Ngayong Eleksyon

NGAYONG ELEKSYON
ni Gregorio V. Bituin Jr.
10 pantig bawat taludtod

huwag iboto ang mga duwag
nang buhay nati'y di maging hungkag
nang batas nati'y di nilalabag
nang di umupo'y walang habag

huwag iboto ang mga gago
na isip laging negatibo
imbes na tumulong sa tao
serbisyo'y ginawang negosyo

ibagsak ang mga tiwali
iboto sila'y pagkakamali
kung di kurakot, palahingi
di sila dapat manatili

iboto natin ang nararapat
huwag yaong nagpapakabundat
sa kabang bayan ay sumisilat
at taumbayan ang inaalat

iboto natin ang matitino
sa atin maaring makahango
huwag elitistang maluluho
kundi pangarap nati'y guguho

Salamat, Ara Mina, Diyosa

SALAMAT, ARA MINA, DIYOSA

ni Gregorio V. Bituin Jr.

13 pantig bawat taludtod

tinititigan ko ang mukha sa magasin

totoong kayganda niya't ng ngiting angkin

yaong magasin nga'y nais ko sanang bilhin

ngunit walang perang pambiling babasahin

marapat sambahin ang kaygandang diyosa

siya ang nasa puso ko't isip tuwina

sinasambit-sambit ko nga ang ngalan niya

larawan lang, sa harapan ko'y wala siya

kaygandang Ara Mina, ako'y binihag mo

ngunit hanggang pangarap lang kita, alam ko

gayunman, naging inspirasyon kang totoo

upang magsipag ako't magsikap ng todo

maraming salamat, Ara Mina, sa ngiti

alam kong ngiti mo'y di isang palamuti

pinagaan mo ang diwa, loob ko't budhi

inspirasyon kang sa puso’y di mapapawi

Sa Araw ng mga Ina

SA ARAW NG MGA INA
(HAPPY MOTHER'S DAY)
ni Gregorio V. Bituin Jr.
13 pantig bawat taludtod

minamahal naming ina, dakila kayo
kayong nagluwal sa aming mga anak nyo
kung wala kayo, kami kaya’y naririto?
wala, wala kami, ina, kung wala kayo!

kaya kami sa araw ninyo’y nagpupugay
pagkat kayo’y kasama sa saya at lumbay
liwanag kayong nagbigay aral at gabay
sa amin, mabigo man kami’t magtagumpay

kami’y hinugot ngunit di sa inyong tadyang
kami’y hinugot sa inyong sinapupunan
kaming sanggol sa loob ng siyam na buwan
na minahal nyo’t talagang inalagaan

salamat po sa inyo, ina naming mahal
mahal namin kayong sa amin ay nagluwal
at umukit ng aming pagkatao’t dangal
marapat lang kayong iluklok sa pedestal

Tanaga sa Pagbangon

TANAGA SA PAGBANGON

ni Greg Bituin Jr.

pagbabago ang hamon

sa obrero at nasyon

manggagawa'y babangon

adhika'y rebolusyon

Mensahe sa Praning

MENSAHE SA PRANING
ni Gregorio V. Bituin Jr.
11 pantig bawat taludtod

astig ka pala't hari ng lansangan
sa kapwa tao'y isang lapastangan
bakit ka ba naging isang sukaban
at dukha'y hinahamak mong tuluyan

pulos droga ang iyong pinuhunan
sinisira mo pati kabataan
inaapi pati kababaihan
krimen ang iyong pinagbibidahan

nasa utak lagi'y pagpapayaman
kahit na mangyurak ng karapatan
bawat negosyo'y dapat pagtubuan
kahit ang kapwa'y pinagtutubuan

langit ba ang iyong pinanggalingan
kaya kapwa'y pinagmamataasan
ari mo pala'y laksang kayamanan
madadala mo ba sa langit iyan

kung di ka nagmula sa kalangitan
impyerno ba ang iyong pinagmulan
kaya mahilig pagsamantalahan
ang iyong kapwa't mga kababayan

payo ko'y magbago ka ng tuluyan
upang kapwa mo'y di mo sinasaktan
kundi'y lalaban kami ng sabayan
upang kagaguhan mo'y mapigilan

Maghanda Nang Di Mapahiya

MAGHANDA NANG DI MAPAHIYA

ni Gregorio V. Bituin Jr.

