Hazard pay ng mga frontliner, ibigay

HAZARD PAY NG MGA FRONTLINER, IBIGAY

hazard pay o sahod sa mapanganib na gawain

na tulad ng mga medical frontliners sa atin

dahil sa pananalasa ngayon ng COVID-19

marapat lang na hazard pay nila'y ibigay na rin

subalit may ulat na iyon ay naaantala

iyon ang sinabi ng mga nars at manggagawa

may trabaho sa gitna ng pandemya'y walang-wala

at pag nagutom pa ang pamilya'y kaawa-awa

ang hazard pay ba nila'y kailan pa ibibigay?

kung sa sakit ba manggagawa'y mawala nang tunay?

kung kanilang pamilya'y sinakbibi na ng lumbay?

sinong dapat makinig? sinong dapat umalalay?

ibigay ang hazard pay ng mga frontliner natin

ito'y munting kahilingan nilang dapat lang dinggin

- gregoriovbituinjr.

Ulam na talbos ng sayote

ULAM NA TALBOS NG SAYOTE

padala naman ni misis ang talbos ng sayote

iba sa nakasanayang talbos ng kamote

inilaga ko't isasawsaw sa toyong may sili

aba'y napakasarap, baka ako'y makarami

tara, kain tayo, talbos ng sayote ang ulam

pag natikman mo, alalahanin mo'y mapaparam

oo, sapagkat ganito ang aking pakiramdam

lalo't magana kang kumain dahil malinamnam

nakapagtanim na rin ako minsan ng ganito

sayoteng magugulang ang sa lupa'y ililibing mo

at susuloy na ito ng ilang buwan o linggo

kasama si misis ay itinanim namin ito

ngayon, may pang-ulam nang talaga namang kaysarap

upang may makain kahit ang buhay ay mahirap

tatalbusin lamang ang dulo ng mga pangarap

lalo na't may pandemyang kagutuman ang kaharap

- gregoriovbituinjr.

Pulutgata sa Mindanao

PULUTGATA SA MINDANAO

minsan na kaming nagpunta ng Mindanao ni misis

nang dumalo sa Third Philippine Environment Summit

kasalamuha'y grupo't kapwa environmentalists

umalalay sa mga nag-organisa ng summit

nakapag-ikot din sa marami roong tanawin

bukod sa Cagayan de Oro ay sa Bukidnon din

mahalagang pagmumulat ang aming mga gawain

upang ating kalikasan ay alagaan natin

magandang gawain, memorableng karanasan

na kalagayan ng kalikasan ay pag-usapan

na maraming problemang dapat bigyang kalutasan

napagtantong mapangwasak ay sa tubo gahaman

ugali lang ng tao ang tukoy nilang problema

na sila ring di masabing problema'y ang sistema

subalit mabuti na ring sila'y nag-aalala

habang pulutgata nami'y di naman naabala

- gregoriovbituinjr.

Katha lang ng katha

di na rin makasali sa anumang paligsahan

wala ring mapagsulatang anumang pahayagan

grupo-grupo kasi, anang makatang kaibigan

kung sinong kakilala ang mayroong karangalan

subalit ako'y di naman talaga sumasali

nadala na ako kay Rio Alma sa sinabi

pulos social realism daw ang aking putahe

at sumasalamin sa mga katha ko't diskarte

tanggap ko naman ang kanyang mga sinabing sadya

ngayon nga'y isa lang akong makatang maglulupa

naglilingkod sa pambansang samahang maralita

kasama rin sa pakikibaka ng manggagawa

di man sumasali sa paligsahan ng pagsulat

bagamat dating nagpasa sa Palanca't inalat

mabuting magsulat ng tula kung may mamumulat

at kung may magbabasa ng aking mga sinulat

kumakatha di upang manalo sa paligsahan

kundi ang magsilbi sa pagbabago ng lipunan

katha lang ng katha, iyon ang aking panuntunan

at bakasakaling may ambag sa kinabukasan

- gregoriovbituinjr.

