Pamana ng Trapo’y Republikang Basahan

PAMANA NG TRAPO'Y REPUBLIKANG BASAHAN
ni Gregorio V. Bituin Jr.
14 pantig bawat taludtod

Ang bansa nating ito'y tinulad sa basahan
Ng mga trapong ganid na sa kapangyarihan
Sa kanila ang saya, sa masa'y kahirapan
Trapo'y palaging bundat habang gutom ang bayan.

Maging sa pulitika o kaya'y ekonomya
Sila'y naririyan na, pawang pami-pamilya
Relyebo ng mag-anak ang laging nakikita
Kahit sa Malakanyang ay naroroon sila.

Ekonomya, Kongreso't Senado'y kontrolado
Ng mayamang iilan, pati na pulitiko
Republikang basahan ang pamana ng trapo
Halina't ating tingnan ang kanilang epekto.

Pinatakaran nila'y itong globalisasyon
Na sadyang nagpahamak sa manggagawa't unyon
Serbisyo'y ninegosyo nitong pribatisasyon
Merkado ang bahala dahil deregulasyon.

Kalikasa'y sinira, yumaman ang banyaga
Pagkat pinagminahan ang ating mga lupa
Puno'y pinagpuputol kaya lagi ang baha
Pati kapaligiran ay binabalahura.

Ang dukha'y tinanggalan ng kanilang tirahan
Ang manggagawa nama'y biktima ng tanggalan
Magsasaka'y nawalan ng lupang sasakahan
Nag-ari'y ang kumpanya't kinapital ang bayan.

Katutubong kultura'y pilit ding tinatanggal
Pati ang katutubo'y aalisan ng dangal
Nais pang palayasin ng mga trapong hangal
Upang lupang ninuno'y makuha ng kapital.

Ang babae'y produkto sa mga palatastas
Sila'y pinagigiling sa maraming palabas
Alak, babae, sugal ang pinausong batas
Ganito ang sistema sa bayang dinarahas.

Karapata'y binili, edukasyon ay mahal
At mahal na rin kahit ang pagpapaospital
Ang lahat na'y may presyo at ginawang kapital
Tatawanan ka nila pag ikaw ay umangal.

Pulitikang binaboy, pulitikong gahaman
Ekonomyang winaldas, kapitalistang ilan
Wasak na kalikasan, kahirapan ng bayan
Na ang naging resulta'y republikang basahan.

Paghahari ng trapo'y dapat nating wakasan
At huwag ipanalo sa sunod na halalan
Ilibing sa pahina ng ating kasaysayan
Yaong pamilyang trapong walang silbi sa bayan.

Maralita, obrero, babae, magsasaka
Lahat ng aping sektor, halina't magkaisa
Republikang basahan ay ating palitan na
Ng gobyerno ng masa't matinong republika.

Pagbabaka-sakali

PAGBABAKASAKALI
ni Gregorio V. Bituin Jr.
7 pantig bawat taludtod

I

Ako si Goriong Putik
Simple lang ngunit lintik
Kung bumili ng swipstik
Tila dito naadik

Kahit na tingi-tingi
Binili't hindi hingi
Nagbabaka-sakali
Upang di mapalungi

Pagkat aking pangarap
Buhay ko'y maging ganap
Ngayon ay nagsisikap
Swerte man ay kay-ilap

Umaasang tatama
Upang di na lumuha
Nakatulong ding pawa
Sa pagkakawanggawa

Paano naman kasi
Ang pinipintakasi
Nais nang maging kasi
Nang di ako magsisi

Dahil baka mawala
Ang sinisintang lubha
Siya'y aking diwata
Dito sa puso't diwa

At inaasahan ko
Sa swipstik ay manalo
At pag nangyari ito
Punta na sa kasal ko

II

Sa pamilya'y pangarap
Di na sila maghirap
Sana ako'y matanggap
Sa trabaho kong hanap

Ako'y bibili pa rin
Ng swipstik sa may amin
Lotto'y tatayaan din
Baka ako'y palarin

Nang makaahon naman
Sa dustang kalagayan
At pamilya'y umalwan
Sa aming kabuhayan

Dulot nito'y pag-asa
Sa marami ring masa
At sa kaunting pera
Pag tumama'y kaysaya

Kaya ako ma'y putik
Dangal ko'y walang batik
Ang lagi ko lang hibik
Mata'y huwag tumirik

Dahil sa kagutuman
At mga kahirapan
Kaya sana'y pagbigyan
Swipstik ko'y matamaan

Daan man ay matinik
Bibilhin ko ang swipstik
Nang buhay na tiwarik
Ay di na maging hindik.

