Kaysarap mong hagkan, aking Ara

KAYSARAP MONG HAGKAN, AKING ARA
ni Gregorio V. Bituin Jr.

kaylambot ng iyong mga labi
at kaysarap hagkan
kaytamis ng iyong mga ngiti
sadyang kalulugdan

kaysayang kasama't walang lungkot
pagkat kaytabil mo
di ako sa iyo nababagot
kaydami mong kwento

tawa mo'y madaling makahawa
at ito'y mainam
pag kasama kita'y maginhawa
itong pakiramdam

sana'y lagi kang nariyan, Ara
maligaya ako
pagkat ikaw lang ang aking Ara
na iniibig ko

sakaling ikaw ay aking mabuntis
pakasal na kita
sa ginhawa't mga pagtitiis
sasamahan kita

Ngiting Mala-Ara Mina

NGITING MALA-ARA MINA

ni Gregorio V. Bituin Jr.

6 na pantig bawat taludtod

malilimot ko ba

ang ngiti mong tulad

ng kay Ara Mina

ngiting bumighani

sa mga tulad kong

nilimot ng sinta

ngiting nagpangiti

sa pagkatao ko't

buong kaluluwa

di kita iiwan

ibigin mo lamang

ako, aking sinta

Ara Mina ka ng buhay ko

ARA MINA KA NG BUHAY KO

ni Gregorio V. Bituin Jr.

9 na pantig bawat taludtod

ikaw ang aking Ara Mina

minamahal ko't sinasamba

sa alapaap ay diyosa

nitong puso kong nangangamba

na baka ako'y di pansinin

kayhaba pa ng lalandasin

upang ako'y iyong sagutin

sinta, anong dapat kong gawin?

pagkatao ko'y binuo mo

sa kumunoy, sinagip ako

iniwanan ang mga bisyo

iniwasan ang basag-ulo

nabuo'y wasak kong kahapon

ikaw ang naging inspirasyon

ah, saan man kita humantong

ay buuin natin ang ngayon

Mga Balang Lagalag

MGA BALANG LAGALAG

ni Gregorio V. Bituin Jr.

9 pantig bawat taludtod

Natamaan ng ligaw na bala si Stephanie Nicole Ella, 7 taong gulang, noong kasagsagan ng pagdiriwang ng Bagong Taon. Namatay siya sa ospital. Kasalukuyan pang pinaghahanap ng pulisya at ng taumbayan ang nagpaputok ng baril na naging dahilan ng kamatayan ni Nicole.

Binatilyo na nagpaputok ng sumpak sa Mandaluyong tiklo

(philstar.com) | Enero 2, 2013

MANILA, Philippines – Nahuli na ang binatilyong sinasabing nakabaril sa isang apat-taong-gulang lalaki sa pagsalubong ng Bagong Taon sa Mandaluyong City.

Sinabi ni Director Leonardo Espina, hepe ng National Capital Region Police Office (NCRPO), nasakote ng mga pulis sa Mandaluyong City si Emmanuel Janabon, 19, noong Martes ng gabi.

Si Janabon umano ang nagpaputok ng sumpak na aksidenteng tumama kay Ranjelo Nimer, residente ng Welfareville Compound, Barangay Addition Hills, Mandaluyong.

Inihahanda na ang mga kasong isasampa kay Janabon.

Naunang naiulat na umabot na sa 11 ang biktima ng ligaw na bala sa Metro Manila.

Ayon naman sa tagapagsalita ng Philippine National Police (PNP) na si Chief Superintendent Generoso Cerbo, umabot sa 40 katao ang mga biktima ng ligaw na bala sa buong bansa base sa pinakahuling tala Miyerkules ng umaga.

di maglalagalag ang bala
kung dito'y walang kakalabit
pag may tinamaan talaga
tiyak ngang dito'y may sasabit

kayrami ngang balang lagalag
kung saan-saan lumulundag
batas ng tao'y nilalabag
magpaumanhi'y pampalubag

ngunit dapat lamang managot
yaong maysala't nasasangkot
pag may buhay mismong nilagot
walang dapat na makalusot

dalawang batang may bukas pa
ngunit yao'y biglang wala na
kailangan niya'y hustisya
kailangan nila'y hustisya!