Pagtambay sa kapehan

PAGTAMBAY SA KAPEHAN

ako'y nagkape muna't si misis ay hinihintay

upang sunduin sa trabaho habang nagninilay

ng samutsaring paksa't pagsusulat ng sanaysay

mainit-init pa ang kape'y hihiguping tunay

minsan, sumasagot ng palaisipang Tagalog

o kaya'y magbabasa ng mga librong di bantog

maya-maya'y tatawag na ang mutyang sinta't irog

upang ako'y puntahan niya't siya'y papanaog

at kami'y magkakapeng sabay doon sa kapehan

ngunit naka-social distancing pa rin sa upuan

bawal kasing magtabi at baka magkahawaan

kahit na laging magkatabi sa silid-tulugan

kaysayang magkape lalo't kaytamis at kaysarap

habang kasama ang diwata sa bawat pangarap

di mo mararamdaman ang nararanasang hirap

dahil sa pandemyang di mabatid ang hinaharap

maraming salamat, nakakatambay sa kapehan

kaysa naman patulog-tulog doon sa pansitan

sa kapeng mainit, gising na gising ang kalamnan

at maraming paksang pagulong-gulong sa isipan

- gregoriovbituinjr.

Masarap na Hawaiian dish

MASARAP NA HAWAIIAN DISH

sa T.V. nga, Hawaiian dish ay makatawag-pansin

nakakatuwang pakinggan ang kanilang lutuin

masarap kaya ito kung sakaling papapakin

aba'y talaga naman, mukhang kaysarap kainin

pinaksa sa telebisyon ang kultura sa Hawaii

pati iba't ibang lugar doon ang natalakay

pinanood, pinakinggan, ngayon ay nagninilay

nakatingin sa kisameng nangangarap ng husay

ngunit di ko pa napuntahan ang lugar na iyon

na kayrami raw naggagandahang tanawin doon

kung may pera lang ay masarap doong magbakasyon

doon magsusulat ng mga panibagong hamon

berde rin ang utak nitong naglagay ng pamagat

na sa taga-Hawaii ay karaniwan lang na sulat

subalit sa Pinoy, kahulugan nito'y dalumat

na ngingiti ka na lang upang ikaw ay kumagat

Oh, kaysarap ng Hawaiian dish, nais kong matikman

na baka rito'y katumbas ng kalamay o suman

ngunit sa tanda ko nang ito, ako'y mahihirapan

Hawaiian dish na ito'y hahanapin dito na lang

- gregoriovbituinjr.

* litratong kuha mula sa Unang Hirit ng GMA7, 05.03.2021

Dapat daw nating i-monitor ang sarili

DAPAT DAW NATING I-MONITOR ANG SARILI

wala raw social distancing ang nakita sa T.V.

yaon daw mga nagsidalo sa Labor Day rally

kaya Kagawaran ng Kalusugan ay nagsabi

nagpaalalang i-monitor natin ang sarili

walang masama, tama lamang ang magpaalala

upang malayo tayo sa nakaambang sakit pa

na sa buong mundo'y patuloy na nananalasa

salamat, tungkulin n'yong magpaalalang talaga

subalit araw-araw nang tayo'y nasa panganib

nariyan ang gutom, kahirapan, saanmang liblib

ngayon, nahaharap sa sakit na naninibasib

na pag-aalaga sa sarili'y talagang tigib

sino bang gustong lumabas upang magkasakit lang

dahil Mayo Uno ito'y lumabas ng lansangan

sa Araw ng Paggawa sa buong sandaigdigan

upang ipahayag ang prinsipyo't paninindigan

gayunman, salamat po sa paalala, salamat

i-monitor ang sarili'y tama at nararapat

kung may lagnat, magpatingin na't baka pa mabinat

ayaw nating maghawahan, lalo't buhay pa'y salat

- gregoriovbituinjr.

Paalala sa nagkilos-protesta

PAALALA SA NAGKILOS-PROTESTA

nanood ako ng balita nang ito'y makita

tungkol sa Labor Day ngunit balita'y di maganda

ayon sa ulat, mga kasama, nagpaalala

itong Department of Health sa mga kilos-protesta

nagbabala silang super spreader daw ng virus

ang malalaking event tulad ng ating pagkilos

bagamat dinisiplina naman natin ng maayos

ang ating hanay, social distancing, ginawang lubos

ngunit alam nating di naman nakasunod lahat

dahil may mga pulis na hinarang tayong sukat

pinaalis, pinagtabuyan, naging kalat-kalat

at isa iyong katotohanang nagdudumilat

kaya nating mag-social distancing, iyon ang plano

at maipakitang hanay natin ay disiplinado

Araw ng Paggawa iyon, daming tiyak dadalo

kaya nanawagan ding layu-layong isang metro

di tayo nagkulang kung di lang pulis ay nangharang

sa atin upang Araw ng Paggawa'y ipagdiwang 

gayunman, salamat sa paalala't mayroong hakbang

kaming nasa rali upang sakit ay maiwasan

- gregoriovbituinjr.

