Ampon ng Kapayapaan

AMPON NG KAPAYAPAAN
ni Gregorio V. Bituin Jr.
13 pantig bawat taludtod

marami nang natupok ng apoy ng digma
di na makagulapay sa hirap at luha
ngunit umaasam pa ng diwang payapa
at mapigilan na ang digmang mapanira

pamilya'y nangamatay, maraming nasindak
sa salimbayang bala'y gumapang sa lusak
kayraming nawalan ng ama, ina, anak
sa digmaang sadyang sa atin nagpahamak

kaya marami silang nais magpaampon
kung saan may kapayapaang nakakulong
kapayapaang ang paglaya ay paghamon
di sa lakas ng sigaw, kundi ng pagbulong

kailangang mag-usap yaong magkalaban
upang sila-sila ay magkaunawaan
upang iyang digmaang walang katuturan
ay matigil na tungo sa kapayapaan

"magpapaampon kami sa payapang mundo
at lalayo kami sa digmaang magulo,
maari bang kami nama'y pagbigyan ninyo"
sigaw ng mga nadamay sa gerang ito

Tinatawag Kaming Subersibo

TINATAWAG KAMING SUBERSIBO
ni Gregorio V. Bituin Jr.
10 pantig bawat taludtod

tinatawag kaming subersibo
ng maka-elitistang gobyerno
nais daw naming ibagsak ito
gayong ang nais naming totoo
ay isang tunay na pagbabago

subersibo pala kami dahil
ayaw namin ng pulos hilahil
ayaw sa sistemang mapaniil
sa karapatan ay mapanupil
na ninanais naming matigil

tama lang na maging subersibo
para sa kabutihan ng tao
pagkat tayo'y nagiging aktibo
at mapagsuri sa mundong ito
imbes na tayo'y maging pasibo

maging subersibo ba'y masama
gayong ang nasa'y mapagpalaya
tangan nami'y sosyalistang diwa
pagpawi ng uri ang adhika
sa lipunang makamaralita

wasto lamang maging subersibo
kaysa naman ang maging pasibo
na walang pakialam sa isyu
na apektado ang pagkatao
at dangal ng ating kapwa rito

Edsa Tres sa Bangkok

EDSA TRES SA BANGKOK
ni Gregorio V. Bituin Jr.
13 pantig bawat taludtod

manggagawa't maralita doon sa Bangkok
ay nagprotesta laban sa mga dayukdok
na mga elitista at burgesyang bulok
na palakad sa bansa ay sistemang bugok

narindi na rin ang mga dukha sa Thailand
napuno na rin sa galit ang mamamayan
pinakita ng dukha ang kapangyarihan
ng aping mamamayang nagpasyang lumaban

protesta ng dukha'y pamamaraan nila
upang agawin ang gobyerno sa burgesya
ang nais ng maralita'y pagbabago na
nang mapalitan ang bulok nilang sistema

tinawag sila ng madlang pulahang baro
pagkat pula ang suot ng kanilang hukbo
habang katunggali nila'y dilawang baro
na tawag sa mga elitistang maluho

dukha't obrero'y pulahang barong nanguna
niyanig ang sentro ng Bangkok ng protesta
habang ang kalaban nilang dilawang pwersa
sama-sama'y militar, gobyerno't burgesya

pulahang baro'y nais bagong pamumuno
sawang-sawa na raw sila sa nakaupo
ang poot sa dibdib ay tunay ngang namuo
mapang-aping burgesya'y nais nang igupo

mga dukha sa pagkilos nagkakaisa
kahit walang pinunong nag-oorganisa
nakikibaka na ang ordinaryong masa
nakipaglaban mabago lang ang sistema

nagsama-sama ang maraming maralita
nagbigkis-bigkis pati mga manggagawa
nagkaisa silang mapalaya ang bansa
pagkakaisang akala mo'y isang sigwa

katulad rin ito ng nangyaring Edsa Tres
mga dukha sa bansa'y nagkabigkis-bigkis
tila nagkakaisang burgesya'y maalis
sa pamahalaang nais nilang luminis

parehong pagkilos nang dukha'y magkaisa
mga kilos-protestang bukal ng pag-asa
nang makaahon sa kahirapan ang masa
ngunit nadurog ang parehong pag-aalsa