9 pantig bawat taludtod

ang mga taong hindi handa

kadalasang napapahiya

nanginginig ang puso't diwa

kaya uuwing lumuluha

tila sila napariwara

pati pagkatao'y nawala

pakiramdam nila'y kawawa

sa mata ng naroong madla

kaya sa susunod, maghanda

nang hindi naman mabibigla

mahirap muling mapahiya

at baka lalong matulala

Kung Walang Corrupt, Walang Mahirap?

KUNG WALANG CORRUPT, WALANG MAHIRAP?
ni Gregorio V. Bituin Jr.
10 pantig bawat taludtod

kung walang corrupt, walang mahirap
kung may corrupt, aba'y may yumaman
kinurap nila'y tinagong ganap
kinurap nila kaya'y nasaan?

kung walang corrupt, walang mahirap
ito'y isang magandang islogan
ng kandidatong di naghihirap
kundi talaga namang mayaman

kung walang corrupt, walang mahirap
ito ba'y di kasinungalingan
bakit kayrami pa ring mahirap
gayong di corruption ang dahilan

kayraming dinemolis nang ganap
kayraming nawalan ng tahanan
kayraming dukhang di nililingap
at lupa nila'y pinag-agawan

kayrami nang di na nangarap
na sila sa buhay ay aalwan
nabuhay daw silang naghihirap
hanggang sa kanilang kamatayan

manggagawa'y laging nagsisikap
sa trabahong pinaghaharian
ng mga kapitalistang corrupt
lakas-paggawa'y pinagtubuan

pati magsasaka'y naghihirap
gayong kanila ngang pinagyaman
ang mga lupa, ngunit nalasap
nila'y dusa, luha't karukhaan

kahit walang corrupt, di mahirap
ang bayang itong pinagyayaman
ng mga obrerong nagsisikap
upang pamilya'y mabuhay lamang

maraming yumaman dahil corrupt
at walang pakialam sa bayan
prinsipyo'y ipinagbiling ganap
sa mga elitistang gahaman

dapat silang talupan sa harap
ng bayang itong nilapastangan
nilang sadyang mga mapagpanggap
at sanhi ng ating kahirapan

Tatapusin Daw Ang Kahirapan

TATAPUSIN DAW ANG KAHIRAPAN
ni Gregorio V. Bituin Jr.
13 pantig bawat taludtod

tatapusin na raw niya ang kahirapan
ito ang sabi ng kandidatong mayaman
sa media'y kanyang ipinangangalandakan
ito ang sa masa'y pinangakong tuluyan

sa dagat ng basura'y nakaligo ka ba?
at nakatulog ka na rin ba sa kalsada?
maysakit na kapatid ba'y namatayan na?
pambobola ng kandidato'y ramdam na ba?

nagpagawa ng bahay, nagbenta ng lote
pinagtutubuan sinumang makabili
hanggang sa yumaman ang pamilya't sarili
sa kanya kaya, ikaw ba'y napapakali?

kaymahal ng kanyang bahay para sa dukha
sadyang di abot-kaya nitong maralita
tadtad ng pangako ang di-botanteng bata
habang walang mapangako sa manggagawa

ginamit sa propaganda ang mga bata
sa radyo't telebisyon, pangako'y ginhawa
basta't maboto siya'y wala na raw dukha
at mga trabaho raw sa masa'y babaha

ang kahirapan daw ay kanyang tatapusin
nang di sinasabi paano nya gagawin
paano ba wawakasan ang hirap natin
ito ba'y salita lang, di kayang tuparin

isinisigaw niya'y sipag at tiyaga
ang dahilan kaya yumaman siyang bigla
ngunit bakit kayraming nawalan ng lupa
dahil gustong yumaman, iba'y kinawawa?

grabe nang mambola ang mga kandidato
para makuha lang ang ating mga boto
binibilog nila ang ating mga ulo
tinatahak natin ang landas ng bolero

tulad ba niya'y karapat-dapat ihalal
o baka tulad ng iba'y isa ring hangal
mabulaklak ang dila ngunit amoy kanal
tila bayan ay ibubulid sa imburnal

ang kahirapan nga ba'y kanyang matatapos
kung paano ito'y di nya masabing lubos
tila ba sa katwiran siya'y kinakapos
basta raw ito ang pangako niya, Tapos!

Ang Trapo Kung Mang-uto

ANG TRAPO KUNG MANG-UTO

ni Gregorio V. Bituin Jr.

