Pagsalansan ng salita

kayraming mga salitang di basta maaninag

ang bola'y bilog, kaya ba binobola ang dilag?

tutungo ka bang nakatungo sa daang di hayag?

iyang pagtaklob ba sa taklobo ay may paglabag?

pag ako ba'y nagpatawa, ako ba'y patawa rin?

matutuwa ka ba kung ikaw ay patutuwarin?

pag ako ba'y nagkasala, ako na ba'y salarin?

ang pusa bang nangalmot ay pusakal kung tawagin?

iba ang tubo na pinanggalingan ng asukal

iba ang tubo na inasam ng nangangapital

iba ang tubo ng gripo, posonegro't imburnal

iba ang tubo ng tanim at punong matatagal

ang makata'y nag-iisip, kawa, kawal, kawali

kung sakaling maiinip, pala, palag, palagi

na sa puso'y halukipkip, saka, sakal, sakali

bawat tula'y makasagip, baha, bahag, bahagi

matatagpuan mo ba sa diwa ang haka't katha

nadarama ba ng puso mo ang halik ko't likha

minsan nga'y di mawaring tutula akong tulala

nagkakaganyan ba pagkat makatha ang makata

- gregoriovbituinjr.

Ang kaibhan ng poetry at poem

"...but it is only the study not of poetry but of poems, that can train our ear." - T. S. Eliot

- mula sa aklat na Selected Prose of T. s. Eliot, p.108

tanong: anong kaibahan ng poem at poetry?

masagot kaya ito ng makatang nagmumuni?

kay T. S. Eliot ay ito ang kanyang sinabi

na sa akin nama'y kariktang nakabibighani

poetry ba pag inalayan siya ng bulaklak?

pagkat sa kanyang kariktan ako'y napapalatak?

poem na ba pag tinulad ko siya sa bulaklak?

siya'y rosas na matinik ngunit iindak-indaK?

susuriin mo di lang ang katitikan ng tula

di lang paano ito isinulat ng makata

susuriin mo'y nakapaloob na talinghaga

paano tumagos sa puso yaring parikala

paano kung sa sariling wika ito isalin

ang poetry ay tula, at ang poem ay tula rin

minsan ang tula'y tulay upang mutya'y pasagutin

kaya tula'y kaysarap unawain at namnamin

- gregoriovbituinjr.

Huwag iwan sa isang bulsa ang selpon at pera

huwag iwan sa isang bulsa ang selpon at pera
aba ito'y napagtanto ko lang kani-kanina
paghugot ko ng selpon ang mga pera'y sumama
agad ko namang nakita kundi ito'y wala na

buti't sa gilid ng bangketa ako napaupo
nang binunot ko ang selpon na tila hapong-hapo
upang i-text si misis upang kami'y magkatagpo
at nakita nga ang pera nang biglang mapatungo

nasa isip kasi'y ang pariralang kinakatha
di namalayang pera sa bulsa'y muntik mawala
paano kung may tumawag at naglalakad na nga
nalaglag na ang pera't nakakuha'y tuwang-tuwa

sadyang nakapanghihinayang kung magkakagayon
pasya ko'y ihiwalay ng bulsa ang pera't selpon
marahil ito na'y isa sa tumpak kong desisyon
upang di ka naman mawalan ng pera paglaon

- gregoriovbituinjr.

Pagsusuot ng medyas kay misis

oo, kay misis ay ganyan akong magsilbing lubos
sinusuutan ko siya ng medyas at sapatos
tanda iyan ng pagmamahal, di pambubusabos
kusa kong ginawa, di man sinabi o inutos

oo, ganyan nga kung magtulungan kaming dalawa
lalo't siya ang may trabaho't may tangan ng pera
akong bahala sa gawaing bahay, paglalaba,
pagluluto, paglampaso, pagtapon ng basura

isa man akong dakilang lingkod sa aking misis
ayos lang lalo't malaki ang tiyan niyang buntis
baka pag nagsapatos siya, tiyan na'y umimpis
susuutan ko siyang kusa upang di mainis

ako ring magtatanggal ng sapatos niya't medyas
pag dumating na sa bahay pagkagaling sa labas
payak at kusangloob na pag-ibig ang katumbas
at di magmamaliw habang pinapanday ang bukas

- gregoriovbituinjr.

