Dadalhin kita sa paraiso

DADALHIN KITA SA PARAISO

"Dadalhin kita sa paraiso," anang makata
sa nililigawang dilag na animo'y diwata
na ang kagandahan sa iwing puso'y nagpapala

animo'y Eden ang paraisong pinapangarap
walang pang-aapi, pagkabigo o pagpapanggap
paraisong silang dalawa lang ang magkausap

dadalhin ka sa paraisong puno ng pag-ibig
pupupugin ka ng halik, kukulungin sa bisig
maglalapat ang ating katawan at magniniig

dalawang magnanakaw ang nakapako sa kalbaryo
isa'y taos-pusong nagsisi sa ginawa nito
sabi ni Hesus, "Dadalhin kita sa paraiso!"

- gregbituinjr.
(Biyernes Santo 2018)

Uulitin ko ng ilang ulit sa iyo

Uulitin ko ng ilang ulit sa iyo
Ramdam mo ba ang pagsintang inaalay ko?
Ikaw ang tanging mutya ng buhay kong ito
Na laging pinupukaw ang puso't diwa ko
Galing sa kaibuturan, ikaw ang sentro

Malayang tatahakin ang kinabukasan
Ang bawat hakbang ay tungo sa kaalwanan
Nang mabuong pamilya'y saya ang magisnan
Ginhawa't ligaya'y pangarap na makamtan
Gagawing magkatuwang ang makakayanan

Atin mang danasin ang pagdurusa't hirap
Gawin ang lahat ng uri ng pagsisikap
At  nang pamilya'y araw-gabing nalilingap
Wari'y dulo ng bahaghari ang hagilap
Asahan mong ginhawa'y ating malalasap

- gregbituinjr.

Humanap ka ng panget - mula sa survey

HUMANAP KA NG PANGET - MULA SA SURVEY

Ayon sa ulat ng Abante Tonite, sa isinagawang pag-aaral ng Florida State University, mas mahaba umano ang pagsasama ng isang magkasama kung ang napili ng babae ay hindi guwapo, at panget ang lalaki (Abante Tonite, Marso 26, 2018, p.3)

"humanap ka ng panget", ang pamagat ng balita

at umano'y pag-uusisa ng mga banyaga

sa unibersidad, ito raw ang nakitang tigib

tatagal daw ang pagsasama ng magkaisang-dibdib

aba'y inaawit na ito ni Andrew E. noon

higit na dalawang dekada nang lumipas ngayon

o baka napakinggan din ng banyaga ang awit

at ito ngayon ang kanilang saliksik na bitbit

sabi, "humanap ka ng pangit, ibigin mong tunay"

saliksik na tila payo, di kaya ito sablay?

- gregbituinjr.

Anak ba'y nais maging kontraktwal

ang mahal nyo bang anak ay inyong pinapag-aral
upang sa kalaunan sila ay maging kontraktwal

kontraktwal ay walang katiyakang pagtatrabaho
may kontrata, palipat-lipat, walang benepisyo

sa ekonomya'y manggagawa ang nagpapaandar
subalit sila pang kawawa, di na maregular

kapitalista nama'y panay tubo't tuwang-tuwa
bayarang makina lang ang tingin sa manggagawa

regular na pagtatrabaho'y laban ng pamilya
laban ng manggagawa, ng anak, at ng asawa

sistema'y palitan na't tumahak sa tamang landas
salot na kontraktwalisasyon, dapat nang magwakas

- gregbituinjr.

Mabuti pa'y tutong kaysa panis na kanin

MABUTI PA'Y TUTONG KAYSA PANIS NA KANIN
13 pantig bawat taludtod

sino kayang matino pa yaong kakain
kung batid naman niyang panis yaong kanin
kahit na pulubing marahil walang kain
di gaganahan, di nila iyon kakanin

tanungin mo kaya, bakit ka napanisan
kaning kaysarap ay bakit pinabayaan
dahil maraming bigas na maisasalang
o dahil ito'y di mo naman pinaghirapan

marami nga riyan, sa gutom nagtitiis
kung may kanin man, kakainin kahit panis
di ba't ang gayon ay nakapaghihinagpis
lalo'y may anak pang sa gutom nananangis

huwag magpabaya, ang kanin man ay tutong
pagkat sa kalusugan, malaki ring tulong
sa oras ng kagipita'y lunas sa gutom
kaysa anak mo'y ang kamao'y nakakuyom

- gregbituinjr.

