Nagmamaramot ang Gabi

NAGMAMARAMOT ANG GABI

ni Gregorio V. Bituin Jr.

8 pantig bawat taludtod

nakatitig sa kawalan

ang mga batang lansangan

habang nagkakarerahan

ang iba't ibang sasakyan

batang hamog kung tawagin

ang gutom ayaw nang damhin

kahit ano'y aagawin

upang sila'y makakain

sino kayang manlilimos

sa kanilang mga kapos

bakit ba sila busabos

ang nasa isip ng musmos

sa araw ay maghahanap

ng pagkaing masasarap

sa gabi'y pinapangarap

maibsan na itong hirap

gabi nila'y pumapanglaw

pangarap ba'y matatanaw

mayroon bang bagong araw

na sa kanila'y susungaw

nagmamaramot ang gabi

sa pangarap nila'y bingi

gobyerno'y walang masabi

sa hinaing ng marami

Ang Welga'y Isang Paaralan

ANG WELGA'Y ISANG PAARALAN

ni Gregorio V. Bituin Jr.

14 pantig bawat taludtod

mahalagahin ang welga pagkat paaralan

hinggil sa tunggalian ng uri sa lipunan

welga'y kongkretong pagmumulat sa katangian

ng lipunan at estadong kinasasadlakan

ang welga'y paaralan upang magrebolusyon

nang makamtan ng obrero ang emansipasyon

at maresolba ang pangunahing kontradiksyon

sa pabrika, lipunan, at gamit sa produksyon

sa welga, ang mga manggagawa'y napapanday

sa pakikibaka pagkat tunggaliang tunay

kitang-kita kung bakit kapitalismo'y sablay

natututong dumiskarte hanggang magtagumpay

rebolusyon ay di lang sahod at benepisyo

at lalong higit pa sa isyu ng unyunismo

ito'y di lang katiyakan sa pagtatrabaho

kundi layon nito'y panlipunang pagbabago

Kamalayang Unyunista'y Sadyang Di Sapat

KAMALAYANG UNYUNISTA'Y SADYANG DI SAPAT

ni Gregorio V. Bituin Jr.

13 pantig bawat taludtod

kamalayang unyunista'y mananatili

kung limitado lang yaong kanilang gawi

kung munting ginhawa lang ang kanilang hingi

nagkakasyang dagdag-sweldo'y maipagwagi

hangga't sa lipunang bulok, di mamumuhi

hangga't di tukoy na pribadong pag-aari

ng kagamitan sa produksyon ay mapawi

hangga't obrero'y di maging mulat-sa-uri

kamalayang unyunista'y sadyang di sapat

dapat ang mismong lipunan na'y inuungkat

tanungin bakit may kapitalistang bundat

at kayraming obrerong sa buhay ay salat

diwang unyunismo'y huwag panatilihin

mga unyunista'y dapat organisahin

sosyalistang layunin sa kanila'y dalhin

nang diwang makauri'y kanilang yakapin

Simula Man Ang Unyonismo

SIMULA MAN ANG UNYONISMO

ni Gregorio V. Bituin Jr.

13 pantig bawat taludtod

ang unyonismo'y simula ng pagkamulat

pagkat nagkakaisa ang obrerong salat

ang karapatan nila'y naisisiwalat

laban sa kapitalistang sa tubo'y bundat

simula ng pagkamulat ang unyonismo

ngunit di sapat na ilaban lang ang sweldo

at batayang karapatan nitong obrero

dapat na ang diwang makauri'y matamo

dapat mapasabak ang unyon sa labanan

maaari mang ito'y welga o aklasan

nang manggagawa'y mamulat sa tunggalian

ng uri sa pabrika, pati sa lipunan

ang pagsapi sa unyon ay simula pa lang

dahil kapwa manggagawa'y nagsasamahan

ngunit kung walang makauring kamalayan

baka sila'y madurog sa simpleng labanan

simula man ng pagkamulat itong unyon

panahon nila'y di dapat maubos doon

dapat matutunan nilang magrebolusyon

yakaping mahigpit ang sosyalistang layon

Hindi Unyonismo ang Landas ng Paglaya

HINDI UNYONISMO ANG LANDAS NG PAGLAYA

ni Gregorio V. Bituin Jr.

