Ngayong World Environment Day 2023

NGAYONG WORLD ENVIRONMENT DAY 2023

sa harap ng D.E.N.R, walang nagpo-protesta

nang magtungo ako ng ikasampu ng umaga

kaya pala walang imbitasyon akong nakita

dahil kaya administrasyong ito'y naiiba?

di ba katulad ng nakaraang administrasyon

aba'y kabi-kabila ang mga pagkilos noon

sadyang naghanap ako ng masasamahan ngayon

upang maibulalas ang sa diwa'y mga tanong:

bakit ba progreso'y mapanira ng kalikasan?

kaya raw nagmimina ay para sa kaunlaran

kinalbo ang gubat at pinatag ang kabundukan

iyan ba ang development? progreso nga ba iyan?

matindi na ang pananalasa ng microplastic

sa paligid-ligid, na sa laot pa'y nagsumiksik

di sapat ang paggawa ng ekobrik at yosibrik

upang malutas ang suliraning kahindik-hindik

ngayong World Environment Day, ating alalahanin

sa pagkasira ng kalikasan, anong gagawin

meron nang Right to a Healthy Environment ang U.N.

Rights of Nature pa'y dapat ding maitaguyod natin

mabuhay ang mga nangangalagang katutubo

sa kagubatan, kabundukan, upang di maglaho

mabuhay yaong nakikibakang di humihinto

upang kapaligira'y alagaa't mapalago

- gregoriovbituinjr.

06.05.2023

Mahal, ako'y pauwi na (Sa eroplano, Bidyo 12)

MAHAL, AKO'Y PAUWI NA

(Sa eroplano, Bidyo 12)

"Pauwi na ako," sabi sa isang awit

na sa puso't diwa'y pananabik ang bitbit

di na iniisip kung saan pa sasabit

basta't tungo'y sa mahal na asawa't paslit

sa eroplano'y sumakay tungong Maynila

nang may kasabikang makakauwi na nga

paglalakbay man ay matagal at mahaba

o maiksi man, may saya sa puso't diwa

"Pauwi na ako, mahal" ang aking sabi

sa tanging diwatang talagang kinakasi

huwag lamang sanang matulad sa mensahe

sa awiting "Napakasakit, Kuya Eddie"

tigib ng kasabikang puso'y inihanda

upang di salubungin ng lumbay at luha

upang tanging pagsinta yaong manariwa

at magniig muli ang aming puso't diwa

- gregoriovbituinjr.

06.05.2023

* ang bidyo ay kuha ng makatang gala sa paglipad ng eroplano mula Mactan airport tungong NAIA, 05.31.2023

* mapapanood ang bidyo sa kawing na: https://fb.watch/lqwyLL_NGb/

Pagdatal sa NAIA 3 (Sa eroplano, Bidyo 11)

PAGDATAL SA NAIA 3

(Sa eroplano, Bidyo 11)

hapon na nang sa paliparan nakarating

habang nasa isip ang diwatang kaylambing

"baka may tsiks ka roon" ang biro't pasaring

sinabi ko'y wala, at wala ring pahaging

matagal pa ang pag-uwi mula NAIA

lalo't nasa lungsod na, maulan, trapik pa

ito ang nasa isip habang pababa na

tanging bitbit ay karanasa't alaala

pinagmasdan ko ang iba pang eroplano

na aming nadaanan pagkalapag nito 

maya-maya lang, tatayo na kami rito

susunduin ng bus pagbaba namin dito

halos isang oras din yaong paglalakbay

na may kakaibang natutunan ding tunay

mataas pa sa ulap, kaibang palagay

ah, pahinga muna pagkauwi ng bahay 

- gregoriovbituinjr.

