Pag-ibig sa isang sangre

PAG-IBIG SA ISANG SANGRE
ni Gregorio V. Bituin Jr.
15 pantig bawat taludtod

dinadalaw akong lagi sa aking panaginip
ng larawan mo, Sangre Danaya, sa puso't isip
kung bakit ikaw ang sinisinta'y di ko malirip
ngunit sa puso ko'y ligaya kang kahalukipkip

hanga ako sa iyong galing sa pakikidigma
sa arnis, katunggali'y tiyak kakain ng lupa
anong tamis ng iyong ngiti, mahal kong diwata
kaakit-akit kahit marami kang kasagupa

sa panawagang hustisya'y tunay kang inspirasyon
pagkat magkatugma tayo ng mithi't nilalayon
sa aming mundo'y kayraming dapat tugunang hamon
lalo't pinapaslang akala'y buhay na patapon

atas ng nakaupo'y walang habas na pagpatay
walang paggalang sa karapatang pantao't buhay
at nais din nilang ibalik ang parusang bitay
at ituring na kriminal ang batang walang malay

walang proseso, walang patumanggang karahasan
sa daigdig naming tila walang pagmamahalan
sa mundo mo'y batid kong iyong ipinaglalaban
dapat makatarungang palakad sa mamamayan

isang aktibista't isang diwata'y tumitindig
para sa hustisya't layuning dulot ng pag-ibig
kaya paghanga sa iyo sa puso ko'y pumintig
ikaw, aking diwata, ang nais kong makaniig

pagkat sa pagtudla mo puso ko ang tinamaan
iwing mong ganda't tapang ano't di ko maiwasan
ang prinsipyo't tindig mo'y tunay kong hinahangaan
hangad kong makasama ka, O, diwata kong hirang

ilang bundok ma'y tatawirin ko, Sangre Danaya
karagatan ma'y lalanguyin, makita lang kita
tayo na'y magsama sa anumang pakikibaka
nang kamtin ng ating mundo ang asam na hustisya

* binasa ang tulang ito sa isang kulturang pagtatanghal na pinangunahan ng grupong KAUSAP (Kapatirang Umuugnay sa Sining at Panitikan) na ginanap sa Rizal Park Open Air Auditorium, Pebrero 17, 2017, araw ng Biyernes

Laksang buhay na pinuti

luha'y dahil sa laksang buhay na pinuti
na di makuro bakit dukha'y dinuhagi
patapon daw at nagkalat ang mga labi
maralitang sa lupa na'y nagsilupagi

di madalumat ang dulo ng bahaghari
habang binulay-bulay ang sermon ng pari
naglalaro sa kisame'y laksang butiki
pinupuknat ang putong ng berdugong hari

langaw ay naglalaro sa dalagang binti
nagkakamot ang rilag, di na makangiti
ang madlang umiidolo sa hari'y hati
pagkat sa buhay ay naninindigang sidhi

pagkaisahin na ang kinawawang uri
nang bukangliwayway sa atin ay bumati
halina't ibagsak ang naghaharing imbi
pagkat sistemang bulok ay sila ang sanhi

- gregbituinjr.

Babalik din at babalik ang mga estudyante

BABALIK DIN AT BABALIK ANG MGA ESTUDYANTE
ni Gregorio V. Bituin Jr.
15 pantig bawat taludtod

"The students will come back again and again... and again." ~ Lean Alejandro

patuloy ang mga mag-aaral na prinsipyado
sa pakikibaka taglay ang maraming konsepto
sa pangarap na lipunang tunay na makatao
diktadura'y haharapin humantong man sa dulo

estudyante'y nagsipaglabasan sa pamantasan
pagkat nais nilang paglingkuran ang sambayanan
pinapangarap nila'y pantay-pantay na lipunan
nais nilang lipunang makatao'y ipaglaban

marami pa ring naghihirap sa lungsod at liblib
pagkat diktadura'y patuloy na naninibasib
estudyanteng kumikilos kaharap ay panganib
ang paglingkuran ang bayan sa puso nila'y tigib

nandadaluhong ang burukrata-kapitalismo
magsasaka'y walang lupa dahil sa pyudalismo
patuloy nilang babakahin ang imperyalismo
nang marating ng bayan ang asam na sosyalismo

babalik din at babalik ang mga estudyante
at handang makibaka't yugyugin ang laksang peste
sa bayang dinuhagi ng diktadura't biningi
ng mga hinaing pagkat masa'y di mapakali

