Mga David ng maralita

MGA DAVID NG MARALITA
ni Gregorio V. Bituin Jr.
14 pantig bawat taludtod

maraming David sa aming mga mahihirap
nakahandang humarap sa maraming Golayat
na nais wasakin ang aming mga tahanan
huwag magtaka kung bato'y aming pananggalang

pabahay ay karapatan naming maralita
bakit nila kami pinalalayas ng lubha
sa mundong ito, maging dukha ba'y isang sumpa
bakit ba kami tinataboy na parang daga

tama lamang magtanggol kami pag ginigipit
lalaban pag karapatan ay pinagkakait
tulad ni David, bato’y tangan naming mahigpit
malalaking Golayat ay duduruging pilit

armado man ang mga Golayat na may sungay
at David kaming bato lang ang armas na taglay
may karapatan din kaming dukha sa pabahay
at ang tahanan nami'y ipaglalabang tunay

titigil din itong bato naming mga David
kung kami'y di na gigipitin at igigilid
igagalang itong karapatan naming batid
nitong gobyerno't mga taong di naman manhid

Ang tagapagsalaysay

ANG TAGAPAGSALAYSAY
ni Gregorio V. Bituin Jr.
13 pantig bawat taludtod

walang magandang ikwento sa aking buhay
na sa masa'y tiyak patok na isalaysay
wala kasing aksyon, buhay ay di makulay
ismoltaym lang kasi't walang bertud na taglay
kaya papel ko'y naging tagapagsalaysay
buhay ng iba ang ikinukwentong tunay

ganito ang gawa naming panitikero
nagsasaliksik, nagsusulat, nagkukwento
kaninong kwento’y kagigiliwan ng tao?
sinong barumbado na kapara'y delubyo?
ang may makulay na karanasan ba'y sino?
inspirasyon ba sa kapwa ang buhay nito?

ang kwento kayang ito ay pampelikula
kikita ba tayo't tatabô sa takilya
kung kwentong ito'y di naman, para saan pa
ang kwentong isinusulat kung walang kwenta
tagapagsalaysay ay nahihirinan na
sa trabahong ito ba'y susuko pa siya?

Bugbugin sila bago mulatin

BUGBUGIN SILA BAGO MULATIN
ni Gregorio V. Bituin Jr.
10 pantig bawat taludtod

astig sila, siga ng lansangan
hilig nila'y makipagbanatan
ngunit sila ba'y dapat patulan
upang matigil ang kalokohan
tanong namin: bakit lalabanan
kung wala kang mapapala riyan
lagi silang nasa kaguluhan
di maawat kahit ng magulang
liban kung may layuning mataman
tulad ng pagbago ng lipunan

mga maton na totoong lumpen
nais lagi'y pumormang tigasin
kami'y tibak, may prinsipyong angkin
nais na lipunan ay baguhin
sa kanila'y anong dapat gawin
siga'y paano pasusunurin
bugbugin sila bago mulatin
alikabok, sila’y palamunin
pag bugbog na, sila’y kausapin
sa pagkilos ay agad himukin

kaya sila'y pinagkaisahang
iwasto ang angkin nilang tapang
organisahin at direksyunan
hanggang lipunan ay pag-aralan
bakit may mahirap, may mayaman
bakit nagpapasasa'y iilan
bakit may lumpen sa kadawagan
hanggang kanilang maunawaan:
dapat kumilos sa tamang daan
tungo sa pagbago ng lipunan

Ang mga pusakal

ANG MGA PUSAKAL
ni Gregorio V. Bituin Jr.
11 pantig bawat taludtod

ganda ng daigdig ay pinapaslang
ng mga pusakal na puso'y halang
kay-itim na ng mga kailugan
basurahang plastik ang karagatan
pulos usok sa buong kalangitan
pulos dapog ang buong kalawakan

binutas ang bundok sa pagmimina
ang bansa'y basurahan ng Canada
sa polusyon, di ka na makahinga
kaytinding usok sa mga pabrika
binabaha na ang mga kalsada
dahil sa mga plastik na bumara