13 pantig bawat taludtod

pinasasarap nila ang bawat pangako

sadyang tinitimplahan upang malasahan

ng sinumang akala nila'y mauuto

upang manalo lamang sila sa halalan

ganyan ang mga trapong kapara'y hunyango

sambayanan ang kanilang binubudburan

ng asin ng pangakong madalas mapako

at ang masakit, pako na'y kinakalawang

dapat ibagsak iyang trapong nang-uuto

nais lang nilang sa atin ay makalamang

masa'y balewala na pag sila'y naupo

serbisyo'y negosyo pala ng mga hunghang

kaya kilalanin ang mga kandidato

uriin sila kung sila'y para sa masa

kilatising mabuti iyang mga trapo

bago sambayanan ay muling mabiktima

tulatext - Iboto ang Nasa Budhi

IBOTO ANG NASA BUDHI (tulatext)
ni greg bituin jr.
8 pantig bawat taludtod

pera'y pinamamahagi
ng trapong mapagkunwari
tanggapin mo ang salapi
na kinurakot ng imbi
iboto ang nasa budhi
ng bukas ay di lugami

Una Kong Pamamaalam

UNA KONG PAMAMAALAM
ni Gregorio V. Bituin Jr.
20 pantig bawat taludtod

1
Malugod kong inihahandog sa sambayanan ang buhay ko’t bisig
Upang baguhin ang lipunan at sa sinuman ay di palulupig
Kalakip ang prinsipyong sa pagkakapantay ng lahat nasasalig
Kasama ng maraming aktibistang sariling dugo’y idinilig
Ito ako, mga kaibigan, kasama, pamilya, iniibig

2
Ako’y nalulugmok habang nakikitang ang bayan ay nagdurusa
Habang nagpapasasa sa yaman ang iilang trapo’t elitista
Magpapatuloy akong lingkod nyo sa larangan ng pakikibaka
Habang tangan-tangan ko sa puso’t diwa ang prinsipyong sosyalista
Ako’y handang mamatay sa paglaban sa uring mapagsamantala

3
Mamamatay akong nababanaag ko ang tagumpay ng obrero
Laban sa kasakiman nitong masibang sistemang kapitalismo
Mamamatay akong nakikibaka laban sa kayraming berdugo
Na nagpapayaman sa dugo’t pawis ng manggagawa’t dukhang tao
Aktibista akong lalaban hanggang dulo, lalabang taas-noo

4
Noong ako’y musmos pa’t bagong nagkakaisip, aking pinangarap
Na upang umunlad sa buhay na ito, ako’y sadyang magsisikap
Magsisipag ako sa trabaho’t babatahin ang lahat ng hirap
Ngunit habang lumalaki’y napagtanto kong kayraming mapagpanggap
Habang sanlaksa ang dukhang kahit konting ginhawa’y di maapuhap

5
Sa eskwelahan, pinag-aralan ko ang historya’t matematika
Pinag-aralan pati na agham, wika, panitikan, at iba pa
Natutunan kong nabibili ang edukasyon ng mga maykaya
Kaybaba ng sahod ng manggagawa, walang lupa ang magsasaka
Ang babae’y api, demolisyon sa dukha, habol ang manininda

6
Sa mura kong isipan noon, kayraming umuukilkil na tanong
Bakit kayrami ng dukha, at may iilang nagpapasasang buhong
Kaya sa paglaon, sa mga naghihirap, pinili kong tumulong
Laban sa kasakiman ng iilan na bayan na ang nilalamon
Sa kabulukan nila, ang sigaw ng pagbabago’y nagsilbing hamon

7
Sa sarili kong paraan, tumulong akong sa puso’y may ligaya
Hanggang sa kalaunan, ang lipunang ito’y pinag-aralan ko na
Sumama ako sa mga rali at naging ganap na aktibista
Pinasok ang paaralan, mga komunidad at mga pabrika
Sa puso’t diwa’y sigaw: babaguhin natin ang bulok na sistema

8
Nag-organisa’t nagsulat akong sa puso’y may namumuong galit
Sa sistema ng lipunang sa ating kapwa tao’y sadyang kaylupit
Napakaraming isyung laging ang tanong ko sa isipan ay bakit
Bakit tinanggal kayo sa pabrika, bakit ang lupa nyo’y inilit
Bakit nauso ang kontraktwalisasyon, bakit mundo’y pawang pasakit

9
Tiniis kong lahat kahit mawalay pa sa kinagisnang pamilya
Tiniis pati pagod, bugbog at pukpok sa gaya kong aktibista
Tiniis ang gutom, kawalang pera, basta’t makaugnay sa masa
Dahil ako’y aktibistang nakibaka upang kamtin ang hustisya
Para sa manggagawa’t dukha tungo sa pagbabago ng sistema

