Natibò

NATIBÒ

di salitang Filipino ng "native" ang natibo

di dapat Kastilaloy o barok ang salin dito

pagkat "katutubò" ito sa wikang Filipino

tanong kasi'y nabubog, natibò ang sagot dito

mula sa salitang tibò, na mabagal ang bigkas

di tibô na lesbyana, na mabilis ang pagbigkas

ang tibò ay tinik sa talahiban sa Batangas

na sa lalawigan ni ama'y doon ko nawatas

bihira naman ang talahiban dito sa lungsod

bubog ang nakasusugat, kaya tanong: nabubog

natibò ay lalawiganing salitang natisod

o batid din marahil ng gumawa nitong krosword

kaya sa salitang "native", huwag itong isalin

ng "natibo" kundi "katutubò", taal sa atin

may impit naman ang natibò, dapat alam natin

at ilapat sa wasto kung sakaling gagamitin

- gregoriovbituinjr.

05.06.2023

* ang krosword ay mula sa pahayagang Pilipino Star Ngayon, Mayo 5, 2023, p.14

Pagtagay

PAGTAGAY

tumagay muna't pahinga naman

at sardinas ang pinupulutan

relaks-relaks din paminsan-minsan

tumagay na naman ang kolokoy

"work and no play can make you a dull boy"

di ba, ika nila sa Ingles, hoy

kanina, mais sabaw, may fiber

ngayon, Red Horse, sardinas, mag-partner

simple lang tumagay, walang hassle

umiinom na naman ang kumag

para sa gabing ito'y panatag

pagkalasing ay tila kalasag

tara, minsan lang ito, tagay na

okay lang ako kahit mag-isa

wala namang nakakaalala

eh, ano nga palang selebrasyon?

wala lang, ay, teka, aba'y meron!

birthday nga pala ni Karl Marx ngayon

- gregoriovbituinjr.

05.05.2023

Titisan

TITISAN

ginawa kong muli ay mga ashtray o titisan

mula sa lata ng sardinas na wala nang laman

aba'y sayang naman kung basta itatapon na lang

gayong maaari pang gawing lagayan ng upos

at titis ng yosi sakali mang ito'y maubos

ito'y inisyatiba, walang sinumang nag-utos

para lang alam mo, di ako naninigarilyo

ang titisan sa kalikasan ay munting ambag ko

nang di pakalat-kalat ang upos, titis o abo

aba'y nasasakal na sa upos ang katubigan

na lulutang-lutang sa ilog, sapa't karagatan

ang tubig ay buhay, di man lang natin matulungan

ang titisan ay iaambag ko sa opisina,

plasa, barberya, palengke, at kung saan-saan pa

munti man, tulong na sa kalikasang nagdurusa

- gregoriovbituinjr.

05.05.2023

Karton lang ang pagitan

KARTON LANG ANG PAGITAN

sa labas ng bahay, sa bakuran

ay aking ginawan ng tirahan

ang limang kuting na nananahan

sa bahay, karton lang ang pagitan

lalabasan nila'y nahahanap

kaya pinasakan ko ang butas

ngunit mahusay silang umakyat

talaga namang nakakaalpas

pagkat gutom, hanap ay pagkain

pag ngumiyaw, uhaw, painumin

at bibigyan din ng makakain

pag busog, tutulog na ang kuting

sa petsang Mayo Disisiyete

aba'y sambuwan na sila dine

ah, matagal pa bago lumaki

ngunit mayroon na silang silbi

nawala nga yaong mga daga

ay napalitan naman ng pusa

buti nang may ganitong alaga

na sa puso'y may hatid na tuwa

- gregoriovbituinjr.

05.05.2023

Ang nakaakbay

ANG NAKAAKBAY

uy, aba, kay Greg, may umakbay na

sabi noon ng isang kasama

wala raw syota, akala nila

subalit may umaakbay pala

oo, may umakbay na sa akin

aba, ako mismo'y kinilig din

torpe man ngunit nanligaw pa rin

hanggang ako nga'y kanyang sagutin

ngayon, kasama ang nakaakbay

sa mga paglalakbay sa buhay

siya ang napangasawang tunay

kapiling hanggang ako'y mamatay

baka lahat daraan sa ganyan

na may isang makakatuluyan

- gregoriovbituinjr.

