Ang Samahan at Museyo ng mga Bilanggong Pulitikal

ANG SAMAHAN AT MUSEYO NG MGA BILANGGONG PULITIKAL

n Gregorio V. BituinJr.

15 pantig bawat taludtod

mga dating bilanggong pulitikal ang nagtayo

ng samahan at ng museyo ng mga gunita

sa loob ng museyo, balahibo mo'y tatayo

pagkat nangaroo'y alaala ng dusa't luha

ikadalawampu't tatlo ng Marso itinatag

yaon labingdalawang taon nang nakararaan

upang tulungan yaong ang karapata'y nilabag

hinuli, kinulong, pinahirapan sa piitan

sinong nabilanggo, anong kalagayan sa loob

alam ba ng pamilya nilang sila'y nakapiit

mga tibak ba silang sa gobyerno'y nagsilusob

at sa bilangguan ay patuloy na ginigipit

may replika ng kulungan sa loob ng museyo

naroon ang litrato't ngalan ng mga kinulong

pati ng mga lumayang nakibakang totoo

na tila sumumpang tuloy ang laban, di uurong

masdan ang museyo, isiping nabilanggo ka rin

bukas mo'y nawala, tulala ka't di makausap

pagkat ang bawat bakal na rehas pag iyong damhin

ay saksi sa mga panaghoy nila’t paghihirap

mga saksing ang hiyaw: karapata'y ipaglaban!

bayang tuluyang inanod ng dusa'y palayain!

yaong sapilitang piniit at pinahirapan

may bagong bukas pa kaya silang kakaharapin?

- sa tanggapan ng AAPP (Assistance Association for Political Prisoners), Setyembre 19,  2012

Bilanggong Pulitikal sa Burma'y Palayain

BILANGGONG PULITIKAL SA BURMA'Y PALAYAIN
ni Gregorio V. Bituin Jr.
14 pantig bawat taludtod

bilanggong pulitikal ba'y anong kahulugan
tila sa mundo ito pa'y pinagtatalunan
ngunit para sa nabiktima ng karahasan
ito'y maliwanag, may kahuluga't batayan

pagkat anuman ang ikinaso sa kanila
ang motibo ng pagkapiit ang ebidensya
kung yaong ikinulong ay isang aktibista
bilanggong pulitikal ang tawag sa kanila

ipiniit ng walang sala noong rehimen
karapatan ng bilanggo'y sinong nakapansin
hustisya sa ipiniit ay dapat lang dinggin
bilanggong pulitikal sa Burma'y palayain

- Setyembre 18, 2012, sinulat habang binibisita ang tanggapan at museyo ng AAPP (Assistance Association for Political Prisoners) - Burma

Bawat Bata'y Hubugin para sa Bagong Bukas

BAWAT BATA’Y HUBUGIN PARA SA BAGONG BUKAS
ni Gregorio V. Bituin Jr.

kung kabataan nga ang pag-asa ng bayan
ayon kay Jose Rizal
aba'y hubugin sila sa kinabukasan
ng may magandang asal
upang taglayin nila ang paninindigang
kaakibat ay dangal

hubugin ang bata para sa bagong bukas
na kanilang pangarap
sa gayon tahakin nila ang tamang landas
para sa hinaharap
sa bawat layon at pasya'y maging parehas
maging mapagpalingap

si Aung San Suu Kyi at iba pang taga-Burma
tiyak na nanaising
sa bansa nila ang mga bata'y pag-asa
malakas at magiting
upang tuluyang ibagsak ang diktadura
hanggang paglaya'y kamtin

- sa New Society Learning Center (NSLC), kung saan maraming mga batang mag-aaral, pawang nasa kinder, Setyembre 19, 2012, Mae Sot

Kabataan ang Pag-asa ng Bayan

KABATAAN ANG PAG-ASA NG BAYAN

ni Gregorio V. Bituin Jr.