10
Halina’t pagsikapan nating itayo ang lipunang makatao
Gibain na natin ang mga dahilan ng kaapihan sa mundo
Pangunahing wawasakin ang relasyon sa pag-aaring pribado
At iaangat sa pedestal ang hukbong mapagpalayang obrero
Habang dinudurog ang mga labi ng sistemang kapitalismo

11
Pagpupugay sa lumilikha ng yaman, kayong uring manggagawa
Magkaisang tuluyan kayong ang taguri’y hukbong mapagpalaya
Magkabuklod kayong lagutin ang nakapulupot na tanikala
Magkapitbisig kayong durugin ang elitista’t burgesyang diwa
Pagkat nasa mga kamay nyo ang pag-asa ng masang kinawawa

12
Sa tunggaliang ito’y may mga magagapi’t may magtatagumpay
Ngunit kung sakali mang sa labanang ito’y tanghalin akong bangkay
Ako’y nakahanda na sa pagtigil sa mahaba kong paglalakbay
Pagkat natapos na rin sa wakas ang buhay kong sakbibi ng lumbay
Sa oras na iyon, panahon nang katawan kong pagal ay humimlay

13
Di na mahalaga kung mga tulad ko’y tuluyang malimutan na
Basta’t mabuhay pa rin ang pangarap nating sosyalismo sa masa
Kung sakaling mabuhay ako dahil sa tula ng pakikibaka
Ipinagpapasalamat ko itong labis sa mga nagbabasa
Na ako pala’y nakatulong magmulat kahit sa mundo’y wala na

14
Paalam, mga kasama, kapatid, kapamilya, at kaibigan
Mananatili akong sosyalista sa aking puso at isipan
Mamamatay akong aktibista, kahit na ako’y abang lilisan
Taas-kamao akong aalis nang walang bahid ng kahihiyan
Paalam, paalam, magpatuloy man ang mga rali sa lansangan

Aktibista Kami, Hindi Pulubi

AKTIBISTA KAMI, HINDI PULUBI
ni Gregorio V. Bituin Jr.
11 pantig bawat taludtod

aktibista kami, hindi pulubi
aktibistang sa bayan nagsisilbi
ngunit bakit kinakawawa kami
turing sa amin ay mistulang api

tinanggap namin ang buhay na kapos
upang ipaglaban ang masa't musmos
dumidiskarte kami ng panustos
ngunit hindi kami namamalimos

sapagkat kami'y mga aktibista
dahil sa prinsipyo'y nagsama-sama
naglilingkod kaming tapat sa masa
sama-sama kaming nakikibaka

aktibista't pulubi'y naghihirap
ngunit magkaiba sila nang ganap
isa'y bagong sistema ang pangarap
habang isa'y pawang limos ang hanap

aktibista kami, hindi pulubi
kahit kung minsan, nanghihingi kami
yaon naman ay hindi pansarili
kundi panggagastos sa mga rali

pagkat ang rali'y mahalagang porma
ng aming pagkilos, pakikibaka
bagong sistema ang inaanyaya
ng mga tulad naming aktibista

aktibistang para sa manggagawa
at hindi pulubing kinakawawa
aktibistang sosyalismo'y adhika
at hindi pulubing prinsipyo'y wala

aktibistang para sa sambayanan
at hindi pulubing niluluraan
aktibistang handa na sa paglaban
at hindi pulubing niyuyurakan

kung nais mong tumulong, tumulong ka
huwag ka nang magdalawang-isip pa
samahan kami sa pakikibaka
hanggang ganap na manalo ang masa

aktibista kami, hindi pulubi
prinsipyo nami'y di ipinagbibili
sa pakikibaka'y nariyan kami
handang ipagtanggol ang masang api

