Di napaslang ang kanilang pangalan

DI NAPASLANG ANG KANILANG PANGALAN
ni Gregorio V. Bituin Jr.
11 pantig bawat taludtod

Macliing Dulag, Father Pops Tentorio
Dr. Gerry Ortega, Leonard Co

Cheryl Ananayo, Gensun Agustin
si Father Neri Satur, Armin Marin

Margarito Cabal, Rudy Segovia
Jimmy Liguyon, Frederick Trangia

Manuela Albarillo, Boy Billones
Nicanor Delos Santos, Romy Sanchez

Rogelio Lagaro, Rodel Abraham
Joel Pelayo, Eladio Dasi-an

Jose Doton, Father Allan Caparro
Gil Gujol, Reverend Raul Domingo

mga pangalan ito ng napaslang
ngunit di napapaslang ang pangalan

kayrami na nilang nasa listahan
silang mga martir ng kalikasan

dapat lang natin silang parangalan
bilang bayani ng kapaligiran

napaslang lang ang kanilang katawan
di napaslang ang kanilang pangalan

Kamatayan sa Silverio

KAMATAYAN SA SILVERIO

ni Gregorio V. Bituin Jr.

13 pantig bawat taludtod

(Alay sa mga taga-Silverio Compound, Parañaque City, at sa namatay nilang kapwa maralita, Arnel Leonor Tolentino, 21 taong gulang, na nabaril at napatay sa demolisyon noong Abril 23, 2012, at sa mahigit 30 ilegal na inaresto dahil sa pagtatanggol sa kanilang mga tahanan.)

anong masamang hangin ang kanilang hatid?
bakit sa demolisyon, buhay mo'y pinatid?
sinumang maysala'y dapat lang mabilibid!
at ang katarunga'y makamtan mo, kapatid!

wala ka na bang karapatang magkabahay?
wala na ba kayong karapatang mabuhay?
dahil ba iskwater ka'y dapat nang mabistay?
at sa ulo mo nga'y natamaan kang tunay!

ilan pa bang bahay ang dapat idemolis?
ilan pa bang dukha ang nais mapaalis?
ilan pa ba kayong nais nilang matiris?
kayong araw-gabi'y lagi nang nagtitiis!

pasistang punglo nga ba ang tamang solusyon?
karahasan ba o dapat ay negosasyon?
ang gobyerno ba'y paano dapat tumugon?
lagi na lang bang sagot nila’y demolisyon?

dapat itigil ang mga pakana nila!
lalo ang walang tigil nilang pangmamata!
tao tayong may dignidad, hindi basura!
tao tayong may karapatan sa hustisya!

hustisya sa mga nawalan ng tahanan!
katarungan sa lahat ng mga nasaktan!
wakasan ang demolisyon at karahasan!
nang wala na muling buhay na nasasayang!

- Abril 24, 2012, KPML-NCRR Office, Navotas, Metro Manila

Kasaysayan ng isang punungkahoy

KASAYSAYAN NG ISANG PUNUNGKAHOY
ni Gregorio V. Bituin Jr.
13 pantig bawat taludtod

dati kang mabunga't malagong punungkahoy
mas matanda ka pa sa aking Tiyo Nonoy
dumating ang panahong dahon mo'y naluoy
dating ubod ng yaman, ngayon na'y palaboy

ang laki mo'y di mayakap ng limang tao
ang taas mo'y tila abot ng limang metro
di ka na nagbunga, tuluyan kang nakalbo
anila, wala nang pakinabang sa iyo

walang bunga, walang dahon, anong nangyari
panahong taglagas, kapara mo na'y poste
panahong tag-araw, walang lilim na saksi
tila ka na bangkay sa kadimlan ng gabi

dapat ka nang sibakin, sabi ng iilan
dapat ka lang lagariin, gawing upuan
dapat gawing troso't dalhin sa kalunsuran
limpak ang tubo sa punungkahoy na iyan

ang dating punungkahoy ay naging troso na
sinibak, nilagari, siya'y ibinenta
nakinabang sa kanya ang isang eskwela
doon ay naging lamesa, silya't pisara

sa lupang iniwan ay may tumubong bago
taon ang lilipas upang lumago ito
at magbigay-bunga't lilim sa mga tao
buhay ng punong kahoy sa mundo'y ganito

Bahagi kayo ng aking panulat

BAHAGI KAYO NG AKING PANULAT
ni Gregorio V. Bituin Jr.
14 pantig bawat taludtod

I

Bahagi kayo nitong aking pluma
Bahagi kayo ng puso ko't diwa
Bahagi ng danas, luha't ligaya
Bahagi ng kwento, sanaysay, tula

