Paraiso Ba Ang Lungsod?

PARAISO BA ANG LUNGSOD?

ni Gregorio V. Bituin Jr.

15 pantig bawat taludtod

paraiso ba ang lungsod na puno ng iskwater?
paraiso ba ang nagtatayugan nitong pader?
paraiso ba kung halang ang pinuno sa poder?
kung kahirapan ay di matugunan nitong lider?

paraiso ba ang lungsod ng mga batang gutom?
paraiso ba kung bibig ng namumuno'y tikom?
paraiso ba kung maraming kamao ang kuyom?
paraiso ba kung pangako'y pawang alimuom?

paraiso ba ang lungsod na kayraming dinukot?
di makita ng mga mahal na ngayo'y kaylungkot?
paraiso ba kung namumuno'y pulos kurakot?
at sa mga katiwalian laging nasasangkot?

paraiso ba kung dinudusta ang manggagawa?
kung lakas-paggawa'y di nababayarang tama?
paraiso ba ang lungsod kung kayrami ng dukha?
na pagkatao'y dinusta ng sistemang kuhila?

sa paraiso'y nagtutulungan ang bawat tao
sa bawat karapatan, ang lahat ay may respeto
binabayarang tama ang trabaho ng obrero
wala nang dukha't guminhawa na ang buhay nito

walang naiiwan sa kangkungan ng kasaysayan
lahat tayo'y may dignidad na di niyuyurakan
bawat isa'y pantay ang pagkatao't kalagayan
paraiso ang lungsod na walang mga gahaman

Tungo sa Hayahay na Bukas

TUNGO SA HAYAHAY NA BUKAS

ni Gregorio V. Bituin Jr.

9 pantig bawat taludtod

mahayahay ang ating bukas

kung ang lipunan ay parehas

kalagayan ng masa'y patas

bagong sistema'y nilalandas

kung ginhawa'y matatamasa

nitong naghihirap na masa

bawat isa'y tiyak sasaya

gagaan ang loob ng kapwa

sa mga dukha'y mababakas

ang hirap, dusa, pandarahas

ngunit problema'y malulutas

kung sa dusa, tayo'y aalpas

masa'y dapat nating mulatin

upang kaapiha'y tapusin

magkaisa tayo't durugin

ang sistemang mapang-alipin

ang lipunang luma'y lilipas

sistemang bulok maaagnas

tahakin na ang bagong landas

tungo sa hayahay na bukas

Manggagawa'y Dakila

MANGGAGAWA'Y DAKILA

ni Gregorio V. Bituin Jr.
15 pantig bawat taludtod

manggagawa, mataas man, trabaho'y aakyatin
matiyak lang na magampanang husay ang gawain
bawat gawa nila'y pinagsisikapang sinsinin
silang sa lipunan ay nagpaunlad pangunahin

dekalidad na trabahong alay sa kaunlaran
sa loob at labas ng kapitalistang lipunan
bisig, oras, talino ng manggagawa'y puhunan
siya ang tunay na lumikha nitong mga bayan

sa ilalim man ng lupa o sa saanmang ituktok
tunay na paglilingkod nila'y iyong maaarok
inapi man ng kapitalistang sa tubo'y hayok
sila'y manggagawang sa gobyerno'y dapat maluklok

ekonomya ng bawat bansa'y kanilang nilikha
kaya sa lipunang ito, manggagawa'y dakila

(ang larawan ay mula sa facebook account ng Occupy Bahrain)

Pakinggan mo ang aking dibdib

PAKINGGAN MO ANG AKING DIBDIB

ni Gregorio V. Bituin Jr.

9 pantig bawat taludtod

pakinggan mo ang aking dibdib

hinihiyaw nito'y pag-ibig

pagmamahal sa iyo'y tigib

kukulungin kita sa bisig

dibdib ko'y pakinggan mo, sinta

ang awit nito'y: "Mahal kita!"

nais kitang maging asawa

at sa mga anak ko'y ina

mahal, pakinggan ang dibdib ko

nababaliw ako sa iyo

sadyang ikaw lamang, sinta ko

sa puso'y tinitibok nito

nais kong labi mo'y mahagkan

sa halik ay paliliguan

mahal kita, walang iwanan

hanggang pagtanda'y sasamahan

Ngiti mo pa lang, pamatay na

NGITI MO PA LANG, PAMATAY NA

ni Gregorio V. Bituin Jr.