Agosto 21, 1983

AGOSTO 21, 1983
ni Gregorio V. Bituin Jr.
11 pantig

Pinabagsak ka, Ninoy, sa may tarmak
Doon ka nilugmok at napahamak
Sa nangyari, marami ang nasindak
Habang diktadurya'y humahalakhak.

Pagkamatay mo'y naging isang mitsa
Sa nagngangalit na poot ng masa
Tatlong taon lamang ay bumagsak na
Itong mapang-aglahing diktadurya.

Maraming salamat sa iyo, Ninoy
Ginising mo ang bayang nananaghoy
Tuluyang napalayas ang nang-unggoy
Sa bayan nating ginawang palaboy.

Di nasayang ang iyong sakripisyo
Di nasayang ang buhay na alay mo
Isa kang bayani sa bayang ito
Na hinahanggan ng buong mundo.

Mayo 10, 1897

MAYO 10, 1897
ni Gregorio V. Bituin Jr.
11 pantig

Ilang buwan pagkamatay ni Rizal
Nang ikaw ay kanilang isinakdal

Upang agawin ang pamumuno mo
At maghari ang mga ilustrado.

Si Heneral Aguinaldo'y nag-atas
Na iwing buhay nyo'y agad mautas.

Kapatid mong si Procopio at ikaw
Sa Bundok Buntis ay agad pumanaw.

Binaril ni Lazaro Macapagal
Kasama'y mga pili niyang kawal.

Mga bayaning Andres at Procopio
Kami rito'y nagpupugay sa inyo

Sakripisyo ninyo'y di masasayang
Pagkat kayo'y pawang bayaning hirang

Ngalang Bonifacio'y tumataginting
Sa kasaysayan ng bayang magiting.

Ang laban ninyo'y itutuloy namin
Pagkat bayan pa ri'y inaalipin.

Disyembre 30, 1896

DISYEMBRE 30, 1896
ni Gregorio V. Bituin Jr.
12 pantig

Tanging ikaw lang yata ang nobelista
Sa buong mundo ang pinapatay nila
Dahil sa akda mong dalawang nobela
Ay iyong ginising ang diwa ng masa.

Maraming mamamahayag ang pinaslang
Dahil nagsiwalat ng katotohanan
Ngunit ikaw ay nobelista ng bayan
Na nagmulat laban sa mga gahaman.

Sadyang isa kang bayaning manunulat
Pagkat ginamit mo ang iyong panulat
Upang ang irog na bayan ay mamulat
At sala ng mananakop ay isumbat.

Aming bayani, pagpupugay sa iyo
O, Jose Rizal, dakila ka sa mundo.

Atas ng Damdamin

ATAS NG DAMDAMIN
ni Matang Apoy
10 pantig

(ginawan ko ng sequel ang tula ng isang magaling na makatang babae sa multiply)

Maari ba kitang rahuyuin.
Ngunit hindi kita lalandiin
Nakikiusap ang aking tinig.
Maari bang ako'y iyong dinggin.

Ngunit ako'y parang ligaw-tingin
Ikaw ba'y maari kong hilahin?
Di mo ako pasanin sa dibdib
Lalapit ako sa iniibig

Maaari ba kitang lapitan
Sa iyo pa rin ang kalayaan
Huwag mo lang akong talikuran
Kahit hindi tayo mag-aminan

O, hindi kita nginingisihan
Ikaw lamang ay nginingitian
Sana ako'y huwag kagalitan
Ito lang ang aking naramdaman

Walang Kamatayan si Michael Jackson

WALANG KAMATAYAN SI MICHAEL JACKSON
ni Gregorio V. Bituin Jr.
15 pantig

namamatay din pala ang tulad ni Michael Jackson
namamatay din pala ang inidolo ko noon

