Mga Sampa sa Dyip

MGA SAMPA SA DYIP

ni Gregorio V. Bituin Jr.

sumasampa sa dyip ang batang lansangan

marungis, marusing,

lalamunan niya'y tila walang laman

lahad ang kamay na tila naglalambing

magsisiyuko na't agad pupunasan

ang mga sapatos

sila'y nagbabaka-sakaling lang namang

makakakain na, munti man ang limos

ngunit kadalasan, siya'y binubugaw

na para bang daga

tila walang lugar sa mundong ibabaw

yaong tulad niyang inampon ng luha

Lubid sa Leeg ng Kapital

LUBID SA LEEG NG KAPITAL

ni Gregorio V. Bituin Jr.

11 pantig bawat taludtod

kailan ba bibigtihing tuluyan

iyang leeg ng pagsasamantala

upang balang araw di na magisnan

ang kabulukang ito ng sistema

halina't ihanda natin ang lubid

na pambigti sa mapagsamantala

at walang pakiramdam sa kapatid

kahit ang mga ito'y nagdurusa

Ang Gatla

ANG GATLA

ni Gregorio V. Bituin Jr.

11 pantig bawat taludtod

Mukha'y maaliwalas at sariwa

Ang magandang ngiti'y nakahahawa

Dalaga'y samba ng mga binata

Tila diyosang biyaya ni Bathala

Binabago ng panahon ang mukha

Ang dating ganda'y tila nawawala

Pinalalim ng panahon ang gatla

Na nagpatunay sa gawang dakila

Akala ng iba, gatla ay sumpa

Sa itinuturing na hampaslupa

O sa may malaking pagkakasala

At di dahil sa gawang mapagpala

Iyang pakahulugan nila'y bula

Pagkat di nagsuri, at balewala

Gatla'y di dahil sa sumpa at sala

Kundi iyan ay tanda ng pagtanda

Ampiyas sa Gitna ng Unos

AMPIYAS SA GITNA NG UNOS

ni Gregorio V. Bituin Jr.

11 pantig bawat taludtod

huwag mong katakutan ang ampiyas

dahil iyan naman ay tikatik lang

munti lang ang basa sa iyong manggas

bintana naman ang magsasanggalang

mula sa unos patungo sa landas

ng pagbabago ng lumang lipunan

nabubuntis ang diwa sa ampiyas

ng talinghagang minsan mabitiwan

ng makatang di nag-ahit ng balbas

katulad ng isang batang lansangan

habang patuloy ang unos sa landas

ng sementado't aspaltadong daan

unos man ay palakas ng palakas

haraya'y masigabong naglabasan

sinasalo ng bisig ang ampiyas

na nagpaginaw sa bisig at laman

habang naglalabasan yaong katas

ng malikhaing tulang kainaman

Daluyong sa Sendai

DALUYONG SA SENDAI

ni Gregorio V. Bituin Jr.

13 pantig bawat taludtod

mga barko'y dinuyan-duyan ng daluyong

naglutangan sa dagat na tila kabaong

saglit lang, kaligtasan ang ibinubulong

ng munting bayan sa malayong bansang iyon

pagkalaking lindol ang umuga sa bayan

at pagkatapos noon ay tsunami naman

gusali'y wasak, baha sa mga lansangan

masa'y nagulantang, mukha'y nahintakutan

sinapit nila'y mas matindi pa sa Ondoy

nilindol na'y tsunami pa ang isinaboy

ganti ba ito ng kalikasang binaboy

tila sa sariling bayan na'y itinaboy

napuruhan sa bayang Miragi ang Sendai

kung saan maraming naglaho't nangamatay

sama-samang bahay at buhay ang tinangay

mga nangaligtas ay sakbibi ng lumbay

Katapusan (?)

KATAPUSAN (?)

ni Gregorio V. Bituin Jr.

