Huwag magsunog ng basura

HUWAG MAGSUNOG NG BASURA
ni Gregorio V. Bituin Jr.
8 pantig bawat taludtod

nakasusulasok naman
ang sinunog na basura
gayong maaari namang
ilibing ito sa lupa
nang tao'y di magkasakit
at tiyan ay mamilipit
basura'y paghiwalayin
ibukod ang nabubulok
sa basurang di mabulok
nabubulok ang pagkain
papel, dahon, prutas, karton
di nabubulok ang plastik
lata, bote, bakal, tanso
bulok, ibaon sa lupa
di nabubulok, ibenta
ikaw pa'y magkakapera
basura'y huwag sunugin
upang sakit ay di kamtin
mula sa usok na meteyn (methane)
tandaan lagi at tupdin

Kalabit ng Kapos

KALABIT NG KAPOS

ni Gregorio V. Bituin Jr.

11 pantig bawat taludtod

kalabit-penge silang mga kapos

nakasahod ang kamay na busabos

pag nagbigay ka, ituturing kang Boss

pag nang-isnab ka, sila na'y iingos

ingat lang baka kutsilyo'y tumagos

barya na imbes buhay ang matapos

lipunan kasi'y pabaya sa kapos

gobyerno'y walang paki sa busabos

palibhasa kapitalista ang Boss

ng gobyernong laging iingos-ingos

lipunang bago'y dapat mapatagos

sa diwa nang kahirapa'y matapos

Ilang nilay sa danas

ILANG NILAY SA DANAS
ni Gregorio V. Bituin Jr.
15 pantig bawat taludtod

i
pag malakas ang ulan, agad tayong sisilong
sa tindi ng sikat ng araw, tayo'y magpapayong
pag nakita'y krimen, tatahimik o magsusuplong?
pag inaaglahi ka na, lalaban o uurong?
pag nauuhaw, hanap ay tubig upang uminom
naghahanap ng pagkain pag ramdam na ay gutom
sa pitsel na may yelo'y lilitaw ang alimuom
ang mga sugat bago magpilat ay naghihilom
pag may poot sa dibdib, ang kamao'y kumukuyom
sari-saring kalinangan, sari-sari ang gahum

ii
lagi na'y kailangan nating magsuot ng damit
kung laging hubad, maaari tayong magkasakit
may mga tinderang ang nilalako'y malagkit
na pag iyong tinikman sa mga ngipin mo'y pagkit
yaong mga karpintero'y laging may handang gamit
na kukunin pag kailangan ng kikil o pait
papakuan ang mga upuang lumalangitngit
nais nating makita ang diyosang sakdal-rikit
ngunit marapat muna tayong magpunta sa langit
at doon makisaya sa anghel na umaawit

iii
pag ang tao'y gutom, uunahin munang mabusog
bago kumilos para sa pangarap na matayog
mas mabuti kung ang prutas ay sa puno mahinog
kaysa ikalburo, mapakla'y madaling malamog
sa munting apoy nagsisimula ang bawat sunog
at munting ulan pag sa baha ang bahay mo'y lubog
ang mapula't matamis na rosas ay pinupupog
ng tila nagdidiliryong makisig na bubuyog
mag-ingat lalo na't nalasing ka'y baka mabugbog
ng kapwa lasenggo, mabuting ikaw na'y matulog

iv
upang matiyak na kalusugan nati'y maayos
kailangang uminom at magsikain ng maayos
may tubig, may karne, may isda, may gulay, may talbos
may prutas, sari-saring kakanin, suman sa ibos
tipirin ang salapi, planuhin ang ginagastos
tiyaking sa oras ng kagipitan, may panustos
mayayabang at sikat, kalauna'y malalaos
yaong nagsisikap, sa buhay ay nakakaraos
huwag mong hayaang ang bayan mo'y binubusabos
ng mga kababayang sa dayuhan nakagapos

Pagtunganga'y Di Pakikibaka

PAGTUNGANGA'Y DI PAKIKIBAKA

ni Gregorio V. Bituin Jr.

