Mabuting Pangalan

MABUTING PANGALAN
ni Gregorio V. Bituin Jr.

mas mabuting piliin
.......ang malinis na pangalan
kaysa ginto o pilak
.......o anumang kayamanan
pagkat ang pagkatao'y
.......higit pa sa anumang yaman
ang yaman ay mawawala
.......ngunit hindi ang pangalan

kaya mas mabuti nga
.......ang gumawa ng mabuti
upang ikaw sa mundo
.......ay di naman magsisisi
gawin ang nararapat
.......nang wala nang atubili
at ikaw ay dakila
.......sa mata nitong marami

mabuting pangalan nga'y
.......kayganda nang pamana mo
sa iyong mga anak
.......at susunod sa yapak mo
pag ito'y nadungisan
.......batik na sa pagkatao
kaya ito'y ingatan
.......sa buong buhay mong ito

pangalan ay kakabit
.......nitong ating karangalan
pag ito'y nagkabahid
.......buhay nati'y sinayang lang

Manggagawa'y Saluduhan

MANGGAGAWA'Y SALUDUHAN
ni Gregorio V. Bituin Jr.
8 pantig bawat taludtod

manggagawa'y saluduhang
taas-noo kahit saan
silang lumikha ng yaman
dito sa ating lipunan

Pagkamalikhain Gamit ang Ketsi

PAGKAMALIKHAIN GAMIT ANG KETSI

ni Gregorio V. Bituin Jr.

13 pantig bawat taludtod

pagkabukas ng sopdrinks, ang ketsi'y kukunin

ilalagay sa bag at aking iipunan

upang may magamit pag Pasko na'y darating

ketsi'y dapat tumuwid kaya pupukpukin

at saka ihihilera sa riles ng tren

lahat ng ketsi'y pasasagasaan namin

maya-maya, gitna ng ketsi'y bubutasin

lalagyan ng alambre't aming kakalugin

maingay na, meron na kaming pangaroling

ketsing pinagsama, akala mo'y tamburin

isa sa laruan ng aming kabataan

yaong ketsing tinatawag din nilang tansan

mag-ingat lamang at baka ka mahiwaan

matalas na gilid, nakasusugat naman

mga ketsing ito'y sadyang may pakinabang

gamit ang pinagsamang ketsi'y aawitan

ng kantang Pamasko yaong kapitbahayan

nabibigyan din pag awit mo'y nagustuhan

bentesingko sentimos o piso'y ayos lang

habang nagbigay ay pinasasalamatan

minsan, kailangan ding maging malikhain

basta ba't marangal ay didiskarte man din

tulad ng ketsing pinasagasaan sa tren

nang sa karoling ay may gamiting tamborin

ika nga nila, kung gusto mo'y may paraan

ngunit kung ayaw mo ay kayraming dahilan

ketsi'y bahagi ng araling panlipunan

di sa paaralan, kundi ng karanasan

Ako'y Makata ng Paggawa

AKO'Y MAKATA NG PAGGAWA
ni Gregorio V. Bituin Jr.
11 pantig bawat taludtod

ako'y isang makata ng paggawa
nakikibaka kahit walang-wala
pinaglalaban proletaryong diwa
para sa paglaya ng masa't bansa

ako ang makata ng karpintero
gumagawa ng gusali't bahay nyo
laging hawak yaong pako't martilyo
upang may masilungan naman kayo

ako ang makata ng magsasaka
naglilinang ng bukid sa tuwina
alaga ang kalabaw pati baka
nagtatanim ng palay, at iba pa

makata ako ng mga obrero
makata laban sa kapitalismo
makatang ang adhika'y sosyalismo
para sa mundo at lahat ng tao

makata ako ng kababaihan
makata rin ako ng kabataan
at mga pinagsasamantalahan
ako nga'y makata ng sambayanan

ako ang makata ng rebolusyon
na pagbabago ng sistema'y layon
pribadong pag-aari ng produksyon
ay dapat wasaking tuluyan ngayon

