Ako'y Libra

AKO'Y LIBRA
ni Gregorio V. Bituin Jr.
13 pantig bawat taludtod

nasa gitna ng Virgo't Scorpio ang Libra
Virgo'y simbolo ng aking mahal na ina
at Scorpio naman ang butihin kong ama
at akong kanilang anak ay isang Libra
espesyal ba ako't pinagitnaan nila
o ang pagsilang ko'y isang malaking tsamba

maraming Libra'y sikat sa larangan nila
karamihan nga'y kasingkaarawan ko pa
si chess GM Jonathan Speelman ang isa
pati si Benjie Paras na basketbolista
si Sting na isang batikang manganganta
at magiting na Mahatma Gandhi ng India

marahil mahilig din sa libro ang Libra
pagkat mga tulad namin ay palabasa
sari-sari ang kaalamang ambag nila
anang kapalaran, magaling sa hustisya
sadyang mapagmahal at mainit sa sinta
pagpapakatao't dangal ay mahalaga

Katapatan sa bawat kasama

KATAPATAN SA BAWAT KASAMA
ni Gregorio V. Bituin Jr.
15 pantig bawat taludtod

mahalaga ang katapatan sa bawat kasama
sa hirap man at ginhawa, sa pagdurusa't saya
hindi tatalikod sa prinsipyo't pagkakaisa
hanggang kamatayan, patuloy sa pakikibaka

ang bawat kasama'y kaisa sa diwa't prinsipyo
tangan yaong diwa ng pakikipagkapwa-tao
pawang magkasama sa adhikaing sosyalismo
magkatuwang sa mga pagkilos, rali't trabaho

katapatan sa prinsipyo, tapat din sa kasama
tapat din sa partidong kinabibilangan niya
iginagalang ang pagkatao ng bawat isa
higit pa sa magkakapatid ang turingan nila

walang lamangan, walang iwanan sa bawat laban
ang mali'y bakahin, ang wasto'y yakaping tuluyan
bawat isa'y ipagtanggol laban sa kasamaan
isapuso yaring prinsipyo't talagang Katwiran

mabuhay kayo, mga kasama't aming kapatid
di namin papayagang sa dilim kayo'y mabulid
magkasama tayo buhay man natin ay mapatid
sa pakikibaka, pagkat prinsipyo'y ating batid

Pag-ingatan ang puri

PANG-INGATAN ANG PURI

ni Gregorio V. Bituin Jr.

12 pantig bawat taludtod

Madaling manghiram ng tapang sa alak

Lalo na kung sila'y may masamang balak

Kung isa kang dilag na rosas o lilak

Mag-ingat ka't baka puri'y mapahamak.

BMP - Dalawang Dekada na

BMP - DALAWANG DEKADA NA
ni Gregorio V. Bituin Jr.
13 pantig bawat taludtod

Mapagpalayang pagbati ang paabot ko
sa Bukluran ng Manggagawang Pilipino
Pagpupugay sa inyo nang taas-kamao
sa ikadalawampu nyong anibersaryo

Dalawang dekadang sadyang makasaysayan
na punong-puno ng aral at karanasan

Dumatal ang dalawampung anibersaryo
na patuloy na hinahamon ang obrero:
Uri'y organisahin, magkaisa tayo!
Halina't makibaka tungong sosyalismo!

Mabuhay! Mabuhay ang uring manggagawa!
Mabuhay kayo! O, hukbong mapagpalaya!

(Ang Bukluran ng Manggagawang Pilipino (BMP) ay nagdiwang ng kanyang ika-20 anibersaryo nitong Setyembre 14, 2013 sa ikalawang palapag ng Marikina Sports Park sa Lungsod ng Marikina.)