05.03.2021

Halimaw

sinusumbatan ng budhi ang sangkaterbang aswang

di na nila kaya ang palagiang pamamaslang

gayong sa kanila'y inatas ng ama ng tokhang

wastong proseso't karapatan ay di na ginalang

bakit naglalaway sa dugo ang mga berdugo

at bakit sila tuwang-tuwang pumaslang ng tao

sadyang binabalewala na ang due process of law

pati karapatang pantao'y tinatarantado

at nangagsiluha ang mga nagdurusang ina

habang ulit-ulit isinisigaw ang hustisya!

ang mga berdugo'y katatakutan mo talaga

pagkat walang muwang ang katarungan sa kanila

basta inatas ng ama ng tokhang ay gagawin

pag sinabing papatayin, kanilang papatayin

ginawa na silang halimaw ng utak-salarin

nilikha na silang halimaw ng pangulong praning

walang galang sa karapatan at due process of law

kahit pinag-aralan ang karapatang pantao

nilikhang halimaw na katatakutang totoo

kahit illegal order ay susundin ang pangulo

nawa biktima'y kamtin ang asam na katarungan

mapanagot ang utak at mga may kagagawan

at di na dapat manatili pa sa katungkulan

ang pinunong nag-atas ng maraming kamatayan

- gregoriovbituinjr.

Katatakutan

nagmumulto ang mga nilalang

ang nadama ng mga magulang

di nila alam saan nagkulang

lalo't inosente ang pinaslang

madalas akong magbasang sadya

ng mga katatakutang akda

kaya minsan ay laging tulala

pati guniguni'y lumuluha

sa karimlan sumabog ang lagim

nanokhang ang alagad ng dilim

mga gawang karima-rimarim

amoy asupre ang nasisimsim

masdam mo ang malamig na bungkay

na sa dugo'y lumutang na tunay

pagkatao nila ang niluray

ng mga aswang na pumapatay

sagad sa buto ang inhustisya

at di matahimik ang pamilya

habang pangulo'y tatawa-tawa

pag may katawang itinutumba

naglalaway sa sugo ang aswang

pagkat maya't maya'y pumapaslang

lalo't atas ng ama ng tokhang 

kaya sinunod ng mga bu-ang

inhustisya'y nakapanginginig

ramdam iyon sa gabing malamig

sa salarin ay sinong lulupig

kung walang sinumang mang-uusig

- gregoriovbituinjr.

Kung walang manggagawa

kung walang manggagawa, walang natayong gusali

at wala ring trono at palasyo para sa hari

walang ring kaunlaran silang ipagkakapuri

at wala ring luklukan ang mga payaso't pari

kung walang manggagawa, wala tayong mga bahay

wala ring mahahabang lansangan at mga tulay

dahil sa kanila kaya may kaunlarang tunay

lalo't buong daigdig ang kanilang binubuhay

subalit kayliit ng natatanggap nilang sweldo

sapat lang upang makabalik sila sa trabaho

at karampot din kung may madadagdag sa umento

ang kontraktwalisasyon pa'y pasakit sa obrero

karapatan nila'y nakasaad sa Konstitusyon

karapatang makipagtawaran at magkaunyon

sa usapan, dalawang panig ay dapat sang-ayon

kung hindi man, karapatang magwelga'y isang opsyon

subalit welga'y huling opsyon lang ng manggagawa

upang kalagayan sa pabrika ay maitama

silang nagpapaunlad ng ekonomya ng bansa

at nagpapabundat sa kapitalistang kuhila

karapatan ng manggagawa'y dapat ipaglaban

upang pagsasamantala'y mawala nang tuluyan

sila'y dapat magkapitbisig, tahakin ang daan

upang itayo ang isang makataong lipunan

salamat, manggagawa, taos-pusong pagpupugay

sapagkat buong lipunan ang inyong binubuhay

walang kaunlarang di dumaan sa inyong kamay

nagningning ang mga lungsod sa inyong pagsisikhay

- gregoriovbituinjr.

