Ang Photographer

ANG PHOTOGRAPHER

ni Greg Bituin Jr.

minsan sa isang rali

ako ay napagawi

nang biglang pinagpapalo

ng tila de-susing mga parak

ang mga nanunuligsa

sa mga maling patakaran

ng palpak na pamahalaan

marami silang nasaktan, marami

saksi ako sa pagdugo

ng kanilang katawan

saksi ako sa pagputok

ng noo nila’t tagiliran

pati na pagkalamog

ng kanilang kalamnan

ngunit wala akong nagawa, wala

kundi gamitin ang kamera

at kunan ng larawan

ang mga pangyayari, lalo na

ang mga mukha nilang may poot

may poot sa bulok na sistema

nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralitang Lungsod (KPML), Tomo VIII, Blg. 3, Taon 2003, p.8.

Ang Ibon, ang Isda, at ang Maralita

ANG IBON, ANG ISDA, AT ANG MARALITA

ni Greg Bituin Jr.

minsan, ang mga haring ibong

naglipana sa kalangitan

ay gumawa ng mga batas

para daw sa lahat;

umano’y upang maging maayos

ang pamumuhay ng lahat

sa sandaigdigan;

mapalupa man, mapalangit,

o mapasatubig man

ngunit di maiiwasang

marami ang magtaka

sa kanilang panukala.

nagtanong ang mga isda:

“bakit silang mga ibon

ang gagawa ng mga batas

para sa aming mga isda

gayong hindi naman nila alam

kung paano kami lumalangoy?”

tanong ng isang maralita,

“bakit ang gobyerno

na karamihan ng myembro

ay mga mayayaman

at representante ng kapital

ang gumagawa ng batas

para sa mga maralita,

gayong ni pagtuntong sa bahay

ng maralita o kaya’y makisalo

sa aming pagkain ay di nila magawa?

paano nila mauunawaan

ang aming kalagayan

gayong di nila kami kinakausap

at di muna nila inuugat

ang aming mga problema?

pinupuntahan lang kami

kapag mangangampanya sa halalan

maraming pangakong napapako

na pag napaupo na sa pwesto’y

di na kilala ang mga maralita!”

nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralitang Lungsod (KPML), Tomo IX, Blg. 1, Taon 2004, p.8. 

Ang Ating Boto

ANG ATING BOTOni Greg Bituin Jr.

Boto nati’y mahalaga
Huwag po nating ibenta
Boto mula sa konsensya
Ang siyang ambag ng masa
Sa dakilang pagnanasa
Na mabago ang sistema
Bawat boto’y mahalaga
‘Wag sayangin, ‘wag ibenta

nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng mga Maralita ng Lungsod (KPML), Tomo IX, Blg. 1, Taon 2004, p.8. 

ME-RAL-CO-RYEN-TE

ME-RAL-CO-RYEN-TEni Greg Bituin Jr.

mas malupit pa sila
kaysa mga terorista
pagkat hindi lamang isa,
lima, sampu, o dalawampu
ang kanilang binibiktima
kundi ang higit tatlo't
kalahating milyong consumers
na kanilang "siniserbisyuhan"!
sila ang dapat parusahan!
ngunit sino ang may lakas ng loob
na ikulong at parusahan sila

nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng mga Maralita ng Lungsod (KPML), Tomo VIII, Blg. 3, Taon 2003, p.8.

Ang makata

ANG MAKATA
ni Greg Bituin Jr.
animan ang pantig

Ayaw ng demonyo
ng mga makata
doon sa impyerno

nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng mga Maralita ng Lungsod (KPML), Tomo VIII, Blg. 3, Taon 2003, p.8.

Ang katahimikan ng tupa

ANG KATAHIMIKAN NG TUPA
(THE SILENCE OF THE LAMB)
ni Greg Bituin Jr.

alin daw ang mas nakabibingi
ang ingay o ang katahimikan?
ah, siguro nga'y katahimikan
tulad ng laot ng karagatan
tahimik ngunit napakalalim
di gaya ng alon sa dalampasigan
mababaw kaya't napakaingay ng tabsing

tulad din ng tupang tahimik
mapagtimpi sa mga nangyayaring
pang-aapi ng uring kapitalista't elitista
na patuloy na nagpapahirap sa masa

balang araw ang masang ito'y hindi na
makapagtitiis sa kahirapang dinaranas
sila'y mag-aalsa't mananawagan
ng rebolusyon laban sa bulok na sistema

at ang tahimik na tupa'y dagling kikilos
tutulong sa masa upang siguraduhin
ang panalo ng uring anakpawis
laban sa uring mapagsamantala

nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralitang Lungsod (KPML), Tomo VIII, Blg. 3, Taon 2003, p.8.