We are the World, Heal the World, Earth song, at iba pang kanta
mga mensahe para sa daigdig at sa masa

kaya awit niya'y di kailanman mamamatay
tulad ng awiting Bayan Ko na ngayon pa'y buhay

mga awiting nanunuot sa kaibuturan
dahil dama nating ito'y para sa mamamayan

si Susan Fernandez na magaling na mang-aawit
ay namatay sa kanser na sadyang kaytinding sakit

namatay si Elvis Presley na idolo ni nanay
ngunit mga awit niya'y nananatiling buhay

si John Lennon ng Beatles ay walang awang pinaslang
ngunit awit nila hanggang ngayo'y umiilanglang

pinaslang din si Cesar "Saro" Bañares ng Asin
ngunit kinalulugdan pa ang kanilang awitin

ang "My Way" ni Frank Sinatra ay buhay na buhay pa
kahit dahil sa "My Way" marami nang namahinga

marami pa silang kasabayang pawang idolo
ng maraming Pinoy sa panig na ito ng mundo

sila nga'y hinangaan sa kapanahunan nila
nagbigay inspirasyon ang kanilang mga kanta

sa mga awitin nila'y nais nating makinig
dahil sa mensahe, porma nila't ganda ng tinig

sila pa'y nasa alaala kahit nawala man
dahil sa iniambag nila sa sangkatauhan

tulad din ni Michael Jackson ng ating henerasyon
buhay pa siya sa henerasyon noon at ngayon

I want you back, I'll be there, mga walang kamatayan
Thriller, Billie Jean, Beat it, atin siyang hinangaan

magbabalik pa si Michael Jackson, magbabalik pa
di ang katawan kundi yaong mga awit niya

oo, may namamatay nga upang muling mabuhay
at ang ambag nila sa mundo'y hindi mamamatay

Pulitikong Aso, Trapong Kabayo

PULITIKONG ASO, TRAPONG KABAYO
ni Gregorio V. Bituin Jr.
11 pantig

pulitikong aso, trapong kabayo
ganito ang sistema sa bayan ko
krisis ang nararanasan ng tao
dahil inutil yata ang pangulo

inaasikaso'y kapitalista
nais pa nilang sayawin ay ChaCha
sadya ngang pahirap sila sa masa
gobyerno pa bang ganito'y may kwenta?

krisis ng masa'y kanilang ginawa
nagsamantala rin sa manggagawa
con-ass ang kanilang inaadhika
buong bayan na ang kinakawawa

pulos sunud-sunuran sa pangulo
itong kayraming pulitikong aso
itinatahol na'y ang makapwesto
upang magkamal ng maraming buto

tatakbo ang mga trapong kabayo
makikipagkarera na sa Mayo
nagbabakasakaling mananalo
at tiyak maninipa pag natalo

ngunit bakit ang ganito ang sistema
wala muling pagpilian ang masa
pawang patakbo ng kapitalista
ang mga pulitikong pangarera

trapong kabayo, pulitikong aso
ang sistema sa bayan ko'y ganito
sa krisis makakaahon ba tayo
kung sila muli ang makakapwesto?

pulitikong aso, trapong kabayo
tiyak kawawa ka muli, bayan ko
pulitikong aso, trapong kabayo
di ako natatawa, hu hu hu hu!

- nalathala sa Taliba ng Maralita, ang opisyal na publikasyon ng Kongreso ng Pagkakaisa ng mga Maralita ng Lungsod (KPML), Tomo XIV, Blg. 2, Taon 2009, p. 8.

