Proyektong 'ghost' flood control

PROYEKTONG 'GHOST' FLOOD CONTROL

pulos buhangin, konting semento?

sa flood control, o wala nga nito?

bakit baha pa rin sa bayan ko?

bakit 'ghost' ang kanilang proyekto?

di pala climate change ang dahilan

sa flood control kundi kurakutan 

dapat mapanagot ang sinumang

bitukang halang na nagpayaman

konggresista't senador na suspek

na sa pera ng bayan ay adik

dapat sa piitan na isiksik

at huwag tayong patumpik-tumpik

nakaiiyak, nakalulungkot

ang nangyayari't kayraming salot

na lingkod bayang dapat managot

ikulong na lahat ng kurakot

baguhin na ang sistemang bulok 

pagkat kabuluka'y di pagsubok

kundi gawain ng mga hayok

na sa salapi'y pawang dayukdok

- gregoriovbituinjr.

10.14.2025

* litrato kuha sa Luneta sa Maynila, Setyembre 21, 2025

Pagninilay

PAGNINILAY

i

di nagkakasakit ang bakal

kahit kalawang pa'y kainin

isa itong magandang aral

mula ating salawikain

ii

isa lang akong maralita

na nakikipagkapwa-tao

kasangga rin ng manggagawa

na sadyang nagpapakatao

iii

bulsa ng korap na bumukol

ay dahil sa sistemang bulok

sa korapsyon talaga'y tutol

panagutin ang mga hayok

iv

ang oligarkiya'y kalawang

ang dinastiya'y kalawang din

na sinisira'y ating bayan

sagpang pati ating kakánin

- gregoriovbituinjr.

10.14.2025

Sa sinta

SA SINTA

oo, matatag ako pagdating sa rali

subalit ako'y tumatangis gabi-gabi

tula't rali lang ang bumubuhay sa akin

minsan, nais kong kumain, di makakain

subalit ganito lang ako, aking sinta

habang patuloy na nagsisilbi sa masa

hamo, balang araw, magkikita rin tayo

pag umabot sa edad na pitumpu't pito

o marahil walumpu't walo o di kayâ

sandaang taon, kahit abutin ng sigwâ

nais ko pa kasing may nobelang matapos

tungkol sa mundo ng maralita't hikahos

kung paano gibain ang sistemang bulok

upang uring obrero'y ilagay sa tuktok

nagkakilala naman tayong ako'y tibak

na pinagtatanggol ang mga hinahamak

siyang tunay, lalagi ka sa aking pusò

ako'y ganoon pa rin naman, walang luhò

sa katawan, naaalala kitang lagi

iniibig ka pa rin ng puso kong sawi

- gregoriovbituinjr.

10.13.2025

Ang Paghahanap kay Tapat

ANG PAGHAHANAP KAY TAPAT

di ko nabili ang nasabing aklat

dahil bulsa ko'y butas at makunat

napapanahon pa naman ang aklat

pamagat: Ang Paghahanap Kay Tapat

magkakilala kami ng may-akdâ

lumipas na'y tatlong dekada yatà

ngayon, may matagumpay siyang kathâ

si Bert Banico, kaygaling na sadyâ

si Tapat ba'y mahahanap pa? saan?

sa gobyernong pulos katiwalian?

sa DPWH? sentro iyan

ng mga kickback sa pondo ng bayan

sa Senado bang sanay sa insertion?

sa Kongreso bang tadtad ng korapsyon?

sa kontraktor bang malaki ang patong?

sa kapulisang praktis na'y mangotong?

sa mga paring kunwa'y lumilingap?

sa pulitikong tuso't mapagpanggap?

sa mga kabataang nangangarap?

o sa isang mayang sisiyap-siyap?

mukhang siya'y wala sa Pilipinas

sa lupa nina Maganda't Malakas

wala noong panahon pa ni Hudas

si Tapat ba'y nasa Landas ng Wakas?

- gregoriovbituinjr.

10.13.2025

* litrato mula sa google

Paalala sakaling magkalindol

PAALALA SAKALING MAGKALINDOL

naglindol, kayâ payò ng mga kasama

ay huwag manatili sa mga gusaling

gawa ng DPWH at kontraktor

at baka mabagsakan ng kanilang gawâ

dahil sa mga ghost project ng flood control

dahil patuloy pa ring bahâ sa Bulacan

dahil sa korapsyon sa DPWH

wala nang tiwalà ang bayan sa kanila

baka nga pulos substandard na materyales

ang ginamit dahil kinurakot ang pondo

ng bayan, ibinulsa ng mga buwaya

kaya materyales talaga'y mahuhunâ

katiwalian nila'y parang tubig bahâ

hahanap at hahanap ng mapupuntahan

habang ang masa naman ay nakatungangà

walang ginagawâ, hay, walang ginagawâ

Oktubre na, wala pang nakulong na corrupt!

nganga pa rin ba pag dumating ang The Big One?

ikulong na ang mga kurakot! ikulong!

kung maaari lang, bitayin sila ngayon!