Kasaysayan ni Tukmol

KASAYSAYAN NI TUKMOL
ni Greg Bituin Jr.

si Tukmol ay wala raw pera
para pamasahe sa rali
at iba pang pagkilos
ngunit siya’y may pera
para sa yosi, alak at tong-its

Nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralitang Lungsod (KPML), Tomo IX, Blg. 1, Taon 2004, p.8.

Kapag Naglagablab ang Apoy sa Dibdib

KAPAG NAGLAGABLAB ANG APOY SA DIBDIB

ni Greg Bituin Jr.

sinlamig ng bangkay

ang pakikitungo nila sa masa

habang sa dibdib naman ng maralita’y

may apoy na naglulungga

laban sa kanilang mga naghahari-harian

sa lipunang binusabos ng puhunan

tayo’y busabos sa kanilang mga mata

kaya winawasak ang ating tahanan

at itinataboy tayong parang mga daga

habang sinusunog ang ating paninda

na pinagkukunan ng ikabubuhay

para sa nagugutom nating pamilya

maglalagablab ang apoy sa ating dibdib

kahit hindi natin sabihin kaninuman

ngunit ang apoy na ito’y di dapat matulad

sa ningas ng kugon na maminsang

masindihan ay agad namamatay

kapag naglagablab ang apoy sa dibdib

tiyakin nating ang unang sisilaban ng poot

ay ang mga mapagsamantala pagkat

sila ang dahilan ng ating mga kahirapan

dapat silang matupok sa nagbabagang apoy

hanggang sa maabo at di na manganak

- nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralitang Lungsod (KPML), Tomo VIII, Blg. 2, Taon 2003, p.8.

Mga Patay na Letra

MGA PATAY NA LETRA

ni Greg Bituin Jr.

pawang mga guhit at patay na letra

lamang kung ituring itong monitoring

chart na nakapaskil sa pader

kung hindi bibigyang pansin

mga patay na letra din ang Noli Me Tangere

kung di binigyang-pansin ng masa noon

mga patay na letra din ang mga nakasulat

sa pader noong panahon ng martial law

ngunit ang Noli’t islogan sa pader

ay binigyang-pansin ng masa kaya’t sila’y

nag-alsa’t lumaya sa mga kastila’t sa diktadurya

ilan pang mga patay na letra ang kailangang

bigyang-pansin upang gumising sa atin?

MAGBASA, MAG-ANALISA, MAKIBAKA!

nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralitang Lungsod (KPML), Tomo VIII, Blg. 3, Taon 2003, p.8.

Ang Prinsipyo Naming mga Dyarista

ANG PRINSIPYO NAMING MGA DYARISTA
ni Greg Bituin Jr.

magpahayag ng katotohanan
ang sagrado naming katungkulan
kaya’t kung sakaling
sa mga sinulat namin
ay maraming manggalaiti
ay nakahanda kami
sa anumang mangyayari
pagkat para sa amin:
“mas mabuti pang patahimikin
kaysa maging tahimik!”

(its better to be silenced
than to be silent)

Nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralitang Lungsod (KPML), Tomo VIII, Blg. 3, Taon 2003, p.8. 

Sa isang maralitang kasapi sa demolisyon

SA ISANG MARALITANG KASAPI NG PANGKAT-DEMOLISYON

ni Greg Bituin Jr.

kamatayan ang dulot mo sa maralita

tinatanggalan mo kami ng dignidad

winawasak mo ang aming tahanan

gayong mahirap ka rin naman

pero nagpapagamit ka sa kanila

nang dahil sa kakaunting barya

mga hayup sila, mga walang awa

ganuon ka na rin kahit maralita ka

Nalathala sa publikasyong Taliba ng Maralita, Tomo IX, Blg. 4, Taon 2004, p.8. Ang Taliba ng Maralita ang opisyal na publikasyon ng Kongreso ng Pagkakaisa ng Maralitang Lungsod (KPML).

