Sa barko mula Matnog hanggang Allen

SA BARKO MULA MATNOG HANGGANG ALLEN
ni Gregorio V. Bituin Jr.
15 pantig bawat taludtod

umaga'y lumisan, gabi'y dumatal sa pantalan
sa Matnog, kayhaba ng pila ng mga sasakyan
mga kasama'y naghuntahan habang nag-aabang
sabik subalit dama sa puso'y kayraming patlang

madaling araw, dalawang trak at van na'y sumakay
barkong patungong Allen ay naghanda nang maglakbay
kain, toma, pahinga hanggang magbukangliwayway
sarili'y inihanda sa mga daratnang lumbay

* ang mga litrato'y kuha ng may-akda noong Disyembre 2, 2013 bilang bahagi ng People's Caravan for the People of Samar and Leyte na nasalanta ng matinding bagyong Yolanda

Mga punong nabunot ang ugat

MGA PUNONG NABUNOT ANG UGAT
ni Gregorio V. Bituin Jr.
16 pantig bawat taludtod

aming nadaanan, puno / ng niyog ay nagbagsakan
mga ugat ay nahugot / sa pader biglang dumagan
anong lakas ni Yolandang / rumagasa na sa bayan
na di na rin nakayanan / ng taal na kalikasan

kahit na sampung tao'y di / basta-basta mahuhugot
ang mga punong matatag, / ugat ay masalimuot
na para lamang tumapik / ng ulo mong nagkakamot
ang mga punong nahugot / ay tila punong napugot

habang aking minamasdan / ang kabuuang paligid
mga nahugot na puno'y / tila buhay na napatid
napansin ko sa kasama / luha niya'y nangingilid
ang sinumang di iiyak / ay yaong may pusong manhid

pag nabunutan ng ugat, / namamatay din ang puno
tulad ng ibang nilikha, / buhay din nila'y naglaho

* ang litrato'y kuha ng may-akda noong Disyembre 3, 2013 

Sa parang ng dusa, sa hukay ng korapsyon

SA PARANG NG DUSA, SA HUKAY NG KURAPSYON
ni Gregorio V. Bituin Jr.
13 pantig bawat taludtod

ikasiyam ng Disyembre ng bawat taon
ay daigdigang araw laban sa korapsyon
isang araw ng pagnamnam sa tamang layon
kung bakit dapat iwaksi ang gawang iyon

mga trapong ganid, laging silaw sa pera
salapi ng bayan ang binubulsa nila
ang serbisyo'y ninenegosyo't kumikita
sa mga proyekto't sila'y nagtatamasa

anila, kung walang korap, walang mahirap
ngunit sa islogang iyon, huwag kukurap
baka matalisod mo silang mapagpanggap
mga trapong tusong hinehele sa ulap

sa sistema ng trapo'y galit na ang dukha
galit na rin pati ang uring manggagawa
dahil sa korapsyon, kayraming nakawawa
ibagsak na iyang mga trapong kuhila

trapong walang kabusugan, lamon ng lamon
buong bayan na ang kanilang binabaon
sa parang ng dusa, sa hukay ng korapsyon
dapat lang silang ilugmok ng rebolusyon

Karapatang Pantao, Ikasampu ng Disyembre

KARAPATANG PANTAO, IKASAMPU NG DISYEMBRE
ni Gregorio V. Bituin Jr.
15 pantig bawat taludtod

Karapatang Pantao, ikasampu ng Disyembre
Araw ng taon, paggunita sa dangal at puri
May proseso ang bawat pagkatao ng marami
Pagkat iba-iba ang kultura ng bawat lipi
Marapat nating ipagtanggol ang ating sarili
Laban sa sinumang sa atin ay nang-aaglahi
Ang ginawa ni A ay di dapat ibintang kay B
Iwaksi na yaong ang mga asal ay kadiri
Sa sala ni X, bakit nagdurusa'y si Y at Z
Hindi natin dapat ihasik yaong maling binhi
Dapat loob natin ay nabubuhay sa mabuti
Ito ang sa araw ng karapata'y aking bati!

