Pagtatanim sa paso

PAGTATANIM SA PASO

nakakatuwang masdan ang luntiang kalunsuran

kung paanong tayo animo'y nasa kagubatan

mapuno, mahangin, maraming tanim na halaman

na sa pakiramdam ay talagang nakagagaan

kaya magtanim-tanim kahit sa mumunting paso

diligan araw at gabi nang may buong pagsuyo

alagaan ang mga tanim nang walang pagsuko

bakasakaling mamunga pag ito'y napalago

kung di man mamunga ang halaman ay pwede na rin

kung makakasagap ka naman ng sariwang hangin

kung polusyon sa paligid ay maiwasan natin

kung kaaya-aya rin ito sa ating paningin

tunay ngang ang kalikasan ay kadikit ng pusod

magandang halimbawa ang lunting nakalulugod

kaya urban farming sa bawat isa'y itaguyod

halina't magtanim-tanim din kahit nasa lungsod

- gregoriovbituinjr.

07.12.2021

Paminggalang bayan

PAMINGGALANG BAYAN

salamat po sa Maginhawa community pantry

at kay Patreng na nagsimula nito't nagsisilbi

sa nangyayaring bayanihan ay kayraming saksi

tila ba ito'y apoy nang sa mitsa'y may magsindi

dahil nga kulang ang ayuda ng pamahalaan

di sapat para sa nagugutom na mamamayan

kaya sinimulan ni Patreng ay kadakilaan

lalo't bayanihan ay nakita ng daigdigan

salamat sa paminggalang bayan ng Maginhawa

dahil kahit papaano'y nakatulong sa dukha

lalo na sa walang makaing pamilyang dalita

na gigising sa umaga at pipilang kayhaba

kung sakaling walang laman ang paminggalang bayan

di ibig sabihin, nagsawa na sa bayanihan

baka naubos agad ang anumang nakayanan

at di pa matiyak ang handog sa kinabukasan

gayunman, sa nagsusulputang community pantry

dahil "inspired by Maginhawa community pantry"

kami'y saludo sa inyo, tunay kayong bayani

puso'y di pansarili kundi sa kapwa'y nagsilbi

- gregoriovbituinjr.

Ang edukasyon, ayon kay Einstein

ANG EDUKASYON, AYON KAY EINSTEIN

"Education is not the learning of facts, 

but the training of mind to think." 

~ Albert Einstein

nakita ko lang sa dingding ang nasabing kwotasyon

hinggil sa edukasyon na nakapaskil lang doon

sa daycare center na lunsaran nitong edukasyon

kayganda kaya kinunan ko ng litrato iyon

di lang iyon pagkabisado ng mga detalye

kung anong petsa't saan isinilang ang bayani

kung sino ang ikalabing-anim na presidente

kundi kung paano't bakit ng mga pangyayari

edukasyon ay pagsasanay paano mag-isip

magsuri ng kalagayan kaya huwag mainip

binubuksan ang mundo mo ng bagong malilirip

baka may mga paksang interesado kang mahagip

tulad din ng mga aralin sa matematika

tinuturuan tayo kung paano ba magkwenta

lalo sa usapin ng pera, malulugi ka ba

o sa negosyo mong pinasok, ikaw ba'y kikita

bakit nga ba tinuturuan tayong magmano

sa ating mga matatanda tanda ng respeto

bakit binabasa ang kasaysayan ng bansa mo

bakit sinusuri ang pulitika't pulitiko

inaaral natin anong magagamit sa buhay

di lang magkabisa ng detalye kundi magnilay

magamit sa trabaho't pamilya ang angking husay

edukasyong dala-dala natin hanggang mamatay

- gregoriovbituinjr.

- litratong kuha ng makatang gala sa Day Care Center sa ZOTO Towerville sa Bulacan

Sa batuhan

SA BATUHAN

nakatapak lang ako roon sa batuhang marmol

at sinusuri sa isip ang bawat kong nagugol

habang pinagmamasdan ang buhat nilang palakol

nang mga kahoy na iyon ay mapagputol-putol

nagmumuni-muni habang doon ay nakatayo

inaalagata ang nararanasang siphayo

dahil mga pangarap ay nagbabantang gumuho

nagsusuri paanong di ito sadyang maglaho

nakatitig sa inaapakan, nakatitig lang

mamaya'y titingala sa bughaw na kalangitan

kung anu-anong apuhap sa agiw ng isipan

habang paruparo sa hardin ay nag-iindakan

naririyan pa rin ang paralumang minumutya

tunay na inspirasyon sa aking bawat pagkatha

ang musa ng panitik na lambana ko't diwata

na pagsinta'y pagpapaubaya't pagpaparaya

- gregoriovbituinjr.