- gregoriovbituinjr.

10.13.2025

* litrato mula sa kinasapiang messenger group

Pagsisikap

PAGSISIKAP

narito pa rin akong / lihim na nagsisikap

upang tupdin ang aking / mga pinapangarap

nagbabakasakaling / may ginhawang malasap

kahit laksang problema / itong kinakaharap

kayâ patuloy akong / kumakathâ ng kwento,

tulâ, dulâ, sanaysay / bilang paghahandâ ko

upang unang nobela / ay makathang totoo

at maipalathala't / maging ganap na libro

mabuti't may Talibâ / ng Maralitâ pa rin

upang maikling kwento / ay malathala man din

dalawang pahinâ lang / kung papel ay tiklupin

Taliba'y publikasyon / nang dukha'y may basahin

salamat sa nagla-like / ng aking mga kathâ

sanaysay, dulâ, kwento, / lalo na't mga tulâ 

pagkat tula'y tulay ko / sa sambayana't dukhâ 

sa kanila nanggaling / ang sa kwento ko'y diwà

- gregoriovbituinjr.

10.12.2025

Lutang sa hangin

LUTANG SA HANGIN

"Pagsubok ba ng Diyos ang katiwalian?"

aba'y nainis ako't siya'y nasigawan:

"Gawain iyon ng sa gobyerno'y kawatan

na ninakawan nila'y tayong taumbayan!"

nakahiligan niya'y pawang pamahiin

na gawa ng demonyo ang lahat ng krimen

di lapat sa lupa, diwa'y lutang sa hangin

"Pag-aralan mo ang lipunan!" aking bilin

dating adik siyang nais magbagong buhay

ngunit lutang din sa hangin ang gumagabay

dapat kongkretong suri sa kongkretong lagay

ng bayan, aralin ang mga isyu't ugnay

ipagpaumanhin kung nainis sa kanya

bagamat ayos lang naman ang tanong niya

dapat ko lamang pagpaliwanagan siya

ng lapat sa lupang kasagutan talaga

- gregoriovbituinjr.

10.12.2025

Kaming mga tibak na Spartan

KAMING MGA TIBAK NA SPARTAN

kaming mga tibak na Spartan

malulugmok lang sa kamatayan

at di sa anumang karamdaman

na prinsipyo naming tangan-tangan

kaya katawa'y pinatatatag

ang puso't diwa'y di nangangarag

ginagamot ang sariling sugat

lunas ay agad inilalapat

kumakain ng sariwang gulay

nang laman, diwa't puso'y tumibay

sariwang buko ang tinatagay

habang patuloy sa pagsasanay

nabubuhay na kaming ganito

at ganito kami hanggang dulo

tuloy sa paglilingkod sa tao

lalo sa dukha't uring obrero

- gregoriovbituinjr.

10.12.2025

ALTANGHAP (ALmusal, TANGhalian, HAPunan)

ALTANGHAP (ALmusal, TANGhalian, HAPunan)

pritong isda, talbos ng kamote

okra, bawang, sibuyas, kamatis

pagkain ng maralita'y simple

upang iwing bituka'y luminis

sa katawan nati'y pampalusog

nang makaiwas sa karamdaman

puso't diwa man ay niyuyugyog

ng problema ay makakayanan

iwas-karne na'y patakaran ko

hangga't kaya, pagkain ng prutas

ay isa pang kaygandang totoo

pagkat iinumin mo ang katas

aba'y oo, simpleng pamumuhay

at puspusan sa pakikibaka

dapat tayo'y may lakas na taglay

lalo na't nagsisilbi sa masa

- gregoriovbituinjr.

