Kung ako'y magsusulat ng nobela

paano ba susulatin ang asam na nobela

na sa buhay na ito'y magiging obra maestra

nobelang marahil ay pag-uusapan ng masa

na baka maging klasiko rin sa literatura

maganda nang paghahanda ang magasing Liwayway

na kayraming nobelang inilathala ngang tunay

ngunit sa maikling kwento muna'y magpakahusay

maikli muna bago mahaba ang isalaysay

dapat paghandaan ding mabuti't pakasuriin

ang umpisa, gitna't pagtatapos ng inakda ring

mga maikling kwentong nabasa't nais sulatin

pag sanay ka na'y saka mo na ito pahabain

sa dagli pa lang nahihirapan na sa pagkatha

gayong mas maiksi pa sa maikling kwentong akda

si Harper Lee nga'y isang nobela lang ang nalikha

"To kill a mockingbird" na kinagiliwan ng madla

isang nobela man lang ay magawa ng tulad ko

si Amado V. Hernandez ngang makatang totoo

ay may tula't dalawang nobelang isinalibro

sa nobela kong gagawin, sila'y inspirasyon ko

- gregbituinjr.

Ang tambayan kong palikuran

ngayon nga'y naging tambayan muli ang palikuran

upang doon isiwalat bawat nararamdaman

doon ibinubuhos ang mga kaligaligan

niring diwang kung anu-ano'y napagninilayan

may tigisang kasilyas sa dalawang pintong iyon

at sa isang silid tatambay, aba'y ayos doon

habang diwa'y nasa alapaap naglilimayon

na pamuli ngang naglakbay sa pusod ng kahapon

magigiting ang bayaning sa bayan nga'y nagtanggol

at lumaban hanggang mamatay na di nagpasukol

dinidiligan bawat tanim nang binhi'y sumibol

nang maging halaman o gulay o puno ng santol

ang bawat kinakatha sa diwa'y nakasasabik

pluma'y kayraming sinasabi kahit walang imik

aalis sa palikuran nang masaya't tahimik

na kwento, sentimyento't hibik na'y naisatitik

- gregbituinjr.

Sinong tatapos sa aklat?

"A writer only begins a book. A reader finishes it." - Samuel Johnson

sinisimulan lamang daw ng isang manunulat

yaong pagkatha ng kanyang binabalak na aklat

at mambabasa na raw ang tatapos nitong sukat

ang sinabi'y matalinghagang dapat ding masipat

marahil, sinimulan lang ng may-akda ang katha

ngunit pagtatapos ng akda'y problema pa yata

kung serye sa magasin ang nobelang nililikha

kung basahin ito'y mambabasa ba'y nagtatakda?

kung simula pa lang ng nobela'y nakakabagot

baka akdang ito'y sa kangkungan na pinupulot

kung ayaw ng mambabasa ang akdang nilulumot

naglathala'y malulugi't sa ulo na'y kakamot

may nobelang sinaaklat na serye sa magasin

"Banaag at Sikat" ay nobelang halimbawa rin

inabangan ng mambabasa't kaysarap basahin

matapos lang ang isang taon ay sinaaklat din

marahil nga'y tunay ang sinabi ni Samuel Johnson

na sa mangangathang kagaya ko'y malaking hamon

isulat lang ba'y gusto o mambabasa'y kaayon?

susulatin ko ba'y aklat na panlahat ang layon?

- gregbituinjr.