Pinakapahinga ko sa trabaho ang pagtula

pinakapahinga ko sa trabaho ang pagtula

sa maghapong paggawa'y pahinga na ang pagkatha

magninilay-nilay kahit na sa panahong putla

agad isinusulat anumang nasa gunita

minsan, maghapon ang pagpapako't pagmamartilyo

magdidilig, mga tanim ay inaasikaso

at minsan naman, maglaba, magluto't maglampaso

o kaya'y magsalin ng akdang naroon sa libro

habang trabaho'y ginagawa, ay may naninilay

ang ina'y nasa piitan, ang anak ay namatay

aktibista ang nanay na sa anak napawalay

dahil ba aktibista, ang hustisya na'y di pantay

pagpupugay doon sa nars na maganda'y ginawa

nagpaanak sa kalsada ng inang namumutla

di sila dapat makaligtaan sa bawat tula

tuloy muna ang trabaho't mamaya na kakatha

- gregoriovbituinjr.

Sa anino ng kahapon

nasa anino man ako nitong aking kahapon

ay lagi kong pinagbubutihan ang bawat ngayon

sinasabuhay ang angking prinsipyo't nilalayon

samutsaring paksa'y inaaral at sinusunson

gawin ang bawat ibig ng minumutyang diwata

kathain ang pagsintang nilalabanan ang sigwa

idarang pa natin sa apoy ang espadang katha

upang pumutol sa ulo ng gahamang kuhila

nagsisiksik pa rin sa bote ng sanlaksang plastik

nag-aalay sa diwata ng rosas na may tinik

habang tinatahak ang sangandaang anong tarik

at laman ng kalooban ay agad isatitik

oo, di ko makikita ang anino sa dilim

kundi doon sa liwanag na tumagos sa lilim

anino'y natanaw kong naroroong naninimdim

hanggang sa kami'y abutan ng bunying takipsilim

- gregoriovbituinjr.

Mga paksa sa pagkatha

paano nga bang kinakatha ang hibik ng puso

habang naninilay ang mga ugaling hunyango

at nanonokhang habang may pinunong kapit tuko

di lumpo ang panitik habang iba'y pinayuko

inaakdang buong tigib ang samutsaring paksa

sinasapuso ang bawat daing ng maralita

pinapaksa ang kasanggang hukbong mapagpalaya

at paglilingkod kasama ang uring manggagawa

matematika, astronomiya, pageekobrik

aktibo, aktibismo, tahakin man ay matinik

sistemang bulok, hustisyang panlipunan, paghibik

makata, tula, nasa loob ay sinasatitik

pluma ang gatilyo ng bawat paksang susulatin

nasa diwa'y punglong sa mapang-api'y patagusin

aklat, sakripisyo't danas ang kaluban kong angkin

layuning sistemang mapagsamantala'y kikitlin

pakikipagkapwa't pagpapakatao'y nilayon

na aking tinataguyod bilang dakilang misyon

upang iyang bulok na sistemang tunay na lason

ay durugin sa mga akda't mawala paglaon

- gregoriovbituinjr.

Patuloy na pagsulat

di tumitigil sa pagkatha ang makatang tibak

sa gitna man ng init, pawis ay tumatagaktak

sa gitna man ng lamig at nangangatal sa lambak

sa gitna man ng payapang sementeryong pinitak

patuloy ang pagkatha kahit mabulid sa dilim

itutula pati ulat na karima-rimarim

aakdain pati laman ng pusong naninimdim

kakatha't kukutyain ang gumagawa ng lagim

kanyang ibubulgar ang mga mapagsamantala

at patuloy na itutula ang hibik ng masa

imbis kiskisin ang kalawang upang mapaganda

ang gintong tanikala'y dapat itong lagutin na

hindi nahihimbing ang makata sa toreng garing

naroon siyang kasama ng dukhang dumadaing

sasamahan ang mga manggagawang magigiting 

upang bulok na sistema'y tuluyan nang malibing

- gregoriovbituinjr.