Paglalakbay para sa mga nasalanta ng Yolanda

PAGLALAKBAY PARA SA NASALANTA NG YOLANDA
ni Gregorio V. Bituin Jr.
15 pantig bawat taludtod

panahon noon ng Ondoy, kayraming nasalanta
sa taga-Maynila'y tumulong ang taga-probinsya
isang buwang ulan sa loob ng anim na oras
bagyong Ondoy ay nagpalubog sa maraming landas
nangyari sa Leyte't kanugnog ay di akalain
ang Yolanda'y higit tatlong daang beses ang tulin
ngayong taga-probinsya naman ang nangailangan
mga taga-Maynila'y naghandang sila'y tulungan
kami'y sumama't nakipagbayanihang totoo
kahit munti man ay makatulong sa dinelubyo


* ang mga litrato'y kuha ng may-akda noong Disyembre 1, 2013 mula sa Caritas sa Maynila bilang paghahanda sa malayong paglalakbay patungo sa mga sinalanta ng Yolanda sa Leyte

Kahoy na walang lilim

KAHOY NA WALANG LILIM
ni Gregorio V. Bituin Jr.
13 pantig bawat taludtod

wastong bilin sa Kartilya ng Katipunan:
ang buhay na di ginugol sa wastong dahilan
ay kahoy na walang lilim, di masilungan
sa gitna ng init ng araw, natalupan
dahil walang dangal na sa bayan maiwan

tinangay ni Yolanda yaong mga dahon
ng punong dumanas ng kaytinding daluyong
kayraming winasak ng dambuhalang alon
yaong matatag na puno'y naiwan doon
ulila sa gabing ang buwan ay nalulon

nakita'y sadyang nakadudurog ng puso
masa'y apektado, kayraming natuliro
tila mga pangarap, tuluyang naglaho
ngunit di dapat magpakubkob sa siphayo
mayp ag-asa pa, halina't kita'y tumayo

magsibangon tayo sa kabila ng lagim
ang buhay sa mundo'y di pulos puti't itim
makulay na buhay, atin ding masisimsim
mga bagong puno'y atin ngayong itanim
upang puno'y muling magkaroon ng lilim

* ang larawan ay kuha noong Disyembre 3, 2013 sa Brgy. Canramos, Tanauan, Leyte, na nakaranas ng daluyong ni Yolanda

Rali agad sa Manila pagkagaling sa Tacloban

RALI AGAD SA MAYNILA PAGKAGALING SA TACLOBAN

ni Gregorio V. Bituin Jr.

15 pantig bawat taludtod

madaling araw na nang makabalik sa Maynila

matapos ang limang araw ng aming paglalakbay

ngunit kinaumagahan ay agad sumagupa

sa rali sa di-es-dobol-yu-di (DSWD), ako'y nagnilay

ayon sa ahensya'y ititigil na raw ng Disyembre

ang pagbibigay ng relief goods doon sa Tacloban

anang Partido Lakas ng Masa'y dapat nagsisilbi

ang ahensya lalo't nasalanta'y ang mamamayan

kahit pagod na sa biyahe'y tuloy ang pagkilos

at dalhin sa pamahalaan ang mga hinaing

ng mga nasalantang marapat ding makaraos

mula sa trahedyang sa buong bayan ay gumising

di sapat ang rali, tuluy-tuloy dapat ang tulong

upang sa buhay ng nasalanta'y may maidugtong

* ang litrato'y kuha ng may-akda noong Disyembre 6, 2013 sa harap ng tanggapan ng DSWD sa Lungsod Quezon

* mangyaring tingnan ang kaugnay na ulat mula sa Partido Lakas ng Masa sa kawing na http://masa.ph/index.php?option=com_content&view=article&id=230&Itemid=1

Ang kaloobang puno ng himagsik

ANG KALOOBANG PUNO NG HIMAGSIK
ni Gregorio V. Bituin Jr.
11 pantig bawat taludtod

ang kaloobang puno ng himagsik
bulok na sistema'y di matangkilik
pagbabago ang tangi nilang hibik
kumikilos nang di patumpik-tumpik
prinsipyadong diwa'y inihahasik
nakikibaka silang parang lintik
bago pa mata nila'y magsitirik