10.12.2025

Maging bayani ka sa panahong ito

MAGING BAYANI KA SA PANAHONG ITO

maging bayani ka / sa panahong ito

laban sa korapsyon / ng mga dorobo

bahâ sa probinsya't / lungsod nating ito

pagkat ibinulsa / mismo nila'y pondo

ng bayan, trapo ngâ / ang mga kawatan

na 'naglilingkod' daw / sa pamahalaan

aba'y senador pa't / konggresista iyan

at mga kontraktor / ang kasabwat naman

masa'y niloloko / nitong mga hayok

sa salapi, masa'y / di dapat malugmok

subalit di sapat / ang sanlibong suntok

sa mga nilamon / ng sistemang bulok

tuligsain natin / lahat ng kurakot

at singilin natin / ang dapat managot

ipakulong natin / ang lahat ng sangkot

at tiyaking sila'y / di makalulusot

sa panahong ito / ay maging bayani

unahin ang bayan, / at di ang sarili

singilin ang trapong / kunwari'y nagsilbi

panagutin natin / silang tuso't imbi

- gregoriovbituinjr.

10.12.2025

* litrato kuha sa Foro de Intramuros, Oktubre 11, 2025, sa aktibidad ng grupong Dakila

Ang taong pinili mo, kaysakit pag nawala sa iyo

ANG TAONG PINILI MO, KAYSAKIT PAG NAWALA SA IYO

(Sa ikaapat na DEATH Monthsary ni misis)

ang taong pinili mo, kaysakit pag nawala sa iyo

pinili ko ang aking asawa, pinili niya ako

sumumpâ sa mayor, sa tribu, sa altar, sa kasaysayan

na magsasama sa ginhawa, hirap, saya't kalungkutan

kumpara sa magulang at kapatid, mas ramdam ang sakit

pag nawala ang minamahal mo't sinamahan sa gipit

kaysa mga taong kinagisnan ngunit di mo pinili

na minahal mo rin ngunit marahil di gayon kahapdi

ipagpaumanhin, iyan ay sarili ko lang pananaw

nami-miss ko siya't di mapagkatulog sa gabi't araw

tunay ngang ibang-iba ang kapangyarihan ng pag-ibig

napapanaginipan ko pa ang maganda niyang tinig

sa rali nga'y mandirigmang Spartan akong nakatayô

na sa pag-iisa, lumuluha ako't nakatalungkô

- gregoriovbituinjr.

10.11.2025

Dalamhati, pighati, lunggati, luwalhati

DALAMHATI, PIGHATI, LUNGGATI, LUWALHATI

(Sa ikaapat na DEATH Monthsary ni misis)

anong lungkot ng buhay nang mawala ka na, sinta

kahit na tanghaling tapat, mapanglaw ang kalsada

mga rali ang bumubuhay sa akin tuwina

bilang aktibistang Spartan pa'y nakikibaka

ay, nadarama ko ngayon ay biglaang pagbagsak

di ng aking katawan, kundi ng puso ko't utak

mabuti nga't di pa ako gumagapang sa lusak

pagkat may rali't tula pang sa puso'y nakatatak

patuloy pa rin ang dama kong pagdadamhati

nilalakasan man ang loob ay pulos pighati

ang makita ka't makasamang muli ang lunggati

baka pag nangyari iyon, dama na'y luwalhati

- gregoriovbituinjr.

10.11.2025

Kaylayo man ng kanyang libingan

KAYLAYO MAN NG KANYANG LIBINGAN

(Sa ikaapat na DEATH Monthsary ni misis)

kung sa Maynila lang nakalagak

si misis, tiyak na araw-araw

ko siyang dadalhan ng bulaklak

ngunit hindi, ako'y namamanglaw

kaylayo ng kanyang sementeryo

na sa pamasahe'y talo pa ngâ

lalo't tungkulin ko'y nasa sentro

de grabidad dini sa Maynila

libingan ay nasa lalawigan

habang ako'y narito sa lungsod

at kumikilos para sa bayan

sa isyu't laban nagpatianod

madadalaw sambeses, santaon

at doon na rin ako kakathâ

nitong mga taludtod at saknong

na handog ng makatâ sa mutyâ

kaylayo man ng kanyang libingan

ngunit sa puso ko'y buhay siya

naririto sa kaibuturan

ang diwata't tanging sinisinta

- gregoriovbituinjr.

10.11.2025

Mga gurô ang nasa headline ngayon

MGA GURÔ ANG NASA HEADLINE NGAYON

pawang mga gurô ang headline ngayong araw

sa dalawang diyaryo, gurong dapat tanglaw

magkaibang balitang karima-rimarim

mga suspek ay gurô, biktima'y gurô rin

sa una, dalawang guro'y nangmolestiya

ng mga estudyante, dalawa'y buntis na

sa ikalawa, guro't syota ay nagtalo

dahil daw sa nakawalang alagang aso

bunga nito'y pinaslang ng tibô ang gurô

yaong balat at tinalupan ay naghalò

pawang mga balitang di mo maiisip

dahil pag guro'y respeto agad ang lirip 

hustisya sa mga biktima nawa'y kamtin

at mga suspek ay madakip at litisin

- gregoriovbituinjr.