Sa pakakaining bibig

amasona siyang sa layon ay kakapitbisig
habang sa kanya ako'y mandirigmang umiibig
ang tinig niring uri'y magkaisa naming dinig
at kapwa kumikilos para sa prinsipyo't tindig
subalit naiisip ko'y pakakaining bibig

- gregbituinjr.

Kaylamig ng gabing ang kayakap ko’y hangin

kaylamig ng gabing ang kayakap ko’y hangin
habang nakatingala sa mga bituin
iwing sinisinta'y inaalala man din
upang panata sa kanya'y lagi kong tupdin

- gregbituinjr.

sa aking musa

o, dilag, nang makilala kita
sabi ko sa sarili: ikaw na
ang makasama ka lang tuwina
ay sadyang tunay ko nang ligaya
pagkat natatangi kitang musa

-gregbituinjr

Saksi ang rebulto ni Ka Popoy sa Marikina

SAKSI ANG REBULTO NI KA POPOY SA MARIKINA

kapitbisig ang nag-aaklasang uring obrero
upang panata nilang dalisayin ang prinsipyo
na tuluy-tuloy ang pagbakbak sa kapitalismo
ay maging ganap at huwag mahulog sa rahuyo
ng animo'y nagkikislapang tanso ng negosyo

naghahanda sa laban ang hukbong mapagpalaya
naroroon at nagmartsa ang mga manggagawa
habang nangingilid ang tinig ng kinakawawa
isinisigaw ang adhika't sosyalistang diwa
nang sa pakikibaka'y samahan sila ng madla

at kumukulo pa ang poot sa dibdib ng masa
na kung uunawain lamang sila'y makikita
upang bulok na sistema'y palita, sigaw nila
saksi ang rebulto ni Ka Popoy sa Marikina
sa kanilang pagkilos upang alpasan ang dusa

pulang-pula ang lansangan, kamao'y nakataas
pulu-pulutong laban sa sistemang anong dahas
nagkukulay-dugo ang silanganing nilalandas
upang itindig ang lipunang ang lahat ay patas
kapitbisig ang obrero bulsa man nila'y butas

- gregbituinjr.

* ang litrato ay mula sa fb ni MELF Feds

Ang matagumpay na Himagsikang Edsa 1986

ANG MATAGUMPAY NA HIMAGSIKANG EDSA 1986
Tula ni Gregorio V. Bituin Jr.

1
ispontanyong damdamin ang nagpakilos sa bayan
upang patalsikin na ang diktador na gahaman
sa laksang galit, nais lumaya ng sambayanan
sama-samang kumilos sa ngalan ng katarungan

2
ilang dekadang lumipas, nagka-martial law noon
bawal kang manuligsa, tahimik ng ilang taon
masa'y naghirap, sa balita'y umuunlad iyon
nangutang ang diktador, hanggang bayan ay nabaon

3
ang dinanas nilang diktadurya animo'y sumpa
mga lumaban ay dinahas, pamilya'y lumuha
karapatan ay niyurakan, laksa'y nangawala
kayraming di nakita, ibinaon ba sa lupa?

4
kayraming institusyong sinara tulad ng midya
matindi ang paggawa ng mga imprastraktura
hawak sa leeg ang batasan at hudikatura
hanggang baya'y yanigin ng welga sa La Tondeña

5
mga manggagawa'y nagtagumpay sa pag-aaklas
ngunit sa maraming lugar ay patuloy ang dahas
kung ano ang nais ng diktador, siya ang batas
tila di alam ng rehimen kung ano ang patas

6
patuloy ang pamamayagpag ng tusong diktador
sa mga kalaban ay pangunahing kumpiskador
hanggang mapaslang sa tarmak ang kalabang Senador
na umuwi ng bansang ang dala'y dangal at balor

