Ang ina, ang anak, at ang katulong

ANG INA, ANG ANAK, AT ANG KATULONG
ni Gregorio V. Bituin Jr.
15 pantig bawat taludtod

minsan ay nagtanong ang bata sa mahal na ina
"iiwan nyo po ba sa katulong ang inyong pera
pati mga alahas at gamit na mahalaga?

sagot ng ina sa pinakamamahal na anak
"hindi, anak, isa lang siyang katulong na hamak
wala akong tiwala sa kanyang isang bulagsak!"

bata'y napaisip at sa wari'y bubulong-bulong
at nang di makatiis sa ina'y agad nagtanong
"kung gayon, bakit mo ako iiwan sa katulong?"

matalim, malalim, marunong magsuri ang bata
isang katanungang dapat lang sagutin ng tama
ngunit ina'y wala agad maisagot sa putla

Pag Gutom ang Lamok

PAG GUTOM ANG LAMOK

ni Gregorio V. Bituin Jr.

13 pantig bawat taludtod

pag gutom ang lamok, kutis ang pinupupog

dala nitong sakit sa atin dumudurog

sa dengge't malarya'y kayrami nang namatay

na nagdulot sa mga ina nitong lumbay

halina't kumilos bago muling dumami

ang mga lamok na sa atin pumipeste

dahil pag gutom ang lamok, maghanda ka na

mahirap magpagamot ng dengge't malarya

pigilan ang pagdami nitong mga lamok

sa dugo natin, sila nga'y hayok na hayok

tanggalin ang naimbak na tubig sa kanal

wasakin ang pinangingitlugan ng hangal

tandaang kayrami nang namatay sa dengge

at sa malarya'y kayrami na ring nadale

"prevention is better than cure," ika nga nila

magastos magpagamot, kayraming abala

Utak ma'y nakapiit sa bungo

UTAK MA'Y NAKAPIIT SA BUNGO

ni Gregorio V. Bituin Jr.

10 pantig bawat taludtod

utak ma'y nakapiit sa bungo

puso ma'y patuloy sa pagdugo

katinuan ay di maglalaho

ang pangarap ko'y di magugupo

adhikain ko'y kalong ng puso

layunin sa masa'y di guguho

sa pakikibaka'y di susuko

pitpitin man ang bayag ko't bungo

Masaker sa Mendiola - Enero 22, 1987

MASAKER SA MENDIOLA - ENERO 22, 1987
ni Gregorio V. Bituin Jr.
15 pantig bawat taludtod

labintatlong magsasaka ang doon ay pinaslang
habang walumpu pa ang sa kanila'y nasugatan
gayong makatarungan lang naman ang kahilingan
bakit ipinagkait, dinulot pa'y kamatayan

sa Ministry of Agrarian Reform ay namalagi
upang isiwalat sa publiko ang minimithi
walong araw na singkad sila roong nanatili
at sa harap ng Post Office, nagrali't talumpati

Comprehensive Agrarian Reform Program, ipatupad!
silang magsasaka'y ito yaong kanilang hangad
CARP na pangako ng Pangulong Cory'y inilantad
bakit ba pangakong ito'y tila di umuusad

kaya magsasaka'y nagtungo doon sa Mendiola
ngunit kapulisang naroo'y hinarangan sila
ang masakit ay pinaulanan sila ng bala
ilang taon na'y nagdaan, nasaan ang hustisya?

Agos sa Pisngi ng Pangungulila

AGOS SA PISNGI NG PANGUNGULILA

ni Gregorio V. Bituin Jr.

ang luha, tulad ng daloy ng wagas na pag-ibig,

ay patuloy na aagos sa pisngi ng pangungulila,

ngunit ang mahalaga't sa puso'y nakakaantig

di man pisikal ay nagkakausap silang kapwa

ang mahalaga'y laging may komunikasyon

at walang pag-aalinlangan nang di magmaliw

ang dalawang puso sa pagsintang nilalayon

pag-ibig na mapagparaya para sa ginigiliw

Maasim man ang pakikibaka

MAASIM MAN ANG PAKIKIBAKA

ni Gregorio V. Bituin Jr.

