NAKATULOG SA PAGOD SI ALAGÀ
nakita kong natutulog na sa gamit ko
si alagang kaytagal nawalâ sa bahay
mukhang pagod at nakatulog agad ito
na kung pagmasdan mo'y tila di mapalagay
gamit kong pawang mga tambak na diyaryo
habang nakasalansan yaong mga aklat
baka siya'y nananaginip ng adobo
o kaya'y tulingan o sapsap na pinangat
dumating siya habang pusikit ang dilim
minsan, umuuwi ring walang halukipkip
madaling araw na, ako'y tutulog na rin
at muling kakatha ng nasa panaginip
buti't siya'y di naguguluhan tulad ko
na di malaman anong sisimulang kwento
- gregoriovbituinjr.
02.02.2026
Walang komento:
Mag-post ng isang Komento