Sa bawat sulatin, yakap ang prinsipyo
Masaya man o may bahid ng dugo
Sa bawat akda'y nagpapakatao
Habang bira ang ganid at maluho

Sa akda'y anong ipagmamalaki
Lalo na't rebolusyon yaong binhi
Pagbabago, sadyang ito ang silbi
Upang aking kapwa'y di maaglahi

II

Kayo, aking bayan, ang nilalayon
Kayo, aking kapwa, ang rebolusyon

Kayong mga dukha ang aking kwento
Kasama ang maralita't obrero

Ako'y nasa panig ng kabataan
Kasama ng ating kababaihan

Magsasaka, mangingisda, ang masa
Pagkat kayo'y laging aking kasama

Sa lahat ng uri ng tunggalian
Magkasama sa anumang digmaan

III

Bahagi kayo ng aking panulat
Bahagi rin ng aking pagkamulat
Narito kayo kahit ako'y salat
Kaya pagsasama nati'y nagluwat
Mga kasama, maraming salamat

Napapanaginipan ko ang bawat propaganda

NAPAPANAGINIPAN KO ANG BAWAT PROPAGANDA

ni Gregorio V. Bituin Jr.

15 pantig bawat taludtod

napapanaginipan ko ang bawat propaganda

na dapat isulat, ipamahagi, ipabasa

idinidisenyo ito para kaaya-aya

madaling maunawaan ang maganda sa mata

at tagos sa puso ang bawat mensahe sa masa

pluma't kwaderno'y lagi nang katabi sa pag-idlip

bakasakaling masulat agad ang nasa isip

sabi nga, ang bawat karanasan ay halukipkip

sa puso't sa diwa, bagamat di agad malirip

na biglang naglalabasan sa bawat panaginip

tulog man yaong katawan, di tulog ang isipan

kahit sa gitna ng nararamdamang kagutuman

patuloy na nagmamasid sa takbo ng lipunan

pag napukaw isusulat anumang natandaan

taludtod man, parirala't iba pang natuklasan

ngunit sa aking pagbangon at pag-inat ng buto

sa totoo lang limot ko na ang panaginip ko

subalit di nakalimot ang katabing kwaderno

pagkat doon ko natala ang panagimpang ito

na magagamit sa propaganda ng pagbabago

bubuksan ang kwaderno't babasahin yaong tala

baka may mungkahi doon ang uring manggagawa

baka may mabagsik na sinabi ang masang dukha

baka may bagong talinghaga’t gintong parirala

baka may bugtong, saknong, awit, sukat ikaluha

at saka susuriin ang lahat ng naisulat

magagamit ba sa islogan, tula, o pamagat

sa propaganda'y matatalas ba't nakasusugat

salamat sa panaginip at di nakalilingat

patuloy pang nagagawa ang papel na mabigat

Mga Batang Hamog sa Bayang Tulog

MGA BATANG HAMOG SA BAYANG TULOG

ni Gregorio V. Bituin Jr.

13 pantig bawat taludtod

naging pangulo si Noynoy ng bayang hamog

namumuno sa bansang sa utang ay lubog

kayraming batang hamog sa bayang hamog

silang pinabayaan ng gobyernong tulog

hamog ang bayan dahil sa katiwalian

nitong mga pinunong walang pakialam

ang gubyerno'y imbes magserbisyo sa bayan

ang inaatupag na'y pagkakakitaan

kaya mga batang hamog na'y naglipana

sa mga taksi't bus nakikipagkarera

mga pasahero't tsuper inaabala

kung anu-anong gamit nito'y kinukuha

sinasalamin ng batang hamog kung ano

ang klase ng liderato nitong gobyerno

bakit pabaya't ang bansa'y laging magulo

paano ba namumuno itong pangulo

tila sa problema'y naghahanap ng damay

ang mga batang hamog na sa hirap ratay

sa nangyaring ito'y aking napagninilay

sila ba'y may pag-asa pang magbagong buhay

hangga't pekeng kaunlaran ang laging handog

sa taumbayan ng lider ng bayang hamog

hangga't pangulo'y nakatunganga o tulog

walang magandang bukas iyang batang hamog

Pabasa ng Maralita, Abril 2012

PABASA NG MARALITA, ABRIL 2012

ni Greg Bituin Jr.