13 pantig bawat taludtod

mga kabataan ang pag-asa ng bayan

ayon kay Rizal na martir ng sambayanan

silang anumang lahi ang pinanggalingan

mula man sa Pilipinas o sa Burma man

pagkat kabataan ay marunong tumindig

sa mga prinsipyong sa puso'y nakasalig

mga kabataang marunong ding umibig

sa kanilang kapwa, kaaway man o kabig

halina't turuan ang mga kabataan

ng pagsusuri sa kongkretong kalagayan

turuan silang pag-aralan ang lipunan

kung bakit mayorya'y naghihirap sa bayan

kabataan, pag-asa ka ng iyong bansa

pakinggan ang tinig ng inyong mga dukha

pakinggan ang bawat panaghoy ng paglaya

pati lagutok ng bisig ng manggagawa

manindigan kayo't mag-aral ng mabuti

labanan at gapiin yaong mapang-api

pagsikapang sa bayan ay mayroong silbi

pag-asa kayo't bansa nyo'y di magsisisi

- sa CDC (Children’s Development Center), Mae Sot, Tak, Thailand

Setyembre 19, 2012

Sa Klinikang "Mae Tao"

SA KLINIKANG "MAE TAO"
ni Gregorio V. Bituin Jr.
13 pantig bawat taludtod

dumatal kami sa kilalang "Mae Tao Clinic"
itinatag upang tumulong at tumistis
sa mga biktima noong digma't ligalig
at malunasan ang mga sugat at sakit

payak na klinika sa mga nagsilikas
dahil sa kanila'y mahalaga ang buhay
kayrami nilang pasyente sa bawat araw
mga walang pambayad ang tinutulungan

nasa hangganan ng Burma't Thai ang klinika
tagapangalaga ng umalis sa Burma
dahil kaylupit ng gobyernong diktadura
na pinupuksa'y ang bayan, lalo ang masa

kayganda ng layunin ng klinikang ito
gamutin ang biktima ng digma't gobyerno
sa mundong ito'y may pag-asa ngang totoo
sugatang puso't diwa'y lulunasan dito

- sa pagbisita sa kilalang "Mae Tao Clinic", Setyembre 19, 2012, umaga

Di napapanahong paglisan

DI NAPAPANAHONG PAGLISAN
ni Gregorio V. Bituin Jr.
13 pantig bawat taludtod

(alay sa ika-25 anibersaryo ng kamatayan ni Lean Alejandro)

lukob ng dilim ang bughaw na kalangitan
tumatangis yaon bagamat walang ulan
sa balita'y nagambala ang sambayanan
pagkat kanilang batid sa puso't isipan
di pa napapanahon ang kanyang paglisan

siyang nangarap ng isang bagong sistema
para sa bayan, laban sa imperyalista
lider na kumilos laban sa diktadura
sa lansangan ay laging kasama ng masa
bakit punglo ang tumapos sa buhay niya

sigaw ng katarungan ma'y nakaririndi
at itong sambayanan ay di mapakali
lalo't katahimikan ay nakabibingi
subalit tunay siyang sa bayan nagsilbi
kaya marapat lang itanghal na bayani

19 Setyembre 2012

Paaralang Aktibista

PAARALANG AKTIBISTA

ni Gregorio V. Bituin Jr.

15 pantig bawat taludtod

silang naroroo'y anak ng mga aktibista

na tulad kong nangangarap ng paglaya sa dusa

siyam na buwan silang aarali'y pulitika

magbabasa't utak ay hahasain sa teorya

pati syensya, matematika't ideolohiya

kahit wikang Ingles ay rekisitos sa kanila

nagtitiyagang mag-aral na mga kabataan

nagsisikap unawain ang mga kaalaman

nagpapakahusay sa iba't ibang karunungan

pati kasaysayan ng bansa'y pinag-aaralan

di lang magsaulo kundi suriin ang lipunan

nais din nilang matututo sa pakikipaglaban

apuhap mo ang hirap sa kanilang mga mata

ngunit matatanaw mo rin sa mata ang pag-asa

nag-aaral mabuti't pinaghahandaan nila

kung paano tutulungang mapalaya ang Burma

kung paano pamamahalaan ang bansa nila

kung paano mababago ang bulok na sistema

- sa DPNS Political School, Setyembre 18,  2012

Hustisya sa Mga Migranteng Manggagawa

HUSTISYA SA MGA MIGRANTENG MANGGAGAWA
ni Gregorio V. Bituin Jr.
13 pantig bawat taludtod