Huwag Sambahin ang mga Inglesero

HUWAG SAMBAHIN ANG MGA INGLESERO
ni Gregorio V. Bituin Jr.
16 pantig

(Nang tinanggihan ng premyadong manunulat at nobelistang si Edgardo M. Reyes ang isang award na ipinagkaloob ng Komisyon ng Wikang Filipino noong Abril 2, 2009, kaarawan ni Balagtas, isa sa kanyang mga dahilan ay wala siyang nakikitang pag-unlad ng sariling wika. Ang sumusunod na tula ang pagninilay ko kung bakit di umuunlad ang sariling wika, at pati na ang bansa, kung saan naalala ko at taimtim na pinagnilayan ang isang saknong sa awiting 'Tayo'y mga Pinoy' ng Banyuhay ni Heber: "Mayroong isang aso, daig pa ang ulol, siya'y ngumingiyaw, hindi tumatahol, katulad ng iba, pa-ingles-ingles pa, na kung pakikinggan, mali-mali naman". Ah, hindi nga tayo dapat tumulad sa asong ngumingiyaw. Ambag ang tulang ito sa pagdiriwang ng Linggo ng Wika sa darating na Agosto.)

sa Pilipinas, sinasamba ang mga Inglesero
dahil inaakalang mga ito'y matatalino
ngunit kung susuriin marami sa kanila'y bobo
upang di mahalata'y pala-Ingles ang mga ito

puro Ingles kahit kausap ay kapwa Pilipino
kaytagal na sa Pilipinas pero ayaw matuto
pag nagtatagalog ka, imperyor ang tingin sa iyo
tingin sa nagtatagalog, mababaw ang pagkatao

yaon daw mga Pilipinong di marunong magmahal
sa sariling wika, ayon sa dakilang Jose Rizal
ay kapara ng mabahong isda doon sa imburnal
nandidiring magtagalog itong Pilipinong hangal

mabuti pa ang totoong dayuhang nais matuto
ng katutubong wika kahit dayo lang sila rito
di gaya ng kapwa Pilipinong naging Inglesero
ingles ng ingles kaharap man ay kapwa Pilipino

e kasi dito, sinasamba ang mga Inglesero
paraan nila ito nang agad makilala rito
dahil kung magtatagalog baka malaman ng tao
na wala pala silang alam, kayhihina ng ulo

dinadaan sa paingles-ingles para makaisa
pagkat sa bansang ito, ang inglesero'y sinasamba
dahil magaling sa Ingles ay agad hahangaan na
aakalaing laki sa pangarap na Amerika

dapat nating salitain ang sarili nating wika
aralin natin ang tagalog, ilokano't bisaya
kapampangan, panggalatok, iba pang wika sa bansa
upang tayong lahat dito'y totoong makaunawa

ang Japan ay umunlad, di naman Ingles ang salita
ang Tsina'y bumabangon na gamit ay sariling wika
Latin Amerika'y nagkaisa sa wikang Kastila
marami pang umuunlad na di Ingleserong bansa

huwag na nating tingalain ang mga Inglesero
dahil yakap pa nila'y kaisipang kolonyalismo
superyor ang Ingles, imperyor ang wikang Pilipino
sa ganitong kaisipang pulpol, uunlad ba tayo?

ingles ay tamang gamitin doon sa mga dayuhan
sariling wika naman pag kausap ay kababayan
ito nga ang nararapat nating gawing panuntunan
kung nais pa nating sumulong at magkaunawaan

Kahungkagan

KAHUNGKAGAN
ni Gregorio V. Bituin Jr.

ano bang naambag
ng mga tiwaling pulitiko
upang mapanatag
ang bayan sa serbisyo publiko

wala kundi hungkag
na pamumuno't pagkatuliro
ang sinasagisag
nitong mga trapo sa gobyerno

lagi silang bulag
sa dustang kalagayan ng tao
at mistulang bangag
sa kapangyarihang natatamo

ang trapo'y kaylibag
ng pamamahala at serbisyo
di dapat pumayag
tayong mamamayan sa ganito

dapat nang malansag
ang sistemang bulok nitong trapo
bago pa malaspag
itong ating bansa't pagkatao

- nalathala sa Taliba ng Maralita, ang opisyal na publikasyon ng Kongreso ng Pagkakaisa ng mga Maralita ng Lungsod (KPML), Tomo XIV, Blg. 1, Taon 2009, p. 8.