Nagsakit-sakitan

may kilalang nagsakit-sakitan pagkat di alam

ang gagawin sa buhay, problema pa'y di maparam

walang plano sa buhay, walang pakialam

di alam ang gagawin, sa sarili'y nasusuklam

nanghihiram ng tapang sa kunwari niyang sakit

mahina ang loob, pinayuhan kong magpainit

sa araw pagkat Bitamina D yaong guguhit

sa bawat hinaymay ng kalamnan, gamot na sulit

di agad nagkakasakit ang may Bitamina D

ngunit malala'y magsakit-sakitan ang sarili

walang magawa, tingin sa sarili'y walang silbi

nag-iisip ng dahilan upang di nasisisi

wala raw ginagawa, walang kita, walang sahod

sa telebisyon na lang kasi laging nakatanghod

buhay na lang ba'y ganito, na tulad ng alulod

o baguhin ang pananaw sa buhay, huwag tuod

maghanap ng gagawin, magkaroon ng layunin

buhay ay gawing makabuluhan, may adhikain

tumulong sa kapwa, misyong marangal ay yakapin

di ka na magsasakit-sakitan, susulong ka rin

- gregbituinjr.

Libro imbes na yosi ang bisyo

mas mabuti pang pabilhin mo na ako ng libro

ngunit di mo ako mapabili ng sigarilyo

pagkat pagbabasa na ang kinagisnan kong bisyo

wala kasi akong mahita sa yosi o damo

napayosi rin ako noong aking kabataan

dahil naman sa pakikisama o barkadahan

subalit bisyong iyon ay agad kong napigilan

nang mapasama sa kilusang makakalikasan

sayang lang ang pera sa usok, sabi sa sarili

wala ngang pambili ng kanin, usok pa'y bibili?

mas mabuti pa ang ensaymada't busog ka dine

at pagbabasa'y naging bisyo kong kawili-wili

bagamat biniling libro'y di agad nababasa

binili iyon na pamagat at paksa'y kayganda

minsan isa o dalawang kabanata lang muna

mabuti na ang ganito't nakakapagbasa pa

- gregbituinjr.

Ang patpat ng ekobrik

Ang Patpat ng Ekobrik (ecobrick stick)

mahalaga ang paggamit ng patpat ng ekobrik

upang mga ginupit mong plastik ay maisiksik

sa boteng plastik din na paglilibingan ng plastik

patpat na kawayan lang ang gamitin mong paniksik

aangat lang ang mga plastik sa loob ng bote

kung wala kang pantulak sa plastik na anong dami

di lang ginupit na plastik ang isiksik sa bote

kundi malambot ding plastik na ikakabig dine

malambot na sando bag ang magtutulak pababa

sa tulong ng patpat na kawayang gamit mong kusa

di pwedeng metal kundi kawayan nang di masira

ang boteng plastik, na ekobrik mo ring ginagawa

ang malambot na plastik ang kukubkob sa ginupit

hanggang sa pinakababa't patitigasing pilit

na pag pinisil mo'y parang batong di mo mabinit

ekobrik na sa tigas parang brick na magagamit

- gregbituinjr. 

Magkalintog man dahil sa page-ekobrik

nagkakalintog o nagkakapaltos din talaga

sa daliri sa paggupit ng plastik na basura

ayos lang iyon, sa kalikasan ay ambag mo na

paunti-unti man, nakadarama ka ng saya

ito ngang lintog ko'y halos di ko na naramdaman

daliri'y nakasakbat sa gunting, nakita na lang

na may lintog, marahil ay tanda ng kasipagan

o di kasipagan kaya madaling malintugan

gayunman, lintog na ito'y simbolo ng ekobrik

mga ginupit na plastik na ating isiniksik

sa boteng plastik, patitigasin mong talagang brick

nang makabawas sa kalat, walang patumpik-tumpik

magkalintog man at magkalipak, ito'y paggawa

ng makababawas sa basura mong nalilikha

basta makatulong, lintog na ito'y balewala

habang naggugupit, nagninilay, at kumakatha

- gregbituinjr.