12 pantig bawat taludtod

maasim man ang ating pakikibaka

tamis ng tagumpay nawa'y ating kamtin

kaya halina tayo'y mag-organisa

nang makamit natin ang ating layunin

kung ang pakikibaka nati'y kaypakla

sadyang kayraming dakilang sakripisyo

kaya ibilin sa uring manggagawa

dapat nang maging pwersa ng pagbabago

sosyalismong diwa'y atin nang yakapin

manggagawa'y gawin nating inspirasyon

tagumpay ng ating adhika'y tiyakin

hanggang umabot sa pagbabagong layon

bulok na sistema'y atin nang igupo

kahit na sa sakripisyo'y punong-puno

Kung Ako'y Hangin

KUNG AKO'Y HANGIN
ni Gregorio V. Bituin Jr.
10 pantig bawat taludtod

ako’y hanging di mo nakikita
ngunit iyong laging nadarama
sa araw-araw, kasama kita
sa gabi'y hinahaplos-haplos ka

ganyan nga kita iniingatan
balintataw ka sa aking isipan
guniguni ka sa panagimpan
nais kitang maging kasintahan

ako nga ba'y iyong nadarama
lalo ang puso kong sumisinta
ayokong sa dilim mawala ka
at sa liwanag ay matunaw ka

sasabihin ko ang aking lihim
ayoko nang manatiling hangin
na laging walay sa'yong paningin
nang ikaw'y tuluyang maging akin

Ulap na Nakaraan

ULAP NA NAKARAAN

ni Gregorio V. Bituin Jr.

13 pantig bawat taludtod

kung nakaraan man ay kapara ng ulap

tinabunang liwanag ay aandap-andap

mas maiging salubungin ang hinaharap

ng marubdob at may determinasyong ganap

baka matamo'y inaasahang pangarap

isang pag-asang sa'yo'y totoong lilingap

Yakap

YAKAP

ni Greg Bituin Jr.

11 pantig bawat taludtod

A hug is a great gift - one size fits all, and its easy and free to exchange. - mula sa facebook ng isang kaklase sa elementarya

isang magandang regalo ang yakap?

aba kung totoo ito'y kaysarap

ngunit namimili rin ng kayakap

kung sino sa kanya'y katanggap-tanggap

kahit naman dalaga kong pangarap

ay di ko basta-basta mayayakap

kelangan munang pasaguting ganap

upang di sampal ang aking malasap

Ang Mapanira

ANG MAPANIRA

ni Greg Bituin Jr.

12 pantig bawat taludtod

The people who know the least about you, always have the most to say. - mula sa facebook ng isang kaklase sa elementarya

Ang taong kaunti ang alam sa iyo

Ang siya pang buga ng buga ng todo

Nilamon na pala'y iyong pagkatao

Ng idinadaldal nilang di totoo

Sinasabi nila'y nakapagdaramdam

Tila lahat sa iyo'y alam na alam

Sila ba'y pawang walang pakiramdam

At sa iyong buhay nakikialam?

Sa Aking Diwata

SA AKING DIWATA

ni Gregorio V. Bituin Jr.

13 pantig bawat taludtod

tulad ka ng diwatang laging nasa isip

na sunod ng sunod sa aking panaginip

kaya ayoko nang dumilat sa pag-idlip

pagkat ganda't ngiti mo sa puso ko'y kipkip

gaya ng hangin, tinangay mo akong bigla

inilakbay ako sa ilog ng haraya

hanggang makadaong sa aplaya ng luha

upang doon kalayaan ay maunawa

at ngayon, iwi kong diwa'y nakaintindi

na ang paglaya'y di pagkamakasarili

kundi panlahat ang anyaya nitong silbi

upang madanas ng tao'y pawang kaybuti

ikaw ang diwata ng puso ko't haraya

na diwa ng pagbabago'y inaadhika

sabay kita at magkasamang ipupunla

ang binhi ng sosyalismo saanmang lupa

kita na nating kayraming naghihimagsik

at pagbabago ang kanilang hinihibik

diwa ng kalayaa'y ating ihahasik

bago kita, diwata, gawaran ng halik

patuloy kitang kumilos, aking diwata

upang sundin ang pintig ng ating adhika

mapakilos ang dukha't uring manggagawa

at maganap ang himagsik tungong paglaya

pagbati - MANY KRISis ang MASa, API sa NEW YEAR

MANY KRISIS ANG MASA

ni Gregorio V. Bituin Jr.