Pasyon ng Manggagawa't Maralita

PASYON NG MANGGAGAWA’T MARALITA
ni greg bituin jr.
8 pantig bawat taludtod

(ito'y nakatakdang basahin sa gaganaping Pasyon ng Manggagawa't Maralita sa Welcome Rotunda, Marso 31, 2010)

ang gumagawa ng yaman
laging pinahihirapan
ng naghaharing iilan
namumuno sa lipunan
ay pawang mga gahaman

lagi nang nasa kalbaryo
ang buhay nitong obrero
kayod doon, kayod dito
kaybaba pa rin ng sweldo
sadyang hirap silang todo

ngayon, sa ating lipunan
kapitalista'y gahaman
sa salapi at puhunan
kanila ang pakinabang
sa obrero'y laging kulang

sa mga kapitalista
pawang tubo itong una
walang pakialam sila
sa mga obrero nila
kahit na ito'y magdusa

ang uring kapitalista
ay talagang walang kwenta
sariling interes nila
ang palaging nangunguna
sadyang kaysisiba nila

ang kawawang manggagawa
kanilang lakas-paggawa
di mabayaran ng tama
pulos sila dusa't luha
manggagawa silang dukha

kontraktwalisasyon, salot
ang kapitalista'y salot
sila nama'y isang dakot
ngunit sila ang kilabot
halina at makisangkot

mga ganid ay ibagsak
na sa tubo'y tambak-tambak
at pagapangin sa lusak
ang kapitalistang tunggak
silang pawang mapanghamak

magkaisa, manggagawa
saanmang sulok ng bansa
sa inyo ang mawawala
ay ang pagkatanikala
ng inyong lakas-paggawa

magkaisa na, obrero
itayo ang sosyalismo
na sadyang lipunan ninyo
sistemang kapitalismo
ay palitan nang totoo

Hindi tayo dapat magdamit ng basahan

HINDI TAYO DAPAT MAGDAMIT NG BASAHAN
ni Gregorio V. Bituin Jr.
13 pantig bawat taludtod

halina't pag-aralan natin ang lipunan
kung bakit may mahirap at mayaman
kung bakit may hari at pinaghaharian
kung bakit may amo at pinangangamuhan

maraming maralita ang nagkakasakit
maraming manggagawa'y patuloy na gipit
kapitalistang sistema'y sadyang kaylupit
at kayraming masa na basahan ang damit

bakit nakararami ang nahihirapan
bakit pulubi'y naglipana sa lansangan
bakit ang manggagawa'y aliping sahuran
bakit kayraming nagdadamit ng basahan

tayong lahat dito sa bansa'y mamamayan
kaya tayong lahat dito'y may karapatan
hindi tayo dapat magdamit ng basahan
pagkat tayo'y may dignidad at karangalan

Walumpu't Dalawang Tauhan

WALUMPU'T DALAWANG TAUHAN
ni Gregorio V. Bituin Jr.
13 pantig bawat taludtod

“I began revolution with 82 men. If I had to do it again, I do it with 10 or 15 and absolute faith. It does not matter how small you are if you have faith and plan of action.” - Fidel Castro

i.

"tanging walumpu't dalawang tauhan lamang
at sinimulan na namin ang himagsikan

kung rebolusyong ito'y uulitin ko pa
gagawin kahit na sampu o labinlima

kasama ang absolutong sampalataya
na ang bulok na lipunan ay magigiba

marami man o kaunti ang nagrerebo
ay maaari pa ring magtagumpay tayo

kung may sampalataya sa mga kasama
at may plano ng aksyon sa pakikibaka"

ii.

itong tinuran ni kasamang Fidel Castro
ay aral sa mga aktibistang tulad ko

paano bang baguhin ang lipunang bulok
ang lipunan muna'y dapat nating maarok

kaya aralin ang pasikut-sikot nito
upang mailapat natin ang tamang plano

ang bawat kasama'y dapat nagkakaisa
laging may tiwala sa kakayahan nila

walang iwanan hanggang maipanalo
ang ating rebolusyon tungong sosyalismo

Misyon ng Obrero

MISYON NG OBRERO
ni Gregorio V. Bituin Jr.
6 pantig bawat taludtod

rebolusyonaryo
ang mga obrero
dudurugin nito
ang kapitalismo
itatayo nito
ang sistemang bago
at ipapanalo
yaong sosyalismo
sa lipunang ito
ay kasama tayo