Duguan Pa ang Dilaw na Laso

DUGUAN PA ANG DILAW NA LASO
ni Gregorio V. Bituin Jr.
13 pantig bawat taludtod

sadyang duguan pa rin ang dilaw na laso
di nagmamaliw ang duguang batik nito
kahit na sa bansa'y may bago nang pangulo
may magagawa nga kaya ang isang ito

talagang duguan pa rin ang lasong dilaw
sa dibdib tila naroon pa ang balaraw
nakatarak pa nang di tayo makagalaw
gayong mga obrero sa hustisya'y uhaw

ang lasong dilaw hanggang ngayon ay duguan
at wala pang nananagot sa kahibangan
ng mga pumaslang ng aping mamamayan
ang dulot ng lasong dilaw ay kamatayan

hustisya, hustisya sa mga manggagawa
sa Asyenda Luisitang dulot ay luha
hanggang ngayon marami pa ring manggagawa
ang doon ay nananangis, kinakawawa

Bagong Gobyerno'y Walang Pondo

BAGONG GOBYERNO'Y WALANG PONDO
ni Gregorio V. Bituin Jr.
13 pantig bawat taludtod

walang pera, anang susunod na pangulo
sa kabangyaman ng papalitang gobyerno
napakalaki ng kakulangan sa pondo
tanong namin: ninakaw ba ang mga ito?

mamanahin niyang gobyerno'y walang pera
kinurakot na kaya ng trapong maldita
pera ng bayan ang ginastos sa kampanya?
ito'y karaniwang tanong ng dukhang masa

nakaraang administrasyon ay nag-iwan
ng malaking kakulangan sa kabangyaman
kakulangang ito'y paano ngayon pupunan
maliban sa pangakong buwis tatapalan

kung nasingil lang daw ng tama ng gobyerno
at hindi naibubulsa ang mga pondo
tiyak, budget deficit ay hindi lolobo
ito ang pahayag ni Pangulong Aquino

tulad ng ipinangako noong kampanya
ilan sa tampok sa kanyang mga programa
ay paglaban sa katiwalian ang una
at nang agad matulungang lubos ang masa

"kung walang corrupt, aba'y walang maghihirap"
ayon kay Noynoy na tumalo na kay Erap
bilang pangulo, kaya siya'y nagsisikap
na ang katiwalian ay mawalang ganap

Binuhay Mo Ako, Sinta

BINUHAY MO AKO, SINTA
ni Gregorio V. Bituin Jr.
11 pantig bawat taludtod

dapat namatay na ako noon pa
dahil puso ko'y kaytagal nang patay
ngunit nang ikaw'y masilayan ko na
ano't ramdam ko'y kaysarap mabuhay

puso ko'y unti-unting pumintig
tandang aking buhay ay nagbabalik
binuhay ako ng iyong pag-ibig
gawaran mo sana ako ng halik

namatay kong puso'y biglang nagbangon
nais makalipad, lulukso-lukso
ikaw na nga ang aking inspirasyon
kaypalad ko na sa buhay na ito

sinta ko, binuhay mo akong muli
ikaw sana sa puso ko'y maglagi

Buhay ng Manunulat

BUHAY NG MANUNULAT
ni Gregorio V. Bituin Jr.
11 pantig bawat taludtod

Nung baguhan pa lang akong magsulat
Ako'y agad tutunganga sa papel
Kahit ako'y wala pang isusulat
Habang tangan ko sa kamay ang pinsel

Ngunit nang ako'y maging manunulat
Di na ako tumunganga sa papel
Pagkat binalangkas ang isusulat
Habang nag-iisip wala mang pinsel

Ngayong kaytagal ko nang manunulat
Minsan tutunganga pa rin sa papel
Habang nasa diwa'y isinusulat
At sa kompyuter na ipinapaskel

Nanliligaw o Naliligaw?