Ang maging tibak

"Beside being a poet, to be an activist is my calling. ~ GBJ"

isa lang ako sa tinawag upang maging tibak

magsisilbi sa bayan, pamumuhay ay payak

danasin man ang hirap, wala ritong pisong pilak

nagpasya akong ganap, buhay ko'y dito tiniyak

pagyakap sa aktibismo'y pagtanggap sa layunin

sumama ako dahil marangal ang adhikain

lipunang makatao'y itayo ang simulain

upang sosyalismo't panlipunang hustisya'y kamtin

magtatatlong dekada nang ito ang aking misyon

uring manggagawa'y kasamang nagrerebolusyon

kasama rin pati magsasaka sa nilalayon

at nakikibaka para sa makataong nasyon

internasyunalismo ang prinsipyo't diwang yakap

na anuman ang lahi'y dapat tubusin sa hirap

pagkakapantay sa lipunan ang aming pangarap

rason kung bakit kami'y naging aktibistang ganap

kahit sa mga tula ko'y nakikibakang tunay

nagrerebolusyong yakap ang simpleng pamumuhay

sosyalismo sana'y makamit habang nabubuhay

ito na ang aking buhay hanggang ako'y mamatay

- gregbituinjr.

Halina't maglaro ng sudoku

matapos magbasa't magsulat, o magtanim kaya

matapos mag-ekobrik, magdilig man, o maglupa

maglalaro na ng sudoku sa selpon kong luma

animo'y matematika itong kahanga-hanga

tunay nga bang sudoku'y inimbento ng Igorot

dahil balangkas nito'y parang sa sundot-kulangot

pagkain sa kawayan at baong tamis ang dulot

siyam na hilerang tila sudoku pag sinundot

mula SUnDOt-KUlangot ay tinawag na sudoku

habang nasa kwarantina'y nilalaro-laro ko

di pa magastos na di tulad ng sudokung libro

na kailangan pang bilhin upang maglaro nito

may app ng sudoku, i-download mo sa iyong selpon

at laruin matapos ang gawain sa maghapon

magandang pangrelaks, pumokus, bilisan ang aksyon

huwag lang hayaang sarili mo'y dito magumon

- gregbituinjr.

Ekobrik ang libingan ng mga plastik

sa lahat ng mga plastik, libingan n'yo'y ekobrik
panawagang sa boteng plastik na kayo isiksik
ito ang maaaring gawin sa lahat ng plastik
lalo't naglipana na sila, anong iyong hibik?

mamangka ka sa dagat, ang plastik nga'y naglutangan
malapit sa amin ang Manila Bay, iyong tingnan
hinampas ng alon ang plastik sa dalampasigan
akala ito'y pagkain ng isdang nagbundatan

may dapat tayong gawin upang ilibing ang plastik
huwag sa laot pagkat mata ng isda'y titirik
mayroon din daw microplastics na kahindik-hindik
na di na malaman kung saan-saan nakasiksik

ilibing ang mga plastik ng pinagkainan mo
kung nais mo'y isama ang mga plastik na trapo
i-ekobrik lalo't mga plastik ang mga ito
nang di na lumutang sa dagat at makaperwisyo

- gregbituinjr.

Nakarami na rin ako ng nagawang ekobrik

nakarami na rin ako ng nagawang ekobrik
sa boteng plastik ay pinagsikapan kong isiksik
ekobrik ay libingan na ng laksa-laksang plastik
ekobrik ay libangan ko na ring nakasasabik

kayraming naipong plastik habang may kwarantina
pinatitigas na parang bato, pindutin mo pa
pag binato ng plastik ni misis, masakit pala
parang haloblak ang ginawang ekobrik, ano ba?

isang tulong na rin ito sa ating kalikasan
upang basura'y mabawasan sa kapaligiran
isang ekstrang gawain man ito'y pinagsikapan
upang makatulong din sa kapwa't sa sambayanan

ang naipong plastik sa malaking bag na'y naubos
ang basura'y di napunta sa laot, nakamenos
pakiramdam mo'y masaya't nakatulong kang lubos
ginawa sa panahong kwarantina kahit kapos

- gregbituinjr.

Dalawang payak na tanaga

I

lagi kang magsisikap
nang kamtin ang pangarap
dinanas man ang hirap
at buhay mo'y masaklap

sige lang, magsikap ka
magsipag sa tuwina
gumawa hangga'y kaya
at ika'y malakas pa

II

manggagawa, obrero
uri, organisado
lipuna'y aralin mo
kapitalismo'y ano

kaharap man ang sigwa
kaya mo, manggagawa
ang obrero'y dakila
sa lupang pinagpala

- gregbituinjr.