05.05.2023

* litrato'y selfie ng makatang gala habang sakay sa harapan ng dyip

Pinaglagaan ng mais

PINAGLAGAAN NG MAIS

kaysarap din namang inumin

ng pinaglagaan ng mais

na talagang pampalusog din

at bituka pa'y nalilinis

panibago kong bitamina

ang sabaw na pinaglagaan

ng mais na anong sarap pa

na talaga kong kailangan

nagbabawas ng kolesterol

at panganib ng colon cancer

sa kalusugan nauukol

mataas din ito sa fiber

panlaban din daw sa anemya

pinapadali ang panunaw

ito'y anti-oxidant pala

sa mata pa'y nagpapalinaw

tara, ito'y ating subukan

nang kolesterol ay bumaba

kaysarap ng pinaglagaan

lalo ang mais na nilaga

- gregoriovbituinjr.

05.05.2023

Sardinas na bistek

SARDINAS NA BISTEK

binili ko'y sardinas na bistek

upang tikman kung ano ang lasa

aba'y kaysarap pala ng lintik

pritong sardinas na, may sarsa pa

di na nakabili ng pandesal

bistek na sardinas ang binuksan

malasa, ulam ko sa almusal

at ang pakiramdam ko'y gumaan

kaluluto lang ng bigas mais

ay sinabayan na ng sadinas

na bistek, di ako nakatiis

sa gutom, kaysa naman mamanas

porke ba agad akong nabusog

at para bagang biglang inantok

ay hihiga muli't matutulog

ah, hindi, ako'y may inaarok

- gregoriovbituinjr.

05.05.2023

Lathalain tungkol sa Antique

LATHALAIN TUNGKOL SA ANTIQUE

binasa ko yaong lathalain

hinggil sa lalawigang Antique

pook yaong inilarawan din

na talagang kabigha-bighani

sa aking puso't diwa'y pamilyar

kahit di pa roon nakapunta

pagkat ina ko'y galing sa lugar

na iyon, sa bayan ng Barbaza

ah, animo ako'y tagaroon

gayong Manileño akong tunay

pangarap kong makarating doon

sa probinsya ng mahal kong nanay

halo mang Batanggenyo't Karay-a

marating ang Antique'y layunin

habang malakas pa'y makapunta

pangarap itong dapat tuparin

narating ko na ang ibang bansa

Paris, Japan, Tsina, Thailand, Burma

subalit sa Antique'y di pa nga

ah, kami ni misis ang pupunta

salamat po sa nagsulat nito

at nabuhay muli ang pangarap

na magtungo sa probinsyang ito

kahit sa malayong hinaharap

- gregoriovbituinjr.

05.05.2023

* ang anim na pahinang artikulong "Antique" na sinulat ni DJ Rivera ay nasa buwanang Enrich magazine na kadalasang mabibili sa Mercury Drug, isyu ng Abril 2023, pahina 76-81

Matapos kumain ng mga kuting

MATAPOS KUMAIN NG MGA KUTING

ginigising ni Kulit si Antukin

hayaan mo muna siyang matulog

iyan ang yugto matapos kumain

habang nahimbing na ang mga busog

hayaan muna silang magpahinga

at marahil sila'y may hinahabi

sa panaginip anong masarap ba

upang kagutuman nila'y mapawi

pagtulog nila'y aking pinagmasdan

ano kayang kanilang panaginip

bata pa sila, wala pang sambuwan

heto kaming sa kanila'y sumagip

nawala na ang isa, lima na lang

na sana nawala'y makapiling pa

baka nandiyan sa tabi-tabi lang

at may iba nang kumupkop sa kanya

- gregoriovbituinjr.

05.04.2023

* mapapanood ang bidyo sa: https://fb.watch/kjDUysG4OW/

Talupapak, ambulong, talupad, atbp.

