I-D.A. kami kung kami'y salbahe

I-D.A. KAMI KUNG KAMI'Y SALBAHE
ni Gregorio V. Bituin Jr.
15 pantig bawat taludtod

dapat lang lumabas ang sinumang nag-aakusa
huwag hanggang character assassination lang siya
lumantad siya upang kami'y makapagdepensa
kaysa sinisira kami sa mga tsismis niya

i-D.A. kami kung iyan ang kinakailangan
upang kung kami'y maysala, kami'y maparusahan
huwag hanggang tsismis ka lamang, ikaw na bulaan
huwag kang magbintang lalo't walang katotohanan

ang manira ng kasama'y ligaya mo na yata
pagkatao't dangal ng kapwa'y iyong sinisira
tanungin mo ang iyong sarili: iyan ba'y tama
di ba't di makatarungan ang iyong ginagawa

bakulaw na dalahira, hinahamon ka namin
paninira't tsismis mo'y sapilitan mong pigilin
kami'y mapagpasensya, ngunit kami'y galit na rin
nais naming sa tamang proseso ito daanin

mabuting magsampa ka ng kaso sa matataas
kaysa ipagpatuloy ang gawain mong marahas
tatanggapin namin ang D.A. kung ito'y lulutas
at upang bintang at tsismis mo'y tuluyang magwakas

Pera pala'y nakapagpapatalas ng memorya

PERA PALA'Y NAKAPAGPAPATALAS NG MEMORYA
ni Gregorio V. Bituin Jr.
15 pantig bawat taludtod

pera daw ay nakapagpapatalas ng memorya
kayrami mong kaibigan pag marami kang pera
ngunit pag naghirap, lalayuan ka ng barkada
ang turing sa iyo'y tila di ka na kakilala

ganyan bang sadya ang buhay ng tao sa daigdig
lahat yata'y kilala ka pag kabig ka ng kabig
saanmang larangan, sila'y iyong kakapitbisig
parang lahat karamay mo, puso mo'y maaantig

ngunit di ka na maalala pag ikaw'y naghirap
lapitan mo sila't sila'y tila tsonggong kay-ilap
tila ba may ketong kang ayaw nilang makaharap
doon mo mawawatasang kayraming mapagpanggap

at masisisi mo ba kung ang sistema'y ganito
nawawala na sa kapwa ang pagpapakatao
kaya sa bawat hakbang, tingnan ang lalakaran mo
baka may mukhang salaping nakatitig sa iyo

Kapag tila kabaong yaong kaha ng yosi

KAPAG TILA KABAONG YAONG KAHA NG YOSI
ni Gregorio V. Bituin Jr.
14 pantig bawat taludtod

Kapag tila kabaong yaong kaha ng yosi
Tila kalusugan mo'y yaong pinuputakti
Pag isang yosi'y pilit sinindihan mo dine
Kapag nagkasakit ka'y sino nang masisisi
Ng mga nagmamahal, ikaw ba o ang yosi?

Hindi ba't paalala ng inyong pamahalaan
Pagyoyosi'y masama sa inyong kalusugan
Ang dulot nito'y sakit o kaya'y kamatayan!
Bakit ba sila'y tila di mo pinakikinggan?
Dahil ba walang kwenta kahit ang pamunuan?

Ah, lalagyan lang yaong kahang tila kabaong
Gayong ang mahalaga'y dama mong relaksasyon
Ng utak sa panahong tila nakakaburyong
Ngunit kung kalusugan na yaong nasusuong
Igigiit pa rin ba hanggang ika'y malulong?

Sa ika-20 anibersaryo ng Sanlakas

SA IKA-20 ANIBERSARYO NG SANLAKAS
ni Gregorio V. Bituin Jr.
10 pantig bawat taludtod

Isang maalab na pagpupugay
Sa Sanlakas aming inaalay
Mabuhay, mga kasamang tunay
Ang bandila'y ating iwagayway.