Paraiso sa Lupa

PARAISO SA LUPA

ni Greg Bituin Jr.

itong langit daw ay napuntahan na

ng mga nakakilala kong durugista

na sa tuwina’y pawang mga tulala

ngunit ibang langit ang ating puntahan

walang pang-aaping langit na lipunan

na ating dapat itayo sa hinaharap

gawin nating langit ang lupa

habang tayo’y nabubuhay

sa pamamagitan ng rebolusyon

laban sa bulok na sistema

Nalathala sa publikasyong Taliba ng Maralita, Tomo IX, Blg. 4, Taon 2004, p.8. Ang Taliba ng Maralita ang opisyal na publikasyon ng Kongreso ng Pagkakaisa ng Maralitang Lungsod (KPML).

Salarin

SALARIN
ni Greg Bituin Jr.

Mas masahol pa sila sa hayop
Walang pakialam sa kapwa
Demolis dito, demolis doon
Ang kanilang ginagawa.
Di bale nang may masaktan
Di bale nang marami ang umiyak
Di bale nang mawalan ng tahanan
Basta't makapagdemolis lamang.
Wala silang pakialam sa proseso
Wala silang pakialam sa maralita
Oo, wala silang pakialam
Pagkat wala silang pakiramdam.
Sila'y mga kawatang merong tsapa
Sila'y mga alagad ng payasong
Ayaw makipagnegosasyon
Oo, sila ang mga salarin ng maralita
At simple lang ang nais nila:
Urban poor genocide.

Nalathala sa publikasyong Taliba ng Maralita, Tomo IX, Blg 3, Taon 2004, p.8. Ang Taliba ng Maralita ang opisyal na publikasyon ng Kongreso ng Pagkakaisa ng Maralitang Lungsod (KPML).

Dalit para sa mga Duwag

DALIT PARA SA MGA DUWAG
ni Greg Bituin Jr.

akala ng mga duwag
ay makaliligtas sila
sa karit ni Kamatayan
kaya ayaw makibaka.

nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralitang Lungsod (KPML), Tomo IX, Blg. 1, Taon 2004, p.8. 

Organisador

ORGANISADOR

ni Gregorio V. Bituin Jr.

(tigpipitong pantig)

mula sa adhikaing

mapalaya ang masa

sa pagsasamantala

nitong mga buwaya

na nagdulot ng gulo

sa buong sambayanan

ay ninais mong maging

kabahagi ng masa,

hinangad mong matuto’t

lipuna’y inunawa

kung bakit bulok itong

kinasadlakang mundo,

niyakap ang prinsipyo’t

mga sakripisyo ng

mga organisador

na nauna na sa’yo,

tinahak ang landasing

iniwasan ng iba,

inalay mo ang iyong

panahon, pagsisikap,

pawis, luha, at dugo

para pagkaisahin

ang uring manggagawa

at masang maralita,

lagi kang taas-noo

sa pagmulat sa masa

hinggil sa nangyayari

sa bayang punung-puno

ng kabalintunaan

at lipunang ang hari’y

ang tubo at kapital

na nagdulot ng hindi

pagkakapantay-pantay

ng kalagayan nitong

mahirap at mayaman.

bunying organisador:

saludo kami sa’yo

pagkat buong buhay mo’y

iyo nang inilaan

para sa kapakanan

ng uring manggagawa

at masang tagalikha

ng ating kasaysayan

nang walang hinihintay

na anumang kapalit

kundi ang isang bukas

na sagana’t payapa.

kasama, mabuhay ka!

nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralitang Lungsod (KPML), Tomo VIII, Blg. 2, Taon 2003, p.8.

Pagpag

PAGPAG

ni Gregorio V. Bituin Jr.

maraming natirang pagkain

doon sa Jollibee at McDo

na itinapon na lamang

sa mga basurahan

at dahil sa gutom

ng maraming kababayang

naghihirap dahil idinemolis

ang kanilang mga tahanan

ay matyagang naghahalungkat

sa basurahan, pinipili at kinukuha

ang mga tirang hita, pitso, pakpak

ng malasang pritong manok

at saka ito ipapagpag

upang lutuing muli

o di kaya’y agad kanin upang

ipantawid-gutom

anong klaseng lipunan ito

at pinapayagang magkaganito

ang ating mga kababayang

isang kahig, isang tuka

nang dahil walang makain

nagtatyaga na lang sa pagpag

na mga tira-tirahan

mula sa Jollibee at McDo

nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralitang Lungsod (KPML), Tomo VIII, Blg. 2, Taon 2003, p.8.