manggagawang Burmes ka man o Pilipino
may karapatan tayo sa tamang pasweldo
di dapat naaapi ang mga obrero
ah, bakit ba api't lagi na lang ganito
mga karapatan ba nati'y nakanino

bakit karapatan nati'y di natin angkin
may karapatan lang ba'y ang nasa rehimen
karapatan ba'y nasa dagat na kaylalim
o ito'y nasa langit, kayhirap abutin
ang karapata'y di dapat bibitin-bitin

simbigat ng bundok kung walang katarungan
sa mga manggagawang mula ibang bayan
dahil ba migrante'y dapat nang pabayaan
ng nagpapatrabahong sukdulan ng yaman
dapat itama ang ganitong patakaran

hustisya sa manggagawang Pinoy at Burmes
pagyurak sa dangal, di dapat tinitiis
nagpapatrabaho'y di dapat magmalabis
hustisya sa bawat isa'y dapat mabilis
katarungan sa lahat itong aming nais

- Setyembre 18, 2012, sa YCOWA, na tanggapan ng mga migranteng Burmes sa Mae Sot

Sa Mga Kabataang Tibak

SA MGA KABATAANG TIBAK
ni Gregorio V. Bituin Jr.
13 pantig bawat taludtod

kabataan silang tulad ko'y aktibista
bukangliwayway ba'y nababanaag nila
nasa ibang bansa man ay nakikibaka
di bumibitaw sa pinapangarap nila

kalayaan, sisilang din ang bagong araw
pag-asa, sa bawat bukas ay matatanaw
paghahanda, kaharapin man ay balaraw
pangarap, ang minimithi'y di malulusaw

kabataan, magsikap ka't ikaw'y pag-asa
ng bayang nasa ilalim ng diktadura
tulad noon, Pilipinas ay parang Burma
mga kabataan ay nag-oorganisa

kayo ang pag-asa, O, mga kabataan
ng inyong bayang sinadlak sa kadiliman
dalhin ang inyong Burma sa kaliwanagan
hanggang sa lumaya ang buong sambayanan

- Setyembre 18, 2012, sa pagbisita sa tanggapan ng SYSB sa Mae Sot

Kababaihang Burmes, Pinay, atbp.

KABABAIHANG BURMES, PINAY, ATBP.
ni Gregorio V. Bituin Jr.
13 pantig bawat taludtod

babaeng Burmes at babaeng Pilipina
parehong api't parehong nakikibaka
para sa karapatang pantao't hustisya
nais nila'y kalayaan at demokrasya

tigib ng lumbay, may tinik sa kalooban
kayraming nabibiktima ng karahasan
kailan ba lalaya ang kababaihan
kailan ba magiging pantay ang lipunan

may nagtutunggalian sa kalooban ko
tila naglalaban ang kayraming anino
bakit sa kababaihan, iba ang trato
bakit karapatan nila'y di irespeto

kababaihan, dapat kayong palayain
tulad ng aking ina't mga kapatid din
mundo'y di lalaya pag babae'y alipin
paglaya ng lahat ay dapat nating gawin

- Setyembre 18, 2012, sa pagbisita sa tanggapan ng Burmese Women's Union sa Mae Sot