TALUPAPAK, AMBULONG, TALUPAD, ATBP.

sa diksiyonaryo'y mayroon akong hinahanap

nang mata ko'y mapadpad sa salitang talupapak

kahulugan nito'y agad naunawaang ganap

pati na rin ang talurok, talusad, at talupad

iyang talupapak pala, ayon sa depenisyon,

ay paunang tipan sa pangkalahatang ambulong

o isang kasunduan sa kasiya-siyang pulong

ibig namang sabihin ng talupad ay batalyon

minsan, maganda ring magbasa ng diksiyonaryo

di lang magsaliksik ng mga kahulugan dito

makitang may katumbas na salita sa ganito

tulad ng talura na sa Pangasinan ay tatlo

dulas ang kahulugan ng talusad at taluras

ang talurok ay matarik, matulis, at mataas

sa talupaya, tila sa pagkatayo'y nanigas

talupak sa palma'y balat sa bahaging itaas

marami pala tayong matutumbas na salita,

kung batid lang natin, sa mga salitang banyaga

mga ito'y mahalaga sa tulad kong makata

lalo na sa pagtataguyod ng sariling wika

- gregoriovbituinjr.

05.04.2023

* ang litrato'y mula sa UP Diksiyonaryong Filipino (UPDF), pahina 1218

* ambulong, mula sa UPDF, p. 47, na ibig sabihin ay 1. kasiya-siyang usapan, 2. kasunduan

Nang kumain kami sa labas

NANG KUMAIN KAMI SA LABAS

literal na kumain kami sa labas, tingnan mo

halatang nasa bangketa kami, nasa litrato

gulong nga ng mga traysikel ay kita mo rito

may lamesa't upuan naman sa bangketang ito

nag-deyt ang magsyota, este, mag-asawa na pala

habang sarap na sarap kaming kumain talaga

nakita lang sa pesbuk ang nasabing karinderya

at inalam na namin ni misis kung masarap ba

tama lang ang lasa paris ng iba, ang kaibhan

sinadya pa namin ni misis upang mag-agahan

bagamat di naman iyon pagkaing vegetarian

ay ayos na rin, mura lang para sa budgetarian

kahit na sa bangketa kumain, disente pa rin

walang langaw, talagang mapapasarap ang kain

eto pa, sa pagkain nilabas ang saloobin

deyt ng magsing-irog sa bangketang malinis man din

- gregoriovbituinjr.

05.04.2023

Ang kuting na antukin

ANG KUTING NA ANTUKIN

sa limang kuting, siya ang antukin

pag naglalaro ang mga kapatid

ay sasabayan niya ng paghimbing

buti't gawi niya'y aking nabatid

na maganda para sa kalusugan

lalo't mga bata pa naman sila

aba'y wala pa nga silang sambuwan

subalit pawang naglilimayon na

subalit antukin talaga ito

matutulog na pagsapit ng hapon

e, kasi naman, ora-de-peligro

kaya kauna-unawa na iyon

O, kuting, ako rin ay inaantok

kaya sasabayan kitang matulog

- gregoriovbituinjr.

05.04.2023

Taas-kamao

TAAS-KAMAO

mga kasama, mabuhay kayo

sa pagkilos nitong Mayo Uno

kaisa akong taas-kamao

sa Dakilang Araw ng Obrero

mabuhay kayo, mga kapatid

obrero'y tampok, wala sa gilid

diwa ng paggawa'y inyong hatid

lipunang asam ay inyong batid

mabuhay ang lahat ng sumama

pagpupugay sa mga kasama

magpatuloy sa pakikibaka

hanggang mabago na ang sistema

di sa Mayo Uno natatapos

ang ating sama-samang pagkilos

maghanda tayo sa pagtutuos

nang sistemang bulok na'y makalos

- gregoriovbituinjr.

