Basta't gawin natin ang mabuti

BASTA'T GAWIN NATIN ANG MABUTI
ni Gregorio V. Bituin Jr.
15 pantig bawat taludtod

kaaway silang naniniwala sa sabi-sabi
mga mapangwasak silang ang kapara'y buwitre
mapanira sa kapwa, sakim, at makasarili
masaya silang ang iba'y kanilang binibigti

sila'y mga buwitreng walang katiting na bait
silang nabubuhay sa yabang, katakawan, inggit
sarili nilang ginhawa ang laging ginigiit
habang karapatan ng iba yaong ginigipit

huwag tayong tumulad sa kanilang pang-aapi
basta't gawin nating lagi kung ano ang mabuti
dukha man, may dangal tayong maipagmamalaki
pakikipagkapwa't pagpapakatao'y maigi

mula sa sariling pawis ang ating kakainin
mula sa sariling kayod bawat ating dadamtin
mula sa sariling sikap anumang palad natin
mula sa sariling sipag ang anumang kakamtin

tayo'y may dangal, sikaping may bait sa sarili
di nang-aagrabyado ng kapwa't di nang-aapi
nagpapakatao, masaya sa buhay, may silbi
nasa gawa't isip sa lahat ay makabubuti

Pagsintang ginipit

PAGSINTANG GINIPIT
ni Gregorio V. Bituin Jr.
13 pantig bawat taludtod

diwatang sinasamba, ako'y nilalait
dahil isa lang akong aktibistang yagit
totoo naman, ako'y laging nasa gipit
sapat ba iyon upang siya'y magmalupit?
marahil nga, pagkat pinangarap ko'y langit
diyosang ang pangalan ay lagi kong sambit

ako'y dukha, walang anumang pag-aari
may pag-aari man ay mayroong kahati
walang sambuo, kundi kala-kalahati
iba'y hiram, iba'y bigay, kundi man hingi
ngunit nagsisipag ako't nagpupunyagi
bakasakaling pagsinta'y maipagwagi

dapat kayang ang iwing pagtingin sa kanya
na aking sinisinta'y ibaling sa iba?
ngunit ganoon kaya'y aking makakaya?
siya lamang ang nasa isip ko tuwina
siya lamang ang sa puso ko'y nakatira
siya, tanging siya lamang ang sinisinta

diwatang sinasamba'y di ko pinipilit
gaano man katapat ang pusong lumapit
sawing kapalaran ba'y aking masasapit?
o kapalaran kong siya'y aking madagit?
kung may pag-asa, pagsinta ko'y igigiit
kung wala, lalayo ako't di na hihirit

Ang buhay ko'y sa kilusan na nakalaan

ANG BUHAY KO'Y SA KILUSAN NA NAKALAAN
ni Gregorio V. Bituin Jr.
15 pantig bawat taludtod

ang iwing buhay ko'y sa kilusan na nakalaan
nasa kamay na nila ang buhay ko't kamatayan
pagkat ako'y aktibistang pagbabago'y adhika
nasa diwa'y paglilingkod sa uring manggagawa
tanging prinsipyong niyakap ang pinalalaganap
saanma't kailan upang matupad ang pangarap
na lipunang walang anumang pagsasamantala
ng tao sa tao't wala nang elit at burgesya
kilusan ang kapiling sa maghapon at magdamag
at sa pakikibaka'y nananatiling matatag
patuloy na sinusunod ang disiplinang bakal
ng kilusan bilang akda ng buhay na may dangal
sadyang dito na ako sa kilusan mamamatay
pagkat dito na nakalaan ang iwi kong buhay

Ikulong lahat ng maysala!

IKULONG LAHAT NG MAYSALA!
ni Gregorio V. Bituin Jr.
13 pantig bawat taludtod

"beyond reasonable doubt" upang maikulong
ang mga trapong sa pagnanakaw nalulong
di lang sina Sexy, Tanda't Poging kuratong
pati liberal at oposisyong nandambong

ikulong lahat, senador o kongresista
na sa kabang bayan ay kawatang talaga
walang dapat santuhin kung maysala sila
dapat mamugot ang palakol ng hustisya

kaiba ito kapag isang kilong tuyo
ang ninakaw ng dukhang ramdam na'y siphayo
bugbog, kulong agad, dangal pa'y dinuduro
walang "beyond reasonable doubt" sa damuho

di dapat sa tsismis, bulungan o masmidya
na pagkatao nila'y agad ginigisa
suspek lamang kung walang anumang pruweba
di gaya sa dukhang di patas ang hustisya

sila'y dalhin sa tamang proseso ng batas
na dapat din sa dukhang kinulong ng paspas
batas sa dukha't mayaman, dapat pahehas
sa "beyond reasonable doubt" dapat ay patas

lahat ng pagkakataon ay bigyan sila
upang makapagtanggol, makapagdepensa
di gaya sa dukhang di patas ang hustisya
wala silang kawala kung may ebidensya

kaya sinumang napatunayang kawatan
pag "beyond reasonable doubt" na ang saligan
dapat kulong, dukha, mayaman o trapo man
ang hustisya'y dapat walang kinikilingan

Anang dukha: "Kakainin na lang, ninakaw nyo pa!"