Sa ika-5 anibersaryo ng rebolusyong Saffron

SA IKA-5 ANIBERSARYO NG REBOLUSYONG SAFFRON
ni Gregorio V. Bituin Jr.
11 pantig bawat taludtod

anibersaryo ng rebolusyong Saffron
kayraming taong nagsidalo roon

dalawampung monghe'y nasa harapan
nagtalakay sila ng karanasan

bagamat di ko iyon maunawa
sa mata nila'y banaag ang luha

dama ang paglayang kanilang hangad
at sistema sa bansa'y mabaligtad

anibersaryong yao'y ikalima
tigib ng luha, galit, alaala

kung sa susunod, muling mag-aaklas
laban sa pamahalaang marahas

aking hangad ang kanilang tagumpay
mula sa puso itong pagpupugay

ang Burma'y dapat tuluyang lumaya
nang puso't isip nila'y pumayapa

- sinulat sa Ragira Hotel, Mae Sot,
umaga ng Setyembre 18, 2012

Dalhin ang Burma sa Landas ng Paglaya

DALHIN ANG BURMA SA LANDAS NG PAGLAYA

ni Gregorio V. Bituin Jr.

13 pantig bawat taludtod

ginipit, inapi, pinagsamantalahan

patuloy na naghihirap ang sambayanan

marami'y lumaban para sa kalayaan

kayraming namatay sa pakikipaglaban

diktadurya sa kanila'y nakakubakob

ngunit sa puso nila paglaya'y marubdob

nanunuot ang nasang paglaya sa loob

dapat nilang lumaban, poder ay malusob

marami nga sa kanila'y nangibang-bansa

upang makibaka't sa hangganan naglungga

sa nangyayari'y ayaw nilang tumunganga

sila'y kikilos hanggang bansa'y mapalaya

ginigipit, inaapi ang mga tao

pinagsasamantalahan pati obrero

aba'y dapat kumilos, tumulong din tayo

dalhin ang Burma sa landas ng pagbabago

di lamang taga-Burma ang dapat lumaban

kundi ang sinumang nais ng kalayaan

bakahin at ibagsak ang kapangyarihan

ng mga mapang-api sa kanilang bayan

tulong-tulong tayong baguhin ang sistema

sa mamamayan nitong Burma'y makiisa

halina't kumilos tayo sa panig nila

sa ngalan ng kalayaan ay magkaisa

- Setyembre 17, 2012, sa tanggapan ng YCOWA

Pagtatapos ng Migrante

PAGTATAPOS NG MIGRANTE

ni Gregorio V. Bituin Jr.

15 pantig bawat taludtod

sa pagtatapos ng mag-aaral, may pagdiriwang

mula sa limang araw na leksyon sa karapatan

ng mga migranteng naging biktima ng tanggalan

tumiwasay ang isip sa dagdag na kaalaman

handa nang ipaglaban ang kanilang karapatan

habang nagkakatuwaan, inuman at kantahan

sa bawat tagay, may ngitngit ngunit may katatagan

tila mga mandirigmang handa na sa digmaan

- Setyembre 17, 2012, sa tanggapan ng YCOWA

Palaro sa Papel

PALARO SA PAPEL

ni Gregorio V. Bituin Jr.

11 pantig bawat taludtod

paligsahan sa papel yaong laro

limang tao kada papel ang turo

nakaapak doon, sila'y tutungo

lakad sa papel, tatlong metro'y layo

unahan ang grupo't isa'y nabigo

nakakatuwa ang paglaro nila

isang ehersisyo sa disiplina

paano magtulungan bawat isa

sa harap ng panganib o sakuna

kalamidad o anumang problema

isang laro sa kanilang palihan

na pagkakaisa'y inilarawan

papel ay tila bangkang sinasagwan

bago lumubog ay magkatulungan

hanggang makarating sa kaligtasan

- nagisnang palihan ng mga manggagawang Burmes na natanggal sa trabaho, sa huling araw ng limang araw nilang pag-aaral hinggil sa mga karapatan ng migranteng obrero, Setyembre 17, 2012, sa tanggapan ng YCOWA