Sugatan sa Protesta

SUGATAN SA PROTESTA
ni Gregorio V. Bituin Jr.
15 pantig bawat taludtod

ilang ulit na bang manggagawa'y di mapakali
dahil namumuno sa bayan ay di nagsisilbi

pag sila'y nagpoprotesta sa maling patakaran
tubig ng bumbero ang handog ng pamahalaan

bilang aktibista'y marapat akong makiisa
sa pagkilos nila'y di pwedeng di ako kasama

hawak ang plakard na ang mensahe'y tumatagos
sa puso ng nakakaunawa't binubusabos

susugod na sa Mendiola o kaya'y sa Kongreso
nang maparating namin ang mensahe sa gobyerno

ngunit kung ang gobyerno'y di nagsisilbi sa bayan
duduruging pilit yaong lakas ng sambayanan

maraming nasasaktan, maraming nagkakapilay
karapatang magpahayag, mistulang gerang tunay

duguan ang plakard, may namatay, may naapakan
ngunit uring manggagawa'y tunay na lumalaban

para sa karapatan, para sa bayang matino
para sa hustisya, tumilamsik ang dugo

ilang ulit na ba akong nasugatan sa rali
nagkagalos at sugat man, di ako nagsisisi

dahil ang pagsama ko'y pagsama sa kasaysayan
tungo sa isang sistemang dapat lang mapalitan

mga sumama sa protesta'y nanindigang tunay
para sa tunay na pagbabago't magandang buhay

Mga Trapong Hunyango

MGA TRAPONG HUNYANGO
ni Gregorio V. Bituin Jr.
10 pantig bawat taludtod

sa kampanyahan ay kaybibilis
kung mangako sila'y kaytatamis
nag-aastang pawang malilinis
ang puso ng mga petiburges
gayong pawang sariling interes
ang pinaggagawa nilang labis
pag sa tubo'y humahagibis
silang trapong hunyango ang bihis
ang sa masa itong umaamis
pag naupo'y dapat lang maalis

Banoy, ang Pambansang Ibon

BANOY, ANG PAMBANSANG IBON
ni Gregorio V. Bituin Jr.
10 pantig bawat taludtod

noon, maya ang pambansang ibon
banoy naman ang pambansa ngayon
dapat palitan ang mayang yaong
simbolo ng kahinaan noon

banoy na'y sa bansa'y kinilala
laki't lakas ang simbolo niya
sa bansang sinakbibi ng dusa
sa bansang naging api ang masa

ngunit may malaki bang epekto
itong pagpapalit ng simbolo
nanggaya lang sa Amerikano
na simbolo rin ang ibong ito

nasa ilalim pa ba ang bansa
ng kapangyarihan ng banyaga
marahil, marahil ganito nga
kung bayang sarili pa’y kawawa

ngunit banoy ay mas maigi pa
kaysa isang maliit na maya
kunwari bansa'y di nagdurusa
pagkat ekonomya'y maunlad na

banoy ay simbolo ng pag-asa
di na mahinang tulad ng maya
di na bansang sakbibi ng dusa
sinisimbolo'y lakas ng masa

Banoy - sa Ingles ay Philippine Eagle, a.k.a. monkey-eating eagle

Pera at Konsensya

PERA AT KONSENSYA
ni Gregorio V. Bituin Jr.
11 pantig bawat taludtod

Bulung-bulungan: "May nakaipit ba
Diyan sa polyeto nyong dala-dala
Kung wala, kandidato nyo'y pasensya
Purdoy pala't walang kapera-pera"

Pagkat dala ng kandidatong ito
Ay ang panawagan ng pagbabago
Baguhin na ang sistema ng trapo
Tanggalin na ang trapo sa gobyerno!

Kaya ibinilin namin sa masa:
"Hala, sige't tanggapin nyo ang pera
Ngunit iboto ang nasa konsensya
Para sa bukas ng inyong pamilya."

"Tutal yaong ipinamudmod diyan
Ay pera mula sa kaban ng bayan
Na kinurakot ng mga gahaman
Kaya masa sa trapo'y walang utang."

Dalit ng Dalita

DALIT NG DALITA
ni Gregorio V. Bituin Jr.

nangangarap ang dalita
lampasan ang pagkadukha
gamit ang lakas-paggawa
sa ganito sila'y handa

* dalit - tulang may walong pantig bawat taludtod

Itlog, Kamatis, Kapeng Barako

ITLOG, KAMATIS, KAPENG BARAKO
ni Gregorio V. Bituin Jr.
14 pantig bawat taludtod

sa pag-init ng tubig, kayraming pagbabago
at makikita mong magkaiba ang epekto
tumigas ang itlog; kamatis, lumambot dito
habang kumulong tubig, kaylinaw pa rin nito
subukang tubig ay lagyan ng kapeng barako
ang kumulong tubig ay manlalabong totoo
kaya kung suriin ang mga bagay na ito
pinakuluang bagay ay di pare-pareho
kaya itong itlog, kamatis, kapeng barako
parehong pinakuluan, iba ang epekto
ito'y aral na kaisipang diyalektiko