9 pantig bawat taludtod

kinikilig ako, o sinta

sa iyo pag nakita kita

ngiti mo pa lang, pamatay na

diwata kang napakaganda

lagi ka sa aking gunita

lalo ang maamo mong mukha

sa iyo nga'y natutulala

napakaganda mong diwata

ngiting sa puso'y nagpalambot

salamat, di mo pinagdamot

ngiti mo'y pamawi ng lungkot

kaytamis sa puso ang dulot

ngiti mo pa lang, pamatay na

kaya mahal na mahal kita

Gunam-gunam

GUNAM-GUNAM

ni Gregorio V. Bituin Jr.

13 pantig bawat taludtod

niraratrat ng gunita ang aking diwa

tila napunit ang karimlan, nagluluksa

hiyaw ay hustisya, nagbabanta ng digma

ang pag-ibig nga'y nababalot ng hiwaga

bayan ang sinta pag sa digma pumalaot

dalaga ang sintang pagmamahal ang dulot

sinta'y hinabol, saan kaya napasuot

huwag sanang mawala't ako'y malulungkot

tatablan ba ng bala ang diwang matalim

na nais dumurog sa puso kong taimtim

ano ang bumabalot sa payapang dilim

bakit kaya bagang ko'y biglang nagtitiim

mabagsik ang leyong sa puno'y magbubuwal

sasalo'y ang estadong may kamay na bakal

dadalhin ito roon sa malayong kural

gagawing panggatong saka magmiminindal

Sa Puso Ko'y Nag-iisa Ka

SA PUSO KO'Y NAG-IISA KA

ni Gregorio V. Bituin Jr.

4 pantig bawat taludtod

ako't tila

isang tuod

na iyo lang

nilampasan

gayong ako'y

umiibig

sa iyo ng

buong wagas

pansin mo ba

yaong luha

sa mata ko'y

biglang natak

pagkat ikaw

lang ang tangi

kong pag-ibig

hanggang wakas

maari bang

ako'y iyong

sulyapan man

kahit minsan

nang sumaya

naman itong

buhay ko sa 

daigdigan

kung sakaling

mapugto na

ang hiningang

aking taglay

tandaan mong

mahal kita

sa puso ko'y 

nag-iisa

Sa Dilag Niring Puso

SA DILAG NIRING PUSO

ni Gregorio V. Bituin Jr.

4 pantig bawat taludtod

dadalhin ko

ang tamis ng

iyong ngiti

sa isipan

at sa puso

ko'y tatatak

ang ngiti mong

katamisan

pagkat lagi

kang may lunan

sa buod ko't

katauhan

kaya sana'y

maging tayo

mula ngayo't

kailanman

tagumpay mo'y

tagumpay ko

pagkat kita'y

isa lamang

ang lungkot mo'y

aking lungkot

mahal kita't

tunay lamang

ikaw'y akin

ako'y iyo

ikaw'y di ko

iiwanan

panata ko

sa isipan

at sa puso

ay sumpaan

Ang Nawala Kong Inspirasyon

ANG NAWALA KONG INSPIRASYON

ni Gregorio V. Bituin Jr.

10 pantig bawat taludtod

wala na ang aking inspirasyon

sa ibang bansa na naglimayon

nilugmok na ako ng kahapon

paano na itong aking ngayon?

siya ba'y hanggang gunita na lang?

na di ko na ba masusumpungan

pagbabalik niya'y aking abang

huwag niya akong kalimutan

inspirasyon ko'y kailan kaya

makapiling muli ng makata

nabuburo ang aking pagkatha

ng obra mulang siya'y mawala

sana, ang bugtong kong inspirasyon

ay magbalik sa aming kahapon

upang buuin ang bagong ngayon

at kathain yaong nasa't layon

Alam kong mahirap mapag-isa

ALAM KONG MAHIRAP MAPAG-ISA

ni Gregorio V. Bituin Jr.