11 pantig bawat taludtod

tadtad pa rin ng krisis itong masa

na pansamantala lang pinakalma

tunay ngang pasko'y isang anestisya

nang krisis ay sandaling di madama

upang pagkatapos ng kapaskuhan

patuloy pa rin itong tunggalian

pansamantala lang hinimasmasan

ng bolerong pasko nitong gahaman

lakas-paggawa'y di bayarang tama

mumo pa rin ang pagkain ng dukha

marami pa ring sa gutom tulala

paskong-pasko, dukha'y kinakawawa

API SA NEW YEAR

ni Gregorio V. Bituin Jr.

11 pantig bawat taludtod

nagbago lang ang petsa'y nagsaya na

gayong api pa rin naman ang masa

nawala ba ang pagsasamantala

sa pagkakapalit ng bagong petsa

anong meron diyan sa bagong taon

may bago kayong new year's resolution

habang nakaamba ang demolisyon

at patuloy ang kontraktwalisasyon

bagong taon, lumang sistema pa rin

tumaas na ang presyo ng pagkain

manggagawa'y nagdaralita pa rin

api pa rin ang marami sa atin

Sa Pagdatal ng Bagong Petsa

SA PAGDATAL NG BAGONG PETSA

ni Gregorio V. Bituin Jr.

9 pantig bawat taludtod

sa pagdatal ng bagong petsa

ay luma pa rin ang sistema

magpatuloy mag-organisa

magmulat at i-propaganda

ang adhikaing sosyalista

HAPPY NEW YEAR, mga kasama!

Hangga't Buhay Ako, Ms. M.

HANGGA'T BUHAY AKO, MS. M.

ni Gregorio V. Bituin Jr.

15 pantig bawat taludtod

poproteksyunan kita, Ms. M., hangga't buhay ako

panata itong kakabit ng aking pagkatao

poproteksyunan kita ng buhay ko hanggang dulo

dahil pag-ibig kita, ikaw ang minamahal ko

isa ka sa pinakamamabait kong kasama

ikaw ang aking inspirasyon sa pakikibaka

kaya magpatuloy tayo sa pag-oorganisa

lalo sa panawagang manggagawa'y magkaisa

panata kong sa bawat laban, di kita iiwan

buhay ko man ang kapalit, ikaw'y ipaglalaban

sa bawat pagkilos, di ka mawala sa isipan

sa bawat labanan, kasama ka at kagampan

kaya poproteksyunan kita hangga't buhay ako

panata itong kakabit ng aking pagkatao

sa bawat pakikibaka, magpapatuloy tayo

dahil kasama kita, kasama't minamahal ko

Buti kung daliri'y may kapalit

BUTI KUNG DALIRI'Y MAY KAPALIT

ni Gregorio V. Bituin Jr.

7 pantig bawat taludtod

pak, pak, bum, bum, pak, pak, boom

sabay-sabay ang putok

para sa bagong taon

yanig ang buong nayon

pak, pak, bum, bum, pak, pak, boom

magdamag ay nilindol

iba'y sisipol-sipol

ang iba'y humagulgol

sinugod sa ospital

ang mga naputukan

sa daliri't paanan

sa braso't sa ulunan

ang lima'y naging tatlo

natanggal pati kuko

dugo'y sirit sa noo

sa tama ng piccolo

taun-taon na lamang

daming napuputulan

di naman mapalitan

ang bahaging nawalan

sino pa ang hihirit

buti kung may kapalit

ang daliring naligpit

sa tradisyong kaylupit

Habang...

HABANG...

ni Gregorio V. Bituin Jr.