Pagpupugay kay Nelson Mandela

PAGPUPUGAY KAY NELSON MANDELA
ni Gregorio V. Bituin Jr.
15 pantig bawat taludtod

itim man o puti ang balat, ayon sa Kartilya
pagkatao natin at ng ating kapwa'y iisa
ang prinsipyong ipinaglaban ni Nelson Mandela
tila mga Katipunero ang iyong kapara
sagisag laban sa rasismo't pagsasamantala

dalawampu't pitong taon sa loob ng piitan
dahil rehimeng apartheid ay iyong nilabanan
nang makalaya, poot ay iniwan sa kulungan
ipinaglaban ang laya ng mga kababayan
at tagapagkaisa rin ng buong sambayanan

nahalal na pangulo ng bansang Timog Aprika
at naging kasapi rin ng Partido Komunista
sa iyo, di kulay ng balat ang sanhi ng dusa
kundi kaisipang tubo at bulok na sistema
hanggang sa iyong kamatayan, di ka nag-iisa

di malilimot ang kasaysayan mo't halimbawa
umangat ka man, paa mo'y lapat pa rin sa lupa
marami pang magpapatuloy ng iyong adhika
upang pagsasamantala sa kapwa na'y mawala
sa iyo, kami'y nagpupugay, isa kang dakila

Ang hustisyang para sa amin ay aming kukunin

ANG HUSTISYANG PARA SA AMIN AY AMING KUKUNIN
ni Gregorio V. Bituin Jr.
15 pantig bawat taludtod

marami ang mapagpaniwala sa sabi-sabi
sila'y mga hunyangong walang bait sa sarili

sinisira ang aming dangal, puri't pagkatao
ginigiba kami ngunit di kami patatalo

mga sinungaling silang akala mo'y kaybuti
pawang mga mapagkunwari, ikaw'y sinisisi

sinisisi sa kasalanang iba ang gumawa
sinisisi sa salang sila yata ang maygawa

mag-imbestigang mabuti, huwag turo ng turo
nang makapagdepensa ang inyong itinuturo

mga sinungaling kayong dapat putlan ng dila
huwag diyang bubulong-bulong, kayo'y magsalita

harapin kami at huwag magtago sa salawal
humarap nang taas-noo, huwag lang umatungal

mga aktibista kaming kapwa'y di inaapi
ang prinsipyo't disiplina'y niyakap ng matindi

ngunit may mga taong hindi marunong magsuri
nag-aakusa'y walang batayan, dila'y pamuti

sa hindi mo kasalanan, sila’y ngawa ng ngawa
iginigisa ka nila sa kanilang mantika

kaya dapat tayong magpakatatag, sila'y linta
hanap ay masisisi kahit iba ang may sala

sa paninira nila, sila'y lalabanan namin
ang hustisyang para sa amin ay aming kukunin!

Pagbabago, hindi gulo

PAGBABAGO, HINDI GULO
ni Gregorio V. Bituin Jr.
10 pantig bawat taludtod

ang paghahanap ng pagbabago
ay hindi paghahanap ng gulo
kung sakali mang sumigaw kami
ng pagbabago doon sa rali
hindi iyon gulo o anumang
nakasisira ng karapatan
pagkat ang pinaglalaban doon
ay ang pagbabagong naaayon
sa tunay na pakikipagkapwa
at pagkakaisa ng dalita
dakila't marangal na layunin
prinsipyong tangan at simulain
hindi gulo iyang aming hanap
para sa pagbabagong kay-ilap

Ang Haring Usok

ANG HARING USOK
ni Gregorio V. Bituin Jr.
11 pantig bawat taludtod

puno na ng polusyon ang daigdig
na sa ilong natin ay lumulupig
mula sa sigarilyong nasa bibig
hanggang sunog na nakapanginginig

ang Haring Usok ay di mapakalma
palipad-lipad sa tuwi-tuwina
buong mundo ba'y sasakupin niya?
pagkat siya na ang bagong sistema?

lungsod na'y kinulapol ng polusyon
at di malaman ang tamang solusyon
tayoman dito'y maging mahinahon
ang usok pa rin ay maglilimayon

bawasan natin ang usok sa langit
asap itong sa mundo'y humihirit
ito sa bayan ay sadyang kaylupit
na dapat mabawasan nating pilit

sadyang mapanakop ang Haring Usok
na nagnanais abutin ang rurok
polusyon siyang nakasusulasok
na sa daigdig ay bumubulusok

polusyong ito'y sadyang walang habas
na akala mo'y tila walang lunas
nasa kamay natin ang pagbabawas
sa Haring Usok na sadyang kayrahas

(Tuwing Disyembre 3 ay Anti-Pollution Day sa bansang India bilang paggunita sa Bhopal Gas Tragedy, na siyang itinuturing na pinamatinding sakuna sa industriya sa buong mundo, na umano'y ikinamatay ng higit 3,000 katao, at 500,000 naman ang nasaktan. Naganap ang trahedya noong hatinggabi ng 2–3 Disyembre 1984 sa Union Carbide India Limited (UCIL), na isang planta ng pestisidyo sa Bhopal, Madhya Pradesh, sa bansang India.)