Suliranin at Pagbangon

sumisiklab ang poot

laban sa mapag-imbot,

tuso, buktot, kurakot,

na sa bayan nga'y salot

dukha'y namimilipit

sa sinturong kayhigpit

kaya siklab ng galit

kumakawalang pilit

puspos ng kahirapan

kawalang katarungan

mapang-api't gahaman

tadtad ng kabulukan

pumapatay na lider

animo'y isang Hitler

ang bayan nga'y minarder

ng pinunong pagerper

dapat nang pag-isipan

paano na lalaban

para sa katarungan

at sa kinabukasan

kayraming nangangarap

na hustisya'y malasap

na ginhawa'y mangusap

sa ibabaw ng ulap

panibagong pag-asa

panlipunang hustisya

baguhin ang sistema

isang bagong umaga

kaya makibaka rin

upang tuluyang kamtin

ang adhika't layunin

para sa bansa natin

- gregoriovbituinjr.

* Ito'y unang nalathala sa Taliba ng Maralita, ang opisyal na publikasyon ng pambansang samahang Kongreso ng Pagkakaisa ng Maralitang Lungsod (KPML), isyu ng Oktubre 1-15, 2020, pahina 2

Ang payo ng kampyong si Triple G

"Sometimes the only person that can see your goal is you. Stay focused and you will achieve it. You, yes you, you can do it too. Hard work pays off." ~ world middleweight boxing champion Gennady G. Golovkin

bilin ng isang magaling na boksingerong kampyon

minsan ang tanging makakakita ng iyong layon

ay ikaw lang mismo, kaya isipan mo'y ituon

upang mapagtagumpayan mo ang anumang hamon

isang magandang payo ni Gennadiy G. Golovkin

sa anumang larangan ay pagsikapan at sundin

minsan walang ibang tutulong kundi sarili rin

kaya kung di ka magsisikap ay walang kakamtin

pumokus ka sa iyong inaasam na larangan

ito man ay sa palakasan, agham, o sipnayan

bawat larang ay aralin at iyong pagsikapan

upang matamo ang tagumpay o inaasahan

mapipigil mo ang takot na namahay sa dibdib

malalagpasan mo ang lungkot sa malayong liblib

makakalabas ka rin sa pinaglunggaang yungib

matitigpas mo ang ulo ng sawang nanibasib

iyan ang isang payong magaling para sa masa

lalo sa tulad kong isang makata't aktibista

sa pagbaka't pagkamit ng panlipunang hustisya

sa panawagang baguhin ang bulok na sistema

- gregoriovbituinjr.

Napadpad man sa malayong ilang

oo nga't napadpad lang ako sa malayong ilang

subalit sa iwing katungkulan pa'y gumagampan

pagkabahag ng buntot sa akin ay walang puwang

kahit pa manuluyan sa amak ng karukhaan

nakakaakit man ang buhay sa gubat na liblib

ay parang nasa hukay na puputukin ang dibdib

dapat uwian kung saan ang iwing puso'y tigib

mabuti nang harapin ang sawang naninibasib

di mawawala sa taludturan ko't pangungusap

na pinagluluksa ang pagkawala sa pangarap

di na masulingan ang buntong hininga't paglingap

na inaasahan sa katungkulan kong tinanggap

ang halal ng mayorya'y dapat magawang magtanggol

sa prinsipyo't tindig na iwing buhay ay inukol

ayokong ituring na tusong unggoy na masahol

pa sa hayop, kahit pulang rosas pa ang mapupol

- gregoriovbituinjr.

