ANG TATLONG KULIGLIG
ni Gregorio V. Bituin Jr.
13 pantig bawat taludtod
I
maingay tuwing gabi ang mga kuliglig
na kulisap na kamag-anak ng tipaklong
tila buong nayon sa ingay nila'y yanig
sa gabing payapa ang bulong nila'y ugong
II
ang kuliglig yaong sasakyang pang-araro
sadyang palasak sa kayraming lalawigan
pinaaandar ng gasolina o krudo
nang lumago ang tanim, tubuhan, palayan
III
mga kuliglig sa Maynila'y hatid-sundo
pedikab na ang gamit ay motor ng bangka
kay-ingay sa lansangan, nakakatuliro
paboritong sakyan ng pasaherong madla
IV
iba't iba man itong uri ng kuliglig
kulisap, pang-araro't hari ng lansangan
bahagi na ng buhay, laging maririnig
gaano man kaingay, kinagigiliwan
Walang komento:
Mag-post ng isang Komento