Sa Kaarawan ni Ina

SA KAARAWAN NI INA
ni Gregorio V. Bituin Jr.
14 pantig bawat taludtod

salamat, inay, sa iyong mga pagsisikap
na maabot naming anak ang aming pangarap
maraming salamat sa taos-pusong paglingap
at tunay na pagmamahal na aming nalasap

maligayang kaarawan po, ina kong mahal
ikaw na nagbigay ng magagandang pangaral
lalo't payo mong dapat kaming maging marangal
sa bawat naming ginagawa, prinsipyo't asal

sa pagdatal niring iyong kaarawan, ina
tandaang bawat anak mo'y mahal na mahal ka
napakatatag mo sa pagsubok at problema
sa mundong ito, tunay ka pong THE BEST na ina

nawa'y lagi kang nasa mabuting kalagayan
nawa'y nasa maayos ang iyong kalusugan
nawa'y laging matatag ang iyong kalooban
sa muli po, ina, maligayang kaarawan

6 Setyembre 2013

Nahan?

NAHAN?
ni Gregorio V. Bituin Jr.
14 pantig bawat taludtod

(Sa pandaigdigang araw ng mga desaparesido o mga nangawala, International Day of the Disappeared tuwing Agosto 30)

kaytindi ng panahong pawa na lang lunggati
na yaring tanang buhay, puno ng dalamhati
tuliro na ang diwa, puso'y walang baluti
patuloy sa pagdugo, hustisya yaong mithi

sari-sari ang kwento, iba't iba ang bintang
ang mga nangawala'y tuluyan bang pinaslang
alaala'y kaypait, hanggang gunita na lang
nangyari sa kanila'y sino ba ang maylalang?

o, kayhirap mawalan ng ating minamahal
lalo't di natin alam paano ba napigtal
yaong kanilang buhay, kami'y natitigagal
katawan kaya nila'y saan na nangabuwal?

kahit anumang bakas, sasaliksiking pilit
hustisyang inaasam ay aming igigiit
nahan si ama't ina, pati aming kapatid?
sinong berdugo't bakit buhay nila'y pinatid?

para bagang sa likod, may tarak ng balaraw
bawat nilalakaran, kaydilim kahit araw
ang panahong ligalig, bakit nangingibabaw?
mailap na hustisya'y kailan matatanaw?

Manininda laban sa pork barrel

MANININDA LABAN SA PORK BARREL
ni Gregorio V. Bituin Jr.
13 pantig bawat taludtod

mga manininda'y nakiisa rin doon
laban sa pork barrel na ugat ng kurapsyon
pork barrel daw ay ilaan sa edukasyon
at di sa bulsa ng mambabatas na maton

pork barrel, ilaan sa pagkain ng dukha
para sa pabahay ng mga maralita
para sa kalusugan ng mga kawawa
pork barrel, tanggalin sa kamay ng kuhila

tanggalin sa kamay ng mga mambabatas
pagkat ninanakaw ng mga mambubutas
iyang kabangbayan ay binabalasubas
ng mga kawatan at trapong talipandas

kayraming pera ng gobyerno, kitang-kita
ngunit sa serbisyo'y kulang, ibinubulsa
kaya panawagan ng mga manininda
pork barrel, ilaan sa serbisyo sa masa

Sa lakambining tinatangi

SA LAKAMBINING TINATANGI
ni Gregorio V. Bituin Jr.
13 pantig bawat taludtod

kaysarap pagmasdan ng kaytamis mong ngiti
kitang pareho ng adhikain at sanhi
sinta, nais kong nakikita kitang lagi
makasama ka'y aking pinakamimithi
kaysayang hagkan ng magaganda mong labi
lakambini kitang tunay kong tinatangi