Danas

tila nakasiksik sa waring pigil na damdamin

ang mga nakabaong tinik ng alalahanin

habang ang di magagap sa gunita'y sinisinsin

ngunit di malimot ang mga karanasang angkin

di matingkala kung paano harapin ang unos

ng buhay na iwing nangangarap ding makaraos

patuloy ang pulong, magsasaing pa pagkatapos

habang walang iuulam sa panahong hikahos

kaya dapat mabatid ang kakaharaping sigwa

upang di maunahan pag tuluyang nagsagupa

kahit naririnig ang munting impit ng pagluha

sa mga kalagayang madalas di matingkala

anuman ang mangyari'y pipiliting makaahon

di hahayaan ang sitwasyong parang nakakahon

kuko man ng ibong madaragit ay nakabaon

pipiliting pumiglas at lalaban din paglaon

- gregoriovbituinjr.

Pagpupugay kay Kasamang Sammy Gamboa

PAGPUPUGAY KAY KASAMANG SAMMY GAMBOA

Pagpupugay sa iyo, kasamang Sammy Gamboa

Katawan mo'y nawala, ngunit diwa'y narito pa

Marami kang binahagi tungkol sa ekonomya

Nakasama sa mga rali at pakikibaka

"Freedom from illegitimate debts!" nga'y iyong hiniyaw

"Comprehensive audit of all public debts" pa'y sinigaw

Sa press statements at balita, ngalan mo'y lumitaw

Mga pagsusuri sa utang ay napakalinaw

Ilang beses ka ring bumili ng gawa kong libro

Na pawang inilathala ng Aklatang Obrero

Aklat ng mga sanaysay, serye ng librong MASO

Bumili't sumuporta sa mga tulang nilibro

Pareho tayong secgen ng ating organisasyon

Magaling kang secgen ng Freedom from Debt Coalition

Di ko malilimutan ang mga payo mo noon

Sa KPML at Ex-D'y ginagamit ko ngayon

Mga tindig sa isyu'y pinag-aralan mong husay

At sa tungkuling hawak ay nagsipag at nagsikhay

Sa iyo, Ka Sammy, taas-kamaong pagpupugay

Taospusong pasasalamat! Mabuhay! Mabuhay!

- gregoriovbituinjr.

(Alay para sa Luksang Parangal ng Hunyo 10, 2021)

Kapayapaan

KAPAYAPAAN

kapayapaan ba'y ano? bakit ito'y hangad mo?

bakit pag wala nito'y nagpapatayan ang tao?

sa kabila ng kaibhan ng kultura't prinsipyo

bakit kapayapaan ay kailangan ng mundo?

lahat tayo'y tiyak ang hangad ay kapayapaan

lalo na't ibang iba ito sa katahimikan

ang kapayapaan ay tagos sa puso't isipan

habang ang katahimikan ay hanggang tainga lamang

iba ang PEACE sa SILENCE, ika nga sa wikang Ingles

kaya kapayapaan sa mundo ang ating nais

di ang katahimikang may takot pa rin sa dibdib

di ang patahimikin lang tayo't mata'y may takip

payapa na ba ang bayan pag nawala ang salot?

o patuloy ang digma dahil sa tuso't kilabot?

O, kapayapaan, ginhawa ba ang iyong dulot?

dahil nga ba sa iyo'y mawawala na ang takot?

marahil tutungo lang tayo sa kapayapaan

kung wala nang mga uri sa buong sambayanan

sa kabila ng kulay ng balat, nagbibigayan

kung natayo na ang isang makataong lipunan

- gregoriovbituinjr.