Ang malabong larawan

malabo ang larawang namumuo sa isipan

silang karaniwan ay naroon sa panagimpan

animo ako'y hinehele sa malayang duyan

subalit kaylabong di maaninag sa kawalan

ang pagpapakatao'y di dapat maisantabi

mahalagang bilin sa atin ng mga bayani

sa pakikipagkapwa'y huwag mag-aatubili

pagkat ito'y tatanganan natin hanggang sa huli

kahit madarang man tayo sa apoy ng ligalig

at hinehele sa kandungan ng bunying pag-ibig

lubak man ang lansangan ay di pa rin mayayanig

anumang sigwa'y haharapin at tayo'y titindig

pusikit ang karimlan, sumulpot ang bulalakaw

maganda ba itong senyales na ating natanaw

ang mga naaninag ba'y palinaw ng palinaw

at baka paglaya'y masulyapan sa balintataw

- gregoriovbituinjr.

Pagbaka sa mananagpang

sumasanib sa kawalan ang gahum ng bangungot

na tila nagnanasa ang hukluban ng kalimot

may tumutusok sa tagiliran, pasundot-sundot

nakakailang kaya sa ulo'y pakamot-kamot

di mo pa magapi ang sa loob mo'y katunggali

patuloy pa rin nilang ang kapwa'y inaaglahi

nagpapakatao ka ngunit sila'y namumuhi

sa kagaya mong tangan pa rin ang nilulunggati

mag-ingat pa rin baka mahulugan ka ng sundang

mula sa buwan, tila ikaw ay palutang-lutang

huwag mong hayaang sa lusak ikaw ay gumapang

dahil nagapi ka na ng kalabang salanggapang

"sasagpangin ka namin, tulad mo'y di sinasanto!"

"ayoko, ayoko, ayoko! sinabing ayoko!"

"tulad mo'y balewala lang sa aming paraiso!"

"tanggap ko kahit na sa labang ito'y nagsosolo!"

- gregoriovbituinjr.

Pakikipagtunggali

animo ako'y ilahas na hayop na sugatan

at pagod na pagod sa naganap na tunggalian

pagkat ayaw palapa sa hayop ng kagubatan

o marahil sa gubat ay naghahari-harian

nakatindig pa rin kahit may sugat na natamo

sa bakbakang araw at gabi'y umaatikabo

kapwa pagod na ngunit di pa rin sila patalo

totoo, sugatan na ako'y di pa rin manalo

mabangis ang kalooban ng mga mananagpang

habang tangan ko pa ang kalasag na pananggalang

nageeskrimahan habang taktika'y tinitimbang

pinaghuhusayan upang di sila makalamang

hari ng kagubatang kagaya ko ring animal

ngunit di ko kaya ang malakas niyang atungal

isang taong lobong balat ng tupa ang balabal

sa labanang ito'y sinong magwawagi't tatagal

- gregoriovbituinjr.

Ang nag-iisang mais sa gilid ng kalsada

namunga na rin ang mais sa gilid ng kalsada

nag-iisa ang mais na iyon, walang kasama

nabuhay ng ilang buwan sa kanyang pag-iisa

sa kabila ng kalagayan,  nakapamunga pa

tulad din ng makatang kumakatha sa kawalan

may nakakatha sa umaga man o sa kadimlan

may katha sa sinag ng araw o patak ng ulan

lagaslas man ng tubig o kalagayan ng bayan

ang introvert nga akala mo'y may sariling mundo

tulad ko'y kayrami rin palang inaasikaso

laging may ginagawa, masaya mang nagsosolo

siyang may buti ring ambag sa mundo't kapwa tao

O, mais, mag-isa ka mang tumubo sa lansangan

subalit namunga ka pa't nagbigay-kasiyahan

ako'y nagpupugay sa iyong angking katatagan

tanging alaala'y larawan mong aking kinunan

- gregoriovbituinjr.