Kung ako, aking mahal, ang iyong iibigin

KUNG AKO, AKING MAHAL, ANG IYONG IIBIGIN
ni Gregorio V. Bituin Jr.
14 pantig bawat taludtod

kung ako, aking mahal, / ang iyong iibigin
ihahandog sa iyo / kahit isang bituin
pangarap nating lipunan / ang ating tatahakin
sasamahan kang lagi / landasin man ay bangin

kung ang iibigin mo, / aking mahal, ay ako
pakakasalan kita / saanman ang nais mo
at magkasama nating / bubuhaying totoo
ang ibinungang anak / na nanggaling sa iyo

kung ako, aking mahal, / ang pakamamahalin
dadalhin ka sa langit / ng bawat pangitain
bundok ay tatahakin / pati himpapawirin
lalo sa mga lugar / na sadyang matulain

kung ang mamahalin mo / ay ako, aking mahal
aking ipakikita / bawat mabuting asal
aking ipadarama / ang pag-ibig na bukal
kapwa natin gagawin / pamumuhay na banal

pag inibig mo ako, / sinisintang diyosa
hanggang sa kamatayan / tayo ay magkasama
tanging hiling ko lamang / sa iyo, aking sinta
ang matamis mong oo'y / huwag ipagkait pa

Limang Tanaga sa Barungbarong

LIMANG TANAGA SA BARUNGBARONG
ni Gregorio V. Bituin Jr.

DINGDING

yari sa tagpi-tagpi
ang dingding ko'y sawali
di malungkot, di sawi
ang tahanang may ngiti

BAHAY

sira na yaong bubong
ng aking barungbarong
kung bumagyo'y lulusong
pag baha na sa silong

TAHANAN

tahanan ko ma'y dampa
basta't walang kawawa
puso ko'y sumisigla
sa dampang maginhawa

KAHIRAPAN

nakatira'y mahirap
na laging nangangarap
makakaahong ganap
pag patuloy ang sikap

KARAPATAN

dukha'y may karapatang
magkaroong tahanan
bahay na pahingahan
ng pagod na katawan

Limang Dalit sa Kalibre.45

LIMANG DALIT SA KALIBRE.45
ni Gregorio V. Bituin Jr.

PANANGGA

kalibre kwarenta'y singko
ang tangan niyang totoo
tsapa niya't abogado
sa sinong loloko-loko

LAYON

ano bang iyong adhika
ang magkabaril ba't tama
kung ang layon mo'y masama
kakamtin mo'y dusa't luha

PAGBUNOT

pag baril, iyong binunot
tiyakin mong ipuputok
pag ikaw ay nagbantulot
ikaw'y kanyang ilulugmok

ASINTADO

dapat pagtira'y di sablay
di nanginginig ang kamay
pag naunahan kang tunay
mababaon ka sa hukay

HUSTISYA

dapat laging isipin mo
pagkalabit ng gatilyo
may mapapatay kang tao
makatarungan ba ito?

Kung dumiskarte ang mga kasama

KUNG DUMISKARTE ANG MGA KASAMA
ni Gregorio V. Bituin Jr.
13 pantig bawat taludtod

yaong mga kasama'y pawang maparaan
magaling dumiskarte sa pang-araw-araw
ngunit may sinusunod silang panuntunan
gabay ay kawastuhan, prinsipyadong galaw

anumang hiniram ay dapat mong ibalik
anumang iyong nasira'y bayarang pilit
ang paggalang sa kapwa'y nasa puso't isip
dito'y laging pagpapakatao ang salik

huwag lalamangan ang manggagawa't dukha
igalang ang mga babae't matatanda
maging makatwiran sa bawat pasya't gawa
maging makatarungan din sa puso't diwa

kapos ka man sa buhay sa araw at gabi
mabuhay lang ang pamilya'y dumidiskarte
nagtatrabaho't nagsisikap ng maigi
sa kapwa'y di nanlalamang, di nang-aapi

dumidiskarte ng maayos at marangal
binabayarang wasto ang perang hiniram
kung mangusap sa kapwa'y tunay na magalang
ang diskarte'y may pagpapakataong tunay

mabuhay kayong sa bayan ay nagsisilbi
nang walang pag-iimbot, may pagkabayani
kasama'y prinsipyado nga kung dumiskarte
at sa kanila'y hindi kayo magsisisi