Ayoko nang umabot ng otsenta sa pagtanda

ayoko nang umabot ng otsenta sa pagtanda
na inabot ko lang iyon dahil nakatunganga
na di ka man lang nakatulong sa bayan o madla
mabuti nang mamatay sa laban kaysa tumanda

mahalaga laging may nagagawa ka sa bayan
sa iyong kapwa tao, maging sa kapaligiran
may nagagawa ka ba para sa kapayapaan?
ipinaglaban mo ba ang pantaong karapatan?

mabuti nang makipaglaban at baka magwagi
mabuting maglingkod sa bayan kaysa naghahari
kung bulok ang sistema'y bakit pinananatili
ayokong tumanda kung tahimik na lang palagi

ayokong kain, tulog, trabaho, paikot-ikot
kain, tulog, trabaho, kain, tulog, nababansot
ang utak, ayokong tumandang turumpong kangkarot
kung ganito lamang, otsenta'y ayokong maabot

- gregbituinjr.

Kinsenas na naman

Kinsenas na naman, sahod ng mga manggagawa
Ibigay sana'y tamang presyo ng lakas-paggawa
Natataguyod sana ang magandang halimbawa
Subalit switik nga ang kapitalistang kuhila
Espesyal na araw na aba pa rin ang paggawa

Nagtatrabaho upang ang pamilya'y may makain
Ang kalusugan ng pamilya'y dapat atupagin
Sa bawat araw, kitang sahod ay dapat ipunin
Na pati edukasyon ng anak ay iisipin
Ang pag-iimpok para bukas ay mahalagahin

Nananatiling ganyan, paikot-ikot ang buhay
Ang kinsenas at katapusan ay dapat manilay
Manggagawa kang sa pamilya'y kayraming inalay
Anak mo sana'y magsikap at mag-aral ngang tunay
Na ganyan pa rin ang iyong buhay hanggang mamatay

- gregbituinjr.

Ingat, baka matibo

ingat, baka matibo, ang sabi ng aking pinsan
nang minsang kami'y naglalakad doon sa tubuhan
may tibo raw na anong liliit sa sa dahon niyan
na dapat ko raw iwasan upang di masugatan

dahil doon, maraming salamat sa kanyang payo
kaya sa masukal, nag-iingat ng taos-puso
di lang sa ahas mag-ingat kundi pati sa tibo
pagkatakot sa madadawag ay agad naglaho

kaya kahit mapunta ako sa ibang probinsya
mag-ingat sa madadawag ay ginagawa ko na
mahirap maisahan, kahit tibo lang ay isa
aaringking ka sa sakit, buong araw na dusa

may lason man o wala, pag sa balat mo'y tumusok
kung kagat man ng langgam iyon ay di ko pa arok
magandang pagsasanay nang makaiwas sa tusok
maging maingat saan mang mapasuot na sulok

- gregbituinjr.

Paninilip

naninilip siya sa butas nang aking mahuli

ngunit di siya umaamin, walang sinasabi

upang malaman ang totoo'y sisilip din dini

upang magkasala rin ako't dalawa na kami

paano kung ako'y pagbintangan ding namboboso

o kaya'y nagmamanman siya't may ibang sikreto

depende marahil sa lugar o katayuan n'yo

kung matatakasan agad ang sitwasyong ganito

bakit nga ba may masasaya kapag naninilip

dahil ba pulos libog ang nadama't naiisip

o baka tumatayo na kapag nananaginip

kaya dapat ilabas ang kung anong halukipkip

sana'y walang mangyaring masama sa binosohan

sana'y hanggang silip na lang ang kanyang maranasan

huwag na sanang sumobra't lumampas sa hangganan

at panatilihin na lamang ang kapayapaan

- gregbituinjr.