Kung hari'y walang bait

matinding magparunggit
ang maghapong kaypait
tila ba nasa bingit
ang lumuluhang paslit

o, mahabaging langit
ang hari'y anong lupit
karapatan mong bitbit
ay di mo maihirit

buhay na pinagkait
anong dulot na sakit
ilan pang bubunghalit
sa buhay na inilit

tadhana ba'y ginuhit
na hari'y walang bait

- gregbituinjr.

Anak nawa'y laging ingatan

ANAK NAWA'Y LAGING INGATAN

Kahindik-hindik ang balitang namatay ang isang magdadalawang-anyos pa lang na bata nang mapabayaan ng ama. Abalang naghahanda noon ang ama ng pananghalian. Nakarating sa ilog ang bata at nilamon siya nito. Ayon sa balita, aksidenteng nahulog sa ilog at nalunod ang bata. (Pilipino Star Ngayon, Marso 24, 2018)

ang pangyayari'y nakabibigla
nakaiiyak yaong balita
magdadalawang-anyos na bata
ay nalunod, buhay ay nawala

ang ama'y naghahanda pa naman
ng masarap na pananghalian
nang bata'y nagtungo sa pampang
tila naglaro sa katuwaan

subalit aksidenteng nahulog
ang bata sa malalim na ilog
namatay ang batang iniirog
sa puso'y sadyang nakadudurog

anak sana'y di napabayaan
siyang bunga ng pagmamahalan
anak sana'y dapat nabantayan
lalo't siya'y nasa kalikutan

O, Kamatayan, kaybata niya!
ngunit bakit agad mong kinuha?
magandang bukas niya'y wala ba
at siya'y iyong kinursunada?

- gregbituinjr.

Pagyakap sa matandang puno

nais kong yakapin ang isa nang matandang puno
sa panahong di maganda ang aking pakiramdam
bakasakaling manumbalik ang sigla ng puso
pag nadarama kong sakit ay tuluyang maparam

nakaraang binaón ba'y maaaring mahango
nang di na manariwa ang kanilang pang-uuyam
pait ng mga danas ba'y ating mapaglalaho
habang nariyan ang bagong umagang inaasam

nanalasa ang bagyo't bubungan na'y tumutulo
baha ang paligid, naligo't ang mata'y nahilam
gusaling nagkalamat na'y nagbabantang gumuho
hayahay pa kahit nanganganib, di mo ba alam

ayaw kong yapusin ang nararanasang siphayo
na kapara'y alapaap sa maghapong kaylamlam
ginhawang sa pangarap ko nawa'y huwag maglaho
na bawat tagumpay ay kaytamis na mananamnam

- gregbituinjr.

FDC Pasyon 2018

FDC Pasyon 2018
ni Greg Bituin Jr.

Freedom from Debt Coalition
kasangga ng masa't nasyon
kayganda ng nilalayon
sadyang matatag ang misyon
sa lungsod man at sa nayon

misyon nilang ipagtanggol
ang bayan sa mga pulpol
lalo't namumuno'y ulol
kayraming dukhang nilipol
kinapos nga ang ataul

laksa ang isyung dumatal
na sadyang nakangangatal:
namaslang ang mga hangal
nambaboy ng mga dangal
pangulo'y samâ ng asal

buhay na kalunos-lunos
pagkat dukha'y laging kapos
masa'y di na makaraos
sa bayang naghihikahos
babae pa'y binabastos

ang pangulong mapanlinlang
karapatan di ginalang
pananalita'y maanghang
sa babae'y walang galang
Digong pala'y isang hunghang

pinauso ang pagpatay
ang pagkatao'y niluray
umiyak ang mga nanay
nang anak ay naging bangkay
wala sa korte'y binitay

dukha'y ipis kung turingan
gayong kapwa tao naman
tila ba pamahalaan
animo'y nabubulunan
sa usaping karapatan