Sanlakas, marangal ang adhika
Sanlakas ng uring manggagawa
Sanlakas din ng lahat ng dukha
Tuloy ang laban hanggang lumaya.

Bawat isyu'y di pinalalampas
Inaaral ang loob at labas
Sinusuri pati alingasngas
Upang tawirin ang tamang landas.

Isyu't problema'y di nalilingid
Bawat isa'y tila magkapatid
Kalooban at diwa'y matuwid
Pagbabago’t paglaya ang hatid.

Ang pangarap na pagkakapantay
Ipagpatuloy natin ng husay
Babaguhin nating sabay-sabay
Ang lipunang nalipos ng lumbay.

Sa mga magagandang Pia

SA MGA MAGAGANDANG PIA
ni Gregorio V. Bituin Jr.
15 pantig bawat taludtod

kaysarap pakinggan ng pangalang Pia, kaysarap
tila hinehele ako nito sa alapaap
pagkat kaygaganda ng Piang aking nakausap
at nakilala, animo'y diyosa ng pangarap

Pia Hontiveros, sa rali ko unang nakita
isang mamamahayag na akala mo'y diyosa
kaysarap titigan ng mata't mukhang sakdal-ganda
aba'y pinangarap ko siya noon at sinamba

isang kakilalang matalik si Pia Montalban
dahil kay Che Guevara'y nakilala kong tuluyan
una niyang rali'y kasama ako sa lansangan
ngunit magsasaka ang napili niyang samahan

maraming mamamahayag na pangalan ay Pia
Pia Arcanghel, Pia Gutierrez, dyornalista
Pia Guanio, Pia Moran, pawang artista
Pia Cayetano naman ay isang senadora

mga Pia silang sa kamera nga'y kayririkit
na tila pag-ibig ang laging sa kanila'y sambit
mga anghel silang nagbabaan mula sa langit
sa kanila'y sinong tulad ko ang di maaakit

Ako yaong mga katagang sa iyo'y yayakap

AKO YAONG MGA KATAGANG SA IYO'Y YAYAKAP
ni Gregorio V. Bituin Jr.
15 pantig bawat taludtod

ikaw ang tangi kong musa nitong mga pangarap
na inaalayan ng mabubunying pangungusap
ang bawat talata'y pinag-iisipan nang ganap
ang mga saknong sa tula'y bunga ng pagsisikap
ako yaong mga katagang sa iyo'y yayakap.

ikaw ang diwata sa gubat ng aking panimdim
nadarama mo ba ang pighati niring damdamin
tila ba pag wala ka ako'y laging nasa dilim
pinuputakti ng kung ano yaong salamisim
O, diwata, kailan kita muling maaangkin?

lagi kitang kayapos sa pangarap at lansangan
kita'y malimit magkita sa bawat panagimpan
magkalapit nga tayo ngunit magkalayo naman
dahil ba ako'y kataga lamang? ngunit tandaan:
ako'y kakatha pa rin maging doon sa libingan.

Sa pagyakap ng mga kataga

SA PAGYAKAP NG MGA KATAGA
ni Gregorio V. Bituin Jr.
14 pantig bawat taludtod

niyakap ng kataga ang lumbay niring loob
habang doon sa putik ako'y nakasubasob
tila humahalakhak ang buong sansinukob:
makata ka, makatang sa tula'y sakdal rubdob

papuri nga ba iyon o isang panlalait
bakit ngingisi gayong ako na'y nasa gipit
kataga'y yumayapos sa akin nang mahigpit
sa kaibuturan ko'y pumapasok ng pilit

yaong mga kataga sa akin ay nangusap
nangakong ililipad ako sa alapaap
doon kami'y lilikha ng mga pangungusap
taludtod, saknong, hanggang maabot ang pangarap

ako'y tatangayin din sa ilalim ng laot
sari-saring damdamin doon malalamuyot
maraming kaalamang akin ding mahahakot
na sa pagkatha'y di na tinik ang mabubunot

maraming salamat po sa inyo, O, kataga
pagyapos mo sa akin ay isang pagpapala
patuloy yaring diwa sa pagkatha’t paglaya
pluma'y paglilingkurin sa manggagawa't dukha