13 pantig bawat taludtod

ang landas ng paglaya'y hindi unyonismo

pagkat di lang sa pabrika ang labang ito

pakikibakang ito'y tagos sa gobyerno

kaya di dapat mag-unyon lang ang obrero

pakikibaka nila'y di hanggang pabrika

kaya dapat mangarap ng bagong sistema

kung saan malaya sa pagsasamantala

ng hinayupak na mga kapitalista

dapat nang ipaalam sa mga obrero

na magwawakas ang lumang sistemang ito

kung tuluyang bumagsak ang kapitalismo

at manggagawa na'y namuno sa gobyerno

panahon nang tapusin ang dusa at luha

unyonismo'y lagpasan na ng manggagawa

nasa sosyalismo ang landas ng paglaya

pagkat bubunutin na'y gintong tanikala

Kung Nabuhay Kami Para Magutom

KUNG NABUHAY KAMI PARA MAGUTOM

ni Gregorio V. Bituin Jr.

10 pantig bawat taludtod

kung ako ang batang nabuhay lamang

para magutom at mahirapan

bakit pa ako pa'y isinilang

sa mundong walang kinabukasan

matatanggap ko lamang ay mumo

habang sumisikip ang tiyan ko

sa gutom dahil di aasenso

sa ganitong sistema't gobyerno

mabuti pang ako na'y namatay

pagkasilang sa bukang-liwayway

kaysa magigisnan ko ang buhay

na bawat araw, isang tinapay

isinilang kaming walang plano

magkakapatid na labingtatlo

si itay ay kaybaba ng sweldo

labandera naman ang nanay ko

magulang ba namin ang may sala

kaya kami'y ganitong kawawa

anak kaming binabalewala

sa buhay, kami na ang bahala

tao nga kami, bakit ganito

laging gutom, utak ay tuliro

sa amin magpasensya na kayo

tinitiis kami ng gobyerno

latak na ng lipunan ang tingin

ng marami sa kagaya namin

kayhirap namang gutom tiisin

kaya nang-aagaw ng pagkain

sabi, humayo't magpakarami

kaya pagpasensyahan nyo kami

kung dumami kaming mamemeste

kami lang nama'y dumidiskarte

tao kami, ngunit nasa hukay

ang gutom maibsan lang ng tunay

kami nama'y sadyang maglulubay

buti't di namin kayo pinatay

Pagmumuni ng Makata

PAGMUMUNI NG MAKATA

ni Gregorio V. Bituin Jr.

18 pantig bawat taludtod

paano ba paglalaruin sa papel ang mga salita

paano ba binabalangkas ng tinta ang nais na wika

paano ba inuukit sa utak ang hangad na kataga

paano bang bawat sasabihin ng makata'y hinahanda

may naiisip ngunit minsan sa utak di ito makatas

kataga'y pilit mong pinipiga'y di man lang lumabas-labas

para bang nang-aasar, ang ulo mo'y tila nga binubutas

baka ang kailangan mo lang ay kape, magyosi sa labas

kailangan pa bang minsan sa kisame siya'y tumunganga

baka sakaling naroroon ang hinahanap na salita

paano ba niya mapapagtulong ang puso niya't diwa

upang malikha niya ang nag-iisang obra niyang tula

baka kailangan ng makata'y ang magpahingang sandali

baka sa panaginip makita ang salitang minimithi

at pag naalimpungatan, maisulat niya itong madali

pagkat pag nawala pa sa utak, baka ito'y ikasawi

Debate sa RH Bill

DEBATE SA RH BILL

ni Gregorio V. Bituin Jr.