NANLILIGAW O NALILIGAW?
ni Gregorio V. Bituin Jr.
13 pantig bawat taludtod

ako nga ba'y nanliligaw o naliligaw
dilag ba'y madadala doon sa batingaw
ng altar sa kasalang di pa matanaw
magtatagumpay ba ako o matutunaw

Pula ang Kulay ng Pag-asa

PULA ANG KULAY NG PAG-ASA
ni Gregorio V. Bituin Jr.
9 pantig bawat taludtod

walang tayong maaasahan
sa nanalong hukbong dilawan
sarili ang nakikinabang
at di ang buong sambayanan

serbisyo nila'y kulang-kulang
habang sila ang yumayaman
serbisyo'y negosyo na lamang
ng mga pulitikong iyan

sa kanila'y wala ang bayan
kundi ang pinagtutubuan
sa kanila'y kawawa lamang
itong ating kinabukasan

ang tangi nating aasahan
ay ang lumalabang pulahan
tunay na kakampi ng bayan
silang babago ng lipunan

pula ang pag-asa ng bayan
pula ang kulay ng paglaban
pula ang ating karangalan
at pula ang paninindigan

Sa Pagkatalo nina Grace Padaca at Among Ed

SA PAGKATALO NINA GRACE PADACA AT AMONG ED
ni Gregorio V. Bituin Jr.
14 pantig bawat taludtod

tatlong taon ang lumipas nang kayo'y nanalo
sa pagka-gobernador diyan sa bayan ninyo
ibinagsak ninyo ang paghahari ng trapo
at sila'y inilampaso ng mga bumoto

kaya sa tatlong taon ninyong panunungkulan
ay maraming nagalit na mga mayayaman
habang pinupuri kayo nitong mamamayan
pagkat kayganda ng rekord na inyong iniwan

ngunit ngayong halalan, kayo na'y di nagwagi
pawang elitista na ang sa inyo'y gumapi
sa bawat halalan, gumagana ang salapi
nandudurog, lumalapa ng sinumang lipi

ngunit huwag damdamin ang inyong pagkatalo
hanga pa rin kami sa mga nagawa ninyo
kayrami pa rin naming naniniwala rito
kaya ituloy nyo ang laban para sa tao

huwag kayong aayaw at naririto kami
patuloy pa rin kayong sa bayan ay magsilbi
halina't ibagsak na ang mga trapong imbi
halina't ibagsak pa ang mga trapong imbi

Noon, Pangulong Marcos, Senador Aquino; Ngayon, Pangulong Aquino, Senador Marcos

NOON, PANGULONG MARCOS, SENADOR AQUINO;
NGAYON, PANGULONG AQUINO, SENADOR MARCOS
ni Gregorio V. Bituin Jr.
14 pantig bawat taludtod

dalawang pamilyang kilala sa kasaysayan
dalawang pamilyang noon pa ay magkalaban
noon, mga ama yaong namuno sa bayan
ngayon, mga anak nila'y pinuno ng bayan

noon, Pangulong Marcos at Senador Aquino
ang isa'y pangulo, ang isa'y kinalaboso
isa'y nakadalawangpung taon sa gobyerno
isa'y namatay sa tarmak, binaril sa ulo

ngayon, Pangulong Aquino at Senador Marcos
labanan ng pamilya'y kailan matatapos
paglilingkod ba nila sa bayan malulubos
o maggagantihan ba sa bayang binusabos

kapalaran ba nila'y magbabagong tuluyan
historya ba'y mauulit sa ibang paraan
patatalsikin si Aquino ng taumbayan
pag pinaslang naman si Marcos sa paliparan

ito'y haka-haka lamang ng makatang aba
nang mapansing pwesto ng mga anak at ama
ay nagbaligtad ngayong kaharap nila'y masa
maaari nga bang magbaligtad ang historya?

hindi ko hinihinging dalawa'y magkasundo
ang nais ko lamang sa isip nila'y tumimo
maglingkod silang totoo ngayong nakaupo
kung ayaw nilang bayan sa kanila'y gumupo

Hindi Dilaw ang Pag-asa

HINDI DILAW ANG PAG-ASA
ni Gregorio V. Bituin Jr.
10 pantig bawat taludtod

ngayong nanalong ulo'y dilawan
siya ba ang ating aasahan
siya ba ang pag-asa ng bayan
at tayo ba'y may patutunguhan

pagbabagong tunay ang hangarin
ng mamamayang inaalipin
ng sistemang nais pang pigain
ang ating lakas-paggawang angkin

walang maaasahan sa dilaw
lalo't kung ulo'y tulad ng bangaw
baka asahan pa'y lutong makaw
at sa dayo tayo pa'y mabugaw

hindi, hindi dilaw ang pag-asa
pagkat ang pag-asa'y nasa pula
pula'y kulay ng pakikibaka
pula ang babago ng sistema