Di ako nakikibaka upang magpasikat lang

Di ako nakikibaka upang magpasikat lang
Ito'y simulaing niyakap ko't pinaglalaban
Tunay ngang lumalaban kami dahil sa prinsipyo
At nang itayo ang isang lipunang makatao
Sosyalismo ay sistema ng lipunang pangarap
Rebolusyon ang tungkulin para sa hinaharap
Edukasyon ang susi upang mamulat ang masa
Pag-aralan itong lipunang mapagsamantala
Upang baguhin ito't tuluyan nating palitan
Yakap ang prinsipyo'y babaguhin ang kasaysayan
At kasama ang uring manggagawa'y magwawagi
Na tanging susi'y pagkakaisa ng buong uri

- gregbituinjr.

Kung sa palad at mata ng tao'y nakakahiya (Soneto 29)

Kung sa palad at mata ng tao'y nakakahiya (Soneto 29)
ni William Shakespeare
malayang salin ni Gregorio V. Bituin Jr.
15 pantig bawat taludtod

Kung sa palad at mata ng tao'y nakakahiya
Mag-isa kong niluha ang hamak kong kalagayan
Nabingi ang langit sa walang silbi kong pagluha
Sa sarili'y tumingin, sinumpa ang kapalaran
Nais kong matulad sa may mayaman ang pag-asa
Maging tulad niya't dumami ang kaibigan ko
Nais ang sining niya't ang sakop pa ng iba
Di gaanong masaya sa kung anong mayro'n ako
Sa ganitong gunita'y sa sarili'y nasusuklam
Nagkataong lagay ko't ikaw yaring iniisip
Tulad ng biro'y bumangon sa pagputok ng araw
Mula sa mapanglaw, umawit sa pinto ng langit
Dahil pagsinta mo'y nagdulot ng ibayong saya
Kaya ayaw kong mga hari'y aking makasama

Ang hirap kapag umuulan

ANG HIRAP KAPAG UMUULAN
ni Gregorio V. Bituin Jr.
15 pantig bawat taludtod

humaharurot ang sasakyan habang umuulan
kaya ang tubig-baha, ikaw pa'y matatalsikan
aba'y papasok pa lang ang bata sa paaralan
ikaw naman ay patungo na sa inyong tanggapan
at ang iba naman ay sa kanilang pagawaan
bago pumasok, para kayong nakipagbasaan
uniporme'y nababasa sa pagdatal ng ulan
dahil kaybilis ng andar noong isang sasakyan
dahil ang tsuper nito'y tila walang pakiramdam
sa mga papasok pa lang ay walang pakialam
anong ating dapat gamitin kapag umuulan
payong, kapote, dangkal ng mabuting kaasalan
disiplina ng bawat tsuper at ng mamamayan
nang makapasok ng maayos sa patutunguhan

Ang lapis at ang pambura

ANG LAPIS AT ANG PAMBURA
ni Gregorio V. Bituin Jr.
12 pantig bawat taludtod

"Paumanhin," anang lapis sa pambura.
"Ha? Bakit? Wala kang nagawang masama,"
Ang pambura'y agad na tugon sa kanya.
Sumagot ang lapis na bago lang hasa:
"Pagkat katawan mo'y nababawasan na.
Sa mga mali kong sa tuwina'y gawa
Ay naririyan ka't bura na ng bura.
Ang pakiramdam ko ikaw'y lumuluha"
"Tinuran mo'y tunay," sabi ng pambura
"Ngunit ano pa bang aking magagawa
Sa tungkuling iyan ako tinalaga
At sanhi kung bakit tulad ko'y nilikha.
May papalit namang gaya kong pambura
Sakali mang ako'y tuluyang mawala.
Ang tungkuling aking sa kanya'y pamana
Buong tapat din n'yang gagampanang kusa.
Kaya, lapis, huwag ka nang mag-alala
Ako'y masaya sa tungkulin ko't gawa."