Nagagalit sa sarili

nagagalit sa sarili pag ako'y pumapalpak

di ko sinisisi ang asawa ko't mga anak

o kahit kaibigan, kakilala, kamag-anak

sarili lang ang sisisihin pagkat ako'y tunggak

bakit iba'y sisisihin sa pagkakamali ko

sila nga ba ang talagang nagkamali o ako

mahirap bang sa sarili'y tanggapin ang mali mo

tatanggapin ko ang mali upang makapagwasto

ilang beses na rin ba akong gumapang sa lusak

ilang beses na sa pagkilos muntik mapahamak

ilang beses nang nakatikim ng suntok at tadyak

ilang beses na rin ba akong gumanti't nanapak

kapalpakan ko ba'y maisisisi ko sa iba

o sarili'y pakasuriin at mag-analisa

magwasto upang makapaglingkod pa rin sa masa

sarili'y ayusin kung narito ang diperensya

nangyari'y pagnilayan, magwasto kung kailangan

magpakatao ka pa rin sa harap ng sinuman

makipagkapwa, di man makatao ang lipunan

gawain at tungkulin mo'y pagsikapang galingan

- gregbituinjr.

Tanong ni esmi

ano na namang iniisip mo, tanong sa akin

ang laman ng isip ko'y kayhilig niyang tanungin

nagagambala tuloy ang pagninilay sa hangin

lumilipad na naman ang isip sa papawirin

ano bang nasa isip ko habang nakatunganga?

kayhirap bang sagutin, o nasa isip ko'y wala?

iniiba ko ang usapan, may panibagong paksa

ano bang lulutuin ko, anong ulam mamaya?

kahit di naman iyon ang talagang nasa isip

baka kakatha o may diwata sa panaginip

baka sa gilid ng balintataw ay may nahagip

baka prinsesa'y nasa panganib, dapat masagip

tanong sa akin, ano na namang iniisip mo?

o bakit sa ganyang klaseng tanong, ako'y kabado?

dapat bang laging may handang sagot na inimbento?

tortyurer ko ba siya nang ako'y nakalaboso?

ano bang lulutuin, anong ating uulamin?

handang tugon, eh, paano kung tapos nang kumain?

at pipikit na, ewan ko, paano sasagutin

pagkat di ko alam anong bigla kong sasabihin

marahil, nasa isip ko'y mababasa sa akda

biyograpiya raw ng makata'y nasa kinatha

ngunit may nasa isip na di dapat tinutula

anong nasa isip ko, tula, tulala, o wala?

- gregbituinjr.

Dahil walang pagemaker, ginamit ko'y microsoft word

sa paggawa nga ng dyaryo, pagemaker ang gamit ko

ngunit sa mga computer shop ay wala na ito

kaya microsoft word na'y gamit ko sa pagdisenyo

ng pahayagan, ng magasin, maging ng polyeto

isulat muna sa papel ang iyong inaakda

para handa na pag sa kompyuter ka na nagtipa

pag may wifi, pwedeng sa facebook sa selpon gumawa

pag nasa kompyuter na, saka kopyahin ang katha

nakaplano na sa isip ang buong pahayagan

isulat sa notbuk bawat pahina't nilalaman

ige-grayscale mo sa internet ang mga larawan

ilagak sa facebook group o i-email lahat iyan

saanmang computer shop, microsoft word ay laganap

sulatin mo'y i-download sa facebook o email na app

o i-copy paste muna sa notepad ang iyong na-tayp

mula notepad sa microsoft word, ilipat mong ganap

i-column sa isa, dalawa, batay sa disenyo

parang pagemaker pero microsoft word ang gamit mo

batay sa plano, ilagay mo ang teksto't litrato

pag natapos na'y tiyaking mai-p.d.f. ito

i-u.s.b. ang p.d.f. file, pag may pondo'y dalhin

sa palimbagan upang maging dyaryo o magasin

bahala silang maglimbag hanggang ito'y tiklupin

pag gawa na'y ipamahagi o ibenta mo rin

- gregbituinjr.