kayraming pinagpuputol na puno
ginagawang troso para sa tubo
lumulubog na ang maraming pulo
mundo'y sira na sa maraming dako
anong ginawa ng mga pinuno
kalikasan ba'y saan patutungo

pagkasira ng mundo'y halukipkip
sa bisig at puso kong naninikip
daigdig ba'y atin pang masasagip
sana, ito'y isa lang panaginip
magigising tayong ang nasa isip
mundong kayganda yaong nalilirip

panahon na upang tao'y umangal
sinong sumira sa mundong pedestal
anong parusa sa pangit na asal
na yumurak sa kagubatang basal
sinong darakip sa mga pusakal
na nagdala sa mundo sa marawal

Pagbabalik mula sa relokasyon

PAGBABALIK MULA SA RELOKASYON
ni Gregorio V. Bituin Jr.
15 pantig bawat taludtod

at sila'y nakita kong muli, isang dapithapon
sa dating lugar na pinagtirahan nila noon
kung saan naganap yaong madugong demolisyon
hanggang sila'y itapon sa malayong relokasyon
doon, may bahay nga, mamamatay naman sa gutom
bahay na di mailuto, gagawin bang panggatong
sa pamilyang nagugutom, anong ipalalamon
ito ang klasikong mula danger zone hanggang death zone
kaya di na kataka-takang sila'y magdesisyon
babalik sila sa lungsod, ang dating buhay doon
malapit sa trabaho, pamilya'y di magugutom
lalo na't ang ikinabubuhay nila'y naroon
babalik sa dati kahit bahay nila'y di mansyon
may timyas din ng pag-ibig kahit sa barungbarong

Kung taglagas ang buhay

KUNG TAGLAGAS ANG BUHAY
ni Gregorio V. Bituin Jr.
11 pantig bawat taludtod

kung ang buhay ko'y isa lang panahon
tiyak taglagas ang buhay kong iyon
ngunit nais ko pa ring makabangon
mula sa pagkasawi ng kahapon

nais kong dumagta na yaong dapo
sa kahuyan ng aking pagkahapo
gigilas ang inaaglahing puno
sa pagdatal ko sa ilaya't hulo

kung taglagas lamang ang iwing buhay
kamagong ba o kugon ang dadantay
sa taglagas kong sakbibi ng lumbay
habang doon sa banig nagninilay

In Chess

IN CHESS
a poem by Gregorio V. Bituin Jr.
9 syllable per line

in chess, we must think tactically
knowing every move, strategy
as if being a master should be
what's the move against the enemy

an strategic defense is one
tactical offensive should be done
every move should be in our hand
because in every game we must won

Sa namayapang kasama

SA NAMAYAPANG KASAMA
ni Gregorio V. Bituin Jr.
10 pantig bawat taludtod

(Handog sa isang kasamang kasapi ng GPNAI sa Catmon, Malabon na namayapa sa gulang na 37. Binasa sa luksang parangal ng Abril 11, 2015.)

may namamatay, may nawawala
mahalaga'y ang kanyang nagawa
sa pamilya, sa kapwa, sa madla
dahil doon ay pinagpapala

salamat, kaibigan, sa lahat
lalo sa pagsasamang maluwat
at sa pakikibaka'y namulat
upang lipuna'y mabagong sukat

lumaban para sa pagbabago
baguhin na ang lipunang ito
palitan na ang kapitalismo
ng pangarap nating sosyalismo

Pagpupugay sa ikasiyam na anibersaryo ng TDC

PAGPUPUGAY SA IKASIYAM NA ANIBERSARYO NG TDC
ni Gregorio V. Bituin Jr.
15 pantig bawat taludtod

Teachers' Dignity Coalition, tunay kayong ginto
sadyang kayo’y samahan ng magagaling na guro
mahinahon, mapanuri, at mahusay magturo
prinsipyado, marangal, matatag sa pamumuno

ang inyong pagkakaisa'y tunay na inspirasyon
sa maraming inaba upang sila’y magsibangon
butihing samahan nyo'y patuloy na sumusulong
pagkat kayo'y nagkakaisa sa bawat desisyon

maalab na pagbati sa mga gurong palaban
sa bawat problema'y tunay kayong mapamaraan
di nagpapaapi't ayaw mapagsamantalahan
di sumusuko, tunay na lingkod sa sambayanan

pagpupugay sa ikasiyam n’yong anibersaryo
at magtagumpay nawa bawat adhikain ninyo!