Nasumpak si Toto

NASUMPAK SI TOTO

ni Gregorio V. Bituin Jr.

14 pantig bawat taludtod

Nais lang manood ng bata sa Bagong Taon

Ng nagpapaputok ng labintador at kwitis

Walang malay ang batang huling araw na iyon

Pagkat buhay niya'y tinapos ng isang buhong

Kapalaran ba ng batang maagang mamatay?

Tatlong tama ng bala'y aksidente bang tunay?

Aksidente man, maibabalik ba ang buhay?

Ni Ranjelong mahal ng kanyang butihing nanay

Ang baril ay di puputok kung di kakalabitin

Ang itinatagong sumpak, saan gagamitin?

Paano kung may tangan ay kasangga ni Taning?

Bawal na baril, lahat iyan ay kumpiskahin!

Di sapat na humingi lang tayo ng hustisya

Dapat baguhin ang patakaran at sistema

Nangyari kay Ranjelo'y dapat kahulihan na

Di maulit sa mga susunod na taon pa

http://m.abante-tonite.com/issue/jan2013/02crimes01.htm

‘HALIK NG HALIK SA AMIN, MAMAMATAY NA PALA!’
Ulat  ni Nonnie Ferriol, Abante Tonite, Enero 2, 2013

Nagdadalamhati ngayon ang isang mag-anak sa pagkamatay ng kanilang anak na lalake na apat na taong gulang matapos na aksidenteng maputukan ng sumpak habang hinihintay ang pagsalubong sa Bagong Taon ng mga naninirahan sa Bgy. Addition Hills, Mandaluyong City.

Dinala pa sa Mandaluyong City Medical Center subalit hindi na rin umabot nang buhay dahil sa tatlong tama ng bala ng sumpak sa kaliwang bahagi ng kanyang katawan na umabot sa puso ng paslit na si Ranjelo Nimer y Arnold, daycare pupil, at anak ng mag-asawang Gemma at Ryan Nimer.

Tiniyak naman ni Chief Inspector Teddy Tomas, hepe ng Station Investigation and Detection Mana­gement Branch ng Mandaluyong Police na patuloy nilang tinutugis ang suspek na nakilalang si Emmanuel Janabon y Yuillalon, nasa hustong gulang, at kalugar ng pamilya na biktima sa Welfareville Compound sa Bgy. Addition Hills.

Dakong alas-nuwebe umano ng gabi nang mang­yari ang insidente sa harapan ng bahay ng pamilya Nimer sa Block 26 ng Welfareville Compound habang abala ang lahat ng mga residente sa pagsalubong sa Bagong Taon.

Sa panayam ng Abante TONITE sa ina ng biktima, mahigpit nilang bina­bantayan ang anak na si Ranjelo bago naganap ang insidente at habang nasa loob ng bahay panay umano ang lambing ng paslit sa kanilang mag-asawa.

“Halik siya ng halik sa akin at sa papa niya, sinabihan ko pa nga siya, Toto (tawag kay Ranjelo) huwag ka munang halik ng halik kasi wala pang Bagong Taon,” ayon kay Gemma na naiiyak habang ikinukwento ang mga huling sandali na kapiling ang anak.

Pagkakain ng hapunan, sinabihan pa umano nila si Ranjelo na matulog muna at gigisingin na lang pagdating ng hatinggabi.

Humingi pa umano ng pera si Ranjelo subalit hindi nila binigyan dahil baka lumabas pa ng bahay para bumili sa tindahan. Dahil hindi binigyan ng pera ng mag-asawang Nimer kung kaya’t napilitan na rin umano si Ranjelo na mahiga sa tabi ng kanyang ama. Ngunit makalipas ang ilang minuto ay bumangon ito at nagpaalam sa ama na iihi lang.

Subalit sa halip na sa kanilang banyo pumunta ang anak ay nagtatakbo umano ito at tuluy-tuloy na lumabas ng bahay. “Minuto lang po (ang nakalipas) nagsigawan na sa labas at nakita na lang daw ang anak ko na duguan,” ayon pa kay Gemma.