06.05.2023

* ang bidyo ay kuha ng makatang gala sa paglipad ng eroplano mula Mactan airport tungong NAIA, 05.31.2023

* mapapanood ang bidyo sa kawing na: https://fb.watch/lqwbnfz7jT/

Lalapag na ang eroplano (Sa eroplano, Bidyo 10)

LALAPAG NA ANG EROPLANO

(Sa eroplano, Bidyo 10)

naroon pa ring patuloy na nagninilay

ang nasasadiwa'y samutsaring palagay

hanggang eroplano'y naghanda na ring tunay

sa paglapag mula mahabang paglalakbay

inihanda kong muli ang selpon-kamera

upang mismong pag-landing ay mabidyuhan pa

ano nang pakiramdan? saya ba o kaba?

marahil saya dahil makakauwi na

handa nang magbidyo upang may maikwento

anong nasa isip, ano bang naengkwentro

anong nakita habang nasa eroplano

bukod pa sa ngiti ng istewardes dito

"ako'y uuwi na, mahal ko", anang awit

biyahe'y tanghali kaya di na pumikit

at minasdan ang ulap, panganorin, langit,

dagat at kalupaang animo'y kayliit

- gregoriovbituinjr.

06.04.2023

* ang bidyo ay kuha ng makatang gala sa paglipad ng eroplano mula Mactan airport tungong NAIA, 05.31.2023

* mapapanood ang bidyo sa kawing na: https://fb.watch/lqhPzEsSQU/

Lugar na mapuno at nagtatayugang gusali (Sa eroplano, Bidyo 9)

LUGAR NA MAPUNO AT NAGTATAYUGANG GUSALI

(Sa eroplano, Bidyo 9)

may lugar pa palang pulos puno sa atin

sa animo'y kalunsurang nakita lang din

sa ere nang minamasdan ang panganorin

lupa'y tanaw, ah, pagbaba'y malapit na rin

katabi lang ng nagtatayugang gusali

ang mapunong lugar, buti't napanatili

animo sa lungsod, gubat ang kalahati

na sadyang nagbibigay ng magandang ngiti

dapat lang pangalagaan ang kalikasan

huwag salaulain ang kapaligiran

huwag kalbuhin ang bundok at kagubatan

mga pinutol na puno'y dapat palitan

iyan ang nasa diwa hinggil sa nakita

nang nasa ere, naninilay ang problema

paano kalikasa'y maprotektahan pa

nang di sirain ng tusong kapitalista

- gregoriovbituinjr.

06.04.2023

* ang bidyo ay kuha ng makatang gala sa paglipad ng eroplano mula Mactan airport tungong NAIA, 05.31.2023

* mapapanood ang bidyo sa kawing na: https://fb.watch/lqdBdVe_BP/

Tanaw na ang kalupaan (Sa eroplano, Bidyo 8)

TANAW NA ANG KALUPAAN

(Sa eroplano, Bidyo 8)

mula roon sa himpapawid

ay pagkasabik yaong hatid

kalupaan na'y namamasid

malapit nang bumaba'y batid

walang ibong nakasalubong

walang agilang sumusuong

o lawing sa dagat lumusong

o kaya'y bahang nilulusong

tanaw ko na ang kalupaan

nang sa ere'y palutang-lutang

pag iyo namang pagmamasdan

ay tila baga mapa naman

paano ba kami bababa

nang may pag-iingat na lubha

dama sa pagmasid sa lupa

ay di naman nakalulula

kundi kasabikang umuwi

sa asawa't bahay na munti

na ang talagang minimithi

pag-ibig ay mapanatili

- gregoriovbituinjr.

06.03.2023

* ang bidyo ay kuha ng makatang gala sa paglipad ng eroplano mula Mactan airport tungong NAIA, 05.31.2023

* mapapanood ang bidyo sa kawing na: https://fb.watch/lnLAsc3bxe/

Pagtitig sa palikpik (Sa eroplano, Bidyo 7)

PAGTITIG SA PALIKPIK

(Sa eroplano, Bidyo 7)

tanging palikpik ng eroplano

ang tiningna't naging patnubay ko

habang naroon sa himpapawid

sa patutunguha'y ihahatid

nasa tabi ako ng bintana

tila baga roon ay napatda

habang tinatanaw ang paligid

habang mga pulo'y tinatawid

baka lang malula akong lintik

kung di ko namasdan ang palikpik

tila duyang hinehele-hele

yaong pakiramdam ko sa ere

walang anumang alalahanin

o kaya't takot sa papawirin

sa pag-uwi'y sadyang nananabik

habang may tulang sinasatitik

- gregoriovbituinjr.