7
nagising ang bayan, madla'y nagprotesta't kumilos
nagkaisa ang mayayaman at naghihikahos
nais nilang lupit ng diktadura na'y matapos
hanggang bagong halalan ay pinatawag ni Marcos

8
ang diktador ay muling kumandidatong pangulo
kanyang kalaban ay ang balo ni Ninoy Aquino
inilunsad ang halalan, laksang tao'y bumoto
sa Comelec, si Marcos ang deklaradong panalo

9
ngunit sa Namfrel, si Cory Aquino ang nagwagi
siya ang sa puso ng masa'y agad nanatili
pagnanasa ng bayan sa pagbabago'y masidhi
ngunit pagnanasang ito'y hindi naging madali

10
oposisyo'y nanawagan ng malawakang boykot
huwag tangkilikin ang mga crony at kurakot
hanggang sina Enrile at Ramos ay pumalaot
sa EDSA, kumalas kay Marcos, suporta'y hinakot

11
nais ng diktador na si Marcos na sila'y dakpin
ngunit nanawagan ng suporta si Cardinal Sin
tao'y nagdagsaan sa EDSA, may dalang pagkain
gamot, tubig, mga taong may pangarap na angkin

12
kasama ko noon si ama at kanyang barkada
upang mamigay ng maraming pandesal sa EDSA
dumagsa ang tao, tangke, sundalo, madre, masa
tila nagmamahalan bawat isa't nagkaisa

13
at si Cory Aquino bilang pangulo'y nanumpa
kinagabihan, si Marcos na'y umalis ng bansa
naitaboy na ng bayan ang nanagasang sigwa
at ang unos na yumurak sa bayan ay nawala

14
nagtagumpay ang nagkakaisang bayan sa mithi
diktador ay lumayas, sa bansa'y di nanatili
sa buong mundo, ginawa ng Pinoy ay pinuri
at ito sa rebolusyon ng ibang bansa'y binhi

- 7 Pebrero 2017, Lungsod Quezon

Naging halimbawa sa mamamayan ng daigdig ang Pag-aalsang Edsa noong 1986 na nagpatalsik kay Marcos. Nasundan ito ng Singing Revolution sa Estonia, Latvia at Lithuania (1988), Pagbagsak ng Berlin Wall sa Germany (1989), Velvet Revolution sa Czechoslovakia (1989), Bulldozer Revolution sa Yugoslavia (2000), Pag-aalsang Edsa 2 sa Pilipinas (2001), Rose Revolution sa Georgia (2003), Orange Revolution sa Ukraine (2004), Cedar Revolution sa Lebanon (2005), Tulip Revolution sa Kyrgystan (2005), Jasmine Revolution sa Tunisia (2011), at Day of Anger Revolution sa Egypt (2011). Ngunit may mga pagkatalo rin, tulad ng 8888 Uprising sa Burma (1988), Tiananmen Students Protest sa Tsina (1989), Edsa 3 Urban Poor Revolution sa Pilipinas (2001), at Saffron Revolution sa Burma (2007). Tunay na naging inspirasyon ng mamamayan ng mundo ang Edsa People Power Revolution ng 1986.

Sariwain ang kagitingan ni Ka Popoy

sariwain ang kagitingan ni Ka Popoy Lagman
elitistang paghahari'y dapat nating labanan
lalo't banta ng pasismo ng estado'y nariyan
na maaaring magdulot ng laksang kamatayan

ang pamana ni Ka Popoy sa uring manggagawa
ay mga dalisay na aral na sadyang dakila
anya'y organisahin ang hukbong mapagpalaya
pagtayo ng sosyalistang lipunan ay ihanda

dapat nang durugin ang elitistang paghahari
silang sakim sa lupain, pribadong pag-aari
lalo't nasa pamahalaan din silang tiwali
ito sa laksang dukha'y tunay na nakamumuhi

mahigpit nating tinutuligsa ang pamamaslang
ng bagong gobyernong kayraming buhay na inutang
laksang inosente'y binulagta dahil tinokbang
banta ng pasismo'y naging binhi sa lupang tigang

paninibasib ng kapitalismo'y nasa rurok
kaya ang lipunang ito'y sinawi't inuuk-ok
sigaw ng madla: baguhin na ang sistemang bulok
at mga walang pag-aari'y ilagay sa tuktok