Kung walang kompyuter, magdisenyo sa selpon

kailangang sadya ng matinding pagtitiyaga

kung selpon lang ang iyong gamit sa bawat pagkatha

buti't may app na pwede kang magdisenyo't lumikha

ngunit app ay araling mabuti nang maunawa

kung walang laptop at walang bukas na computer shop

malaking tulong sa gawain ang na-download na app

microsoft word, gmail, notepad, mada-download mong ganap

photo editor, wordpress, sa internet nga'y laganap

lalo't kwarantina, wala kang anumang magamit

kundi selpon lang, oo, selpon lang na anong rikit

saan ka man pumunta ay madali mong mabitbit

dapat lang magtiyaga kung gusto'y nais makamit

huwag kang maaburido, matutong magtiyaga

teknolohiya'y maraming hinahain sa madla

aralin ang app, paisa-isa't may magagawa

huwag mainip, selpon man, maraming malilikha

- gregbituinjr.

Buhay na bibitin-bitin

buhay na bibitin-bitin
ay laging pakaisipin
di dapat sising alipin
kundi tayo'y kawawa rin

magsikap lagi't magsikap
pagkat daig ng maagap
ang masipag, kung mangarap
tayo'y dapat may paglingap

isang kahit, isang tuka
ang buhay ng maralita
nawa'y huwag matulala
pag kahirapa'y lumala

wala mang kasiguruhan
ang buhay ng mamamayan
suriin mo ang lipunan
pati na pamahalaan

bakit ba may asindero
bakit may kapitalismo
nasaan ang pagbabago
bakit may uring obrero

kanilang pinanatili
ang pribadong pag-aari
kaya mayama'y nagwagi
at mga dukha'y pighati

kaya dapat maghimagsik
kung ayaw mata'y tumirik
rebolusyon na ang hibik
laban sa mga suwitik

pangarap nating sumaya
tila may bagong pag-asa
itatayong sama-sama
ang lipunan nitong masa

- gregbituinjr.

Kwento ng pagkamulat

nagisnan ko ang liwanag sa aking mga mata

mula sa pagkahimbing ay dumatal ang umaga

tila sikat ng araw ay panibagong pag-asa

habang kinakaharap ang laksang pakikibaka

namulat akong di magkapantay ang kalagayan

ng samutsaring tao sa kinagisnang lipunan

tanong ko: bakit may mahirap, bakit may mayaman

sistema'y inaral upang di magulumihanan

di ko mawari bakit ganito sa bayan natin

dapat ang lipunang ito'y suriin at baguhin

mayaman ang mapagsamantala't mapang-alipin

gayong dukhang inaapi'y mga kapwa tao rin

"Iisa ang pagkatao ng lahat," ang sabi nga

ni Gat Emilio Jacinto na bayaning dakila

dahil dito'y hinanap ang diwang mapagpalaya

hanggang aking makasama ang uring manggagawa

nagsuri't aking natutunan ang kanilang layon

sila pala'y may dakilang papel upang bumangon

ang mga api't pinagsasamantalahang nasyon

prinsipyo ng uring manggagawa, ito ang tugon

dahil sa kanila'y namulat ako't naririto

prinsipyo't misyon ng uring obrero'y niyakap ko

at aming itatayo ang lipunang makatao

salamat sa nagmulat sa akin, mabuhay kayo!

- gregbituinjr.

Kwento ng pagkabulag

nawala na ang liwanag sa aking mga mata

di na mapagmasdan ang mga tanawing kayganda

di na rin masilayan ang magagandang sagala

ang mga nasa isip ay di na rin maipinta

pakiramdam ko, tila ba daigdig na'y nagunaw

pati pakikipagkapwa tao'y di na matanaw

na panlipunang hustisya'y may tarak na balaraw

totoo pa'y kayraming batang sa tokhang pumanaw

di ko lubos maisip bakit dapat pang mabulag

gayong mata'y iningatan lalo't nababagabag

kayraming krimeng naganap at batas na nilabag

pati na karapatang pantao'y pupusag-pusag

buti't bulag na di kita ang karima-rimarim

na pulos krimen, pagpaslang, korupsyon, paninimdim

sakaling makakita muli't di sanay sa dilim

nawa'y may hustisya pa rin sa kabila ng lagim

- gregbituinjr.