Walang Kapayapaan Hangga't May Uri

WALANG KAPAYAPAAN HANGGA'T MAY URI
(Peace among nations, war between classes)
ni Gregorio V. Bituin Jr.
14 pantig bawat taludtod

maaaring magkaroon ng kapayapaan
kung magkakasundo yaong bansang naglalaban
ngunit di natin kakamtin ang kapayapaan
hangga't may mga uri pa sa sandaigdigan

bansa'y magkakasundo, ang mga uri'y hindi
sa lipunan dapat isang uri ang mapawi
kapayapaan sa bansa'y mapapanatili
ngunit ang mga uri'y laging magkatunggali

kung nais natin ng tunay na kapayapaan
tanggalin natin ang mga uri sa lipunan
dahil hangga't may mga uring naglalabanan
di natin matatamo ang ating inaasam

hangga't may uri sa lipunan, may naaapi
may mga inaalipin at may nang-aapi
sigaw ng mang-aapi sa dukha'y "tsupi! tsupi!"
at sabi ng dukha'y "lintik lang ang walang ganti!"

kung kapayapaan ay nais nating matamo
dapat walang mga uri sa lipunang ito
dapat madurog ang mga sakim at bolero
uring manggagawa'y dapat tuluyang manalo

"kapayapaan ang nais ko," sigaw ng bayan
"isang kapayapaang di tulad ng libingan"
ang nais namin ay tunay na kapayapaan
na ang saligan nito'y hustisyang panlipunan

'For a Cause' at hindi 'For a Cost'

'FOR A CAUSE' at hindi 'FOR A COST'

ni Gregorio V. Bituin Jr.

13 pantig bawat taludtod

kami’y nakibaka di para sa salapi

kundi upang palayain namin ang uri

iligtas itong bayan sa pagkalugami

masa’y sagipin sa burgesyang naghahari

kami’y lumalaban pagka't ito'y 'for a cause'

upang masa'y lumaya sa pagkabusabos

ang aming pakikibaka'y hindi 'for a cost'

na tulad ng halimbawa ng trapong bastos

'for a cause' pagkat ang layunin ay dakila

sa bulok na sistema, masa’y mapalaya

dudurugin ang kapitalistang kuhila

itatayo ang lipunan ng manggagawa

yaong 'for a cost' ay kakampi ng burgesya

nakaluhod sa mga haring elitista

mga tuta ng buwayang kapitalista

at sinasamba’y yaong mapagsamantala

naniniwala kaming uring manggagawa

ang dito sa mundo'y dapat nang mamahala

sila itong bumuhay sa mundo't lumikha

silang may angkin ng bisig na mapagpala

kapangyarihan ng kapitalista'y pilak

na sa bangko't gobyerno'y kanilang inimbak

sa dignidad ng tao, sila ang yumurak

nasa pedestal sila, masa’y nasa lusak

bisig yaong gamit nitong mga obrero

sa pang-araw-araw nilang pagtatrabaho

binubuhay nila ang bayan at gobyerno

ngunit sila pa'y api't kaybaba ng sweldo

'for a cost' mag-isip itong kapitalista

laging nasa isip ay tumubo ang pera

ngunit 'for a cause' kaming mga aktibista

kalayaan ng uri ang prinsipyong dala

pigang-piga na ang manggagawang hikahos

na lakas-paggawa'y laging binubusabos

manggagawa'y dapat nang mag-isip, kumilos

tunggalian ng uri’y sila ang tatapos

tanggalin na sa mapang-api't naghahari

ang pribilehiyong pribadong pag-aari

makibaka't itanghal ang dangal ng uri

at lipunan ng manggagawa'y ipagwagi

Ang Tahimik na Tibak

ANG TAHIMIK NA TIBAK
ni Gregorio V. Bituin Jr.
12 pantig bawat taludtod

hindi lahat ng tibak ay nag-iingay
pag nasa lansangang ang rali ay panay
sa pakikibaka sila ay nagsisikhay
upang makamit ang asam na tagumpay