Nasa kamay ng uring manggagawa

NASA KAMAY NG URING MANGGAGAWA
ni Gregorio V. Bituin Jr.
13 pantig bawat taludtod

wala sa kamay ng burgesya ang panalo
upang maibagsak itong kapitalismo
at lalong wala sa kamay ng mga trapo
na tuluyang masagip ang mga obrero

di rin sapat na hanggang unyunismo tayo
lalong wala sa ideyang nasyunalismo
sa demokrasya man o elektoralismo
ang ikababagsak nitong kapitalismo

nasa kamay ng milyong obrero sa mundo
upang ibagsak ang mga ganid sa tubo
pribadong pag-aari'y dapat maiguho
burgesya't elitista'y dapat maigupo

umpisahan sa makauring kamulatan
diyalektiko'y dapat nating pag-aralan
pati na ang kasaysayan ng tunggalian
ng mga uri dito sa ating lipunan

sina Marx at Engels na noo'y sinulat nga
obrero'y magkaisa sa lahat ng bansa
sa manggagawa ang tangi lang mawawala
ay ang kanilang mga gintong tanikala

kaya mga manggagawa, nasa kamay nyo
na sistemang bulok ay tuluyang mabago
magkapit-bisig na at magkaisa kayo
at itayo ang sariling lipunan ninyo

tanging pagbuwag sa pag-aaring pribado
at pagtatayo ng lipunang sosyalismo
ang ikaliligtas ng maraming tao
mula sa kahirapan at kapitalismo

Mabuhay ka, Kasamang Hugo

MABUHAY KA, KASAMANG HUGO
ni Gregorio V. Bituin Jr.
11 pantig bawat taludtod

mabuhay ka, kasamang Hugo Chavez
imperyalismo'y nais mong matiris
upang maraming bayang nagtitiis

ay masagip sa dusa't karukhaang
dulot ng sistemang bulok sa bayan
at sa mamamayang nahihirapan

pagpupugay sa iyong sosyalismo
ng ikadalawampu't isang siglo
nagbigay ka ng pag-asa sa mundo

libreng pagpaospital sa maysakit
libreng edukasyon ang iyong giit
libreng pagkain din sa mga paslit

sosyalismo'y pinahusay mong sapat
upang makinabang ang nagsasalat
sosyalismo mo'y nakapagmumulat
kaya aming masasabi'y "Salamat!"

Maghihilom din ang sugat

MAGHIHILOM DIN ANG SUGAT

ni Gregorio V. Bituin Jr.

8 pantig bawat taludtod

maghihilom din ang sugat

ng puso kong naging tapat

sa iyo, o, aking pag-ibig

na nais kulungin sa bisig

mahal kita kaya sa muli

ako'y magbabakasakali

na sa paghilom nitong sugat

ay muling magiging tapat

ang puso kong umiibig

sa nais kong makaniig

ikaw iyon, habambuhay

Ang Pagtanggap

ANG PAGTANGGAP
ni Greg Bituin Jr.
10 pantig bawat taludtod

“If I accept you as you are, I will make you worse; however if I treat you as though you are what you are capable of becoming, I help you become that.” - Johann Wolfgang von Goethe

pag tinanggap kita kung sino ka
ginawa kitang mas masama pa
gayunman, kung kita'y itinuring
kung ano kayang dapat mong maging
nakatulong pa ako sa iyo
at baka matupad pa nga'y ito

iangat natin ang ating bayan
at huwag basta tanggapin lamang
kung ano ang ating nakagisnan
kundi pagsulong ang patunguhan
halina't ating pagsumikapang
magkaisa na at magtulungan

Nobyembre 23, 2009, Maguindanao masaker

NOBYEMBRE 23, 2009

Maguindanao masaker

ni Gregorio V. Bituin Jr.