Ikinuwento naman ng saksing si Ramon Elbanbuena, 53, na nakita niya habang ikinakasa ng suspek na si Janabon ang isang sumpak nang bigla itong pumutok at tinamaan ang biktima na bigla na lamang bumulagta.

“Nakita ko, nagulat din iyong lalake kasi niyakap niya ang bata at napahiga pa siya (suspek) at yakap-yakap niya ang bata na nakapatong sa kanyang dibdib at nagsisigaw iyong lalake na ‘hindi ko sinasadya! hindi ko sinasadya!’” ayon kay Elbanbuena.

Nang maramdaman umano ng suspek na hindi na gumagalaw ang biktima ay tumayo ito at tumakas na, naiwan ang paslit na duguan sa kalsada na agad namang dinampot ng isang Remy dela Cruz at kasama na ang mga magulang ni Ranjelo ay isinugod ito sa ospital subalit hindi na rin umabot ng buhay.

Ranjelo Nimer

RANJELO NIMER

ni Gregorio V. Bituin Jr.

7 pantig bawat taludtod

di ka raw sinasadyang

paslangin ng may sumpak

ngunit iwi mong buhay

ay tuluyang nawasak

apat-na-taong gulang,

may bukas at pag-asa

wala, wala na iyon,

sapagkat wala ka na

nawa'y di na maulit

sa kagaya mong paslit

ang palad na sinapit

pagkat nakagagalit

Ranjelo, wala ka na

mailap na hustisya

ay makamtan mo sana

paalam, paalam na

http://www.philstar.com/psn-balita-ngayon/2013/01/02/892503/binatilyo-na-nagpaputok-ng-sumpak-sa-mandaluyong-tiklo

Binatilyo na nagpaputok ng sumpak sa Mandaluyong tiklo
(philstar.com) | Updated January 2, 2013 - 12:51pm

MANILA, Philippines – Nahuli na ang binatilyong sinasabing nakabaril sa isang apat-taong-gulang lalaki sa pagsalubong ng Bagong Taon sa Mandaluyong City.

Sinabi ni Director Leonardo Espina, hepe ng National Capital Region Police Office (NCRPO), nasakote ng mga pulis sa Mandaluyong City si Emmanuel Janabon, 19, noong Martes ng gabi.

Si Janabon umano ang nagpaputok ng sumpak na aksidenteng tumama kay Ranjelo Nimer, residente ng Welfareville Compound, Barangay Addition Hills, Mandaluyong.

Inihahanda na ang mga kasong isasampa kay Janabon.

 Naunang naiulat na umabot na sa 11 ang biktima ng ligaw na bala sa Metro Manila.

Ayon naman sa tagapagsalita ng Philippine National Police (PNP) na si Chief Superintendent Generoso Cerbo, umabot sa 40 katao ang mga biktima ng ligaw na bala sa buong bansa base sa pinakahuling tala Miyerkules ng umaga.

Pintig ng Puso

PINTIG NG PUSO

ni Gregorio V. Bituin Jr.

8 pantig bawat taludtod

ang puso ko'y pumipintig

ito kaya'y iyong dinig

tangay ng hangin ang himig

na akin kang iniibig

pangalan mo'y sinisigaw

na sinisinta ko'y ikaw

at kung ikaw ay aayaw

daigdig ko'y magugunaw

Putok

PUTOK

ni Gregorio V. Bituin Jr.

11 pantig bawat taludtod

i

pinuna-puna ang putok ng iba

sariling putok ay di mapuna

dapat lamang siyang magtawas muna

nang di saktan ang ilong ng kasama

ii

sumabog ang paputok sa daliri

labintador ay di man lang nakimi

batang paslit sa sakit napangiwi

sa hapdi, sa ospital naglupagi

iii

nagkasundo ang rebelde't gobyerno

tigil-putukan ang dalawang kampo

palilipasin daw muna ang Pasko

at Bagong Taon saka magduwelo

iv

bagong taon, kayraming nagpaputok

mga labintador nga'y umuusok

namaril ang tila may sirang tuktok

panahon itong nakasusulasok

Usapan sa Tipanan

USAPAN SA TIPANAN

ni Gregorio V. Bituin Jr.