(Nilikha ito upang gamitin sa Tatlong Tagpong Pasyon ng Maralita sa ika-3 ng Abril mula sa Espana, tuloy ng Bustillos, at magtatapos sa Mendiola sa maynila. Ang pabasang ito'y iniayon sa anyo ng pasyon, na may limang taludtod bawat saknong, at walong pantig bawat taludtod)

kami'y mga maralita

ang buhay ay dusa't luha

gutom lagi't walang-wala

api na't kinakawawa

bakit ganito ang dukha

kami ang mga obrero

kaybibigat ng trabaho

ngunit kaybaba ng sweldo

kapitalistang barbaro'y

ginigipit kaming todo

ang sinabi ng Pangulo:

"O, bayan, Kayo ang Boss ko"

ngunit anong ginawa mo

binubusabos ang tao

sa nagtataasang presyo

sadya ngang nakakatangis

tubo sa presyo ng langis

at el-pi-dyi’y labis-labis

lagi na bang magtitiis

itong bayang tinitikis

kami ngayo’y nananaghoy

nahan ka, Pangulong P-Noy

kay Grace Lee, ikaw ang playboy

habang masa’y tinataboy

at ginagawang palaboy

hihingi kami ng tulong

may patay sa ebakwasyon

pinabayaan na doon

walang pambiling kabaong

saan sila ibabaon

mga ina’y lumuluha

para sa anak na dukha

na may sakit na malubha

kami ba’y may mapapala

sa gubyernong kulang-pala

inutil ang pamunuan

sa ating pamahalaan

bingi, bulag at gahaman

halina’t ating palitan

silang kawatan sa bayan

wala tayong mapapala

sa lipunan ng kuhila

kaya gawin nating dukha

putulin ang tanikala

nitong pagdurusa’t luha

wakasan ang pandarahas

tahakin ang bagong landas

itatag ang bagong bukas

tungo sa bayang parehas

at isang lipunang patas

Pansit Lamay

PANSIT LAMAY

ni Gregorio V. Bituin jr.
11 pantig bawat taludtod

I

mula pa noon pag may namamatay
tradisyunal na handa'y pansit lamay
laging kasama sa pakikiramay
tagapagtanggal ba ito ng lumbay

noong bata pa ako'y nakagisnan
ito ang handa saanmang lamayan
pansit itong saksi sa kalumbayan
sa bigat ng puso'y nagpapagaan

bakit pansit lamay ang paborito
marahil dahil sa dami ng tao
at dahil madaling lutuin ito
mura na'y mabubusog ka pa rito

II

maraming tindang pansit sa palengke
paborito ko rito'y ispageti
kayganda ng kulay, kaytamis pati
buhay na buhay ang dugo ko dine

meron ding pansit tulad ng palabok
ang palibot nito'y maraming sahog
mabigat sa tiyan, nakabubusog
lalo't sahog nito'y hipon at itlog

kung may pansit lamay sa karinderya
palengke, turo-turo, o saan pa
tanong ko'y bakit ito'y tinitinda?
sa lamayan ba ito ang natira?

Pag-iisa - salin ng tula ni Edgar Allan Poe

PAG-IISA

Ni Edgar Allan Poe

Malayang salin ni Gregorio V. Bituin Jr.

15 pantig bawat taludtod

Noong panahon ng pagkabata'y di ako naging

Tulad ng iba - at ako'y hindi napagkikita

Tulad ng nakita ng iba - hindi ko madala

Mula sa karaniwang tagsibol ang aking dama -

Mula sa kapwa pinagmulang hindi ko nakuha

Ang aking kalungkutan - at hindi ako magising

Ang aking puso sa tuwa ng may parehong himig -

At ang tangi kong inibig - inibig kong mag-isa -

Noon - ng aking kabataan - sa bukangliwayway

Ng pinakamatinding unos sa buhay - hinugot

Sa bawat kaibuturan ng mabuti't pasakit

Yaong hiwagang nagtanikala pa rin sa akin -

Mula sa kaylakas na agos, o sa balong -

Mula sa pulang talampas ng kabundukang yaon -

Mula sa haring araw na sa akin ay lumulon

Sa taglagas nitong bahagyang natina ng ginto -

Mula sa matinding kidlat doon sa kalangitan

Habang dumaan sa aking anaki'y lumilipad -

Mula sa ugong ng kulog, at nanalasang unos -

At ang alapaap na nagsa-iba't ibang anyo

(Nang yaong kabuuan ng kalangitan ay bughaw)

Na kapara'y yaong diyablo sa aking paningin -

-

-

-

ALONE

Edgar Allan Poe

From childhood's hour I have not been

As others were — I have not seen

As others saw — I could not bring

My passions from a common spring —

From the same source I have not taken

My sorrow — I could not awaken

My heart to joy at the same tone —

And all I lov'd — I lov'd alone —

Then — in my childhood — in the dawn

Of a most stormy life — was drawn

From ev'ry depth of good and ill

The mystery which binds me still —

From the torrent, or the fountain —

From the red cliff of the mountain —

From the sun that 'round me roll'd

In its autumn tint of gold —

From the lightning in the sky

As it pass'd me flying by —

From the thunder, and the storm —

And the cloud that took the form

(When the rest of Heaven was blue)

Of a daemon in my view —

Luksampati sa Luksang Parangal

LUKSAMPATI SA LUKSANG PARANGAL

ni Gregorio V. Bituin Jr.