Ang mga bakod na ekobrik

nasulyapan ko lang ang mga bakod na ekobrik

habang naglalakad sa isang makipot na liblib

di papansinin kung di mo ito tinatangkilik

na kolektibong ginawa ng may pag-asang tigib

sinong nag-isip ng ganitong kapakinabangan

kundi yaong gustong malinis ang kapaligiran

kundi yaong ayaw na mga isda'y mabulunan

ng sangkaterbang plastik sa laot ng karagatan

mapapalad ang nakatira sa liblib na iyon

na sa tagalungsod na tulad ko'y malaking hamon

tambak-tambak ang plastik na sa lungsod tinatapon

anong gagawin ng kasalukuyang henerasyon

halina't pageekobrik ay ating itaguyod

sa mga libreng oras ay dito magpakapagod

kay Inang Kalikasan nga'y tulong na nating lugod

tayo nang magekobrik kaysa laging nakatanghod

- gregoriovbituinjr.

Sa pagwawalis ng kalat

marapat talagang walisan ang ating paligid

upang mawala na ang mga layak at ligalig

itapon yaong wala nang pakinabang at yagit

pati kalat sa ating loob na dapat malupig

oo, dapat ding luminis ang isip sa nagkalat

na mga katiwaliang sa bansa'y nagwawarat

ungkatin pati basura nilang di madalumat 

upang mandarambong ay di lang basta makasibat

ibukod mo ang nabubulok sa di nabubulok

tiyaking maitapon din ang namumunong bugok

magwalis, huwag magsunog, ng nakasusulasok

bakasakaling mapalis pati sistemang bulok

walis tinting o tambo man ang gamitin mong sukat

halina't magwalis ng basurang pakalat-kalat

at baka may mapulot na dapat maisiwalat

mausig ng bayan ang katiwaliang naungkat

- gregoriovbituinjr.

Sa silong ng ating pangarap

minsan, nasa silong lang tayo ng ating pangarap
na animo'y di mabata ang kirot na nalasap
pagkat nasadlak sa mundong kayraming mapagpanggap
na di natin batid anong laging inaapuhap

kinaya nating tiisin anumang dusa't hirap
sila pa kayang naturingang mabuting kausap
lalo't nagpadala tayo sa dilang masasarap
na sa puso natin animo'y magandang lumingap

gawin ang dapat, patuloy tayong magpakatao
at laging tanganan ang adhikain at prinsipyo
di tayo patitinag sa mga gawang perwisyo
nadapa man ay tatayo't tatayo pa rin tayo

titindig tayo upang gawin ang nasasaisip
habang pilit inuunawa ang di natin malirip
na naroong palutang-lutang sa ating pag-idlip
na silong man ay bahain, may buhay pang nasagip

- gregoriovbituinjr.

Ang pagsukat sa bilog

Pi = 3.14159268...

sa ating paligid ay payak na sukat ang bilog

na sa palibot ay mapapansing pantay ang hubog

iba sa obalong pahaba, kaygandang anyubog

kaylaki nang tulong tulad ng gulong sa pag-inog

ang pagsukat ba ng bilog na iyan ay paano

ang radyus at diyametro nito'y masusukat mo

ang haba sa pagitan ng bilog ay diyametro

tinatawag namang radyus ay kalahati nito

sukat ng palibot ng bilog ay sirkumperensya

ang pi ay griyegong titik na sukat na pormula

halimbawa'y sa bilog susukatin mo ang erya

pi tayms radyus iskwer, pormula'y kabisaduhin na

ito'y iyong matatagpuan sa paksang dyometri

at pag-aralan mo rin ano ang trigonometri

mga paksang nagsusukat kaya dulo'y may metri

aralin lalo't kukuha ng indyinering dini

pag-aralan mo muna ang pangunahing batayan

bago mga abanteng paksa'y iyong mapuntahan

marami pa akong gagawing tulang pangsipnayan

ngunit dapat pang magsaliksik ang makatang turan

- gregoriovbituinjr.