Kaysa maging pasibo sa trapo

KAYSA MAGING PASIBO SA TRAPO
ni Gregorio V. Bituin Jr.
12 pantig bawat taludtod

May taong minsang nagsabi ng ganito:
"Inaangalan ninyo ang gawa ng trapo
Gayong kaya naryan, inyong ibinoto
Kasalanan ninyo't sila ay nanalo."

Mas mabuti nang tayo ay magreklamo
Kaysa bawat isa ay maging pasibo
Mahirap tumunganga na lang sa kanto
Gayong bayan ay ninanakawang todo.

Megan Young, Dangal ng Bayan Natin

MEGAN YOUNG, DANGAL NG BAYAN NATIN
ni Gregorio V. Bituin Jr.
18 pantig bawat taludtod

May ganyan sa bayan nating talaga ngang iyong pupurihin
May ganyang dalagang sadyang matalino, maganda't mahinhin
May ganyang dilag na pag ngumiti puso nati'y tatangayin
May ganyang babaeng ubod nga ng gandang iyong sasambahin
Megan Young, ang Miss World ng taon, dangal ka nitong bayan natin

Magandang pambungad ang tagumpay mo sa bansang nasa krisis
Lalo na sa mga kababayang nasa hirap, nagtitiis
Ikinararangal ng bansa, tagumpay mo'y sadyang kaytamis
Bansa'y inangat mo't sa mata ng mundo bayan ay nagbigkis
Mga kababaya'y sadyang taas-noo, tuwa'y labis-labis

Miss Philippines, Miss World Megan Young, tunay kang bituin ng madla
Gawin mo ang dapat, ngunit dapat lagi kang mapagkumbaba
Maging inspirasyon ng nasa pagitan ng ligaya't luha
Maipakita ang bait mo sa masa't bayang nasa sigwa
Maraming salamat, Megan Young, tunay kang dangal nitong bansa

Ako'y Libra

AKO'Y LIBRA
ni Gregorio V. Bituin Jr.
13 pantig bawat taludtod

nasa gitna ng Virgo't Scorpio ang Libra
Virgo'y simbolo ng aking mahal na ina
at Scorpio naman ang butihin kong ama
at akong kanilang anak ay isang Libra
espesyal ba ako't pinagitnaan nila
o ang pagsilang ko'y isang malaking tsamba

maraming Libra'y sikat sa larangan nila
karamihan nga'y kasingkaarawan ko pa
si chess GM Jonathan Speelman ang isa
pati si Benjie Paras na basketbolista
si Sting na isang batikang manganganta
at magiting na Mahatma Gandhi ng India

marahil mahilig din sa libro ang Libra
pagkat mga tulad namin ay palabasa
sari-sari ang kaalamang ambag nila
anang kapalaran, magaling sa hustisya
sadyang mapagmahal at mainit sa sinta
pagpapakatao't dangal ay mahalaga

Katapatan sa bawat kasama

KATAPATAN SA BAWAT KASAMA
ni Gregorio V. Bituin Jr.
15 pantig bawat taludtod

mahalaga ang katapatan sa bawat kasama
sa hirap man at ginhawa, sa pagdurusa't saya
hindi tatalikod sa prinsipyo't pagkakaisa
hanggang kamatayan, patuloy sa pakikibaka

ang bawat kasama'y kaisa sa diwa't prinsipyo
tangan yaong diwa ng pakikipagkapwa-tao
pawang magkasama sa adhikaing sosyalismo
magkatuwang sa mga pagkilos, rali't trabaho