14 pantig bawat taludtod

Sabi mo, kaysarap maging tao at mabuhay.

Tugon ko, masarap maging tayo habambuhay.

Sabi mo, sa aking tabi'y ayaw mong mawalay.

Tugon ko, hinding hindi tayo maghihiwalay.

Tanong mo, pag-ibig ba natin ay magtatagal?

Tugon ko, didiligin kita ng pagmamahal.

Tanong mo, ang ating puso ba'y di mapapagal?

Tugon ko, kung pagsinta'y di nakasasakal.

Sa Muling Pagkikita

SA MULING PAGKIKITA

ni Gregorio V. Bituin Jr.

14 pantig bawat taludtod

Sa muling pagkikita, mata'y agad nag-usap

Kinapa ang damdamin, naroon ang pangarap

Kinapa rin ang puso, narito na't kaharap

Ang magandang diwatang kayhirap mahagilap.

Puso'y tumataginting, ngiti niya'y kaytamis

Damdami'y gumagaan, ako'y di nakatiis

Nais ko siyang hagkan, ngunit baka lumabis

Ang tibok niring puso'y kumabog ng kaybilis.

Walang Nabubuntis sa Titig

WALANG NABUBUNTIS SA TITIG

ni Gregorio V. Bituin Jr.

9 pantig bawat taludtod

kung totoo kang umiibig

kausapin yaong dalaga

ibuka ang iyong bibig

upang bigkasin ang pagsinta

walang nabubuntis sa titig

iyon ay tandaan mo sana

kaya't kumilos ka't kumabig

at pasagutin ang dalaga

pakasal kayo't magkaniig

magmahalan din sa tuwina

pagkat ang tunay na pag-ibig

kumikilos at sumisinta

Kalabit-Penge

KALABIT-PENGE

ni Gregorio V. Bituin Jr.

10 pantig bawat taludtod

maraming nakasahod na kamay

na mula sa mga batang hamog

kawawa ka pag di ka nagbigay

susundan ka nila't kinukuyog

kaunting barya lang daw ang gusto

sa hirap at dusang tinitiis

minsan, sila pa'y patakbo-takbo

nagnakaw pala ang mga putris

ingat sa mga kalabit-penge

marami sa kanila'y salbahe

sa salawal baka mapaihi

dahil sila na'y umaatake

mabuhay sa mundo'y mahirap na

upang makakain, lumaban ka

wasakin ang bulok na sistema

sa lipunan ng kapitalista

Biktima ni Pablo

BIKTIMA NI PABLO

ni Gregorio V. Bituin Jr.

12 pantig bawat taludtod

bumulwak ang ilog, yumanig ang lupa

ang hangin at ulan ay rumaragasa

buong kalunsura'y nilubog sa baha

doo'y kayrami ng mga naulila

ano ang dahilan, ang tanong ng tao

sinong sisisihin sa nangyaring ito?

ang kalikasan bang nagngalit ng todo

o ang pagmimina't bundok na kinalbo

daan-daan yaong mga nangamatay

kayrami rin yaong nangasirang bahay

lulutang-lutang din ang maraming bangkay

ang unos na Pablo ang dahilang tunay

sadyang larawan ng matinding delubyo

tila katapusan na ito ng mundo

walang pinipili, walang sinasanto

kawawang-kawawa ang maraming tao

ang nangyari'y dapat lang pakasuriin

kung mangyari muli'y ano nang gagawin

pagsagip ng buhay ay dapat planuhin

biktima ni Pablo'y tulungan din natin

Sa pagtanda't kamatayan

SA PAGTANDA'T KAMATAYAN
ni Gregorio V. Bituin Jr.
9 pantig bawat taludtod

lahat ng tao'y tumatanda
isa itong katotohanang
di maitatanggi ng madla
dahil nangyayaring lahatan

lahat ng tao'y mamamatay
sinong magkakaila nito
na noon pa'y nagisnang tunay
 ng marami sa mundong ito

ang panahon ang nag-aatas
sa pagtanda'y walang pipigil
tayo't tatanda at lilipas
ang pintig ng puso'y titigil

ang mahalaga'y ating gawin
ang makabubuti sa lahat
di nararapat maging sakim
maging mabuti kahit salat

pagkat ang may mabuting ngalan
may buting sa mundo'y iniwan
naiwan ay mahahawaan
ng buting kinakailangan