Sa Isang Blangkong Papel

SA ISANG BLANGKONG PAPEL
ni Matang Apoy
8 pantig

(ayon sa isang taga-multiply, "wala akong magawa. kahit madaming gagawin", na sinagot ko ng tula)

ito ang magandang berso
na aking pinakagusto

na gagawan ko ng tula
upang ako'y may magawa

kahit maraming gawain
at dapat pakaisipin

maraming salamat dito
at may magagawa ako

at sa isang blangkong papel
ay nag-iisip ng anghel

na dadalaw sa haraya
ng naritong manunula

Hindi Palulupig

HINDI PALULUPIG
ni Greg Bituin Jr.
tanaga

sa ating diwa't tindig
at sa puso'y pumintig
ang bayang iniibig
ay hindi palulupig

Galaw ng Trapo'y Estilong Basahan

GALAW NG TRAPO'Y ESTILONG BASAHAN
ni Gregorio V. Bituin jr.
11 pantig

galaw ng trapo'y estilong basahan
ang nililinis ay kaban ng bayan
ang mga trapo nga'y nagbubundatan
lalo na yaong kanilang lukbutan

pag kampanyahan laging bukambibig
maglilingkod sa bayang iniibig
pag nasa pwesto na'y di na marinig
pagkat iyon pala'y kabig ng kabig

paano'y dapat bawiing tuluyan
ang milyones na gastos sa halalan
pagkat ang sweldo'y maliit lang naman
kaya nagnanakaw sa kabang-yaman

imbis magserbisyo sa mga tao
ang serbisyo'y ginagawang negosyo
ganito bumawi ang mga trapo
utak-basahang di dapat manalo

kaya sa pagsapit nitong halalan
iyang mga trapo'y dapat bantayan
ngunit dapat silang pakaingatan
baka buhay mo ay gawing basahan

kabisado na ng bayan ang trapo
kaya Comelec bantayan ding todo
dahil dumarami ang madyikero
dagdag-bawas, kapalit milyong piso

galaw ng trapo'y estilong basahan
pagkat marami pang katiwalian
kaya bayan ay pulos kahirapan
kawawa lagi itong sambayanan

kailangan natin ng pagbabago
ngayon pa lang ay kumilos na tayo
sa basura nababagay ang trapo
at di sa gobyerno ng mga tao

Trapo'y Nakatunganga

TRAPO'Y NAKATUNGANGA
ni Gregorio V. Bituin Jr.
7 pantig

trapo'y walang ginawa
sa uring manggagawa
at mga maralita
kundi ang tumunganga.

Trapong Bulok, Trapong Bugok

TRAPONG BULOK, TRAPONG BUGOK
ni Gregorio V. Bituin Jr.
11 pantig

itong bayan natin ay nalulugmok
dahil sa mga trapong nabubulok
o, bayan, sa ating pakikihamok
trapo'y dapat lang tigpasin ng gulok

pag halalan lang sila kumakatok
sa buhay ng masang walang naimpok
kundi galit sa namumunong bugok
at sa sistemang kaytindi ng dagok

trapo'y kapara ng ligaw na lamok
dugo ng masa'y lagi nilang tutok
maghilom man ang sugat ay balantok
ulo't sikmura'y laging binabagok

o, panahon nang itapon ang bulok
lalo na yaong mga trapong bugok!

Mga Kwentong Trapo

MGA KWENTONG TRAPO
ni Gregorio V. Bituin Jr.
11 pantig

Namatay na raw ang kwentong kutsero
Ngunit buhay pa ang kwentong barbero
At may nadagdag na iba pang kwento
Tulad ng mga kwentong babaero
At meron pa rin daw kwentong sanggano.

Ngayon, ang uso'y itong kwentong trapo
Na usapan ng mga pulitiko
Doon sa Senado at sa Kongreso
Na Konstitusyon ay nais mabago
At gobyerno'y gawing parlyamentaryo.

At kung sakaling mangyayari ito
Titiyakin ng pangulong tatakbo
Mula Malakanyang tungong Kongreso
Na sa kanyang balwarte'y mananalo
Tatalunin ang karibal sa pwesto.

Ganap nang magiging punong ministro
Kung siya manalo sa parlyamento
Habang mga kakamping pulitiko
Ay may biyayang milyun-milyong piso
Kaytapang ng apog ng mga ito.

Ay, ganito ang mga kwentong trapo
Maaalibadbaran kahit sino
Kaya kung nais nati'y pagbabago
Aba, magkaisa't kumilos tayo
At baguhin ang lipuna't gobyerno.