katapatan sa prinsipyo, tapat din sa kasama
tapat din sa partidong kinabibilangan niya
iginagalang ang pagkatao ng bawat isa
higit pa sa magkakapatid ang turingan nila

walang lamangan, walang iwanan sa bawat laban
ang mali'y bakahin, ang wasto'y yakaping tuluyan
bawat isa'y ipagtanggol laban sa kasamaan
isapuso yaring prinsipyo't talagang Katwiran

mabuhay kayo, mga kasama't aming kapatid
di namin papayagang sa dilim kayo'y mabulid
magkasama tayo buhay man natin ay mapatid
sa pakikibaka, pagkat prinsipyo'y ating batid

Pag-ingatan ang puri

PANG-INGATAN ANG PURI

ni Gregorio V. Bituin Jr.

12 pantig bawat taludtod

Madaling manghiram ng tapang sa alak

Lalo na kung sila'y may masamang balak

Kung isa kang dilag na rosas o lilak

Mag-ingat ka't baka puri'y mapahamak.

BMP - Dalawang Dekada na

BMP - DALAWANG DEKADA NA
ni Gregorio V. Bituin Jr.
13 pantig bawat taludtod

Mapagpalayang pagbati ang paabot ko
sa Bukluran ng Manggagawang Pilipino
Pagpupugay sa inyo nang taas-kamao
sa ikadalawampu nyong anibersaryo

Dalawang dekadang sadyang makasaysayan
na punong-puno ng aral at karanasan

Dumatal ang dalawampung anibersaryo
na patuloy na hinahamon ang obrero:
Uri'y organisahin, magkaisa tayo!
Halina't makibaka tungong sosyalismo!

Mabuhay! Mabuhay ang uring manggagawa!
Mabuhay kayo! O, hukbong mapagpalaya!

(Ang Bukluran ng Manggagawang Pilipino (BMP) ay nagdiwang ng kanyang ika-20 anibersaryo nitong Setyembre 14, 2013 sa ikalawang palapag ng Marikina Sports Park sa Lungsod ng Marikina.)

Sa Kaarawan ni Ina

SA KAARAWAN NI INA
ni Gregorio V. Bituin Jr.
14 pantig bawat taludtod

salamat, inay, sa iyong mga pagsisikap
na maabot naming anak ang aming pangarap
maraming salamat sa taos-pusong paglingap
at tunay na pagmamahal na aming nalasap

maligayang kaarawan po, ina kong mahal
ikaw na nagbigay ng magagandang pangaral
lalo't payo mong dapat kaming maging marangal
sa bawat naming ginagawa, prinsipyo't asal

sa pagdatal niring iyong kaarawan, ina
tandaang bawat anak mo'y mahal na mahal ka
napakatatag mo sa pagsubok at problema
sa mundong ito, tunay ka pong THE BEST na ina

nawa'y lagi kang nasa mabuting kalagayan
nawa'y nasa maayos ang iyong kalusugan
nawa'y laging matatag ang iyong kalooban
sa muli po, ina, maligayang kaarawan

6 Setyembre 2013

Nahan?

NAHAN?
ni Gregorio V. Bituin Jr.
14 pantig bawat taludtod

(Sa pandaigdigang araw ng mga desaparesido o mga nangawala, International Day of the Disappeared tuwing Agosto 30)

kaytindi ng panahong pawa na lang lunggati
na yaring tanang buhay, puno ng dalamhati
tuliro na ang diwa, puso'y walang baluti
patuloy sa pagdugo, hustisya yaong mithi

sari-sari ang kwento, iba't iba ang bintang
ang mga nangawala'y tuluyan bang pinaslang
alaala'y kaypait, hanggang gunita na lang
nangyari sa kanila'y sino ba ang maylalang?

o, kayhirap mawalan ng ating minamahal
lalo't di natin alam paano ba napigtal
yaong kanilang buhay, kami'y natitigagal
katawan kaya nila'y saan na nangabuwal?

kahit anumang bakas, sasaliksiking pilit
hustisyang inaasam ay aming igigiit
nahan si ama't ina, pati aming kapatid?
sinong berdugo't bakit buhay nila'y pinatid?

para bagang sa likod, may tarak ng balaraw
bawat nilalakaran, kaydilim kahit araw
ang panahong ligalig, bakit nangingibabaw?
mailap na hustisya'y kailan matatanaw?