Alisin at panagutin ang palpak

ALISIN AT PANAGUTIN ANG PALPAK

kapalpakan ng pinuno'y tagos sa sambayanan

pinunong inutil at palpak ang dama ng bayan

alisin at panagutin sa mga kasalanan

sa bayan sapagkat patulog-tulog sa pansitan

sa likod ng taumbayan ay parang may balaraw

tila tinarak ng palpak na pinunong halimaw

alisin, panagutin ang inutil, yaong hiyaw

ng masa, at kami'y sang-ayon sa kanilang sigaw

dapat lang namang patalsikin ang ama ng tokhang

na dahil sa kanyang atas, kayrami nang pinaslang

na inosente ang awtoridad na pusong halang

na nilikhang maging halimaw ng pangulong bu-ang

mabuhay kayong nananawagang patalsikin na

ang rehimen at dapat nang baguhin ang sistema

na ibig sabihin, mapagmahal kayo sa kapwa

at kinabukasan ng bayan ay inaalala

sa mga nakikibaka, salamat at mabuhay

sapagkat may pusong puno ng kabutihang taglay

lipunang makatao'y nais maitayong tunay

kaya kami rito'y taas-kamaong nagpupugay!

- gregoriovbituinjr.

* litratong kuha ng makatang gala sa pagdiriwang ng Mayo Uno 2021

Isa pang tula sa Mayo Uno 2021

ISA PANG TULA SA MAYO UNO 2021

mabuhay ang uring manggagawa

tunay na hukbong mapagpalaya

binubuhay ang maraming bansa

manggagawang kasangga ng madla

nagsama-sama ng Mayo Uno

upang kalampagin ang gobyerno

nagkakapitbisig ang obrero

sa maraming sektor na narito

habang ako'y nakilahok pa rin

taun-taon dahil sa layunin

na buong uri'y pagkaisahin

at bulok na sistema'y baguhin

kapag Mayo Uno'y sumapit na

'renewal of vow" ang nadarama

katapatan sa prinsipyo't masa

sa puso'y tumatagos pagdaka

manggagawa sa buong daigdig

ay talagang nagkakapitbisig

upang kapitalista'y mausig

upang tusong burgesya'y malupig

patalsikin ang lider na bugok

ang masa'y di na siya malunok

sinong dapat ilagay sa tuktok

lider-manggagawa ang iluklok

ito ang hiling namin at sigaw

na sa bansa'y umaalingawngaw

asam naming dumating ang araw

na bagong sistema ang lilitaw

na pagsisikapan ng obrero

na palitan ang kapitalismo

at isang lipunang makatao

ang maitayo sa buong mundo

- gregoriovbituinjr.

Kagutuman sa gitna ng pandemya

KAGUTUMAN SA GITNA NG PANDEMYA

gutom ang nararanasan sa gitna ng pandemya

na ayon sa survey ay anim sa sampung pamilya

anong tindi ng datos, may maaasahan pa ba

sa gobyernong di na makapagbigay ng ayuda?

kayrami ng nawalan ng trabaho sa pabrika

marami na ring mga nagsasarahang kumpanya

mga dyipney drayber ay di na makapamasada

dahil minibus na'y ipinapalit sa kanila

mabuti nga't nagsulputan ang community pantry

anang pangulo'y inorganisa ng ignorante

pulos ngawa't kung anu-ano pa ang sinasabi

katibayan ng kapalpakan ng gobyernong imbi

dahil sa community pantry, nagbabayanihan

ang taumbayan maibsan lamang ang kagutuman

bagamat ito'y pansamantalang katugunan lang

habang wala pang magawa ang rehimeng hukluban

sa mga community pantry, maraming salamat

dahil sa inyo, maraming tao ang namumulat

bayanihan dahil sa problemang nagdudumilat

na tindi ng kagutuman ang isinisiwalat

sa nagtayo ng community pantry, pagpupugay

pagkat sa kapwa kababayan, kayo'y dumadamay

taospusong pasasalamat ang sa inyo'y alay

talagang sa bayan nagsilbi, mabuhay! mabuhay!

- gregoriovbituinjr.