walang galang sa proseso
patay doon, patay dito
pag kaharap ang negosyo
bahag na ang buntot nito
di na matanggal ang endo

kontraktwalisasyon, salot
kasalut-salutan, salot
ngunit pangulo'y bantulot
pagkat bumahag ang buntot
at sa negosyo'y natakot

sabi ng pangulong tuso
tatanggalin daw ang endo
di magawa ang E.O.
kaytapang naging maamo
bahag-buntot sa negosyo

sa TRAIN masa'y nagtitiis
pagkat nagtaas ang buwis
negosyo'y bumubungisngis
habang masa'y tinitiris
sa kanyang sariling pawis

kuryente nga'y nagtaas na
pinakamahal sa Asya
tubig nga'y nagmamahal pa
laksa-laksang pagdurusa
ang dulot ng TRAIN sa masa

ang bigas na'y nagmamahal
dagdag buwis sa asukal
dagdag presyo sa kalakal
ang tao pa ba'y tatagal
sa sistemang sumasakal

isyu pang dapat tumutok:
kayraming batang lumahok
sa iwas-kagat ng lamok
ngunit namatay sa turok
at sa dengvaxia'y nalugmok

bakuna'y lagim ang dulot
mga nanay na'y natakot
pangkalusugang hilakbot
sinong dito'y mananagot
dating pangulo ba'y sangkot

sa TRAIN, alta-presyon ka na
tokhang, patay kang bata ka
may kontraktwalisasyon pa
dagdag pa iyang dengvaxia
isyung nakamamatay na

kaya sigaw namin ngayon
tara't tayo'y magsibangon
harapin ang bagong hamon:
Freedom from Debt Coalition
ipagpatuloy ang misyon

O, babae't aktibista
mga estudyante't masa
manggagawa't magsasaka
panahon nang magkaisa
at baguhin ang sistema!

isang tula para sa World Poetry Day 2018

ngayong World Poetry Day ako'y naglalambing
kahit nagugutom na't walang maisaing
ngayong gabi'y isa lamang ang aking hiling
nawa'y makatulog akong busog at himbing
at diwata kong sinisinta’y makapiling

- gregbituinjr.

(World Poetry Day, Marso 21, 2018)

Kami'y aktibista

kami'y aktibista, hindi kami nagbubulakbol
kundi nag-oorganisa, hindi ng mga pulpol
nilalabanan yaong mga namumunong ulol
na pawang paghihirap ang sa masa'y kinulapol

kami'y aktibista, may pagkakaisa sa layon
nais sa pamantasa'y kalidad na edukasyon
sa pabrika'y walang salot na kontraktwalisasyon
binabaka'y paninibasib ng globalisasyon

kami'y aktibista, aktibo, matatag sa laban
upang ipagtanggol karapatan ng mamamayan
ipinaglalaban kung ano ang makatarungan
di pawang galit kundi pag-ibig sa uri't bayan

kami'y aktibista, pangarap ay lipunang pantay
walang pang-aapi, pagkatao'y di niluluray
walang pagsasamantala, sosyalismo ang pakay
patuloy na lalaban, tanghalin man kaming bangkay

kami'y aktibista, lipunan nati'y sinusuri
bakit may mapang-api, bakit may inaaglahi
bakit may dukha, may mayayaman, may naghahari
sadya bang lipunan ay may magkakaibang uri

kami'y aktibista, ang kasaysayan ay inaral
mula sa pantay-pantay na primitibo komunal
umusbong ang lipunang alipin, sunod ay pyudal
sunod ay kapitalismong sa obrero'y sumakal

kami'y aktibista, diwa'y Marxismo Leninismo
niyakap naming prinsipyo'y internasyunalismo
pagkat sa pagbaka'y di sapat ang nasyunalismo
layon ay pagkaisahin ang lahat ng obrero

kami'y aktibista, sa kalaban di padadaig
mapagsamantalang kapitalismo'y malulupig
O, magkaisa, manggagawa sa buong daigdig
at ang bandila ng sosyalismo'y ating itindig

- gregbituinjr.