10 pantig bawat taludtod

alam kong mahirap mapag-isa

kaya yata ako isinilang

nang tayong dalawa'y magkasama

hanggang sa dulo ng walang hanggan

ayaw kong tuluyan kang mag-isa

narito ako't nagsusumamo

itinakda ba tayong dalawa

kaya narito ako sa iyo?

alam kong mahirap mapag-isa

kaya sasamahan kita, mahal

kahit pa saan ka man magpunta

saan pa mang lupalop dumatal

di ka na mag-iisa, sinta ko

pagkat lagi'y kasama mo ako

Ang tigas ng iyong ulo, mahal

ANG TIGAS NG IYONG ULO, MAHAL

ni Gregorio V. Bituin Jr.

10 pantig bawat taludtod

ang tigas naman ng iyong ulo

bakit naghahanap pa ng bago

gayong naririto naman ako

na tunay kung umibig sa iyo

ang tigas ng iyong ulo, sinta

ang nais ko kita'y makasama

huwag ka nang maghanap ng iba

halika na rito't magbalik ka

ang tigas ng iyong ulo, mahal

inilagay kita sa pedestal

ng puso kong di nagpatiwakal

sana puso ko'y di mapapagal

huwag matigas ang ulo, sinta

halika na't magsama na kita

Hindi totoong maikli lang ang panahon

HINDI TOTOONG MAIKLI LANG ANG PANAHON
ni Gregorio V. Bituin Jr.
13 pantig bawat taludtod

hindi totoong maikli lang ang panahon
kayraming tambay, nakatunganga maghapon
kayraming sa droga't alak ay nagugumon
nag-aaksaya ng kanilang mga taon

kayraming mga siga, nag-aastang maton
patapangan ng apog basta makalamon

huwag aksayahin ang malaking panahon
sa problema'y dapat positibo ang tugon
sarili'y suriin, buhay ba'y anong layon?
iwing buhay mo ba'y saan na paroroon?

ngunit iikli rin ang mahabang panahon
tulad ng pagnipis ng kanilang pantalon

Binartolinang Wika

BINARTOLINANG WIKA

ni Gregorio V. Bituin Jr.

12 pantig bawat taludtod

wikang Filipino'y nakatanikala

binartolina na ang sariling wika

kaya pati utak inaliping diwa

ibig mang umalpas di pa makalaya

mismong kababayan, kaybaba ng tingin

dinudusta-dusta ang sariling atin

mahina raw tayo't ang dayo'y magaling

mas maigi pa raw tayo'y paalipin

itinuturo nga sa mismong eskwela

Ingles ang magaling, dapat mag-Ingles ka

sa silid-aralan, titingalain ka

pagkat ito'y wika ng masasagana

bakit binusabos ang wikang sarili

atin ito't dapat maipagmalaki

salita ng bayan, wika ng bayani

kaya tayo'y dapat ditong kumandili

ang sariling wika'y ating palaguin

sa gobyerno't bayan ay ating gamitin

huwag papayagang wika'y dudustain

ng mga haragang ang diwa'y alipin

wikang Filipino ang wika ng bayan

kaakibat nitong puso't kaisipan

di dapat na ito'y yuyurak-yurakan

pagkat ito'y wika ng may kalayaan

Sa iyo muli, Ms. M.

SA IYO MULI, MS. M.

ni Gregorio V. Bituin Jr.

13 pantig bawat taludtod

hinahabol-habol kitang lagi ng tingin

ikaw ma'y paalis na o kaya'y parating

ikaw ma'y matutulog na o bagong gising

masilayan ko lamang ang ganda mong taring

at marinig ang tawa mong tumataginting

Tatlong Giya ng Buhay

TATLONG GIYA NG BUHAY

ni Gregorio V. Bituin Jr.