06.03.2023

* ang bidyo ay kuha ng makatang gala sa paglipad ng eroplano mula Mactan airport tungong NAIA, 05.31.2023

* mapapanood ang bidyo sa kawing na: https://fb.watch/lnLz7Gl1DK/

Tila babagyo (Sa eroplano, Bidyo 6)

TILA BABAGYO

(Sa eroplano, Bidyo 6)

ah, nangingitim ang alapaap

may unos kayang kinakaharap?

para bang may bagyong magaganap

habang ang danas sa ere'y lasap

animo'y bulak o kaya'y usok

ang kaharap habang pabulusok

tila narating namin ang tuktok

ng mga nagtatayugang bundok

bulak at usok, puti at itim

may maarok kayang anong lalim?

may malantad kaya ritong lihim?

may liwanag ba o pulos dilim?

hintaying tayo'y lumampas muna

sa ulap na maitim talaga

bagyo'y may banta mang manalasa

may panahong makapaghanda pa

- gregoriovbituinjr.

06.02.2023

* ang bidyo ay kuha ng makatang gala sa Mactan airport tungong NAIA, 05.31.2023

* mapapanood ang bidyo sa kawing na: https://fb.watch/lfHGBgwu9G/

Nalalambungan ng ulap (Sa eroplano, Bidyo 5)

NALALAMBUNGAN NG ULAP

(Sa eroplano, Bidyo 5)

animo'y usok sa himpapawid

o nagsulputang bulak ang hatid

na nanagasa o bumalakid

sa landas na yaong tinatawid

marahil dahil inip nagbidyo

o kaya'y dahil interesado

sa agham upang may maikwento

habang sakay pa sa eroplano

tila kinain ng alapaap

ang sinakyang noon pa pangarap

nalalambungan kami ng ulap

sa ere nang wala sa hinagap

minsan lang marating ang itaas

na animo'y uri ng palabas

na isa na lang pangarap bukas

maganda na ring ito'y dinanas

- gregoriovbituinjr.

06.02.2023

* ang bidyo ay kuha ng makatang gala sa Mactan airport tungong NAIA, 05.31.2023

* mapapanood ang bidyo sa kawing na: https://fb.watch/lfAZ7fYF9A/

Sa taas ng alapaap (Sa eroplano, Bidyo 4)

SA TAAS NG ALAPAAP

(SA EROPLANO, BIDYO 4)

akala mo'y agila akong kaytayog ng lipad

o di kaya'y si Bathalang mataas pa sa ulap

o si Aladin na nasa karpet na lumilipad

tanaw ang musa't diwatang naroon nakabungad

pagkat ibabaw ng alapaap ay naabot din

ng tanaw, nakamit din ang malaon nang mithiin

tila baga panaginip sa kaytagal kong himbing

nasa taas man ay wala pa rin sa toreng garing

pagkat paa ng makata'y nanatili sa lupa

na buong pakumbabang sinasamahan ang dukha

inaabot man ang langit ng asam na ginhawa

sugat ay nagpapatuloy pa ring nananariwa

kaya di tayo titigil sa ating pagsisikap

na abutin ang langit ng ating mga pangarap

upang kamtin ang ginhawa't makaahon sa hirap

upang tunay na pag-unlad ay kamtin nating ganap

- gregoriovbituinjr.