Pagsara ng Telon (Tula kay FPJ)

SA PAGSARA NG TELON (TULA KAY FPJ)

ni Gregorio V. Bituin Jr.

Bata pa ako noon, nakikita ko na siya

Iglap kung bumunot ng baril sa pelikula

Panday itong hinahangaan ng masa

Magdebate man lagi kaming mag-ama

Ngunit pagdating sa mga pelikula niya

Kaming mag-ama’y tiyak na nagkakaisa

Mula sa pagiging aktor ay hinikayat sa pulitika

Nitong masang totoong galit na sa sistema

At hindi niya binigo itong kahilingan nila

Bilang isang pangulo ang pagkandidato niya

Nang sa kahirapa’y iahon ang taong umaasa

Ngunit sa dulo’y pagkatalo ang nalasap niya

Ang karaniwang masa’y di maniwala

Tingin nila na ang idolo nila’y dinaya

Kaya’y siya’y naghain ng protesta

Nang isang araw, sa ospital ay isinugod siya

Nang makaramdam ng hilo’y siya’y na-koma

Ang buong nasyon ay agad ngang nag-alala

Ngunit sadya yatang dumating na ang oras niya

Kamatayan niya’y totoong ikinabigla

Ng masang sa kanya’y humahanga

Sarado na ang telon, si FPJ ay wala na

Ngunit buhay pa itong naghihirap na masa

Ngayo’y wala na ang simbolo’t pag-asa nila

Kaya’t naiwan ang laban sa kamay na ng masa

At sa patuloy na paggiya ng uring manggagawa

Tunay na gobyerno’y tiyak na matatamasa.

Nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralitang Lungsod (KPML), Tomo IX, Blg. 4, Taon 2004, p.8.

Nobyembre 16, 2004

NOBYEMBRE 16, 2004
SA MGA MANGGAGAWANG PINASLANG SA HACIENDA LUISITA

ni Gregorio V. Bituin Jr.

hindi natutulog ang naiwan nyong mga kauri

mga sakripisyo nyo, sa wala’y di dapat mauwi

sa paghanap ng hustisya’y di kami mag-aatubili

at pagkakaisa ng manggagawa ang tanging susi.

mabuhay kayo, mga kapatid, kayo’y pumanaw man

isa kayong inspirasyon dito sa aming mga naiwan

alam naming hangga’t may kapitalistang gahaman

ang inyong halimbawa’y di mawawalan ng katuturan.

tanikala ng pagsasamantala’y dapat mapatid

harangan man ng kanyon o anumang balakid

tangan ang prinsipyo’y di kami magiging umid

itutuloy namin ang laban nyo, o, aming kapatid.

Nalathala sa publikasyong Taliba ng Maralita, Tomo IX, Blg 4, Taon 2004, p.8. Ang Taliba ng Maralita ang opisyal na publikasyon ng Kongreso ng Pagkakaisa ng Maralitang Lungsod (KPML)

Pacquiao versus Tyson

PACQUIAO VERSUS TYSON

ni Greg Bituin Jr.

(tulang may lalabindalawang pantig bawat taludtod)

Globalisasyon – landas daw ng progreso

Ito’ng sabi ng mga mangangalakal

Dapat daw pumaloob ang Pilipinas

Dito sa globalisadong kumpetisyon.

Pa’no makikipagkumpetensya itong

Maliit nating bansa sa malalaki

Samantalang nakikinabang lang dito’y

Ang mga korporasyong dayuhan lamang

Pagkat ito’y kumpetisyon ng kapital.

‘Pinas laban sa Europa’t Amerika?

Lalaban ang dilis sa mga balyena?

Parang si Pacquiao tayo laban kay Tyson!

- nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralitang Lungsod (KPML), Oktubre-Disyembre 2002, p.8.

Huwag Maging Tarciano

HUWAG MAGING TARCIANO

ni Greg Bituin Jr.