Halaan

HALAAN

muli akong nag-ulam ng paboritong halaan

binibili namin ni Itay noong kabataan

matapos mag-jogging sa Manila Bay, pagpawisan

lalo't araw ng Linggo't nagrerelaks-relaks naman

may nagtitinda kasi ng halaan sa aplaya

ng Maynila o Manila Bay, kaysarap talaga

ng halaan, anila'y pampatibay ng tuhod pa

makakaiwas daw sa megaloblastic anemia

marami itong benepisyo, ayon sa eksperto

bukod sa binibigay sa inang nagpapasuso

sa sakit sa puso'y makakaiwas pa raw tayo

dahil may omega-3 fatty acids nga raw ito

hinigop ko ang sabaw ng halaan dahil na rin

upang maibsan ang aking nararanasang migraine

panlaban sa fatty liver disease dahil sa choline

para sa malusog na isip ay may riboflavin

aba'y sa palengke'y natsambahan ko lamang ito

at agad akong bumili ng kalahating kilo

nang tikman muli ang halaan ng kabataan ko

naiwasan na ang thyroid, pampalusog pa ito

- gregoriovbituinjr.

* litratong kuha ng makatang gala

Pinaghalawan ng ilang datos: 

https://ph.theasianparent.com/halaan-soup

Sa lababo

SA LABABO

ani Inay, dapat laging malinis ang lababo

dahil diyan natin nililinis ang mga plato

at hinuhugasan ang ating ininumang baso

anya pa, huwag itong hayaang maging barado

mga bilin ni Inay noong aking kabataan

na tinatandaan ko hanggang sa kasalukuyan

ang lababong marumi'y imahe ng kapangitan

is-isin ang paligid, dumi'y tanggaling tuluyan

kanina'y nilinis ko ang lababong anong dumi

nilinis dahil agad napansin, barado kasi

sinundot-sundot hanggang lumuwag ito't bumuti

matagal din, tila bumarang dumi'y anong dami

buti na lang, natuto sa mga aral ni Inay

pati nga paglalaba'y nagagampanan kong husay

tandaan lang, lababo'y laging lilinising tunay

dahil pag nagbara muli'y sadyang di mapalagay

- gregoriovbituinjr.

Ilang pagtanaw

ILANG PAGTANAW

madalas tinutugis ng mga alalahanin

at nakakalimutan na rin pati ang pagkain

lagi na lang paanong gagawin sa suliranin

paanong makakahingang maluwag ang damdamin

masalimuot man bawat tinatahak na daan

subalit sasagi rin sa isip ang kalutasan

habang pinagmamasdan ang bughaw na kalangitan

o kaya'y nakatanaw sa bughaw na karagatan

buga ng usok, naglulutangang plastik sa ilog

mga maralitang di alam paano mabusog

paghahanda sa unos nang kumidlat at kumulog

nang mahulog sa higaan at sa sahig nauntog

matapang na anak ng bayan ang kasalamuha

na pagkagising ko'y tinatanggal agad ang muta

naaalala ang dinanas noong pagkabata

habang humahakbang na kasama ang manggagawa

- gregoriovbituinjr.

Manhik-manaog

MANHIK-MANAOG

noon, lagi akong manhik-manaog sa hagdanan

tila turumpong di mapakali sa kinalagyan

akyat-baba ang ehersisyo noong kabataan

at gayon din ang asal sa loob ng paaralan

subalit minsan ay nadulas, tumama ang ulo

sa kanto ng hagdan at nagkasugat ngang totoo

sa pagitan ng kaliwang kilay at ng mata ko

pababa kasi ng hagdan ay mabilis ang takbo

di ko na tanda kung tinahi ba ang aking sugat

paalala sa kalikutan ang natamong pilat

lumipas ang panahon, sa hagdan na'y nag-iingat

lalo't nagmamanhik-manaog pa ring walang puknat

matayog mang pangarap, pagsisikapang akyatin

subalit maingat na akyat-baba ang gagawin

tapik lamang sa balikat ay sapat na sa akin

upang sumigla tungo sa pagkamit ng layunin

di lang parang gulong ang buhay kundi parang hagdan

di lang paikot-ikot, manhik-manaog din naman

mahalaga'y nagpapakatao't nasa katwiran

upang nadaramang kirot sa dibdib ay maibsan

- gregoriovbituinjr.

Sa ikatlong anibersaryo ng aming kasal

gaano man karami ang problemang dinaanan

at gaano man katindi ang bawat karanasan

naririto pa rin tayong matatag ang samahan

magkalayo man, magkalapit ang puso't isipan

pagpupugay sa ating ikatlong anibersaryo

kahit na dumaan pa ang samutsaring delubyo

magkatalingpuso sa mga usapin at isyu

lalo na sa kalikasang dapat ay protektado

sinusulong nang magkatuwang yaring adhikain

para sa buti ng kapwa't marangal na layunin

tulong-tulong upang kinabukasa'y paunlarin

walang iwanan, puso'y patuloy na bibigkisin

daghang salamat sa aking diwata, tanging mutya

at patuloy nating gagawin ang ating panata

- gregoriovbituinjr.