 

ANANG DUKHA: "KAKAININ NA LANG, NINAKAW NYO PA!"
ni Gregorio V. Bituin Jr.
15 pantig bawat taludtod

galit na ang mga maralita, galit na galit
dahil lipunang ito sa kanila'y anong lupit
dukha'y may pangarap ngunit sistema'y mapagkait
kakainin nila'y ninakaw pa ng trapo't elit

ang mga maralita ba'y wala nang karapatan
sa libreng edukasyon, maayos na kalusugan
sa pabahay na bilyon-bilyong pondo'y nakalaan
pati sa pagkaing sapat at buhay na maalwan

anang dukha: "kakainin na lang, ninakaw nyo pa!"
senador at kongresista ang tinutukoy nila
at kawatan sa gobyernong naging bingi't bulag na
pagkat pondong laan sa bayan ay ninanakaw pa

anong hustisya mayroon para sa maralita
at mga kawatang elitista'y nagpapasasa
kaban ng bayan ang dinuhagi ng mga linta
mga senador at kongresista'y nagpapasasa

galit na ang mga maralita, galit na galit
bulok na sistema'y totoong nakapagngangalit
mga kawatan sa kaban ng bayan ay nang-umit
iyang pork barrel na laan sa bayan ay kinupit

anang dukha: "kakainin na lang, ninakaw nyo pa!"
panaghoy nila sa bayan ay tunay na hustisya
isang hustisyang babago sa bulok na sistema
bubuo sa lipunang walang pagsasamantala

* ang litrato'y mula sa facebook ni Anthony Barnedo, sec. gen. ng KPML-NCRR

Kapara ko'y binhing sa putik ibinaon

KAPARA KO'Y BINHING SA PUTIK IBINAON
ni Gregorio V. Bituin Jr.
13 pantig bawat taludtod

kapara ko'y binhing sa putik ibinaon
na hanap ay liwanag sa pagkatilapon
ako'y nakikibaka sa bawat maghapon
at mamumunga ito sa takdang panahon

naiwasan ko ang ahas na makamandag
tuloy ang pagkilos sa maghapo't magdamag
sa akin pa'y hinarap ay kaygandang dilag
prinsipyo ko'y tinanganan, di napalaspag

binhi akong sa putik biglang nagkabuhay
sumuloy ang ugat sa katawang nahimlay
tinubuan ng dahon, sanga't gintong uhay
dagta ko'y pasalubong sa bukangliwayway

tulad ko ma'y binhing napalibing sa putik
daan-daanan man ng sangkaterbang hantik
nabuhay ako't lumagong may bungang hitik
habang hustisya't katwiran ang nasa't hibik

Kanya-kanyang palusot

KANYA-KANYANG PALUSOT
ni Gregorio V. Bituin Jr.
13 pantig bawat taludtod

alitan nilang mga pulitiko'y hitik
nagbabatuhan ng kinulapol na putik
bariles lamang ba iyon ng mga biik
na sa dangal nila'y yumurak at nagbatik

kanya-kanyang baho ang ginugunam-gunam
sala-salabid ang sa kapwa'y pang-uuyam
makalusot sa kontrobersya'y inaasam
nang gumaan ang nagsikip na pakiramdam

"wala akong sala" ang kani-kanyang sambit
"di ko alam iyan" kahit maraming sabit
"sa kaban ng bayan ay di kami nang-umit"
"sa pork barrel na iyan, di kami nangupit"

mata ng taumbayan ay nakakapaso
tila nais nilang sila na'y maglaho
paano gagaling ang pusong nagdurugo
kung nasisira'y pagkatao nila't puso

"masama ang pork" anang mga kongresista
at senador na nadawit sa kontrobersya
kanya-kanyang palusot sa mata ng masa
nagbabakasakaling makaligtas sila

Sumali sa protesta laban sa korapsyon!