Ang mga cactus na parang terra cotta warriors

nilagay sa sanga ng dragonprut ang mga cactus

nahahilera silang animo'y kawal na lubos

animo'y terra cotta warriors ang pagkakaayos

na kung may labanan ay di mo basta mauubos

O, kaygandang pagmasdan ng mga cactus na iyon

sa pabula nga'y mapagsasalita sila roon

na pawang mga mandirigmang naligaw lang doon

di upang lumaban kundi magpahinga't limayon

napakaayos ng kanilang pagkakahilera

bagamat mga cactus ay di naman namumunga

mahal man pag binili'y maganda naman sa mata

animo sa iyong bahay ay may mga bantay ka

mga mandirigmang cactus, huwag munang sumugod

alamin muna anong isyung itinataguyod

karapatan ba ng kapwa'y sasagasaang lugod

kung walang katuturan ay huwag magpakapagod

- gregoriovbituinjr.

* kuha ang mga litrato sa Living Gifts Nursery na hardin ng samutsaring cactus sa Barangay Alno, La Trinidad, Benguet, 10.10.2020

Una lagi ang prinsipyo

una lagi ang prinsipyo kaysa anumang lambing

ito'y napagtanto ko sa kwarantinang dumating

bawal tumambay sa inumang may pagiling-giling

pagkat tibak akong may paninindigang magaling

kahit sa basura'y may prinsipyo ring sinusunod

nabubulok at di nabubulok dapat ibukod

maging pageekobrik ay aking tinataguyod

gawaing pangkalikasa'y isa ring paglilingkod

bilang kawal ng paggawa, una lagi'y prinsipyo

pagkat narito ang buod ng diwa't pagkatao

di raw makakain ang prinsipyong sinasabi ko

ngunit di masarap kumain kung walang prinsipyo

makakain mo ba ang galing sa katiwalian?

masarap ba ang ninakaw mo sa kaban ng bayan?

masarap kumain kung galing sa pinaghirapan

lalo't wala kang inapi't pinagsamantalahan

ito ang niyakap ko bilang tao't aktibista

una ang prinsipyo't tungkulin sa bayan at masa

sa pagsusulat man o tumitinding binabaka

prinsipyo'y di ko tatalikdan kahit may problema

- gregoriovbituinjr.

Magkumot ka

halata ngang di ako sanay magkumot, talaga

kaya laging sinasabi ni misis, "Magkumot ka!"

para kasing nakabalot sa suman itong dama

kaysarap mamaluktot sa maginaw na umaga

sanay kasing matulog sa lungsod na anong banas

na nakahubad pang hihimbing, walang pang-itaas

iba ngayon, sa lugar na maginaw, naninigas

lamig na ninanamnam ng tagalungsod madalas

anong sarap ng lamig, huwag lamang magkasakit

dapat may kayakap din upang madama ang init

kumakatha man sa lamig, ano pang ihihirit?

sumunod lang sa bilin ni misis, huwag makulit

may kasabihang kung walang kumot ay mamaluktot

na may ibang kahulugan man ay mapapakamot;

sa ginaw na ito'y maninigas o manlalambot?

ah, may kumot naman kaya huwag nang mamaluktot

- gregoriovbituinjr.

Basurahan para sa plastik na ieekobrik

may mga basurahan nang para sa nabubulok

panis na pagkain, pinagbalatan ipapasok

basang papel, dahong winalis, huwag magpausok

magsunog ng basura'y mali, dapat mong matarok

may para rin sa di nabubulok na basurahan

styrofoam at gawa sa gomang pinaggamitan

boteng babasagin, sa pagkain pinagbalutan

ibat't ibang uri ng plastik ay ilagay diyan

ngunit may basurang mabebenta't magagamit pa

boteng di pa basag, tuyong karton at papel, lata

aluminum, bakal, at anupang baka mabenta

iyan ang tinatawag na "may pera sa basura"

dapat may basurahang pinagbukod ang plastik

mayroong basurahang para sa single use plastic

ang mungkahi ko namang sa utak ko'y natititik

may basurahan para sa mga ieekobrik

tuyong plastik at boteng plastik ang lalamnin niyon

sa mga eskwelahan ay may karatula doon

tuyong plastik at boteng plastik lang doon itapon

sa mungkahing ito sana'y maraming sumang-ayon

- gregoriovbituinjr.