Aksidente sa Paggawa

AKSIDENTE SA PAGGAWA
ni Gregorio V. Bituin Jr.
11 pantig bawat taludtod

isa siyang manggagawang migrante
na sa trabaho'y nagkaaksidente
paa'y nabagsakan, putol ang binti
tumaob na traktora yaong sanhi

ibinigay lang ay limangdaang baht
sa naaksidente'y di iyon sapat
tila pampalubag-loob, kaykunat
ng nagpatrabahong di nagsasalat

dahil ba Burmes ay pinabayaan
ng nagpatrabahong Thai na mayaman
hustisya sa manggagawa'y nasaan
ang naaksidente'y di tinulungan

sa ibang bayan, kayhirap ng buhay
lakas ng loob ang kanilang taglay
dahil sa trabahong kanilang pakay
sila'y nakipagsapalarang tunay

katotohanan ang nakita rito
bulok ang sistema, walang respeto
mali ang trato sa mga obrero
ang ganito'y marapat lang mabago

- Kinapanayam ang isang manggagawang nawalan ng trabaho at naputulan ng binti, sa bahay-tuluyan ng YCOWA, Setyembre 17, 2012

Pagdatal sa YCOWA at sa kanilang Bahay-Tuluyan

PAGDATAL SA YCOWA AT SA KANILANG BAHAY-TULUYAN

ni Gregorio V. Bituin Jr.

14 pantig bawat taludtod

sa tanggapan ng mga migranteng manggagawa

ako'y pansamantalang tutuloy at titira

hinatid ako roong puso'y nangungulila

ngunit ang diwa'y buhay, patuloy sa pagbaka

lumuluha ang Burma ang aking pakiramdam

pati ang mamamayang panay na dusa't hirap

kailan kaya ito tuluyang mapaparam

kung sila nga marahil patuloy na mangarap

ng paglaya ng bayan mula sa pagkaapi

at pagsasamantala ng diktaduryang tigre

dapat silang lumaban kasama ng marami

ngayon ako'y narito't ang kasama'y migrante

nakausap ko yaong pinuno ng tanggapan

naramdaman ko yaong kay-init ng pagtanggap

at ilang kuro-kuro, kami'y nagtalakayan

pati ibang kasama'y akin ding nakausap

sa bahay-tuluyang kayrami ng manggagawa

ay aming pinuntahan, nakausap ang iba

naroon pala muna ang mga kinawawa

doon ay nananahan silang pansamantala

kapitalista nila'y kanilang kinasuhan

dahil sa kalagayang mababang sweldo't hirap

ako'y napapaisip pagbalik sa tanggapan

kayraming suliranin, dusa ang nalalasap

- sa tanggapan ng Yaung Chi Oo Workers Association (YCOWA; ayon sa kanila, ang Yaung Chi Oo ay salitang Burmes sa New Dawn, o Bagong Bukangliwayway; tinatawag nilang safe house ang bahay-tuluyan; Setyembre 17, 2012

Pagtatagpo

PAGTATAGPO
ni Gregorio V. Bituin Jr.
11 pantig bawat taludtod

madaling araw pa lang ay gising na
sabik sa mangyayari sa umaga
ang sarili'y inasikaso muna
sa kakaharapin ay handa na ba?

nakikibaka ang mga anino
sa loob at labas nitong loob ko
anumang kahinatnan namin dito
ay dahil sa maalab na prinsipyo

kaya nagkatagpo ang mga tibak
dahil sa karapatang hinahamak
sa paglaban ma'y maaring bumagsak
prinsipyo'y di mababalot ng lusak

sa tanggapan ng partido'y nagtungo
nag-usap ng plano, saan dadako
saang samahan, sino ang susundo
ang handang loob ay di sumusuko

- sa tanggapan ng mga tibak

Unang Pagtatasa

UNANG PAGTATASA

ni Gregorio V. Bituin Jr.