Sendong at Pablo

SENDONG AT PABLO
ni Gregorio V. Bituin Jr.
12 pantig bawat taludtod

kayraming namatay na naman sa bagyo
nawalan ng bahay, nawala ang tao
noon ay si Sendong, ngayon nama'y Pablo
nakatutulirong sadya ang ganito

di dating ganito sa lupang Mindanao
bakit bagyo'y bigla na lamang lumitaw
ang unos na ito'y tila nanggugunaw
ang hangin at bagyo'y kaylakas humataw

bakit nangyayari ngayon ang ganito
dahil kabunduka'y kanilang kinalbo
dahil yaong bundok ay mininang todo
nang dahil sa tubo, tayo'y dinelubyo

gaano kahanda ang pamahalaan
upang pagkamatay ay maiiwasan
gaano kahanda itong taumbayan
upang apektado'y sadyang mabawasan

nakaririndi man ang kayraming tanong
marapat sagutin ng may angking dunong
upang maiwasan ang muling dagundong
at pagraragasa nina Pablo't Sendong

iyang mga unos, pag-aralang tunay
kung bakit kayraming kapwang nararatay
anong gagawin nang maibsan ang lumbay
magkakasya lang ba sa dahilang sablay

nakakalbo na ba yaong mga bundok
mga basura ba'y nakasusulasok
o sistemang tubo yaong nakatutok
kaya solusyon ay pawang mga bulok

nang si Pablo'y naging ganap na delubyo
pati na si Sendong, bayan ay binayo
mga bulong itong  maghanda na tayo
sa mas matitinding daratal na bagyo

Napatulog ka man, Pacquiao

NAPATULOG KA MAN, PACQUIAO
ni Gregorio V. Bituin Jr.
14 pantig bawat taludtod

napatulog ka man, Pacquaio, ng kanan ni Marquez
di mo man nakita ang kanyang kanan sa bilis
sa puso ng Pinoy, wala ka pa ring kaparis
hindi ka nandaya't lumaban ka ng malinis

ang boksing daw ay "sweet science", agham na kaytamis
talagang may nagagapi, sadyang natitiris
ganyan lang naman sa boksing, may tsambang kaylinis
ang mahalaga'y matanggap yaong pagkagahis

Bawal na ang plastik

BAWAL NA ANG PLASTIK
ni Gregorio V. Bituin Jr.
12 pantig bawat taludtod

sa kayraming lugar bawal na ang plastik
pinamalengke mo'y sa bayong isiksik
ito'y di mabulok, kaya nga kaybagsik
sa daanang tubig, nagbabarang lintik
maari bang tayo'y basta manahimik
habang kalikasan ngayo'y tumitirik
di maaring tayo'y magpatumpik-tumpik
sa problemang itong sa mundo'y nahasik
plastik, ipagbawal, ang solusyong hibik
lalo sa gobyernong kayrami ng plastik

Ano ba ang tanaga?

ANO BA ANG TANAGA?

ni Gregorio V. Bituin Jr.

7 pantig bawat taludtod

ano ba ang tanaga?

tulang alay sa madla

nitong abang makata

sa sariling salita

tanagang manibalang

iisang saknong lamang

taludtod ay apatan

at pito ang pantigan

tanaga'y ating saksi

sa magandang mensahe

na ating nalilimi

habang nasa biyahe

o habang natutulog

tula'y umiindayog

minsan diwa'y matayog

minsan ito'y palubog

tanagang nalilikha

saanman may adhika

sa loob man ng lungga

o kaharap ang madla

katabi ma'y kalabaw

sa gitna man ng araw

kaharap ma'y balaraw

o sa hiya'y natunaw

Ang Masarap na Hipon

ANG MASARAP NA HIPON

ni Gregorio V. Bituin Jr.