11 pantig bawat taludtod

lindol, tsunami, buhay, kamatayan

libu-libong tao ang tinamaan

libu-libo'y nawalan ng tahanan

nawasak ang maraming kasangkapan

nasadlak sa hirap ang mayayaman

nasadlak sa dusa ang mamamayan

nagwala sa galit ang kalikasan

ang plantang nukleyar na'y tinamaan

radyasyon nito'y kinatatakutan

ano nga ba ang ating kasalanan

lindol, tsunami, buhay, kamatayan

ito ba'y wakas na ng daigdigan

Poem for RH Bill

POEM FOR THE PASSAGE OF RH BILL!

9 syllables per line

Eleven deaths in one day is real!

RH Delay is the one who kill!

Reproductive Health is our will!

Women's choice and health is what we deal!

Let's call for passage of RH Bill!

Ang katawan ng babae'y hindi makina

ANG KATAWAN NG BABAE'Y HINDI MAKINA
ni Gregorio V. Bituin Jr.
13 pantig bawat taludtod

ang katawan ng babae'y hindi makina
na kung kailan mo nais ay pwede siya
tanungin siya kung anumang iyong nasa
hingiin mong lagi ang pagsang-ayon niya

nais ba ng babae ang anak ng anak
na pag ayaw nya'y sasabayan mo ng upak
babae ba'y pagagapangin mo sa lusak
masunod ka lang kahit siya'y mapahamak

babae ang nakatatalos ng sarili
babae ang may alam kung anong mabuti
ramdam niya kung anong maaring mangyari
kaya pag-usapan kung ano ang maigi

huwag mong ituring na siya'y libangan lang
na sa libog mo, siya'y isang parausan
dapat karapatan ng babae'y igalang
siya ang mapagpasya sa kanyang katawan

Ang Nakatarak sa Pusod ng Palawan

ANG NAKATARAK SA PUSOD NG PALAWAN

ni Gregorio V. Bituin Jr.

14 pantig bawat taludtod

Palawan, kalikasan, yaman ng buong bayan

Ano't ito'y wawasakin ng mga minahan

Tila walang pakialam sa kinabukasan

Ng kapwa, ng bayan, ng buhay, ng kalikasan

Lalasunin ng mina ang lupang katutubo

Lalasunin upang kapitalista'y tumubo

Tubo'y nag-udyok kahit Palawan na'y maglaho

Sa tubo'y sakim basta't magpatuloy ang luho

Solusyon ba ang pagmimina sa kahirapan

Bakit ito'y papayagan ng pamahalaan

Nang mapunan ba ang bangkaroteng kabang-yaman

Na halos ubusin ng mga trapong gahaman

Kasama ba ang Palaweños sa pagpapasya

Upang Palawan ay masukol ng pagmimina

Hindi, mga Palaweños ay di isinama

Pagkat batid ng maypakanang tatanggi sila

Sa pusod ng Palawan ngayon na'y nakaumang

Ang matalas na patalim nilang mapanlamang

Nang dahil sa tubo, kanila bang nalalamang

Buhay nati'y wawasakin nilang mga halang

Lalasunin ng pagmimina ang mga tanim

Wawasakin ng mga sakim ang puno't lilim

Gutom, sakit, masa'y mapupunta na sa dilim

Pagkawasak ng Palawan ay ating panimdim

Ang pagmimina'y sadya ngang karima-rimarim

Pagkat idudulot nito sa bayan ay lagim

Huwag nating pabayaan silang mga sakim

Na sa likuran tayo'y tarakan ng patalim

Sa pusod ng Palawan, ang pagmimina'y banta

Sa buhay ng masa, magsasaka't manggagawa

Gawin natin anumang tulong na magagawa

Tulad nitong panawagang sampung milyong lagda

Panukat sa Pagkilos (?)

PANUKAT SA PAGKILOS (?)

ni Gregorio V. Bituin Jr.