12 pantig bawat taludtod

sa isang balkonahe'y nagtalakayan

anong naranasan, anong pakiramdam

sa unang araw sa bansa ng dayuhan

inquitive at cognitive ang salalayan

ekspektasyo’t hamon ay pinag-usapan

bawat isa sa ami'y nagbahaginan

ng aming impresyon at inaasahan

isang bagay na sadyang makasaysayan

- sa isang upuan sa labas, Phan Nu Hotel sa Mae Sot, bandang ikasampu ng gabi, Setyembre 16, 2012

Kumustahan sa Tanggapan

KUMUSTAHAN SA TANGGAPAN
ni Gregorio V. Bituin Jr.
13 pantig bawat taludtod

nagkumustahan kami ng mga kasama
nagtagpo ang mga Pinoy at taga-Burma
doon sa kanilang magandang opisina
nagpalitan ng kuro-kuro bawat isa

sa apat na Pinoy, tatlo'y isang partido
at ibang partido ang pinanggalingan ko
gayunman, nagkakaisa kaming totoo
kalayaan ng Burma yaong aming gusto

nagbahaginan kami't di balitaktakan
bawat isa'y iba't iba ang karanasan
na ang mahalaga'y pagkakaunawaan
sa pakikibaka tungo sa kalayaan

salamat sa binigay na pagkakataon
di ito masasayang, pangako ko iyon
para sa katarungan ay magrebolusyon
nang makamit ang kalayaang nilalayon

- sa tanggapan ng partido, bandang ikapito ng gabi

Apat na Malong

APAT NA MALONG

ni Gregorio V. Bituin Jr.

12 pantig bawat taludtod

apat na malong yaong pagkagaganda

halaga’y nobentang baht ang bawat isa

may panregalo na sa mahal kong ina

sa dalawa kong kapatid at sa sinta

tiyak kong matutuwa ang aking ate

at isa ko pang kapatid na babae

lalo na si Ina sa akin ay swerte

at sa sinta't tinatanging binibini

mahahalagang babae sa buhay ko

kung bakit nga ba ngayon ako nga'y ako

kahit ba mumurahin lang ang regalo

ang mahalaga'y mula sa puso ito

aking Ina, mga kapatid, at sinta

kayo'y lalagi sa aking alaala

sana’y manatil kayong malakas pa

at tumagal pa ang ating pagsasama

- sinulat pagkagaling sa palengke sa Mae Sot, sa Rm 3202 ng Phan Nu Hotel, Setyembre 16, 2012

Larawan ng Kawalang Malay

LARAWAN NG KAWALANG MALAY

ni Gregorio V. Bituin Jr.

11 pantig bawat taludtod

maraming iginuhit na larawan

na nakadispley doon sa restoran

sa Mae Sot na "Casa Mia" ang ngalan

larawang proyekto ng kabataan

bawat larawan ay nakakwadro pa

proyektong kanilang ibinebenta

pag bumili ka'y malaking tulong na

upang talento'y pag-ibayuhin pa

larawang tagos sa puso’t isipan

na proyekto ng mga kabataan

nilalarawan yaong kinagisnan

at pinapangarap na kalayaan

paglayang kanilang pinapanaghoy

sa hangganang ang puso’y umaapoy

pangarap nila’y dapat magpatuloy

at di dapat mabaon sa kumunoy

- sa kainang Casa Mia, habang tinitingnan ang proyektong "The Thai-Burmese Border Children Arts Project", matapos mananghalian, Setyembre 16, 2012

Panibagong Hamon

PANIBAGONG HAMON
ni Gregorio V. Bituin Jr.
13 pantig bawat taludtod

hanggang Mae Sot lang kami, doon sa hangganan
ng Burma't Thailand, bagamat hanggang doon lang
pinapangarap ko ring Burma'y mapuntahan
at sumamang makibaka sa kalayaan
sa hangarin nilang hustisyang panlipunan

may maibabahagi ang tibak tulad ko
gaya ni Che Guevara na isang idolo
at isang internasyunalistang totoo
nawa'y may maitutulong nga kami rito
kundi mga salita'y kahit ang buhay ko

aktibista kaming para sa katarungan
para sa pagpapalaya ng ibang bayan
para rin sa hustisya sa kababaihan
magkasamang ipaglaban ang karapatan
magturingang magkapatid sa daigdigan

- Rm 3202, sa Phan Nu Hotel sa Mae Sot
Setyembre 16, 2012

May Stewardess ang Bus

MAY STEWARDESS ANG BUS

ni Gregorio V. Bituin Jr.