8 pantig bawat taludtod

Nasaan na tayo ngayon?

Patungo ba saan tayo?

Paano marating iyon?

Tatlong giya sadya ito

Sa bawat mga balakin

Tatlong giya'y aasahan

Sa anumang adhikain

Mga bunga'y makakamtan

Sa digmaan man o rali

Sa opisina o bukid

Tatlong giya'y siyang saksi

Kung pinto'y bukas o pinid?

Giya'y landas ng tagumpay

Na dapat gamiting husay.

Kaysarap mong hagkan, aking Ara

KAYSARAP MONG HAGKAN, AKING ARA
ni Gregorio V. Bituin Jr.

kaylambot ng iyong mga labi
at kaysarap hagkan
kaytamis ng iyong mga ngiti
sadyang kalulugdan

kaysayang kasama't walang lungkot
pagkat kaytabil mo
di ako sa iyo nababagot
kaydami mong kwento

tawa mo'y madaling makahawa
at ito'y mainam
pag kasama kita'y maginhawa
itong pakiramdam

sana'y lagi kang nariyan, Ara
maligaya ako
pagkat ikaw lang ang aking Ara
na iniibig ko

sakaling ikaw ay aking mabuntis
pakasal na kita
sa ginhawa't mga pagtitiis
sasamahan kita

Dalit kay Ara Mina

DALIT KAY ARA MINA

ni Gregorio V. Bituin Jr.

* ang dalit ay uri ng katutubong tula na may walong pantig bawat taludtod

O, magandang Ara Mina

pinakaiibig kita

tunay kang isang diyosa

na lagi kong sinasamba

ngiti'y kaytamis tuwina

walang kapantay ang ganda

sadyang nakahahalina

mukha't ngiti'y sadyang gara

ang puso ko'y dinidikta

na pakamahalin kita

iwing puso'y sumasaya

mahal kita, Ara Mina

kapintasan ay wala ka

tila perpekto ka, sinta

mula ulo hanggang paa

at napakabait mo pa

di ka lang simpleng artista

higit ka pa doon, Ara

nais kitang makasama

sa buong buhay ko, sinta

Eleksyon 2013: Trapo at Basahan

ELEKSYON 2013: TRAPO AT BASAHAN

ni Gregorio V. Bituin Jr.

15 pantig bawat taludtod

ang tawag ng dukha sa pulitiko: TRAPO

dahil wala raw silbi itong pulitiko

turing naman ng trapo sa dukha: BASAHAN

dahil nanlilimahid daw sa karukhaan

ngayong parating ang panibagong pagpili

pulitiko't dukha'y mag-uusap na muli

trapo'y mangangampanya't muling mangangako

sa dukha'y lalapit, trapo'y mabait kuno

pangako nila: buhay ng dukha'y gaganda

dahil sa boto, nagsusumamo sa masa

ngunit pag iyang pulitiko'y nagtagumpay

sa maralita ba, sila pa'y aagapay?

trapo't basahan ay maruruming panlinis

trapo'y nagmamalinis, dukha'y nagtitiis

ang trapo'y basahang pinaganda ang tawag

ngunit karumhan nila'y higit pa sa libag

Salamat sa ACF!

SALAMAT SA ACF!

ni Gregorio V. Bituin Jr.