- tula’t litrato ni gregbituinjr. / 020617

Ang kailangan

ANG KAILANGAN

kailangan mo'y taong turing sa iyo'y tahanan
di yaong pag bagyo'y tumila agad kang iiwan
di yaong hahayaan kang malugmok sa putikan

kailangan mo'y isang dalagang sadyang mahinhin
kahit na di ginto ang pustiso ng kanyang ngipin
ang mahalaga'y iniibig ka niyang taimtim

kailangan mo ang isang tunay na kaibigan
na iyong maaasahan di lang sa kagipitan
kundi sa pagbaka upang baguhin ang lipunan

kailangan mo'y misis na ina ng iyong anak
kahit na ang mukha niya't kutis ay lubak-lubak
mahalaga'y mahal ka't di ka ipinapahamak

di mo kinakailangan ang maraming kalaban
pagkat nasa isip mo'y paano susolusyonan
ang pinagsusuong na laksa-laksang kagipitan

- gregbituinjr.

Pagninilay ng isang dukha sa Kalye Mayaman

PAGNINILAY NG ISANG DUKHA SA KALYE MAYAMAN

bakit sa bayan ko'y kayrami nang naghihikahos
umunlad ang iilan, mayorya'y buhay-busabos
may pagkakataon bang guminhawa't makaraos
ang dukhang nagdurusa, sawi’t laging kinakapos

bakit turing ng marami, iyang dukha'y pusakal
habang sa iba, tila banal ang trapong kriminal
bakit asal ng ilan, mabaho pa sa imburnal
at sa iba pagpapakatao’y dapat na asal

bakit di binabayarang tama ang manggagawa
kaybaba ng presyo ng kanilang lakas-paggawa
bakit tinatanggalan ng bahay ang mga dukha
pinapalayas sa lungsod na tila baga daga

dama mong sistemang bulok ay tigib ng pasakit
kailangang mag-aklas kahit nais mong pumikit
upang pansamantalang di masilayan ang lupit
ng sistemang kayraming ginhawang ipinagkait

- tula’t litrato ni gregbituinjr.

Sa sinisinta kong sangre

SA SINISINTA KONG SANGRE

inaabangan kang lagi sa aking panaginip
upang sambahin ka, Danaya, ng puso ko't isip
kung bakit ikaw ang inibig ay di ko malirip
ngunit ligaya kita't puso'y ikaw ang nahagip

hanga ako sa iyong galing sa pakikidigma
sa arnis, kalaban ay tiyak kakain ng lupa
sadyang kaytamis ng ngiti mo, magandang diwata
habang tunay akong naakit sa iyong pagtudla

pagkat sa pagtudla mo puso ko ang tinamaan
habang iwing ganda mo'y ano't di ko maiwasan
magkaiba man tayo ng mundong kinalalagyan
hangad kong makaisang-dibdib ka, diwatang hirang

ilang bundok ma'y tatawirin ko, Sangre Danaya
dagat man ay lalanguyin ko, makita lang kita
iwing buhay ko man ay tigib ng siphayo't dusa
gagawin ang lahat pagkat ikaw ang aking musa

- gregbituinjr.

Tarabangan kitang gabos, tulungan tayong lahat

TARABANGAN KITANG GABOS, TULUNGAN TAYONG LAHAT

doon sa Kabikulan ay dumatal yaong unos
kapaskuhan pa noon nang unos ay nanghambalos
nanalasa ang bagyong Nina, kayraming pinulbos
tulad ng bahay nila’t pananim, sila’y kinapos
tulungan tayong lahat, tarabangan kitang gabos

kabuhayan ay nasira, bahay at puso'y warat
pinagkukunan ng pagkain ay nadaleng lahat
si Nina'y kaylupit, ngitngit niya'y di madalumat
kaya marapat lang na tayo’y sumaklolong sukat
tarabangan kitang gabos, tulungan tayong lahat

habang nakatitig sa kawalan ang tagaroon
naisip kong kalagayan nila'y saan hahantong
sila'y matatag, alam nila paano susulong
silang sinalanta ni Nina'y tiyak na babangon
tarabangan kitang gabos, lahat tayo'y magtulong

sa mga nangyari, luha mo'y tiyak mangingilid
tila di mawari kung bughaw pa ang himpapawid
dapat tayong magtulungan bilang magkakapatid
sa pagkakaisa'y malalagpasan ang balakid
at sa kanila panibagong pag-asa'y ihatid

- gregbituinjr.