SUMALI SA PROTESTA LABAN SA KORAPSYON!
ni Gregorio V. Bituin Jr.
15 pantig bawat taludtod

kaytagal na palang loko ang ilang lingkod-bayan
na animo sa taumbayan ay naninilbihan
iyun pala pinopokusan na’y kaban ng bayan
sistema’y inanak silang pulitikong kawatan

katiwalian ay talamak na, animo'y sakit
maraming nahawa sa sistemang sadyang kaylupit
sa kaban ng bayan, mga pulitiko'y nangupit
animo'y buwitre ang mga trapong mapang-umit

kung niloloko na tayo ng mga pulitiko
pulos katiwalian doon at kurakot dito
di ba tayo kikilos, papayag na lang ba tayo?
o sila'y patatalsikin na sa kanilang pwesto?

kaharap natin ang panibagong krisis at hamon
upang mahal nating bayang ito'y ating ibangon
kaya sali na sa protesta laban sa korapsyon
ito'y prinsipyadong pagkilos, di paglilimayon

lahat ng sangkot sa katiwalian ay hulihin
kahit pulitiko silang pulos mga bigatin
lahat ng may kasalanan ay agad na litisin
napatunayang nagkasala sa piitan dalhin

ngunit tandaang di sapat na mapatalsik lamang
ang mga pulitikong sangkot sa katiwalian
huwag rin tayong magkasyang sila'y maikulong lang
higit sa lahat, sistemang bulok ay mapalitan

Tatlong tula laban sa inhustisya sa manggagawa

 

TATLONG TULA LABAN SA INHUSTISYA
ni Gregorio V. Bituin Jr.
15 pantig bawat taludtod

i

pagkakaisa ng manggagawa'y kailangan na
upang baguhin itong bansa't bulok na sistema
huwag hayaang maghari ang pagsasamantala
wakasan na ang kabulukan ng trapo't burgesya

ii

manggagawa'y lagi nang pinagsasamantalahan
batayang karapatan nila'y nilalapastangan
ng mga tiwaling opisyal sa pamahalaan
ah, dapat nang patalsikin iyang mga gahaman!
hustisya sa lahat ng obrerong pinahirapan!

iii

anong dapat gawin sa mga may bitukang halang?
na karapatan ng mga obrero'y hinaharang
walang prinsipyo silang sinasamba'y pera lamang
mga halang silang dapat sa apoy dinadarang!

Si Ka Romy, sosyalista, internasyunalista

SI KA ROMY, SOSYALISTA, INTERNASYUNALISTA
ni Gregorio V. Bituin Jr.
15 pantig bawat taludtod

isinilang siya sa Araw ng Kababaihan
at siya'y nawala sa Araw ng Kapaligiran
dalawang araw yaong kilalang pandaigdigan
si Ka Romy, pandaigdig din ang prinsipyong tangan

tila maging internasyunalista'y itinakda
mula nang maging isang karaniwang manggagawa
sosyalistang akda’y binasa, nagpakabihasa
hanggang siya’y kumilos din sa iba't ibang bansa

panahon ng batas-militar, siya'y nabilanggo
pinahirapan, tinortyur, dinanas ay madugo
lumaya, patuloy na kumilos, mata'y lumabo
sosyalismo'y pinalaganap sa maraming dako

Bukluran ng Manggagawa para sa Pagbabago
ay kasamang nagtatag at siyang unang pangulo
naniniwala siyang ang internasyunalismo
ang tumpak upang pagbuklurin ang uring obrero

di nag-lie low, sosyalismo'y talagang tinanganan
sa Malaysia'y nakulong din, matatag nanindigan
pamilya'y inaruga, pagkaama'y nagampanan
maysakit man, uring manggagawa'y nasa isipan

sistemang bulok ay ayaw na niyang manatili
pangarap niyang sana manggagawa'y magpunyagi
nang lumaya sa sistemang sadyang mapang-aglahi
wala na siya, ngunit tuloy ang laban ng uri

Ka Romy, taas-kamaong pagpupugay, paalam
sa aming puso't isipan ay di ka mapaparam
tulad mo, sosyalismo'y lagi naming tatanganan
nang pangarap nating lipuna'y maging kaganapan

Halina't daigdig ay alagaan natin!

HALINA'T DAIGDIG AY ALAGAAN NATIN!
ni Gregorio V. Bituin Jr.
13 pantig bawat taludtod

pandaigdigang araw ng kapaligiran
ikalima ng Hunyo ang araw na iyan
araw na tayo'y pinaaalalahanan
paligid natin ay linisin, alagaan

sa dagat lulutang-lutang ang mga plastik
sa ilog, mga basura'y kahindik-hindik
hinayaang basura'y sa atin ang balik
sa basurang sinunog ay mapapahibik

ang maruming usok ay masakit sa baga
sa maruming kanal naglulungga ang daga
sa maruming lugar, langaw ay laksa-laksa
sa maruming paligid, tayo ang kawawa

sa ganitong lugar, magkakasakit tayo
tila tinamaan ng sanlibong delubyo
tila laksang langaw, inatake ang tao
bakit pinapayagang nangyayari ito?

puno'y pinutol, kinalbo ang kagubatan
tinapunan ng basura ang karagatan
nagbabago ang klima ng sandaigdigan
paano haharapin ang problemang iyan?

nukleyar, insinerador, maruming hangin
coal plant, minahan, dam, kayrami ng usapin
simula ngayon, anong dapat nating gawin?
halina't daigdig ay alagaan natin!