05.04.2023

* litratong kuha ng makatang gala sa Recto tungong Mendiola, 05.01.2023

Tarang magkape

TARANG MAGKAPE

halina't magpainit, tara nang magkape

at magbalitaan ng magandang mensahe

natuloy ba sa dilag ang iyong diskarte?

magtataas na naman ba ng pamasahe?

patuloy pa rin ba ang kontraktwalisasyon?

manpower agencies ba'y linta pa rin ngayon?

na walang ginawa sa pabrika maghapon

habang kikita ng limpak sa korporasyon

bakit nademolis ang mga maralita?

papeles ba nila'y kulang? anong ginawa?

mahirap na'y pinahihirapan pang lubha

habang tuwang-tuwa ang nangamkam ng lupa

magkape na't pag-usapan ang mga isyu

at kung paanong sa masa uugnay tayo

paano pakilusin ang dukha't obrero

upang itayo ang lipunang makatao

- gregoriovbituinjr.

05.04.2023

Himbing na kuting sa madaling araw

HIMBING NA KUTING SA MADALING ARAW

madaling araw ay sinilip ko ang limang kuting

na para bang ang aking alaga'y mga tsikiting

naroon sila, kumpleto pa rin, himbing na himbing

habang ako rito'y nagninilay, gising na gising

at nakatunganga na naman sa harap ng papel

nagninilay bakit patuloy pa ang fossil fuel

o kaya'y katiwalian ng mga nasa poder

pag natapos na'y agad ititipa sa kompyuter

mabuti nga't may alagang kuting na natatanaw

himbing na himbing pa sila ngayong madaling araw

pag pumutok na ang araw sila'y magsisingiyaw

ano kayang ipakakain kong luto o hilaw?

sila'y talaga kong pinagmasdan bago magsulat

sa diwa'y may paksa na namang makapagmumulat

- gregoriovbituinjr.

05.04.2023

Ang aming hiyaw

ANG AMING HIYAW

Uring Manggagawa! Hukbong Mapagpalaya!

ang aming hiyaw noong Araw ng Paggawa

magkakauri'y isang hukbo, talaga nga

tila magbubuwal sa tusong dambuhala

panawagang naukit na sa diwa't puso

sa ilang dekada nang pagkilos patungo

sa landas na walang pang-aapi't siphayo

na pagsasamantala'y pangarap maglaho

kalaban ng salot na kontraktwalisasyon

manpower agencies ay linta hanggang ngayon

dapat ibagsak ang lahat ng panginoon

dapat walang naghaharing uri o poon

aalisin natin lahat ng kasamaan

at lahat ng panunupil sa ating bayan

ipapalit nati'y makataong lipunan

itatayo'y daigdig na makatarungan

kayong manggagawa ang tunay na dakila!

kayong nagpapakain sa lahat ng bansa!

magpatuloy kayo, hukbong mapagpalaya!

muli, pagpupugay sa uring manggagawa!

- gregoriovbituinjr.

05.04.2023

* litratong kuha sa España, Maynila, Mayo Uno, 2023

* maraming salamat po sa kumuha ng litrato, CTTO (credit to the owner)

* BMP - Bukluran ng Manggagawang Pilipino

Kapayapaan, kasarinlan, katarungan

KAPAYAPAAN, KASARINLAN, KATARUNGAN

kapayapaan, kasarinlan, katarungan

ang nais ng mga batang nasa digmaan

silang lumaki na sa gayong kalagayan

na kanilang mga ama'y nagpapatayan

pakinggan natin ang tinig ng mga bata

di lang laruan ang nais upang matuwa

mahalaga sa kanila'y wala nang digma

kundi mabuhay sa isang mundong payapa

nais nilang kasarinlan ng bansa'y kamtin

upang walang mananakop at sasakupin

may bayanihan upang sila'y makakain

bansang tao, di gera, ang aatupagin

pangarap din nilang makamtan ang hustisya

dahil sa digma, napatay ang mga ama

nawalan ng amang gagabay sa kanila

na kung walang digma, ama'y buhay pa sana

kahilingan ng mga batang nangangarap

na kapayapaan sa kanila'y maganap

upang kamtin ang hustisya't laya'y malasap

gera'y itigil na, kanilang pakiusap

- gregoriovbituinjr.