14 pantig bawat taludtod

masarap ang katawan, ang ulo'y tinatapon

ganyan lang pag kainin ang masarap na hipon

sadyang kaysarap naman ng ulam ninyo ngayon

sa kay-init na sabaw ay lumulutang iyon

tanggalin iyang balat at ang ulong patapon

o, kaysarap papakin ng katawan ng hipon

tiyak kong mabubusog ang tiyang nagugutom

tanggal ang iyong pagod sa trabahong maghapon

Masaker sa Nobyembre

MASAKER SA NOBYEMBRE

ni Gregorio V. Bituin Jr.

13 pantig bawat taludtod

dalawang masaker sa Nobyembre'y naganap

sa bansang itong napuno ng dusa't hirap

sa Asyenda Luisita'y pitong obrero

sa Maguindanao, limampu't walong katao

yaong pinaslang ng mga berdugong ganid

pinugto nila’y buhay ng kapwa't kapatid

hustisya sa lahat ng mga minasaker

ibagsak yaong pumaslang na nasa poder

kay-iitim ng buto't puso nila'y halang

buhay ng kapwa'y di na nila iginalang

basta't sa kapangyarihan ay manatili

di na nangiming buhay ng kapwa'y pinuti

pagkatao't diwa ng bayan ang nilait

hustisya sa mga biktima'y aming giit!

(16 Nobyembre, 2004 - Hacienda Luisita massacre

23 Nobyembre 2009 - Maguindanao massacre)

Kwento ng Isang Tsuper ng Traysikel

KWENTO NG ISANG TSUPER NG TRAYSIKEL
ni Gregorio V. Bituin Jr.
11 pantig bawat taludtod

I

tsuper ng traysikel ay nagninilay
pagkat sa lungsod di na mapalagay
kaylayo sa pamilya't nalulumbay
kaya't nagpasyang umuwi ng bahay

sa lungsod, buhay ay masalimuot
pamilya'y gunita't gabi'y kaylungkot
traysikel ay kanyang pinaharurot
kung saan-saan nagpasikut-sikot

II

lumayas sa magulong kalunsuran
sementadong lansangan ay iniwan
doon sa inuwiang lalawigan
kaysariwa ng simoy ng amihan

bagamat ang gabok ay lapastangan
nilandas niya ang mabatong daan
gana sa pagpasada'y kaunti man
mahalaga'y nasa sariling bayan

Tanaga laban sa Sin Tax

TANAGA LABAN SA SIN TAX

ni Gregorio V. Bituin Jr.

Patak ng aming pawis

Kakainin ng buwis

Sin tax dapat maalis

Dahil sa masa'y labis

* tanaga - anyo ng katutubong tula na may isang saknong, apat na taludtod, may tugma, at isang diwa

Sin Tax, Dagdag Pahirap sa Masa

SIN TAX, DAGDAG PAHIRAP SA MASA
ni Gregorio V. Bituin Jr.
13 pantig bawat taludtod

ang sin tax ay buwis, di ito isang lunas
sa sakit ng dukhang sa gutom nauutas
sa sin tax na buwisit, dukha'y dinarahas
kabuhayan ng nila'y tiyak magwawakas

ang sin tax ay buwis, di ito isang gamot
sa problema sa buhay na masalimuot
dagdag pahirap ang panukalang baluktot
kabuhayan ng masa'y ipinagdaramot

ang sin tax ay buwis, pandagdag lang sa pondo
pondo ang talagang hanap nitong gobyerno
kaya di kalusugan ang tunay na isyu
kundi dagdag pondo, obrero'y apektado

sin tax ay sadyang di para sa kalusugan
kalusugan ay ginagamit lang sangkalan
nang buwis na ito'y agad maaprubahan
ang nais lang talaga, pondo'y madagdagan

buwis ang sin tax, ito ang isyung totoo
pag tumaas ang buwis, taas din ang presyo
baka dahil diyan, magtanggal ng obrero
sa buwis na ang punta ng para sa sweldo

dukha'y araw-gabi nang laging nagtitiis
pahihirapan pa tayo ng dagdag buwis
pagkat sa ating dukha ito'y labis-labis
panukalang ito'y dapat lamang maalis