Habang patuloy na tumataas

Ang presyo ng isang kilong bigas

Habang patuloy na bumababa

Ang kalidad ng buhay ng madla

Habang itong sistema'y kayrahas

Binababoy ng trapo ang batas

Habang patuloy na lumuluha

Ang mga dukhang nagdaralita

Habang patuloy na namamalas

Ang buhay nilang di naman patas

Habang patuloy na bumabaha

Ang pinagtubuan ng paggawa

Habang aba ang obrerong lakas

Dahil sa kapitalistang ungas

Habang patuloy na nililikha

Yaring danas na dusa at luha

narito tayo

nakikibaka

nagpapatuloy

sa adhikaing

para sa masa

at manggagawa

Dinudurog ng Gutom

DINUDUROG NG GUTOM

ni Gregorio V. Bituin Jr.

10 pantig bawat taludtod

ang masa'y dinudurog ng gutom

pansin ko habang naglilimayon

walang pagkain, walang mainom

tila tulad nila'y alimuom

dinudurog ng gutom ang tiyan

kaya nanghihina ang katawan

bakit ba nangyayari ang ganyan

sila'y biktima ng kahirapan

nagutom ang marami sa atin

kahit laksa-laksa ang pagkain

dahil sistema'y mapang-alipin

na dapat palitan at wasakin

Bihirang Dalawin ni Santa Claus ang Dukha

BIHIRANG DALAWIN NI SANTA CLAUS ANG DUKHA

ni Gregorio V. Bituin Jr.

13 pantig bawat taludtod

ang bawat kapaskuhan ay isang pangarap

sa mga batang isa ang hinahagilap

si Santa Claus sana'y kanila nang mahanap

upang maibsan naman ang danas na hirap

inaabangang baka lumitaw sa ulap

ang mga batang ito'y lagi nang maputla

dahil sa hirap at gutom laging tulala

umaasahang dumalaw si Santang dakila

ngunit inaasahan nila'y laging wala

bihirang dalawin ni Santa Claus ang dukha

pagkat naroon si Santa sa mayayaman

mayayamang bata ang nireregaluhan

habang nakatanghod lang sa may tarangkahan

ang mga batang inangkin ng kahirapan

si Santa Claus pala'y para lang sa mayaman

napagtanto ng mga batang mahihirap

si Santa Claus pala'y totoong mapagpanggap

kaya sila'y nagpulong at nagpasyang ganap

sa susunod na taon di na mangangarap

na isang Santa Claus ay kanilang mahanap

Ang rebolusyon ay di tulad ng bayabas

ANG REBOLUSYON AY DI TULAD NG BAYABAS

ni Greg Bituin Jr.

13 pantig bawat taludtod

ang rebolusyon ay di tulad ng bayabas

na babagsak ng kusa pag ito'y hinog na

dapat kang kumilos upang ito'y mapitas

huwag tumulad kay juan tamad na tanga

Pagtulog sa Lansangan

PAGTULOG SA LANSANGAN

ni Gregorio V. Bituin Jr.

10 pantig bawat taludtod

karton ay aayusing maigi

upang pahingahin ang sarili

langit ang bubong nila't kisame

ilaw nila'y bituin sa gabi

gutom yaong pinipintakasi

upang bukas muli'y dumiskarte

Kung Tayo'y Malulugmok

KUNG TAYO'Y MALULUGMOK

ni Gregorio V. Bituin Jr.