- 8 Abril 2015

Mas maigi ang dangal kaysa yaman

MAS MAIGI ANG DANGAL KAYSA YAMAN
ni Gregorio V. Bituin Jr.
11 pantig bawat taludtod

mas maigi ang dangal kaysa yaman
mabuting ito'y di nayuyurakan
mabuting may malinis na pangalan
kaysa ito'y tuluyang marungisan

mas maiging mabuhay akong dukha
ngunit marangal at di hampaslupa
prinsipyado at nakikipagkapwa
dangal ay yamang tatanganang kusa

kami'y lalaging marangal, pangako
ngunit dangal itong di isusuko
ilalaban dumanak man ang dugo
magtatanggol mabasag man ang bungo

di karangalan ang gawang baluktot
at walang dangal ang mga kurakot
mahirap kung sa ginto'y mapag-imbot
pagkat mayaman nga ngunit may buntot

mas maigi ang dangal kaysa yaman
naroon ang tunay na kasiyahan
marangal kang malinis ang pangalan
kaya taas-noo ka kaninuman

Kaming mga mandirigma

KAMING MGA MANDIRIGMA
ni Gregorio V. Bituin Jr.
13 pantig bawat taludtod

oo, ganito kaming mga mandirigma
ng kilusang may adhikang mapagpalaya
di matitibag ng anumang pagbabanta
di isusuko ang niyakap na adhika
sa bawat nakakatunggali'y laging handa

may prinsipyo kaming tinatanganang tunay
dito umiikot ang aming iwing buhay
kaya sa bawat hakbang, aming inaalay
ang panahon, pagsisikap, talinong taglay
upang maging ganap ang asam na tagumpay

nakahandang mamatay para sa prinsipyo
may patakarang tulad sa Hapong Bushido
pati sa Yuropyano'y pagkakabalyero
gabay din ang kartilya nina Bonifacio
taglay ang aral, dangal, pagpapakatao

di kami tatanggi sa anumang pagsubok
di kami susuko sa pag-abot sa tuktok
di kami aatras gaano man kabulok
ang sistemang sa bawat tao'y naglulugmok
mandirigma kaming lalaban hanggang rurok

mandirigmang marubdob sa anumang laban
maginoo'y dumudurog ng lapastangan
mabait ngunit lumalaban ng sabayan
asahan ang aming taos na katapatan
sa adhika para sa kapwa't daigdigan

Pasyon 2015 - para sa FDC

Freedom from Debt Coalition
ay isang organisasyong
palaban at mahinahon
lahat ng pagkakataon
ang bayan ay ibabangon

kayraming isyu ng madla
kuryente, tubig ang paksa
presyo'y nagtaasang pawa
tila ito'y mga sumpa
sa ating bayang kawawa

paano maitatawid
ang buhay na may balakid
gobyerno'y tila kaykitid
buhay natin pinapatid
sila nga ba’y di matuwid?

lumaking lalo ang utang
nitong bansang tinubuan
nasaan ang pakinabang
ano ang pinaggamitan
bakit hirap pa ang bayan

lumalala na ang klima
epekto'y isang Yolanda
kinawawa'y libong masa
nawalan ng bahay sila
nawalan ng buhay sila

sa isang gobyernong manhid
sa problema'y nauumid
madla'y saan binubulid
ito ba'y kanilang batid?
mali ba'y kayang ituwid?