07.07.2021

Sa pagtatanim ng mabuting binhi

SA PAGTATANIM NG MABUTING BINHI

itanim din natin ang makabubuti sa budhi

habang pagpapakatao ay pinapanatili

itatanim natin ay pulos mabubuting binhi

upang mawakasan ang panahon ng mga imbi

at bubungkalin natin ang lupa ng kawalan

upang itanim ay pawang binhi ng kabuluhan

araw-gabing didiligan kung kinakailangan

upang magkasanga't magkaroon ng katuturan

mga sanga'y hahaba, tutubo ang mga dahon

magiging bunga ba'y mapakla o masarap iyon

marahil, depende sa mga ginagawang aksyon

kung maganda ang patutunguhan ng nilalayon

hanggang dumating na ang panahon ng pamimitas

dito na malalaman kung tama ang nilalandas

- gregoriovbituinjr.

Aya, Laya, Ilaya

AYA, LAYA, ILAYA

sumusukob man ang alalahanin sa gunita

nagbabadya man ang unos na dahilan ng baha

ngitngit man ng kalikasan ay riyang nagbabanta

mga palaisipan ay malulutas ding pawa

kaaya-aya ang umaga't pakuya-kuyakoy

habang sa ilaya, magsasaka'y nagpapatuloy

laya'y pangarap ng mga bilanggong nananaghoy

tulad ng paglipad sa langit ng malaking banoy

kinalulugdan kong magsagot ng palaisipan

lalo sa mga panahong nadarama'y kawalan

tititig sa kisameng hagilap ay kasagutan

tititig sa pahina ng salita't katitikan

patuloy sa pagsulat ang nangingimay na kamay

tungo sa mga saknong at katagang binabaybay

palaisipan ang kaharap habang nagsisikhay

at makatapos sa napakalayong paglalakbay

- gregoriovbituinjr.

Pagdalumat

PAGDALUMAT

binabasa ko ang samutsaring paksa't dahilan

lalo't mga lihim ng daigdig o kalikasan

pagbakasakaling mabatid ang di karaniwan

upang gawin ang marapat ng walang alinlangan

patungkol sa mga isyung kaygandang dalumatin

na kung pahihintulutan ay iisa-isahin

tulad ng sandaang asong bayaning itinuring

at limandaang bantog na taong dapat kilanlin

dapat lang madalumat ang anumang kasawian

tulad ng pag-unawa sa ramdam na kasiyahan

nababatid mo ba ang kanilang kabayanihan

kung ipagwawalambahala ang kasalukuyan

nais kong makasama ang mutya sa panaginip

upang magkahawak-kamay na mundo'y nililirip

baka maraming boluntaryo ang aming mahagip

upang sa kalikasan ay tumulong sa pagsagip

kung anong nararapat, kaibigan, ay turan mo

upang makapaghanda sa parating na delubyo

kung may libreng oras ka'y magbasa-basa ng libro

at baka mabatid paano tayo sasaklolo

- gregoriovbituinjr.

Naisusulat ko na sa gatla

NAISUSULAT KO NA SA GATLA

naisusulat ko na sa gatla

kung ano ang nasa puso't diwa

ganito yata ang tumatanda

mga danas na'y bakas sa mukha

pagtanda'y di na maiiwasan

lalo't dumarami na ang uban

gatla sa noo'y naglalabasan

tanda bang tumalas ang isipan?

kalahating siglo na'y palapit

o kalahating siglo mang higit

ang mahalaga'y di nagigipit

pag sa edad na ito'y sumapit

masdan ang gatla't nakasisilaw

kislap ng pag-asa'y matatanaw

datapwat ang talagang malinaw

matandang hukluban ang lumitaw

sa bawat gatla na'y nakabakat

ang mga pinagdaanang sukat

bawat saknong ay nagdudumilat

bawat taludtod ay kabalikat

tatanda rin ako't maglalaho

ay di mapapawi ang pagsuyo

tanging hiling ko lamang sa mundo

ang pangarap sana'y di gumuho

- gregoriovbituinjr.