13 pantig bawat taludtod

binibigyang pugay ang nawalang kasama

na namatay sa karamdaman o sa gera

na pawang nakibaka para sa hustisya

at upang baguhin ang bulok na sistema

sa bawat luksampati'y pawang pagpupugay

ang handog ng mga kasama sa namatay

sa pag-idlip nito, ang katawang humimlay

ay pagkatuldok sa pakikibakang tunay

sa isa naming kasama'y namumutawi

yaong bait ng namatay, pawang papuri

gayong noong buhay pa'y nanggagalaiti

ngunit ano nga bang layon ng luksampati

bigyang parangal yaong kasamang nawala

sa huling sandali sa ibabaw ng lupa

sa bayan ay munti man ang kanyang nagawa

ngunit munti iyong sa masa'y pagpapala

may luksampati sa bawat luksang parangal

di upang wasakin ang namatay na dangal

di upang sirain sa namatay ang dangal

kundi ipakita ang ginawang marangal

bigyang pugay natin ang nawalang kasama

mabuting luksampati'y para sa pamilya

at anumang maiwan niyang alaala

magaan ang kalooban ng bawat isa

Utak Badjao o Utak Intsik?

UTAK BADJAO O UTAK INTSIK?

ni Gregorio V. Bituin Jr.

13 pantig bawat taludtod

estilo ng mga Badjao ay nanghihingi

estilo ng mga Intsik ay tingi-tingi

alin sa kanila ang hindi nalulugi

alin ang dapat tularan, alin ang hindi

walang anumang puhunan ang mga Badjao

kundi sa mga sasakyan, palaktaw-laktaw

nanghihingi ng limos, pulubing pananaw

konti lang ang naaamot sa araw-araw

namumuhunan ang Intsik, tubo ma'y piso

kahit barya-barya ang tubo sa produkto

kahit tubong lugaw, pumapayag ito

basta't pera'y mapaikot nilang totoo

atake ng Badjao ay kultura ng awa

tiyak Pinoy daw ay maglilimos sa dukha

ngunit estilong ito'y sangkahig, santuka

walang katiyakan, estilong hampaslupa

sa Intsik kahit di tumubo ng malaki

kahit na tingi, baryang tubo'y di na bale

piso ang tubo basta't produkto'y kayrami

sa sanlibong produkto'y di na magsisisi

kung nais mong magpatuloy ang iyong buhay

huwag kang utak-Badjao kung ayaw mamatay

maganda'y utak-Intsik, di ka malulumbay

ugali itong dapat pagbutihing tunay

Di ko malaman kung saan ako susuling

Di ko malaman kung saan ako susuling
Ikaw ang nakikita pag ako'y humimbing
Tunay ba ang halakhak mong tumataginting
At ikaw ang sa panaginip ko'y kapiling

Sinta kitang diwata't lagi bang tuliro
Ramdam ko bakit lagi kang nasisiphayo
Espesyal ka rito sa aking abang puso
Pusikit man ang gabi, kita'y sinusuyo

Uulitin ko, lagi kitang iniibig
Yayapusin kitang mahigpit nitong bisig
Ah, sa panaginip lang ba kita kaniig
Nawa pagsamo ko'y lagi mong naririnig

- gregbituinjr.

Pulitikong Lango

PULITIKONG LANGO

ni Gregorio V. Bituin Jr.

13 pantig bawat taludtod

wala nga bang disiplina ang mga Pinoy

tanong ito ng isang kababayang tsimoy

utak daw ng lasenggo'y tulad ng palaboy

tungga ng tungga itong tunggak na kaluoy

gaya ng pulitikong lasing sa upuan

langong-lango sa hawak na kapangyarihan

nalilimot nang siya'y isang lingkod-bayan

pabaya sa tinatanganang katungkulan

problema ng bayan imbes ayusin niya

hayun, siya'y di na mahagilap ng masa

nalasing na kasi sa papuri ng iba

akala'y di babagsak yaong tulad niya

asal niya'y gahaman, sobra siyang tuso

ang sariling kawani'y kaybaba ng sweldo

masamang halimbawa'y pakita sa tao

asal niya'y basahan, isa siyang trapo

taumbayan sa kanya'y nagbakasakali

ngunit nahawa siya sa mga tiwali

bagong pulitiko ngunit nakadidiri

hamig siya ng hamig, tila walang budhi

pag sa kapangyarihan ang trapo'y nalasing

lahat na ng anomalya'y kanyang gagawin

para bang nakadroga, siya'y napapraning

lingkod-bayang sa kabang-yaman naduduling

Ang Lingkod na Pluma

ANG LINGKOD NA PLUMA

ni Gregorio V. Bituin Jr.