10 pantig bawat taludtod

pagtunganga'y di pakikibaka

dapat kumilos para sa masa

babaguhi'y bulok na sistema

sa pagtunganga'y di makukuha

pagtunganga'y tulo-laway ka lang

ingat baka tuluyang mabuwang

pagtunganga'y gawain ng hunghang

na ang mundo'y pulos paglilibang

ang pagtunganga'y di pangangarap

pawang dusa dito'y malalasap

kung nais mong mawala ang hirap

halina't makibaka nang ganap

pagtunganga'y walang matatapos

tulo-laway lang iyan at kapos

kaya dapat lang ninyong matalos

ang pagbabago'y nasa pagkilos

Sa parang ng labanan

SA PARANG NG LABANAN
ni Gregorio V. Bituin Jr.
13 pantig bawat taludtod

naririto ako sa parang ng labanan
nagninilay, kumikilos sa tunggalian
tinatahak ang mga malalaking patlang
tunggali'y madugo, dudurugin ang halang

nakapanlulumo ang bawat pagkagapi
lalo't tunggalian ay gabi at tanghali
ang pagpisak sa kaaway ay di madali
lalaban katawan ma'y magkabali-bali

nagpapakatao kahit buhay ay hungkag
nanghihina man, pilit nagpapakatatag
di man parehas ang labanang nakalatag
patuloy pa rin, huwag lang tawaging duwag

dapat pagkaisahin ang uring obrero
upang mahigpit nilang tanganan ang maso
sa kanila'y ibandila ang sosyalismo
wakasan ang mapang-aping kapitalismo

May CBA man, sahurang alipin pa rin

MAY CBA MAN, SAHURANG ALIPIN PA RIN
ni Gregorio V. Bituin Jr.
13 pantig bawat taludtod

ang CBA nila, gaano man kaganda
alipin pa rin sila ng kapitalista
kahit umayos ang ugnayan sa pabrika
nadagdagan ang sahod, may mga bonus pa
nananatiling sahurang alipin sila

ngunit kung nais talaga nilang lumaya
di na sahurang alipin ang manggagawa
dapat wakasan na ang sistemang kuhila
yakapin sabay ang sosyalismong adhika
at isang bagong lipunan na'y ibandila

di marapat magkasya lang sa pag-uunyon
sahuran pa rin kung ganito lang ang layon
dapat tahakin na ng manggagawa ngayon:
mapagpalayang sosyalistang rebolusyon
at wakasan ang kapitalismong ulupong

Nang Manghipo ang Lasing

NANG MANGHIPO ANG LASING

ni Gregorio V. Bituin Jr.

13 pantig bawat taludtod

LASING:

"pasensya na po kayo, ako kasi'y lasing

kaya nahipuan ko yaong dalaginding

pag lango kasi ako'y nais kong maglambing

sa ganda niya'y sino bang di maduduling"

TAGAUSIG:

"di ba't ilang beses mo nang ginawa iyan

di ka na nadala't wala kang kasawaan

di tumatalab munti mang kaparusahan

baka ang nais mo'y makulong kang tuluyan?"

LASING:

"di ko naman sinasadya ang panghihipo

nagagawa ko lang ito pag ako'y lango

ngunit pag normal naman ako't di tuliro

ako po'y mahiyaing tulad ng hunyango"

TAGAUSIG:

"nagkukunwari ka lang yatang ikaw'y lasing

nanghiram ng tapang sa alak at nanyansing

sayang ka pagkat tao ka namang magaling

ngunit pag nalango, manyak na't napapraning"

LASING:

"patawarin nyo ako't di na mauulit

pag nalasing akong muli'y di na didikit

sa dalaginding na iyang sadyang kayrikit

kaya sa iba na lang ako mangungulit"

TAGAUSIG:

"mukhang may bago ka namang pinupuntirya

maghunosdili ka't baka makulong ka na

dapat kang magpatingin pagkat may sakit ka

manyakis ka't ang utak mo'y may diperensya"

TAUMBAYAN:

"babae'y kawawa sa ganyang klaseng tao

kultura na rin kasi ang nagdulot nito

tingin sa babae'y segundang uri rito

ganitong pagkilala'y dapat nang mabago"

"bakit ba kayong babae'y ginaganito

binibiktima ng mga lasenggong gago

sa ganyan ng ganyan, papayag lang ba kayo

o babaguhin ninyo ang sitwasyong ito?"

KABABAIHAN:

"ang mga nanghihipo'y mapagsamantala

mga tao silang wala yatang konsensya

dapat sa kanila'y ipalapa sa bwaya

pagkat ugali nila'y bwitre ang kapara"

"di na dapat maapi ang kababaihan

kaya karapatan natin ay ipaglaban

baguhin natin ang kultura't kaisipan

lalo ang lipunang batbat ng kabulukan"

Paglayang Nasayang

PAGLAYANG NASAYANG

ni Gregorio V. Bituin Jr.