Tula kay Libay

Lumulusong man sa kailaliman yaring diwa
Inuugoy man sa duyan nitong mga bathala
Bubuhos din ang biyaya sa asam na dakila
Esensya ba ng buhay ay tama ang nilalandas?
Rabaw ba ito ng mabubuting asal at danas?
Totoo bang pakikipagkapwa'y pinamamalas?
Yanigin man ng anumang delubyo't suliranin
Titindig tayo sa tama't matatag ang damdamin
At kagalingan ng ating kapwa ang iisipin
Lilipas din ang panahon at tatanda rin tayo
Ang paa'y may lipak, ubanin, may gatla ang noo
Subalit lalong tatatag sa kabila ng bagyo
Talastas kong asam na bituin ay maaabot
At maaarok din ang kailaliman ng laot
Sama-sama tayong ligaya ang sa kapwa'y dulot

- gregbituinjr.

Rakenrel, parekoy

Rinig mo rin ba ang rakenrolan ng mga pipit
At nagsisisayawan kahit may bantang hagupit
Kumekendeng-kendeng sa harap ng lawing maplupit
Entrada'y lalapit at bibiglang lalayo sa bingit
Ngingisi-ngisi lang doon ang ibong mandaragit
Rindi na kaya ang lawin sa kaylakas na tugtog
O nagpapasensya lang sa matitining na tunog
Lilipad ba agad sa himpapawid na kaytayog
Pabulusok na bababa't tatagay ng lambanog
At saka dadagitin ang mga pipit at itlog
Rimarim ang dumagsa sa likod ng kagalakan
Estimasyon ay laksa ang nawala sa karimlan
Kung sakaling sa atin maulit ang kasaysayan
Organisahin ang hanay, baguhin ang lipunan
Yayanigin ng pag-aalsa itong sambayanan

- gregbituinjr.

Mahalin mo ako

MAHALIN MO AKO

mahalin mo ako kung ano ba talaga ako
at di kung anong pinapangarap mong maging ako
huwag mong ipilit sa akin ang di naman ako
sapagkat tiyak mabibigo ka lamang, mahal ko

ako'y ako, at di ang pinangarap mong prince charming
akala mo'y pogi ako, kaya ka kandaduling
akala mo'y macho akong nais mong makasiping
aba'y kung gayon pala'y natutulog ka ng gising

kung ninais mong ganito ang maging kahinatnan
ngunit di mo naman sa akin iyon matagpuan
di pala ako ang prince charming mong inaasahan
lilisanin mo ba ako't agad mong iiwanan

yaring bihis ko't mukha'y mababago mo tuwina
subalit di mababago ayon sa iyong nasa
tanging magagawa mo lamang upang lumigaya
mahalin mo ako kung ano ako, aking sinta

- gregbituinjr.

Hindi win-win, hindi kompromiso

hindi win-win, hindi kompromiso
ang hiyaw nitong mga obrero
si Digong ay muling nanloloko
sa mga naaaping obrero
pagkat sagad-sagaring bolero

sino bang mga nahihirapan
yaong kapitalistang gahaman
o ang mga manggagawa naman
na animo'y walang kapaguran
nang pamilya'y mapakain lamang

si Digong pala'y bahag ang buntot
at sungay niya'y bumabaluktot
sa kapitalista pala'y takot
gayong sa mga dukha'y dinulot
ay tokbang, kamatayan, hilakbot

huwag tayong patangay sa alon
ng pangulo nilang urong-sulong
manggagawa, tayo'y magsibangon
at ipaglaban ang naaayon:
wakasan ang kontraktwalisasyon!

- gregbituinjr.

(ang tulang ito'y nilikha at binasa sa konsyerto't vigil ng mga manggagawa sa tulay ng Mendiola bilang protesta laban sa kontraktwalisasyon at pakikipagkompromiso ng pangulo sa mga kapitalista)

Sa unang buwan ng kasal

pagbati sa iyo, aking mahal
sa isang buwan ng ating kasal

matatag na pagniniig, giliw
pagsinta nati'y di magmamaliw

pangarap nating kaygandang bukas
nawa'y matupad, ating mamalas

nawa'y mabuo na, aking mahal
ang pinapangarap nating kambal

- gregbituinjr.