Malago na naman ang aking mga kuko

MALAGO NA NAMAN ANG AKING MGA KUKO

malago na naman ang aking mga kuko
nawawala ang nailcutter, hanap-hanap ko
dapat nang putulin, habang-haba na ako
baka kuko'y maging singhaba ng martilyo!

sa nawawalang nailcutter ay nahahapis
nahan na? ako'y tuliro't naghihinagpis
putulin na't nag-aalala akong labis
at baka kuko'y maging singhaba ng lapis!

saan napalagay ang nailcutter at wala
ang nanghiram kaya'y manggagawa o dukha?
pagkawala ba nito'y isa kayang sumpa?
sapagkat may-ari ng kuko'y hampaslupa?

nagdaramdam na ang aking mga daliri
di ko raw pansin ang kanilang mga hikbi
kukong mahaba'y ayaw nilang manatili
"putulin ito" ang sa labi'y namutawi

"Inay, Inay, ang nailcutter ba'y nasaan?
Sapagkat aking kuko po'y naghahabaan."
"Naku, anak, tiis muna't nasa hiraman
Bukas pa raw ibabalik ng iyong pinsan!"

ang agam-agam ko'y nilunod sa lambanog
nang mata'y napagod agad na nakatulog
pinanaginipan ang adhikang kaytayog
bumalikwas nang may nailcutter na nahulog

- gregbituinjr.

Nilay sa paglalakbay

NILAY SA PAGLALAKBAY
ni Gregorio V. Bituin Jr.
15 pantig bawat taludtod

sa pangingibang-bansa'y sumakay ng salipawpaw
sa unang sakay aking ligaya'y di magkamayaw
sabik sa kalangitan, ulap ay katabi't tanaw
ang tulin ng sasakyan ay di ramdam ang paghataw

sa bansa ng sakang ay nakaanim akong buwan
upang doon ay magdalubaral ng dagisikan
nangibang-bansa muli dalawang siglong nagdaan
para daluhan ang kumperensya sa dating Siam

bumalik roon tatlong taon pa ang nakalipas
dalawang linggo sa Mae Sot, sa Burma'y isang oras
apat kaming doon sa salipawpaw nagsiangkas
at nakipag-ugnayan sa ang nasa'y bansang patas

tatlong taong nakalipas, muli akong lumipad
dumalo sa Roma hanggang Paris na paglalakad
mula Lyon sumama, doon prinsipyo'y tumingkad
nangyari sa Yolanda, sa Paris ay inilahad

di ko alam kung makapangingibang-bansa muli
subalit gawain ay pinag-iigihang sidhi
nagsisikap at tigib ng pagbabakasakali
nang makasama sa proyektong may mabuting sanhi

* salipawpaw - Tagalog sa Kinastilang eroplano
* dalubaral - Tagalog sa Ingles na scholarship
* dagisikan - Tagalog sa Kinastilang elektronika

Tula

TULA

kay Balagtas ang "Florante at Laura"
kay Amado V. Hernandez ang "Masa"
"Ako ang Daigdig" kay Abadilla
"modernismo" naman kay Rio Alma
kay Bituin naman ay "sosyalista"

- gregbituinjr.