11 pantig bawat taludtod

(Hulyo 15, 2011 namatay ang bilanggong pulitikal na si Mariano Umbrero, patay na siya nang siya'y biyayaan ng executive clemency ni Pangulong Noynoy Aquino noong Hulyo 19, 2011)

huli na ang lahat, Noynoy Aquino

huli na pagkat ang pinalaya mo

sa una mong presidential clemency

ay ilang araw nang naililibing

di ko alam, 'yan ba ang utak-wangwang

na laging huli't palpak ang dulugan

noon pa dinulog ang kasong iyan

ngunit di naman agad inaksyunan

level 4 na ang kanser ni Umbrero

tanging hiling niya, Noynoy Aquino

ay makasama ang kanyang pamilya

sa nalalabi pang araw sa mundo

ngunit bigo siya, binigo siya

ng pangulong ayaw ng utak-wangwang

ilan pa, Noynoy, ang bibiguin mo

ilan pa ang mabibigo sa iyo

namatay siyang bigong makasama

sa huling araw ang kanyang pamilya

presidential clemency mo'y wala na

sayang pagkat iyon ang iyong una

tularan mo ang ina mong butihin

bilanggong pulitikal, palayain

paulit-ulit itong aming hiling:

BILANGGONG PULITIKAL, PALAYAIN!

Panaghoy ng Punungkahoy

PANAGHOY NG PUNUNGKAHOY

ni Gregorio V. Bituin Jr.

11 pantig bawat taludtod

minsang kaylakas ng ihip ng hangin

habang mag-isa akong naninimdim

ang langit ay sinapol ko ng tingin

ang tanghaling tapat biglang nagdilim

hanggang marinig ko'y isang panaghoy

na tulad ng isang batang palaboy

pinakinggan ko yaong nginunguyngoy

nanaghoy pala'y isang punungkahoy

di na sumisilong ang mga ibon

pagkat lagas ang kanyang mga dahon

pinagpuputol pa ng mga maton

ang kanyang sanga't ginawang panggatong

panaghoy niya'y aking pinakinggan:

"mga bunga ko kahit bubot pa lang

pinipitas na't pinagtutubuan

imbes ito'y pahinuging tuluyan"

"kapatid na puno'y pinagsisibak

kita mong balat nila'y nagnanaknak

kalbo ng kagubatan ay kaylawak

sadya bang tao'y ganito ang balak"

"kaming puno'y marunong ding manimdim

galit namin sa tao'y kinikimkim

ni hindi man lamang sila magtanim

ng bagong punong ang handog ay lilim"

"kami'y inyong proteksyon sa pagbaha

na sumisipsip ng tubig sa lupa

kakampi nyo sa tag-araw at sigwa

kaya simulan nyo na ang magpunla"

"paghandaan ang anumang delubyo

mga puno'y agad itanim ninyo

nang may pananggalang kayo sa bagyo

sana, pakinggan nyo ang aking samo"

Kapareho, kapareha

KAPAREHO, KAPAREHA
ni Gregorio V. Bituin Jr.
15 pantig bawat taludtod

dapat bang kapareho mo ang iyong kapareha?
dapat ba kung anong gusto mo'y gustuhin din niya?
at paano naman kung kayo'y sadyang magkaiba?
magtatagal naman kaya ang inyong pagsasama?

Matira ang Matibay

MATIRA ANG MATIBAY

ni Gregorio V. Bituin Jr.

11 pantig bawat taludtod

tuloy ang laban hanggang sa tagumpay

halina't makibaka tayong tunay

walang atrasan, matira'y matibay

di pa panahong tayo'y magsihimlay

iyang paglalaylo'y di nga masama

ngunit bakit ba init mo'y humupa

ayaw nang kumilos para sa dukha

mas nais nang sa isyu'y tumunganga

bakit tumigil sa pakikibaka

para atupagin na'y ang pamilya

di ba't babaguhin nati'y sistema

nang mawala ang pagsasamantala

nawala ka, narito pa rin kami

nag-oorganisa't nagpaparami

di maglalaylo't dito na pipirmi

nagbago ka man, narito pa kami

matira matibay, walang iwanan

kung bala'y katumbas ng katapatan

prinsipyo'y tangan hanggang kamatayan

bangkay ko ma'y itapon sa kangkungan

dahil naniniwala akong tama

ang prinsipyong yakap ko't inadhika

pinatibay nito ang aking diwa

tangan ito kahit ako'y mawala

Sa Pagkatha Ko ng Tula

SA PAGKATHA KO NG TULA

ni Gregorio V. Bituin Jr.