Kung magkasakit at mamatay

KUNG MAGKASAKIT AT MAMATAY

nawa'y sa tahanan lang ako makapagpagaling

kaysa ospital na pambayad ay tumataginting

kahit baryang pilak pa ang perang kumakalansing

mahal na presyo ng kalusuga'y nakakapraning

baka mas mura pa ang ataul kung mamamatay

lalo na't ngayong may pandemya'y aking naninilay

baka mas mura ang kremasyon o sunuging tunay

may tunggalian ng uri kahit na sa paghimlay

sa sementeryo'y may apartment pa ngang patung-patong

mura lang daw ang upa ng lagakan ng kabaong

habang ang mga mayayaman ay may maosoleum

sa kamatayan man, magkakaiba rin ang hantong

sa susunod na henerasyon ba'y anong pamana

kundi sa kinathang tula'y pawang himutok lang ba

ako'y nabubuhay ngayong nagsisilbi sa masa

tulad ng iba pag namatay, malilimutan na

ah, basta masaya akong magsilbi, naglilingkod

sa uring manggagawa't dukhang itinataguyod

na kahit sa sangkatutak na isyu'y nalulunod

prinsipyo'y ipaglalaban kahit nakakapagod

itatayo ang asam na lipunang makatao

kasama ang kapwa maralita't uring obrero

kahit na ang pagkilos na ito'y ikamatay ko

ipagmamalaki kong ang ginagawa ko'y wasto

- gregoriovbituinjr.

Minsan sa pagbibidyoke

MINSAN SA PAGBIBIDYOKE

mga kasama'y naroong nagbibidyoke minsan

nagpakain ang isang kasamang may kaarawan

matapos iyon ng pulong nang sila'y magkantahan

at inaya akong kumanta, aking tinanggihan

ngunit noon ay malakas ang loob kong kumanta

basta nakahawak ng mikropono ay lalarga

subalit nang si misis ang pagkanta ko'y napuna

na boses ko'y galing sa ilong, ako'y tumigil na

hanggang ngayon, di na ako kumanta sa bidyoke

tila baga ang pagkanta ko'y isa nang bagahe

pag narinig ng iba, nadarama ko'y diyahe

nakakahiya na sa sinumang makasasaksi

di naman ako matampuhin, inisip ko pa rin

ang kawastuhan ng pagpuna ni misis sa akin

baka nagkakalat lang pala ako'y di ko pansin

baka tingin nila ako'y magalit pag punahin

kaya sa mga inuman, di ako mapaawit

kahit lasing na'y nakikinig na lang sa pagbirit

mas sa pagkatha na lang ako nagkonsentrang pilit

at baka dito'y mas may silbi ako't walang sabit

buti na lang, nila-like ni misis ang aking tula

kahit siya lang ang madalas nagla-like sa katha

na kung di siya mag-like, bigo akong manunula

at di na nararapat tawaging isang makata

- gregoriovbituinjr.

Sa ikalimang taon ng pagpaslang kay Gloria Capitan

SA IKALIMANG TAON NG PAGPASLANG KAY GLORIA CAPITAN

ah, limang taon na pala yaong nakararaan

nang pinaslang ang magiting na si Gloria Capitan

na kampanyador laban sa coal mining sa Bataan

tunay na human rights defender nitong sambayanan

sa lugar niya sa Bataan, sa nayong Lucanin

nang binaril ng dalawang di-kilalang salarin

ito'y mensahe upang mamamayan ay takutin

lalo't lumalaban sa mapaminsalang coal mining

sa unang araw ng pag-upo ng Ama ng Tokhang

ay naging madugo't si Ka Gloria ay tumimbuwang

siya ang una sa sunod-sunod na pamamaslang

due process o wastong proseso'y di na iginalang

kalikasan ay nararapat nating ipagtanggol

upang mabuting hangin ay di natin hinahabol

hustisya kay Gloria Capitan! kasamang tumutol

laban sa coal mining, coal stockpiles, mga plantang coal

taaskamaong pagsaludo ang tangi kong handog

tangan niyang prinsipyo'y akin ding iniluluhog

tama na ang mga coal plants, bayan na'y lumulubog

epekto nito sa kalusuga'y nakadudurog

- gregoriovbituinjr.