15 pantig bawat taludtod

ano ang panukat para masabing kumikilos

ang isang aktibistang sa kahirapan busabos?

mga panukat bang ito'y bakit dapat matalos?

commitment ba sa puso, diwa't bisig niya'y taos?

nag-oorganisa pa ba kahit walang panggastos?

nakikibaka pa ba kahit laging kinakapos?

kasama pa ba sa rali kahit walang pangtustos?

sa kanya ba ideyolohiya'y di nalalaos?

kikilos pa rin ba kahit minsan lang makaraos?

unawa ba bakit karapatan ay binabastos?

bakit ba regular na manggagawa'y inuubos?

bakit ba buhay ng maralita'y kalunos-lunos?

sa pagsusuri sa lipunan ba'y di kinakapos?

nagpaplano bang sakim ay paano mauubos?

iyang kapitalismo ba'y paano makakalos?

gabay ng bawat isa ang panukat sa pagkilos

upang mga plinano'y maisagawang maayos

upang sosyalismo'y ating maipanalong lubos!

Pangarap ng mga Batang Iskwater

PANGARAP NG MGA BATANG ISKWATER

ni Gregorio V. Bituin Jr.

11 pantig bawat taludtod

namamayat sila dahil sa gutom

at nanlilimahid dahil sa hirap

ngunit dusa'y parang di alintana

pagkat patuloy silang nangangarap

tutunguhin nila ang himpapawid

tatawirin ang mga karagatan

sasakyan ang tren kahit malayuan

lalakbayin kahit sampung kabundukan

susubukang sungkitin kahit buwan

kahit sa hangin ay makikiangkas

ngunit pinakamatingkad sa lahat

sila'y magsisipag at magsisikap

maabot lang ang kanilang pangarap

kaya sa kanila'y magtataka ka

akala mo'y di hirap, nagsasaya

nakangiti pa sila kahit gutom

Paglaya ng Tula, Tula ng Paglaya

PAGLAYA NG TULA, TULA NG PAGLAYA

ni Gregorio V. Bituin Jr.

8 pantig bawat taludtod

i.

matagal nang nakabaon

sa maraming henerasyon

sa tugma't sukat nakulong

ang mga tulang umusbong

tula'y paano lalaya

sa mga sukat at tugma

at ano bang mapapala

pag pinalaya ang tula

ii.

dumating din ang panahong

inilunsad ang rebelyon

laban sa tulang kinahon

sa tugma't sukat kinulong

tila sila'y pinagpala

nagtagumpay ang makata

kaya tula ng paglaya

ang ngayon ay kinakatha

Kwento ng isang Dyarista

KWENTO NG ISANG DYARISTA

ni Gregorio V. Bituin Jr.

10 pantig bawat taludtod

Minsan ako'y kanilang binira

Bolpen at papel ko'y kinumpiska

Pati mukha ko'y dinagukan pa

Ako raw naman ay magtigil na

Sa pagsulat laban sa kanila.

At bakit naman ako titigil

Dahil nakatutok na ang baril

Mga ulol, pluma ko'y di pigil

Payag ba naman akong masikil

Ng mga gagong pulos inutil.

Pandarambong sa kaban ng bayan

Patuloy pa ang katiwalian

Manggagawa'y pinagtutubuan

Sa droga'y lulong ang kabataan

Patuloy pa ang mga digmaan.

Balita'y pilit na pinapatay

Paa ng dyarista'y nasa hukay

Pag-uulat ba'y gawaing lumbay

Minamasama'y ulat sa halay

Dapat lang proteksyunan ang buhay.

Ngayon tulad ko'y babantaan pa

Lalagyan ng tingga ang dyarista

Mahiya sila sa balat nila

Patay na ako'y papatayin pa

Hustisya sa masa'y wala na ba?

Sa 'Capitalism' Kapit sa Patalim

SA 'CAPITALISM' KAPIT SA PATALIM

ni Gregorio V. Bituin Jr.

12 pantig bawat taludtod

i

nagtatakang tanong ng isang dayuhan

asking "Why poverty in your country rampant?"

ang agad tugon ko, "it's none of your business

you know Filipinos are just mapagtiis"

"laging nakangiti kahit naghihirap

its as if there's always meron namang lilingap"

tugon ng dayuhan, "your poverty it seems

came from injustices triggered by the system"

"and what systems is that?" agad aking tanong

"it's capitalism, a system that is wrong!"