Pagkamatay ng Kwentong Kutsero

PAGKAMATAY NG KWENTONG KUTSERO
ni Gregorio V. Bituin Jr.
10 pantig

Noon daw sa bayan nating ito
Ay palasak ang kwentong kutsero
Saluhan pa ng kwentong barbero
Aba'y buhay na buhay ang kwento
Tsismis o kaya'y balita ito.

Ngayon tumatanda na ang mundo
Bihira na ngayon ang kutsero
Pagkat karitela'y di na uso
Sasakyan na ang minamaneho
Kaya wala nang kwentong kutsero.

Ngunit meron pang kwentong barbero
Lalo na sa barberya sa kanto
Makipaghuntahan lang kay Pedro
Habang ginugupit ang buhok mo
Ay marami siyang ikukwento.

Kasaysayan ng Dalawang Kalapati

KASAYSAYAN NG DALAWANG KALAPATI
ni Gregorio V. Bituin Jr.
10 pantig

i.

Kalapating mataas ang lipad
Kalawakan ay ginagalugad
Naghahanap ng uod o higad
Para sa anak na nasa pugad.

ii.

Kalapating mababa ang lipad
Ang turing kay Magdang sawimpalad
Na lagi na lang kinakaladkad
Upang gumiling na at maghubad.

Ibagsak ang mga Trapo

IBAGSAK ANG MGA TRAPO
ni Gregorio V. Bituin Jr.
8 pantig

Kawawa na naman tayo
Pag sila'y muling naboto
Kaya ang panawagan ko:
Ibagsak ang mga trapo!

Trapo'y mga pulitiko
Na ginagawa sa pwesto
Serbisyo'y ninenegosyo
Kaya't di nagseserbisyo.

Pag ang namumuno'y trapo
Kawawa ka, Pilipino
Sistema'y dapat mabago
Kaya magkaisa tayo!

Ibagsak ang mga trapo
Huwag paapi, bayan ko!

Sa isang dilag na bagong gising

SA ISANG DILAG NA BAGONG GISING
(tugon sa isang ka-multiply)
11 pantig

buti't nakatulog ka ng mahimbing
kaya pala ngayon ay naglalambing
tiyak kong kaysarap ng iyong gising
pagkat nalikha pa'y akdang masining

Sa iyo, Pag-ibig

SA IYO, PAG-IBIG
(tugon sa tula ng isang taga-multiply)
10 pantig

ako ngayo'y tila nanginginig
minamahal din kita, pag-ibig
ikaw sana'y aking makaniig
at ikukulong sa aking bisig

o, pag-ibig, minahal na kita
ikaw'y laging nasa alaala
sa puso ko'y itinanim ka na
lagi kitang didiligan, sinta

hanggang tuluyan kang mamulaklak
sa puso kong ginawang busilak
at ang bango mo'y humahalimuyak
at kitang dalawa'y hahalakhak

o, pag-ibig, sa iyong paghakbang
sa ibang dako, maging sa ilang
sana'y huwag mo akong iiwan
pagkat yao'y aking kamatayan

kung ako ay iyong lilimutin
para akong tinulak sa bangin
tuluyang maglalaho sa hangin
kaya sana ako'y iyong dinggin

Ang Ginarapal

ANG GINARAPAL

ni Gregorio V. Bituin Jr.

8 pantig bawat taludtod

i.

may isang dilag na basal

ang ninakawan ng dangal

natagpuang hinihingal

takot na takot at pagal

katawan ay nangangatal

at siya pa'y nagduduwal

ii.

buong bayan ay nagimbal

lahat ay napatigagal

yaon namang mag-aaral

na kasuyo niyang mahal

ay napoot sa karibal

sa gawang karumal-dumal

iii.

sa isip ng mag-aaral

di napagtanggol ang mahal

kung siya na'y nagpakasal

ay di sana ginarapal

ang kaylaon nang minahal

ngunit siya ay kaybagal

iv.

pasiya ng mag-aaral

ipaghiganti ang mahal

at ang may sala'y masakal

ay, hinasa na ang punyal

nasang buhay ay mapigtal

ng nanggahasang karibal

v.