Nangyari circa Setyembre-Oktubre, 1950

(tulang may lalabindalawang pantig bawat taludtod)

Hoy, kilala mo ba si Tarciano Rizal

Na Arthur ang alias, at apo raw nitong

Pambansang bayani na mulang Calamba?

Isang Huk kumander itong si Tarciano

Na kay Sekretaryo Magsaysay naglahad

Ng lahat ng kanyang mga nalalaman

Sa buong kilusan nitong rebeldeng Huk.

At dahil sa sumbong nitong si Tarciano,

Sandaan at limang kasamahan sa Huk

Pati matataas na pinuno nito

Ang pinaghuhuli’t agad ikinulong!

Ipinagkanulo nitong si Tarciano

Ang sarili niyang mga kasamahan!

Di dapat tularan si Tarcianong hudas

Na kasumpa-sumpa’t dapat lang mabitay!

- nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralitang Lungsod (KPML), Oktubre-Disyembre 2002, p.8.

Kabataan, pumiglas ka

KABATAAN, PUMIGLAS KA
ni Greg Bituin Jr.

Kabataang maykaya at mahirap
Sa kalagayan ay di pantay
Ang isa'y nabubuhay sa sarap
Habang ang isa'y parang patay.

Paano pa makahihinga
At makaramdam ng ginhawa
Kung kabataa'y ginigiba
Ng sistemang palamara.

Edukasyo'y mataas ang presyo
Pagkat imbes na karapatan
Ay ginawa itong pribilehiyo
Ng kapitalista't pinagtutubuan.

Ah, hindi dapat ganito, hindi ganito
Kalagayan nati'y dapat mabago
Matagal na tayong iniinsulto
Nitong sistemang kapitalismo.

Kabataan, pumiglas ka
Sa higpit ng tanikalang
Iginapos ng sambayanan
Ng uring mapagsamantala.

"Tubo, tubo, tubo" ang siyang hiyaw
Nitong mga kapitalistang bangaw
"Baguhin ang sistema" ang sigaw
Nitong mga kabataang anga-angaw.

Dapat nang putulin ang kasamaan
Ng kapitalismong biniktima ay bayan
Hustisya sa lahat, hindi tubo sa iilan
Kaya sosyalismo'y ating ipaglaban.

Pagbabago ang landas
Sosyalismo ang lunas
Kabataan, ikaw ay puniglas
Sa kapitalismong posas.

Nalathala sa publikasyong Taliba ng Maralita, Tomo X, Blg 2, Taon 2005, p.8.

Ang Taliba ng Maralita ang opisyal na publikasyon ng Kongreso ng Pagkakaisa ng Maralitang Lungsod (KPML).

Kuryente at Yelo

KURYENTE AT YELO

ni Gregorio V. Bituin Jr.

13 pantig bawat taludtod

ano bang kaugnayan ng kuryente't yelo

bakit presyo ng kuryente'y naugnay dito

di ito maipaliwanag ng Meralco

pero si Juday, natalakay agad ito

pag sa tindahan daw, bumili ka ng yelo

kahit isang minuto lang may mababago

dahil matutunaw ang isang parte nito

bawas na ang yelo pagdating sa bahay nyo

ayon kay Juday, system's loss raw ay ganito

system's loss na di naman nagamit ng tao

pero binabayaran natin sa Meralco

binabayaran kahit di nagamit ito

mandaraya, mandaraya sila sa presyo

malakas managa, tinataga ang tao

di nagamit na kuryente'y babayaran mo

tulad daw ng binayarang tunaw na yelo

kuryenteng di na nga nagamit ay may presyo

taumbayan na ang ginagatasan nito

kaya pala tubo ng tubo ang Meralco

kawawa, kinakawawa na nila tayo

habang humahalakhak pa sila ng todo

ah, matagal na nila tayong niloloko

masang Pilipino'y kanilang ininsulto

ginamit pa si Juday na iniidolo

kaya nararapat lang magprotesta tayo

ibabad sa yelo silang taga-Meralco

Soneto sa Katotohanan

SONETO SA KATOTOHANAN

ni Gregorio V. Bituin Jr.

Payag ka bang pawang kasinungalingan

Ang mangaglipana sa ating lipunan?

Hindi ba’t maigi ay katotohanan

Itong pairalin sa kapaligiran?