Ang ulilang marker

ANG ULILANG MARKER
ni Gregorio V. Bituin Jr.
13 pantig bawat taludtod

nag-iisa ang marker na iyon sa ilang
walang katabing estatwa o gusali man
tila doon ay wala iyong kasaysayan
bakit iyon nasa sukal ng kalunsuran

matindi pa naman ang doo'y nakatala
pag-alala sa comfort women noong digma
tanda ng kaapihan ang ginugunita
ng marker na iyong tigib ng dusa't luha

nasa sulok lang ng Liwasang Bonifacio
di kapansin-pansin, di daanan ng tao
ni wala ka nga doong makitang rebulto
sadyang nangungulila ang marker na ito

gayunman, buti't may ganitong marker doon
isang gunita noong panahon ng Hapon
higit libong babae'y ginahasa noon
na panawagan pa rin ay hustisya ngayon

ang ulilang marker ay isang paalala
na may nangyaring ganoon dito noon pa
gunitain ang mga babaeng biktima
at dinggin natin ang sigaw nilang hustisya!

* Ang ulilang marker na ito ay nasa likod ng rebulto ni Gat Andres Bonifacio sa Liwasang Bonifacio, at nasa gilid ng tulay patungong Jones Bridge. Di ito kapansin-pansin kung hindi lalapitan. Hindi daanan ng tao. Natsambahan lang na makita dahil kailangang maghanap ng CR. Kuha noong Nobyembre 30, 2013, sa ika-150 kaarawan ng ating bayaning si Gat Andres Bonifacio.

Ang mapanira

ANG MAPANIRA
ni Gregorio V. Bituin Jr.
13 pantig bawat taludtod

parusahan kung talagang may kasalanan
kung di mo gagawin, wala kang karangalan
ang budhi nami'y malinis, alam mo iyan
ang buong nangyari'y iyong alam na alam

wala kang bayag sa patuloy mong pagsira
sa dangal namin at ng iba mo pang kapwa
halos magtagumpay ka sa iyong pakana
ikaw sa paninira'y laging tuwang-tuwa

mahilig ka lang magbintang, wala kang dangal
sa katabi'y kung anu-anong inuusal
dalahira kang sa kapwa'y sadyang kaydaldal
kulang na lang kapwa mo'y tarakan ng punyal

naliligayahan kang sumipsip ng dugo
ng iyong kapwa, kahit sila'y maghingalo
di ka na tao, pagkat traydor kang hunyango
katulad mo sa mundo'y dapat lang maglaho

Isang bantang pananakop

ISANG BANTANG PANANAKOP
ni Gregorio V. Bituin Jr.
15 pantig bawat taludtod

Panatag, Kalayaan Islands, teritoryo natin
ngunit bakit ba ang Tsina'y nais itong maangkin?
higanteng bansang ito'y nais ba tayong sakupin?
dahil Pilipinas, unano ang kanilang turing?

ngunit ang maliit ay nakapupuwing din naman
tulad ni David nang si Goliath ay patamaan
kayrami nating bayani sa ating kasaysayan
na nakipaglaban upang ipagtanggol ang bayan

ngunit pamahalaan ay tila bahag ang buntot
tila walang magawa upang awatin ang buktot
matapang lang ba ang gobyerno sa pangungurakot?
ngunit pagdating sa Tsina'y tila ba ito takot?

dambuhalang pating sila, tayo'y galunggong lang ba?
ngunit tayong mga narito'y may magagawa pa
huwag nating tangkilikin ang produkto ng Tsina
maghanda rin sakaling tuluyang sakupin nila

* Panatag - kilala ring Scarborough shoal
* Kalayaan Islands - kilala ring Spratleys

Nasisiyahan kami sa Bubble Gang

NASISIYAHAN KAMI SA BUBBLE GANG
ni Gregorio V. Bituin Jr.
13 pantig bawat taludtod

dahil ba nanonood ako ng Bubble Gang
ay mababaw na ang aking kaligayahan?