13 pantig bawat taludtod

di na mahaba-haba ang pakikibaka

kakaunti na lang ang nalalabing oras

maaring takipsilim ay mabanaag na

at ilang taon na lang tayo ri'y lilipas

at sa mundong ito'y magiging alaala

ngunit adhikain nati'y di maaagnas

kaya bago pa sumapit ang takipsilim

ay ialay na natin ang ating sarili

upang bigyang liwanag ang danas na dilim

upang ang sistemang sa ati'y bumibigti

upang kapitalismong nagdulot ng lagim

sa uring manggagawa'y tuluyang iwaksi

patuloy tayong kumilos, mga kasama

laban sa epidemya ng globalisasyon

laban sa yumuyurak sa dangal ng masa

laban din sa salot na kontraktwalisasyon

at laban din sa lipunang kapitalista

di tayo titigil sa pagrerebolusyon

iwawaksi natin ang bulok na sistema

pati lahat ng tipo ng diskriminasyon

patuloy na ipaglalaban ang hustisya

pati na rin karapatang pantao ngayon

huwag nang tumigil sa pag-oorganisa

palakasin natin ang ating mga unyon

kahit paminsan-minsan, nagsasaya tayo

lalo't sumapit ang panahong kapaskuhan

nang problema sa pamilya, unyon, gobyerno

ay ating pansumandaling makalimutan

mapapasabak muli pagkatapos nito

tila parang anestisya ang kapaskuhan

sasapit at sasapit itong takipsilim

upang tayo'y maging alaala na lamang

patuloy tayong kumilos kahit palihim

para sa sosyalismong adhika sa bayan

upang kung tayo'y malulugmok na sa dilim

ay mabanaag ang bagong kinabukasan

Ugaling Kapitalista

UGALING KAPITALISTA

ni Gregorio V. Bituin Jr.

14 pantig bawat taludtod

pag nalugi, ang kapitalista'y nabubuwang

pag tumubo, sa obrero'y walang pakialam
pag nalugi, akala mo sila'y namatayan
pag tumubo, obrero'y di man lang bahaginan

pag nalugi, tanong nila'y saan nagkamali
pag tumubo, magagaling daw silang magsuri
pag nalugi, sa manggagawa pa namumuhi
pag tumubo, manggagawa nila'y di mapuri

pag nalugi, obrero'y sinisisi pa nito
pag tumubo, magaling daw ang kapitalismo
pag nalugi, nais nilang magtanggal ng tao
pag tumubo, di mai-regular ang obrero

pag nalugi, namali lang sila ng diskarte
pag tumubo, manggagawa'y kontraktwal daw kasi
pag nalugi, manggagawa pa ang walang silbi
pag tumubo, kapitalista ang tanging saksi

sadya bang ganito silang asal-tampalasan
pag nalugi, manggagawa ang may kasalanan
pag tumubo, obrero'y di man lang parangalan
pinupuri ng kapitalista’y sarili lang

Latay ng Kabulukan

LATAY NG KABULUKAN

ni Gregorio V. Bituin Jr.

10 pantig bawat taludtod

lumalatay sa puso't isipan

ng mga dukha ang kabulukan

ng sistemang dulot ng gahaman

tumatagos sa kaibuturan

kaytindi ng bulok kung lumatay

buhay ka pa ngunit inaanay

binatak tayo nito sa hukay

upang sa putik mangalupasay

ganyan ang dulot ng kabulukan

ng sistema sa kasalukuyan

at kung di tayo ngayon lalaban

pupulutin tayo sa kangkungan

lumalatay sa bawat pamilya

ang bangis ng bulok na sistema

at kung di tayo makikibaka

dami pa nitong mabibiktima

Ang Tatlong Kuliglig

ANG TATLONG KULIGLIG

ni Gregorio V. Bituin Jr.

13 pantig bawat taludtod

I

maingay tuwing gabi ang mga kuliglig

na kulisap na kamag-anak ng tipaklong

tila buong nayon sa ingay nila'y yanig

sa gabing payapa ang bulong nila'y ugong

II

ang kuliglig yaong sasakyang pang-araro

sadyang palasak sa kayraming lalawigan

pinaaandar ng gasolina o krudo

nang lumago ang tanim, tubuhan, palayan

III

mga kuliglig sa Maynila'y hatid-sundo

pedikab na ang gamit ay motor ng bangka

kay-ingay sa lansangan, nakakatuliro

paboritong sakyan ng pasaherong madla

IV

iba't iba man itong uri ng kuliglig

kulisap, pang-araro't hari ng lansangan

bahagi na ng buhay, laging maririnig

gaano man kaingay, kinagigiliwan

Halina't Parangalan ang mga Manggagawa

HALINA'T PARANGALAN ANG MGA MANGGAGAWA

ni Gregorio V. Bituin Jr.