merong tibak na maingay sa kalsada
meron ding tahimik na nakikibaka
nag-iisip ng tamang estratehiya
pinagninilayan ang wastong taktika

kumikilos siyang kasama ang masa
laya ng masa't uri ang nais nila
paglaya mula sa pagsasamantala
sa sistemang pinairal ng burgesya

minsan kailangang tahimik ang tibak
upang maiwasan niyang mapahamak
upang maituwid ang sistemang lubak
upang ang masa'y di gumapang sa lusak

ang tibak na tahimik sa pagbabasa
ay nagpapakabihasa sa teorya
na armas niya sa pag-oorganisa
sa pagkilos at pagmumulat sa masa

tahimik na tibak ay handang mamatay
pagkat alam niyang handog niya'y buhay
isang paa niya'y naroon sa hukay
habang isa'y hinahakbang sa tagumpay

ang tibak na iyon tatahi-tahimik
ngunit siya pala'y kapara ng lintik
di magsasalita kahit na madikdik
ng mga kalaban mata ma'y tumirik

nakabibingi rin ang katahimikan
lalo't sa dami ng pinagdadaanang
hirap, sakripisyo't pakikipaglaban
upang baguhin ang bulok na lipunan

mag-isa man siya'y alam ang gagawin
upang maipatagos ang simulain
sa masang adhika niyang palayain
siyang mahusay tumupad sa tungkulin

sa tibak na ito'y isang pagpupugay
sa pakikibakang sakbibi ng lumbay
siya'y marespeto't talagang mahusay
ikinikilos ay para sa tagumpay

mananatili siyang maninindigan
siyang laging listo saanmang labanan
siyang taas-noo saanmang larangan
siyang taas-kamaong naninindigan

tibak bang ito'y tahimik ring lilisan?
sa mundong itong kanyang pinag-alayan
ng panahon, pawis, dugo at isipan
nang maitayo'y sosyalistang lipunan

Pagluha ng mga Buwaya sa Katihan

PAGLUHA NG MGA BUWAYA SA KATIHAN
ni Gregorio V. Bituin Jr.
13 pantig bawat taludtod

lumuha ang mga buwaya sa katihan
pumanglaw ang buhay, tila nasa karimlan
nang di manalo sa nakaraang halalan
kung sinong pupwestong hari sa kagubatan

mga buwayang lumuha'y pawang mayaman
silang mga elitista sa kabuhayan
pawang may-ari ng maraming pagawaan
at nag-aari rin ng mga sakahan

nanggigigil silang buwaya sa katihan
nais mabawi ang nagastos sa halalan
nais na pag nakapwesto'y lalong yumaman
at manguna rin sa sistemang kalakalan

mga pagluha nila'y ating pabayaan
pagkat lumuha man ng bato'y, e ano naman
mga buwaya silang walang pakialam
sa taumbayang tunay na nahihirapan

pagluha lang iyan ng buwayang talunan
at di naman magbabago silang gahaman
sila'y dapat lang ibagsak ng taumbayan
nang ang sistema nila'y agad mapalitan

sige, lumuha pa kayong mga gahaman
nararapat lang sa inyo ang mga iyan
kaytagal nyong pinahirapan itong bayan
nararapat lang madurog kayong tuluyan

Sa Mga Nanalong Kawatan

SA MGA NANALONG KAWATAN
ni Gregorio V. Bituin Jr.
12 pantig bawat taludtod

ang mga kawatan ay nagbabalikan
nagtagumpay kasing muli sa halalan
nagpasa ng evat, muli'y may upuan
natalong senador, senador na naman

pati pinatalsik sa edsa'y nariyan
muling nakabalik sa kapangyarihan
muling bibilugin ang ulo ng bayan
muling magnanakaw sa kaban ng yaman

mga sinumpang bwitre'y naghahalakhakan
walang kabusugang bwaya'y nagbalikan
mga nanalong trapo'y naglalaklakan
habang talo'y nanggagalaiti naman

sadyang wala pa ring napaparusahan
sa mga kawatan sa pamahalaan
ang ginawa nila'y agad nalimutan
tanong ko lang: Pinoy nga ba'y sadyang ganyan?