mayroon bang kaligayahang pagkalalim
na marahil di maabot dahil madilim?

pag natawa ba kina Ruffa Mae at Bitoy
mababaw ka na sa patawa nilang Pinoy?

ano ba ang malalim na kaligayahan?
maraming kotse't babaeng pinaglaruan?

pag sikat ka saanmang sulok ng daigdig?
na pag naririyan ka'y lahat nakikinig?

maligaya ba pag sa pera'y nahihiga?
naroon sa mansyon, laging nakahilata?

di kailangang kaligayaha'y kaylalim
basta't dama mo'y saya, ito na'y kaygaling!

kaya walang malalim na kaligayahan
basta't masaya ka at walang nasasaktan

huwag ipagdamot ang Bubble Gang sa amin!
maligaya na kaming ito'y panoorin!

Ruffa Mae, Brad Pete, at iba pang naririyan
magpatuloy kayo! mabuhay ang Bubble Gang!

Huwag kang barat

HUWAG KANG BARAT
BUMILI KA NA LANG NG CORNETTO
ni Gregorio V. Bituin Jr.
13 pantig bawat taludtod

huwag kang barat, kung di mo kaya ang presyo
huwag mo nang bilhin itong aking produkto
bumili ka na lang ng kasya sa pera mo
upang ako nama'y di malugi sa iyo

huwag mo akong baratin, kaibigan ko
pagkat kwarenta pesos ang halaga nito
kung gusto mo'y hati kayo ng kasama mo
bilhin nyo ito, tigbebente pesos kayo

hihingi ka ng tawad, ano bang sala mo?
kasalanan bang naging maralita kayo?
nais ko lang naman, huwag barating todo
pagkat kita ko nga lang dito'y limang piso

sa panahon ngayon nitong kapitalismo
mahalaga'y tubo kaya nagnenegosyo
pagkatapos ay babaratin mo lang ako!
ano na lang ang kikitain ko sa iyo?

ang bawat produkto'y may katapat na presyo
hanggang saan aabot ang bente pesos mo?
kaibigan, bilhin mo na lang ay Cornetto
bente pesos lang, kaya ang pera mo'y sakto

Kayraming gutom kahit kayraming pagkain

KAYRAMING GUTOM KAHIT KAYRAMING PAGKAIN
ni Gregorio V. Bituin Jr.
13 pantig bawat taludtod

kayraming gutom kahit kayraming pagkain
naroon sa groseri, kailangang bilhin
kung wala kang salapi'y tiyak gugutumin
ganito nga ang sistema sa bayan natin

pagkat ang mga pagkain ay di nilikha
upang ipamudmod sa mga hampaslupa
ang negosyante'y namuhunan sa paggawa
upang sila'y tumubo, di magkawanggawa

ngayon kasi'y kawawa ang walang pambayad
sa kagubatan ng lungsod ay tila hubad
sa kamahalan lagi kang mapapaigtad
katunayang ito sa araw nakabilad

may katapat na presyo ang bawat produkto
may halaga na rin kahit mga serbisyo
ang lahat kasi ngayon ay ninenegosyo
kaya kung walang pera, gutom kang totoo

nakakaiyak, may presyo ang karapatan
may bayad upang umayos ang kalusugan
may bayad upang makapag-aral ka lamang
may bayad ang pagkain sa hapag-kainan

dapat ang karapatan ay tinatamasa
ng lahat ng mamamayan, ng simpleng masa
palitan na ang kasalukuyang sistema
kung nais natin ang mundong ito'y gumanda

Storm surge at tsunami

STORM SURGE AT TSUNAMI
ni Gregorio V. Bituin Jr.
15 pantig bawat taludtod

"storm surge" sa balita'y di agad naunawaan
na ito pala'y ala-tsunaming kahihinatnan
basta sa "storm" ang mga tao'y sanay na riyan
ngunit nang "surge" ay dinagdag, ibang klase na iyan