Utos ng hari, kayang mabali

UTOS NG HARI, KAYANG MABALI
ni Gregorio V. Bituin Jr.
5 pantig bawat taludtod

anang kalipi:
"utos ng hari
di mababali"
tunay o hindi?

ngunt maari
itong mabali
kung naduhagi
ang pagkahari

pagkat salapi
nila'y binawi
ng mga pari
na di kalipi

kung mahahati
ang kanyang lahi
pawang pighati
ang bawat hikbi

namumutawi
sa mga labi
dapat mabawi
ang pagkalugi

utos ng hari
kayang mabali
lalo na't lipi
nila ang sawi

kung pagkahari
ay di mabawi
wala nang hari
ang buong lipi

Tahanang puno o hawla?

TAHANANG PUNO O HAWLA?
ni Gregorio V. Bituin Jr.
15 pantig bawat taludtod

"God loved the birds and invented trees. Man loved the birds and invented cages. (Mahal ni Bathala ang mga ibon kaya lumikha ng mga puno. Mahal ng tao ang mga ibon kaya lumikha ng mga hawla.)". ~ Jacques Deval, Afin de vivre bel et bien

makahulugan yaong tinuran ni Jacques Deval
na kung ating lilimiin ay magandang mausal:
upang ipakitang ibon ay sadyang minamahal
ang tahanan nilang puno'y nilikha ng Maykapal

kaylaki ng kaibhan nito sa nilikha ng tao
upang ipakitang ibon ay mahal na totoo
ang nilikha'y hawla't ibon ay pinatira rito
pinapakain dito't inaalagaang todo

tao'y siyang mayhawak ng kapalaran ng ibon
puspusang inalagaan nang di ito magutom
kay Bathala, ang ibon ay bahalang maglimayon
at bahalang maghanap ng pagkaing malalamon

sadyang iba ang pag-ibig ng tao't ni Bathala
sino ang sa ibon ang tunay na nag-aalaga
sa isa, ang puno'y tahanang malaya't payapa
isa nama’y palamuti ang ibong walang laya

Mahirap manahimik na lang sa isang tabi

MAHIRAP MANAHIMIK NA LANG SA ISANG TABI
ni Gregorio V. Bituin Jr.
15 pantig bawat taludtod

mahirap manahimik na lang kung may kaguluhan
at iisipin mong wala ka namang pakialam
pagkat di mo iyon gulo kundi sa pamayanan
bahala na ang iba hanggang sa ito'y maparam

ngunit mahirap manahimik lang sa isang tabi
pagkat nangyayari'y tunay, di mo lang guniguni
pulitika'y negosyo, pulitiko'y walang silbi
kaysama ng mga balita sa araw at gabi

bilang pagpapakatao, wala ka bang gagawin?
iisipin mo lang bang lagi'y iyong kakainin?
paano iyang kapwa mong nabubuhay sa dilim?
wala na bang bukangliwayway, pulos takipsilim?

maiging manahimik sa tabi kung magsusulat
at hayaang sa sulatin mo ang tao'y mamulat
kung mananahimik lang habang iba'y nagsasalat
budhi na ang magpapakilos kundi'y manunumbat

Huwag nang manabako

HUWAG NANG MANABAKO
(Alay sa pagdiriwang ng World No Tobacco Day tuwing Mayo 31)
ni Gregorio V. Bituin Jr.
9 na pantig bawat taludtod

iyong mahalin, kaibigan
ang katawan mo't kalusugan
lalo na ang bagang daluyan
ng masarap na pakiramdam

pag yosi'y tuluyang sinira
ang napakahalagang baga
anong gagawin, tutunganga?
mayroon pa bang magagawa?

hangga't maaga'y tigilan mo
iyang bisyong pananabako
payong kapatid lamang ito
ang desisyon ay nasa iyo

Ang Paggising - tula ni Karl Marx

ANG PAGGISING
Tula ni Karl Marx, circa 1837
Malayang salin ni Greg Bituin Jr.

I
Pag nagkapatlang ang kumikislap mong mata
Nabibighani't nanginginig,
Tulad ng pagala-galang kwerdas ng musika
Na dinidibdib, na naiidlip,
Nakatali sa mga kudyapi,
Hanggang sa pamamagitan ng belo
Ng pinakabanal na gabi,
Pagkatapos mula sa itaas kuminang
Ang walang hanggang bituin
Nang buong pusong pagmamahal.

II

Nanginginig, napasubsob ka
Habang hinihingal
Natatanaw mo ang di matapos
Na walang hanggang daigdig
Sa itaas mo, sa ibaba mo,
Hindi matamo, walang katapusan,
Lumulutang sa sayaw - serye
Ng di mapakaling kawalang-hanggan; 
Isang atomo, nahulog ka
Sa pamamagitan ng Uniberso.

III

Ang paggising mo’y
Walang katapusang pagbangon,
Ang pagbangon mo’y
Walang katapusang pagbagsak.

