EHERSISYO BAGO MAGTRABAHO
ni Greg Bituin Jr.
14 pantig
(para sa mga nakasama ko ng tatlong taon sa pabrikang PECCO sa Alabang, Muntinlupa)
tandang tanda ko pa noon, bago magsimula
ang trabaho sa pabrika'y magpapatirapa
upang igewang-gewang ng pataas-pababa
ang aming katawan at bisig na pinagpala
bibilang muna kami, isa, dalawa, tatlo
saka ibabaluktot ang tuhod, pati siko
bilang uli, apat, lima, anim, pito, walo
at pabalik ang bilang sa aming ehersisyo
kami'y papalakpak sa paglundag ng mataas
upang aming resistensya'y talagang lumakas
nang mabanat ang buto't katawan ay matikas
pati na mga kalamnan ay maging matigas
bago magtrabaho, kami'y mage-ehersisyo
ipipilig-pilig muna itong aming ulo
gagalaw ang katawan, kamay, balikat, braso
nang maging masigla kami sa pagtatrabaho
sa oras ng trabaho'y dapat lang masigla ka
di magpatulog-tulog sa harap ng makina
mahirap nang maipit, baka mawalan ka pa
ng bahagi ng katawan, ng kamay o paa
kaya mag-ehersisyo muna bago trabaho
pampalakas ng katawan ng mga obrero
kaunting pagod lang, ito nama'y hindi bisyo
ngunit kung maging bisyo mo'y mabuting totoo
Walang komento:
Mag-post ng isang Komento