Matagal Nang Bulok

MATAGAL NANG BULOK
ni Gregorio V. Bituin Jr.
13 pantig bawat taludtod

matagal nang bulok di pa matapon-tapon
ang sistemang itong wala nang kahulugan
bulok ngunit sa hukay di pa maibaon
umaalingasaw pa ang baho sa bayan

matagal nang bulok masdan mo't inuuod
ang sistemang itong sadyang nakakasuka
tila pamahalaan ay walang gulugod
pagkat binahayan ng mga elitista

matagal nang bulok kaya dapat ilibing
ang sistemang dahilan ng hirap at luha
lipunan ito ng mga pinunong praning
na nagkait sa bayan ng munting ginhawa

palitan na ang lipunang bahid ng bulok
upang sa iba'y di na ito makahawa
ating palitan ang kapitalismong hayok
at itayo na ang lipunang manggagawa

5 Haiku sa Halalan

5 HAIKU SA HALALAN

ni Gregorio V. Bituin Jr.

1

Halalan ngayon

At di pa rebolusyon

Para sa nasyon

2

Iboto'y wasto

At iwasto ang boto

Para sa tao

3

Pulos pangako

Na laging napapako

Ang mga tuko

4

Laban sa trapo

Na sadyang tarantado

Ang ating boto

5

Bagong sistema

Ang aming ninanasa

Sa bayang sinta

Halalan at Kamatayan ng Bayani

HALALAN AT KAMATAYAN NG BAYANI
(Mayo 10, 2010 at Mayo 10, 1897)
ni Gregorio V. Bituin Jr.
9 pantig bawat taludtod

Kasabay ng halalan ngayon
ay atin ding alalahanin
sandaan labingtatlong taon
ang nakaraan ng yanigin
ang ating pagkamahinahon
nang Supremo'y sadyang paslangin
ng nagtraydor sa rebolusyon

Dahil atas ni Aguinaldo
mga buhay nila'y pinatid
at si Gat Andres Bonifacio
kasama ang kanyang kapatid
na nagngangalang Procopio
sa Bundok Buntis ibinulid
at kamatayan ang natamo

Kasabay ngayon ng halalan
kayraming kandidatong trapo
at hindi mo na rin malaman
kung sila'y talagang seryoso
sila ba'y magpapayaman lamang
maglilingkod pa ba sa tao
o trapong ito ba'y kawatan?

Kung noon bayani'y pinatay
papatayin ng trapo ngayon
ay baka bukas nati't buhay
tayo'y kanilang hinahamon
sa kanila'y huwag bumigay
ating gawin ngayong eleksyon
ang boto'y alagaang tunay

Ngayong Eleksyon

NGAYONG ELEKSYON
ni Gregorio V. Bituin Jr.
10 pantig bawat taludtod

huwag iboto ang mga duwag
nang buhay nati'y di maging hungkag
nang batas nati'y di nilalabag
nang di umupo'y walang habag

huwag iboto ang mga gago
na isip laging negatibo
imbes na tumulong sa tao
serbisyo'y ginawang negosyo

ibagsak ang mga tiwali
iboto sila'y pagkakamali
kung di kurakot, palahingi
di sila dapat manatili

iboto natin ang nararapat
huwag yaong nagpapakabundat
sa kabang bayan ay sumisilat
at taumbayan ang inaalat

iboto natin ang matitino
sa atin maaring makahango
huwag elitistang maluluho
kundi pangarap nati'y guguho

Salamat, Ara Mina, Diyosa

SALAMAT, ARA MINA, DIYOSA

ni Gregorio V. Bituin Jr.