Pag-ibig ko'y di magmamaliw, aking sinta

Pag-ibig ko'y di magmamaliw, aking sinta
Romantiko ang bawat gabing kahalina
O, minumutya, nais kitang makasama

Lalaging nakaukit ang iyong larawan
Espesyal ka sa aking bawat panagimpan
Tinatangi ng ginoong may katapatan

Ang mutyang tulad mo'y marapat sinusuyo
Rinig mo ba ang ibinubulong ng puso
Yapusin mo ako'y di ka masisiphayo

Ako'y naririto't lagi kang iibigin
Dahil natatangi't walang sukat kabigin
Oo, ang pag-ibig mo'y nais kong maangkin

- gregbituinjr.

Akala mo, nanonood ako ng telebisyon

akala mo, nanonood ako ng telebisyon
gayong nakatanghod at nakatunganga lang doon
baka di ko na nauunawaan ang palabas
nagsasayaw man o nag-uusap silang malakas
pagkat nasa iba ang tinatakbo niring isip
gayong gising na gising ay tila nananaginip
mas nais ko pang magbasa, magsulat, at kumatha
magsalaysay, isatitik anumang nasa diwa
sa telebisyon ma'y komedya, balita, digmaan
nasa'y niloloob ng loob, nasa kalooban
paano kakatha ng walang kamatayang awit
na kagigiliwan ng madla, di man bumibirit
diwa'y naglilimayon, sa kawalan nakatutok
sa nariyang suliranin ay di magpapalugmok

- gregbituinjr.

Ang pag-ibig ko'y sadyang tinangay ng hangin

Ang pag-ibig ko'y sadyang tinangay ng hangin
Kusang inihihip sa mutyang iibigin
O, hangin, salamat sa tulong mo sa akin

Yaring buhay ko'y taos-pusong inihandog
Ito'y para sa mutyang sadyang maalindog
Susuungin lahat hanggang siya'y mapupog

Aking pantasya ang mutyang nais ilipad
Nasa'y sa himpapawid aking ipapadpad
Gising kong diwa'y kung saan-saan umusad

Kakanlungin kitang ang puri mo'y kaylinis
O, diwata ko, ayaw kitang maghinagpis
Minumutya kitang hahagkang anong tamis

Udyok ng damdaming ikaw ay paglingkuran
Ng buong puso sa buong sansinukuban
Ikaw lang, sinta, ang sana'y makatuluyan

Sa gabi-gabing ika'y nasa panaginip
Tila inuugoy ng duyan sa pag-idlip
Ang pagsinta mo nawa'y agad kong malirip

- gregbituinjr.

Dalaginding ay nakaligtas sa mga kidnapper

mabuti na lamang at siya'y nakaligtas
laban sa mga taong sadyang mararahas
mabuti na lamang at siya'y nakaalpas
mula sa mga kidnaper na talipandas

sampung taong gulang ay kaybilis mag-isip
gamit ang bolpen, kanyang sarili'y sinagip
sa mga taong katinua'y di malirip
buti't nailigtas ang buhay ng gahanip

maging listo sa panahong ito ng sindak
kung saan namumuntirya ang mga uwak
mag-ingat upang di kayo mapapahamak
pag-ingatang lalo ang inyong mga anak

dapat pigilan ang tulad nilang kuhila
upang kabataan ay di mapariwara

- gregbituinjr.

Ulap at Puso

kaygandang salubong ng umagang sariwa
sa bagong kasal na anaki'y pinagpala
ulap nga'y sumaksi sa pagsintang dakila
pagkat nagsapuso sa pagpupulutgata

(greg and liberty bituin, 021518, nasugbu, batangas)

Mga ngiti ng bagong kasal

Matatamis na ngiti
Namumula ang labi
Pagsinta'y naghahari
Sa pusong nagkatali

(Greg and Liberty Bituin, 021418, Tanay, Rizal)