"it's all about profit, a real system of greed"

kaya aking tugon, "ngayo'y aking batid"

ii

kaya minungkahi ng dayuhang iyon:

"maybe what we need is total revolution!"

"dapat magsibangon", ang agad kong tugon

"na bagong sistema itong nilalayon!"

kaya sinabayan ko siya sa ingles

kahit pa baluktot, upang basic masses

ay hindi na laging sakripisyo't tiis

sa lipunang itong dapat nang malinis

"sa capitalism, kapit sa patalim

the basic masses ay laging nasa dilim

katunayan itong di maililihim

sadyang this system is nakaririmarim"

Ang Tukso ng Kapital

ANG TUKSO NG KAPITAL

ni Gregorio V. Bituin Jr.

9 pantig bawat taludtod

kasalanan bang maging ganid

kung tubo naman ang kapalit

kahit madale pa'y kapatid

basta't tubo'y mahalukipkip

kasalanan bang maging sakim

kaysa buhay ay nasa dilim

anuma'y kanilang gagawin

basta't pagtutubuan pa rin

kasalanan bang maging hangal

sa bawat tukso ng kapital

basta't tumubo'y walang banal

kahit sinuman sinasakmal

tubo na'y pinipintakasi

kahit kapatid dinadale

tila dyablong ngingisi-ngisi

sa tubo ang puso ng imbi

Kapag Di Na Ako Tumula

KAPAG DI NA AKO TUMULA

ni Gregorio V. Bituin Jr.

11 pantig bawat taludtod

kapag inusad ko na itong pluma

tumagaktak ang pawis, walang tinta

pluma'y wala nang buhay, aking sinta

pagkat sa akin ay napawalay ka

bayan, kapag ako'y di na tumula

tandang inspirasyon ko na'y nawala

tandang ako'y di na nagmamakata

tandang pluma ko'y baon na sa lupa

binubuhay lang ng kanyang pag-ibig

ang aking panulat, tayutay, himig

indayog, diwa, dalumat at tindig

sana, sana, ako'y kanya pang dinig

di ko na pagtula'y pagpapaalam

sa sintang pag-ibig ko'y di maparam

hahayo ako doon sa di alam

marahil iyon nga ang mas mainam

Itaas ang Kamao ng Protesta

ITAAS ANG KAMAO NG PROTESTA

ni Gregorio V. Bituin Jr.

14 pantig bawat taludtod

nanggagalaiti na sa galit yaong masa

isinisigaw nila'y "pagbabago, ngayon na!"

habang nakataas ang kamao ng protesta

"ibagsak na ang lahat ng mapagsamantala!

baguhin na natin ang bulok na sistema!"

kamao ng protesta versus kamay na bakal

manggagawa laban sa mga pasistang hangal

maralita laban sa sistemang sadyang brutal

sistemang ang karapatan ay isang kalakal

ang kamaong ito sa mapang-api'y ibuntal

ang kamao ng protesta'y atin nang itaas

tanda ng poot laban sa sistemang marahas

tanda ng galit sa pulitikong balasubas

tanda ng pagkilos nang kabuluka'y magwakas

tandang itatayo'y isang lipunang parehas

Produkto, Benta, Tubo, Kapitalista

PRODUKTO, BENTA, TUBO, KAPITALISTA

ni Gregorio V. Bituin Jr.

11 pantig bawat taludtod

ginagawa ang maraming produkto

ng mga masisipag na obrero

araw-gabi sila'y nagtatrabaho

kamay nila'y pinuno na ng kalyo

ngunit kaybaba ng kanilang sweldo

produkto'y ilalabas ng pabrika

dahil sa atas ng kapitalista

mga likhang produkto'y ibebenta

sa pamilihan nang sila'y kumita

at saangmang sila lang ang kikita

sa isip lagi'y paano tumubo

ang mga nalikhang pantalon, baro

at iba pang produktong halu-halo

wawasakin din kahit mga puno

manggagawa pa nila'y dinuduro

pagkat ganyan silang kapitalista

na tanging layunin nila'y kumita

tubo lang, tubo lang ang nais nila

sa kapwa tao'y walang nadarama

sa obrero'y wala ring nadarama

Bisig, Pawis, Sahod, Manggagawa

BISIG, PAWIS, SAHOD, MANGGAGAWA

ni Gregorio V. Bituin Jr.