IV

Kapag ang nagsasayaw na apoy
Ng iyong kaluluwa'y sumalakay
Sa sarili nitong kailaliman,
Pabalik sa dibdib,
May lumilitaw na walang hanggang
Pinasisigla ng kaluluwa
Tinatanganan ng matamis – namamagang
Mahiwagang  himig,
Ang lihim ng kaluluwa'y
Bumabangon mula sa kasamaang
Di nito maarok.

V

Ang pagkasubsob mo’y
Walang katapusang pagbangon.
Ang walang katapusan mong pagbangon
Ay may nanginginig na labi
Ang namula sa Aeterong
Nagliliyab, walang hanggang
Pagsintang halik ng ulo ng Bathala.


The Awakening
Poem by Karl Marx

I

When your beaming eye breaks
Enraptured and trembling,
Like straying string music
That brooded, that slumbered,
Bound to the lyre,
Up through the veil
Of holiest night,
Then from above glitter
Eternal stars
Lovingly inwards.

II

Trembling, you sink
With heaving breast,
You see unending
Eternal worlds
Above you, below you,
Unattainable, endless,
Floating in dance-trains
Of restless eternity;
An atom, you fall
Through the Universe.

III

Your awakening
Is an endless rising,
Your rising
An endless falling.

IV

When the rippling flame
Of your soul strikes
In its own depths,
Back into the breast,
There emerges unbounded,
Uplifted by spirits,
Borne by sweet-swelling
Magical tones,
The secret of soul
Rising out of the soul's
Daemonic abyss.

V

Your sinking down
Is an endless rising,
Your endless rising
Is with trembling lips-
The Aether-reddened,
Flaming, eternal
Lovekiss of the Godhead.

Panaghoy sa manggagawa

PANAGHOY SA MANGGAGAWA
ni Gregorio V. Bituin Jr.
11 pantig bawat taludtod

manggagawa, kayo ang rebolusyon
napakahalaga ng inyong misyon

narito ba kayo sa aming tabi
sama ba kayo o bahala kami

manggagawa, maging bahagi't saksi
sa pagguhit ng bagong kasaysayan

Sa iyong kaarawan, klasmeyt Fides

SA IYONG KAARAWAN, KLASMEYT FIDES
ni Gregorio V. Bituin Jr.
15 pantig bawat taludtod

pagbubunyi ang alay ko sa iyo, klasmeyt Fides
ikaw na animo'y diyosang may ngiting kaytamis
aliwalas sa iyong mukha'y malinaw na batis
tila ba di mo danas ang kabiguan at hapis

sa iyo, klasmeyt Fides, maligayang kaarawan
nawa ay lagi kang nasa mabuting kalagayan
di nagkakasakit at may magandang kalusugan
ikaw na diyamante sa santambak na kariktan

nawa, klasmeyt Fides, sa pag-usad ng mga taon
iwing buhay mo'y payapa't magandang inspirasyon
nawa'y lagi kang matuwid, mabait, mahinahon
puso't diwa'y naglalambing sa kahapon at ngayon

maligayang kaarawan, O, Fides, mabuhay ka!
pakatandaan mong sa buhay, laging may pag-asa

Ang dukha nating kapwa

ANG DUKHA NATING KAPWA
ni Gregorio V. Bituin Jr.
15 pantig bawat taludtod

tao rin sa lipunan silang dukhang laging kapos
at ayaw sa kanila ng kapitalistang tuso
di raw nababagay ang dukha sa pagnenegosyo
pagkat dukha'y mukhang basahan at mga busabos

malupit iyang mga elitista, anong lupit
sa lipunang ang buhay ng dukha'y hinihilahil
dukhang sinikil ng negosyo't pulitikong sutil
dahil isinilang na kapos, laging nagigipit

kaya dukha silang inaapi't kinakawawa
tila kinabukasan nila'y nasa takipsilim
walang matanaw na liwanag, bukas ay kaydilim
dukhang walang-wala'y itinuring nang hampaslupa

ngunit kaytindi ng burgesyang animo'y kaylakas
ayaw nilang kasalo ang mga dukha sa dulang
animo'y gagalisin, ang tingin sa dukha'y halang
ang mga bituka't turing agad ay talipandas

ipinagtanggol ng dukha ang kanilang sarili:
"dukha man kaming isinilang, sa inyo'y kaiba
tao rin kaming may dangal, itinataboy nyo pa
matalino't mayaman kayo ngunit mapang-api"

ang mga nasa burgesya'y agad namang tumugon:
"karima-rimarim kayo't talagang mababaho
sa lipunang ito, tulad nyo'y dapat lang maglaho
mga patay-gutom kayong nais lagi'y lumamon"

may puwang ba sa mundo ang dukhang kinakawawa
ng mapang-aping uring sa kanila nga'y kaylupit
pinagapang sa lusak, itinataboy na pilit
turing sa kanila'y di tao, pagkat sila'y dukha

sa mataas mang lipunan ay di katanggap-tanggap
pagkat lipunang ito'y para lang daw sa negosyo
sa globalisasyon at mayayamang pulitiko
kaya sa lipunang ito, dukha'y di malilingap

buhay ng dukha'y itinuring na kahindik-hindik
kalunos-lunos ang kahirapan nilang sinapit
tumapang sila pagkat lagi silang nilalait
ng burgesyang sa kanila'y pagdurusa ang hasik

iisa lang ang pinapangarap ng mga dukha
ang maitayo ang isang lipunang makatao
dangal at karapata'y kikilalaning totoo
at pantay-pantay na ang kalagayan nitong madla