Sa magsisipagtapos sa Speakers Training Workshop

SA MAGSISIPAGTAPOS SA SPEAKERS TRAINING WORKSHOP
ni Gregorio V. Bituin Jr.
15 pantig bawat taludtod

Pagpupugay sa magsisipagtapos sa palihan
Hinggil sa pagtatalumpati sa harap ng bayan
Hinggil sa pagbabahagi ng inyong kaisipan
At magtalumpati hinggil sa isyung panlipunan

Maraming salamat din po sa inyong naging guro
Na nagbigay-kaalaman, mabisang pagtuturo
Nadama man sa talumpati'y saya o siphayo
Sa harap ng madla'y di na nanginginig o dungo

Galit man, malinaw na nakikipagtalastasan
Masaya't malungkot man, nakatindig ng mataman
Di naliligaw, nakapokus sa tema't usapan
Tiyak magiging orador sa buong sambayanan

Ang diwa ng uring manggagawa'y bigyan ng diin
Sa pagtatalumpati'y anong paksang sasabihin
Pagtatanggol sa manggagawa'y unang isisipin
Habang nasa diwa, obrero'y pagkakaisahin

Mabuhay kayong sa palihang ito'y magtatapos
Busog na sa kaalaman, di kayo kinakapos
Tandaan lamang na huwag kalimutang pumokus
Nang talumpati nyo sa puso ng madla'y tumagos.

- binigkas sa pagtatapos ng tatlong araw na Speakers Training Workshop para sa mga lider-manggagawa at kasapi ng unyon, Enero 15, 2017

Nang pumutok ang tingga

nang pumutok ang tingga
tinamaan ang bata
na agad bumulagta
ang ina'y lumuluha
sa puso'y kinakapa
may hustisya pa kaya

- gregbituinjr.

Isang tula hinggil sa bagong kalendaryo

sa lumang kalendaryo'y nakatunganga

bagong taon, bagong kalendaryo'y wala

hanggang sa aking maisipang lumikha

ng isang kalendaryong pangmanggagawa

kaya disenyong ito'y agad ginawa

- gregbituinjr.

Ang aso sa Oro

nagprotesta sila pagkat pinaslang daw ay aso
kaya ipinagbawal na ang pelikulang "Oro"
nagprotesta kaya sila nang pinaslang na'y tao?
kaya ipagbawal din ang nag-utos na pangulo?

pelikulang Oro'y di raw magandang halimbawa
pagkat pumatay ng isang asong kaawa-awa
ang panonokhang ba'y isang mabuting halimbawa
gayong pinapaslang na'y ang mga dukhang kawawa

asong pinaslang sa pelikula'y anong kaibhan
sa taong pinaslang, itinapon kung saan-saan
totoo namang aso'y may karapatan din naman
lalo na ang bawat taong sadyang may karapatan

nang aso'y pinaslang, pelikulang Oro'y sinara!
nang tao'y pinaslang, Malakanyang ba'y napasara?

- gregbituinjr.

Tinokbang na ang kawawa

itinuloy na ang banta
tinokbang na ang kawawa
umalingawngaw ang tingga
toktok, bang!bang! bumulagta

saksi maging mga pusa
sa pagtimbuwang sa lupa
ng mga biktimang dukha
lupang tigang ay nabasa

dukha na'y inupasala
dangal pa'y binalewala
buhay pa nila'y winala
sa prosesong di na tugma

ang mga ina’y lumuha
at kayraming natulala
kaya ang tanong ng madla
hustisya'y kamtin pa kaya

- gregbituinjr.

Natapos din ang putukan sa Bagong Taon

nag-Bagong Taon na't natapos na rin ang putukan
habang putukan ay lipana ng anim na buwan
nakaraang tigib ng dahas, lungkot at patayan
tila pumapaslang lang ng daga sa talahiban

ilan kaya’y nagsikatha ng bagong resolusyon
na karapatang pantao'y igagalang din ngayon
na kikilos lang ayon sa mabuting puso’t layon
at tiyak tatangging masagpang ng pangil ng leyon

tulad ng langay-langayan doon sa himpapawid
na di papayag na madagit ng agilang ganid
malayang lumilipad sa amihan habang batid
na may kalutasan bawat sulirani’t balakid

irespeto ang karapatang mabuhay ng tao
kung may pagkakasala ay idaan sa proseso
huwag mamimihasang paslang doon, paslang dito
di tayo mga barbaro kundi sibilisado

sumapit ang Bagong Taon, ang dala'y bagong bukas
nawa'y taon ito na lahat ay pumaparehas
subalit kung kinakailangang tayo'y mag-aklas
gawin natin kung sa lahat ito'y magiging patas

- gregbituinjr.