8 pantig bawat taludtod

(Hinggil sa debate sa ABS-CBN noong May 8,

at sa GMA 7 sa May 22, 2011)

ang hangarin ng babae

ay magpasya sa sarili

makinig kayong mabuti

sa adhika nila't sabi

mga paring walang matris

bakit ninyo natitiis

ang babae'y iniinis

kayo din ba'y nagbubuntis

pakinggan ninyo ang sigaw

baka puso nyo'y matunaw

labing-isang nanay na raw

ang namatay bawat araw

dahil po sa kumplikasyon

ng pagbubuntis na iyon

RH Bill ipasa ngayon

baka ito'y makatulong

kalagayan ng babae

dadaanin sa debate

baka sakaling bumuti

ang lagay ng mga pobre?

“magparami kayo, bayan”

yaong turo ng simbahan

versus sa kababaihang

pagpapasya sa katawan

di ba kayo naaawa

labing-isang buhay nga nga

bawat araw ang nawala

di kayo mapagkalinga!

relihiyong mapang-api

ay dapat nang isantabi

aanhin pa ang debate

kung patay na ang babae

Ngiting Kaytamis

 NGITING KAYTAMIS

ni greg bituin jr.

7 pantig bawat taludtod

pagod ko'y naaalis

katawan ma'y kaynipis

ang ngiti nyang kaytamis

sa makata ba'y hapis

papuri ma'y kaybilis

puso'y humahagibis

hangarin ko'y malinis

kahit ako'y magtiis

pagtula'y di iimpis

basta't huwag maamis

makitang walang mintis

ang ngiti nyang kaytamis

- tulang alay sa dyosang si Ara Mina

Pairalin ang Kolektibong Pamumuno

PAIRALIN ANG KOLEKTIBONG PAMUMUNO

ni Gregorio V. Bituin Jr.

13 pantig bawat taludtod

pairalin ang kolektibong pamumuno

ito'y isang aral na dapat maituro

at isang estilong di nakapanlulumo

upang samahan ay masigla at di tuyo

walang Boss at walang kasamang nakayuko

sa pagpapairal nitong kolektibismo

pangunahin ay pakikipagkapwa-tao

at yaong bawat kasama'y nirerespeto

ginagamit ay di kaisipang supremo

pagkat napakababaw, di pangsosyalismo

bawat kolektibo'y laging kinukunsulta

at buong kolektibo yaong nagpapasya

di ibinababa lang ang nais ng isa

di alipin ang tingin sa mga kasama

pagkat sila'y may kaisipang sosyalista

ang kaisipang supremo'y dapat ibagsak

pagkat estilong ito'y talagang bulagsak

maraming kasama ang ipinahahamak

kaisipang supremo'y bugok, parang burak

makasarili't dapat ilibing sa lusak

ang kolektibong pamumuno'y sosyalista

dapat pairalin ng bawat aktibista

sama-samang nagpapasya't di kanya-kanya

kailangan sa pagbabago ng sistema

mahalaga't may paggalang sa bawat isa

Tubo ang Motibo ng Kapital

TUBO ANG MOTIBO NG KAPITAL

ni Gregorio V. Bituin Jr.

10 pantig bawat taludtod

bakit ba api ng mga amo

ang mga kapatid na obrero'y

aba'y kulang-kulang na ang sweldo

ay wala pa silang benepisyo

binabarat ang lakas-paggawa

hampaslupa ba ang manggagawa

pag sweldo'y tumaas, nanlulumo

itong kapitalistang hunyango

agad na silang natutuliro

apektado kasi iyang tubo

tubo ang motibo ng kapital

dito sila nagpapakahangal

pag itinaas daw yaong sweldo

presyo ng bilihi'y apektado

aba'y binobola nila tayo

akala yata, obrero'y bobo

tubo yaong may ugnay sa sweldo

at di yaong pagtaas ng presyo

dapat manggagawa'y magkaisa

dapat na silang maorganisa

labanan ang pagsasamantala

sa loob at labas ng pabrika

unti-unti tayong inuuk-ok

ng mapang-aping sistemang bulok

Sa ilang may Ph.D. [Pulos Hangin ang Dala]

SA ILANG MAY Ph.D. [Pulos Hangin ang Dala]

ni Gregorio V. Bituin Jr.