Ang pangit na anghel

ANG PANGIT NA ANGHEL
ni Gregorio V. Bituin Jr.
11 pantig bawat taludtod

ang mga aswang ay anghel ng diyos
at ayaw sa kanila ng demonyo
di raw bagay ang aswang sa impyerno
pagkat sila'y anghel na binusabos

malupit ang mga anghel, kaylupit
anak ng diyos silang hinilahil
silang mga itinaboy ng anghel
dahil ipinanganak silang pangit

kaya aswang ay naroon sa gitna
ng bukangliwayway at takipsilim
anghel sa liwanag, taning sa dilim
aswang naman ay nahulog sa lupa

ngunit kaylakas ng anghel, kaylakas
di maari sa liwanag ang aswang
itinuring nitong aswang ay halang
ang bituka't isa ring talipandas

pinagtanggol ng aswang ang sarili:
"ipinanganak lang akong kaiba
ngunit ako'y agad tinaboy nyo na
anghel nga kayo ngunit mapang-api"

ang anghel sa kanya'y agad tumugon:
"karima-rimarim ang iyong anyo
kaya sa langit dapat kang maglaho
at diyan sa lupa ka maglimayon"

kaya pala aswang ay nasa lupa
anghel silang anyo'y napakapangit
kaya itinaboy mula sa langit
at dito sa lupa'y pagala-gala

si Taning man ay di siya matanggap
sa impyerno'y pawang maganda't macho
aswang ay walang puwang sa impyerno
at wala sa kanya doong lilingap

aswang na ang anyo'y kahindik-hindik
gayong anghel siyang ubod ng bait
tumapang dahil laging nilalait
nagrebelde't lagim ang naihasik

iisa lang ang pangarap ng aswang
makabalik sa langit at tanggapin
anuman yaong kanyang anyong angkin
anghel pa rin siya sa kalangitan

Sanggang-dugo

SANGGANG-DUGO
ni Gregorio V. Bituin Jr.
13 pantig bawat taludtod

magkasama kami sa mga kasiyahan
magkasangga kami sa anumang labanan
kami ang sanggang-dugo hanggang kamatayan
sanggang-dugong di palulupig kaninuman

ang pinanggalingan namin ay isang dugo
magkakapatid kaming dugo'y magkahalo
sa magkasanggang-dugo'y walang naglililo
tapat sa adhika, pangarap at pangako

Ang sanhi ng ating kahirapan

ANG SANHI NG ATING KAHIRAPAN
ni Gregorio V. Bituin Jr.
15 pantig bawat taludtod

"If the misery of the poor be caused not by the laws of nature, but by our institutions, great is our sin." ~ Charles Darwin

bakit isinilang na mahirap ang mahihirap?
sila bang mga dukha'y hindi marunong mangarap?
dahil naghihirap dapat ba silang nililingap?
kaginhawaan ba'y kailan nila malalasap?

mahihirap ba'y isinilang upang maging banal?
maging dukha'y mapalad, iba'y ganito ang usal
tila mali itong paniwala nila’t pangaral
siphayo’t dusa ang danas ng dukhang nagpapagal

mapalad ang maging dukha, ang sabi daw ng pari
huwag galawin ang kinamal nilang pag-aari
magdasal kayo habang lupa nyo'y kanilang mithi
don at donya'y dumami, katutubo'y inaglahi

kung naging mahirap kayo gawa ng kalikasan
iyon naman ay madali nating maunawaan
binagyo, dinelubyo, tinangay yaong tahanan
binaha't nangasira ang anuman nilang yaman

ngunit kung inagawan ng karapatan ang dukha
masasabi pa kaya nilang dukha'y pinagpala?
lupaing ninuno'y inagaw sa nagdaralita
ari ng isang tao ang ekta-ektaryang lupa

kaya makatuwiran ba ang ganitong pag-angkin?
ito'y di makatao, dukha'y nagtila alipin
upang mapawi ang hirap ng kapwa tao natin
kailangang ang pag-aaring pribado'y pawiin

gumagawa'y dapat magkaisa't iisang uri
ang yaman ng lipunan ay dapat nilang mabawi
agawin sa kamay nitong burgesyang naghahari
at pribadong pag-aari'y dapat nilang mapawi

ito na lang ang paraan nang wala nang maghirap
yaman ng lipunan ay bawiin sa mapagpanggap
pantay na ipamahagi sa lahat ng mahirap
upang lipunang makatao'y atin nang malasap