07.01.2021

* mga litrato mula sa google

Mga pinaghalawan:

https://www.frontlinedefenders.org/en/case/case-history-gloria-capitan

https://www.greenpeace.org/philippines/press/1057/greenpeace-statement-on-the-murder-of-gloria-capitan-anti-coal-activist-in-bataan/

https://www.fidh.org/en/issues/human-rights-defenders/the-philippines-assassination-of-ms-gloria-capitan

https://www.euronews.com/green/2021/02/22/killed-for-campaigning-meet-the-women-fighting-the-coal-giants

Minsan, sa MRT

MINSAN, SA MRT

naroong nagninilay habang lulan ng MRT

at nasaksihan ang labanan ng mga bagani

upang mapalaya yaong bayan sa mga imbi

pingkian ng mga kampilan ay nakaririndi

biglang nagising ang diwa sa pagbukas ng pinto

sa isang istasyon ngunit tila ako'y naglaho

muling nakita'y mga baganing nakipagbuno

sa mga mananakop na sadya ring matipuno

nagsara ang pinto ng tren, lagusan ay lumitaw

patungo sa Hogwart na sa isang sine'y natanaw

doon ay may mga dambuhalang nambubulahaw

habang katana'y tangan ko panlaban sa halimaw

hanggang napamulagat ako't nadamang tumigil

ang sinasakyan habang palad ay pinisil-pisil

dapat nang lumabas habang ang tren pa'y nakahimpil

natantong ibang mundo ang sa diwa'y umukilkil

- gregoriovbituinjr.

07.01.2021

Sa unang araw ng Hulyo

SA UNANG ARAW NG HULYO

unang araw ng Hulyo, kaygandang ngiti'y bumungad

kaya saya'y nadama sa umagang bumukadkad

pampasigla upang gawin ang tungkulin at hangad

habang ibong nag-aawitan sa langit lumipad

ano pa bang masasabi sa ngiting anong tamis

sa unang araw ng Hulyo, dalawa'y magbibigkis

sa hirap at ginhawa, panahon man ay kaybilis

anumang suliranin, haharapin, natitiis

taospusong pasasalamat sa bagong umaga

at sinalubong ng ngiting sa puso'y nagpasaya

pampaalwan sa dinaranas mang hirap at dusa

ngiting anong tamis na inspirasyon sa tuwina

- gregoriovbituinjr.

07.01.2021

Kaplastikan

KAPLASTIKAN

pulos kaplastikan na sa ating kapaligiran

pulos plastik at upos sa dagat naglulutangan

sadyang kalunos-lunos na ang ganyang kalagayan

at ngayon ay bansa ng plastik tayong naturingan

sa isang editoryal nga'y Plastic Nation ang tawag

sa ating bansang may ilan pang gubat na madawag

kayrami raw nating, oo, nating basurang ambag

na tila sa ulat na ito'y di tayo matinag

ang nabanggit bang editoryal ay nakakahiya

na dahil sa plastik, tila ba tayo'y isinumpa

anong gagawin ng bansa upang ito'y mawala

aba'y magtulungan at magbayanihan ang madla

kayrami mang nagawa, di sapat ang Ocean Cleanup

paano bang kalinisan ng ilog ay maganap

ang Ilog Pasig, tingnan mo anong kanyang nalasap

habang tayo'y abalang kamtin ang abang pangarap

pulos plastik, pulos kaplastikan na ang paligid

pulos microplastic sa dagat pag iyong sinisid

ano bang dapat nating gawin, turan mo, kapatid

bago pa kaplastikan sa dilim tayo ibulid

- gregoriovbituinjr.

06.30.2021

* litrato mula sa Editoryal ng pahayagang Inquirer, petsang Hunyo 20, 2021

Magulong kapaligiran

MAGULONG KAPALIGIRAN

parang gulong ang buhay sa samutsaring dinanas

paikot-ikot, pasikot-sikot, pare-parehas

ramdam mong masalimuot ang bawat nilalandas

nilulutas ang mga suliraning di malutas

mula sa puno'y naglalagasan ang mga dahon

nakabitiw sa mga sanga't di na makaahon

sadyang ganito ba ang kalakarang parang kahon

isinilang, naging tao, mamamatay paglaon

subalit sa pagitan ng buhay at kamatayan

ay makadarama ng pag-ibig at kabiguan

ng kasiyahan, ng kapaitan, ng kalungkutan

di matakasan ang magulong kapaligiran

sa patutunguhan mo nga'y dadalhin ka ng gulong

nakabisikleta man o nakaawto'y susuong

sa balak puntahan, pangarap, saanman humantong

basta matumbok ang dinulot ng sariling dunong

- gregoriovbituinjr.