Pakikipagkaisa sa mga api

nakipagkaisa tayo sa mga inaapi
pagkat tulad nila sa dusa rin tayo sakbibi
lalo't ako'y naiwan sa liblib na di masabi
habang mga salita'y patuloy kong hinahabi

halos madurog bawat kong lunggati sa kawalan
habang nagkakabitak-bitak ang dinaraanan
alagata ang hangad na makataong lipunan
pagkat adhika itong sa puso'y di mapigilan

adaptasyon nang makaangkop sakaling magbaha
mitigasyon nang mabawas ang epekto ng sigwa
Kartilya ng Katipunan ay niyakap kong kusa
lalo't kaginhawahan ng bayan ang diwa't pita

kawal ng paggawang sa api'y nakipagkaisa
lalo sa proletaryo't mga maralitang masa
binabaka ang pang-aapi't pagsasamantala
kumilos upang baguhin ang bulok na sistema

- gregoriovbituinjr.

Kung ako'y isang halaman

ani misis, mahilig siya sa mga halaman

kaya samutsari ang tanim sa kapaligiran

napag-usapan matapos manggaling sa cactusan

samutsari nga ang cactus sa aming napuntahan

kung ako'y isang halaman, na halimbawa'y cactus

na bihira mang makita'y di nagpapabusabos

nabubuhay sa malayong liblib, kahit hikahos

nasa ilang man, matinik akong dapat matalos

kung ako'y isang halamang kapara'y gumamela

mga nektar ng bulaklak ko'y ibibigay ko na

sa paruparo't bubuyog ng libre't anong saya

na kahit munti'y may naitulong din sa kanila

baka mabuting itulad sa talbos ng kamote

na madali lamang patubuin sa tabi-tabi

na lunas sa gutom kung sa kagipitan sakbibi

at maaari pang isahog sa ibang putahe

kung ako'y isang halamang pipitasin ni misis

ang iwing buhay ko'y iaalay nang walang amis

halimbawa ako'y ang kamatis na walang hapis

anong ligayang ang naranasan ko'y anong tamis

- gregoriovbituinjr.

* kuha ang mga litrato sa Living Gifts Nursery na hardin ng samutsaring cactus sa Barangay Alno, La Trinidad, Benguet, 10.10.2020

Pakikipaghamok sa dilim

umuulan, tipak ng bato'y bumagsak sa dibdib
tila ako'y nasa gitna ng madilim na yungib
mga halimaw ay anong bangis kung manibasib
habang inihanda na ang sarili sa panganib

naagnas ang katawan sa dulo ng bahaghari
laksa-laksang tahanan ang tila ba nangayupi
nais kong makaalpas subalit may pasubali
gapiin ang mga halimaw upang di masawi

nadarama kong tila sinusuyo ng kadimlan
patuloy na sinusubok ang aking katatagan
di nila batid na ako'y insurektong palaban
na di payag na pasistang insekto'y makalamang

tinangka ng mga halimaw na ako'y gapiin
kaya pinaghusayan ko ang eskrimahan namin
ayokong basta pagahis upang di alipinin
at patuloy ang labang tila buhawi sa bangin

umuulan, bumagsak sa dibdib ay iniinda
habang nakikipagtunggali sa sabanang putla
pumulandit ang dugong nagkasya sa sampung timba
naghingalo ang halimaw na ngayo'y hinang-hina

- gregoriovbituinjr.

