bumubula rin ang dugo sa aking tagiliran
pinilit ko pa ring umiwas ngunit natamaan
mabuti naman, daplis lang, ako'y di napuruhan
isang mandirigmang akala mo'y di tinatablan
narito't tila may sugat na rin ang aking likod
gayong sa kabila ng mahusay kong paglilingkod
ay nangyari ito't bakit kaya ako sinugod
habang nakapaligid nama'y pawang nakatanghod
naalala ko, sa noo'y tinutukan ng baril
di ko batid bakit sila sa akin nanggigigil
ang daliri'y nasa gatilyo, di mapisil-pisil
nakukunsensya na nga ba't sino ang pumipigil
mamamatay akong sosyalismo'y inilalaban
mamamatay ding kapitalismo'y nilalabanan
ako'y nagpupugay din sa lahat ng lumalaban
upang mundo'y maging payapa't wala nang labanan
- gregbituinjr.
Walang komento:
Mag-post ng isang Komento