13 pantig bawat taludtod

kapuri-puri ang ilang naka-Ph.D. (pi-ech-di)

pinagpaguran nila ang kanilang degree

ngunit sa asal nila'y di ka mawiwili

marami sa kanila'y naging mapang-api

mga nag-doctor daw sila ng philosophy

kaya karapatan daw nilang magmalaki

ngunit karapatan din ba nilang mang-api?

at pasensya na yaong di makaintindi?

sa literatura, ang iba nga'y may degree

marami sa kanila'y Palanca awardee

pag tula mo'y pulitikal, walang masabi

kundi ibasura na't wala iyang silbi

sa eskwelahan, ang gurong mapagmalaki

ay boss na magaling ang tingin sa sarili

binabagsak ang masipag na estudyante

janitor binubulyawan, parang walang paki

sa pabrika, kapitalista'y mapang-api

makina ang turing sa manggagawang pobre

may Ph.D. (pi-ech-di) daw silang mga negosyante

kaya sila'y Boss, manggagawa'y tagasilbi

Pulos Hangin ang Dala nitong may Ph.D. (pi-ech-di)

ang turing na sa kapwa'y bobo't walang silbi

di raw nag-aral kaya di makaintindi

di raw nakapagtapos kaya naging pobre

pag kawawang maralita ang nakatabi

mandidiri na't itataboy, "tsupi, tsupi!"

iisnabin ang dukha't sisigawan ng "pwe!"

ang dukhang minata'y gusto tuloy gumanti

di naman nilalahat yaong may Ph.D. (pi-ech-di)

ngunit karamihan ay utak-negosyante

importanteng tao ang tingin sa sarili

pakikipagkapwa'y di na iniintindi

Mahirap Magbanal-banalan

MAHIRAP MAGBANAL-BANALAN

ni Gregorio V. Bituin Jr.

13 pantig bawat taludtod

tulad ko'y di ba maaaring maging banal

dahil marami rin akong pagkakasala

kinalaban ko ang may-ari ng kapital

dahil sa obrero'y di magbayad ng tama

kalaban ko ang kapitalistang pusakal

dahil inaapi ang mga manggagawa

doon sa pagawaang akala mo'y kural

sa init pagkat kahit bentilasyo'y wala

kung ganito ang nangyayari sa pabrika

ang tulad ko'y mahirap magbanal-banalan

sa gobyerno man ganito ang gawa nila

barat sa obrero't barat sa mamamayan

sa mga pangako, masa'y ginagayuma

ngunit pagtupad sa pangako'y bagsak naman

paano maging banal kung ganito sila

nasa isip na'y baguhin ang lipunan

di yata pwedeng maging banal ang tulad ko

gaya kong lumalaban sa mga tiwali

aktibistang naghahangad ng pagbabago

laban sa sistemang sadya ngang mapanghati

sistemang kumawawa sa dukha't obrero

sistemang amo'y ang pribadong pag-aari

na papalitan ng lipunang makatao

kung saan pag-aari'y tuluyang mapawi

Maganda ang bukas kung...

MAGANDA ANG BUKAS KUNG...
ni Gregorio V. Bituin Jr.
10 pantig bawat taludtod

maganda itong ating bukas
kung walang pulitikong hudas
kung gobyerno'y di balasubas
kung namuno'y di talipandas

maganda ang bukas ng tao
kung gobyerno'y nagseserbisyo
kung paglilingkod di negosyo
kung namumuno na'y obrero

ang bukas ay magandang halos
kung yaong masa'y natatalos
na pagbabago'y kayang malubos
kung kolektibong kumikilos

kung namumuno'y ang manggagawa
kung di na api ang maralita
kung may pagkain lahat ng dukha
kung lahat ng tao'y pinagpala

kung pantay-pantay ang kalagayan
kung wala nang mga kagutuman
kung di na danas ang karukhaan
kung nagkakaisa itong bayan

kung lahat ay nagpapakatao
at may pakikipagkapwa-tao
kung karapatan nirerespeto
kung dignidad ay taglay ng tao

maraming "kung" ang magandang bukas
ang mahalaga'y ating mawatas
anong tatahaking wastong landas
at panahon ay di na mawaldas