ang sinabi ng Pangulo:
"O, bayan, Kayo ang Boss ko"
ngunit anong ginawa mo
lagi nang nasa kalbaryo
ang buhay nitong obrero

ang kawawang manggagawa
kanilang lakas-paggawa
di mabayaran ng tama
pulos sila dusa't luha
manggagawa silang dukha

kontraktwalisasyon, salot
ang kapitalista'y salot
sila nama'y isang dakot
ngunit sila ang kilabot
halina at makisangkot

yaong mga maralita
ang buhay ay dusa't luha
gutom lagi't walang-wala
api na't kinakawawa
bakit ito ang napala

tama na ang kahirapan
sobra na ang karukhaan
na aming nararanasan
panahon nang mapalitan
ang sistema ng lipunan

ngunit isang insidente
ang naganap na kaytindi
isyu iyong sadyang grabe
di madalumat ng gabi
kung ano nga bang nangyari

apatnapu't apat na SAF
yaong bumulagtang sukat
labingwalo pang rebelde
pati na limang sibilyan
yaong totoong nasilat

ngunit sabi ng Pangulo
sa tonong tila palalo
wala siyang sala, wala
kundi tauhan sa baba
yaong totoong may sala

sinungaling si PNoy-kyo
masa'y binobolang todo
di ba't siya ang pangulo
ulat sa kanya'y diretso
binibilog ating ulo

pangulong inuulatan
wala bang pananagutan
danas ng SAF kamatayan
kayraming kamag-anakan
ang naulilang lubusan

maysala'y dapat usigin
dapat silang panagutin
hustisya sa masa'y dinggin
si PNoy-kyong sinungaling
ay dapat nang patalsikin

Freedom from Debt Coalition
at sa buong madla'y hamon
hirap ang buong nasyon
pagbabago, rebolusyon
ay dapat nang gawin ngayon

Sa Lungsod ng Baha

SA LUNGSOD NG BAHA
ni Gregorio V. Bituin Jr.
15 pantig bawat taludtod

lumaki ako sa palaging nagbabahang lungsod
naglalakad sa lansangang tubig ay hanggang tuhod
mabuti't mababa lang, di ka rito malulunod
naglipana ang mga lubak, asong nakatanghod
pati mga litrato ng trapong kunwari'y lingkod

lumaki ako sa lungsod na panay ang delubyo
taun-taon na lang, mga bagyo'y namemerwisyo
basa ang gamit, lubog sa putik, lito ang tao
walang isang salita, hanggang pangako ang trapo
tila paraan na ng pamumuhay ang ganito

lumaki ako sa lungsod na palaging binabaha
papasok sa paaralang ang sapatos ay basa
bubuti pa ba ang lungsod na tila isinumpa?
nahan ang pondo upang kalsada'y maipagawa?
napunta ba sa bulsa ng mga trapong kuhila?

umuunlad ang lungsod, tao'y napag-iiwanan
ang umaasenso lamang ay ang mamumuhunan
bakit di kasabay sa pag-unlad ang sambayanan?
bakit nariyan pa rin ang tiwaling lingkodbayan?
mababago pa ba ang ating dustang kalagayan?

Ang sulo

ANG SULO
ni Gregorio V. Bituin Jr.
15 pantig bawat taludtod

ilawan yaong sinindihan nang dahil sa poot
na sama-samang tangan upang puksain ang salot
habang buong pamayanan sa lagim nababalot
mamamaslang na may pangil ay saan napasuot

panahon yaong una, sa malayong lalawigan
na tanging sulo lamang ang liwanag sa karimlan
na sa paglubog ng araw ay tulog din ang buwan
kaya hilakbot ng lagim yaong danas ng bayan

ang buong bayan na'y sa mamamaslang nanggigigil
nais nilang mawala na ang nilalang na sutil
pupuksain nila ang paninibasib ng pangil
na sa bayan nila'y kayraming buhay na kinitil

ang liwanag ng sulo'y sadyang nakabibighani
titigan mo't tila nagsasayaw na binibini
ngunit yaon lang ang tanglaw sa karimlan ng gabi
na sa panahong kailangan ay isang bayani