14 pantig bawat taludtod

higit tatlumpung mamamahayag ang pinaslang

pati pamilya ng karibal, mga sibilyan

ang pinaslang ng mga may kaluluwang halang

na siyang ipinanghilakbot ng sambayanan

iniwan nilang bangkay sa lambak na masukal

balak pang ilibing yaon ng mga pusakal

umalingasaw din ang baho ng mga hangal

nalaman ng bayan ang krimeng karumal-dumal

naiwang ebidensya sa lugar yaong backhoe

may malaking hukay nang libingan niyong tao

ang karumal-dumal na krimeng ito'y planado

upang burahin ang karibal dito sa mundo

katarungan ang hingi ng buong sambayanan

di lang ikulong, bitayin ang may kasalanan

lalo ang utak na mga kamay ay duguan

silang mga walang pagkatao't kahihiyan

Kung aalis sa kilusan

KUNG AALIS SA KILUSAN
ni Gregorio V. Bituin Jr.
10 pantig bawat taludtod

kung ako'y aalis sa kilusan
tiyak may malalim na dahilan

maaaring ako na'y tuliro
dahil kaugnay sa pusong ito

kumilos akong inspirasyon na
ang isang magandang aktibista

di makaalis dahil sa dilag
na sa aking puso'y nagpapitlag

nawa dilag ay mapasaakin
at siya'y aking aasawahin

dalawa kaming magdedesisyon
kung patuloy pa sa aming layon

mahalaga'y magkasama kami
upang sa bukas ay di magsisi

Buldozer sa Iskwater

BULDOZER SA ISKWATER

ni Gregorio V. Bituin Jr.

13 pantig bawat taludtod

ang mga dukha'y galit dahil may buldozer

na dumating na sa lugar nilang iskwater

sinimulan na nitong tungkabin ang pader

pakiramdam ng dalita, sila'y minarder

marapat nilang pigilin ang demolisyon
kundi'y mawawalan sila ng bahay ngayon
bukod sa walang naganap na negosasyon
ay wala ring inihahaing relokasyon

kaya sa galit ng maralita'y binato
ang buldoser pati nagpapaandar nito
dukha man sila ngunit lalabang totoo
at handang ipaglaban ang tahanang ito

Habambuhay ang Pakikibaka

HABAMBUHAY ANG PAKIKIBAKA
ni Gregorio V. Bituin Jr.
12 pantig bawat taludtod

“Revolution is a serious thing, the most serious thing about a revolutionary's life. When one commits oneself to the struggle, it must be for a lifetime.” - Angela Davis

bakit nga ba nais mong magrebolusyon
ang mga nasa poder pa'y hinahamon
bakit ba ayaw lang nating maging miron
bakit sistema'y gusto nating ibaon

bakit aagawin ang kapangyarihan
mula sa mapagsamantalang gahaman
bakit ba sila'y dapat nating labanan
tinatahak na'y landas ng kamatayan

pagkat pangarap natin ang pagbabago
kaya buhay nati'y tinalaga rito
nang niyakap natin ang prinsipyong ito
di tayo nagloloko, tayo'y seryoso

ang paghihimagsik laban sa sistema
ay di laro lang kundi pakikibaka
nakataya'y buhay ng bawat kasama
kaya habambuhay ang pakikibaka

Bayani, Hindi Bandido, sina Macario Sakay

BAYANI, HINDI BANDIDO, SINA MACARIO SAKAY
ni Gregorio V. Bituin Jr.
15 pantig bawa taludtod

bayani sina Lucio de Vega't Macario Sakay
kahit mga Kano'y magkasama silang binitay
sila'y mga tagapagtanggol ng bayang niluray
at ginahasa ng mga mananakop na tunay

taas-kamaong pagpupugay sa ating bayani
at sumagupa sa mga dayuhang mang-aapi
silang nakibaka upang bayan ay magsarili
upang lumaya tayo sa kuko ng dayong imbi

namuno si Sakay nang mamatay si Bonifacio
ipinagpatuloy ang Katipunan at prinsipyo
hanggang mga Kano'y itinuring silang bandido
at sila'y napalinlang sa isang lider-obrero

hindi sila mga bandido, sila'y nabitay man
mga bayani silang tunay at anak ng bayan
dapat lang kilanlin ang kanilang kabayanihan
taos-pusong pagpupugay ay ibigay ninuman

Huwag Mong Ipagkait ang Iyong Ngiti

HUWAG MONG IPAGKAIT ANG IYONG NGITI

ni Gregorio V. Bituin Jr.