10 pantig bawat taludtod

sari-sari na'y aking tinula

prinsipyo, diwa, buhay ng dukha

paglarawan ng buhay ng madla

paglaban ng uring manggagawa

may maningning, may malagim

may masaya'y nakaririmarim

tula ko'y tanglaw sa iyong dilim

sa init mo'y nagbibigay lilim

may tulang minsan iniiyakan

may tulang natatawa ka na lang

may tulang dama'y kaibuturan

may tulang wala ring katuturan

may tulang sadyang pinantututok

nanunuligsa ng nasa tuktok

nang-uupak ng sa tubo'y hayok

nambabanat sa sistemang bulok

ah, sadyang mahirap ding kumatha

minsan ang tinta'y pinababaha

sa papel ito'y pinaluluha

hanggang agos ng diwa'y humupa

tula'y pinagagapang sa lusak

haraya'y gulok na nakatarak

bawat taludtod ay nagnanaknak

hanggang diwa'y tuluyang manganak

Tumula Ako ng Sari-Sari

TUMULA AKO NG SARI-SARI

ni Gregorio V. Bituin Jr.

10 pantig bawat taludtod

may tula akong isyu'y pambata

may tula rin akong pangmatanda

may tulang pandukha't manggagawa

may tulang ang adhika'y paglaya

may tulang sa ulap naglimayon

may tulang sa tubo'y nagugumon

may tulang larawan ng pagbangon

may tulang sigaw ay rebolusyon

may tulang humihibik ng luha

may tulang sangkahig at santuka

may tulang pagbabago'y adhika

may tulang sosyalismo ang diwa

tumula ako ng sari-sari

para pagkaisahin ang uri

para di mayurakan ang puri

para durugin ang naghahari

Sistemang kristal

SISTEMANG KRISTAL
ni Gregorio V. Bituin Jr.
13 pantig bawat taludtod

taas-noo akong may lungkot yaring puso
uring manggagawa hanggang ngayon ay bigo
kailan ba sa kanilang puso'y titimo?
na ang lipunan nila'y dapat nang mabuo

suntok sa buwan bang kanilang pangarapin
na bulok na sistema'y tuluyang baguhin
hindi ba'y kaygandang adhika't simulain
na sila ang manguna upang ito'y  gawin

nakatindig akong ang puso'y hinihiwa
sapagkat kayrami ng napapariwara
buhay ay winawasak ng pagdaralita
ngunit wala pang magawa ang manggagawa

paano tayo titindig ng taas-noo?
kung di nagkakaisa ang uring obrero
kung puso nila'y nakatuon sa trabaho
imbes na ipalaganap ang sosyalismo

sa nangyayari ba'y magkikibit-balikat
habang puso ng sambayanan ay may pilat
lagi na lang bang lipunang ito'y maalat
gayong babasaging sistema na'y may lamat

sistemang kristal na iniingatang lubos
ng isang uring tunay ngang mapambusabos
walang pakialam sa dukhang laging kapos
sagot ba'y paano ng dukha matatalos?

sa mga obrero'y kumakatok ang lambing
ng asam na sahod, baryang kumakalansing
diwa ba nila bilang uri'y magigising?
sistemang bulok ba'y kailan dudurugin?

uring manggagawa'y hukbong mapagpalaya
sila ang babago sa sistemang kuhila
ngunit hanggang kailan sila tutunganga?
pag pilantod na sila't wala nang magawa?