Mayo Unong Walang "Internasyunal'

MAYO UNONG WALANG 'INTERNASYUNAL'

(Mayo 1, 2011, Mendiola, Manila)

ni Gregorio V. Bituin Jr.

15 pantig bawat taludtod

taun-taon, ang Mayo Uno'y tinatapos natin

sa pag-awit ng Internasyunal, di binibitin

ngunit ngayong taon, di nakanta itong awitin

natapos ang rali nang ang misa'y natapos na rin

pinatugtog ang Internasyunal, biglang pinatay

sampung segundong pasakalye, akala ko'y tunay

babalik sana ako, ngunit agad nanlupaypay

ngayong taon lang, walang Internasyunal na alay

ngayon taon din lang, misa sa Mendiola'y dinaos

gayong wala tayong maaasahang manunubos

ang kaligtasan ng manggagawa'y nasa pagkilos

nasa internasyunalismong di dapat kinapos

nang dahil ba sa misa'y wala nang Internasyunal?

rali sa Mendiola ba'y tapusin na lang sa dasal?

may aasahan na bang Bathala ang nagpapagal?

Internasyunal na ba'y di dapat kaya tinanggal?

di na dapat maulit ang ganitong karanasan

ang manggagawa'y di na dapat muling maisahan

sa bawat Mayo Uno'y huwag nating kalimutan

ang Internasyunal para sa manggagawa't bayan

alipin ng gutom, bangon na sa pagkabusabos

pagkat sa atin ay walang sinumang magtutubos

ang Internasyunal ay awitin natin ng lubos

saanmang rali ng Mayo Uno tayo magtapos

Nasukol ng mga maka-Noynoy?

NASUKOL NG MGA MAKA-NOYNOY?
ni Gregorio V. Bituin Jr.
15 pantig bawat taludtod

mukhang naisahan ang militanteng manggagawa
sa mismong Daigdigang Araw ng Paggawa
imbes na magrebolusyon ay manampalataya
imbes talumpati'y misa ang sinubo sa madla

sa makasaysayang Mendiola pa nangyari ito
lumabnaw na ba ang paninindigan ng obrero?
wala na ba ang tinatanganan nilang prinsipyo?
o naisahan lang sila ng galamay ng trapo?

mapagpalayang prinsipyo ba'y di na tumatagos?
kaya aasahan na'y Bathala o manunubos?
mananampalataya na lang ba ang mga kapos?
o kaligtasan ng manggagawa'y nasa pagkilos?

tila nasukol ng maka-Noynoy ang manggagawa!
natatakot ba si Noynoy na siya'y matuligsa?
dahil sa isyu ng manggagawa'y walang magawa?
paglabnaw ng araw na ito'y kaninong pakana?

di ko minamasama ang isinagawang misa
ngunit dapat sa simbahan ito, di sa Mendiola
sa loob kaya ng simbahan tayo magprotesta
panawagan nati'y RH Bill na'y agad ipasa

tiyak nang hindi papayag dito ang kaparian
tiyak nang tayo'y agad nilang ipagtatabuyan
kaya huwag ibigay sa kanila ang lansangang

binahiran ng dugo ng mga martir ng bayan

ang Mendiola'y kasaysayan ng maraming protesta
ang simbahan ay para sa mga nais ng misa
di pa lubos kung simbahan nga'y kakampi ng masa
laki ng abuloy nila'y mula kapitalista

ganito pa rin ba kaya sa susunod na taon?
misa na lang sa Mayo Uno imbes rebolusyon?
dapat lamang balikan natin ang totoong layon
kung bakit may Mayo Uno sa kasaysayan ngayon