Kasinungalinga’y siyang pumapatay

Sa katotohanang hangarin ay lantay

Pag baya’y nilugmok, sakbibi ng lumbay,

Pa’no pa gaganda itong iwing buhay?

Kasinungalinga’y simpait ng apdo

Kita nang hanapin ang bawat totoo

Harapin ma’y pawang mga sakripisyo

Kahit man banggain ay pader na bato.

Kapag totoo na’y ating nasumpungan

Pukyutang kaytamis ang malalasahan.

Hunyo 7, 2008

Sampaloc, Maynila

Ilang eksperimentasyon

ILANG EKSPERIMENTASYON
ni Greg Bituin Jr.

(Paunawa: Eksperimentasyon at pagkamalikhain ang naging saligan ng makata upang ang mga diona, tanaga at dalit na naririto ay pawang gumamit lamang ng patinig na "a" at walang patinig na "e", "i", "o", at "u",

APAT NA DIONA
(diona - tulang may tatlong taludtod at pitong pantig bawat taludtod)
Masa'y dapat mag-alsa
Kapag pamahalaan
Ay nagpapabaya na.

Ang mga manggagawa
Ang pag-asa ng masa
Na hangad ay paglaya.

Ang mapagsamantala
Ay dapat nang mawala
Nang lahat ay payapa.

Mapalad ang dalaga
Pagkat napangasawa
Ang tanyag na makata.


TATLONG TANAGA
(tanaga - tulang may apat na taludtod at pitong pantig bawat taludtod)
Ang mga mandaraya
At mga mangangamkam
At dapat lang mawala
Sa tahanan ng paham

Mababakas ng masa
Sa makata ang saya
Pagkat napangasawa
Ay magandang dalaga.

Mga daga sa parang
Magsasaka'y kaaway
Kaya kapag nadarang
Mangangatngat ng palay.


TATLONG DALIT
(dalit - tulang may apat na taludtod at walong pantig bawat taludtod)
Kapag naanyayahan ka
Ng pandak sa Malakanyang
Kaagad bang papayag ka
Sa mga atas ng hangal?

Kaya nadala sa bahay
Ng dalaga ang makata
Ay sapagkat mahal na nga
Ng makata ang dalaga

Manggagawa't magsasaka'y
Pawang malakas ang kamay
Magsasaka'y may kalabaw
Manggagawa'y nagpapanday

Nalathala sa publikasyong Taliba ng Maralita, Tomo X, Blg 3, Taon 2005, p.8.

Ang Taliba ng Maralita ang opisyal na publikasyon ng Kongreso ng Pagkakaisa ng Maralitang Lungsod (KPML).

Ang Komyun

ANG KOMYUN
ni Greg Bituin Jr.
10 pantig bawat taludtod

Paris Commune ay kasaysayan na
Sa manggagawa'y ating ibida
Aral tungo sa pagkakaisa
Ang halimbawa nilang maganda

Nalathala sa publikasyong Taliba ng Maralita, Tomo X, Blg 4, Taon 2005, p.8.

Ang Taliba ng Maralita ang opisyal na publikasyon ng Kongreso ng Pagkakaisa ng mga Maralita ng Lungsod (KPML).

Political Prisoners, Palayain

POLITICAL PRISONERS, PALAYAIN
ni Greg Bituin Jr.

bulok pa rin ang sistema
gayong marami na ang nagbuwis
ng buhay sa pakikibaka
at ngayon, ikinulong ng estado
ang mga aktibistang naniniwala
sa pagbabago

sakbibi ng lumbay ang mga
nagmamahal kung kailan ka
lalaya sa kulungang inilaan
ng bulok na estado na siyang
dahilan kung bakit ka kumilos
noon at sumasama sa mga rali
habang isinisigaw ang pagbabago

dapat kang palayain
dahil hindi ka bagay diyan
dahil marami ka pang magagawa
dahil kasama ka sa pagbabago
dahil kasama ka
kasama


nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralitang Lungsod (KPML), Tomo IX, Blg. 1, Taon 2004, p.8. 