"storm surge" at tsunami'y pawang parehong daluyong
malalaking alon, mga bayan ang nilululon
"storm surge" ay lintik ang hangin, unos na sumumpong
tsunami'y mula sa lindol o bulkang dumagundong

ang Yolanda'y "storm surge", dapat na napaghandaan
kung ito lamang ay naipaunawang mataman
Ingles na salitang di naman salita ng bayan
kaya nagbabalita'y meron ding pananagutan

mga ulat nila'y di ipinaunawang mabuti
na epekto ng "storm surge" ay tulad ng tsunami
disin dana'y umalis agad ang tao sa Leyte,
Samar, at sa mga lalawigan nitong katabi

sana'y nagawan ng paraan ang problemang banta
sana'y nakalikas din sa matataas ang madla
sana taumbayan ay agad na nakapaghanda
sana'y maraming buhay ang nasagip, di nawala

mamamahayag sana'y nagpaliwanag ng husto
bago pa dumating ang kinatakutang delubyo
"storm surge" ay di rin pala alam ng mga ito
kaya di nalahad ang matindi nitong epekto

ganito rin ang mga syentipiko ng PAGASA
"storm surge" ay di na naipaliwanag sa masa
sa mga namatay, may pananagutan din sila
kundi mananagot, bahala na yaong konsensya

sa mga susunod na kalamida na ganito
na alam nilang sa bansa'y malaki ang epekto
ipaliwanag nilang maigi sa mga tao
at upang makapaghanda naman sila ng wasto

Kartilya ng Mabuting Loob

KARTILYA NG MABUTING LOOB
ni Gregorio V. Bituin Jr.
14 pantig bawat taludtod

pawang kasapi sila / ng bunying Katipunan

na gabay ang Kartilya, / mabuting kalooban

buhay na di ginugol / sa banal na dahilan

kahoy na walang lilim, / buhay na sayang lamang.

kung pawang pansarili / yaong nasasaloob

di pakikipagkapwa / sa puso'y nakalukob

paano na ang iba / kung ang nakakubakob

sariling ginhawa lang / ang sa kanya'y marubdob.

Kartilya'y mahalaga, / gabay sa pagkatao

sadyang Katwiran yaong / nangungusap sa iyo

ipagtanggol ang api, / kapwa'y paglingkuran mo

at sa lahat ay dapat / pantay-pantay ang trato.

ang kabanalang tunay / ay pagkakawanggawa

lalo pang mahalaga'y / ang pag-ibig sa kapwa

at sa taong may hiya, / salita'y panunumpa

ang loob ay linisin / nang di maging kuhila.

naghihimagsik tayo / laban sa kasamaan

at ipinaglalaban / ang talagang Katwiran

dapat taglayin nati'y / mabuting kalooban

upang di mapahamak / ang kapwa, uri't bayan.

namnamin nating buo / yaring Kartilyang ito

bilang gabay ng ating / buhay at pagkatao

kung tamaan man kita / ng problema't delubyo

ay nakatindig pa rin / tayo nang taas-noo.

Prinsipyo'y tatanganan, mamatay man sa gutom

PRINSIPYO'Y TATANGANAN, MAMATAY MAN SA GUTOM
ni Gregorio V. Bituin Jr.
14 pantig bawat taludtod

aktibismo'y pinasok at prinsipyo'y niyakap
lipunang sosyalismo'y agad na pinangarap
nais itong makamtan kaya nagsusumikap
upang uri't ang masa'y matapunan ng lingap.

kahit walang alawans, pultaym pa ring kumilos
nasa lansangan pa rin kahit halatang kapos
upang prinsipyong tangan sa masa'y mapatagos
at bulok na sistema'y tuluyan nang magtapos.

sumumpa sa bandila, kaharap ay kasama
na hanggang kamatayan kaming makikibaka
lipuna'y inunawa, kami'y nag-organisa
magkasamang adhika: "Baguhin ang sistema!"

mamatay man sa gutom, prinsipyo'y tatanganan
dangal ng bawat isa'y sadyang pinaglalaban,
obrero'y iniisip, pati masa't ang bayan
upang makamtan yaong ginhawa't kagalingan.

ang mapagsamantala'y marapat nang kalusin
dibdib ng mapang-api'y dapat lamang gibain
lipunang pantay-pantay na inaasam natin
ay dapat nang itayo, sosyalismo'y angkinin.

ang pakikipagkapwa'y tanganan nating buo
kahit yaong prinsipyo'y mabahiran ng dugo
kagalingan ng bayan, laging isasapuso
kahit kaninong hari o amo'y di yuyuko.