sa gawa nilang garapal

at sa mga krimeng brutal

ay di sapat ang pagbuntal

o paglatigo sa hangal

dapat ibigay na aral

ay ipiit ang pusakal

vi.

ang balita'y parang ritwal

naulit ang gawang hangal

hustisya sana'y iluwal

at bigla'y aking nausal:

sana'y di magpatiwakal

ang dilag na minamahal

Pagbabaka-sakali kay Kongresman

PAGBABAKA-SAKALI KAY KONGRESMAN
ni Matang Apoy
10 pantig

Wala kang pakialam sa dukha
Lalo na sa mga maralita
Dulot mo'y pulos dusa at luha
Kongresman, dapat ka lang isumpa.

Gutom pa ba bituka mong halang
Kaya ginagawa'y panlilinlang
Nais mo yatang kami'y lumutang
Sa dagat ng dugo't kahirapan.

Buong taon ay iyung iyo na
Habang sa masa ang pagdurusa
Dapat bang ikaw ay pagbigyan pa?
Dapat sa'yo'y ibagsak ng masa!

Sa yaman, masyado kang matakaw
Pagkain mo'y tila di matunaw
Maari bang kahit isang araw
Saluhan mo kami sa nilugaw.

Ikaw muna'y aming pagbibigyan
At sana kahit isang araw lang
Ipakita mo sa buong bayan
Ay kabutihan ng sambayanan.

Kahit isang araw lang, kongresman
Itigil mo ang pagkagahaman
Itigil na rin ang kurakutan
Itigil din pati karahasan.

Kung hindi'y ibabagsak ka namin
Sa bansa'y di ka paaalisin
Dapat sa tulad mo'y latiguhin
At ikaw'y tuluyan nang sumpain.

Suntok sa Buwan

SUNTOK SA BUWAN
ni Gregorio V. Bituin Jr.
10 pantig

paano susuntukin ang buwan
kung ikaw’y palambot-lambot naman

nais mo bang mawalang tuluyan
ang angkin niyang kaliwanagan

paano kung gantihan ka niyan
masasaktan payat mong katawan

at pag nadale ka na sa tiyan
aaga yaong gabing karimlan

kung nais mong siya’y mapuruhan
dapat mo lang siyang paghandaan

nang galit mo sa mundo’y maibsan
ngunit bakit dinamay ang buwan

ay, ano nga ba ang katuturan
pag pinagsusuntok mo ang buwan

ikaw ba nama’y masisiyahan
at sa puso’y may kapayapaan

o iyan ay isang kahangalan
ng utak na minsa’y nadirimlan

a, pagmasdan mo na lang ang buwan
nang kanyang ganda’y mapanagimpan

Ang Bumangga sa Manggagawa

ANG BUMANGGA SA MANGGAGAWA
tanaga
ni Greg Bituin Jr.

ang sinumang bumangga
sa uring manggagawa
ay tiyak magigiba
at tuluyang luluha

(tanaga - taal na tulang tagalog, binubuo ng apat na taludtod at may pitong pantig sa bawat taludtod)

Sa Pangulong Kuhila

SA PANGULONG KUHILA
7 pantig bawat taludtod
ni Greg Bituin Jr.

sa pangulong kuhila
sadyang walang napala
ang mga maralita
sa kanyang pinanata

bahay nati'y giniba
buhay nati'y lumubha
hirap nati'y humaba
luha nati'y bumaha

wala siyang nagawa
sa tulad nating dukha
nakatira sa lungga
mahirap pa sa daga

di dapat maniwala
sa pangulong kuhila
ang dulot niya'y luha
sa ating mga dukha

pangako na'y sinira
di nagpapakumbaba
halina at maghanda
ibagsak ang kuhila

(kuhila - matandang tagalog sa palamara, sukab, lilo, imbi o taksil, ginamit ni Balagtas sa kanyang Florante at Laura laban sa mga prayleng kuhila)