Kung may rosas ako habang inaalala kita

KUNG MAY ROSAS AKO HABANG INAALALA KITA
ni Gregorio V. Bituin Jr.
15 pantig bawat taludtod

kung may rosas ako habang inaalala kita
may hardin ako ng rosas para sa iyo, sinta
hardin na sumusulpot lang pag nagugunita ka
pinalago ng pag-ibig sa tulad mong diyosa

kapara mo'y rosas na kayganda ngunit matinik
ngunit isang rosas kang bango ang inihahasik
nagbubunyi't naghihiyaw ang puso kong tahimik
pagkat nariyan kang nais kong gawaran ng halik

sa mga kariktang nakasalamuha ko, sinta
diyamante kang namumukod-tangi sa kanila
kung tangan ko ang rosas habang nasa gunita ka
tandang ikaw ang pinakaiibig kong diyosa

Dapat ang masa'y ganap na lumaya

DAPAT ANG MASA'Y GANAP NA LUMAYA
ni Gregorio V. Bituin Jr.
11 pantig bawat taludtod

paanong sarili'y poprotektahan
kung ang kapwa mo'y walang kalayaan
magiging ganap na malaya ka lang
kung iba'y may ganap na kalayaan

kaya halina't tayo'y makibaka
durugin yaong mapagsamantala
palitan iyang bulok na sistema
kalayaa'y dapat kamtin ng masa

ang paglaya ng masa'y paglaya mo
paglayang dapat nating matrabaho
sa mundong itong sadyang gulung-gulo
na karapata'y di nirerespeto

sa pangunguna nitong manggagawa
dapat ang masa'y ganap na lumaya
magkaisang uri silang babangga
at dudurog sa burgesyang kuhila

Ang lasenggo at ang lasenggero

ANG LASENGGO AT ANG LASENGGERO
ni Gregorio V. Bituin Jr.
15 pantig bawat taludtod

ang lasenggo sa nayon at lasenggero sa lungsod
ay nagkasarapan sa tunggaang nakalulunod
pulutan nila'y balot na pampalakas ng tuhod
napag-usapan ang buhay, bakit kayod ng kayod

lasenggo'y nais nang iwan ang sinasakang lupa
nais magtungo sa lungsod at maging manggagawa
tugon ng lasenggero, sa lungsod kayraming dukha
mabuti't sa nayon, magtanim lang, may mapapala

basta masipag ka sa nayon, may maitatabi
may lupa roong matatamnan, di ka magsisisi
sa lungsod, dapat mautak, marunong dumiskarte
magpautang, magpataya, mangamuhan, maapi

patuloy sa pagtunggang kayraming napag-usapan
pati mga pangarap nila sa kinabukasan
nais layuan ang kasalukuyang kalagayan
pinapangarap kung saan buhay nila’y aalwan

naubos ang tagay, natulog, nagising, tulala
pagkatapos mahulasan, sila'y nakatunganga
kinita'y napunta sa inom, ngayon, walang-wala
kinitang maghapon, di naipon, walang napala

Siga sa kalye

SIGA SA KALYE
ni Gregorio V. Bituin Jr.
5 pantig bawat taludtod

siga'y naroon
sa aming kalye
ngunit di bale
ako'y may baston

kapag dinale
ako ng siga
ako'y sasangga
sa pag-atake

sa aking diwa
siya'y babagsak
dugo'y dadanak
hanggang sa lupa

ako'y titindig
ng taas-noo
kahit kanino
di palulupig

Nang binanlian ng kumukulong tubig ang Pinay sa Riyadh

NANG BINANLIAN NG KUMUKULONG TUBIG ANG PINAY SA RIYADH
ni Gregorio V. Bituin Jr.
15 pantig bawat taludtod

kumukulong tubig yaong ibinuhos sa kanya
ng among babaeng kundi man baliw ay maldita
sa Riyadh umano'y dalawang buwan pa lang siya
at pawang mga pasa ang agad niyang nakuha

tinanggap niya sa among lalaki'y pasa't palo
ngayon, sa among babae'y tubig na kumukulo
sinapit niya'y sadyang nakadudurog ng puso
siya pa'y pinagtrabaho kahit puno ng paso

anim na oras pa umano bago pinagamot
dinala sa isang klinika ng among balakyot
sa kanya'y kaytindi ng kalagayang idinulot
dapat lang niyang lisanin ang mga among salot

sino bang matinong taong sa kanya'y magbabanli
ng tubig na kumukulo, sadyang nakamumuhi
mga amo niya'y sadya ngang walang puso't budhi
nagamot man, pinagtrabaho pa't di kinandili

di makatao ang naging amo niya sa Riyadh
nagkamali ng napasukan sa trabahong hangad
sa pinsalang tinamo, amo'y dapat lang magbayad
sinapit ng mga tulad niya’y dapat malantad

sa nangyari'y di dapat mabagal ang embahada
lalo't kababayan ay kailangan ng hustisya
dapat managot yaong mga maysala’t magdusa
ang sinapit niya'y di dapat maulit sa iba