Diwang Mandirigma

DIWANG MANDIRIGMA
ni Gregorio V. Bituin Jr.
13 pantig bawat taludtod

kaming aktibista'y may diwang mandirigma
nakahandang mamatay para sa adhika
isang paa'y nasa hukay, isa'y sa lupa
prinsipyo'y ilalaban hanggang sa tumanda

kaming aktibista'y tapat sa adhikain
hindi kami duwag sa aming simulain
ang bulok na sistema'y papalitan namin
ng sistemang pantay-pantay para sa atin

kung kamatayan ang aming kakaharapin
kami'y nakahanda nang ito'y sagupain
ang kaaway ng masa'y aming susugpuin
ang mapagsamantala'y aming bibiguin

sapagkat kaming aktibista'y mandirigma
matatag ang puso at palaban ang diwa
ang alab ng pakikibaka'y di huhupa
titigil lang kami pag nabaon sa lupa

ngunit habang buhay pa kami't humihinga
patuloy pa rin kami sa pakikibaka
kaming mandirigma'y talagang lalaban pa
tuloy kami hanggang mabago ang sistema

Ang proyektong Chico Dam

ANG PROYEKTONG CHICO DAM
ni Gregorio V. Bituin Jr.
14 pantig bawat taludtod

ang gobyerno't World Bank, nagbabaga ang proyekto
nais nilang tayuan ng dam ang Ilog Chico
ngunit mga katutubo'y di sang-ayon dito
pagkat libong tao, kalikasa'y apektado

aburidong nagtanong ang isang inhinyero
kay Macliing Dulag, "Nahan ang inyong titulo
sa lugar na itong tatayuan ng proyekto?"

si Macliing, respetadong pinuno ng tribo:
"Tinatanong mo kung pag-aari namin ito
kaya sa amin, isang titulo ang hanap mo?
di ba't mas nauna pa ang lupa kaysa iyo?
kaytagal na ng lupa'y aariing paano?
maglaho man tayo, ang lupa pa ri'y narito"

isang gabi, si Macliing, binaril ng todo
panahon iyon ni Marcos, Abril Bente Kwatro
nagbuwis siya ng dugo, bayani ng Chico
tao'y nag-alsa, di na tinuloy ang proyekto
Macliing Dulag, lider at bayaning totoo

24 Abril 2010, ang ikatatlumpung anibersaryo ng kamatayan ni Macliing Dulag, magiting na lider at bayani ng kalikasan; pinaslang siya noong 24 Abril 1980

Ang Kwarta

ANG KWARTA
ni Gregorio V. Bituin Jr.
10 pantig bawat taludtod

kwarta'y kalakaran sa lipunan
ito ang batayan ng palitan
ng samutsari sa kalakalan
saanman dito sa daigdigan

kwarta ang saligan ng mayaman
kaya mistulang kagalang-galang
saligan din ng nahihirapan
kaya nabatbat ng karukhaan

pambili ng pangangailangan
pagkain, kasuotan, tirahan
pati na respeto't karangalan
basta't may kwarta ka'y ihihirang

subukang ikaw nito'y mawalan
maralita kang kalilimutan
at pati dangal mo'y yuyurakan
parang di kasapi ng lipunan

pamilya'y winasak ng kawalan
nasisira pati katinuan
tiyak na ang iyong kagutuman
saanman lagi kang maiiwan

kababayan ka man o dayuhan
kwarta itong pinag-uusapan
bawat tao ito'y kailangan
pagkasilang hanggang kamatayan

Sa 'War Room' ng Propagandista

SA 'WAR ROOM' NG PROPAGANDISTA
ni Gregorio V. Bituin Jr.
15 pantig bawat taludtod

dapat may sariling silid yaong propagandista
kung saan naroon ang gamit na pampropaganda
naririyan ang telebisyon, radyo, dyaryo, mapa
kompyuter, calculator, aklat, ruler, at iba pa

dapat may bentilador din nang hindi pagpawisan
at meron ding comfort room na maaring pagbawasan
aparador, mesa, silya, paliguan, sampayan
may stock na pagkain, lulutuin, at lutuan

may pisara’t corkboard na pagtutusukan ng memo
bolpen, lapis, papel, charger, at kailangan dito
may cellphone, fax machine, refigerator, telepono
at may aklat na “Art of War” ng maestrong si Sun Tzu

ilan ito sa nasa ‘war room’ ng propagandista
na makatutulong sa dakilang trabaho niya
upang malikhang sadya ang propaganda ng masa
propaganda para sa masa at tungo sa masa

higit sa lahat, ang propagandista’y naroroon
minsan nagsasaliksik ngunit di naglilimayon
at pinagsisikapang maabot ang nilalayon
ng propagandang nilikha’t inihanda sa ‘war room’

