HUWAG MAGPAHULI SA TRAPIKERO
11 pantig bawat taludtod
ni Gregorio V. Bituin Jr.
may mga nagtatanod sa trapiko
silang tagaayos ng daloy nito
ang tawag sa kanila'y trapikero
hinuhuli'y tsuper na barumbado
kaya sa mga hari ng lansangan
batas-trapiko'y huwag kaligtaan
mahirap nang ikaw ay matyempuhan
ng mga trapikero sa katihan
ang trapikero'y ating irespeto
pagkat sila'y sahuran ding obrero
iyan ang nakuha nilang trabaho
kahit kaybaba ng kanilang sweldo
araw-gabing sa araw nakabilad
nakatayo, minsan, lakad ng lakad
katawan nga'y sa init nakalantad
kaya mainit ang ulo't kaykupad
sundin mong lagi ang batas-trapiko
tsuper man, pedestriyan, pasahero
huwag magpahuli sa trapikero
kung ayaw mong ikaw ay maperwisyo
Walang komento:
Mag-post ng isang Komento