14 pantig bawat taludtod

nakarating kami sa bayang Mae Sot sa Thailand

ng sampung araw at sa Burma'y isang oras lang

sa panahong sadyang di namin inaasahan

sapagkat wala sa plano sa kinabukasan

apat kaming mga Pinoy na nagtungo roon

ito'y dahil sa Active Citizenship Foundation

sa pag-isponsor ng lakbayin naming iyon

kung wala ang ACF, wala rin kami roon

ang Mae Sot ang bayan ng maraming nagsitakas

mula sa Burma dahil diktadurya'y kayrahas

at kayrami na roong aktibistang nautas

na yaong inadhika'y diktadurya'y magwakas

yaong galit sa dibdib ay mararamdaman mo

kaya hinangad nila'y totoong pagbabago

ang mga taga-Burma'y kaytatag ng prinsipyo

upang paglayang hangad ay makamtang totoo

nakita namin doon kung gaano kabigat

ng tungkulin at isyung dapat maisiwalat

kami doo'y natuto, sadya kaming namulat

sa ACF, maraming marami pong salamat

(Ako, kasama ang tatlo pa, ay namalagi ng sampung araw sa Mae Sot mula Setyembre 16 hanggang 25, 2012. Umalis kami ng Pilipinas ng Setyembre 15, 2012 at nakabalik sa bansa noong Setyembre 27, 2012. Naging kinatawan ang inyong lingkod ng grupong Free Burma Coalition-Philippines sa aming pagtungo roon. Inilathala ng Aklatang Obrero Publishing Collective ang isang 120-pahinang aklat na pinamagatang "Paglalakbay sa Mae Sot" na naglalaman ng 8 sanaysay at 88 tula noong Nobyembre 2012. Ang tulang ito'y hindi naihabol doon ngunit kailangan pa rin itong sulatin at ipaabot sa ACF ang taos-puso kong pasasalamat. Salamat din sa mga nakasama kong mga Pinoy doon na sina Jehhan Silva, Sigrid Jan Sibug at Raniel Carmona Ponteras, pagkat naging mabunga ang munti mang panahon ng aming pagsasama sa Mae Sot.)

Nagsinungaling ang Salamin

NAGSINUNGALING ANG SALAMIN

ni Gregorio V. Bituin Jr.

12 pantig bawat taludtod

tanong ng dalaga, "Salamin, salamin

pinakamaganda'y sino ba sa amin?

alam ng salamin ang matandang kwento

na kinwento naman noong kanyang lolo

paano ba niya ito masasagot

upang ang dalaga'y di naman mapoot?

pagkat yaong kwento'y may matinding aral:

di dapat mainggit ang sinumang hangal

paanong ang hangal ay pangangaralan?

gayong hangal na nga't bagsak ang isipan

magkalabang mortal sa matandang kwento

ang prinsesa't bruhang sa ganda nga'y tukso

sa prinsesang iyon ang bruha'y nainggit

pagkat ang prinsesa'y tunay na marikit

bruha'y laging tanong, "Salamin, salamin

pinakamaganda'y sino ba sa amin?"

na sasagutin ng "Maganda'y prinsesa"

at totoo lamang ang tugon sa kanya

hanggang ang dalawa'y naglabang totoo

nagpingkian sila kung maganda'y sino

nalo ang prinsesang sadyang mahinahon

mapagkumbaba na'y kaybait pa niyon

sadyang nananaig kung anong mabuti

at sa huli bruha ang nanggalaiti

kaya sa modernong tanong ng dalaga

pinakamaganda'y sino sa kanila

upang walang away, para sa salamin

ito'y kailangan nang magsinungaling

"pinakamaganda sa mundo’y ikaw na”

tugon ng salaming nagbuntong-hininga

pinakamaganda kahit di totoo

dalaga'y sumaya, wala na ring gulo

isip ng salamin, "Wala nang awayan

nagsinungaling man, gulo'y naiwasan."

iyan ang modernong kwento ng salamin

iwas na sa gulo'y nagpasaya pa rin

Ang mga prinsesang api

ANG MGA PRINSESANG API
ni Gregorio V. Bituin Jr.
12 pantig bawat taludtod

laging sinasagip ng isang prinsipe
ang kanyang prinsesang laging inaapi
sa kamay ng bruhang laging nanggugulpi
prinsesa'y kayganda, bruha'y pangit kasi

siya'y nakakulong sa may toreng garing
tulad ng kudyaping nalagot ang bagting
asam ng prinsesang tulong ay dumating
mailigtas siya ng kanyang Prince Charming

sa ganyan uminog ang maraming kwento
nang kabataan ko, at ngayon pa'y uso
tila di mamatay ang kwentong ganito
na pawang may aral sa bata sa mundo

sa kwento nga'y api ang mga prinsesa
sa modernong mundo, sila'y astang reyna
di sila maapi, lagi pang may gwardya
anumang iutos ay susundin sila

hanggang kwento lamang ang sila'y apihin
na ang hanap lagi'y kanilang Prince Charming
ngunit ang totoo, reyna kung ituring
di ba't sila'y bruha sa modernong tingin

o, prinsesang api sa kwentong pambayan
kaiba ang iyong uring pinanggalingan
sa totoong buhay, ikaw'y manlilinlang
ang masa'y luluhod sa iyong harapan