05.03.2023

Pulang-pula ang Mayo Uno

PULANG-PULA ANG MAYO UNO

anong laki ng mobilisasyon ng manggagawa

noong Mayo Uno, pagmasdan mo't rumaragasa

pulang-pula sila sa kalsada, kapara'y sigwa

parang handang ibagsak ang buwitreng maninila

nasa kanang bahagi pala ako ng litrato

tangan ang pulang tarp at K.P.M.L. ang tshirt ko

patunay na sa laban ng uri'y kaisa ako

at kumikilos para sa dignidad ng obrero

isang lipunang makatao ang pinapangarap

kung saan walang pagsasamantala't pagpapanggap

na ang dignidad ng kapwa'y kinikilalang ganap

isang lipunang walang mayaman, walang mahirap

O, manggagawa, taaskamao pong pagpupugay!

sa Araw ng Paggawa, mabuhay kayo! Mabuhay!

- gregoriovbituinjr.

05.03.2023

* kuha ang litrato sa España, Maynila, 05.01.2023

* maraming salamat po sa kumuha ng litrato, CTTO (credit to the owner)

* KPML - Kongreso ng Pagkakaisa ng Maralitang Lungsod

Pritong tilapya para sa mga kuting

PRITONG TILAPYA PARA SA MGA KUTING

sarap na sarap ang mga gutom na kuting

sa pinritong tilapyang kanilang kinain

nang mabusog na'y agad na silang humimbing

gayong kanina'y nais nilang makaalpas

naghahanap ng maaakyatan palabas

maghahanap ng pagkain o makakatas

animo'y musika ang kanilang pagngiyaw

kaya sila'y dinadalaw ko't dinudungaw

ah, binidyo ko muli sila't tinatanaw

nang pinakain ko'y agad na natahimik

nakatulog na, isa'y tila naghihilik

habang isa'y sa kapatid niya sumiksik

mamayang gabi, buong gabi silang tulog

may sasakyan mang umuugong o may tugtog

basta, dapat sa pagkain sila'y mabusog

- gregoriovbituinjr.

05.03.2023

* ang bidyo ay mapapanood sa: https://fb.watch/khN7Q_nqnH/

Pananghalian

PANANGHALIAN

huwag magpakagutom, ang bilin ni misis

kaya heto, may pritong tilapya, kamatis

at sibuyas, kaysa sa gutom ay magtiis

aba'y kumain na, basta walang matamis

gaano man kapayak ang pananghalian

ay pampatibay sa mahahabang lakaran

ah, paglalakad na aking nakasanayan

dahil pampalakas din iyon ng katawan

huwag lang maglalakad habang mainit pa

dapat lamang lagi kang may dalang tuwalya

dapat may tubig pag inuhaw sa kalsada

ah, payak lang ang pananghalian ng masa

tara, saluhan mo sana akong kumain

kasabay ng mga pagkukwentuhan natin

- gregoriovbituinjr.

05.03.2023

P750 minimum wage, ngayon na

P750 MINIMUM WAGE, NGAYON NA

seven hundred fifty pesos minimum wage, ngayon na!

panawagan ng manggagawa habang nagmamartsa

simpleng kahilingan sa gobyerno't kapitalista

ito kaya sa kanila'y maibigay talaga?

seven hundred fifty pesos kasama ang rehiyon

across-the-board, presyo ng lakas-paggawa, minimum

kaya naman iyan ng malalaking korporasyon

ayaw lang ibigay, sa tubo'y kabawasan iyon

ang pinaglalaban nila'y makatarungan lamang

ngunit mga naghaharing uri'y talagang dupang

sa tubo, gayong sa lakas-paggawa'y nakinabang

ayaw lang ibigay pagkat sa tubo nga'y suwapang

pakinggan sana ang panawagan ng manggagawa

pagkat sila ang umukit ng daigdig at bansa

nagpalago ng ekonomya ng bansa'y sila nga

pagkat kung walang manggagawa, pag-unlad ay wala

- gregoriovbituinjr.