Huwag sayangin ang panahon

HUWAG SAYANGIN ANG PANAHON
ni Gregorio V. Bituin Jr.
15 pantig bawat taludtod

"Huwag mong sayangin ang panahun: ang yamang nawala'y mangyayaring magbalik; ngunit panahung nagdaan na'y di na muli pang magdadaan." ~ mula sa Kartilya ng Katipunan

ang bawat sandali'y dapat laging pahalagahan
magagawa ngayo'y huwag ipagpabukas na lang
mahirap kung lagi nating ipinagpapaliban
ang kayang magawa't matapos sa kasalukuyan

bumulong man ang hangin sa kanan man o kaliwa
may pakpak man ang balita't may tainga ang lupa
sa paggawa ng kabutiha'y huwag magsasawa
lalo't may panahong may kinakaharap na sigwa

may panahong mag-aatubili o magpapasya
di na magbabalik ang panahong kamusmusan pa
na maiisip lang pag kabataa'y naalaala
at sasabihing may iling, "Sayang, noon pa sana!"

huwag sayangin ang panahon, Kartilya'y nagbilin
na sa bawat puso't isip ay ating patagusin

Anuman ang kulay ng balat

ANUMAN ANG KULAY NG BALAT
ni Gregorio V. Bituin Jr.
15 pantig bawat taludtod

"Maitim man at maputi ang kulay ng balat, lahat ng tao'y magkakapantay: mangyayaring ang isa'y higtan sa dunong, sa yaman, sa ganda, ngunit di mahihigtan sa pagkatao." - mula sa Kartilya ng Katipunan

malalim, sadyang tumatagos sa kaibuturan
pag Kartilya ang Katipunan ay naunawaan
dinadalisay nito'y pagkatao't kalooban
na armas sa maraming tunggalian sa lipunan

ang pagpapakatao'y binibigyan ng halaga
pakikipagkapwa'y dapat tagos sa kaluluwa
maging mabuti sa kapwa'y isabuhay tuwina
upang pakikitungo'y magbubunga ng maganda

anuman ang kulay ng balat ng tao sa lupa
sila'y ating kapwa, kapwang dapat inaaruga
sapagkat may pagkatao ring tunay na dakila
dapat pantay at walang sinumang nagdaralita

taos-pusong sundin ang nilalaman ng Kartilya
igalang natin ang pagkatao ng bawat isa

Halik ng Truncheon

HALIK NG TRUNCHEON

ni Gregorio V. Bituin Jr.

11 pantig bawat taludtod

nakaharang muli ang mga truncheon

nitong parak sa mga raliyista

nilulunsad na raw yata'y rebelyon

gayong sila lang ay nagpoprotesta

mataas na ang presyo ng bilihin

gayong di naman tumaas ang sweldo

mahal na ang pamasahe't pagkain

kuryente, tubig, bahay at petrolyo

ikaw na lang ba'y tutunganga na lang

o sasama ka sa pagpoprotesta

trucheon, kanyon man ang nakahambalang

di tayo matatakot makibaka

ang pagrarali'y ating karapatan

kahit pa mukha nati'y magkadugo

o magkapasa ang ating katawan

kahit humalik ang truncheon sa bungo

karapatan natin ang magprotesta

kung walang ginagawa ang gobyerno

kundi lalong pahirapan ang masa

sistemang ito'y dapat nang mabago

Di Na Uso ang mga Supremo

DI NA USO ANG MGA SUPREMO

ni Gregorio V. Bituin Jr.