Saksi

SAKSI

6 pantig bawat taludtod

ni Gregorio V. Bituin Jr.

i.

karima-rimarim

ang nangyaring lagim

sa gitna ng dilim

puso'y naninimdim

naganap ang lihim

tanging saksi'y talim

ii.

nasasalamisim

ng pusong taimtim

rosas ay masimsim

sa punong malilim

iii.

edad labing-anim

suot niya'y itim

panibugho'y tiim

noong takipsilim

iv

huwag kang magtanim

ng poot, panimdim

Huwag mong pigilan ang aking pluma

HUWAG MONG PIGILAN ANG AKING PLUMA

ni Gregorio V. Bituin Jr.

11 pantig bawat taludtod

huwag mong pigilan ang aking pluma

ikaw ang lagi nitong dinidikta

pangalan mo'y tinatala ng tinta

habang ako'y nasa digma't pagbaka

sinusulat ang bawat nasaksihan

pag-ibig man ito o kamatayan

bawat pakikibaka'y tutulaan

magandang halimbawa'y tutularan

sinusulat ko'y dugo't sakripisyo

ng dukha't kumakayod na obrero

pinakakalat ang tamang prinsipyo

sa bawat isa'y nagpapakatao

kaya pluma ko'y huwag pipigilin

pagkat kayrami ko pang susulatin

ang mapaslang ako'y mas nanaisin

kaysa di magamit ang plumang angkin

Magpulitiko'y Di Biro

MAGPULITIKO'Y DI BIROni Gregorio V. Bituin Jr.
8 pantig bawat taludtod

magpulitiko'y di biro
pagkat iyong matatanto
pangako ka ng pangako
lagi namang napapako

mahirap kumandidato
di biro ang magserbisyo
tutulong sa mga tao
sa mga problema nito

ngunit di lahat ay lingkod
may pulitikong kurakot
ang kaban ang kinakayod
ang masa'y binuburaot

nagsusumamo sa masa
maiboto lamang sila
ngunit pag nakaupo na
masa'y di na maalala

huwag tularan ang trapo
na ang serbisyo'y negosyo
dapat kang magpakatao
kung magiging pulitiko

Dalawang Paraan Para Makalimot

DALAWANG PARAAN PARA MAKALIMOT

ni Gregorio V. Bituin Jr.

10 pantig bawat taludtod

dalawang paraan ang payo ko

sa iyo nang makalimutan mo

ang pagsintang nawala sa iyo

nang gumaan naman ang loob mo

una kong payo'y iyong pakinggan

sa isip mo siya'y kalimutan

at sa puso'y tanggaling tuluyan

natitiyak kong kaya mo iyan

ikalawa, ipalit mo ako

na sadyang umiibig sa iyo

maghihilom tiyak ang sugat mo

paghihilumin ng pag-ibig ko

ikaw ang rosas sa aking mata

tandaan mo, minamahal kita

sa buhay ko'y ikaw ang pag-asa

at di kita lilimutin, sinta

Ang Sumpit ng Paslit

ANG SUMPIT NG PASLIT

ni Gregorio V. Bituin Jr.

9 pantig bawat taludtod

patuloy ang laro ng paslit

habang tangan niya ang sumpit

bala'y balatong na malagkit

na kapag dumapo'y kaylupit

naglalaro habang mainit

sa labasan ang makukulit

habang ina'y tila ba galit

sa anak na nangungunyapit

itigil na ang larong sumpit

kung ito'y nakakapanakit

maglaro lang ng pangmabait

nang masaya ang mga paslit

aba'y huwag ka nang humirit

makuha ka sa isang sitsit

Ang Alagang Aso

ANG ALAGANG ASO

ni Gregorio V. Bituin Jr.