Manininda laban sa pork barrel

MANININDA LABAN SA PORK BARREL
ni Gregorio V. Bituin Jr.
13 pantig bawat taludtod

mga manininda'y nakiisa rin doon
laban sa pork barrel na ugat ng kurapsyon
pork barrel daw ay ilaan sa edukasyon
at di sa bulsa ng mambabatas na maton

pork barrel, ilaan sa pagkain ng dukha
para sa pabahay ng mga maralita
para sa kalusugan ng mga kawawa
pork barrel, tanggalin sa kamay ng kuhila

tanggalin sa kamay ng mga mambabatas
pagkat ninanakaw ng mga mambubutas
iyang kabangbayan ay binabalasubas
ng mga kawatan at trapong talipandas

kayraming pera ng gobyerno, kitang-kita
ngunit sa serbisyo'y kulang, ibinubulsa
kaya panawagan ng mga manininda
pork barrel, ilaan sa serbisyo sa masa

Sa lakambining tinatangi

SA LAKAMBINING TINATANGI
ni Gregorio V. Bituin Jr.
13 pantig bawat taludtod

kaysarap pagmasdan ng kaytamis mong ngiti
kitang pareho ng adhikain at sanhi
sinta, nais kong nakikita kitang lagi
makasama ka'y aking pinakamimithi
kaysayang hagkan ng magaganda mong labi
lakambini kitang tunay kong tinatangi

Kung ako, aking mahal, ang iyong iibigin

KUNG AKO, AKING MAHAL, ANG IYONG IIBIGIN
ni Gregorio V. Bituin Jr.
14 pantig bawat taludtod

kung ako, aking mahal, / ang iyong iibigin
ihahandog sa iyo / kahit isang bituin
pangarap nating lipunan / ang ating tatahakin
sasamahan kang lagi / landasin man ay bangin

kung ang iibigin mo, / aking mahal, ay ako
pakakasalan kita / saanman ang nais mo
at magkasama nating / bubuhaying totoo
ang ibinungang anak / na nanggaling sa iyo

kung ako, aking mahal, / ang pakamamahalin
dadalhin ka sa langit / ng bawat pangitain
bundok ay tatahakin / pati himpapawirin
lalo sa mga lugar / na sadyang matulain

kung ang mamahalin mo / ay ako, aking mahal
aking ipakikita / bawat mabuting asal
aking ipadarama / ang pag-ibig na bukal
kapwa natin gagawin / pamumuhay na banal

pag inibig mo ako, / sinisintang diyosa
hanggang sa kamatayan / tayo ay magkasama
tanging hiling ko lamang / sa iyo, aking sinta
ang matamis mong oo'y / huwag ipagkait pa

Limang Tanaga sa Barungbarong

LIMANG TANAGA SA BARUNGBARONG
ni Gregorio V. Bituin Jr.

DINGDING

yari sa tagpi-tagpi
ang dingding ko'y sawali
di malungkot, di sawi
ang tahanang may ngiti

BAHAY

sira na yaong bubong
ng aking barungbarong
kung bumagyo'y lulusong
pag baha na sa silong

TAHANAN

tahanan ko ma'y dampa
basta't walang kawawa
puso ko'y sumisigla
sa dampang maginhawa

KAHIRAPAN

nakatira'y mahirap
na laging nangangarap
makakaahong ganap
pag patuloy ang sikap

KARAPATAN

dukha'y may karapatang
magkaroong tahanan
bahay na pahingahan
ng pagod na katawan

Limang Dalit sa Kalibre.45

LIMANG DALIT SA KALIBRE.45
ni Gregorio V. Bituin Jr.