14 pantig bawat taludtod

nalikha ang lipunan dahil sa manggagawa

kung wala sila, lipunan ay di malilikha

dahil sa bisig nila, mundo'y pinagpapala

dahil sa kanila, umunlad ang mga bansa

lipunan ay di nilikha ng kapitalista

ngunit naghahari-harian pa dito'y sila

utang na loob daw ng obrero sa kanila

kaya mga ito'y may trabaho sa pabrika

aba, aba, aba, sila pa ang nagmayabang

kung di raw sa kanila, obrero'y walang puwang

subukan kaya nilang walang obrero riyan

tutubo ba ng limpak silang mga gahaman

dapat matanto ng kapitalistang kuhila

ang katotohanang kung wala ang manggagawa

pabrika'y sarado, tutubuin nila'y wala

kailangang kalakal ay di na malilikha

mula pa ng panahong primitibong lipunan

mga tao'y nangangaso at nagbibigayan

mga nakukuha nila'y pinaghahatian

walang gutom, bawat isa'y lalamnan ang tiyan

ngunit nang dumatal na ang lipunang alipin

mga alipin ang tagakuha ng pagkain

para sa panginoong sa kanila'y nag-angkin

sila'y walang karapatan, madaling patayin

nang umunlad na ang kagamitan sa produksyon

tao'y inari ng mga naghahari noon

hanggang sa dumating ang maylupang panginoon

sa lipunang pyudal, magsasaka'y di malingon

hanggang ang sistemang sahuran ay maimbento

ang pangunahin sa kapitalista'y negosyo

nagtayo ng pabrika, nangalap ng obrero

tubo ang una, kahit obrero'y ginagago

ngunit lipunang ito'y di sa kapitalista

di sa sinupamang nang-aalipin sa masa

di sa sinupamang mayayamang elitista

lalo't di sa gahaman sa tutubuin nila

lipunang ito'y para sa nagpagal, nagpala

upang umunlad ang ekonomya nitong bansa

lipunang ito'y nilikha ng lakas-paggawa

halina't parangalan ang mga manggagawa

Nilay ng Dukha

NILAY NG DUKHA

ni Gregorio V. Bituin Jr.

13 pantig bawat taludtod

kumatok ang dukha sa mansyon ng mayaman

ngunit ang dukha'y agad ipinagtabuyan

bakit daw siya naroon sa tarangkahan

mabuti pang siya raw ay umuwi na lang

ngunit ang dukhang iyon kaya naroroon

ay nag-aabang ng pagkaing itatapon

ilang araw nang di kumain, nagugutom

nagbabakasakali kahit daw bagoong

at lumipat ng mansyon ang nasabing dukha

ngunit sadya ngang siya'y binabalewala

ang tingin sa kanya'y pusakal, hampaslupa

tingin niya sa sarili'y kaawa-awa

o, bakit ba sa mundo ang dukha'y kayrami

maraming nagugutom, kumain dili

ano ba ang misyon nila sa mundong bingi

bakit ba mundo sa kanila'y napipipi

kung masasagot lang ang katanungang iyon

tiyak itong mga dukha'y magsisibangon

mga mapang-api'y kanilang ibabaon

at sama-sama nilang iibsan ang gutom

Sa First Date Natin

SA FIRST DATE NATIN

ni Gregorio V. Bituin Jr.

9 pantig bawat taludtod

nagkakasama lagi tayo

sa mga pagkilos ng masa

sa panawagang pagbabago

sa bawat pag-oorganisa

sa welga ng mga obrero

sa mga rali sa kalsada

at mahal kita, kasama ko

ngunit first date nati'y wala pa

lagi mo akong dinadalaw

sa aking mga panaginip

ang puso ko'y iyong pinukaw

kaya lagi kang nasa isip

hanggang lagi kang natatanaw

hanggang diwa't puso'y malirip

na ang iniibig ko'y ikaw

puso ko'y iyong halukipkip

patuloy tayong makibaka

lumang sistema'y bubuwagin

di na ako mawawalay pa

sa pagbabagong adhikain

nais kong mapangiti kita

nang wala kang alalahanin

nais kitang mapaligaya

pag natupad ang first date natin

first date ng mapupulang rosas

kahit nagrerebolusyon tayo

first date ng pag-ibig na wagas

ang buhay ko'y ikaw, sinta ko

first date na di malilimutan

inspirasyon kitang totoo

sa buhay kong ito'y minsan lang

dumating ang mga tulad mo

habang kasaliw ang musika

damhin mo ang aking pag-ibig

pangarap kong mahagkan kita

habang kulong kita sa bisig

puso ko'y pakinggan mo, sinta

at kaydami mong maririnig

rebolusyon, pakikibaka

tayo'y pinag-isang pag-ibig

prinsesa kang napakaganda

at ako'y kabalyerong lintik

ipagtatanggol lagi kita

sa anumang gulong humibik

sa first date natin, aking sinta

puso ko't diwa'y nasasabik

ikaw na lagi kong kasama

ay gagawaran ko ng halik

Binhi ng Rebo

BINHI NG REBO

ni Gregorio V. Bituin Jr.