Ang tingin nila sa dukha'y dagang dapat lipulin

ANG TINGIN NILA SA DUKHA'Y DAGANG DAPAT LIPULIN
ni Gregorio V. Bituin Jr.
15 pantig bawat taludtod

sa flood summit ng gobyerno, ang biktima'y kriminal
maralita ang sinisisi sa bahang dumatal
dukhang todong binaha, itinuring na sagabal
marapat daw mawala nang lumuwag ang imburnal

ang tingin nila sa dukha'y dagang dapat lipulin
at sila'y Pied Piper na dukha ang pupuksain
tingin nila bawat dukha'y nakagawa ng krimen
krimen ang maging mahirap sa ganitong rehimen

nais linisin, pagandahin ang mga estero
kaya tinataboy ang dukhang nakatira rito
project cost ay kaylaki, sa social cost, walang pondo
kung meron man, tinitipid, ibinubulsa ito

para sa kanila, itaboy dapat iyang dukha
iyan umano'y buod ng flood summit na ginawa
dagang dapat nang lipulin ang mga maralita
pagkat dukha raw ang dahilan kaya nagbabaha

wala sanang problemang linisin iyang estero
basta't maralita'y ituring nilang kapwa tao
ang paglilipatan pa'y di malayo sa trabaho
di sa kung saang relokasyong magugutom tayo

ang dukha'y di daga kundi taong may karapatan
bakit aalipustain ang dukhang mamamayan?
di daga iyang dukha, kapwa tao natin iyan
dukha'y dalita man, may dangal na iniingatan

Iskwater ang makabagong sabsaban

ISKWATER ANG MAKABAGONG SABSABAN
ni Gregorio V. Bituin Jr.
13 pantig bawat taludtod

ipinanganak siya doon sa sabsaban
dahil mga tao sila'y pinagtabuyan
ngayon sabsaban na'y kinilalang tuluyan
di lang nitong dukha kundi ng mayayaman
dahil sinasamba nila'y doon sumilang

kayraming dukhang sa iskwater pinanganak
makabagong sabsabang sadyang nililibak
ng mayayamang mapangmata't mapangyurak
tila di na tao ang dukhang hinahamak
pag eleksyon lang trapo'y doon pumuputak

ang sabsaban ang kainan ng hayop noon
ang iskwater ay kanlungan ng dukha ngayon
hinahamak ang sinumang tumira roon
kapwa pinandidirihan ang mga iyon
ng mga mapangmatang may sariling mansyon

itinaboy sa sabsaban, walang katulad
nasa iskwater, animo'y walang dignidad
sa sabsaba't iskwater, pagkatao'y hubad
asal ng mapangmata'y dito nalalantad
na puso nila'y bato't ang balat ay katad

dukhang sabsaban ngayo'y dinarakila na
habang iskwater nama'y inaalipusta
di ba't kabalintunaan ang asal nila
sariling kaligtasan lang ang ninanasa
habang niyuyurakan ang kanilang kapwa

Sosyalismo'y tulad ng karagatan

SOSYALISMO'Y TULAD NG KARAGATAN
ni Gregorio V. Bituin Jr.
13 pantig bawat taludtod

iyang sosyalismo'y tulad ng karagatan
sadyang kaylawak, saklaw ang kailaliman
sa kanya'y walang nagmamay-aring sinuman
pagkat sa kanya, lahat ay nakikinabang

tulad ng karagatan iyang sosyalismo
dagat na hindi maari-ari ng tao
mayaman o dukha, para sa lahat ito
sa dagat ay nakikinabang lahat tayo

ganyan din ang sosyalismo, tulad ng dagat
walang nag-aaring negosyanteng makunat
isda, pusit, halamang-dagat, tubig-alat
walang nag-aaring kapitalistang bundat

dagat na ito'y di dapat isapribado
pagkat sadyang hindi maisasapribado
sinong mag-aari ng Dagat Pasipiko
kung nais pa niyang mabuhay pa sa mundo

tulad ng dagat na walang nagmamay-ari
dapat iwaksi ang pribadong pag-aari
pagkat pag-aring pribado'y mapang-aglahi
na sanhi kung bakit nagkaroon ng uri

tao'y makinabang sa yaman ng lipunan
wala para sa isang uri o iilan
lipulin ang naghaharing uri sa bayan
pribadong pag-aari'y iwaksing tuluyan

dapat isulong ang sistemang sosyalismo
pagkat walang paghahati ng tao rito
dapat itatag ang lipunang sosyalismo
upang maging ganap ang ating pagkatao