Bihirang magkape

bihira pa rin akong magkape, tulad ng dati
nagtitipid ng panggastos kaya di nagkakape
maliban kung may mag-alok sa pulong at nagsabi
ngunit di na magkakape kung ako pa'y bibili

lalo ngayong kwarantina, si misis ay mahilig
magkape kaya napapakape rin ang makisig
dapat nang magtipid ngayong panahon ng ligalig
kaya nagkakasya na lang sa mainit na tubig

kung sanay kang magkape, umaga, tanghali, hapon
gabi, di na ito basta-basta magawa ngayon
walang sahod, walang pambili, at walang limayon
buhay-lockdown na ito, tipid-tipid pag naglaon

masarap namang magkape lalo't kapeng barako
nagpapaaraw sa umaga't nageehersisyo
subalit sa panahong ang sitwasyon ay ganito
may dahilang maging kuripot, nasa lockdowan tayo

- gregbituinjr.

Patuloy ang page-ekobrik kahit umuulan

patuloy ang page-ekobrik kahit umuulan

kaylakas ng tikatik, aba'y nagraragasaan

animo'y may demolisyon, yero'y nag-aangasan

habang nage-ekobrik ay patuloy sa paggampan

matagal maggupit, daliri rin ay nangangalay

dapat din, loob ng plastik ay malinisang tunay

punasan ng basahan o banlawan at isampay

walang latak ng pagkain ang plastik na ginutay

mga ginupit ay ipapasok sa boteng plastik

dapat malinis upang walang mikrobyong sumiksik

dapat di rin basa, patpat na kahoy ang paniksik

gagawing sintigas ng bato ang bawat ekobrik

habang kwarantina, sa page-ekobrik tumutok

doon ililibing ang plastik na di nabubulok

mai-ekobrik din kaya ang mga trapong bugok

dahil mga plastik din itong nakasusulasok

- gregbituinjr.

Ngitngit ng kalikasan

kanina'y tirik ang araw, subalit nagbabadya

ang pagbuhos ng malakas na ulan, biglang-bigla

sa yerong bubong tila bato'y nagbagsakang lubha

sa nangingitim na ulap ay biglang kumawala

ibinuhos na ng kalikasan ang kanyang ngitngit

lalo't usok ng coal-fired power plants ay abot-langit

nang mapuno ng plastik ang dagat, nakakagalit

kalikasan ay nagwala't sa lupa gumigitgit

tuwang-tuwa naman ang magsasaka't nadiligan

ang mga tanim niyang nilinang sa kabukiran

habang animo'y basurahan ang mga lansangan

nagbaha pagkat sa kanal, plastik na'y nagbarahan

biktima ng ngitngit ng kalikasan ay tayo rin

batas ng kapaligiran ay alamin at sundin

huwag mo nang dumihan kung di mo kayang linisin

kalikasan ay buhay kaya alagaan natin

- gregbituinjr.

Bakit nga ba marami raw pasaway sa Maynila

bakit nga ba marami raw pasaway sa Maynila
habang lockdown, laging iyon ang nababalita
dahil ba pasaway talaga ang taga-Maynila
o malapit kasi roon ang tagapagbalita

palibot ng Maynila ang mayorya ng masmidya
nasa Lungsod Quezon, Pasay, Makati, at saan pa
sa Malabon at Navotas ay swerteng makapunta
sila'y nasa sentro ng pulitika't ekonomya

nasa Maynila ang Malakanyang, ang nasa rurok
ng gobyerno, at pasaway din ba ang nasa tuktok
laki akong Maynila, sa distrito ng Sampaloc
kaya minsan naaamoy ang nakasusulasok