10.10.2025

* mga ulat mula sa pahayagang Abante Tonite at Pang-Masa, Oktubre 10, 2025, p.1 at 2

Gulay sa hapunan

GULAY SA HAPUNAN

iwas-karne at mag-bedyetaryan

pulos gulay muna sa hapunan

ganyan ang buhay ng badyetaryan

batay sa badyet ang inuulam

sa katawan natin pampalakas

ang mga gulay, wala mang gatas

may okra, kamatis at sibuyas

pulos gulay na'y aking nawatas

iyan ang madalas kong manilay

upang kalamnan nati'y tumibay

payo rin ito ng aking nanay

kaya kalooban ko'y palagay

sa hapunan, ako'y saluhan n'yo

at tiyak, gaganahan din kayo

- gregoriovbituinjr.

10.10.2025

Paglahok sa Black Friday Protest

PAGLAHOK SA BLACK FRIDAY PROTEST

isa lamang ako sa mamamayang galit

ekspresyon ang Black Friday Protest sa paggiit

ng hustisya para sa dukha't maliliit

na tinig ay kayhabang panahong winaglit

panahon nang maparusahan at ikulong

ang mga lingkod bayan daw ngunit ulupong

mga kongresista't senador na nangotong

pati kontratistang ginawa tayong gunggong

kahit ako'y nag-iisa, tiyak lalahok

sa takbo ng kasaysayan nang mailugmok

ang sistemang bulok at pulitikong bugok

nang uring manggagawa'y ilagay sa tuktok

simpleng tibak man ako at abang makata

pag nabago ang sistema'y saka huhupa

ang galit nitong bayan sa trapong kuhila

ngayon, tabak ni Andres muna'y hinahasa

- gregoriovbituinjr.

10.10.2025

Tatlong herbal na inumin

TATLONG HERBAL NA INUMIN

di naman iinumin nang sabay

magkasunod o isang tunggaan

may pagitan itong isang oras

mainit na tubig lang ang sabay

sayang kung tubig ay iinitin

kada oras sa takure namin

kaya tatlong baso'y pagsabayin

ngunit di lang sabay iinumin

isang baso'y salabat o luya

dahon ng guyabano ang isa

isa nama'y sambasong bawang pa

inuming pampalakas talaga

iyan na ang aking iniinom

gabi, umaga, tanghali, hapon

hay, kayrami pang trabaho't misyon

dapat katawa'y malakas ngayon

- gregoriovbituinjr.

10.10.2025

Baha sa tapat ng bahay

BAHA SA TAPAT NG BAHAY

kaylalaki ng patak ng ulan
dito pa rin ba'y ghost ang flood control?
tingni, nagbaha na sa lansangan
flood control ba'y paano ginugol?

batid na ng bayan ang korapsyon
na likha ng mga lingkodbayan
talagang loko ng mga iyon
ibinulsa ang pera ng bayan

ay, wala ba silang mga budhi
kung meron man, budhi'y sakdal itim
dapat nang lunurin sa pusali
silang budhi'y kakulay ng uling

sa lumalaban, ako'y saludo
upang mabago na ang sistema
itayo'y lipunang makatao
mga kurakot, parusahan na!

- gregoriovbituinjr.
10.10.2025

* mapapanood ang bidyo sa kawing na: https://www.facebook.com/reel/2353627365076958

Oktubre 9 sa kasaysayan

OKTUBRE 9 SA KASAYSAYAN

pinaslang ang rebolusyonaryong si Che Guevara
taga-Argentina, pinatay sa bansang Bolivia

unang pinatugtog sa radio sa buong daigdig
ang awiting Imagine ni John Lennon ay narinig

isang lupon ang tinatag ng mga mambabatas
upang akdain ang Konstitusyon ng Pilipinas

itinatag ang paaralang Yale University
at nagdiborsyo sina Elvis at Priscilla Presley

ang sewing machine ni Singer ay naimbento naman
at lumindol sa Pakistan, India, Afghanistan

bansang Cambodia naman ay naging Khmer Republic
ang mga nabanggit, sa kasaysayan natititik

magkakaibang taon, magkakaibang balita
na sa petsa Oktubre Nuwebe nangyaring sadya