PANANGGA

kalibre kwarenta'y singko
ang tangan niyang totoo
tsapa niya't abogado
sa sinong loloko-loko

LAYON

ano bang iyong adhika
ang magkabaril ba't tama
kung ang layon mo'y masama
kakamtin mo'y dusa't luha

PAGBUNOT

pag baril, iyong binunot
tiyakin mong ipuputok
pag ikaw ay nagbantulot
ikaw'y kanyang ilulugmok

ASINTADO

dapat pagtira'y di sablay
di nanginginig ang kamay
pag naunahan kang tunay
mababaon ka sa hukay

HUSTISYA

dapat laging isipin mo
pagkalabit ng gatilyo
may mapapatay kang tao
makatarungan ba ito?

Kung dumiskarte ang mga kasama

KUNG DUMISKARTE ANG MGA KASAMA
ni Gregorio V. Bituin Jr.
13 pantig bawat taludtod

yaong mga kasama'y pawang maparaan
magaling dumiskarte sa pang-araw-araw
ngunit may sinusunod silang panuntunan
gabay ay kawastuhan, prinsipyadong galaw

anumang hiniram ay dapat mong ibalik
anumang iyong nasira'y bayarang pilit
ang paggalang sa kapwa'y nasa puso't isip
dito'y laging pagpapakatao ang salik

huwag lalamangan ang manggagawa't dukha
igalang ang mga babae't matatanda
maging makatwiran sa bawat pasya't gawa
maging makatarungan din sa puso't diwa

kapos ka man sa buhay sa araw at gabi
mabuhay lang ang pamilya'y dumidiskarte
nagtatrabaho't nagsisikap ng maigi
sa kapwa'y di nanlalamang, di nang-aapi

dumidiskarte ng maayos at marangal
binabayarang wasto ang perang hiniram
kung mangusap sa kapwa'y tunay na magalang
ang diskarte'y may pagpapakataong tunay

mabuhay kayong sa bayan ay nagsisilbi
nang walang pag-iimbot, may pagkabayani
kasama'y prinsipyado nga kung dumiskarte
at sa kanila'y hindi kayo magsisisi

Di ako nakikibaka upang magpasikat lang

Di ako nakikibaka upang magpasikat lang
Ito'y simulaing niyakap ko't pinaglalaban
Tunay ngang lumalaban kami dahil sa prinsipyo
At nang itayo ang isang lipunang makatao
Sosyalismo ay sistema ng lipunang pangarap
Rebolusyon ang tungkulin para sa hinaharap
Edukasyon ang susi upang mamulat ang masa
Pag-aralan itong lipunang mapagsamantala
Upang baguhin ito't tuluyan nating palitan
Yakap ang prinsipyo'y babaguhin ang kasaysayan
At kasama ang uring manggagawa'y magwawagi
Na tanging susi'y pagkakaisa ng buong uri

- gregbituinjr.

Kung sa palad at mata ng tao'y nakakahiya (Soneto 29)

Kung sa palad at mata ng tao'y nakakahiya (Soneto 29)
ni William Shakespeare
malayang salin ni Gregorio V. Bituin Jr.
15 pantig bawat taludtod

Kung sa palad at mata ng tao'y nakakahiya
Mag-isa kong niluha ang hamak kong kalagayan
Nabingi ang langit sa walang silbi kong pagluha
Sa sarili'y tumingin, sinumpa ang kapalaran
Nais kong matulad sa may mayaman ang pag-asa
Maging tulad niya't dumami ang kaibigan ko
Nais ang sining niya't ang sakop pa ng iba
Di gaanong masaya sa kung anong mayro'n ako
Sa ganitong gunita'y sa sarili'y nasusuklam
Nagkataong lagay ko't ikaw yaring iniisip
Tulad ng biro'y bumangon sa pagputok ng araw
Mula sa mapanglaw, umawit sa pinto ng langit
Dahil pagsinta mo'y nagdulot ng ibayong saya
Kaya ayaw kong mga hari'y aking makasama