06.01.2023

* ang bidyo ay kuha ng makatang gala sa Mactan airport tungong NAIA, 05.31.2023

* mapapanood ang bidyo sa kawing na: https://fb.watch/l6V6uloEyU/

Kanya-kanyang kain ang inahin at mga kuting

KANYA-KANYANG KAIN ANG INAHIN AT MGA KUTING

nang mapakain sila'y magtatanghaling tapat na

natira ko sa tilapya'y pinagsaluhan nila

buong ulo, gilid, tinik, hasang, pati bituka

pagkakuha ng kanilang parte'y nagkanya-kanya

pansin ko iyon, kanya-kanya, at di sabay-sabay

ang makuhang parte'y siya lang ang kakaing tunay

dapat kong hati-hatiin nang sila'y mapalagay

dahil pag hindi, isa lang yaong makakatangay

di sila gaya ng tao na magsasalo-salo

pusa't kuting niya'y nagkakanya-kanyang totoo

pag nakuha ang parte'y lalayo ang mga ito

ayaw magutom, pagkaing nakuha'y itatakbo

nakahanda na ang kuko pag sila'y aagawan

di hating kapatid, nakuha ng isa'y kanya lang

ganyan ang napansin kong kanilang kaugalian

hatiin agad ang pagkain nang walang awayan

- gregoriovbituinjr.

06.01.2023

* mapapanood ang bidyo sa: https://fb.watch/l2i2JQtIr8/

Pagmamasid sa karagatan (Sa eroplano, Bidyo 3)

PAGMAMASID SA KARAGATAN

(SA EROPLANO, BIDYO 3)

tanaw ko ang karagatan habang nasa itaas

tila kapara nami'y lawin sa kanyang pagmalas

"dadagit ako ng isda", sa lawin ay bulalas

tila si Icarus kaming sa piita'y tumakas

mga isla'y tila ba mumunting tipak ng bato

na sa alamat, higante'y talon doon at dito

bansa ba'y ilang isla't di mabilang ang numero

kung masdan ang mga ito mula sa eroplano

tigib ng lumbay at galak ang namahay sa dibdib

pauwi mula pagtitipon sa malayong liblib

na animo'y nagsipaglungga sa malaking yungib

ng mga isyung sa sambayanan naninibasib

at tinanaw kong muli ang dagat ng alaala

tunay na may pag-asa sa bawat pakikibaka

mamatay man kami'y tiyak mayroong mag-aalsa

hangga't di pa nababago ang bulok na sistema

sa malalim na laot makata'y nakatulala

mababaw man ang pagninilay ay nakatutula

ang lawin kaya'y may nadagit nang pagkaing isda

ah, anong sarap pagmasdan ng dagat sa ibaba

- gregoriovbituinjr.

06.01.2023

* ang bidyo ay kuha ng makatang gala sa Mactan airport tungong NAIA, 05.31.2023

* mapapanood ang bidyo sa kawing na: https://fb.watch/l2f7mQyVg7/

Pagtulog sa ilalim ng traysikel

PAGTULOG SA ILALIM NG TRAYSIKEL

umaga, nakita kong tulog pa ang mga kuting

sa ilalim ng nakaparadang traysikel, himbing

may dala akong pagkain, di ko muna ginising

pag ngiyaw nila'y narinig, saka pakakainin

para bagang sila'y maralitang walang tahanan

noong una'y binigyan ko ng basahang tulugan

subalit kung saan matulog ang ina'y susundan

ah, nanay iyon, kaya sila'y nauunawaan

may ginawa akong tulugan sa bakuran noon

subalit di sila nasanay na gamitin iyon

pag nagising kasi sila'y nililinis ko roon

dahil tae't ihi nga nila'y nangangamoy doon

gayunpaman, may sarili din naman silang buhay

bahala na ang nanay magtaguyod at gumabay

tiyak sa anak, ang inahing pusa'y di sasablay

mahalaga'y di naman nagpapabaya ang nanay

- gregoriovbituinjr.