10 pantig bawat taludtod

tapat na kaibigan ng tao

ngunit sunud-sunuran sa amo

masaya na sa ibatong buto

handang lumaban para sa iyo

huwag ka lang sa kanya'y magtaksil

kundi'y masasagpang ka ng pangil

kaibigang tapat ngunit sutil

pag ginutom mo siya'y aangil

alam ng asong may karapatan

ang mga tulad niyang hayop man

kaya't aso'y iyong alagaan

pagkat tapat siyang kaibigan

tapat na tanod ng iyong bahay

ibang tao'y kakahulang tunay

ngunit pag aso mo na'y naglaway

ingat, baka rabis ang lumatay

Aktibista'y Tulad ng Ibon

AKTIBISTA'Y TULAD NG IBON

ni Gregorio V. Bituin Jr.

11 pantig bawat taludtod

"Birds of the same feather flock together," - old English saying

tulad ng ibon kaming aktibista

kolektibo sa pagkilos at pasya

walang iwanan sa bawat pagbaka

upang itayo ang bagong sistema

sakali mang masugatan ang pakpak

di na makalipad, mapapahamak

magtutulungan pa rin kaming tibak

upang kami'y di tuluyang bumagsak

tulad ng ibon, kawan-kawan kami

pag isa sa ami'y di mapakali

tiyak problema'y di maikukubli

pagkat ramdam namin, di man magsabi

tulad ng ibong may iisang langkay

sa paninindigan ay di bibigay

ganito ang pinili naming buhay

di magsisisi kami ma'y mamatay

Hamon sa bawat isa

HAMON SA BAWAT ISA

ni Gregorio V. Bituin Jr.

10 pantig bawat taludtod

(binasa sa harap ng mga bisita ng KPML bilang bahagi ng presentasyon kasama ng mga banda, sa naganap na pagpupulong sa conference room ng ZOTO, Enero 14, 2013)

dukha'y kaydami sa kalunsuran

sadyang lugmok sa karalitaan

walang almusal, walang hapunan

paminsan-minsan, may tanghalian

maralita'y di hiwa-hiwalay

sa kalagayan nila sa buhay

hirap at dusa'y magkakaugnay

sa puso't diwa'y nakabalatay

kaming mga dukha'y binusabos

nasa putikang kalunos-lunos

pusaling sa amin nagpaamos

kailan kami makararaos

sa harap ng ganitong sitwasyon

dapat tayo'y laging mahinahon

magkaisa sa prinsipyo't layon

manindigan tayo hanggang ngayon

sa bawat isa'y hamon ko'y ito

sitwasyong ito'y dapat mabago

magkaisa, ikaw, ako, tayo

itayo ang lipunang makatao

magkaisa tayo, maralita

pati silang taga-ibang bansa

magtulungan tayong mga dukha

sa isang mapagpasyang adhika

Pagkaing De Sabog

PAGKAING DE SABOG

ni Gregorio V. Bituin Jr.

10 pantig bawat taludtod

walang ulam sa hapag-kainan

mayroong kaunting kanin lamang

na di pa makabusog sa tiyan

dahil kanin lang, di malasahan

maigi't mayroon silang asin

upang magkalasa ang pagkain

isasabog ang asin sa kanin

upang magmistulang ulam man din

ang buhay ng dukha'y sadyang lubog

sa hirap, ang pagkai'y de sabog

ng asin, katawan nila'y lamog

paano kaya sila lulusog

ang pagkaing de sabog ay banta

sa kalusuga't buhay ng dukha

ngunit anong ating magagawa

papayag bang basta bumulagta

sistemang ito'y dapat baguhin

tungo sa marangal na layunin

na itayo ang lipunang atin

na di na de sabog ang pagkain