13 pantig bawat taludtod

kaiba ang bus mula Bangkok hanggang Mae Sot

dalawang palapag itong aming sinakyan

malawak ang espasyo't ang supa'y malambot

at sa unang palapag ay may palikuran

maganda pa rito'y may stewardess sa bus

inaasikaso ang bawat pasahero

bibigyan ka niya ng kumot na maayos

na gamit sa matagal na biyahe ninyo

nagbibigay din ang  magandang stewardess

ng kape, tubig, yakult, at may tinapay pa

kaysarap bumiyahe ng maraming beses

kung ganitong inaasikaso ka nila

 may stewardess ang bus, parang eroplano

tila ba diwata't kaygandang inspirasyon

ngiti'y kaytamis, problema'y lilimutin mo

hintay, huwag muna't mayroon kaming misyon

habang naglalakbay kami ng walong oras

may taga-Imigrasyong sumampa pa sa bus

pasaporte't ID'y tiningnan, mababakas

sa kanya ang paggampan ng tungkuling taos

pagdatal namin sa Mae Sot, kinuhang muli

ng stewardess ang binalabal na kumot

pag-asikaso niya, ganti nami'y ngiti

pagkat maginhawa ang pagdatal sa Mae Sot

- sinimulan sa bus mula Bangkok, gabi ng Setyembre 15, 2012, at tinapos ng madaling araw pagdatal sa Mae Sot, Setyembre 16, 2012

Ang Kalayaan ay Buhay

ANG KALAYAAN AY BUHAY
ni Gregorio V. Bituin Jr.
13 pantig bawat taludtod

bawat isa'y hangad ay buhay na payapa
may kinakain bawat araw at malaya
ang gobyerno'y may mabuting pamamahala
iginagalang ang karapatan ng madla
ang ganitong buhay ay kaygandang adhika

kalayaan ay buhay, dapat ipaglaban
pagkat paglaya'y taal nating karapatan
bayan nga nati'y may matinding kasaysayan
na dapat maibahagi sa ibang bayan
bilang tanda ng ating pagkakapatiran

- nilikha sa Murchit Bus Station, Bangkok, Setyembre 15, 2012

Pananabik

PANANABIK

ni Gregorio V. Bituin Jr.

13 pantig bawat taludtod

sa lakbaying ito’y ano kayang daratnan

nasa Bangkok na’y di ko pa rin maramdaman

patungo pa sa Mae Sot na di ko kilala

at makikipag-ugnayan sa  taga-Burma

sa kanila’y makikipagpalitang-kuro

sa isa’t isa’y kapwa kami matututo

ihanda ang isip pati na yaong loob

sa pakikibaka’y sanay nama’t marubdob

may mapapala kaya sa lakbaying ito

meron, tiyak ko, kaya nga kami narito

anumang matutunan dito’t mapapala

nawa’y makatulong sa kanilang paglaya

- nilikha sa Murchit Bus Station, Bangkok, Setyembre 15, 2012

Mabuhay ka, IID!

MABUHAY KA, IID!

ni Gregorio V. Bituin Jr.

15 pantig bawat taludtod

mabuhay ka, IID, sa bawat pakikibaka
upang kamtin ang kapayapaan at demokrasya
kaytagal na nating magkakilala’t magkasama
mula Apcet, Duyog Mindanao at kampanyang Burma
isang taas-kamaong pagpupugay, mabuhay ka

- eroplanong PR 730, Setyembre 15, 2012

Salamat sa Pagkakataon

SALAMAT SA PAGKAKATAON
ni Gregorio V. Bituin Jr.
13 pantig bawat taludtod

O, maraming salamat sa pagkakataon
na ibinigay ng Free Burma Coalition
isang grupo sa Pilipinas hanggang ngayon
upang Burma'y tulungang lumaya't bumangon