10 pantig bawat taludtod

i.

ang Supremo noon ay kinatay

ng mga kasama sa Kilusan

hinatulang ibaon sa hukay

kakampi'y tinuring na kalaban

ganyan ang kwento ni Bonifacio

nang makalaban si Aguinaldo

ii

di lang agawan sa pamumuno

marahil ang isyu nila noon

kundi ang ugali ng pinuno

na akala mo'y kung sinong maton

nangyari na iyon sa Tejeros

nang Supremo'y magwala ng lubos

iii.

kasamaha'y totoong nabigla

rebolber niya'y binubunot na

ganito pala ito magwala

buti na lang at naawat siya

siya'y pinagpasyahang ipiit

kasama pati kanyang kapatid

iv.

bago pa sumugod ang Kastila

ay dinala na sila sa labas

tinangka nilang maging malaya

ngunit sila'y agad na nautas

ang mga kapwa Katipunero

ang pumaslang mismo sa Supremo

v.

di na uso ang Supremo ngayon

baka maulit ang kasaysayan

pagkat nagbabago ang panahon

di tulad niya ang kailangan

dapat pamumuno'y kolektibo

at di diktadurya ng Supremo

* pinatay si Andres Bonifacio, kasama ang kapatid na si Procopio, noong Mayo 10, 1897 sa Bundok Buntis, Maragondon, Cavite

Di Tayo Isinilang Para Sumunod Lang

DI TAYO ISINILANG PARA SUMUNOD LANG

ni Gregorio V. Bituin Jr.

13 pantig bawat taludtod

di tayo isinilang para sumunod lang

o kaya'y para lang alipinin ninuman

bawat isa sa atin ay may karapatang

ituring na kapwa ng sinumang nilalang

kung sakaling isinilang tayong mahirap

huwag pumayag apihin ng mapagpanggap

magtulungan tayong abutin ang pangarap

na lipunang makatao sa hinaharap

dahil ba isinilang tayong maralita

karapatan na nilang apihin ang dukha?

ituturing pa nila tayong hampaslupa

tayo naman payag apihin ng kuhila

bawat isa'y may kalayaan nang isilang

di para maging alila't tagasunod lang

at kung nabuhay tayong iyan ang dahilan

buhay pala natin ay walang katuturan

di tayo alipin ninuman, tao tayo

kung alipin ang marami sa mundong ito

aba'y kumilos na tungo sa pagbabago

pagkat isinilang tayong malaya dito

kilalanin natin ang ating karapatan

kaya dapat lang matuto tayong lumaban

suriing mabuti ang ating kalagayan

matatantong di natin ito kapalaran

Patuloy ang Paglalayag

PATULOY ANG PAGLALAYAG

ni Gregorio V. Bituin Jr.

12 pantig bawat taludtod

patuloy pa rin ang aking paglalayag

kung saan-saan na ako naglagalag

upang hanapin kung sinong aking liyag

upang makilala ang magandang dilag

sino kaya itong aking pinangarap

sana'y makita ko na sa hinaharap

sa maraming taon nitong paghahanap

aking natagpuan siya't nakaharap

nakita ko siya't puso ko'y pumintig

pintig na kaylakas at dinig na dinig

sa magandang dilag agad napatitig

at naramdaman kong siya'y iniibig

sadyang kayganda ng kanyang mga ngiti

sa kanya nga'y tiyak di ako hihindi

pag nabigo ako'y maglalayag muli

doon sa kawalang walang pagkamuhi

Ang Magpapasya

ANG MAGPAPASYA

ni Gregorio V. Bituin Jr.

12 pantig bawat taludtod

sabi ko sa iyo, minamahal kita

at di ko sinabing mahalin mo ako

pagkat sa puntong 'yan, ikaw ang magpasya

ninais mo rin bang ako'y ibigin mo?

Isa Kang Palaisipan

ISA KANG PALAISIPAN

ni Gregorio V. Bituin Jr.

11 pantig bawat taludtod

sa akin, isa kang palaisipan

di ka naman gaanong kagandahan

di naman seksi ang iyong katawan

di perpekto ang iyong katauhan

ngunit inibig kita ng tuluyan

at tinanggap ko maging sino ka man

sa iyo, ako ba'y palaisipan?

kahit na di gaanong kagwapuhan

kahit na katawan ko'y katamtaman

kahit di perpekto ang katauhan

ako kaya'y iyong maiibigan?

at matanggap na maging kasintahan?

