay tuloy pa rin
ang adhikang pagbabago
Sadyang kayo'y inspirasyon namin
pagkat kayo'y makatao

Makataong lipunan ang nais
nitong sambayanang giliw
Lipunang walang nagmamalabis
adhikang di magmamaliw

Ina, kami sa inyo'y saludo
kaya tuloy po ang laban
Salamat, salamat po sa inyo
bayani ka nga ng bayan