10 pantig bawat taludtod

kailangan ng lakas ng bisig

upang sa pabrika'y makakahig

pagkat ang pamilya'y kanyang ibig

na mapakain, di ang mabikig

kaya nagpapatulo ng pawis

nagsisipag siyang labis-labis

sa trabaho siya'y nagtitiis

kahit sa kapitalista'y inis

ayaw niyang laging nakatanghod

sa kawalan gayong may gulugod

sa pabrika siya'y naglilingkod

kapalit ng karampot na sahod

ang tulad niya'y kahanga-hanga

hiling lang niya'y bayarang tama

ang inalay na lakas-paggawa

ng lahat ng kapwa manggagawa

Bahay, Iskwater, Demolisyon, Maralita

BAHAY, ISKWATER, DEMOLISYON, MARALITA

ni Gregorio V. Bituin Jr.

13 pantig bawat taludtod

pabahay ay karapatan ng bawat isa

mula pa ng isilang, dapat may bahay na

ito ang kailangan ng bawat pamilya

sa ama, ina't anak, bahay nga'y ligaya

bagamat doon binubuo ang pangarap

sila'y pawang dukha't tila di nililingap

iskwater sa sariling bayan, naghihirap

tila gobyerno nga'y totoong mapagpanggap

hanggang dumating ang araw ng demolisyon

idedemolis silang walang negosasyon

bara-bara't walang tiyak na relokasyon

kaya saan na sila pupulutin ngayon

may karapatan kahit mga maralita

ngunit bakit sa mundo'y panay ang pagluha

dapat kumilos sila kahit walang-wala

pagkakaisa ang dapat gawin ng dukha

Araw ng mga PU_O

ARAW NG MGA PU_O

ni Gregorio V. Bituin Jr.

araw ng mga puno

tiyakin nating tayo'y magtanim

upang magkaroon pa ng lilim

laban sa init nitong panimdim

nang makapag-isip ng malalim

araw ng mga puto

kaysarap tikman ng puto bumbong

habang nakaupo sa kamagong

at ang sinisinta'y nakakandong

sa tulad niyang paurong-sulong

araw ng mga pugo

naglulundag doon sa kulungan

ang mga pugong nag-aawitan

kayraming itlog na lilimliman

upang maging pugo ring tuluyan

araw ng mga puro

puro na lang ganyan ang hinampo

ng sinisintang ubo ng ubo

kaya uminom ng gamot ito

kahit walang halo't purong-puro

araw ng mga puyo

dahan-dahang sinuklay ang buhok

nang sumunod ang puyo sa tuktok

tandang ang may puyo'y naging tampok

nang kanyang marating yaong rurok

araw ng mga pulo

kayraming pulo sa karagatan

na lumubog na kamakailan

pagkat mga yelo'y nagtunawan

nang klima'y nagbago ng tuluyan

araw ng mga puso

sinisinta ko'y aking minahal

pagkat hangarin ko'y sadyang banal

ngunit ang puso ba niya'y bakal

at di pansin ang puso kong hangal

Ang Diwata ng Makata

ANG DIWATA NG MAKATA

ni Gregorio V. Bituin Jr.

8 pantig bawat taludtod

ikaw ang aking diwata

ako ang iyong makata

magkaiba man ng lungga

iisa ang ating diwa

ikaw ang aking pangarap

ako ang iyong kayakap

ating puso'y magkausap

bawat isa'y nililingap

Titibagin ko ang pader ng iyong mundo

TITIBAGIN KO ANG PADER NG IYONG MUNDO

ni Gregorio V. Bituin Jr.