Ang hirap kapag umuulan

ANG HIRAP KAPAG UMUULAN
ni Gregorio V. Bituin Jr.
15 pantig bawat taludtod

humaharurot ang sasakyan habang umuulan
kaya ang tubig-baha, ikaw pa'y matatalsikan
aba'y papasok pa lang ang bata sa paaralan
ikaw naman ay patungo na sa inyong tanggapan
at ang iba naman ay sa kanilang pagawaan
bago pumasok, para kayong nakipagbasaan
uniporme'y nababasa sa pagdatal ng ulan
dahil kaybilis ng andar noong isang sasakyan
dahil ang tsuper nito'y tila walang pakiramdam
sa mga papasok pa lang ay walang pakialam
anong ating dapat gamitin kapag umuulan
payong, kapote, dangkal ng mabuting kaasalan
disiplina ng bawat tsuper at ng mamamayan
nang makapasok ng maayos sa patutunguhan

Ang lapis at ang pambura

ANG LAPIS AT ANG PAMBURA
ni Gregorio V. Bituin Jr.
12 pantig bawat taludtod

"Paumanhin," anang lapis sa pambura.
"Ha? Bakit? Wala kang nagawang masama,"
Ang pambura'y agad na tugon sa kanya.
Sumagot ang lapis na bago lang hasa:
"Pagkat katawan mo'y nababawasan na.
Sa mga mali kong sa tuwina'y gawa
Ay naririyan ka't bura na ng bura.
Ang pakiramdam ko ikaw'y lumuluha"
"Tinuran mo'y tunay," sabi ng pambura
"Ngunit ano pa bang aking magagawa
Sa tungkuling iyan ako tinalaga
At sanhi kung bakit tulad ko'y nilikha.
May papalit namang gaya kong pambura
Sakali mang ako'y tuluyang mawala.
Ang tungkuling aking sa kanya'y pamana
Buong tapat din n'yang gagampanang kusa.
Kaya, lapis, huwag ka nang mag-alala
Ako'y masaya sa tungkulin ko't gawa."

Ako si Asoge

AKO SI ASOGE
ni Gregorio V. Bituin Jr.
13 pantig bawat taludtod

ako itong si Asogeng may dalang ulat
tila walang hapo, may kabal na akibat
para bang nakasakay sa talim ng kidlat
nang matuling maihatid ang nararapat

may kasabihan nga ang matatandang dukha
kaybilis mag-ulat, may pakpak ang balita
kaytuling kumalat, may taynga ang lupa
ganyan ang balita kung masagap ng madla

kayrami ng nangyayaring dapat mabatid
kung walang mga taong dito'y naghahatid
mula sa bulungan, anasan ng litid
ulat ay nalalaman ng mga kapatid

ito ang papel ng mga tagapag-ulat
mahalagang balita'y isinisiwalat
huwag lang kasinungalingan ang ikalat
dahil ganito'y pawang tsismis na maalat

* asoge - tagalog sa mercury

Kung ang kapitalismo'y...

KUNG ANG KAPITALISMO'Y...
ni Gregorio V. Bituin Jr.
15 pantig bawat taludtod

Kung ang kapitalismo'y napakalaking akasya
Obrero'y mga palakol na sisibak sa kanya
Unti-unti'y puputulin ang malalagong sanga
Mga sanga'y panggatong nang makakain ang masa.

Kung ang kapitalismo'y napakataas na tore
Buhay-hari ang kapitalistang ngingisi-ngisi
Toreng itinayo ng manggagawang nagsisilbi
Ay dapat nang buwagin ng mga obrerong api.