14 pantig bawat taludtod

ang pluma'y dapat ipaglingkod sa aping uri

lalo sa manggagawang api ng naghahari

ilantad ng pluma ang pribadong pag-aari

na dahilan ng pagsira ng buhay at puri

ang bawat tula't kwento'y may salaysay ng hidwa

habang dinuduyan-duyan yaring puso't diwa

di toreng garing ang tibok ng bawat salita

may sigla ng himagsik ang bawat kabanata

pluma'y tagapaglingkod laban sa mga hayok

sa tubo't naghaharing tanda ng pagkabulok

sa kwento ang tiwali'y kaya nating ilugmok

habang yaong naapi'y ilalagay sa tuktok

makata, pluma'y gamitin sa gitna ng digma

upang yaong mga tiwali'y di makawala

durugin mo sa tula yaong kasumpa-sumpa

at iangat sa pedestal yaong manggagawa

Mga Kasalamuha

MGA KASALAMUHA

ni Gregorio V. Bituin Jr.

14 pantig bawat taludtod

sa araw at gabi'y kayraming kasalamuha

maaring bida't kontrabida sa kwento't tula

posibleng tauhan sa akda kong kinakatha

sila yaong bubuhay sa saknong at talata

bawat mga danas ay maaaring eksena

habang sa kwento'y lulutang ang isang persona

mga posibleng piyesa sa tula't nobela

iwasiwas ang pluma sa hapdi, kirot, saya

lilitaw tiyak ang paniwala mo't prinsipyo

sa bawat kathang kinatas sa puso mo't ulo

sinong nakasalamuha ang bida sa kwento

masa ba'y anong aral ang mahihita dito

tila nga buhay na buhay ang bawat sitwasyon

tulad din ng karakter doon sa telebisyon

salita'y kikilos sa bawat talata't saknong

ngunit tayo lamang ang dapat doong magdugtong

Tinik sa Obrero ang Kontraktwalisasyon

TINIK SA OBRERO

ANG KONTRAKTWALISASYON

ni Gregorio V. Bituin Jr.

13 pantig bawat taludtod

binobola ng kapitalistang kawatan

ngunit alinlangan pa silang maghimagsik

kung ganyan ng ganyan, anong kahihinatnan

di matatanggal ang sa manggagawa'y tinik

ang dangal ng manggagawa'y nayuyurakan

tinik sa obrero ang kontraktwalisasyon

dignidad ng paggawa'y nilalapastangan

tinik na ito'y unti-unting bumabaon

labis nang nabibikig ang mga obrero

pagkat tinik na ito'y labis kung tumusok

sa diwa't kalamnan ay sumusugat ito

sa buhay ng obrero'y sadyang umuuk-ok

maghimagsik ka, manggagawa, maghimagsik

ikaw lang ang kayang tumanggal niyang tinik

Presyo ng LPG, Ibaba!

PRESYO NG LPG, IBABA!

ni Greg Bituin Jr.

9 pantig bawat taludtod

kayrami nang natutulala

bilihin ay kaytaas na nga

ito'y abot na sa kusina

tagos pa sa bulsa't sikmura

pambili'y nagsasalat na nga

pagtaas ng presyo ng langis

ay sadya ngang nakakainis

buhay namin ay numinipis

sa pagtaas na labis-labis

kartel nga'y dapat nang matiris

presyo ng el-pi-dyi (LPG), ibaba

pagtaas nito'y isawata

pagkat kawawa kaming dukha

hirap na, hirap pa'y lulubha

ang buhay na'y kasumpa-sumpa

pag lalo pang tumaas ito

aba'y baka na magkagulo

tiyak na ang gutom ng tao

kaya ibaba na ang presyo

nitong el-pi-dyi at petrolyo

Nakikita'y Tugma, Kulang sa Sukat

NAKIKITA'Y TUGMA, KULANG SA SUKAT

ni Gregorio V. Bituin Jr.