Tula sa Araw ng Paggawa 2021

TULA SA ARAW NG PAGGAWA 2021

ako'y kaisa't kasama sa panawagang ito

di lang patalsikin ang rehimen kundi ang loko

di lang basta loko, kundi bu-ang at siraulo

na pulos pamamaslang ang naidulot sa tao

wala ring paggalang sa kapwa, tingin ay ignorante

ang mga organisador ng community pantry

dapat lamang patalsikin ang rehimeng Dutete

tingin ng masa'y di na niya kaya, walang silbi

subalit tingin ko ang masa'y nagpapasensya lang

sa pangulong ama ng tokhang, pagpatay, pagpaslang

lalo't kung anu-anong sinasabi, parang bu-ang

pati nga community pantry'y di na iginalang

kayraming pinangako, umasa ang masa noon

lalabanan daw ang Tsina, bago pa mag-eleksyon

sa unang taon, tanggal daw ang kontraktwalisasyon

ngunit kapitalista pala'y kanyang panginoon

ilang libo ang pinaslang, unang taon ginawa

anang ulat, napatay pa'y higit sandaang bata

kinaibigan ang Tsina kaya walang magawa

kahit inaagaw na ang teritoryo ng bansa

kaya panawagan ng manggagawa'y tama lamang

na sinigaw sa Araw ng Paggawang Daigdigan

patalsikin ang pangulong walang paninindigan

itayo ang gobyerno ng obrero't sambayanan

- gregoriovbituinjr.

Ka Kokoy, lider-maralita

KA KOKOY, LIDER-MARALITA

mabuhay ka, pangulong Kokoy, tagapagsalita

sa maraming okasyon sa isyu ng mga dukha

masipag at magaling na lider ng maralita

tunay na kasama, kaagapay, kaisang diwa

naging pangulo rin siya ng kanilang palengke

nakilalang sa bayan ay tunay na nagsisilbi

mga isyu't kahilingan ng dukha'y sinasabi

bakasakaling dinggin ng gobyernong tila bingi

siya ang bise nang ang dating pangulo'y mamatay

at nakita namin kung paano siya nagsikhay

upang sumigla ang organisasyong nananamlay

na sadyang gumana sa pamununo niya't gabay

isang pagpupugay sa aming pambansang pangulo

Ka Kokoy, kami'y nagpapasalamat ngang totoo

huwag bibitiw, pagkat maraming laban pa tayo

atin pang itatayo ang lipunan ng obrero

- gregoriovbituinjr.

* Si Ka Kokoy ang pambansang pangulo ng KPML, kuha ng makatang gala sa Araw ng Paggawa, 05.01.2021

Ka Vicky, lider-maralita

KA VICKY, LIDER-MARALITA

maraming salamat po, Ka Vicky, kasamang tunay

ikalawang sekretaryo heneral, aming gabay

dahil tunay kang masipag at laging nagsisikhay

upang sa bawat pagkilos, matiyak ang tagumpay

tulad na lang ng mataas na presyo ng kuryente

na sa kamahalan, ang masa'y nanggagalaiti

pati isyu ng klima na di dapat isantabi

ay talagang aktibo't sa bayan nga'y nagsisilbi

mabuhay ka at ang iyong mga tindig sa isyu

ng manggagawa't maralita dahil sa prinsipyo

isa kang lider-maralitang talagang totoo

na ipinaglalaban ang karapatang pantao

pinanday ng panahon, di umuurong sa laban

at ipinagtatanggol ang hustisyang panlipunan

Ka Vicky, daang pinili mo'y masalimuot man

maraming salamat, kasangga ka sa bawat laban

- gregoriovbituinjr.

* Si Ka Vicky ang deputy secgen ng KPML, kuha ng makatang gala sa Araw ng Paggawa, 05.01.2021