Pag salat sa pag-ibig

minsan, nagdurugo ang pusong salat sa pag-ibig
pagkat walang inibig kaya dama'y  nabibikig
mabuti nang nagmahal kaysa di man lang umibig
kahit magdugo ang pusong nasawi sa pag-ibig

oo, mabuti pang masaktan ang pusong nagmahal
na ang nadaramang kirot animo'y nagpapantal
minsan, mabuti pang sa pag-ibig nagpakahangal
kaysa di umibig at inibig, nagpatiwakal

ako'y ibigin mo, O, diwata kong minumutya
pagkat ikaw ang ibig ko, magbadya man ang sigwa
babatahin ang hirap kahit magdusa't lumuha
na kung mawawala ka'y tiyak kong ipagluluksa

ayos lamang daw magbigay ng tsokolate't rosas
ngunit anila'y mabuting may pambili ng bigas
pagkat di sapat ang pagmamahal, puso'y nag-atas
na dapat nakabubusog din ang pagsintang wagas

- gregoriovbituinjr.

Dalawang nais kong disenyo sa tshirt

dalawang klaseng disenyong nais kong ipagawa

tatak sa tshirt na itinataguyod kong kusa

na sumasalamin sa pagkatao, puso't diwa

baka pag nabasa ng iba'y humanga sa likha

sa tshirt ay nakatatak ang tinahak kong daan

ang isa'y pagiging vegetarian at budgetarian

habang ang isa'y prinsipyong niyakap kong lubusan

na unang taludtod ng Kartilya ng Katipunan

una, "Ang buhay na hindi ginugol sa malaki

at banal na dahilan ay kahoy na walang lilim

kundi man damong makamandag", sa ikalwa'y sabi

ako'y isang vegetarian at budgetarian na rin

dalawang diwa, dalawang tatak ng pagkatao

na kaakibat ng yakap kong adhika't prinsipyo

kung ikaw naman, ipalalagay mo kaya'y ano

sa tshirt na sumasalamin sa personahe mo

- gregoriovbituinjr.

Iekobrik din ang mga cotton bud na plastik

anong gagawin sa mga cotton bud na plastik

ang tumangan sa bulak, ito ba'y ieekobrik

oo naman, bakit hindi, huwag patumpik-tumpik

di ba't sa laot, cotton bud din ay namumutiktik

dapat lang may disiplina kung popokus din dito

baka mandiri sa cotton bud na mapupulot mo

kailangan ng partisipasyon ng mga tao

upang sila na ang magekobrik ng mga ito

tipunin muna ang cotton bud nilang nagamit

at isiksik nila ito sa isang boteng plastik

sa kalaunan, ito'y mapupuno't masisiksik

mabuti na ito kaysa basurahan tumirik

simpleng pakiusap, iekobrik mo ang cotton bud

lalo't plastik ito't lulutang-lutang pa sa dagat

baka kaining isda'y may plastik na nakatambad

iyon pala'y cotton bud mong binalikan kang sukat

- gregoriovbituinjr.

* unang nakita ang litrato ng sea horse mula sa isang seminar na dinaluhan ko noon, at hinanap muli sa internet

Mga tinakdang apakan sa lansangan

isang metrong social distancing ay ginawang tanda

sa daanan, sa bangketa, kainan, talipapa

upang doon tatapak ang tao nang di mahawa

pagkat pag napabahing ang katabi, ay, kawawa

ito na'y ginawang paraan ng social distancing

sa pagpara ng dyip, sa botika kung may bibilhin

kahit manliligaw ng dalaga'y di makatsansing

apakan mo ang bilog ngunit huwag kang babahing

samutsaring bilog, may nakasulat pa sa sahig

iba't ibang disenyo, ingat lang sa mang-uusig

tumalima na lang, sa payak na bilog tumindig

habang sa naka-facemask na dalaga'y nakatitig

lipat agad pag may umabante't nakasakay na

abante pag sa botika'y nakabili na sila

ganyan sa panahon ngayon pagkat may kwarantina

para walang gulo, kailangan ang disiplina

- gregoriovbituinjr.