06.01.2023

Paglipad sa ere (Sa eroplano, Bidyo 2)

PAGLIPAD SA ERE

(SA EROPLANO, BIDYO 2)

anong lapad din ng runway ng paliparan

maya-maya lang, eroplano'y umandar na

pinagmasdan ko ang buong kapaligiran

pag-usad namin ay binidyuhang talaga

wow, natiyempuhan ko ang mismong paglipad

hanggang kalupaa'y lumiit sa paningin

sa tabi ng bintana'y naupong kaypalad

habang naririnig ang pagaspas ng hangin

iyon ang aking unang pagbidyo sa ere

nakabibingi ang katahimikan doon

bigla'y makaririnig na di ko masabi

baka sa hangin kaya nangyayari iyon

buti't hangin ay di gaanong nagngangalit

lalo't may balitang may parating na bagyo

at ninamnam ko na lamang ang bawat saglit

nakapagbidyo rin ng dalawang minuto

- gregoriovbituinjr.

05.31.2023

* ang bidyo ay kuha ng makatang gala sa Mactan airport tungong NAIA, 05.31.2023

* mapapanood ang bidyo sa kawing na: https://fb.watch/l0chDSp8Sd/

Paglalagay ng gamit (Sa eroplano, Bidyo 1)

PAGLALAGAY NG GAMIT

(SA EROPLANO, BIDYO 1)

noong makalampas na ang katanghalian

nakapasok na rin kami sa eroplano

animan ang upuan sa bawat hilera

habang nadarama sa puso'y pananabik

minasdan ko ang tanawin sa paliparan

buti't sa tabi ng bintana nakapwesto

tiyak, maya-maya lang kami'y lilipad na

kaya nakita sa kwaderno'y sinatitik

iginala ang mata sa kapaligiran

may naglalagay ng gamit ng pasahero

binidyuhan ang pagsalansan ng maleta

sa kumbeyor na sa ilalim isiniksik

ay, isang tagpo iyon ng pagtutulungan

upang bagahe'y mapag-ingatang totoo

marahil ay sapat-sapat ang sahod nila

nang pamilya nila'y di sa gutom tumitik

- gregoriovbituinjr.

05.31.2023

* ang bidyo ay kuha ng makatang gala sa Mactan airport tungong NAIA, 05.31.2023

* mapapanood ang bidyo sa kawing na: https://fb.watch/k-XRqJBcjl/ 

Pasalubong

PASALUBONG

alas-singko pa lang, kami'y nasa airport na

para sa flight ng alas-syete ng umaga

subalit anong tagal kong maghihintay pa

flight ay nalipat ng alas-dose y medya

nasa loob na't ayoko na ring lumabas

ramdam ko pa'y antok, minuto'y pinalipas

sa upuan nakatulog, dama ang puyat

ngunit gising ang diwa, di dapat malingat

maya-maya pa'y naglibot, nakakagutom

bumili ng makakain at pasalubong

ah, pantawid-gutom din ang biskwit na iyon

buti't may tubig akong nadala rin doon

ako'y pumasok na rin bandang alas-onse

dala kong tubig ay na-detect, at sinabi

ng gwardya, iwan ko raw ang tubig sa tabi

tubig ko'y ininom at iniwan ang bote

buti't may Jollibee, makakakain na rin

kaya di na lang biskwit, may ulam na't kanin

di dapat magutom, ito ang laging bilin

sa sarili't baka tiyan ay pilipitin

- gregoriovbituinjr.

05.31.2023

Pagtungo sa airport

PAGTUNGO SA AIRPORT

kay-agang gumising upang maglakbay na pauwi

nag-ayos, naligo, nagbihis, sadyang nagmadali

mabuting maagap upang pag-alala'y mapawi

pagkasabik ba o lungkot ang sa puso'y naghari

doon nga sa kwarto'y talaga akong tinawagan

alas-kwatro ng madaling araw, gising na naman

nasa hulatanan o lobby naghihintay ang van

upang sumundo sa amin patungong paliparan

tatlo kaming umalis na kasamang nagsidalo

sa tatlong araw na asembliyang ginanap dito

sa Mactan, Cebu, sa lalawigan ni Lapulapu

hinggil sa paksang hustisya't karapatang pantao

madaling araw yaong iskedyul naming nauna

kaya kagabi pa lang ay talagang kumain na

habang mamaya pa magsisialisan ang iba

na bago lumisan ay may almusal o meryenda

uuwi kaming dala ang nangyaring pag-uusap

upang dalhin sa kanya-kanyang lugar ang naganap

na sa paglaon itayo ang lipunang pangarap

na walang nagsasamantala at nagpapahirap

- gregoriovbituinjr.