Sa Pagdalo sa Kamayan

SA PAGDALO SA KAMAYAN
ni Greg Bituin Jr.
14 pantig

maraming salamat sa mabuting nilalayon
ng kalatas na itong hatid sa aming nayon
sa inyong tinakdang pulong ako'y paroroon
matamang makikinig, di para maglimayon

basta't sa ikabubuti nitong kalikasan
at sa ikagaganda nitong kapaligiran
akong simpleng makata'y inyong pakaasahan
taos na tutulong sa abot ng kakayahan

kaya nga't magkita-kita tayo sa Kamayan
magbahaginan at matuto sa talakayan
upang makapag-ambag tayo kahit munti man
sa ikabubuti ng kalikasan at bayan

aasahan naming tayo'y magkikita doon
upang magkaisa sa napakagandang layon

(ang tulang ito'y tugon sa isang paanyayang dumalo sa talakayang pangkalikasan sa Kamayan-Edsa tuwing ikatlong Biyernes bawat buwan mula pa Marso 1990, dinadaluhan ko na ito mula 1997, gayunman ginawan ko ito ng tula para sa nag-anyaya)

Ang Uwak at ang Trapo

ANG UWAK AT ANG TRAPO
tula ni Greg Bituin Jr.
9 pantig

Uwak lamang ang tumatawag
Sa sarili niyang pangalan

Kapara nitong mga trapo
Na bukambibig lagi'y "Ako"

"Ako ang nagpagawa niyan
Ako rin ang nagpondo riyan

Sa akin ang ganyang proyekto
Iyon nama'y pinagawa ko

Pinasemento ko ang daan
Pati na iyang basketbulan

Dahil ako nga'y makatao
Dapat ako'y inyong iboto!"

Siya ba'y talagang seryoso
Na makapaglingkod sa tao?

Tingin sa maralita'y boto
Tingin sa serbisyo'y negosyo

Pag nasa pwesto na't hinanap
Aba'y di agad mahagilap

Istorbo ang tingin sa masa
Pag nilapitan sa problema

Siya ba'y sadyang mapagpanggap?
Pag halalan lang lumilingap?

Pulos "Ako" ang maririnig
Tila uwak ay dinadaig

Kapwa parehong sinasambit
Ngalan nila sa lumalapit

"Uwak, uwak," sabi ng isa
"Ako, ako," anang isa pa.

(binagong bersyon ng nauna kong tulang pinamagatang "Uwak at Pulitiko")

Ang Dinoktor Mo...

ANG DINOKTOR MO... ni Greg Bituin Jr. 11 pantig
maraming nagpapagawa sa iyo hinahanap ka ng maraming tao pinagagawa'y pekeng dokumento bakasakaling magkakatrabaho
ako sa iyo'y napapasimangot pagkat ikaw lagi'y nambuburaot pagkat hindi ka pala manggagamot doktor ka pala ng mga kurakot
marami na pala ang dinoktor mo na sari-saring mga dokumento pawang papel na di naman totoo at kaylaki pa ng bayad sa iyo
dinoktor mo ang mga dokumento dinoktor mo pati pirma ng tao dinoktor mo rin pati sertipiko o, kaydami na nga ng dinoktor mo
sa pamemeke ka pala yumayaman payag ka't galing mo'y binabayaran gayong marami kang pahihirapan niloloko mo na ang mamamayan
ang pamemeke mo'y gawaing halang kaya dapat itigil mo na iyan at baka mabali ang iyong tadyang ng galit ng nilokong mamamayan
siguradong ikaw din ay babagsak pagkat marami kang pinapahamak pag nahuli'y kalaboso kang tiyak at doo'y magsisisi ka't iiyak

Ang Buhay Ko'y Ikaw

ANG BUHAY KO'Y IKAW
ni Matang Apoy

ang buhay ko'y ikaw, ikaw ang aking buhay
kayganda ng talatang nakagigising ng malay
nawa'y minamahal ko'y di sa akin mawalay
dahil baka iyon ang akin nang ikamatay

ikaw ang aking buhay, ang buhay ko'y ikaw
minsan, mahal, nais kitang makaulayaw
kahit pa sa gitna ng gabing mapanglaw
sa saliw ng musika'y akin kitang isasayaw

ang buhay ko'y ikaw, ikaw ang aking buhay
nawa ang pag-iibigan nati'y tunay at lantay
malagutan man ng hininga't tuluyang mamatay
pagkat tanging ikaw lamang itong aking buhay