9 pantig bawat taludtod

ikaw ang aking inspirasyon

ikaw ang aking kasiyahan

ikaw ang diyosa kong mahal

ikaw ang diwata kong banal

ipagkait mo na ang buwan

pati tala sa kalawakan

ipagkait mo na ang mundo

ngunit huwag ang iyong ngiti

pagkat ngiti mo'y aking langit

na sa puso ko'y kumakapit

ngunit kung ito'y ipagkait

dugo sa puso ko'y sisirit

Sasamahan kita sa iyong pagtanda

SASAMAHAN KITA SA IYONG PAGTANDA

(muli, kay Ms. M.)

ni Gregorio V. Bituin Jr.

13 pantig bawat taludtod

nais kitang samahan sa iyong pagtanda

ikaw na hibik niring pusong lumuluha

mahal kita, ang puso ko'y sumusumpa

iisa ka lang, ito ang aking panata

sa pagtanda mo, akin kitang sasamahan

sa mga pagkilos, kailanman, saanman

sa anumang gawain, di kita iiwan

kahit makaharap natin si Kamatayan

Di Kami Mga Bayarang Raliyista

DI KAMI MGA BAYARANG RALIYISTA
ni Gregorio V. Bituin Jr.
13 pantig bawat taludtod

di ko ugali ang magbanta sa kung sino
ngunit namumuo ang poot sa dibdib ko
lalo't lagi silang nagtatanong magkano
ang sa mga rali'y kinikita ko't sweldo

wala kaming kinikita sa mga rali
kaya naririto, sa masa'y nagsisilbi
prinsipyong tangan ay di ipinagbibili
nakikibaka kaya sa rali kasali

ang rali ay isang pamamaraan namin
na maipahayag ang aming saloobin
hinggil sa mga isyu ng masa't hinaing
at sa kinauukulan ay maparating

ang ipinaglalaban namin ay prinsipyo
kahit mahirap at puno ng sakripisyo
ibabagsak namin itong kapitalismo
upang maitayo ang ipapalit dito

hindi kami mga bayarang raliyista
pagkat prinsipyo ang ipinakikibaka
ang magpabayad kami ay katawa-tawa
parang nilunok ang sinusukang sistema

papalitan namin itong sistemang bulok
ibabagsak namin itong gobyernong bugok
babaguhin namin ang diwang inuuk-ok
at uring manggagawa'y aming iluluklok

Matamis na Ngiti

MATAMIS NA NGITI

ni Gregorio V. Bituin Jr.

14 pantig bawat taludtod

nais kong masilayan ang matamis mong ngiti

ngunit paano naman kung ang puso ko'y sawi

iyo kayang pakinggan ang paghibik ko't hikbi

ikaw na sa puso ko'y laging nananatili

Ikaw'y Kasama

IKAW'Y KASAMA
ni Gregorio V. Bituin Jr.
10 pantig bawat taludtod

“If you tremble indignation at every injustice then you are a comrade of mine.” - Che Guevara

kung ikaw'y nangangatog sa galit
sa dumaratal na inhustisya
kung ikaw'y suklam sa mapagkait
at talagang maramot sa kapwa
kung nangangatal ka na sa lupit
ng sinumang mapagsamantala
at kung poot ka sa nanggigipit
sa mahirap na obrero't masa
aba'y bisig natin ay magkapit
pagkat ikaw ay isang kasama

Paglandi sa Labi

PAGLANDI SA LABI

ni Greg Bituin Jr.