05.31.2023

* kuha ang bidyo ng madaling araw ng 05.31.2023

* may mapapanood na munting bidyo sa: https://fb.watch/kXnE2YUsA7/

Danggit

DANGGIT

inalmusal ko'y danggit, kaysarap
ng pagkapritong aking nalasap
na para bang ako'y nangangarap

lalo't sikat nga ito sa Cebu
at ngayon ay nakarating dito
kaya hinanap itong totoo

pagtungo sa Cebu'y ikalawa
matapos ang Climate Walk ang una
siyam na taon ang lumipas na

sa airport lamang nagtungo roon
at pa-Maynila na kami noon
di man lamang nakapaglimayon

ngayon sa Cebu nakapagdanggit
sana sa asngal ay di sumabit
salamat sa sarap na kaylupit

- gregoriovbituinjr.
05.30.2023

* asngal - ngalangala

* ang makatang gala ay dumalo sa isang asembliya ng karapatang pantao sa Mactan, Cebu mula Mayo 28-30,2023

Bente pesos na bigas, trenta pesos na kanin

BENTE PESOS NA BIGAS, TRENTA PESOS NA KANIN

bente pesos na bigas / ang pangako sa atin

pangako sa eleksyon / ay di na ba kakamtin?

boladas lang ba iyon / na pang-uto sa atin?

habang trenta pesos na / ang isang tasang kanin

ito ba'y isang aral / sa dukhang mamamayan?

mga trapo'y nangako / sa turing na basahan?

upang manalo lamang / sa nangyaring halalan

nabulag sa pangako / ng trapo't mayayaman?

ay, ano nang nangyari? / nagpabola't nabola?

matagal nang pag-iral / ng trapong pulitika?

kung dati limangdaang / piso raw bawat isa

ngayon naman ay naging / libo na, totoo ba?

trenta pesos ang kanin, / bente pesos na bigas

ang pangako sa masa, / pangako ba ng hudas?

na sadyang ipinako? / kamay kaya'y maghugas?

masabunan pa kaya? / at sa puwet ipunas?

- gregoriovbituinjr.

05.29.2023

Nilay sa karapatan

NILAY SA KARAPATAN

mahalaga ang pinag-usapan

sa asembliya kong dinaluhan

hinggil sa pantaong karapatan

at samutsaring isyung pambayan

dito'y sinikap kong magsalita

at ibahagi ang nasa diwa

lalo na karapatan ng madla

pati na ang usaping pangwika

nagbahagi sa mga sirkulo

sa bawat isyu sa bawat grupo

sayang naman kung napipi ako

sinabi ang nasasaisip ko

makinig ka muna sa umpisa

at pag may pagkakataon ka na

basta umangkop sa isyu't linya

magsalita't makikinig sila

ganyan naman dapat pag may pulong

huwag sa sulok bubulong-bulong

magsalita baka makatulong

upang di tayo mag-urong-sulong

- gregoriovbituinjr.

05.29.2023

Coffee, tea or me?

COFFEE, TEA OR ME? SYEMPRE, IKAW NA 'TE!

minsang kasama si misis ay nag-deyt kami

magkaharap sa lamesa, di magkatabi

paskil sa kanyang likuran: Coffee, Tea, or Me?

aba'y syempre YOU sa kanya'y aking sinabi

pag di siya kasama, may pagpipilian

kape man o tsaa ay iinumin naman

subalit pag si misis na ang naririyan

na talagang pipiliin ko'y siya lamang

ah, kapara ko'y ang makatang si Balagtas

na nagsabi na noon: "Sa loob at labas

ng bayan kong sawi", ngunit ang nilalandas

ay pagsintang parang maong na walang kupas

- gregoriovbituinjr.