Sa huling araw ng pagiging binata

SA HULING ARAW NG PAGIGING BINATA

ang pagpapakasal ba sa sinta'y isang pagsubok?
o nakaamba rito'y di madalumat na dagok?
ang huling araw ng pagiging binata ba'y rurok?
magsasamang maluwat at problema'y malulunok?
subalit dapat kaming magsumikap at mag-impok
at tanggapin ang ganitong katotohanang tampok

ngayon nga ang huling araw ng pagiging binata
bukas magaganap na'y pag-iisang puso't diwa
bagamat ako'y karaniwang tao't maglulupa
na patuloy pa ring naglilingkod sa manggagawa
tinanggap ako't inibig ng sinta ko’t diwata
bituin sa langit ay ikukwintas ko sa mutya

tila baga ang tadhana sa amin umaayon
may banta mang unos, di nagsusungit ang panahon
senyales nga ba iyon ng magandang nilalayon
na pagsasama'y titibay sa hampas man ng alon
salamat sa pagiging binata ng laksang taon
ngayon na'y handang humarap sa panibagong hamon

- gregbituinjr./02132018

Aking babalikan ang pisika't matematika

AKING BABALIKAN ANG PISIKA'T MATEMATIKA

sa pag-aasawa, bagong buhay na ang kaharap
kaya nais kong balikan ang dati kong pangarap
pag-aralan ang pisika't matematika'y hanap
repasuhin ang mga paksa sa bawat hinagap

ang pisika'y pag-aaral ng mosyon at materya
paano ba ang daloy halimbawa'y enerhiya
pati dagsin o grabidad ay mapag-aralan pa
paano ba tumatakbo ang natural na pwersa

aldyebra ay parang mahikang kaysarap lutasin
pati na aritmetika'y anong gandang aralin
ang tatsulok sa trigonometriya'y susukatin
kumplikadong kalkulus ay muling rerepasuhin

kung sa pagtataling-puso'y iba na ang tinahak
pagbabalik sa asam na paksa'y dapat matiyak
kaya mag-aral muli, pumasa't huwag bumagsak
baka may trabahong ibubuhay sa mga anak

- gregbituinjr.

Rinig mo ba ang tibok niring aking puso?

Rinig mo ba ang tibok niring aking puso?
E, di ba't alam mong ika'y pinipintuho?
Bubusugin kita ng tamis ng pagsuyo
Oo, pagsinta ko sa iyo'y punumpuno

Lunas ka sa kalumbayang nararanasan
Umukit sa diwa ang iyong kagandahan
Sinusuyo kita kahit sa panagimpan
Yapos ng aking puso ang iyong larawan

O kaya'y ililipad kita sa mga bituin
Nang luningning mo'y sa langit bibitin-bitin
Ako'y bubuyog bang pulos palipad-hangin?
Ramdam mo ba ang pintig ng aking damdamin?

Yayakagin kita't tutungo ta sa langit
O, sinta't sa paraiso ko'y ipipiit

- gregbituinjr.

Sa musa ng kariktan

SA MUSA NG KARIKTAN

tulad ka ba ng musa ng aking panitik
na aking inaalayan ng tula't halik
alam mo bang ako'y laging sa iyo'y sabik
pagkat sa puso ko, ngalan mo'y natititik

nadudurog ako pag di ka nasilayan
tamis mong ngiti'y laging pinananabikan
nais kong habambuhay na makatuluyan
ikaw na sinisintang musa ng kariktan

gabi'y kumikislap pag ating tingalain
suntok sa buwan kung langit pa'y lalakbayin
upang doon ay aking tuluyang pitasin
yaong ikukwintas ko sa iyong bituin

iilang araw na lang ang ipaghihintay
pagtataling-puso'y magaganap nang tunay

- gregbituinjr.

Mag-amang magkaaway

bakit sa panahong ito mag-ama'y magkaaway
pamagat ng ulat: "sa anak, ama ang kumatay"
sa isa pang ulat: "sa ama, anak ang pumatay"
"ang anak, kinatay ng ama na galing sa lamay"
"anak na tumalon sa ilog, ama ang humalay"

ano nang nangyayari dito sa ating daigdig
mga balita'y sa lalamunan nakabibikig
mismong mag-ama, silang bawat isa'y nilulupig
sinong magwawagi kung wala na silang pag-ibig
bilang mag-amang usapin ay dapat dinirinig

dapat mag-usap, huwag daanin sa karahasan
dinggin pa rin ang pintig sa puso'y binubukalan
di ba't may pag-asa ang bulong ng kapayapaan
upang ang magkapamilya'y makapagpatawaran
sa mga salang dapat dinadaan sa usapan

wala na bang puwang ang pag-ibig sa inyong puso
huwag nyong payagang iduyan kayo ng siphayo
sa mga suliraning sa puso'y nagpapadugo
problema'y gawing palipad-hangin hanggang maglaho
upang bilang mag-ama, kayo'y manatiling buo

- gregbituinjr.