Kumain muna bago dumalo sa rali

KUMAIN MUNA BAGO DUMALO SA RALI

dapat kumain muna bago magtungo sa rali

baka gutumin doon, tiyak di mapapakali

isipin mo rin ang laman ng tiyan at sarili

kapag sa mahaba-habang pagkilos ay kasali

lalo't may pandemya, isipin mo ang kalusugan

di lang ng kapwa, kundi ng iyong pangangatawan

huwag basta aalis kung tiyan ay walang laman

mahirap magutom, baka bumagsak kang tuluyan

kumain muna bago dumalo sa Mayo Uno

kain tayo, pasensya na't tuyo lang ang ulam ko

pantawid gutom, kaysa wala, mabuti na ito

nang kahit paano'y may lakas sakaling tumakbo

tara, kain tayo, sarili'y huwag kalimutan

alagaan lagi ang katawan at kalusugan

Daigdigang Araw ng Paggawa ang dadaluhan

kaya dapat matibay ka sa init ng lansangan

- gregoriovbituinjr.05.01.2021

Ang uno per uno pala'y di one inch pag sa kahoy

ANG UNO PER UNO PALA'Y DI ONE INCH PAG SA KAHOY

binili'y uno per unong kahoy para sa banner

subalit natanto naming kami'y nadayang pilit

one inch pala'y di uno pag ginamitan ng ruler

sinukat namin, lima sa walong guhit o five eighth

oo, ang one inch ay di uno kundi five eighth lamang

sinukat pati dating kahoy, ganito rin naman

ang akala naming one inch, sa sukat pala'y kulang

dapat talagang usisain bakit ito'y ganyan

ah, kayhirap kasing ang nadarama mo'y nadaya

kulang sa sukat ang kahoy na biniling talaga

mahirap ngang sa sarili'y nariyang nagdududa

at sa bagay na di alam ay baka magprotesta

hinay-hinay lang, puso mo, iya'y masasagot din

kung magtatanong lang muna't ito ang unang gawin

- gregoriovbituinjr.

Manggagawa't maralita sa Mayo Uno

MANGGAGAWA'T MARALITA SA MAYO UNO

handa rin ang maralitang samahan ang obrero

sa Daigdigang Araw ng Paggawa, Mayo Uno

sapagkat sila'y magkauri sa lipunang ito

silang pawang mga walang pag-aaring pribado

mabuhay ang uring manggagawa at maralita

magkasamang naninindigan upang makalaya

mula sa pang-aapi't pagsasamantalang sadya

ng uring burgesya, ng kapitalista't kuhila

ang mga bituka nila'y tunay na magkarugtong

kaya magkasangga sa labanan, di umuurong

prinsipyo'y tinatanganan kahit saan humantong

binabaka, ani Balagtas, ang kutya't linggatong

tara, sa Mayo Uno'y halinang magkapitbisig

at ating iparinig ang nagkakaisang tinig

ng manggagawa, na kapitalismo'y inuusig

alam nating marami riyan ang handang makinig

- gregoriovbituinjr.04.30.2021

Hirit sa huling araw ng Buwan ng Panitikan

sa Buwan ng Panitikan, tayo nga'y naging saksi

sa dalawang linggong lockdown na sa atin nangyari

sumulpot din ang Maginhawa community pantry

hanggang ginaya ng iba kaya ito dumami

ang buwan ng Abril ay talagang masalimuot

lalo't community pantry'y kayganda ng dinulot

kahit tinawag na ignorante ng punong buktot

ang nagpasimula nito'y huwag tayong matakot

kaya bilang pagtatanggol, kayrami kong kinatha

at binigkis ang mga salita sa kwento't tula

habang nagsasaliksik ng mga isyu't balita

upang sumalamin sa mga kinakathang akda

ang hirit ko'y suportahan ang community pantry

kahit saan man tayo naroroong community

sapagkat pagbabayanihan ay di ignorante

na tulad ng patutsada ng pangulong salbahe

kaisa ako upang panitika'y paunlarin

habang sinusulong ang pagbabayanihan natin

dapat mga mangingisda'y suportahan din natin

pati na magsasakang lumilikha ng pagkain

kaya sa huling araw ng Buwan ng Panitikan

at bisperas ng Mayo Uno sa sandaigdigan

hirit ko'y ituloy natin ang pagbabayanihan,

pagbibigayan, pagdadamayan, pagtutulungan

- gregoriovbituinjr.04.30.2021

* Ang Abril ay Buwan ng Panitikang Filipino, sa bisa ng Proklamasyon Blg. 968, s. 2015

Pagpupugay sa bayaning midwife

PAGPUPUGAY SA BAYANING MIDWIFE

Lea Barro Blacer, ngalan ng midwife na bayani

sinaklolohan ang inang nanganak sa kalsada

kapuri-puri ang ginawa, maraming sumaksi

tinulungan din ang sanggol na di na humihinga

pinalo raw sa puwit, at maya-maya'y umuha

hanggang ang mag-ina'y itinakbo na sa ospital

buti't nasaklolohan agad, ayon sa balita

kundi baka lumala ang nangyari kung magtagal

maraming salamat, Lea Barro Blacer, sa iyo

na dapat lamang gawin sa ganoong pangyayari

salamat, tinupad mo ang tungKulin at misyon mo

tunay na widwife na sa kapwa't bayan ay nagsilbi

ang bayaning midwife ay nakapagligtas ng buhay

maraming salamat, sa kanya kami'y nagpupugay!