Malungkot ang Pasko ng pamilyang tinokbang

MALUNGKOT ANG PASKO NG PAMILYANG TINOKBANG

biktima sila ng anong lupit na karanasan

sapagkat pamilya'y dinaluhong ng karahasan

mahal sa buhay ay wala sa prosesong pinaslang

kinatok sa bahay, imbitasyon ay naging tambang

operasyong tokhang ay naging tokbang: "tok, tok, bang! bang!"

ngayong Pasko, wala na ang mahal nila sa buhay

malungkot ang kapaskuhan sa kinagisnang bahay

ganun-ganon lang, mahal nila'y basta lang pinatay

walang managot, collateral damage daw ang bangkay

sa digmaang parang ipis kung tirisin ang buhay

at ngayong Pasko, halina't magnilay-nilay tayo

paano bang buhay ay kanilang irerespeto?

igalang pa kaya itong karapatang pantao?

sa sunod na Pasko ba'y asahan pa ring ganito?

mga biktima ba'y may hustisya pang matatamo?

kung tugon nila sa problema'y shortcut, pamamaslang

kung solusyon nila'y pananakot at pananambang

di matalino ang pinuno, isa siyang hunghang

problema'y di kayang malutas, kaya shortcut na lang

kung ganyan ang lider mo, kaluluwa niya'y halang

- tula't litrato ni gregbituinjr.,/122516

Paskung-pasko, kayraming pulubi

PASKONG-PASKO, KAYRAMING PULUBI

naglakad-lakad ako ngayong Kapaskuhan

na dapat dama kahit munting kasiyahan

ngunit kayrami pa ring pulubi sa daan

para bagang ang Pasko'y walang pakialam

gula-gulanit pa rin ang damit ng bata

marusing pa rin ang suot na tila basa

para bagang Pasko'y dinaanan ng sigwa

Paskung-Pasko'y marami pa rin ang kawawa

maglakad-lakad ka ri't maging piping saksi

kahit na kapaskuhan, kayraming pulubi

kagutuman sa bayan ay sadyang kayrami

bakit ganito ang bayan, tanong sa sarili

ang sistemang ito'y mapangyurak sa tao

na serbisyo'y negosyo sa kapitalismo

naglipana ang pulubi kahit na Pasko

kaya dapat palitan ang lipunang ito

Pasko'y isang araw ba ng pananahimik?

at matapos ito'y muling manghihimagsik?!

pangarap na pagbabago'y ating ihasik

hanggang lipunang komunal ay maibalik

- gregbituinjr.,/122516

Nasa pagkakaisa ng manggagawa ang pag-asa

nasa pagkakaisa nitong manggagawa
yaring pag-asa ng buong sangkatauhan
paniwalang ito'y tagos sa puso't diwa
upang kamtin ang pagbabago ng lipunan

panahon man ngayon ng hinagpis at sigwa
dahil sa kabuktutan ng lilong puhunan
ang Pasko'y araw na dapat ding ikatuwa
pagkat may isang araw na dusa'y naibsan

lipunang kapitalista'y kasumpa-sumpa
na yumurak sa dangal nati't katauhan
kaya dapat kamtin ang lipunang malaya
sa salpukan ng makauring tunggalian

uring manggagawa, hukbong mapagpalaya
magbigkis muli't patuloy tayong lumaban
ipanalo natin ang lipunang adhika
ito'y muling panata ngayong kapaskuhan

- gregbituinjr./122516

(nasa larawan ang anyo ng Christmas Card na ipinamamahagi ng Bukluran ng Manggagawang Pilipino)

Huwag kang makikipag-away ngayong Pasko

huwag kang makikipag-away ngayong Pasko
lalo na't ang katunggali mo'y walang modo
dahil baka magkasakitan lamang kayo
magpasensya ka't wala pang sakit ng ulo

ngayong Pasko'y huwag kang makikipag-alit
at baka isa sa inyo'y makapanakit
unawain mo na lang, huwag magagalit
at baka pa makapatay ang iyong ngitngit

ngayong Pasko'y pagpasensyahan na lang sila
baka kaya nang-away, kayraming problema
baka ang pasko nila'y tuyo't walang pera
di na nila alam kung paano sumaya

ngayong Pasko'y panahon ng pagbibigayan
kahit na ang buong taon ay kahirapan
isang araw man ay damhin ang kasiyahan
kahit isang araw lang, walang kaalitan