Ako si Asoge

AKO SI ASOGE
ni Gregorio V. Bituin Jr.
13 pantig bawat taludtod

ako itong si Asogeng may dalang ulat
tila walang hapo, may kabal na akibat
para bang nakasakay sa talim ng kidlat
nang matuling maihatid ang nararapat

may kasabihan nga ang matatandang dukha
kaybilis mag-ulat, may pakpak ang balita
kaytuling kumalat, may taynga ang lupa
ganyan ang balita kung masagap ng madla

kayrami ng nangyayaring dapat mabatid
kung walang mga taong dito'y naghahatid
mula sa bulungan, anasan ng litid
ulat ay nalalaman ng mga kapatid

ito ang papel ng mga tagapag-ulat
mahalagang balita'y isinisiwalat
huwag lang kasinungalingan ang ikalat
dahil ganito'y pawang tsismis na maalat

* asoge - tagalog sa mercury

Kung ang kapitalismo'y...

KUNG ANG KAPITALISMO'Y...
ni Gregorio V. Bituin Jr.
15 pantig bawat taludtod

Kung ang kapitalismo'y napakalaking akasya
Obrero'y mga palakol na sisibak sa kanya
Unti-unti'y puputulin ang malalagong sanga
Mga sanga'y panggatong nang makakain ang masa.

Kung ang kapitalismo'y napakataas na tore
Buhay-hari ang kapitalistang ngingisi-ngisi
Toreng itinayo ng manggagawang nagsisilbi
Ay dapat nang buwagin ng mga obrerong api.

Kung ang kapitalismo'y agilang lilipad-lipad
Manggagawa'y di sisiw na dadagitin lang agad
Sila'y isniperong riple'y tangan, na tanging hangad
Na masapol pag ulo nitong agila'y lumantad.

Kung ang kapitalismo'y tulad ng isang buldoser
Na manggagawa sa pabrika ang minamasaker
Tanganan mo, manggagawa, laban sa mga Hitler
Iyang masong inyong dapat ipambuwag sa pader.

Pagbati

Kumusta na ba kayo, mga kaibigan?
Nawa'y nasa mabuti kayong kalagayan
Di naaapi't pinagsasamantalahan
Ginagalang lahat ng mga karapatan
Sapagkat kayo'y masunuring mamamayan.

Komunista ba kayo, mga kababayan?
Dahil kumikilos laban sa kahirapan?
Nais na kamtin ang pantay na karapatan
Nakikibaka upang lumaya ang bayan
Sa kuko ng mapagsamantalang lipunan.

Kumusta na kayo? Komunista ba kayo?
Bakit pinagtatanggol ang mga obrero?
Magsasaka, babae, karaniwang tao?
Laban sa mga mapagsamantala't tuso!
Bakit ang dukha'y ipinagtatanggol ninyo?

Kumusta na? Komunista ba pag nanaig
Ang paggalang sa dangal ng kapwa't pag-ibig?
Bakit ang mapagsamantala'y inuusig?
At hustisyang panlipunan ang bukambibig?
Bakit manggagawa'y dapat magkapitbisig?

- gregbituinjr.

Maging matanda'y di pases nang sundin lagi

MAGING MATANDA'Y DI PASES NANG SUNDIN LAGI
ni Gregorio V. Bituin Jr.
13 pantig bawat taludtod

Iyang pagsunod ay hindi simpleng paggalang
kailangang ito'y iyo ding pag-isipan
dahil matanda siya'y susundin na lamang
o dahil tama lang na siya'y paunlakan

Dahil ba matanda siya'y susundin mo na
kung sa pagsusuri mo'y mali naman siya
paggalang ba agad ang pagsunod sa kanya
at pag di ka tumalima'y masama ka na

Ang pagsunod ay dapat batay sa tama't mali
magpasya ka batay sa iyong pagsusuri
huwag sunod ng sunod para lang mapuri
maging matanda'y di pases nang sundin lagi

Nais maging pangulo ni Manny Pacquiao

NAIS MAGING PANGULO NI MANNY PACQUIAO

ni Gregorio V. Bituin Jr.