7 pantig bawat taludtod

(sa isang dalagang nagpapantasya sa makata)

turing mo'y ako'y hari

ng iyong puso't ngiti

sige, ikaw'y maglandi

sa aking mga labi

nais kong manatili

sa iyong aking mithi

habang kita'y hahabi

ng pangarap na sanhi

Kaibhan ng Reporma't Rebolusyon

KAIBHAN NG REPORMA'T REBOLUSYON
ni Gregorio V. Bituin Jr.
13 pantig bawat taludtod

"A reform is a correction of abuses; a revolution is a transfer of power." - Edward George Earle Lytton Bulwer-Lytton, mula sa kanyang Talumpati sa House of Commons, hinggil sa Reform Bill

pinagtalunan na ng mga tibak noon
na nangangarap ng pagbabago sa nasyon
kung sino yaong repormismo'y nilalayon
at sino naman ang para sa rebolusyon

reporma'y pagtama lang sa mga abuso
ngunit wala pa ring gaanong pagbabago
pulos katiwalian pa rin sa gobyerno
patuloy pa rin ang landas ng mga trapo

di sapat ang reporma lamang, kaibigan
rebolusyon ay talagang kaiba naman
ito'y sadyang pag-agaw ng kapangyarihan
mula sa mga gahaman, tungo sa bayan

kaya makiisa na't tayo'y makibaka
rebolusyon para mabago ang sistema

BISIG, Tunay na Unyon sa Goldilocks

BISIG, TUNAY NA UNYON SA GOLDILOCKS
ni Gregorio V. Bituin Jr.
12 pantig bawat taludtod

Kilalanin natin ang tunay na unyon
Ito ang marapat na tungkulin ngayon
Ng bawat obrero, kahit ng mga miron
At ang mapagpanggap ay agad itapon

Sa Goldilocks, BISIG ang unyong nanalo
Na siyang marapat kilanling totoo
Ano't itong BUKLOD na talagang talo
Ang kinikilala ng manedsment dito

Ang BUKLOD ay kayang hawakan sa leeg
Nitong manedsment na kanila ngang kabig
Habang ang nanalong unyon nitong BISIG
Sa pakikibaka'y hindi palulupig!

Sa Goldilocks, BISIG itong unyong tunay
At sa halalan nga'y siyang nagtagumpay
Sa obrero'y tunay silang kaagapay
Habang iyang BUKLOD, talo't parang anay.

Goldilocks, Tumitiba

GOLDILOCKS, TUMITIBA
ni Gregorio V. Bituin Jr.
13 pantig bawat taludtod

ang pabrikang Goldilocks, kaytinding tumiba
ngunit manggagawa niya'y kinakawawa
binuhay na siya ng kanyang manggagawa
na nag-akyat ng malaking tubo at tuwa

ngunit bakit obrero'y sakbibi ng luha
nagtatrabaho nga'y para pang isinumpa
sugat-sugat na pati kanilang diwa
kahit ang laman nila'y parang hinihiwa

dahil nais ng kapitalistang kuhila
na mag-akyat pa ng tubo ang manggagawa
kahit na manggagawa pa'y nakakawawa
kapitalista'y walang puso't pang-unawa

pulos tubo, tubo, tubo ang nasa diwa
tubo ang susing nagpapagalaw sa kuhila
kaya ang kapitalista'y kasuma-sumpa
mapanghamak na dapat ibaon sa lupa

Welga sa Goldilocks, Unang Araw

WELGA SA GOLDILOCKS, UNANG ARAW
ni Gregorio V. Bituin Jr.
15 pantig bawat taludtod

Sigaw ng lider-obrero: Goldilocks, tumitiba!
Agad tugon naman: Manggagawa, kinakawawa!
Ang sagutang ito'y sa piketlayn dumadagundong
Na ipinaririnig sa masang makasalubong.

Talagang galit na ang mga manggagawa rito
Pagkat sila'y sabay-sabay tinanggal sa trabaho
Dahil sa kasalanang di naman nila ginawa
Na pinagbintangang nagwelga kahit naman wala.

Kasinungalingan ng manedsment ang dumaluhong
Katwirang baluktot nito sa obrero'y daluyong
Na nakisabwat sa gobyerno laban sa obrero
Imbes sila'y tumulong, dahil sa tubo'y nanloko.

Unyunista ng BISIG, kayo na'y magbuklod-buklod
Magkapit-BISIG na upang BUKLOD ay manikluhod!
Goldilocks, tumitiba! Manggagawa'y itsa-pwera
Kaya nararapat, patuloy kayong magkaisa!