05.03.2023

* litratong kuha ng makatang gala habang nagmamartsa sa España patungong Mendiola, Mayo Uno, 2023

Gawing pabahay ang lupang gobyerno

GAWING PABAHAY ANG LUPANG GOBYERNO

"Gawing pabahay sa mga mahihirap

ang lupang gobyerno!" anang maralita

panawagan sa gobyernong mapaglingap

dahil ito nga'y paglilingkod sa dukha

sila'y nakasama nitong Mayo Uno

sa lansangan habang patungong Mendiola

panawagang tagos sa puso ko't buto

ay dinggin bilang pagsisilbi sa masa

lupa'y serbisyo, di negosyo ng ilan

huwag hayaang agawin o kamkamin

ng mga negosyante't tusong gahaman

lupa'y gawing serbisyo'y ating layunin

katulad din ng pampublikong pabahay

na dapat serbisyong pamamahalaan

ng gobyerno, na di aariing tunay

kundi gamitin mo bilang mamamayan

anong ganda't di pribadong pag-aari

na siyang ugat ng laksang paghihirap

kundi ito'y pampublikong ating mithi

patungo sa lipunang pinapangarap

- gregoriovbituinjr.

05.03.2023

* litratong kuha ng makatang gala sa España tungong Mendiola, Mayo Uno 2023

Tapakang goma

TAPAKANG GOMA

binili ko'y tapakang goma

para sa loob ng kubeta

ito'y isa kong pandepensa

dahil yata tumatanda na

nadulas nang muntik-muntikan 

tatlong beses na yata iyan

mabuti't nakahawak naman

kundi ako'y mapipilayan

tapakang goma ang nawatas

na bibilhin agad sa labas

kaligtasan ang nag-aatas

kaysa bigla kang madupilas

may kilala akong namatay

dalawang lider silang tunay

na sa kubeta nahandusay

nang madulas, ulo'y bagok, ay

isipin ang makabubuti

tulad ng tapakang may silbi

tapakang goma na'y binili

upang sa huli'y di magsisi

- gregoriovbituinjr.

05.03.2023

Himbing sa bagong tahanan

HIMBING SA BAGONG TAHANAN

anong sarap ng pagkahimbing

ng magkakapatid na kuting

sa kanilang bagong tahanan

na inayos ko sa bakuran

baka pagod sa paglalaro

nakatulog na't hapong-hapo

ang mga kuting na alaga

sana'y lumusog at sumigla

pagkakain nila'y nabusog

hayaan nating makatulog

unang gabi sa bagong bahay

doon sila nagpahingalay

pag mga kuting na'y nagising

tiyak gutom na't maglalambing

- gregoriovbituinjr.

05.03.2023

Pagdalo sa Mayo Uno

PAGDALO SA MAYO UNO

taon-taon akong dumadalo

sa pagkilos tuwing Mayo Uno

kasama'y libo-libong obrero

dahil din sa paniwalang ito:

"Hindi bakasyon ang Mayo Uno!"

totoong holiday na tinuring

ng gobyerno, subalit sa amin

ito'y di dapat balewalain

holiday ngunit may pagkilos din

dahil sa historya nitong angkin

sa Dakilang Araw ng Paggawa

lumabas ang mga manggagawa

silang may kamay na mapagpala

na nagpaunlad ng mundo't bansa

bagaman sahod nila'y kaybaba

araw ng obrerong nagpapagal

upang pamilya'y may pang-almusal,

tanghalian, hapunan, minindal

araw itong dapat ikarangal

sa akin, mag-absent dito'y bawal

- gregoriovbituinjr.

05.02.2023

* selfie ng makatang gala sa Recto patungong Mendiola, Mayo Uno, 2023

Pag-inom ng kuting sa C.R.

PAG-INOM NG KUTING SA C.R.

kaya pala ngiyaw ay narinig

nang ako'y naroon sa kubeta

nais nilang uminom ng tubig

kaya pinapasok ko na sila

tanong ko'y bakit nais pumasok

ano bang kanilang naiisip

nang pinapasok ko'y parang hayok

sa tubig na kanilang sinipsip

sa sahig, ah, iyon pala naman

sila'y agad ko ring naunawa

silang pulos kain at suso lang

ay nauuhaw din ang alaga

pag sa kubeta sila'y ngumiyaw

batid ko nang sila'y nauuhaw

- gregoriovbituinjr.