13 pantig bawat taludtod

tinititigan ko ang mukha sa magasin

totoong kayganda niya't ng ngiting angkin

yaong magasin nga'y nais ko sanang bilhin

ngunit walang perang pambiling babasahin

marapat sambahin ang kaygandang diyosa

siya ang nasa puso ko't isip tuwina

sinasambit-sambit ko nga ang ngalan niya

larawan lang, sa harapan ko'y wala siya

kaygandang Ara Mina, ako'y binihag mo

ngunit hanggang pangarap lang kita, alam ko

gayunman, naging inspirasyon kang totoo

upang magsipag ako't magsikap ng todo

maraming salamat, Ara Mina, sa ngiti

alam kong ngiti mo'y di isang palamuti

pinagaan mo ang diwa, loob ko't budhi

inspirasyon kang sa puso’y di mapapawi

Sa Araw ng mga Ina

SA ARAW NG MGA INA
(HAPPY MOTHER'S DAY)
ni Gregorio V. Bituin Jr.
13 pantig bawat taludtod

minamahal naming ina, dakila kayo
kayong nagluwal sa aming mga anak nyo
kung wala kayo, kami kaya’y naririto?
wala, wala kami, ina, kung wala kayo!

kaya kami sa araw ninyo’y nagpupugay
pagkat kayo’y kasama sa saya at lumbay
liwanag kayong nagbigay aral at gabay
sa amin, mabigo man kami’t magtagumpay

kami’y hinugot ngunit di sa inyong tadyang
kami’y hinugot sa inyong sinapupunan
kaming sanggol sa loob ng siyam na buwan
na minahal nyo’t talagang inalagaan

salamat po sa inyo, ina naming mahal
mahal namin kayong sa amin ay nagluwal
at umukit ng aming pagkatao’t dangal
marapat lang kayong iluklok sa pedestal

Tanaga sa Pagbangon

TANAGA SA PAGBANGON

ni Greg Bituin Jr.

pagbabago ang hamon

sa obrero at nasyon

manggagawa'y babangon

adhika'y rebolusyon

Mensahe sa Praning

MENSAHE SA PRANING
ni Gregorio V. Bituin Jr.
11 pantig bawat taludtod

astig ka pala't hari ng lansangan
sa kapwa tao'y isang lapastangan
bakit ka ba naging isang sukaban
at dukha'y hinahamak mong tuluyan

pulos droga ang iyong pinuhunan
sinisira mo pati kabataan
inaapi pati kababaihan
krimen ang iyong pinagbibidahan

nasa utak lagi'y pagpapayaman
kahit na mangyurak ng karapatan
bawat negosyo'y dapat pagtubuan
kahit ang kapwa'y pinagtutubuan

langit ba ang iyong pinanggalingan
kaya kapwa'y pinagmamataasan
ari mo pala'y laksang kayamanan
madadala mo ba sa langit iyan

kung di ka nagmula sa kalangitan
impyerno ba ang iyong pinagmulan
kaya mahilig pagsamantalahan
ang iyong kapwa't mga kababayan

payo ko'y magbago ka ng tuluyan
upang kapwa mo'y di mo sinasaktan
kundi'y lalaban kami ng sabayan
upang kagaguhan mo'y mapigilan

Maghanda Nang Di Mapahiya

MAGHANDA NANG DI MAPAHIYA

ni Gregorio V. Bituin Jr.

9 pantig bawat taludtod

ang mga taong hindi handa

kadalasang napapahiya

nanginginig ang puso't diwa

kaya uuwing lumuluha

tila sila napariwara

pati pagkatao'y nawala

pakiramdam nila'y kawawa

sa mata ng naroong madla

kaya sa susunod, maghanda

nang hindi naman mabibigla

mahirap muling mapahiya

at baka lalong matulala

Kung Walang Corrupt, Walang Mahirap?

KUNG WALANG CORRUPT, WALANG MAHIRAP?
ni Gregorio V. Bituin Jr.
10 pantig bawat taludtod

kung walang corrupt, walang mahirap
kung may corrupt, aba'y may yumaman
kinurap nila'y tinagong ganap
kinurap nila kaya'y nasaan?