14 pantig bawat taludtod

kayrami nilang mga lumilikha ng tula

kulang sa sukat, bagamat seryoso sa tugma

di naman malayang taludturan ang kinatha

tila kaalaman sa tugma't sukat ay wala

basta't kakatha na lang yaong bagong makata

sa tula kasi'y tugma ang agad namamalas

tulad ng obra ng ating makatang Balagtas

di pansing ang bilang ng pantigan ay parehas

kaya dapat iturong sa pagtula'y may batas

na sa tulang may tugma, may sukat na kapatas

minsan meron pa silang sesurang binibilang

na sa bawat taludtod ay hati ng pantigan

halimbawa'y Florante na labindalawahan

sa ikaanim na pantig, may paghinto naman

ganyan itong ating katutubong panulaan

makata noon pa'y ganito kadisiplina

pantig sa bawat taludtod ay binibilang pa

sa tanaga, dalit, gansal at iba pang obra

kaya di lang tugma ang ating dapat makita

kundi batas ng tugma't sukat, maunawa pa

Pag-ibig mo sinta'y nakilala ng puso

Pag-ibig mo sinta'y nakilala ng puso
Ikaw lamang ang tangi nitong sinusuyo
Ang iwi kong pag-ibig ay di maglalaho
Mula sa kawalan, ako'y iyong hinango

Oo, buong-buo mo akong maaangkin
Ngayon at kailanman, pakamamahalin
Tutuparin ko, sinta, ang sumpaan natin
Ako'y iyong-iyo na't isa mong alipin

Lagablab ka sa diwa kong animo'y hangal
Bilib ako sa Kupido mong tinatanghal
Alab mo'y tila pusong nagpapatiwakal
Ningas ka sa pusong naritong nagmamahal

- gregbituinjr.

Wikang Ingles ang Wika ng Dating Panginoon

WIKANG INGLES ANG WIKA NG DATING PANGINOON

ni Gregorio V. Bituin Jr.

14 pantig bawat taludtod

"Malaya na ang ating bayan at huwag kausapin sa wika ng dating panginoon." - mula sa pahina 293 ng nobelang Mga Ibong Mandaragit, ni Ka Amado V. Hernandez

Wikang Ingles ang wika ng dating panginoon
Ito pa rin ang wika ng mga Pinoy ngayon
Wikang Filipino'y nilalait, tinatapon
Tanda raw ng kawalang-aral at pagkagunggong

Ang Wikang Filipino raw ay pandukha lamang
Di dapat salitain ng may pinag-aralan
At di dapat pag-aralan ng mga mayaman
Kaysakit naman nitong kanilang pang-uuyam

Wikang Filipino raw ay wika ng alipin
Wika raw ng mga maralitang palamunin
Wika rin daw ng mga manggagawang waldasin
Aba, wikang ito'y dapat ipagtanggol natin

Ingles ang wika ng gustong pinapanginoon
At wika ng imperyalismo't globalisasyon
Filipino'y wika ng inaalipin ngayon
Pangmaralita, pangdukha, pantambay, pangmaton

Kung wala tayong gagawin, lalaitin tayo
Kung tayo'y tutunganga lang, tayo nama'y ano
Wikang Filipino'y wika nina Bonifacio
Jacinto, Balagtas, Batute, Quezon, at Rio

Wikang Filipino'y wika ng pagkakaisa
At dito rin nagkakaunawaan ang masa
Ito'y wika ng bayani't wika ng pag-asa
Na dapat ipagtanggol sa harap ng balana

Pag kaharap mo kami, bakit ka mag-iingles?

PAG KAHARAP MO KAMI, BAKIT KA MAG-IINGLES?

ni Gregorio V. Bituin Jr.

14 pantig bawat taludtod

Sige, mag-Ingles ka pa, ikaw na sosyalera

Sige, sa kapwa Filipino'y mag-Ingles ka pa

Wika mong sarili'y pinandidirihan mo na

Mas gusto mo pa'y wika ng mapagsamantala

Sana'y mabulunan ka't matanggalan ng dila

Ikaw na mapanlait sa sarili mong wika

Sige, wikang Filipino'y ilubog mo pa nga

Sana'y masama ka sa pagkalubog sa lupa

Pag kaharap mo'y kami, bakit ka magi-Ingles?

Para ba sabihing balyena ka't kami'y dilis?

Sabihing matalino ka't dukha'y utak-ipis?

Wala ka palang pinag-iba sa kaning panis!

Pag kami'y kaharap, dapat kang mag-Filipino

Ito ang tamang lohikang dapat lang gawin mo

Tagarito ka't sariling wika natin ito

Ikaw dapat ang unang tagapagtanggol nito

Kapatiran nga ba'y ganito?

KAPATIRAN NGA BA'Y GANITO?

ni Greg Bituin Jr.