05.02.2023

* ang bidyo ay mapapanood sa: https://fb.watch/kgmawuH-Kz/

Panawagan ng PMCJ sa Mayo Uno

PANAWAGAN NG PMCJ SA MAYO UNO

panawagan ng Philippine Movement for Climate Justice

sa manggagawa sa pagdiriwang ng Mayo Uno

Just Transition ay panguhanan nila't bigyang hugis

ang sistemang makakalikasan at makatao

imbes magpatuloy pa sa fossil fuel, coal, dirty

energy ay magtransisyon o lumipat ang bansa

o magpalit na patungong renewable energy

para sa kinabukasan, O, uring manggagawa!

kayo ang lumikha ng kaunlaran sa daigdig

di lang ng kapitalistang nasa isip ay tubo

saklolohan ang mundong anong lakas na ng pintig

upang mundo sa matinding init ay di maluto

payak na panawagan ngunit napakahalaga

sa kinabukasan ng mundo at ng bawat isa

- gregoriovbituinjr.

05.02.2023

* litratong kuha ng makatang gala sa Mendiola, Mayo Uno 2023

Mabuhay ang pagkakaisa ng uri

MABUHAY ANG PAGKAKAISA NG URI

mabuhay ang pagsasama-sama ngayon

ng apat na malalaking pederasyon

sa ilalim ng All Philippine Trade Unions

makasaysayang Araw ng Mayo Uno

ng uring manggagawa, taas-kamao

kaming bumabati sa lahat sa inyo

ito nga'y panibagong pagkakaisa

magkauri bagamat magkakaiba

nagkaunawa bilang uri talaga

sana, pagkakaisa'y magtuloy-tuloy

bilang uri, wala nang paligoy-ligoy

parang uhay ng palay na sumusuloy

mabuhay kayo, O, Uring Manggagawa!

pagpupugay sa Hukbong Mapagpalaya!

- gregoriovbituinjr.

05.02.2023

* litratong kuha ng makatang gala sa Mendiola, Mayo Uno, 2023

Presyo, Ibaba! Sahod, Itaas!

PRESYO, IBABA! SAHOD, ITAAS!

"Presyo, Ibaba! Sahod, Itaas!"

na karaniwan nang kahilingan

sistemang ito'y gawing parehas

di pa masabing "Tubo, Bawasan!"

kapag nagtaasan na ang presyo

ng mga pangunahing bilihin

di naman makasabay ang sweldo

nitong abang manggagawa natin

gayong talagang magkatunggali

ay sahod at tubo sa pabrika

gayunman, laban ay di madali

na dapat baguhin ay sistema

tuwing Mayo Uno'y bukambibig

sa manggagawa'y dapat ibigay

ngunit ito'y tila di marinig

ng namumunong pasuray-suray

na sa kapangyarihan ba'y lasing?

ang mga mata'y mapupungay na?

laging tulog? mata'y nakapiring?

kung ganito'y nahan ang hustisya?

- gregoriovbituinjr.

05.02.2023

* litratong kuha ng makatang gala sa Mendiola, Mayo Uno 2023

Reserbang delata

RESERBANG DELATA

heto't binili'y sampung delata

na pang-isang linggo nang reserba

sardinas na talagang malasa

mga isdang kinulong sa lata

minsan sa mundo'y ganyan ang buhay

lalo't tulad kong di mapalagay

sa mundong saksi sa dusa't lumbay

bagamat may saya ring nabigay

madalas kung iyong iisipin

ito'y talagang pang-survival din

sa mga nasalanta'y pagkain

sa dukha'y delatang mumurahin

ah, mabuting may reserbang ganyan

na panlaban mo sa kagutuman

pagkat nakikipagsapalaran

pa rin sa di patas na lipunan

- gregoriovbituinjr.

05.02.2023