Nagkataon lang itim ang kulay ng pusa

NAGKATAON LANG ITIM ANG KULAY NG PUSA
ni Gregorio V. Bituin Jr.
15 pantig bawat taludtod

paano naging malas ang pusang itim na iyan?
gayong siya'y isinilang na ang kulay na'y ganyan
hindi ba't kaitiman niya'y nagkataon lamang?
oo nga't itim siya, dapat na bang katakutan?

marami namang pusang naaalagaang tunay
ngunit kaibahan niya'y itim ang kanyang kulay
kulay lang ito, paano naging nakamamatay?
paano kung itim ay tao, ah, tayo'y magnilay

pusang itim ba sa kapalaran mo'y mapagpasya?
o siya'y tandang mag-ingat ka't baka masakuna?
na para bang kung saan ay biglang lilitaw siya?
at sa bantang panganib ay paalalahanan ka?

pinalaki ba tayong masama ang kulay itim?
ang maputi'y maganda na't ang itim na'y malagim?
bakit kayraming mapuputing sa yaman ay sakim?
bakit may tisay na ugali'y nakaririmarim?

hindi porke't kulay itim, sa sama na ang tungo
dahil maraming maitim na busilak ang puso
maganda rin ang itim lalo't buhok mo'y ginugo
huwag lang sanang itim ang mga buto mo't dugo

pusang itim nga ba o pusong itim yaong malas
pusong itim na taksil sa kapwa, tulad ni Hudas
ang pusong sa karapatan ng kapwa'y umuutas
sakim, sukab, lilo, tiwali, mga talipandas

Pakikipagtalastasan kay Kasamang Lenin - salin ng tula ni V. Mayakovsky

PAKIKIPAGTALASTASAN KAY KASAMANG LENIN (1929)

Tula ni Vladimir Mayakovsky

Malayang salin ni Gregorio V. Bituin Jr.

Pinaghalawan: Panitikang Ruso ng ika-20 Siglo

Sa pag-inog ng mga pangyayari,

                  na tambak ng sangkaterbang gawain,

unti-unting lumulubog ang araw

                    habang palubog na rin ang anino ng gabi.

May dalawang tao sa silid:

                          ako

                          at si Lenin -

isang larawan

            sa kaputian ng dingding.

Sumirit pataas ang pinaggapasan

                        sa ibabaw ng kanyang labì

habang namutawi ang talumpati

            sa kanyang bibig.

                                Ang malalang

gatla sa kanilang noo

              ay may diwang

                          mahigpit nilang tangan,

ang noo nilang napakalapad

             ay tinutumbasan ng napakalawak nilang diwa.

Isang gubat ng mga bandila,

               singkapal ng damo ang nakataas nilang kamay...

Libu-libo ang nagmamartsa

                      sa ilalim niya...

                                   Nakalulan,

nag-aalab sa ligaya,

                bumangon ako mula sa aking kinalalagyan,

upang makita lamang siya,

               papurihan siya,

                       mag-ulat sa kanya!

“Kasamang Lenin,

               ako'y nag-uulat sa iyo -

(di dahil dikta ng opisina,

                     ang puso’y nadidiktahang mag-isa)

Ang napakatinding gawaing itong

               dapat nating gampanan

ay dapat magawa

           at ginagawa na.

Pinakakain namin at dinadamitan

                      at binibigyang-liwanag ang nangangailangan,

ang mga kota

         para sa uling

                 at para sa bakal

                            ay nagampanan,

ngunit mayroong itong

           di madalumat

                     na pagdurugo

marumi

    at walang saysay

                pa rin sa ating paligid.

Kung wala ka,

           napakarami

                      ang hindi na napanghawakan,

ang isa’y natulak

              ng mga pag-aaway

                                 at pagbabangayan.

Maraming mga

           taong hamak

                    na nasa ating mga lupain,

nasa labas ng hangganan

                  at narito rin

                          sa loob.

Subukan mong

     bilangin sila

              at

                 italâ sila -

                          wala yaong paroroonan,

naroon ang lahat ng tipo,

                at sila’y

                            singkapal ng kulitis:

ang mga panggitnang magsasaka,

      ang mga may disiplinang bakal,

                at,

                    sa baba ng hanay,

ang mga lasenggo,

         ang mga sektaryan,

                   ang mga sipsip.

Gumigiri-giri sila sa paligid

                 nagmamalaking

                        tulad ng pabo,

ang mga tsapa at pluma’y

                        nagkalat sa kanilang dibdib.

Gagapiin natin ang karamihan sa kanila -

                         ngunit

                            ang sila’y gapiin

ay di madaling gawin

             sa pinakainaman nito.