Kapitalismong mapagbalatkayo

KAPITALISMONG MAPAGBALATKAYO
ni Gregorio V. Bituin Jr.
15 pantig bawat taludtod

aalwan na raw ang buhay ng sintang sambayanan
ang hatid daw ng kapitalismo'y kaginhawahan
gagawin daw moderno ang buong sangkapuluan
pagkatali sa lupa'y mawawala nang tuluyan
lahat daw ay kasama sa asam na kaunlaran

bumilis ang pag-unlad, naglalakihan ang tubo
ngunit hinati nito sa uri ang buong mundo
obrero'y naghirap, yumaman ang tusong hunyango
lakas-paggawa'y binarat, sila'y pinagkanulo
at natantong kapitalismo'y mapagbalatkayo

para sa ilan lang pala ang pangakong pag-unlad
sa kaalwanan ang madla'y nananatiling hubad
hanggang kabulukan nito'y unti-unting nalantad
pagkat pangako pala ng kapitalismo'y huwad
pagkat nakikinabang pala'y mga tusong tamad

ang mapagbalatkayong kapitalismo'y wasakin
at buong uring manggagawa na'y pagkaisahin
panahon nang rebolusyong sosyalista't tahakin
upang isang bagong lipunan ang ating buuin
at kapitalismong imbi'y tuluyan nang ilibing

Ang Panghilagpos

ANG PANGHILAGPOS
ni Gregorio V. Bituin Jr.
15 pantig bawat taludtod

yari iyon sa malapad na piraso ng balat
o kaya'y telang nakakabit sa dalawang tali
dito'y inilalagay ang isang batong makinis
o kaya'y batong kasinlaki ng isang dalandan
paiikutin ito sa taas ng kanyang ulo
saka naman niya bibitiwan ang isang tali
at hihilagpos ang bato ng pagkalakas-lakas
sa sinumang puntirya'y kaytindi kung makasapol
panghilagpos na sandatang ginamit noong una
na siyang nagpatumba sa higanteng si Gulayat.

Pagkabayubay sa tulos

PAGKABAYUBAY SA TULOS
ni Gregorio V. Bituin Jr.
13 pantig bawat taludtod

binabali ang binti ng mga kriminal
na nakabayubay sa pahirapang tulos
pinabibilis daw nito ang kamatayan
ng nagkasalang dorobong animo'y palos

tulad nila'y doon sa tulos ipinako
kanilang kamay at paang nakabayubay
bibitin ang buong bigat nila sa pako
at daranasin yaong kaytinding pag-aray

upang makahinga, katawa'y iaangat
sa pamamagitan ng nakapakong paa
ngunit pag buto sa binti'y binaling sukat
di nila maaangat ang katawan nila

kaya dugo'y di na dadaloy sa katawan
dahil di na makahinga'y mamamatay na lang

Sa anibersaryong pilak ng Kamayan Forum

SA ANIBERSARYONG PILAK NG KAMAYAN FORUM
ni Gregorio V. Bituin Jr.
8 pantig bawat taludtod

salamat sa Kamayan Forum
sa tuwinang buwanang pulong
kayrami ninyong naitulong
sa paliwanag at paglagom
nitong isyung pangkalikasan
na matamang pinakinggan
upang aming maunawaan
kung bakit dapat pangalagaan
ang iisa nating daigdig
lupa, araw, hangin at tubig
klima, at iba pang nadinig
patuloy na magkapitbisig
salubungin nating may galak
itong anibersaryong pilak
ng Kamayan, kayraming pitak
sa maraming isyung palasak
alagaan natin ang mundo
dahil nag-iisa lang ito
Kamayan, salamat sa inyo
mabuhay, O, mabuhay kayo!

Sikmura ng mangangatha

SIKMURA NG MANGANGATHA
ni Gregorio V. Bituin Jr.
11 pantig bawat taludtod

mas nais ko pang langit ay pagmasdan
gutom ay tiis, imbes mag-agahan
musa ng panitik na laging asam
ang hinihintay na dumalaw naman

upang kami rito'y muling magniig
siya'y ikulong ko sa aking bisig
minumutya ng haraya ko't himig
mag-uusap ang aming mga titig

ah, bihira na akong mag-agahan
naroon ba siya sa kagutuman
madalas pag sikmura'y kumakalam
saka mutyang ito'y dadalaw naman