Kung ang kapitalismo'y agilang lilipad-lipad
Manggagawa'y di sisiw na dadagitin lang agad
Sila'y isniperong riple'y tangan, na tanging hangad
Na masapol pag ulo nitong agila'y lumantad.

Kung ang kapitalismo'y tulad ng isang buldoser
Na manggagawa sa pabrika ang minamasaker
Tanganan mo, manggagawa, laban sa mga Hitler
Iyang masong inyong dapat ipambuwag sa pader.

Pagbati

Kumusta na ba kayo, mga kaibigan?
Nawa'y nasa mabuti kayong kalagayan
Di naaapi't pinagsasamantalahan
Ginagalang lahat ng mga karapatan
Sapagkat kayo'y masunuring mamamayan.

Komunista ba kayo, mga kababayan?
Dahil kumikilos laban sa kahirapan?
Nais na kamtin ang pantay na karapatan
Nakikibaka upang lumaya ang bayan
Sa kuko ng mapagsamantalang lipunan.

Kumusta na kayo? Komunista ba kayo?
Bakit pinagtatanggol ang mga obrero?
Magsasaka, babae, karaniwang tao?
Laban sa mga mapagsamantala't tuso!
Bakit ang dukha'y ipinagtatanggol ninyo?

Kumusta na? Komunista ba pag nanaig
Ang paggalang sa dangal ng kapwa't pag-ibig?
Bakit ang mapagsamantala'y inuusig?
At hustisyang panlipunan ang bukambibig?
Bakit manggagawa'y dapat magkapitbisig?

- gregbituinjr.

Maging matanda'y di pases nang sundin lagi

MAGING MATANDA'Y DI PASES NANG SUNDIN LAGI
ni Gregorio V. Bituin Jr.
13 pantig bawat taludtod

Iyang pagsunod ay hindi simpleng paggalang
kailangang ito'y iyo ding pag-isipan
dahil matanda siya'y susundin na lamang
o dahil tama lang na siya'y paunlakan

Dahil ba matanda siya'y susundin mo na
kung sa pagsusuri mo'y mali naman siya
paggalang ba agad ang pagsunod sa kanya
at pag di ka tumalima'y masama ka na

Ang pagsunod ay dapat batay sa tama't mali
magpasya ka batay sa iyong pagsusuri
huwag sunod ng sunod para lang mapuri
maging matanda'y di pases nang sundin lagi

Nais maging pangulo ni Manny Pacquiao

NAIS MAGING PANGULO NI MANNY PACQUIAO

ni Gregorio V. Bituin Jr.

13 pantig bawat taludtod

Nais mo ba ang isang Pangulong Pacquaio

yaong mamumuno sa atin balang araw

sinong karibal kaya sa kanya'y sasapaw

plano niya sa bansa'y gaano kalinaw

o ang bayang ito'y lalong magiging hilaw

pag nanalong pangulo si Manny Pacquiao

Ulat mula sa http://ph.news.yahoo.com/pacquiao-says-considering-running-president-025230082.html

Pacquiao says considering running for president

By Alex Millson | Agence Franca Presse News – 4 hours ago, July 28, 2013

Philippine boxing great Manny Pacquiao is harbouring thoughts of running for president in his beloved homeland when he finally hangs up his gloves, he revealed to AFP in an exclusive interview.

Giving his strongest hint yet that he will push to the top of the political tree when he finally retires from the ring, the "Pacman" -- a hero and congressman in his home country -- admitted he had considered the presidency of the 95 million-strong nation.

When pressed on whether he had thought about shooting for the top job, the softly-spoken 34-year-old replied "Yes".

Drawing parallels between his pugilism and politics careers, the former world champion in eight weight divisions said: "When I started boxing, of course I was planning, you know and thinking about getting to become a champion. So when I enter politics it's the same thing.