- gregoriovbituinjr.
10.09.2025

* pinagbatayan ay mula sa pahayagang Pang-Masa, Oktubre 9, 2025, pahina 4

Dahil sa misyong dakila

DAHIL SA MISYONG DAKILA

parang araw-araw na lang, lagi akong tulala

subalit dapat ipakita kong ako'y masigla

kahit hindi, sapagkat ako'y isang mandirigma

at nalulutas iyon, dahil may misyong dakila

iyon ang bumubuhay sa akin sa araw-gabi

nakapagpapasigla pa ang pagdalo sa rali

kaya sa anumang laban, di ako nagsisisi

na kabilang ako sa mga sa bayan nagsilbi

tulad ko'y ang mandirigmang Ispartang si Eurytus

na hanggang sa huling sandali'y nakibakang lubos

di gaya ng Ispartang duwag, si Aristodemus

kinahiya ng kanyang lipi, di nakipagtuos

kumikilos pa ako't patuloy na lumalaban

upang tuluyang mapawi ang mga kabulukan

ng sistema't itatag ang makataong lipunan

iyan ang dakila kong misyon hanggang sa libingan

- gregoriovbituinjr.

10.09.2025

BOTO, BOGO, BOFO

BOTO, BOGO, BOFO

Buy One, Take One: BOTO

Buy One, Get One: BOGO

Buy One, Free One: BOFO

iba'y ibang daglat

sa bibilhing sukat

iyan nga ba'y sapat

na pawang pakulô

nang tinda'y lumagô

nang sila'y tumubò

pag binili'y isa

may libre pang isa

may kita na sila

ang BOTO ng masa

sana'y di ibenta

sa tusong burgesya

BOTO mo'y butatâ

pag nanalo na ngâ

ay trapong kuhilà 

- gregoriovbituinjr.

10.09.2025

* litrato mulâ kung saan-saan

Ako'y bato

AKO'Y BATO

ako'y bato, apo ni Batute

na pagtula'y tungkulin at mithi

pinaliliwanag anong sanhi

bakit sistema'y nakamumuhi

bagamat bato ay batong buhay

idinaraan na lang sa nilay

ang kinakatha kong tula'y tulay

sa sinapupunan hanggang hukay

ako'y bato ay di naman kalbo

kahit minsan ay nagdedeliryo

pag si misis pinuntahan ako

anong sarap ng pakiramdam ko

pananim niya'y dinidiligan

ng mga luha ko't kalungkutan

na balang araw, lalago naman

upang bunga'y mapakinabangan

- gregoriovbituinjr.

10.09.2025

Sa tambayan

SA TAMBAYAN

nasa Fiesta Carnival muli ako, O, sinta

doon sa dati, sa tinatambayan ko madalas

muling kumakatha habang naaalala kita

tayo'y nag-usap anong panonooring palabas

oo, madalas, doon mo ako pinupuntahan

agad magkukwento ka pagkagaling sa trabaho

kaytamis ng ngiti mo't agad akong susulyapan

habang ako nama'y nakikinig sa iyong kwento

ako'y nag-iisa na lang sa Fiesta Carnival

habang inaalagata ang nakaraan natin

habang doon sa tabi-tabi ay nagmiminindal

aba'y anong sarap pa ng ating mga kutkutin

hanggang dito na lang muna, O, diwata ko't irog

nagunita ka lang ng pusong nagkalasog-lasog

- gregoriovbituinjr.

10.08.2025

Mukhang Sr. na kasi si Jr.

MUKHANG SENIOR NA KASI SI JUNIOR

sa dulo ng ngalan ko'y may Junior

aba'y mukha na raw akong Senior

kaya pamasahe imbes kinse

sa minibus, singil nila'y dose

bago mag-Senior, ilang taon pa

ngunit nangalahating siglo na

aba'y dapat wala pang diskwento

ngayon, meron na't ubanin ako

salamat naman at nakatipid

ang mula sektor ng sagigilid

kung may Senior I.D., di nagtanong

na sana'y masasagot ko iyon

di pa ako Senior, sasabihin

ko't diskwento'y tiyak babawiin

- gregoriovbituinjr.