Sa hangganan ng Burma't Thailand ay tutungo
kaming apat na tibak sana'y di mabigo
anong daratnan namin sa malayong dako
kapayapaan ba o digmaang madugo

Kalayaan, freedom, independence, libertad
Burmes, Pinoy, ibang lahi'y ito ang hangad
kaya salamat muli sa oportunidad
at sa dako ngang ito ng mundo'y napadpad

Ang makibahagi sa magandang layunin
ay isang karanasang bihirang maangkin
kaya anumang dapat ay aming gagawin
at magtagumpay nawa kami sa hangarin

- nilikha sa  eroplanong PR 730, tinapos sa Bangkok airport, Setyembre 15, 2012

Di Ako Maglalakbay sa Kawalan

DI AKO MAGLALAKBAY SA KAWALAN
ni Gregorio V. Bituin Jr.
13 pantig bawat taludtod

maglalakbay akong muli't kapayapaan
ang nasa't layunin para sa mamamayan
di lang ng bayan kundi ng ibang bansa man
lalo't yaong nagnanais ng kalayaan

Pilipino ka man o kaya'y taga-Burma
isa ka mang Thai o anuman ang lahi pa
sa kapayapaan, halina't magkaisa
budhi mo, budhi ko, budhi nila'y iisa

kaya di ako maglalakbay sa kawalan
nakatingala man ako sa kalangitan
o naglalakad ng mahaba sa lansangan
pagkat sa puso't diwa'y layunin ang laman

apat kaming dala'y magandang adhikain
sa mga ibang lahing dapat palayain
ang makibahagi sa laban nila'y aming
paraan ng pakikiisa ng layunin

- sinimulan sa Naia Terminal 2, tinapos sa eroplanong PR 730 patungong Bangkok, Setyembre 15, 2012

Muling Paglalakbay

MULING PAGLALAKBAY
ni Gregorio V. Bituin Jr.
12 pantig bawat taludtod

maglalakbay muli pabalik ng Bangkok
at tulad ng dati, ang ulo ko'y subsob
sa mga aralin ay nagkukumahog
iniwang sandali yaong iniirog

nawa paglalakbay na ito'y payapa
at ang kalangitan ay huwag lumuha
bagamat kanina sa ulan ay basa
nawa himpapawid, manatiling tila

ako'y maglalakbay ngunit magbabalik
sa mahal na sinta't gagawad ng halik
marami pa akong naiwang tungkuling
marapat gampanang husay at taimtim

o, kapayapaan, ikaw ang dahilan
kung bakit ba ako'y lalakbay na naman
ikaw yaong hangad ng maraming bayan
nawa'y amin ka nang makamtang tuluyan

- Naia Terminal 2
Setyembre 15, 2012

* Ito ang ikalawang paglalakbay ng makata patungong Bangkok sa bansang Thailand. Ang nauna'y noong Setyembre 2009 sa walong araw nilang pagdalo sa aktibidad ng Jubilee South (JS) at ng ClimateXchange-Philippines sa pulong ng mga kinatawan ng iba't ibang bansa hinggil sa usaping climate change, climate debt and reparations, at climate justice. Sa kalaunan, napalitan ang pangalan ng ClimateXchange-Philippines sa Philippine Movement for Climate Justice (PMCJ).

Sa ika-66 na Kaarawan ni Inay

Sa ika-66 na Kaarawan ni Inay
ni Gregorio V. Bituin Jr.

pagbati po sa iyo, mahal kong ina
ng isang mapagpalayang kaarawan
mula sa iyong anak na aktibista
malayo man po ako, puso'y nariyan

di man mapagkikita ang sintang anak
ang inang nagluwal ay lagi sa diwa
kahit po abala sa gawaing tibak
at pag-oorganisa ng manggagawa

ang bilin nyo po laging panindigan ko
kung anong aking sinuong at pinasok
kahit punung-puno man ng sakripisyo
maging matibay ako't huwag lulugmok

salamat, inay, sa pangaral mo't payo
sadyang pinatitibay mo akong lalo

- Setyembre 6, 2012, Maynila, Pilipinas