Lalaki man ay tinig din ng kababaihan

lalaki man kami'y tinig din ng kababaihan
kung ako'y haligi, asawa'y ilaw ng tahanan
dapat lamang ipagtanggol ang bawat kasarian
aba'y tingni ang nasa Kartilya ng Katipunan

kaya pagbibirong apatnapu't dalawang birhen
ang sa banyaga'y pasalubong at dapat maangkin
ay di katanggap-tanggap, kahit pagbibiro man din
ang mga kababaihan ay di dapat bastusin

dapat maging tinig din ng babae ang lalaki
pagkat noong nanliligaw pa lang sa binibini
ay binigkas na ng puso ang pagsintang kaylaki
kaya puri ng babae'y ipagtatanggol dini

baliw man ang hari ay hari pa ring naghahari
may tatalima pa rin sa utos na di mabali
ngunit ang hari'y di bathalang di maduduhagi
babagsak din siya sa gawaing kamuhi-muhi

- gregbituinjr.

Sabi mo, dreamer ako

sabi mo, dreamer ako, dahil manunulat
kaya kinakabahan kang ako'y masilat
na pag nagmaneho'y mabangga akong sukat
na pag malayo’y nilakad, paa'y bumigat

sabi mo, ako'y nangangarap kahit gising
nananaginip habang kita'y magkapiling
nakatunganga sa langit, animo'y himbing
ang isip ay malalim kahit nagsisiping

sabi ko, ikaw ang sa puso ko'y diwata
tunay ka ngang diyosang aking minumutya
sabi mo, dapat akong tumuntong sa lupa
pagkat pambili ng isasaing nga'y wala

kaya sabi ko, ako na'y magtatrabaho
tanong mo, mamamasukan ka bang obrero
sagot ko, nais kong magsulat sa diyaryo
napailing ka't naglambing na lang sa dulo

- gregbituinjr.

Salin ng panalangin ni Pope Francis laban sa fake news

Panalangin ni Papa Francisco upang Labanan ang mga "Huwad na Balita"
Malayang salin mula sa wikang Ingles ni Gregorio V. Bituin Jr.

Panginoon, gawin mo kaming instrumento ng iyong
kapayapaan.

Tulungan mo po kaming makilala ang nakakubling
kasamaan sa isang pag-uusap na hindi nagtatatag
ng pagkakaisa.

Tulungan mo po kaming tanggalin ang lason sa aming mga paghuhusga.

Tulungan mo po kaming magsalita hinggil sa aming
kapwa bilang aming mga kapatid.


Kayo po ay matapat at mapagkakatiwalaan;
nawa ang aming mga salita'y maging binhi ng kabutihan sa daigdig:

Kung saan may sigawan, nawa'y masanay po kaming makinig;

Kung saan may kaligaligan, nawa'y makapagbigay po
kami ng inspirasyon ng pagkakasundo;

Kung saan may kalabuan, nawa'y makapagdala po kami ng kalinawan;

Kung saan may pagbubukod, nawa'y makapag-alay po
kami ng pagkakabuklod;

Kung saan may makapukaw-damdaming usapin, nawa'y magkaroon po ng kahinahunan;

Kung saan may kalabisan, nawa'y maibigay po namin
ang totoong mga tanong;

Kung saan may kapinsalaan, nawa'y makapukaw po kami
ng pagtitiwala;

Kung saan may paglalabanan, nawa'y makapagdala po kami ng paggalang;

Kung saan may kasinungalingan, nawa'y madala po namin ay katotohanan.  Amen.

- Papa Francisco, pahayag sa Pandaigdigang Araw ng Komunikasyon 2018