Ang makata'y iba sa persona sa tula

ANG MAKATA'Y IBA SA PERSONA SA TULA
ni Gregorio V. Bituin Jr.
11 pantig bawat taludtod

sari-sari ang persona sa tula
na naliliha ng abang makata
narinig natin ang hikbi ng dukha
pati na panaghoy ng manggagawa
patay na'y kanyang napagsasalita
pati hibik ng bawat nangawala

sari-sari ang bidang nalilikha
manggang hilaw na binabad sa suka
kawayang sa langit nakatingala
mabibining anghel na isinumpa
babaeng kiri, mga dalahira
pati mga nag-aaral na bata

pag nagsalita ang dukha sa tula
nakasalubong mo'y tinig ng dukha
di iyon tinig ng abang makata
siya lamang ang sa tula'y kumatha

kung ang makata'y isang aktibista
siya lamang ang lumikha ng bida
bidang may tindig, sariling pag-asa
kaya makata'y iba sa persona

sino ang persona sa tula? dukha!
anak-dalita ang nagsasalita
makata ba'y dukha? hindi, di dukha!
siya lamang ang sa tula'y kumatha

Kay Celia

KAY CELIA
ni Gregorio V. Bituin Jr.
13 pantig bawat taludtod

Sino ang Célia nina Balagtas at Jonson?
Tila sila'y magandang dilag ng kahapon!
Natititik sa diwa't puso nilang yaon
Ang Céliang walang kamatayan ng panahon!

Ang ngalang Célia ba'y simbolo ng siphayo?
O ito'y tatak ng sanlaksang panibugho?
Tulad nila'y may Célia akong nasa puso
Na buong pag-ibig ang ipinangangako!

Ang Célia'y simbolo, iba man ang pangalan
Ng babaing sinisinta't iniingatan
Kung diwata siya ng buong kagiliwan
O, kaysarap ibigin ng Céliang naturan.

Sa Célia ng makatang Jonson at Balagtas
Ang pagsinta nga'y inspirasyong walang kupas
Na maaaring mawala sa maling landas
Ngunit sa sugatang puso pa rin ay lunas.

Awit: Kay Celia - salin ng tula ni Ben Jonson

AWIT: KAY CELIA
Ni Ben Jonson
Malayang salin ni Gregorio V. Bituin Jr.
15 pantig bawat taludtod

Tagayan mo ako ng iyong mga mata lamang
At ako'y mamamanata nitong abang sarili;
O mag-iwan kaya ng halik subalit sa tasa,
At ako'y hindi na maghahagilap pa ng basi.
Ang uhaw na mula sa aking kaluluwa'y buhat
Sa inaasam-asam na basing may pagkasanto:
Subalit ako man sa lagdò ni Jove'y hihigop
Ako'y hindi magbabago alang-alang sa iyo.

Pinadalhan kita nito lang ng rosas na putong,
Ito'y hindi upang ikaw ay bigyang-karangalan,
Na animo'y nagbibigay ng pag-asa, na roon
Ay hindi na nga malalanta-lanta pang tuluyan.
Ngunit ikaw kapagdaka'y humihinga na lamang,
At iyong ibinalik iyon sa aba mong lingkod;
Subalit nang lumago iyon at humalimuyak,
Ako'y sumusumpa, hindi roon, kundi sa iyo.

SONG: TO CELIA (1616)
Ben Jonson (1572-1637)

Drink to me only with thine eyes,
And I will pledge with mine;
Or leave a kiss but in the cup,
And I'll not look for wine.
The thirst that from the soul doth rise,
Doth ask a drink divine:
But might I of Jove's nectar sup,
I would not change for thine.

I sent thee late a rosy wreath,
Not so much honoring thee,
As giving it a hope, that there
It could not withered be.
But thou thereon didst only breath,
And senst it back to me;
Since when it grows and smells, i swear,
Not of thyself, but thee.