11 pantig bawat taludtod

bulok na sistema'y nakamumuhi

na nagdulot ng hirap na masidhi

pribadong pag-aari itong sanhi

kaya palayain natin ang lahi

laban sa elitistang asal-panghi

halina't ating itanim ang binhi

ng rebolusyong kaytagal nang mithi

ihasik natin sa matabang lupa

ang hangarin ng uring manggagawa

rebolusyong nasa ng mga dukha

ang sosyalismong kanilang adhika

kapitalista'y itulad sa daga

itaboy sila sa labas ng lungga

o sa noo nila'y lagyan ng tingga

Asin at Pangarap

ASIN AT PANGARAP

ni Gregorio V. Bituin Jr.

12 pantig bawat taludtod

minsan isang ginang ang kinapanayam

sa kanyang tahanan, anong inuulam

lalo't magpapasko, masarap ba naman

sa kanyang asawa'y ano ang pulutan

ngunit itong ginang na isang mahirap

ay agad tumugon, walang pagpapanggap

di kaya ng bulsa yaong masasarap

na mga pagkaing kanilang pangarap

ilang pasko na raw, noche buena'y tuyo

ang puto bumbong daw ay isa nang luho

tinda nilang isaw, paa, pakpak, dugo

ang kanilang ulam, kahit hinahapo

di raw masustansya, anang nagpanayam

yaong kinakain ng nasabing ginang

wala raw ba siyang pangarap man lamang

na kumain kahit sa mga restawran

tumugon ang ginang kahit nahihirin,

"di sapat ang kita sa luhong pagkain

ayokong dagdagan ang alalahanin

masaya na akong magdildil ng asin"

nagpanayam naman ay agad tumugon

"nawalan na kayo ng imahinasyon

ayaw nyong tumikim kahit man lang litson

parang kayo'y ayaw mangarap na ngayon?"

ang tugon ng ginang, "may bukas pa nga ba

sa lipunang itong pawang luha't dusa

tingnan mo ang aking anak at asawa

pawa nang maysakit, may bukas ba sila?"

"may pag-asa pa po," payo ng kausap

"ngayon po'y simulang muli ang mangarap

huwag makuntentong asin ang malasap

isang bagong bukas ang likhaing ganap"

Milyun-milyong Kontraktwal

MILYUN-MILYONG KONTRAKTWAL

ni Gregorio V. Bituin Jr.

13 pantig bawat taludtod

kailangan ng trabaho, nagpaalipin

kahit maging kontraktwal, basta may makain

kaysa raw magutom ang kanilang pamilya

kaysa raw mamatay silang dilat ang mata

basta may makain, kahit maging kontraktwal

nagpapaalipin kahit di maregular

sa lipunang itong walang kinabukasan

ang kinabukasan ay alipin ng gahaman

kinabukasang inukit na ng kapital

upang pagtubuan iyang mga kontraktwal

kontraktwalisasyong walang benepisyo

di tao kung ituring ang mga obrero

kundi makina, makinang walang pamilya

obrerong pinagsasamantalahan nila

ilan ba, ilan pa silang dapat maapi

sa buhay na itong hirap ay tumitindi

nasa milyon na ang tulad nilang kontraktwal

panay ang trabaho, nananatiling kaswal

milyun-milyong kontraktwal, magkaisa kayo

ang bulok na sistema'y baguhin na ninyo

katiyakan sa trabaho'y dapat tiyakin

pagiging regular ay dapat nyong maangkin

lakas-paggawa'y dapat mabayarang tama

benepisyo'y dapat kamtin ng manggagawa

kaya obrero, wakasan  ang kabulukan

ugitin nyo na ang bagong kinabukasan

manggagawa, dapat na kayong magkaisa

kontraktwalisasyong salot, tapusin nyo na