10.08.2025

Tarang mag-almusal

TARANG MAG-ALMUSAL

patibayin ang katawan

at busugin din ang tiyan

kumain na ng agahan

upang di ka panghinaan

mahirap kung walang kain

kung maraming lalakarin

dahil baka ka gutumin

ay baka maging sakitin

tara munang mag-almusal

upang di babagal-bagal

at din rin hihingal-hingal

sa daraanan mang obal

dapat tumatag ang isip

na kayraming nalilirip

busog ay may halukipkip

at lakas ang kahulillip

- gregoriovbituinjr.

10.08.2025

Kami'y mga apo ni Leonidas

KAMI'Y MGA APO NI LEONIDAS

kami'y mga apo ni Leonidas

mandirigmang lumalaban ng patas

mandirigma ang tinahak na landas

marangal, sa labanan ay parehas

katulad ko'y Ispartang si Eurytus

maysakit man ay lumaban ng lubos

nang sa Thermopylae, siya'y inulos

hanggang mga mandirigma'y naubos

di gaya ng isang Ispartang duwag

na ang sariling buntot ay nabahag

si Aristodemus na nangangarag

sa digma'y umuwi, di nakibabag

kami'y mga aktibistang Spartan

na laging handâ sa anumang laban

na misyon ay baguhin ang lipunan

nang ginhawa'y kamtin ng buong bayan

- gregoriovbituinjr.

10.07.2025

* litrato mula sa google

Kwento ng dalawang wish

KWENTO NG DALAWANG WISH

nag-ala-Kara David na si Bishop

ngunit iniba lang ang pangungusap

kay Kara, mamatay lahat ng korap

na birthday wish ko na rin sa hinagap

kay Bishop Soc, kung siya'y mamamatay

mga korap sana'y maunang tunay

kina Kara't Bishop, wish nila'y lantay

mula sa pusò, may galit na taglay

poot sa lahat ng mga kurakot

sa kaban ng bayan, dapat managot

bantayan, dapat walang makalusot

ipakita natin ang ating poot

mamatay lahat ng mga tiwali

trapo't dinastiya'y dapat magapi

- gregoriovbituinjr.

10.08.2025

Magwawakas din ang Nakbâ

MAGWAWAKAS DIN ANG NAKBÂ

mulâ ilog hanggang dagat

lalaya rin ang Palestine

gagapiing walang puknat

ang mga hudyong salarin

magwawakas din ang Nakbâ

mananakop ay iigtad

at magiging isang bansâ

silang malaya't maunlad

kaya nakiisa ako

sa pakikibaka nila

narito't taas-kamao

upang sila'y lumaya na

- gregoriovbituinjr.

10.07.2025

* Nakbâ - sa Arabiko ay catastrophe o malaking kapahamakan

Sino bang modelo sa katha kong tulâ?

SINO BANG MODELO SA KATHA KONG TULA?

sino bang modelo sa katha kong tulâ?

gayong pwede rin namang talagang walâ

minsan, pakikiusapan mo ang madlâ

kung pwede ba silang litratuhang sadyâ

madalas din namang bantulot ang masa

sa rali, malilitratuhan talaga

pag ayaw makuhanan, bakit nandyan ka?

lalo't maraming kamera at masmidya

pag may kinunang may plakard, aba'y gusto

pag ayaw, makata na lang ang modelo

na sa pagtula mismo'y nakalitrato

kaysa maghanap pa ng kung sino-sino

pagkat di na pipilitin ang sarili

"hoy, ikaw muna'y maging modelo rini"

sa litkuran o background na sinasabi

upang agad maparating ang mensahe

walang magawa kundi makata na lang

upang yaring tula ay may katibayan

na pag binasa, totoo pala naman

yaong sa tula'y isinasalarawan

- gregoriovbituinjr.

10.07.2025

Resign All!

RESIGN ALL!

iyan ang tindig namin - Resign All!

bulsa ng korap nga'y bumubukol

dinastiya pa'y pinagtatanggol

ng mga kurakot sa flood control

lahat ng korap, dapat managot

korapsyon nila'y katakot-takot

mag-resign na ang lahat ng sangkot

parusahan lahat ng kurakot 

kaya huwag na tayong bumoto

sa walang mapagpiliang trapo

pulos kinatawan ng negosyo,

oligarkiya't burgesyang tuso

pinaglaruan ang mamamayan

sa kalunsuran at lalawigan

ibinulsa ng mga kawatan

ang pondong nakalaan sa bayan

kaya mag-resign na silang lahat

RESIGN ALL! ang sigaw nami't sumbat

gobyerno na'y mapanglaw na gubat

serbisyo'y ninenegosyong sukat

- gregoriovbituinjr.

10.07.2025