Sugat

SUGAT
ni Gregorio V. Bituin Jr.
13 pantig bawat taludtod

malalim na ang sugat ng damdaming iwi
di madalumat kung bakit lagi nang sawi
gayon bang sadya ang pagsintang anong sidhi
ilang ulit mang mabigo'y tanggap ng budhi

Isang tula sa polygon

ISANG TULA SA POLYGON
ni Gregorio V. Bituin Jr.
7 pantig bawat taludtod

ano ba ang polygon
yaong kanilang tanong:
ito'y magkakarugtong
na iba't ibang guhit
paikot bawat gilid
at yaong gitna'y pinid
bilang ng sulok nito
at gilid ay pareho

tatlo ang sa tatsulok
apat sa parisukat
lima ang sa pentagon
anim ang sa heksagon
sa heptagon ay pito
sa oktagon ay walo
siyam ang sa nonagon
at sampu sa dekagon

maaaring lumabis pa
sa sampu bilang nila
ngunit ang mahalaga
di nagkakasalabid
ito lang ay paikot
walang makalulusot
polygon ay paksain
ng alhebrang mithiin

Salin ng Soneto 50 ni William Shakespeare

GAANO KABIGAT ANG PAGLALAKBAY KO SA DAAN
ni William Shakespeare (Soneto 50)
Malayang salin ni Gregorio V. Bituin Jr.
15 pantig bawat taludtod

Gaano kabigat ang paglalakbay ko sa daan,
Noong ang hanap ko’y wakas ng patang paglalakbay.
Tinuro’y alwan at sa pahinga’y sabing mataman
‘Milya-milya’y sinukat ng kaibigan mong tunay!’
Ang hayop sa loob ko, pagod na sa’king pighati
Pagkayod na matamlay, atang-atang yaong bigat
At tila ba likas na ugali, batid ng imbi
Lulan niya’y ayaw ng bilis na sa iyo’y buhat:
Hindi siya mapagagalit ng madugong tahid
Na minsan tinutulak ng poot magkubli siya;
Na mabigat niyang tinutugunan ng may impit,
Sa akin mas matalim kaysa pumanig sa kanya;
Tulad ng impit na yaong sa isip ko’y nalagak;
Ang pighati ko’y sumulong at naiwan ang galak.
-
-
-
How heavy do I journey on my way
By William Shakespeare (Sonnet 50)

How heavy do I journey on my way,
When what I seek, my weary travel’s end,
Doth teach that ease and that repose to say
‘Thus far the miles are measured from thy friend!’
The beast that bears me, tired with my woe,
Plods dully on, to bear that weight on me,
As if by some instinct the wretch did know
His rider loved not speed, being made from thee:
The bloody spur cannot provoke him on
That sometimes anger thrusts into his hide;
Which heavily he answers with a groan,
More sharp to me than spurring to his side;
For that same groan doth put this in my mind;
My grief lies onward and my joy behind.

Pag hinog na ang pag-ibig

PAG HINOG NA ANG PAG-IBIG
ni Gregorio V. Bituin Jr.
15 pantig bawat taludtod

kasingrupok ng kastilyong buhangin ang pag-ibig
kung ito'y pagkahumaling lang at hindi pa hinog
madaling guguho sa hampas ng ragasang tubig
pagkat bubot pa ang pag-ibig niyang inihandog

ang pag-ibig ay di panibugho ng isang maton
na sa sinag ng araw ay maningning palang bubog
ang pag-ibig ay di matatangay ng laksang alon
na pag tumimo sa puso'y di basta malalasog

pag-ibig ay di dapat isang kastilyong buhangin
kundi muog na di basta na lang mapalulubog
pagkat pag-ibig ay rosas sa mayabong na hardin
gaano man katinik ay pinagpalang kaytayog

Matisod man sa pagtakbo

MATISOD MAN SA PAGTAKBO
ni Gregorio V. Bituin Jr.
11 pantig bawat taludtod

matisod ka man habang tumatakbo
di ka tatakbong muli sa simula
titindig ka kung saan ka nadapa
at muli'y tumakbo kang taas-noo

isiping kung tumakbo ng matulin
malalim daw ang tinik kung bumaon
sa pagtakbo'y tiyakin ang direksyon
daang matinik ay lagpasan man din

makailang ulit ka mang mabuwal
ay muli kang bumangon at tumayo
nabubuwal yaong naninibugho
subalit tumindig ka ng may dangal

matisod ka man sa pagtakbo, bangon!
sumulong ka kung saan paroroon!