13 pantig bawat taludtod

kaytagal ko nang sininta ang iyong puso

ngunit nakakulong ka pa sa iyong mundo

kaya pakiramdam ko ngayon ay tuliro

dahil mahal kita'y di ako manlulumo

iyang daigdig mo ba'y iba pa sa akin

o may mundo kang sa aki'y inililihim

ang pagsusumamo ko'y iyo namang dinggin

alam mo namang katapatan ko'y taimtim

malaya kang maglabas-masok sa mundo ko

ngunit bakit piitan mong mundo'y sarado

tibagin ko kaya ang pader ng mundo mo

upang doon din ay maglabas-masok ako

titibagin ko ang pader ng iyong mundo

gamit ang aking pag-ibig na taos-puso

iyan ang gagawin ko't ipinapangako

at sa mundo mo'y mamahalin kitang buo

Prinsipyadong Manunulat

PRINSIPYADONG MANUNULAT

ni Gregorio V. Bituin Jr.

10 pantig bawat taludtod

Prinsipyado akong manunulat

Tungkulin ko sa masa'y mag-ulat

Bawat komentaryo'y bumabanat

Inuupakan sinumang lekat

May nagbantang ako'y mararatrat

Ngunit di na ako maaawat

Magpapatuloy akong susulat

Ng maraming akdang mapagmulat

Totoo lang ang madadalumat

Sa bawat artikulong masulat

Katotohana'y di masusukat

Ngunit masa nama'y mamumulat

Kung may isyu't balitang masilat

Tiyak ito'y agad ikakalat

Hustisya ang aming kasapakat

Upang diwang tulog ay magulat

Kapitalista'y pako, Manggagawa'y martilyo

KAPITALISTA'Y PAKO, MANGGAGAWA'Y MARTILYO
ni Gregorio V. Bituin Jr.
9 na pantig bawat taludtod

ang kapitalista ang pako
ang manggagawa ang martilyo

napakatalas man ng pako
at napakatibay ng dulo

tiyak na di babaon ito
kung di pupukpukin sa ulo

kaya huwag ka nang mahiya
pukpukin mo na, manggagawa
ang kapitalismong kuhila

at ibaon itong tuluyan
sa kangkungan ng kasaysayan
nang mapalitan ang lipunan

dahil sistema'y mababago
mga kapatid na obrero
kung magsisikilos lang kayo

Si Flora Tristan, Lider-Kababaihan

SI FLORA TRISTAN, LIDER-KABABAIHAN

ni Gregorio V. Bituin Jr.

13 pantig bawat taludtod

sahurang pang-aalipin, kung mawakasan

yao'y magpapalaya sa kababaihan

ito ang paniniwala ni Flora Tristan

Pranses, magaling na lider-kababaihan

aktibista't manunulat siyang kaygiting

na modernong peminismo'y tinaguyod din

"The Workers' Union" ang sinulat na magaling

pagtatayo ng unyon ang kanyang hangarin

manggagawa'y mapagkakaisa, aniya

kung solidong unyon ay maoorganisa

karapatan sa paggawa'y pinakilala

pati butaw ng obrero’y minahalaga

kanyang hangad na matipon ang manggagawa

sa tinawag niyang "Palasyo ng Paggawa"

na pagdidiinan ay gawaing pangmadla

sa larangang pulitikal ay maihanda

si Flora'y nabaril, buti't di napuruhan

nang isang Andre Chazal sa kanya'y tumambang

ngunit siya pa'y nagpatuloy sa paglaban

lider-kababaihan siyang anong tapang

ayon pa sa kanya, lalaya lang ang uri

kung babae'y lalaya't di maduduhagi

kaya sosyalismo'y dapat lang ipagwagi

upang bulok na sistema'y di manatili

ginagalawang lipunan ay maaayos

kung babae'y malaya't di binubusabos

babaeng obrero'y organisahing lubos

panawagan niyang ito sa puso'y taos

paglaya ng babae'y kukumpletong ganap

sa inasam niyang sosyalistang pangarap

Flora Tristan, lider na sadyang mapaglingap

istorya niya'y aral na dapat mayakap

* Flora Tristan (7 Abril 1803 sa Paris – 14 Nobyembre 1844 sa Bordeaux, France)

Si Gracchus Babeuf

SI GRACCHUS BABEUF

ni Gregorio V. Bituin Jr.