Huwag Magpahuli sa Trapikero

HUWAG MAGPAHULI SA TRAPIKERO

11 pantig bawat taludtod

ni Gregorio V. Bituin Jr.

may mga nagtatanod sa trapiko

silang tagaayos ng daloy nito

ang tawag sa kanila'y trapikero

hinuhuli'y tsuper na barumbado

kaya sa mga hari ng lansangan

batas-trapiko'y huwag kaligtaan

mahirap nang ikaw ay matyempuhan

ng mga trapikero sa katihan

ang trapikero'y ating irespeto

pagkat sila'y sahuran ding obrero

iyan ang nakuha nilang trabaho

kahit kaybaba ng kanilang sweldo

araw-gabing sa araw nakabilad

nakatayo, minsan, lakad ng lakad

katawan nga'y sa init nakalantad

kaya mainit ang ulo't kaykupad

sundin mong lagi ang batas-trapiko

tsuper man, pedestriyan, pasahero

huwag magpahuli sa trapikero

kung ayaw mong ikaw ay maperwisyo

Hilang Kayod Kalabaw

HILANG KAYOD KALABAW
ni Gregorio V. Bituin Jr.
13 pantig bawat kariton

ang hilang kahon-kahon, tila nakasingkaw
sa leeg ng isang matipunong kalabaw
sa init, obrero'y tila di natutunaw
patuloy ang trabaho, bilad man sa araw

tagas yaong pawis sa lansangang kay-init
kahit na kontraktwal, nagtatrabahong pilit
trabaho'y di man nais, gagawin ding pilit
nang mairaos ang pamilyang nagigipit

tila mga kalakal ang laman ng kahon
ihahatid saanman nararapat yaon
lakad at hila, lansangan ay sinusunson
hanggang siya'y tumigil sa bodegang iyon

ibinaba ang kahon at isinalansan
sa paleta'y pinagpatung-patong niya lang
muli siyang bumalik sa pinanggalingan
upang hakutin ang mga kahong naiwan

simple mang gawain, ngunit kayhirap pa rin
dapat kumayod nang pamilya'y di gutumin
kailangang pagpawisan ang kakainin
sahod ma'y kaybaba, pinagtiisan na rin

Di pa umiiral ang bayang pangarap

DI PA UMIIRAL ANG BAYANG PANGARAP
ni Gregorio V. Bituin Jr.
15 pantig bawat taludtod

ang malayong bayang iyon ay di pa umiiral
bayang ang bawat isa'y nabubuhay ng marangal
bawat isa'y may paggagalangan, walang pusakal
pagkat di uso ang pusakal sa bayang may dangal

di pa umiiral ang bayang pangarap ng tao
bayang ang pribadong pagmamay-ari'y di na uso
bayang ang moda ng produksyon ay sosyalisado
bayang nakikipagkapwa at nagpapakatao

ang bayang pangarap, atin bang mahahanap iyon?
nasa langit ba, sa lupa, saang dako naroon?
o narito lang sa lipunan, sa rela-relasyon?
o kailangan ng isang tunay na rebolusyon?

bakit ang lumilikha ng yaman ang naghihirap?
bakit yumaman ang nagpapatubong mapagpanggap?
bakit may uring dukhang pawang dusa'y nalalasap?
bakit may uring bundat, nagpapasasa sa sarap?

kailan iiral ang pinapangarap na bayan?
ito ba'y mangyayari o ito'y suntok sa buwan?
di masamang mangarap, ito'y ating pagsikapan
nang marating natin ang bayang may kaginhawahan