05.29.2023

Ang mga awitin ng Sining Dilaab

ANG MGA AWITIN NG SINING DILAAB

ang mga awitin / ng Sining Dilaab
ay talagang dama / at talab na talab
sa puso't diwa ko'y / sadyang nagpaalab
awiting para bang / dyamante't dagitab

magpatuloy tayo / sa pakikibaka
para sa human rights, / para sa hustisya
maraming salamat / sa alay n'yong kanta
para sa obrero, / sa dukha, sa masa

taas-kamao pong / ako'y nagpupugay
sa Sining Dilaab / sa kantang kayhusay
tapik sa balikat / sa di mapalagay
tanging masasabi'y / mabuhay! Mabuhay!

- gregoriovbituinjr.
05.28.2023

* ang Sining Dilaab ay grupo ng mang-aawit na nakabase sa Cebu
* ang dilaab ay Cebuano sa liyab, lagablab

Chorizo de Cebu

CHORIZO DE CEBU

inalmusal ko'y Chorizo de Cebu

pagkat ispesyal na putahe ito

kaya agad na ito'y tinikman ko

lalo't pangalwang beses ko lang dito

agad ngang nakahalina sa akin

ang pangalan pa lang nitong pagkain

soriso, ah, mukhang masarap man din

at piniling ito'y matikman ko rin

kinunan muna ito ng litrato

na nakasulat: Chorizo de Cebu

minsan lang kasing mapapunta rito

kaya aking ninamnam ang soriso

aba'y malasa kaysa karaniwan

at tamang-tama pa sa lalamunan

nadama kong nabusog din ang tiyan

pagkat anong sarap, talaga naman

- gregoriovbituinjr.

05.28.2023

* sinulat ng makatang gala sa ikalawa niyang punta sa Cebu

Pagdatal sa Mactan

PAGDATAL SA MACTAN

at nakarating din sa Mactan tangan ang bagahe

buti'y di Japan na kailangan ng pasaporte

dadalo sa asembliya, dapat may masasabi

hinggil sa mga isyung ang dama'y di mapakali

narating ko na rin ang lupain ni Lapulapu

kung saan si Fernando Magallanes ay natalo

ito ang aking ikalawang pagpunta ng Cebu

una'y noong Climate Walk nang pauwi nang totoo

upang daluhan ang malaking asemliya roon

ng mga prinsipyadong karapatan yaong misyon

na pinag-uusapan ang isyung napapanahon

at panawagang hustisya ng namatayan noon

mga isyu ng mga nawalan ng katarungan

at usaping dapat pag-isipan at pag-usapan

na sistema'y babaguhin kung kinakailangan

at hustisyang panlipunan ay ipinaglalaban

- gregoriovbituinjr.

05.28.2023

* litratong kuha ng makatang gala, 05.27.2023

Paalala sa kalinisan

PAALALA SA KALINISAN

madaling unawain kung uunawain nila

ang paalala sa mga sa opis bumisita:

"Huwag mag-iwan ng anumang uri ng basura,"

at saka, "dumi at kalat sa ating opisina"

magwalis

mag-imis

maglinis

mag-isis

kailangan pa talaga ng paalalang iyon

upang opisina'y iwanang malinis paglaon

habang nakikibaka't tinutupad yaong misyon

ang kalinisan din ng ginagalawan ay layon

- gregoriovbituinjr.

05.27.2023

Ang kuting na ayaw pasusuhin

ANG KUTING NA AYAW PASUSUHIN

nakauna na ang ibang kapatid

pinalipat ang may batik na itim

palipat-lipat, di mapatid-patid

di na makasuso ang isang kuting

tila tulog na ang inahing pusa

o nakapikit lang habang abala

na pasusuhin ang mga anak nga

na agawan sa pagsuso talaga

inaalis ng kapatid ang ulo

ng isang kuting na di makadede

lumipat naman sa kabila ito

ganoon din, di pa rin makadede

ibang kapatid niya't anong kulit

na gustong ang makasuso'y sila lang

hanggang kanyang sarili'y ipinilit

ayaw rin niyang siya'y maisahan

sige, karapatan mo'y igiit mo

kapatid ka namang dapat dumede

ipagtagumpay mo rin ang pagsuso

kaysa magutom ka't mauhaw dine

- gregoriovbituinjr.