13 pantig bawat taludtod

Pranses siyang may paniwala sa komunismo

na ang pag-aari'y pantay-pantay sa tao

na siyang batayan ng paglaya sa mundo

isang lipunang magkapatid ang obrero

si Gracchus Babeuf man din ay nangangarap

ng isang lipunang malaya't may paglingap

ngunit nakikita niya'y napakalasap

pagkabigo ng bayan ay di niya matanggap

nais niyang mag-ari ng lupa ang bayan

at sa lupa'y walang mag-aaring sinuman

ani sa lupa'y pantay na pagbahaginan

tamasahin ng lahat ang pinagpaguran

kaya nang lumipas ang Rebolusyong Pranses

pag-organisa sa obrero'y di mabilis

natantong baka ideya niya'y magmintis

kaya diskarte'y binago't nang di magahis

agarang solusyon ang kanilang pinakay

solusyon nila'y Sabwatan ng Pantay-Pantay

layon nilang kapangyarihan ng kaaway

ay kanila nang makuha't mapasakamay

edukasyong diktaduryal ang itatayo

upang sa obrero, komunismo'y ituro

na magandang sistema, kung mapapagtanto

ngunit di natuloy, ang nangyari'y madugo

Sabwatan ng Pantay-Pantay ay inaresto

layon at plano nila'y nawasak ng todo

dinurog ng kaaway ang kanilang grupo

si Gracchus Babeuf, pinugutan ng ulo

pagkilos nila'y unang bugso ng paggawa

paglantad ng kakayahan ng manggagawa

na gobyerno’y maagaw sa mga kuhila

bigo man, saysay niya'y tumatak sa madla

* Sabwatan ng Pantay-Pantay - Conspiracy of Equals

Pagbale

PAGBALE

ni Gregorio V. Bituin Jr.

7 pantig bawat taludtod

bale lagi ng bale

sila ba'y masisisi

pamilya'y nabibingi

sa gutom nawiwili

di pa rin makahuli

kahit isang kanduli

Ang Pagpapasya

ANG PAGPAPASYA
ni Gregorio V. Bituin Jr.
15 pantig bawat taludtod

paano nga ba nagpasya ang isang aktibista
upang taluntunin ang landas ng pakikisangkot
paano ba tayong nagpasyang maging aktibista
at suungin ang pakikibaka ng walang takot

nagpasya akong makisangkot at maging kaisa
dahil sa maraming katanungang hindi masagot
tanong bakit api ang manggagawa't magsasaka
gayong kaysisipag, sa dusa sila'y nababalot

nagpasya akong makisangkot, naging aktibista
dahil sa gobyerno'y kayrami ng mga balakyot
dahil inadhika nating makatulong sa masa
dahil nais nating ituwid ang sistemang buktot

dahil walang pag-aaring lupa ang magsasaka
dahil pati sahod ng obrero'y kinukurakot
dahil maraming pulitikong sadyang walang kwenta
dahil sa labang ito'y di dapat palambot-lambot

ikaw naman, kasama ko, paano ka nagpasya
dahil ba sa isang rali'y isa ka sa hinakot
tambay lang, o nais mo ring baguhin ang sistema
nais naming marinig ang mga kwento mo't sagot

gayunman, salamat sa iyong tamang pagpapasya
makibaka na't magpatuloy sa pakikisangkot
walang iwanan, patuloy tayong mag-organisa
ituwid natin ang sistema't lipunang baluktot

Maralita, Mag-organisa

MARALITA, MAG-ORGANISA

ni Gregorio V. Bituin Jr.

10 pantig bawat taludtod

maralita, tayo'y magkaisa

patuloy tayong mag-organisa

halina't mulatin na ang masa

patungo sa diwang sosyalista

dapat ibagsak ng mga dukha

ang kapitalistang walang awa

sa kanila'y walang mapapala

kundi pulos pasakit at luha

di na tayo dapat matuliro

adhika'y dapat masigurado

tara't magrebolusyon na tayo

ipagtagumpay ang sosyalismo!