nasa Maynila rin ang matatandang kolehiyo
ang U.S.T., pinagdiwang na'y pang-apat na siglo
ang Letran ngayong apatnadaang taon na nito
pati ang La Salle, Mapua, San Beda, Ateneo

ang Kongreso'y nasa Q.C., Senado'y nasa Pasay
sakop ng Metro Manila, sila rin ba'y pasaway
ang totoo, nasa Maynila ang masmidyang hanay
kaya balita pag nilatag ay pambansang tunay

nasa Maynila ang balita, napapag-usapan
ng mga komentarista sa radyo't pahayagan
magrali sa Mendyola't pambansa na ang latagan
ganyan ang Maynila, na pasaway lang ay iilan

- gregbituinjr.
05.10.2020

Gisingin mo ako sa tagal nang pagkakahimbing

gisingin mo ako sa tagal nang pagkakahimbing

na diyosa ng kagandahan ang aking kapiling

na kasama ko'y prinsesa mula sa toreng garing

na baka pantasyang ito'y tunay pag di nagising

sasabihing ako'y binangungot ng kagandahan

na isa palang diwata ang aking nakatipan

habang ako'y dalitang kapiling ng kagipitan

na ginhawa ng bayan ko ang tanging kasagutan

mutya'y naglalayag sa diwa ng abang makata

na tila bilanggong nakagapos sa tanikala

na sa pagkakahimbing ay tila di makawala

na tanging saksi sa kanya'y ang lobong maninila

dapat na akong magising, mayroon pang labanan

tulad kong mandirigma'y dapat handa sa digmaan

kasama'y hukbong mapagpalaya sa sagupaan

tunggaliang dapat na naming mapagtagumpayan

- gregbituinjr.

Ayokong maging pabigat

Ayokong maging pabigat

Ayokong maging pabigat, ito ang aking hiyaw
Yayao akong di pabigat sa mundong ibabaw
Oo, nagsusuri akong may ibang natatanaw
Kumilos man akong may batong pasan bawat araw

O, kung wala kang pag-ibig sa kapwa kung sakali
Nakibaka ka kaya upang obrero'y magwagi?
Ginhawang asam ng uring manggagawa ang binhi
Maghandang buwagin ang sistemang mapang-aglahi

Aktibista akong may adhikaing sinimulan
Ginagampanan kong lubos ang tungkuling pinasan
Iniisip ang kapakanan ng masa't samahan
Ng uring manggagawa, ng dukha, di ng iilan

Gising ang diwa sa samutsaring isyu't problema
Pagkamulat ko'y mula sa uring obrero't masa
At nangangarap baguhin ang bulok na sistema
Bisig ko't kamaong kuyom ay tanda ng pagbaka

Ibig kong mag-ambag sa ginhawa ng kapwa tao
Gaya ng pangarap ng dakilang Katipunero
Ayokong maging pabigat, buhay ko ang ambag ko
Tatahakin ang landas ng lipunang makatao

- gregbituinjr.
05.10.2020

Happy Mother's Day! - a Tagalog poem

Happy Mother's Day, pagpupugay sa lahat ng nanay!
Anak po'y naritong nagpapasalamat ng tunay!
Pagkat kayo'y inang mahal! Mabuhay po! Mabuhay!

Pangarap po namin ay naabot dahil sa inyo
Yamang pagmamahal ninyo sa anak ay solido
Mahal po namin kayo! Kami sa inyo'y saludo!

O, inay, na nag-alaga mula sinapupunan
Tigib ang pag-aaruga sa anak nang isilang
Heto kaming tumatag para sa kinabukasan

Espesyal pong araw na ito. Happy Mother's Day po!
Ramdam itong pagpapahalagang mula sa puso
Sa inyo, pagmamahal namin ay di maglalaho!

Dahil sa inyo, matatag at may dignidad kami
At pinag-aral, pinangaralan hanggang paglaki
Yamang kayong aming magulang ang aming bayani

- Greg Jr. and Liberty
05.10.2020