Hindi Natutulog ang Gabi

HINDI NATUTULOG ANG GABI
ni Greg Bituin Jr.

habang tayo’y nahihimbing
sa kailaliman ng gabi
ang mga bampira’y gising
nagpaplano ng maitim
sa paghahasik ng lagim
upang buhay ng masa’y
tuluyang kumulimlim
kaya makiramdam ka
hindi natutulog ang gabi
nagpaplano silang maigi
… kung paano ka mabibigti
… ng sanlaksang kahirapan
… kung paano madadapurak
… ang iyong dangal
… kung paano mababarat
… ang lakas-paggawa
… kung paano idedemolis
… ang tahanan ng maralita
kaya maghanda ka, kasama
hindi natutulog ang gabi
upang sa pagdatal ng umaga’y
plantsado na ang mga balak nila
magkaisa tayong durugin sila

Soneto sa Pangarap Kong Lipunan

Soneto sa Pangarap kong Lipunan
ni Greg Bituin Jr.
(15 pantig bawat taludtod)

Pinapangarap ko’y isang lipunang makatao
Isang lipunang mga manggagawa ang nagtayo
Ngunit tiyak punung-puno ito ng sakripisyo
Maraming maaalay na luha, pawis at dugo.

Pagkat ang kinakailangan dito’y rebolusyon
Layunin nito’y pagbabago ng mga relasyon
Sa pribadong pag-aari’t sa moda ng produksyon
At sistemang kapitalismo’y tuluyang ibaon.

Ako’y di naman nag-iisa sa aking pangarap
Kundi kasama ko’y yaong kaparehong mahirap
Na nabubuhay sa mundong punung-puno ng saklap
Isang lipunang pantay-pantay itong aming hanap.

Nais ko’y lipunang walang mahirap at mayaman
Sosyalismo’y ipunla sa mundong sinapupunan.

Hunyo 6, 2008
sa tanggapan ng BMP

Awitin: Ang Buhay Aktibista

AWITIN

ANG BUHAY AKTIBISTA

ni Greg Bituin Jr.

I

Ang buhay ng aktibista’y dapat unawain

Kumikilos siya upang lipunan ay baguhin

Bulok na sistema’y nais niyang durugin

Upang maayos na lipunan ay ating kamtin.

Refrain:

Matinding sakripisyo itong kinakaharap

Ng aktibistang punung puno ng pangarap

Upang tuluyang wakasan itong paghihirap

Kaya siya ay ating pag-ukulan ng lingap.

II

Di pa kumakain ang pobreng aktibista

Na upang mabusog ay nagyoyosi siya

Minsan ay kape ang laman ng tiyan niya

Gutom ang kalaban sa pag-oorganisa.

(Ulitin ang Refrain)

III

Minsan ay naroon siya sa eskwela

At nagtatalakay sa estudyante’t masa

Tapos ay pupunta rin siya sa pabrika

Upang kausapin ang mga manggagawa.

(Ulitin ang Refrain)

IV

Maralitang dinemolis sa mga komunidad

Ay agad niyang tinutulungan at hinaharap

Nais niyang mailigtas ang mga mahihirap

Sa kuko ng mga ganid at mapagpanggap.

(Ulitin ang Refrain)

V

Siya’y aktibistang may disiplinang bakal

At ayaw niyang mahihirap ay kinakalakal

Siya’y aktibistang sa mundo’y iniluwal

Upang sosyalismo’y maitatag at maitanghal.

(Ulitin ang Refrain)

Abril 7, 2007, Unrubbia St., Lunsod Quezon

Etsa-puwera

ETSA-PUWERA
ni Greg Bituin Jr.

siya’y hindi naman manhid
ngunit laging nauumid
pagkat pawang namamasid
sa kanyang pali-paligid
ay pulos mga balakid
sa kanyang mga kapatid

krisis, kahirapan, kagutuman, dusa,
ang nararanasan ng maraming masa
at siyang malakas at may panahon pa
sa mga pagkilos ay ayaw sumama
nais niyang iba na lang ang gumawa
sa mga pagbabagong pangarap niya

meron naman siyang pakiramdam
ngunit ayaw niyang makialam,
at ang tangi niyang inaasahan
ay yaong mga may pakialam
ah, bahala na lang daw ang iba
sa pag-ugit ng kinabukasan

Nalathala sa publikasyong Taliba ng Maralita, Tomo XII, Blg 1, p.8.

Ang Taliba ng Maralita ang opisyal na publikasyon ng Kongreso ng Pagkakaisa ng Maralitang Lungsod (KPML)