06.30.2021

* litratong kuha ng makatang gala sa Bantayog ng mga Bayani, Lungsod Quezon

Pritong isda

PRITONG ISDA

tila isdang galit pag tumingin

sa mesa'y naroong nakahain

kitang sunog nang ito'y hanguin

sa kawaling talagang nangitim

napabayaan ba ng makata

ang pagpiprito niyang kaysigla

o kung saan-saan natunganga

nagluluto'y may ibang ginawa

sapat lang sana ang pagkaluto

upang sarap nito'y di maglaho

nasunog, lumutong, at sumubo

kumain pa rin ng may pagsuyo

sumarap din dahil sa kamatis

na sadyang sa mukha'y pampakinis

na pampaganda rin nitong kutis

kunswelo sa mamang mapagtiis

tara, halina't mananghalian

o kaya'y ulamin sa hapunan

huwag paabutin ng agahan

aba'y kayhirap nang mapanisan

- gregoriovbituinjr.

06.30.2021

Ang bawat kong tula'y paglilingkod

ANG BAWAT KONG TULA'Y PAGLILINGKOD

para sa akin, ang bawat kong tula'y paglilingkod

tulad sa pagkaing anong sarap na nakatanghod

araw-gabing kumakain ng anong makalugod

araw-gabing magsalansan ng saknong at taludtod

tara, sa pananghalian nga'y saluhan mo ako

ating namnamin ang gulay, ang prito, ang adobo

tara, sa paggawa ng tula, ako'y sabayan mo

ating namnamin ang bukid, ang pitak, ang araro

may kasabihan nga, ang personal ay pulitikal

tulad ng pagkain at pagtulang gawaing banal

pagluluto't paglikha ang sa diwa'y nakakintal

mula sa sinapupunan ng wala'y maitanghal

ang bawat kong tula'y paglilingkod sa abang madla

sa kababaihan, kabataan, nagdaralita

ang bawat kong tula'y tulay sa uring manggagawa

mga tulang bubusog sa tiyan, puso n'yo't diwa

ako'y makata ng lumbay, sa inyo'y nangungusap

ako'y makata ng pag-ibig, na di kumukurap

ako'y makatang pulitikal, may pinapangarap

na lipunang makatao nawa'y matayong ganap

- gregoriovbituinjr.

06.29.2021

Kontra-baha sa Provident Village

KONTRA-BAHA SA PROVIDENT VILLAGE

isang magandang balitang makabagbag-damdamin

na huli man at magaling sana'y magawa pa rin

higit sampung taon nang nakaraan nang bahain

ang Provident Village na talagang lumubog man din

nanalasa ang ngitngit ng Ondoy, kaytinding bagyo

lumubog sa baha ang buong subdibisyong ito

dalawampung talampakan, abot anim na metro

higit limampung tao umano'y namatay dito

at naganap ang bangungot sa ikalawang beses

nang manalasa ang mas matinding bagyong Ulysses

nitong nakaraang taon lang, bagyo'y naninikis

muling lumubog ang Provident, sadyang labis-labis

buti't may gagawin ang lokal na pamahalaan

nang di na maulit ang bahang di mo makayanan

higit isangdaang metrong bakod, ito'y lalagyan

kung bumagyo't umapaw ang ilog ay may haharang

kaytagal hinintay ang ganitong inisyatiba

salamat sa alkalde ng Lungsod ng Marikina

at sana'y matatag ang bakod na gagawin nila

upang di maulit ang mga bangungot at dusa

- gregoriovbituinjr.

06.29.2021

Mga pinaghalawan ng datos:

https://news.abs-cbn.com/nation/09/28/09/78-dead-devastated-marikina

https://newsinfo.inquirer.net/1360021/like-ondoy-all-over-again

Hiyaw ng katarungan

HIYAW NG KATARUNGAN

binaril ng pulis na lasing ang isang matanda

aba, ito'y sadyang nakagigimbal na balita

bakit ba nangyari ang gayon, nakakatulala

matanda'y walang armas, pinaslang ng walanghiya!

ayon sa ulat, nag-iiba ang pulis pag lasing

kaibigan pa naman daw ng biktima ang praning

nagagalit, nabubuwang, mistulang may tililing

mga kaanak ng biktima, hustisya ang hiling

nakunan pala sa bidyo ang ginawang pagpaslang

lasing na ang suspek nang babae'y sinabunutan

tinutukan ng baril, sa leeg pinaputukan

ang ginawa ng parak ay walang kapatawaran

ang mga naulila'y humihiyaw ng hustisya

lalo't wala namang kalaban-laban ang biktima

tanong ko'y bakit ginawa ng pulis ang trahedya?

dahil ba pangulo'y sagot ang pandarahas nila?

libu-libong tinokhang nga ang nilibing na't sukat

kasama na ang matandang pinagtripan ng alat

ah, sana'y mahuli't maparusahan din ang parak

kung walang bidyo, baka biktima pa'y mabaligtad

- gregoriovbituinjr.