300kph ng Yolanda

HIGIT TATLONGDAAN KILOMETRO BAWAT ORAS
ni Gregorio V. Bituin Jr.
15 pantig bawat taludtod

ang tulin ng tumamang unos ay di matingkala
higit tatlongdaang kilometro’y agad dinagsa
bawat oras at naglutangan sa dagat ng baha
ang laksang kamatayang sa mundo nga’y nagpaluha
di malirip, danas ng paglipol animo’y sumpa

pinakamabilis na yaong pagdatal ng unos
sa historya ng mundong sa pusod nito'y tumagos
napit ang laksang kamatayan sa saglit na agos
di agad nakarating ang tulong, kalunos-lunos
kahit na ang pamahalaan ay labis ding kapos

unos nang humupa'y nangawala ang buong bayan
dambuhalang delubyo'y nangwasak ng paliparan
puno'y nabunot, barko'y sumampa sa kabukiran
kotse'y nagpatong-patong, ubos din ang kabahayan
ako'y tulala't kayraming nasawing mamamayan

Ang ulat ng matinding unos na Yolanda

ANG ULAT NG MATINDING UNOS NA YOLANDA
ni Gregorio V. Bituin Jr.
15 pantig bawat taludtod

nakabibigla ang mga kwento sa telebisyon
kayraming nadale nang Tacloban ay dinaluyong
storm surge daw, animo'y tsunami, kaylaking alon
sa ulat, libu-libo raw ang nangasawi roon

Tulong Na Tabang Na Tayo Na Para Sa Tacloban
sa telebisyon mga artista'y nananawagan
tulungan yaong mga nasalantang kababayan
bumili ng t-shirt, bigay-donasyon, mag-ambagan

sa naringgang balita't panawagan ng artista
kalubhaan ng suliranin ay mahihinuha
gumuhong lupa't kamatayan ay nakikinita
paano tayo tutulong sa mga nasalanta

sa telebisyon ay di na ito simpleng palabas
ulat ng naganap ay dagat ng luhang pumitas
sa laksang buhay ng mga kabayang nangautas
noon ay Ondoy, ngayon ay Yolanda ang dinanas

Higit sampung libo umano'y patay sa Yolanda

HIGIT SAMPUNG LIBO UMANO'Y PATAY SA YOLANDA
ni Gregorio V. Bituin Jr.
15 pantig bawat taludtod

MANILA, Philippines (2nd UPDATE) – The provincial government of Leyte said at least 10,000 of its residents were killed by Super Typhoon Yolanda (international codename Haiyan), regional police said on Sunday, November 10.

"We had a meeting last night (Saturday, November 9) with the governor and based on the government's estimates, initially there are 10,000 casualties (dead)," Chief Supt Elmer Soria told reporters in Tacloban City, the devastated provincial capital. "About 70 to 80 percent of the houses and structures along the typhoon's path were destroyed."

Reports quoting Tacloban administrator Tecson Lim said the death toll in the city alone “could go up to 10,000.”

http://www.rappler.com/nation/43347-yolanda-death-toll-nov-10-am

higit sampung libong tao'y tinatayang namatay
dahil sa dahas ng bagyo't delubyong humalukay
doon sa pusod ng Tacloban, sa pulo ng Waray
naglatag sa kalsada ang, ah, pagkaraming bangkay

kayhirap isipin kung ikaw mismo'y naroroon
nagunaw na ang mundo't laksa-laksa ang nabaon
tila buong karagatan sa kanila'y lumamon
anong uring poot ang nasa dibdib ni Poseidon

- gregbituinjr.

Pag Bagyo Na'y Sumapit

PAG BAGYO NA'Y SUMAPIT
ni Gregorio V. Bituin Jr.

Pag bagyo na'y sumapit
Tayo nang mangagsikapit
Sa salbabida, bangka't lubid
Dahil dapat nang mag-ebakwet

Nang si Yolanda na'y dumatal
At bumagyo ng gabi’t araw
Maraming kababayan
Ang apektado - bahay at buhay

Pakasuriin ang sanhing tunay
Kung bakit ganito na ang kalikasan
Climate change, GHG emissions
Sa atmospera’y sobra nang tunay.