Lipak sa Palad ng Paggawa

LIPAK SA PALAD NG PAGGAWA
ni Gregorio V. Bituin Jr.
13 pantig bawat taludtod

kayraming lipak sa palad ng manggagawa
tanda ngang sila'y kaysipag at kaytiyaga
bawat lipak ay tandang sila ang nagpala
upang umunlad itong lipunan at bansa

tila lipak na’y tatak ng pagkaalipin
gawa ng gawa nang pamilya'y may makain
mababa ang sahod, nagdidildil ng asin
kaysipag ngunit kawawa sila sa turing

pagkat sistema'y saliwa, talagang mali
pagkat ang lipunan sa uri'y nahahati
dukha'y laksa-laksa, mayaman ay kaunti
alipin ng mayroon ang dukhang inimbi

puno ng lipak ang palad ng manggagawa
di ito sasapat na pamahid ng luha
sa kapal ay kayang tampalin ang kuhila
at pangwasak sa sistemang mapangkawawa

Sa Bawat Gusali'y Bakas ang Kamay ng Manggagawa

 SA BAWAT GUSALI'Y BAKAS
ANG KAMAY NG MANGGAGAWA
ni Gregorio V. Bituin Jr.
16 pantig bawat taludtod

masdan ang bawat gusali / pumunta ka sa Ayala
tingnan ang mga gusali / sa kahabaan ng Edsa
sa ibang lunan sa bansa / ay iyo ring madarama
naroroon yaong bakas / ng obrero't makikita
at gaano man katayog / ang gusaling naglipana
kamay nila ang lumikha, / nagpala, at nagpaganda

yaong maraming gusali'y / mahusay na dinisenyo
ng arkitektong magaling / o kaya'y ng inhinyero
ngunit pinagpalang kamay / ng magiting na obrero
ang nagtiyak na gusali'y / maitayo nang totoo
manggagawa ang naghalo / ng buhangin at semento
nagsukat at nagpatatag / ng biga't pundasyon nito

sa bawat gusali'y bakas / ang kamay ng manggagawa
ang katotohanang iyan / ay di mapapagkaila
isinakripisyo nila'y / buhay, pawis, oras, diwa
ginugol yaong panahon / upang gusali'y magawa
nagtrabaho nang maigi, / tunay silang nagtiyaga
ngunit pakasuriin mo, / ang sahod nila'y kaybaba

Alikabok at Agiw

 ALIKABOK AT AGIW
ni Gregorio V. Bituin Jr.
14 pantig bawat taludtod

sa bawat alikabok / na namuo sa sahig
at agiw sa kisameng / animo'y ikinalat
nariyan ang dyanitor, / may malakas na bisig
masipag na obrero / kahit na nagsasalat

hawak yaong panlinis, / lampaso bawat sulok
ang mga alikabok, / hinahagip ng tingting
mga nagbiting agiw / lalo't nasa tuktok
kinakayod ng maigi't / sinisikap tanggalin

manggagawang alagad / siya ng kalinisan
mula kisame't sahig, / silya nama't lamesa
nais niyang ang sahig / ay pwedeng salaminan
ngunit obrero siyang / kontraktwal lang ang gana

pag siya'y wala, tiyak / kayrumi at kaygulo
masipag na dyanitor / kalabaw kung kumayod
lampaso ng lampaso / sa maghapong trabaho
ngunit natatanggap lang / ay karampot na sahod

Makulimlim ang Umaga

MAKULIMLIM ANG UMAGA

ni Gregorio V. Bituin Jr.

13 pantig bawat taludtod

umaga'y makulimlim, may bantang pag-ulan

nawa'y di maging unos, kawawa ang bayan

yaong tikatik lang, sapat sa kabukiran

upang magsasaka'y ganap ang kasiyahan

huwag mabahala sa pagdatal ng bagyo

may bahagharing magpapakita sa tao 

na tanda ng pag-asang humayo pa tayo

at gawin ang marapat sa kapwa't sa mundo

ulan, ulan, pantay kawayan, sabi nila

bagyo, bagyo, pantay kabayo, ang dagdag pa

awiting bayan itong aking nakilala

nang bata pa't naniningala sa dalaga

may bantang pag-ulan, umaga'y makulimlim

sana kalangita'y di tuluyang magdilim

upang ang bubuyog bulaklak ay masimsim

nang lumigaya ito't huwag nang manimdim