05.26.2023

* mapapanood ang bidyo sa: https://fb.watch/kMvUNFH10U/

Kanina, sa dyip

KANINA, SA DYIP

sa dyip, naupo ako sa una

nang may pinuntahan lang kanina

may istiker roong may babala:

"Bawal sumakay ang walang pera!"

buti't ako'y may baryang pambayad

kaya ayun, nagbayad kaagad

bagamat dyip sa takbo'y makupad

dumating din, pagong man ang usad

piniktyuran ko na lamang iyon

baka tama naman yaong layon

baka may nagwa-wantutri roon

inis na ang tsuper kaya gano'n

salamat sa gayong parirala

naalimpungatan ang makata

matagumpay yaong parikala

na tumatagos sa puso't diwa

- gregoriovbituinjr.

05.26.2023

* parirala = phrase

* parikala = irony

Paggising sa umaga

PAGGISING SA UMAGA

paggising sa umaga'y nag-inat

inimis ang inunan kong aklat

kagabi'y umulan at mahamog

buti't tuhod ay di nangangatog

mumog, hilamos, handa'y almusal

barakong mainit at pandesal

karaniwang tagpo pagkagising

mag-eehersisyo, magdi-dyaging

ihahanda ang buong sarili

para sa gawain hanggang gabi

mangangalap ng mga balita

at isyu ng dukha't manggagawa

magsusulat ng mga sanaysay

sinong bibigyan ng pagpupugay

mga kuting ay kukumustahin

pakakainin, paiinumin

at maglalakad muli sa lubak

nanamnamin ang paksa sa utak

na isusulat agad sa papel

titipain naman sa kompyuter

- gregoriovbituinjr.

05.26.2023

Ragasang tubig sa biglang pag-ulan

RAGASANG TUBIG SA BIGLANG PAG-ULAN

tumigil ako sa isang lansangan

kung saan tao'y may masisilungan

lalo't bigla ang pagbagsak ng ulan

nakisilong sa isang paaralan

magpapasa sana ako ng akda

sa isang manunulat na dakila

di na natuloy ang inaadhika

lampas-oras, baka siya na'y wala

oras nga'y pinagsikapang habulin

lalo na'y kayhaba ng lalakarin

biglang umulan, di na kakayanin

tila ba ako'y nasa isang bangin

pinagmasdan ko na lamang ang kanal

ragasa ang tubig tungong imburnal

walang payong kaya natitigagal

ako'y basang sisiw at nangangatal

- gregoriovbituinjr.

05.25.2023

* mapapanood ang bidyo sa: https://fb.watch/kL85cDnujH/

Wrestling ng mga kuting

WRESTLING NG MGA KUTING

naglalaro muli ang mga kuting

animo sila'y mga nagre-wrestling

balibag dito at doon, ang galing

o baka naman nagla-loving-loving

sa galaw ng kanilang buntot pa lang

alam mong sila'y nagkakatuwaan

masaya lang silang naghaharutan

palibhasa'y mga bata pa naman

akala mo ba, kaya mo ako, ha?

aba'y sabi ng isa sa kanila

palakasan, sinong agad tutumba

sige nga, ang sagot naman ng isa

baka naman sila'y nag-eensayo

na pagbabalibag daw ba'y paano

baka raw may dagang malaki, naku

sa pagdepensa'y dapat nang matuto

nagkatuwaan ang mga alaga

habang sa kanila'y nakatunganga

sa panonood pa lang ay may tuwa

sa puso, bagamat di mo halata

- gregoriovbituinjr.

05.25.2023

* ang bidyo ay mapapanood sa: https://fb.watch/kK-uulwtIh/