- gregoriovbituinjr.

Mabuhay ka, kasama

MABUHAY KA, KASAMA

mabuhay ka, kasama, kami'y saludo sa iyo

dahil sa kusa mong pagtulong sa uring obrero

lalo na sa paghahanda para sa Mayo Uno

nariyan kang kasamang nakikibakang totoo

nagtanong ka kung bakit may mahirap at mayaman

bakit may inaapi't pinagsasamantalahan

hanggang kasama sa iyo'y nagpaliwanag naman

hanggang laban ng obrero'y atin nang sinamahan

maraming salamat, kasama, maraming salamat

at katuwang ka namin sa gawaing pagmumulat

kasamang tunay, kaagapay, sa yaman ma'y salat

upang asam na pagbabago'y masagawang sukat

taas-kamaong nagpupugay sa iyo, kasama

sana tulad mong nakakaunawa'y dumami pa

sama-samang sumulong at baguhin ang sistema

upang makataong lipunan ay kamtin talaga

- gregoriovbituinjr.

Soneto para sa Mayo Uno 2021

SONETO PARA SA MAYO UNO 2021

kaisa ang obrero di lang tuwing Mayo Uno

kundi sa araw-araw na pakikibaka nito

upang itayo ang isang lipunang makatao

habang tangan ang kanilang layunin at prinsipyo

ako'y maralita mang sakbibi ng karukhaan

ay laging nagsisikap para sa prinsipyong tangan

kasama ng uring manggagawang naninindigan

tungo sa inaasam na makataong lipunan

mabuhay ang manggagawa, hukbong mapagpalaya

lantay ang paninindigan, dumaan man ang sigwa

naririto kaming nakikibaka't laging handa

upang pagkaisahin ang bayan at manggagawa

at sa Mayo Uno, susumpa muling maging tapat

sa prinsipyo't patuloy na gawaing pagmumulat

- gregoriovbituinjr.04.30.21

Hindi ignorante ang nasa community pantry

HINDI IGNORANTE ANG NASA COMMUNITY PANTRY

puso'y naghihimagsik sa sinabi ni Duterte

na nasa community pantry'y pawang ignorante

ngunit kabu-angan niya'y atin bang masisisi

pangulong di na alam kung anong makabubuti

di na malaman kung saan kukuha ng ayuda

nadamang community pantry'y sumapaw sa kanya

di na maaming palpak ang pamamahala niya

ah, pinagpapasensyahan na lang siya ng masa

datapwat pinagtanggol ng masa ang bayanihan

community pantry'y pagdadamayan at tulungan

nagsisulputan dahil palpak ang pamahalaan

kaya kusang nagsikilos ang mga mamamayan

sa ayuda'y ubos na raw ang pondo ng gobyerno

pero sa N.T.F.-ElCac, bilyon-bilyon ang pondo

nariyang mahigit labingsiyam na bilyong piso

na dapat pondong ito'y gawing ayuda sa tao

nakakalungkot, ani Patreng, sa isang panayam

na mismong pangulo ng bansa pa ang nang-uuyam

sa bayaniha't pagdadamayan ng mamamayan

ngunit binabalewala lang ng pangulong bu-ang

pinagpapasensyahan na lang natin si Duterte

sa kanyang pagbabatikos sa community pantry

binabalewala siya't magtatapos na kasi

ang rehimeng itong turing sa masa'y ignorante

dahil kung tayo'y mapipikon, bubugso ang galit

patatalsikin si Duterteng nawalan ng bait

at makataong lipunan na'y ating igigiit

at matitinong pinuno ang ating ipapalit

- gregoriovbituinjr.

Benepisyaryong planted?