May mga plano pang coal plants
At mga malalaking dam
Sadyang kayraming isyung
Dapat suriin at pag-usapan

Pag bagyo muli'y sumapit
Totoong solusyon ating igiit
At Climate Justice Now!
Ating ipanawagan sa buong bayan

Pananampal ng tampalasan

PANANAMPAL NG TAMPALASAN
ni Gregorio V. Bituin Jr.
15 pantig bawat taludtod

tampalasan ba ang tawag sa mahilig manampal?
o ang marapat itawag sa kanya'y isang hangal?
ang pagkatao ba niya'y sing-itim ng imburnal?
kaya pananampal ng kapwa'y taal niyang asal?

ngunit bakit ba nanampal ang tampalasang yaon?
sa kapwa'y walang galang, ang nakakamukha'y lukton
ang hilig ay magsaya, maglasing, magtalun-talon
mahilig sa talikuran pagkat bayag ay urong

tila nahiligang manghiram ng tapang sa alak
na pag matino'y di magawa ang masamang balak
sadyang sinisimot pati na ang natirang latak
binabalisawsaw pala minsan ang kanyang utak

magbago na siya, ano pang kanyang hinihintay?
ang lumpuhin siya ng kanyang mga nakaaway?
ang pagkatampalasan niya'y wawakasang tunay
dahil ugali iyong sa pagkatao'y sadyang sablay

Ngalan niya'y Tampalasan

NGALAN NIYA'Y TAMPALASAN
ni Gregorio V. Bituin Jr.
15 pantig bawat taludtod

ngalan niya'y Tampalasan, tampal kasi ng tampal
mabigat ang kamay, kapara niya'y isang hangal
manghihiram ng tapang sa alak, kaygandang asal
mananampal ng kung sino, kahit nasa pedestal
ang katulad niya'y isang leyon pag umatungal
dapat sa kanya'y lagyan ng taumbayan ng busal
itali't ikulong kasama ng baboy sa kural
ngalan niyang Tampalasan ay bumagay sa hangal

Nang manapok ang lango

NANG MANAPOK ANG LANGO
ni Gregorio V. Bituin Jr.
10 pantig bawat taludtod

ang pananapak at pananapok
ay ugali ng sira ang tuktok
kayhilig manakit nitong hayok
ang gawi niya'y di ko maarok

ang katwiran niya, siya'y lango
nang siya'y nagpasirit ng dugo
ng kaibigang kanyang dinuro
dahil lang di nabilhan ng taho

usapin ay kayliit na bagay
bakit agad nagbuhat ng kamay
pang-unawa niya'y bakit sablay?
isip ba niya'y bulok ngang tunay?

ah, kawawang alak, sinisisi
sa kasalanang gawa ng imbi
alak na naroon lang sa bote
ang may gawa imbes na sarili

matindi nga ba ang espiritu
ng ininom na Marka Demonyo
o may topak sadya yaong gago
gawa'y sapok doon, dagok dito

magkakaroon din ng katapat
ang gagong iyang laging pasikat
dugo niya sa lupa'y kakalat
mabait ang sa kanya'y babanat

Altanghap

ALTANGHAP
ni Gregorio V. Bituin Jr.
10 pantig bawat taludtod

nauso ang salitang altanghap
sa pamayanan ng mahihirap

sa isang araw ang kakainin
ay isang beses lang bubunuin

almusal, tanghalian, hapunan
tatlong kaing pinag-isa lamang

di ka naman binagyo sa lungsod
sadya lamang kayhirap kumayod

di naman nasalanta ng unos
ngunit buhay ay parang busabos

pag altanghap ang iyong kinain
para kang nagdidildil ng asin

nagtitiis ka sa dusa't hirap
parang walang kapanga-pangarap

anak ay huwag mong pakainin
ng altanghap kundi kumpletuhin

almusal, tanghalian, hapunan
araw-araw ay tatlong kainan

nang anak mo'y lumaking malusog
tumalino pagkat laging busog

Ang kilusang ito'y atin

ANG KILUSANG ITO'Y ATIN
ni Gregorio V. Bituin Jr.
13 pantig bawat taludtod

pakatandaan, ang kilusang ito'y atin
sa mga naninira'y ipagtanggol natin
isang kilusang may marangal na layunin
upang hirap ay wakasan, ginhawa'y kamtin

ngunit may dalahirang ang kapara'y linta
sa aming pagkilos, wala raw mapapala
mabuting magbenta raw ng laman at lupa
dahil sa kilusan, kami raw ay kawawa

siya'y nagkakamali sa akalang ito
dahil sa adhika kaya kami narito
tatanganan namin ang yakap na prinsipyo
at kilusa'y ipagtatanggol hanggang dulo

ang dalahirang ito'y dapat lang makalos
pagkat pasensya nati'y kanyang inuubos