kung walang corrupt, walang mahirap
ito'y isang magandang islogan
ng kandidatong di naghihirap
kundi talaga namang mayaman

kung walang corrupt, walang mahirap
ito ba'y di kasinungalingan
bakit kayrami pa ring mahirap
gayong di corruption ang dahilan

kayraming dinemolis nang ganap
kayraming nawalan ng tahanan
kayraming dukhang di nililingap
at lupa nila'y pinag-agawan

kayrami nang di na nangarap
na sila sa buhay ay aalwan
nabuhay daw silang naghihirap
hanggang sa kanilang kamatayan

manggagawa'y laging nagsisikap
sa trabahong pinaghaharian
ng mga kapitalistang corrupt
lakas-paggawa'y pinagtubuan

pati magsasaka'y naghihirap
gayong kanila ngang pinagyaman
ang mga lupa, ngunit nalasap
nila'y dusa, luha't karukhaan

kahit walang corrupt, di mahirap
ang bayang itong pinagyayaman
ng mga obrerong nagsisikap
upang pamilya'y mabuhay lamang

maraming yumaman dahil corrupt
at walang pakialam sa bayan
prinsipyo'y ipinagbiling ganap
sa mga elitistang gahaman

dapat silang talupan sa harap
ng bayang itong nilapastangan
nilang sadyang mga mapagpanggap
at sanhi ng ating kahirapan

Tatapusin Daw Ang Kahirapan

TATAPUSIN DAW ANG KAHIRAPAN
ni Gregorio V. Bituin Jr.
13 pantig bawat taludtod

tatapusin na raw niya ang kahirapan
ito ang sabi ng kandidatong mayaman
sa media'y kanyang ipinangangalandakan
ito ang sa masa'y pinangakong tuluyan

sa dagat ng basura'y nakaligo ka ba?
at nakatulog ka na rin ba sa kalsada?
maysakit na kapatid ba'y namatayan na?
pambobola ng kandidato'y ramdam na ba?

nagpagawa ng bahay, nagbenta ng lote
pinagtutubuan sinumang makabili
hanggang sa yumaman ang pamilya't sarili
sa kanya kaya, ikaw ba'y napapakali?

kaymahal ng kanyang bahay para sa dukha
sadyang di abot-kaya nitong maralita
tadtad ng pangako ang di-botanteng bata
habang walang mapangako sa manggagawa

ginamit sa propaganda ang mga bata
sa radyo't telebisyon, pangako'y ginhawa
basta't maboto siya'y wala na raw dukha
at mga trabaho raw sa masa'y babaha

ang kahirapan daw ay kanyang tatapusin
nang di sinasabi paano nya gagawin
paano ba wawakasan ang hirap natin
ito ba'y salita lang, di kayang tuparin

isinisigaw niya'y sipag at tiyaga
ang dahilan kaya yumaman siyang bigla
ngunit bakit kayraming nawalan ng lupa
dahil gustong yumaman, iba'y kinawawa?

grabe nang mambola ang mga kandidato
para makuha lang ang ating mga boto
binibilog nila ang ating mga ulo
tinatahak natin ang landas ng bolero

tulad ba niya'y karapat-dapat ihalal
o baka tulad ng iba'y isa ring hangal
mabulaklak ang dila ngunit amoy kanal
tila bayan ay ibubulid sa imburnal

ang kahirapan nga ba'y kanyang matatapos
kung paano ito'y di nya masabing lubos
tila ba sa katwiran siya'y kinakapos
basta raw ito ang pangako niya, Tapos!

Ang Trapo Kung Mang-uto

ANG TRAPO KUNG MANG-UTO

ni Gregorio V. Bituin Jr.

13 pantig bawat taludtod

pinasasarap nila ang bawat pangako

sadyang tinitimplahan upang malasahan

ng sinumang akala nila'y mauuto

upang manalo lamang sila sa halalan

ganyan ang mga trapong kapara'y hunyango

sambayanan ang kanilang binubudburan

ng asin ng pangakong madalas mapako

at ang masakit, pako na'y kinakalawang

dapat ibagsak iyang trapong nang-uuto

nais lang nilang sa atin ay makalamang

masa'y balewala na pag sila'y naupo

serbisyo'y negosyo pala ng mga hunghang

kaya kilalanin ang mga kandidato

uriin sila kung sila'y para sa masa

kilatising mabuti iyang mga trapo

bago sambayanan ay muling mabiktima

tulatext - Iboto ang Nasa Budhi

IBOTO ANG NASA BUDHI (tulatext)
ni greg bituin jr.
8 pantig bawat taludtod

pera'y pinamamahagi
ng trapong mapagkunwari
tanggapin mo ang salapi
na kinurakot ng imbi
iboto ang nasa budhi
ng bukas ay di lugami