13 pantig bawat taludtod

Nais mo ba ang isang Pangulong Pacquaio

yaong mamumuno sa atin balang araw

sinong karibal kaya sa kanya'y sasapaw

plano niya sa bansa'y gaano kalinaw

o ang bayang ito'y lalong magiging hilaw

pag nanalong pangulo si Manny Pacquiao

Ulat mula sa http://ph.news.yahoo.com/pacquiao-says-considering-running-president-025230082.html

Pacquiao says considering running for president

By Alex Millson | Agence Franca Presse News – 4 hours ago, July 28, 2013

Philippine boxing great Manny Pacquiao is harbouring thoughts of running for president in his beloved homeland when he finally hangs up his gloves, he revealed to AFP in an exclusive interview.

Giving his strongest hint yet that he will push to the top of the political tree when he finally retires from the ring, the "Pacman" -- a hero and congressman in his home country -- admitted he had considered the presidency of the 95 million-strong nation.

When pressed on whether he had thought about shooting for the top job, the softly-spoken 34-year-old replied "Yes".

Drawing parallels between his pugilism and politics careers, the former world champion in eight weight divisions said: "When I started boxing, of course I was planning, you know and thinking about getting to become a champion. So when I enter politics it's the same thing.

Mas maiging magdusa kaysa mang-api

MAS MAIGING MAGDUSA KAYSA MANG-API
ni Gregorio V. Bituin Jr.
10 pantig bawat taludtod

mas maigi pang kita'y magdusa
kaysa pagmalupitan ang iba
kaysa apihin ang ating kapwa
kaysa kawawain yaong masa
kaysa pagsamantalahan sila

di ka sasaya sa pang-aapi
iniisip mo lang ay sarili
ang ginto't pilak ay walang silbi
kung pagkatao'y di mapakali
sa madla'y berdugo't di bayani

Babae'y Hindi Hinugot sa Tadyang

BABAE'Y HINDI HINUGOT SA TADYANG
ni Gregorio V. Bituin Jr.
11 pantig bawat taludtod

mula sa sinapupunan ng ina
lalabas ang sanggol sa kanyang pwerta
noon at ngayon, ganyan ang istorya
kasaysayan man ito o siyensya

ngunit isang alamat, alamat lang
na umano'y kwento ng Eba't Adan
babae daw ay hinugot sa tadyang
ng lalaking una raw na nilalang

galing sa tadyang ay tanging si Eba
hindi yaong sa mundo'y bilyong masa
pinagbuntis tayo ng ating ina
at siyam na buwan tayong dinala

may alamat ding niluto ang tao
nasunog ang luto kaya nagnegro
ang puti'y hinango na agad dito
katamtamang luto'y Pilipino

sa ina galing sinuman sa madla
galing sa ina mayaman at dukha
sanggol sa tiyan, sa pwerta luluwa
kaya tao'y di sa tadyang nagmula

alamat ni Eba'y imbento lamang
tulad din ni Venus sa kasaysayan
wala itong syentipikong batayan
pagkat alamat nga't alamat lamang

Barungbarong, inilalaban ng patayan

BARUNGBARONG MAN, INILALABAN NG PATAYAN
ni Gregorio V. Bituin Jr.
15 pantig bawat taludtod

sinumang tanggalan ng bahay ay tiyak lalaban
munti mang barungbarong yaong kanilang tahanan
di ba't kayhirap mawalan ng bahay-pahingahan

tahanan ma'y barungbarong, sa dukha ito'y mansyon
may karapatan pa rin silang manirahan doon
tawagin mang nasa danger zone, di naman sa death zone

ilalaban ng patayan bahay ma'y barungbarong
dahil ito'y tahanan ng dukhang tumira doon
pahingahan ng dukhang nagtatrabaho maghapon

barungbarong man, bahay ito ng buong pamilya
dito nabuo yaong kayraming pangarap nila
yari man ito sa pinagdikit-dikit na tabla

hayop man o kulisap, tanggalan mo ng tahanan
tiyak na magagalit, gagantihan ka't lalaban
tao pa kayang tinanggal ang kanilang tirahan