Mga pinaghalawan:

https://www.rappler.com/nation/cop-kills-woman-lilybeth-valdez-quezon-city-may-31-2021

https://www.gmanetwork.com/news/news/metro/789668/drunk-cop-allegedly-shoots-dead-52-year-old-woman-in-qc/story/

https://www.youtube.com/watch?v=XqM8HO0xqtw

Linisin ang Ilog Pasig

LINISIN ANG ILOG PASIG

di ligtas at marumi ang tubig sa Ilog Pasig

iyan ang sinambit ng marami't nakatutulig

pag naligo rito'y di lang basta mangangaligkig

pag nagkasakit ka pa'y sarili mo ang uusig

aba'y para kang naligo sa dagat ng basura

tulad ng trapong sa maraming lupa'y nanalasa

ang paglinis sa Ilog Pasig ba'y magagawa pa

marahil, kung magtulong tayong ito'y mapaganda

pulos basura, di naman basurahan ang ilog

kung anu-ano ang nakalutang at nakalubog

sa karumihan nga sa mundo ito'y napabantog

tayo'y walang magawa, sa puso'y nakadudurog

ngunit kailan pa ito malilinis, kailan

di lang basura kundi langis din ay naglutangan

mula pabrika't sasakyang pantubig na dumaan

di ito malilinis kung di ito sisimulan

halina't kumilos, bakasakaling may magawa

Ilog Pasig ay simbolo ng kultura ng bansa

walang malasakit sa ilog, sa tao pa kaya

ah, nais kong magboluntaryo't tumulong ng kusa

- gregoriovbituinjr.

Sakripisyo ng mga nanay

SAKRIPISYO NG MGA NANAY

sa community pantry mga ina'y pumipila

madaling araw na'y gising, pipila ng umaga

bakasakaling kahit kaunti'y may makukuha

upang pansagip sa gutom ng kanilang pamilya

sa panahon ng pandemya, pantry ay nagsulputan

dahil kay Patreng Non, na simbolo ng bayanihan

lumaganap ang "Magbigay ayon sa kakayahan"

pati na "Kumuha ayon sa pangangailangan"

dahil pandemya, mga ina'y lahat ay gagawin

at anumang hadlang o balakid ay hahawiin

antok man sa madaling araw ay sadyang gigising

malayo man ang community pantry'y lalakarin

ganyan ang sakripisyo ng mapagmahal na nanay

upang kanilang pamilya'y di magutom na tunay

ang pagbabayanihan ng kapwa'y buhay na buhay

taospusong pasalamat sa mga nagbibigay

- gregoriovbituinjr.

Dito sa kagubatan

DITO SA KAGUBATAN

kayraming puno sa kagubatan

na bunga'y pipitasin na lamang

mga hayop ay nagmamahalan

at bawat isa'y nagbibigayan

oo, di sila tulad ng tao

na kabig doon at kabig dito

serbisyo'y ginagawang negosyo

ginto ang nasa puso ng tuso

naglalaguan ang mga puno

sana mga ito'y di maglaho

ngunit kung puputlin ng maluho

ay mabebenta saanmang dako

gubat ma'y kunin ng manunulsol

upang gawing silya o ataul

lalabanan ang gintong palakol

kagubata'y dapat ipagtanggol

buhay man iwi yaong kapalit

tahanan itong dapat igiit

bahay ng hayop, ibon mang pipit

huwag hayaang sila'y magipit

ah, mabuti pa rito sa gubat

kasamang hayop ay matatapat

na bawat bunga'y para sa lahat

at walang basta nangungulimbat

mamitas lamang ng bungangkahoy

habang nagsasaya pati unggoy

na sa baging ay uugoy-ugoy

pagong ay sa sapa naglulunoy

mga pagkain dito'y sariwa

luntiang gubat na pinipita

mga hayop na sadyang malaya

ay nabubuhay nang mapayapa

- gregoriovbituinjr.

06.28.2021