12 pantig bawat taludtod

(hinggil sa pagkamatay na naman ng isang estudyante dahil sa hazing sa fraternity)

nirekrut nila ang magiging kapatid

ngunit bakit ang buhay nito'y pinatid

ang utak ba nila'y sadyang makikitid

ang katotohanan pa'y nais ilingid

at ang hustisya'y tinuring na balakid

mga saksi'y di dapat na lang maumid

sabihin ang totoo't huwag umismid

upang ang mga maysala'y mabilibid

ang kapatiran ba'y anong adhikain

di ba't mga kasapi'y pagkaisahin

di ba't kapatid ang sa kasapi'y turing

di ba't isang diwa sa isang layunin

ngunit bakit ang buhay pa'y papatirin

ang pagluluksa ng naulila'y damhin

katarungan sa biktima'y dapat dinggin

dapat ikulong ang sinumang salarin

Dumulog ang aking isip sa panagimpan

Dumulog ang aking isip sa panagimpan
Ikaw ang aking nasulyapang dinuduyan
Tuwing umaga't malamig pa ang amihan
At maaliwalas pa yaong kalangitan
Sigaw ng puso ko'y ikaw, O, binibini
Ramdam ko'y narito ka lang sa aking tabi
Espesyal ka sa akin sa araw at gabi
Puso ko'y kinukuyumos mong anong tindi
Uuwi akong sa kawalan nakatitig
Yamang sa paghimbing ko puso'y naaantig
At pag nagising, wala na ba ang pag-ibig
Nais kong tayo'y tuluyan nang magkaniig

- gregbituinjr.

Kontrabidang Kongresman

KONTRABIDANG KONGRESMAN

ni Gregorio V. Bituin Jr.

13 pantig bawat taludtod

(Hinggil sa House Resolution 2140 ni Congressman Aurelio “Dong” Gonzales Jr. ng Pampanga na nagsasaad na itigil na ang paggawa ng mga pelikulang naglalarawan sa tulad nilang “honorable” na kongresista bilang mga kontrabida.)

laging kontrabida sa mga pelikula
ang papel ng “honorable” na kongresista
ito'y patunay ba kung anong klase sila?
sa totoong buhay ba'y totoong buwaya?

kongresista'y kontrabida, bida ang masa
sa pelikulang Pinoy ay gasgas na tema
gasgas man ang tema'y katotohanan pala
ang inilalarawan nitong pelikula

sa Kongreso man, ang kongresista'y kuhila
isang panig lang ang batas na nagagawa
bihira ang batas sa mga manggagawa
at bihira rin ang batas sa mga dukha

kung may batas man sa mga dukha't obrero
ito'y kaylupit, di maitaas ang sweldo
mga batas ay batay sa kapitalismo
di sa kagalingan ng karaniwang tao

bagamat may ilang kongresmang matitino
mayorya ng kongresista'y para sa tubo
batas sa pabahay nga'y nakapanlulumo
batas sa manggagawa'y di mo nga makuro

kaya tama lang ang mga paglalarawan
na kontrabida ng bayan itong kongresman
kung nais nilang ito'y mabagong tuluyan
magpakatino sila't maglingkod sa bayan

Bababa rin sa akin ang isang diyosa

BABABA RIN SA AKIN 

ANG ISANG DIYOSA

ni Gregorio V. Bituin Jr.

bababa rin sa akin ang isang diyosa

dahil sa wakas napaibig ko rin siya

kung kailan man iyon, ako'y umaasa

isang magandang diyosa'y magiging sinta

ito'y isa sa matagal kong pinangarap

na diyosa'y madulutan ako ng lingap

ang karilagan niya'y akin lang masulyap

tiyak ako'y hinehele sa alapaap

nasa panagimpan ko’y kaygandang diyosa

na sa matagal na panahon ay sininta

darating ang panahon, kami'y magkikita

mahahaplos ko siya't magkakaniig na

huwag lamang akong mawalan ng pag-asa

bababa rin sa akin ang aking diyosa

(FHM model and beautiful goddess Regine Angeles)

Kalikasan ng Pag-ibig

KALIKASAN NG PAG-IBIG

ni Gregorio V. Bituin Jr.

10 pantig bawat taludtod

bakit ba dagat ay umaalon?

pag-ibig ba ang dahilan niyon?

bakit gumaganda ang panahon?

dahil ba ngiti mo'y naaayon?

bakit ba hangin ay umiihip?

dahil lagi kitang nasa isip?

ang langit ba'y ating malilirip

habang tayo'y kapwa naiidlip?

bakit ba minsan ay bumabagyo?

dahil ba wala ka sa tabi ko?

bakit ba itong mundo'y matao?

saksi sa pag-ibig ko sa iyo?

bakit ba may rosas na bulaklak?

dahil ba puso ko'y iyong hawak?

bakit ba may daang lubak-lubak?

dahil may problemang tinatahak?

bakit ba ang lupa'y nagpuputik?

dahil ba tayo'y humahagikhik?

bakit ba ang bundok ay matarik?

dahil matamis ang iyong halik?

bakit ba araw ay umiinit?

dahil puso nati'y magkadikit?

bakit panahon ay nagsusungit?

dahil ba ikaw ay nagagalit?

bakit lumalago ang pananim?

dahil ba pag-ibig ko'y kaylalim?

bakit bulaklak kang sinisimsim?

ang pag-ibig ba'y tamis at asim?

puso ko ba'y iyong naririnig?

nais kitang kulungin sa bisig!

bakit nais kitang makaniig?

dahil ikaw ang aking pag-ibig!