Nais kong bumili ng gitara

NAIS KONG BUMILI NG GITARA
ni Gregorio V. Bituin Jr.
13 pantig bawat taludtod

maganda raw ang tinig ko, sabi ni ina
gamitin ko raw ang talentong ito, anya
sa bahay namin, noong kaarawan niya
sa bidyoke'y lagi akong kanta ng kanta

pagkanta'y paghusayin, maging praktisado
ang Talentadong Pinoy daw ay subukan ko
ngunit pangbidyoke lang ang boses kong ito
gayunman, inay, salamat sa tiwala mo

ngunit ako'y makata, hindi manganganta
pawang mga tula ang katha sa tuwina
ano kaya't bumili ako ng gitara
lagyan ng tono ang mga tulang gawa na

marahil ito ang dapat kong pagsikapan
aaralin kong maggitara sa tahanan
tula'y lagyang himig, akin ding susubukang
umawit sa pista, bertdey, rali't lansangan

manghiram ng gitara'y pahirapan mandin
ang solusyon, sariling gitara'y bibilhin
mag-iipon nang maabot ang adhikain
ang pangarap ni ina'y di ko bibiguin

- sinulat matapos basahin ang istorya ng awiting "Starry Starry Night" o Vincent ni Don MacLean

Sa Kamatayan ni Rochelle Lopez, Katulong

SA KAMATAYAN NI ROCHELLE LOPEZ, KATULONG

ni Gregorio V. Bituin Jr.

13 pantig bawat taludtod

(Namamaga ang kaliwang mukha, maraming latay sa katawan at mga paso ng sigarilyo sa magkabilang braso, at may malaki pang bukol sa leeg. Ganito inilarawan ni Ginang Jocelyn Lopez ang itsura ng 17-anyos na anak na babaeng si Rochelle nang kanya umano itong makita sa morgue kung saan nila pinuntahan.

Si Rochelle na namasukan bilang kasambahay ay sinasabing pinagmalupitan hanggang sa mapatay ng kanyang among babae na kinilalang si Maria Shiela Gomez y Sabanal, isang buy and sell businesswoman na naninirahan sa California Garden Square sa Brgy. Highway Hills, Mandaluyong City. 

Napag-alaman na nasa kamay na rin ng pulisya ang suspek na si Gomez matapos na maaresto ng pinagsanib na pwersa ng Women and Children's Protection Desk (WCPD), Special Operations Group at ng mga tauhan ng Department of Social Welfare and Development. 

- mula sa artikulong "Katulong Pinapangit Hanggang Mamatay" ni Nonnie Ferriol, Abante Sunday Tonite, Hunyo 30, 2013, pahina 3)

hindi ka batang basta lang kagagalitan

ng iyong among tila walang kamuwangan

kung ano yaong magandang kaugalian

amo mo siyang puno ng kaligaligan

may karapatan ka dahil ikaw ay tao

at di dapat basta saktan ng iyong amo

among mukhang mabait ngunit isang gago

amo mong nagwasak sa iyong pagkatao

anong demonyo ang nasa kanyang isipan

inalipin ka na, ikaw pa'y sinasaktan

anong aswang yaong nasa kanyang likuran

anong dyablo ang nasa kanyang kalooban

hustisya, hustisya, dapat itong makamit

ng mga tulad mong ang dinanas ay lupit

ang tunay na hustisya'y di dapat mawaglit

ang amo mo'y sadyang marapat na mapiit

Wala na dapat tortyur sa piitan

WALA NA DAPAT TORTYUR SA PIITAN
ni Gregorio V. Bituin Jr.
13 pantig bawat taludtod

alam mong wala kang ginawang kasalanan
ngunit kailangan ka nilang paaminin
tingin sa iyo'y marami kang nalalaman
mga impormasyon sa iyo'y pipigain