Caesar, Brutus, Marco Antonio at Propaganda

CAESAR, BRUTUS, MARCO ANTONIO AT PROPAGANDA
ni Gregorio V. Bituin Jr.
11 pantig bawat taludtod

napakahalaga ng propaganda
mula pa kalakaran noong una
gaya ng nangyari noon sa Roma
nang paslangin ang isang lider nila

si Julius Caesar noon ay may plano
na tumakbo sa kanilang Senado
ngunit merong nainggit yata dito
kaya't plinano nang patayin ito

kaibigang matalik na si Brutus
ang nagmamahal sa kanya ng lubos
ngunit mas mahal nito'y bayang kapos
at ito'y nagplano laban kay Julius

takot silang si Caesar ang mamuno
dahil baka tao'y ipagkanulo
magpapayaman si Caesar sa luho
at itong bayan ang matutuliro

higit pa kay Caesar ang pagmamahal
ni Brutus sa Romang nasa kapital
at kung si Caesar ang nasa pedestal
ang bayan ay parang nagpatiwakal

kaya si Brutus kay Caesar tinarak
sa puso yaong matalas na tabak
sa nangyari ang bayan ay nasindak
ang galit nila sa puso'y sumulak

ngunit poot nila'y nahimasmasan
nang si Brutus ay agad nangatwiran
na dapat lamang si Caesar mapaslang
pagkat ambisyoso't kawawa'y bayan

kaya kay Caesar ang bayan nagalit
mabuti't napaslang raw siyang pilit
kaysa ang Roma'y kanya raw magamit
sa pansarili nitong pagkaganid

pinaslang si Caesar para sa Roma
upang mapangalagaan daw sila
kaya si Brutus, bayaning nanguna
tagapagtanggol ng Roma't ng masa

ngunit lahat ito'y nabalewala
nang si Marco Antonio'y nagsalita
at binaligtad ang mga winika
ni Brutus habang siya'y lumuluha

at sa kanyang bibig ay namutawi
yaong makahulugang talumpati
kay Caesar panay ang kanyang papuri
habang si Brutus ang dinuduhagi

kaya ang bayan ay muling nagalit
kay Brutus ay agad silang lumapit
ipinakita ang kanilang ngitngit
ngunit sina Brutus ay nakapuslit

sa kasaysayang ito'y makikita
kung paano ang pagpopropaganda
talas ng katwiran ng bawat isa
lalo't labanang kaharap ang masa

kaytindi ng aral ng kwentong ito
na sa tunggalian ay mananalo
kung nasa katwiran at nasa tyempo
propaganda'y matatanggap ng tao

Propagandista'y Di Dapat Laging Nasa Upuan

PROPAGANDISTA'Y DI DAPAT LAGING NASA UPUAN
ni Gregorio V. Bituin Jr.
15 pantig bawat taludtod

propagandista'y di dapat laging nasa upuan
baka mapagkamalang nagpapalaki ng tiyan
propagandista'y dapat nakakasama sa laban
upang magbigay inspirasyon sa nasa labanan

pagkat propaganda'y di lang mga bandila't papel
kundi paano lalabanan ang mga hilahil
pampalakas ng loob ng masa't di pasisiil
nandudurog ng katunggali kahit walang baril

Agrabyado ang Bayan kay Agra

AGRABYADO ANG BAYAN KAY AGRA
ni Gregorio V. Bituin Jr.
13 pantig bawat taludtod

sa ating bayan pa ba ay may katarungan?
abswelto ang mga suspek na Ampatuan?
utak ng masaker, wala raw kasalanan?
lalaya sina Zaldy't Akmad Ampatuan?
DOJ Sec. Agra, AGRAbyado ang bayan!

mga prosekyutor ay agad nagprotesta
di raw nila susundin ang atas ni Agra
pagkat mayroon daw matinding ebidensya
na utak nga sa masaker itong dalawa
kaya bakit nga ba mapapalaya sila?

si Agra'y dating abogado ng pangulo
kaya ano ngang mapapala natin dito
Ampatua'y isang dahilan ng panalo
ni Arroyo upang makaupo sa pwesto
aba, aba, itong bayan nga'y AGRAbyado!

kaya buong bayan ay agad nagprotesta
maraming nagrali, nagpunta ng kalsada
sigaw nila'y "Huwag babuyin ang hustisya!
mga utak ng masaker, dapat magdusa
silang pumatay ng sibilyan, dyronalista!"

naghaharing uri'y naglalaro na naman
pinaglalaruang muli ang sambayanan
ang sambayanan ay di papayag na lamang
pagkat nasa panig nila ang katarungan
dapat nagmasaker mapiit nang tuluyan!