Panunuyo

PANUNUYO

ni Gregorio V. Bituin Jr.
13 pantig bawat taludtod

nanunuyo ang lalamunan ng binata
habang nanunuyo sa magandang dalaga
tila di maapuhap ang tamang salita
na iparirinig sa kanyang sinisinta

patuloy ang kanyang panunuyo sa dilag
kahit na walang bulaklak at tsokolate
upang puso niya'y di manunuyo't hungkag
kaya hinuhusayan niya ang diskarte

lilitaw rin sa dila ang tamang bigkasin
habang mula sa puso'y sambit ang pag-ibig
upang sa dulo ang dilag siya'y sagutin
hanggang silang dalawa'y tuluyang magniig

ngunit tila nanunuyo na ang binata
habang nanunuyo sa magandang dalaga
konting tiyaga pa't di tuyo ang salita
sa wakas, sumagot din ang sinuyong sinta

Inday Wil Olweys Lab Yu

INDAY WIL OLWEYS LAB YU

(alay kay Whitney Houston - Agosto 9, 1963 - Pebrero 11, 2012)

ni Gregorio V. Bituin Jr.

mahal ni Inday Whitney ang kanyang tagahanga

na mga kinakanta nya'y awiting dakila

inaaliw ang mayayaman at mararangya

inaaliw din kahit na dukha't hampaslupa

may pinagmanahan ang kanyang mga pagbirit

anak siya ng inang premyadong mang-aawit

pinsan ni Dionne Warwick, kaya di sumasabit

ang tinig nyang tila awit ng anghel sa langit

awit nya sa Bodyguard, "Inday Wil Olweys Lab Yu"

tagos nga sa puso habang nanonood ako

habang ang tinig nya'y nanunuot hanggang buto

sa kanyang "Greatest Love of All" nga ako'y saludo

kaya maraming tagasubaybay ang nabigla

dahil sa pagpanaw nya, biglaang pagkawala

gayunman mahal siya ng mga tagahanga

kaya di mamamatay ang awit nya't gunita

Tuloy ang Laban ni Ka Popoy

TULOY ANG LABAN NI KA POPOY
ni Gregorio V. Bituin Jr.

14 pantig bawat taludtod

labing-isang taong singkad na yaong dumaan

ng mapaslang ng kung sino si Ka Popoy Lagman

ngunit hanggang ngayon wala pa ring katarungan

di pa rin nahuhuli yaong may kagagawan

gayunman, tuloy pa rin ang ipinaglalaban

at simulain niyang baguhin ang lipunan

sosyalismo ang landas sa bawat nating hakbang

sosyalismong pangarap para sa sambayanan

sa ilan sa kanyang mga iniwang sulatin

ay ating matutunghayan yaong kanyang bilin

kamalayang makauri'y dapat patagusin

sa sinumang manggagawang ating aabutin

halina't pagkaisahin ang mga obrero

huwag magwatak-watak, maging organisado

ang misyon ni Ka Popoy ay misyon mo't misyon ko

tuloy ang laban ni Ka Popoy hanggang sa dulo

BMP office

Pebrero 6, 2012

Hibik ng Dilag: Huwag Manggahasa

HIBIK NG DILAG: HUWAG MANGGAHASA

ni Gregorio V. Bituin Jr.

12 pantig bawat taludtod

"Don't tell me how to dress. Tell them not to rape." - mula sa plakard na dala ng isang seksing babae

seksi ang babae, maiksi ang palda
litaw ang balikat, kaygandang kurbada
bakit iba'y tila agad nagnanasa
parang bagang sila'y hindi makahinga

nakita lang yaong mapuputing hita
nalilibugan na ang mga binata?
tinitigasan na ang mga timawa?
at nagnanasa na ang mga kuhila?

dahil daw maigsi'y tabingan ng kumot?
sinambit ng dilag sa puso'y kumurot:
"huwag makialam sa’ming isusuot
ay, magtiis kayo riyang mamaluktot"

dagdag pa, "anuman ang aming suutin
kumportable kami’t huwag babastusin
matakam man kayo sa alindog namin
ay huwag nyo lamang kaming sasalingin"

ang mga babae'y ating irespeto
silang larawan ng ina at lola mo
huwag manggahasa, magtinong totoo
dahil kung di'y tiyak ikaw'y kalaboso

purihin mo na lang ang kanilang ganda
ngunit huwag mo nang pagnasaan sila
pagkat sila’y ating katuwang, kaisa
sa pagbabago ng bulok na sistema