Sa mga lupaing nagyeyelo

                     at sa mga pinaggapasang palayan,

sa mga plantang mauusok

              at sa mga pabrika,

narito ka sa aming puso,

                     Kasamang  Lenin,

                                    kami'y nagtatatag,

kami'y nag-iisip,

          kami'y humihinga,

                  kami'y nabubuhay,

                          at kami'y lumalaban!”

Sa pag-inog ng mga pangyayari,

                  na tambak ng sangkaterbang gawain,

unti-unting lumulubog ang araw

                    habang palubog na rin ang anino ng gabi.

May dalawang tao sa silid:

                          ako

                          at si Lenin -

isang larawan

            sa kaputian ng dingding.

-

-

-

-

Conversation with Comrade Lenin (1929)

Poem by Vladimir Mayakovsky

Source: 20th Century Russian Literature.

Awhirl with events,

                  packed with jobs one too many,

the day slowly sinks

                   as the night shadows fall.

There are two in the room:

                          I

                           and Lenin-

a photograph

            on the whiteness of wall.

The stubble slides upward

                        above his lip

as his mouth

            jerks open in speech.

                                The  tense

creases of brow

              hold thought

                          in their grip,

immense brow

             matched by thought immense.

A forest of flags,

               raised-up hands thick as grass...

Thousands are marching

                      beneath him...

                                   Transported,

alight with joy,

                I rise from my place,

eager to see him,

               hail him,

                       report to him!

“Comrade  Lenin,

               I report to you -

(not a dictate of office,

                     the heart’s prompting alone)

This hellish work

                that we’re out to do

will be done

           and  is already being done.

We  feed and we clothe

                      and give light to the needy,

the quotas

         for coal

                 and for iron

                            fulfill,

but there is

           any amount

                     of bleeding

muck

    and  rubbish

                around  us still.

Without you,

           there’s many

                      have got out of hand,

all the sparring

             and  squabbling

                                 does one in.

There’s scum

           in plenty

                    hounding our land,

outside the borders

                  and  also

                          within.

Try to

     count ’em

              and

                 tab ’em -

                          it’s no go,

there’s all kinds,

                and  they’re

                            thick as nettles:

kulaks,

      red tapists,

                and,

                    down the row,

drunkards,

         sectarians,

                   lickspittles.

They strut around

                 proudly

                        as peacocks,

badges and fountain pens

                        studding their chests.

We’ll lick the lot of ’em-

                         but

                            to lick ’em

is no easy job

             at the very best.

On snow-covered lands

                     and on stubbly fields,

in smoky plants

              and on factory sites,

with you in our hearts,

                     Comrade  Lenin,

                                    we  build,

we  think,

          we breathe,

                  we  live,

                          and we fight!”

Awhirl with events,

                  packed with jobs one too many,

the day slowly sinks

                    as the night shadows fall.

There are two in the room:

                          I

                          and Lenin -

a photograph

            on the whiteness of wall.

Ang Kaibigang Liha

ANG KAIBIGANG LIHA

ni Gregorio V. Bituin Jr.

10 pantig bawat taludtod

kung lagi ka nang sinisiraan

ng itinuring mong kaibigan

isipin mong siya'y liha lamang

sinasaktan ka't sinusugatan

bandang huli'y kaykinis mo naman

niliha kang kakintab-kintaban

habang sila'y itatapon na lang

diretso nila'y sa basurahan

Dumi ba ang mapagpasya?

DUMI BA ANG MAPAGPASYA?
ni Gregorio V. Bituin Jr.
15 pantig bawat taludtod

bawal daw magwalis sa gabi, anang isang lola
swerte'y tatanggalin mo raw kaya mamalasin ka
iyan ang pamahiin ng matatanda noon pa
ganoon lang, walang paliwanag, sundin lang sila

sadyang nakapagtataka, matatanggal ang swerte?
gayong nais mo lang linisan ang kwarto sa gabi
mapagpasya na ba sa kapalaran mo ang dumi?
kung suswertehin ka'y dumi na ba ang magsasabi?

halina't mag-ipon ng dumi, ito'y kayamanan
alikabok at agiw pala'y pagkakaperahan
dumi na ang mapagpasya sa ating kapalaran
magwalis sa gabi't swerte'y mawawalang tuluyan

ops, huwag iasa sa dumi ang kapalaran mo
kundi sa sipag sa buhay at maganda mong plano
di dumi ang mapagpasya sa atin kundi tayo
magwalis sa gabi kung nais luminis ang kwarto