ngunit kung sila sa iyo'y walang mapiga
totortyurin ka, sasaktan ang katawan mo
sa kanila'y kailangan mong magsalita
kundi'y talagang masasaktan kang totoo

sa tortyur, kahit balahibo mo'y titindig
pahihirapang tunay ang isip mo't puso
gagawin nilang kalamnan mo'y mapanginig
habang ramdan ang sakit ng laman at bungo

dapat nang tigilan ang tortyur, tigilan na
sa lahat ng piitan ay mawalang dapat
sa kulungan ay maging makatao sana
huwag nang paglaruan ang presong inalat

epekto sa tao ng tortyur ay kaytindi
katawan at pagkatao'y nayuyurakan
wala na dapat tortyur, sigaw ng marami
wala dapat tortyur sa alinmang piitan

- tuwing Hunyo 26 ay UN International Day in Support of Victims of Torture

Sa maliit na mundo ng asong nakatali

SA MALIIT NA MUNDO NG ASONG NAKATALI
ni Gregorio V. Bituin Jr.
11 pantig bawat taludtod

kaibigan siyang tunay ng tao
nagsisilbing tanod sa bahay nito
kinakahulan ang bawat anino
dama'y kaytalas laban sa dorobo

may kadena sa leeg ang animal
handang kagatin ang sinumang hangal

matapang at magaling itong aso
pinapakain, alagang totoo
handugan mo ng paboritong buto
kakampi mo pagdatal ng peligro

mag-ingat sa aso't baka masakmal
kahit sa aso'y igihan ang asal

gwardyang di bayarán, tapat sa amo
may tungkulin siyang bantayan tayo
bilanggo man sa munting teritoryo
sa kanya yao'y isang paraiso

Tulawit sa Kalikasan

TULAWIT SA KALIKASAN
ni Gregorio V. Bituin Jr.
12 pantig bawat taludtod

(nilikha ang tula bilang tugon sa kahilingan ni Ate Marie Marciano, moderator ng Kamayan para sa Kalikasan Forum, upang lapatan ng tono at gawing bagong awit para sa kalikasan; ito'y burador o draft pa lamang)

i
kabayan, hindi ba ninyo napapansin
tambak ang plastik sa karagatan natin
polusyon sa paligid ay kaytindi rin
hawa ang pinagkukunan ng pagkain

ii
umulan, biglang aaraw at aambon
pabagu-bago na ang ating panahon
kalikasan ay parang hilong-talilong
di mawari bakit ito’y urong-sulong

iii
adaptasyon ay kailangan na natin
sa mga pagbabago'y umangkop na rin
ang mitigasyon ay dapat na ring gawin
bawasan din ang usok sa papawirin

KORO:
alagaan ang LAHAT, kilos na tayo
ito ang Lupa, Araw, Hangin, at Tao
iisa lang ang tahanan nating mundo
kaya huwag nating pabayaan ito

Ulitin ang iii
Ulitin ang Koro 2x

Ang mga "Men of Steal"

ANG MGA "MEN OF STEAL"
ni Gregorio V. Bituin Jr.
15 pantig bawat taludtod

palabas sa puting tabing ngayon ang "Man of Steel"
na istorya ni Superman laban sa mapaniil
di na si Christopher Reeve ang di tamaan ng baril
pagkat Superman na ngayon ay isang Henry Cavill

ngunit sa labas ng puting tabing, pulos hilahil
sa bayan ko'y kayraming naglipanang "Men of Steal"
nasa matataas na posisyon, kunwari'y anghel
ngunit kaban ng bayan pala ang dinudukilkil

sila ang mga trapong banal ngunit mapaniil
karapatan nga ng maliliit ay sinusupil
para sa sariling interes, mahilig mangikil
asungot na kayraming tauhang pulos de-baril

pawang tiwali, buong bayan na ang sinisikil
nilang nasa pwestong sa pagseserbisyo'y inutil
dapat lang ibagsak na silang mga "Men of Steal"
silang ang puri't pagkatao'y santambak ng banil