BENEPISYARYONG PLANTED?

di naman magsasaka

ngunit sanay sa planted

ganito ba talaga?

ano bang ating batid?

anong tingin sa masa?

na utak ay makitid?

para bang ebidensya?

na di alam kung planted?

may pantry ang pulisya

benepisyaryo'y planted

community pantry ba?

ay isa nang balakid?

kung magtalaga sila

ng tinuring na planted

masa sa pantry nila

ba'y sa mali nabulid?

dapat litratuhan pa

pag natanggap ang hatid

na ayuda ang masa

patakarang di lingid

ito'y tanong lang muna

nais naming mabatid

bakit kailangan pa

tutulungan ay planted?

- gregoriovbituinjr.

Bagalan lang ang takbo

BAGALAN LANG ANG TAKBO

bagalan lang ang takbo, bagalan

nakapinta mismo sa lansangan

na paalala sa may sasakyan

upang aksidente'y maiwasan

SLOW DOWN: malaking nakapinta

lalo sa matao't may kurbada

na dapat lang sunding paalala

nitong tsuper na namamasada

di pa siksikan sa dyip o sa bus

nag-iingat sa coronavirus

mag-social distancing tayong lubos

nangyayari na'y kalunos-lunos

kayhirap kung sasakya'y mabangga

naaksidente'y kaawa-awa

o kaya'y may mabundol na bata

sa bilis ng takbo'y may nagluksa

magmaneho lamang ng mabagal

lalo na sa paliko't may kanal

baka pasahero na'y mangatal

kung patakbo'y parang patiwakal

- gregoriovbituinjr.

* litratong kuha ng makatang gala habang nakasakay sa isang bus

Sa mga kalakbay

dapat nang tumula ng tumula

pagkat baka mamatay na bigla

tandang handa at may ginagawa

upang mulatin ang dukhang madla

di lang panahon ang nauubos

panahon pa ng coronavirus

panahon din ng pambubusabos

at kayrami ring naghihikahos

buti kung bumubuti ang lagay

ng bawat isang mga kalakbay

at kung sumakbibi na ang lumbay

kaya pa ba ng diwang magnilay

tula ng tula kahit ganito

sana'y nasa maayos pa kayo

ngunit magpatuloy pa rin tayo

baka masolusyonan pa ito

"mag-ingat!" ang tanging masasabi

sa katoto, kalaban, kakampi

mag-ingat sa sakit na salbahe

habang katha'y nasa guniguni

- gregoriovbituinjr.

Pagsisilbi

isa man akong kadalasang binabalewala

ayos lang, habang patuloy sa misyon at adhika

kahit di man pansinin ang tulad kong maglulupa

patuloy akong kikilos, buhay ko'y nakahanda

tinuring akong alikabok ng nasa burgesya

tinuring akong puwing sa kanilang mga mata

tinuring akong putik sa madulas na kalsada

tinuring akong tuldok na itim sa puting tela

hayaan akong sa kapwa'y magkaroon ng silbi 

lalo't pinili ko'y buhay na di makasarili

hayaan akong ihalo kapara ng adobe

sa ginagawang gusali ng bunying anluwagi

sapagkat namumutiktik ang balon ng pag-asa

upang lumaya ang masa sa bulok na sistema

nakikibaka pa rin sa gitna ng pag-iisa

habang nagdaralita ang nakararaming masa

- gregoriovbituinjr.

Hayak

HAYAK

marahil nga'y lagi akong nakalutang sa ere

nakatingalang nagninilay ng mga nangyari

tila walang ginagawa subalit super busy

sukdulan man ang hirap, patuloy sa pagmumuni

tila isang lawing lumilipad sa panginorin

tutok ang mata sa lupa't tila may dadagitin

kumakalam ang sikmura't ang hanap ay pagkain

maingat sa paglipad, alam kung anong gagawin

subalit bakit mga pangarap ay naglalaho

kung walang adhikang sa puso't diwa'y nahahango

dapat matiyak na may maipakain kay Bunso

nang hindi na kailangang magbubo pa ng dugo

iyang makatang hayak, nakalutang ang isipan

nasa'y masarap na pulutan ang nais matikman

nais bumarik upang bumalik sa katinuan

at makaulayaw muli ang dukhang mamamayan

- gregoriovbituinjr.

* hayak (pang-uri) - nakalutang ang isipan, mula sa UP Diksiyonaryong Filipino, p. 439