- gregbituinjr./122516

Paano bang tumula kung loob ko'y pulos galit

paano bang tumula kung loob ko'y pulos galit
makatula pa kaya kung pulos poot ang dibdib
paano ba ilalarawan ang sanlaksang lupit
na halos magpasabog na sa pusong sinibasib
ng paglinlang, pagpaslang, sa inosente'y pagligpit

paano itula ang mga nagkalat na bangkay
lalo't malalaman mong yaong biktima'y hinalay
di lamang katawan kundi pagkatao'y niluray
di na iginagalang ang karapatang mabuhay
ang pinaggagawa nila'y pumatay nang pumatay

paano itula ang nararanasang pagyurak
sa dignidad ng tao't mga dukha'y hinahamak
di na nag-isip, basta sundin ang pangulong utak
sa ngalan daw ng seguridad, kalsada'y tinigmak
ng dugo, animo'y naglaway sa dugo ang parak

paano bang tumula kung dibdib ko'y pulos poot
dahil di malutas ang mga krimen at sigalot
pagpaslang lang ang kayang gawin ng ngayon ay salot
sa mga pagpaslang, paano na sila lulusot
sa nangyayari'y mayroon ka bang maisasagot

- gregbituinjr.

Pagdurog sa durugista

PAGDUROG SA DURUGISTA

Philippine President Rodrigo Duterte: "My campaign against drugs will not stop until the end of my term... until the last pusher and the last drug lord (is killed)." 

ramdam ng mamamayan ang takot

sa panahong ligalig ang dulot

dahil sa polisiyang nakasaklot

sa kalsada'y lagim ang bumalot

napakarami nang napapaslang

na kabataan, na mamamayan

dahil nais ng pamahalaan

durugista'y mawalang tuluyan

pangulo mismo ang nagdidikta

hanggang sa kanyang huling hininga

paslangin lahat ng durugista

para sa kaligtasan ng masa?

ngunit ano ang tamang proseso?

sugurin sa pinugaran nito?

pagbabarilin ang mga ito?

ang ganyan ba ang prosesong wasto?

balang araw, hustisya'y hihingin

gobyerno'y kanilang sisingilin

katarungan sana'y maihain

sa pamilya ng gawang rimarim

- gregbituinjr.

Kabilugan ng buwang

KABILUGAN NG BUWANG

saksi ang bayan sa kayraming nagsipagtimbuwang
laksang sugapa ang inasinta't pinagpapaslang
at pinapula sa dugo ang dukha't lupang tigang
kayraming tokhang ang naging tokbang, toktoktok, bangbang!

sa utak ng pinuno'y lagi raw umuukilkil
ang "ginintuang" layunin at katagang "Kill! Kill! Kill!"
proseso't karapatang pantao'y sadyang sinikil
parang pumapatay lang ng ipis ang mga sutil

iyon daw ang panahon ng kabilugan ng buwang
binilog ng pinuno ang ulo ng mga hibang
masa'y nilinlang at naging tagapanood lamang
kahit pagpaslang sa araw at gabi'y walang patlang

dapat alpasan ng bayan ang hipnosis na ito
nang mabigyang pansin ang bawat buhay, bawat tao

- gregbituinjr.

Pagkalugmok

PAGKALUGMOK

Umaalingasaw ang paligid
Nag-amoy dugo ang lansangan
Pinapaslang ka na'y di batid
Kayhapdi ng hanging amihan

Paano kung walang proseso
Tinanggalan ng karapatan
Ang biniktima'y kapatid mo
O di kaya'y malayong pinsan

Laksa'y naging tagapanood
May pakiramdam ba ang bayan?
Kayraming sa dugo nalunod
Nakiramdam lang ba ang bayan?

Sa droga'y kayraming nalulong
Sa pagpaslang daming naburyong

- gregbituinjr.