Bato sa guho

BATO SA GUHO
ni Gregorio V. Bituin Jr.
11 pantig bawat taludtod

naroroon lang iyon, naghihintay
na muli'y maging bahagi ng muog
nang gumuho ang pader na matibay
dahil sa lindol, kayraming lumubog

may silbi pa ba ang bato sa guho
wala nang muog na kinakutaan
mapapansin ba ang kanyang siphayo
o siya'y aapak-apakan na lang

marahil, batang dukha pa'y kikita
kung yaong mga bato'y iipunin
ibebenta niya sa naggagraba
may pambili na siya ng pagkain

minsan, tayo ang batong guhong iyon
ngunit siphayo'y di naman palagi
sasapit ding tayo'y dapat bumangon
sa muog ay muling maging bahagi

Bantayog ng mga Bayani: Isang Pagninilay

BANTAYOG NG MGA BAYANI: ISANG PAGNINILAY
ni Gregorio V. Bituin Jr.
13 pantig bawat taludtod

kayraming pangalang doon ay nakaukit
ngalan ng namayapang may prinsipyong bitbit
mga aktibistang inalay yaong buhay
para sa bukas ng bayang inaping tunay
nabuhay sila noong panahon ng unos
namatay silang ang adhikain ay taos
kumilos noon upang bayan ay lumaya
mula sa mga ganid at trapong kuhila
kanilang dugo'y nabubo sa lupang tigang
ipinagtanggol ang bayan sa mga halang
nilabanan ang diktadurang ala-Hitler
nakibaka sila't itinuring na martir
estado'y gumanti, dala nito'y bangungot
ngunit ang bayan ay di marunong lumimot
mga sakripisyo sa panahong ligalig
ay dapat ikwento sa bayang iniibig
itinayo ng bayan ang isang bantayog
bilang alaala sa buhay nilang handog
naukit sa bantayog ang mga pangalan
nilang mga bayani ng lupang hinirang

Nakapagpiyansa ang suspek sa masaker

NAKAPAGPIYANSA ANG SUSPEK SA MASAKER
ni Gregorio V. Bituin Jr.
15 pantig bawat taludtod

Napalaya ang suspek sa pagpaslang ng marami
Bakit? Tanong ng madla. Tugon: Nagpiyansa kasi
Laya na ang suspek. Sa bayan ba ito'y mabuti?
Makakatulog ka pa ba ng mahimbing sa gabi?

Piyansa'y labing-isang milyong piso, anang ulat
Na mismong hukuman ay pinayagan itong sukat
Kaya ayun, dahil sa pera'y laya na ang lekat
Habang mga namatayan ay tiyak nangagulat

Magkano ba ang kalayaan, aking natatanong
Pag dukha, walang pampiyansa, walang laya, kulong
Pag may pera, may pampiyansa, laya nang ganoon
May presyo nga ba ang paglaya, anong itutugon?

Ang namamayapa'y tiyak di na natatahimik
Silang tanging saksi sa araw na ang bala'y hitik
SIlang nasang hustisya'y tila nabaon sa putik
Silang ang mga buhay ay di na maibabalik

MANILA, Philippines – Pinayagan ng korte ngayong Lunes ang isa sa mga suspek sa Maguindanao massacre na makapagpiyansa para sa kasong multiple murder.

Nagbayad ng P11.6 milyon si dating provincial officer-in-charge Sajid Islam Ampatuan upang pansamantalang makalaya matapos aprubahan ni Quezon City Regional Trial Court Branch 221 Judge Jocelyn Solis-Reyes ang kanyang bail petition. (mula sa pahayagang Pilipino Star Ngayon, Marso 9, 2015, na may kawing sa http://www.philstar.com/bansa/2015/03/09/1431728/sajid-ampatuan-nakapagpiyansa-ng-p11.6m-sa-maguindanao-massacre)