Trapong Hunyango

TRAPONG HUNYANGO
ni Gregorio V. Bituin Jr.
11 pantig bawat taludtod

mga trapo'y kadalasang nangangako
nang maboto ngunit laging napapako
dahil pag nasa pwesto na't nakaupo
simple ang mensahe ng trapong hunyango
babawi agad nang gastos ay tumubo
sa blangkong mensahe, baya'y nasusubo

Mga Trapo'y Ibagsak

MGA TRAPO'Y IBAGSAK
ni Gregorio V. Bituin jr.
10 pantig bawat taludtod

ninais namin ang pagbabago
ngunit bakit kandidato'y trapo
ano bang maaasahan dito
pag nahalal na ang trapong ito

wala, wala ngang maaasahan
sa trapo ang ating mamamayan
pagkat trapo'y tulad ng basahan
nililinis ay kaban ng bayan

sa eleksyong sa bansa'y daratal
pag mga trapo uli'y nahalal
tayo'y para nang nagpatiwakal
parang ang pagkatao'y sinakmal

pagkat ang mga trapo'y tiwali
punung-puno ng pagkukunwari
huwag tayong magbakasakali
na titino pa ang trapong imbi

ibagsak natin ang mga trapo
sila'y kayrami na sa gobyerno
trapo'y di naman nagseserbisyo
sa'ting bayan kundi sa negosyo

Iboto ang Wasto, Iwasto ang Boto

IBOTO ANG WASTO, IWASTO ANG BOTO
ni Gregorio V. Bituin Jr.
8 pantig bawat taludtod

iboto natin ang wasto
iwasto natin ang boto
ito ang dapat sa trapo
na sadyang tumarantado
sa mga dukhang narito

halina't tayo'y magnilay
di ba't nasa ating kamay
yaong botong matagumpay
kaya ibagsak ng tunay
ang mga trapong pasaway

iboto natin ang wasto
iwasto natin ang boto
ito'y payo sa boboto
upang bansa'y umasenso
kasama ang mga tao

Mga Pangako'y Hanggang Bibig Lamang

MGA PANGAKO'Y HANGGANG BIBIG LAMANG
ni Gregorio V. Bituin Jr.
13 pantig bawat taludtod

minsan sa talumpati'y nakinig ang bayan
sa trapong ang pangako'y paulit-ulit lang
at muli't muli'y kanilang napatunayan
mga pangako nila'y hanggang bibig lamang

laging kulang sa gawa iyang mga trapo
pangako ng pangako, di na nagbabago
pangako'y limot na pag naupo sa pwesto
dapat lang kalusin ang ganyang mga tao

pinaaasa lang lagi nila ang madla
dahil sa boto, kahit ano'y nginangawa
sa kapapangako, laway nila'y babaha
ganyan lagi ang asta ng trapong kuhila

putulan ng dila ang mga trapong iyan
silang nangangakong di naman maasahan

Nais Kong Makatulong

NAIS KONG MAKATULONG
ni Gregorio V. Bituin Jr.
9 pantig bawat taludtod

bata pa ako'y alam ko na
kung ano ang gusto kong maging
nais kong tumulong sa masa
at maging bayani sa turing

binasa ko ang kasaysayan
ng sarili't ng ibang bansa
marami akong natutunan
kaya nagkalaman ang diwa

ngayon nga ako'y aktibista
na kasama ng manggagawa
pati nasa ibang sektor pa
na pagbabago ang adhika

marami kaming nangangarap
na lipunang ito'y mabago
nawa nasang ito'y maganap
habang nabubuhay pa ako

palitan natin ang lipunang
hari'y pawang kapitalista
pawiin ang mga gahamang
nagdulot sa atin ng dusa

makatulong ang aking hangad
kahit na di maging bayani
sistemang bulok ay ilantad
at mawala ang mga api