Kayo ang nagpaunlad sa Goldilocks at lumikha
Ng produkto dito't di kayo dapat balewala
Kaya Workers Control ng Goldilocks, pag-isipan na
Kayo na ang magpatakbo ng sariling pabrika!

Sigaw ng lider-obrero: Goldilocks, tumitiba!
Agad tugon naman: Manggagawa, kinakawawa!
Sigaw ng lider-obrero: Baguhin ang lipunan!
Na tinugon ng: Tungo sa ganap na kalayaan!

(Nilikha sa unang araw ng welga sa piketlayn ng Bukluran ng Independyenteng Samahang Itinatag sa Goldilocks (BISIG), Marso 11, 2010)

Marso 11, 2010, 498 Shaw Blvd.

MARSO 11, 2010, 498 SHAW BLVD.
ni Gregorio V. Bituin Jr.

Dali-daling nagmartsa ang mga pagod na katawan
Upang ipaglaban ang nilabag na karapatan
Upang pukawin ang mga tulog na isipan
Upang makamtan ang minimithing katarungan

Alas-tres iyon ng madaling araw
Habang tulog pa ang kapitalistang tungaw
Habang tinutubo ng kumpanya'y angaw-angaw
Habang mga obrero sa hustisya'y uhaw

Ipinutok na ang pag-aaklas
Ng mga manggagawang naroon sa labas
Dahil tinanggal ng kapitalistang ungas
Dahil binaluktot ang kaso at batas

Nanggigigil ang mga manggagawa
Pagkat hustisya't trabaho'y sadyang nawala
Pagkat kapitalista'y kanilang isinusumpa
Pagkat sa tubo'y nais na nilang lumaya

Ang Manggagawa

ANG MANGGAGAWA
ni Gregorio V. Bituin Jr.
15 pantig bawat taludtod

Manggagawa, ikaw ang tagalikha ng lipunan
Ang tagahubog ng sistema ng sandaigdigan
Halina't magsuri, pag-aralan ang kasaysayan

At ang lipunang luklukan ng bulok na sistema
Lalo ang kapitalistang ganid sa tubo't kwarta
Kung wala kayo'y walang maunlad na ekonomya

Ikaw ang bumuhay at umukit ng buong mundo
Tunay kang pinagpala, simbolo ng pagbabago
Ang iyong bisig, pawis, utak, dugo'y inambag mo

May dakila kang misyon sa daigdig, manggagawa
Ikaw ang pinagpalang uri ng masang dalita
Sikapin mong gampanan yaong misyon mong dakila

Yakapin mo ang ideyolohiyang proletaryo
Establisahin ang mga komyun sa buong mundo
Lupigin yaong mapagsamantalang aparato

Kapitalismo'y isang mapag-aglahing sistema
Ang sistemang di atin, para lang sa elitista
Nais lang nito'y tumubo't pagtubuan ang masa

Yanigin na natin ang sistemang mapang-aglahi
Organisahin na nating tunay ang ating uri
Sosyalismo'y ipalit na sa lipunan ng imbi

Buklurin ang mga obrero sa pakikibaka
May naghihintay sa ating sistemang sosyalista
Panahon na, manggagawa, halinang magkaisa

Di Isang Piging Ang Rebolusyon

DI ISANG PIGING ANG REBOLUSYON
ni Gregorio V. Bituin Jr.
15 pantig bawat taludtod, soneto

di isang piging o kasayahan ang rebolusyon
na pag nakita sa TV ang ating rali ngayon
o napabalita sa dyaryo ang pagrali noon
ay kaysaya na natin at nakapagrebolusyon

sa totoo lang, ang rebolusyon ay insureksyon
ito'y pagdurog sa kalabang ating hinahamon
pagwasak sa pribadong kagamitan sa produksyon
lalo na'y pagpawi ito sa estado o nasyon

rebolusyon ay pagtatayo ng bagong sistema
ito'y pagpawi rin ng uring mapagsamantala
at pagtatanggol laban sa elitista't burgesya
upang di muling mabuhay ang mga tulad nila

sistemang bulok ay papalitan nating tuluyan
at itatayo natin ang sosyalistang lipunan