Sisikat Pa ang Araw Bukas

SISIKAT PA ANG ARAW BUKAS

ni Gregorio V. Bituin Jr.

9 pantig bawat taludtod

kung sa ulo mo'y bumubutas

ang mga problemang marahas

tandaang iya'y lumilipas

iyo din iyang malulutas

mag-iwan man ito ng bakas

sisikat pa ang araw bukas

Kung Paano Di Na Libakin

KUNG PAANO DI NA LIBAKIN

ni Gregorio V. Bituin Jr.

9 pantig bawat taludtod

ang tao raw na walang pilak

ay parang ibong walang pakpak

kaya madalas nililibak

at lagi na lang hinahamak

kung ituring parang di tao

api ang pakiramdam nito

parang tao'y laging may presyo

kaya dapat gawin ba'y ano

kaya nasa isipan niya

magtotodong trabaho siya

dahil pag siya'y nagkapera

di na hahamakin ng iba

pera lang pala ang katapat

nang di na apihin ng lahat

kahit ang trabaho'y kaybigat

basta kunwari bulsa'y bundat

Ang Nais ng Batang Lansangan

ANG NAIS NG BATANG LANSANGAN

ni Gregorio V. Bituin Jr.

8 pantig bawat taludtod

buhay ba'y lagi nang ganyan

sabi ng batang lansangan

"araw-araw kagutuman

pamana ba'y kahirapan

ano bang pamamaraan

upang aking maiwasan

ang danas na kasalatan

at akin namang matikman

ang nasang kaligayahan

nais ko namang gumaan

itong aking kalagayan

a, ako'y maninilbihan

at aking pagsisikapang

magkatrabahong tuluyan

kahit maging alipin man

ng kung sinong mayayaman

tatanggapin kaya naman

ang tulad kong dukha lamang

o ako'y paglalaruan

at pagtatawanan lamang

basta aking susubukan

na magkatrabaho naman

di nga ba't may kasabihan

pag aking pinagsikapan

meron ding kapupuntahan

kapag pinangatawanan

pangarap ko'y makakamtan

basta't hindi sapilitan"

Dyaryo at Dyarista

DYARYO AT DYARISTA

ni Gregorio V. Bituin Jr.

13 pantig bawat taludtod

doon natititik ang mga insidente

nakatala sa dyaryo'y isyu't pangyayari

balita sa sambayanan ba'y anong silbi

para ba mabatid kung sinong nanalbahe

para ba maiwasan yaong mga imbi

para ba mayroong maikwento't masabi

ang panitik ng dyarista'y di napipipi

balitang nasagap ay di sinasantabi

agad na susundan, sila'y dumidiskarte

sinusulat agad kahit anong mangyari

balita ang kanilang ipinagbibili

dito sila nabubuhay at nagsisilbi

Hampaslupa at Dakila

HAMPASLUPA AT DAKILA

ni Gregorio V. Bituin Jr.

Hampaslupa ba'y kilala ng mga dakila

Maari bang dakilain ang mga hampaslupa

Pagkahampaslupa ba'y pagkadakila

Dahil isinilang na walang-wala

Walang saplot nang isilang

Walang sariling tahanan

Walang karapatan

Kung wala siyang karapatan

Bakit siya dakila

O dahil walang karapatan

Kaya siya hampaslupa

O ang mga hampaslupa'y

Alipin ng dakila

Di Bayani ang Diktador

DI BAYANI ANG DIKTADOR

ni Gregorio V. Bituin Jr.

di bayani ang diktador

na nagbaba ng martial law

at siyang dahilan

ng kamatayan ng marami

ng pagkawala ng maraming buhay

ng pagdukot sa mga aktibistang

di pa nakikita hanggang ngayon

di bayani ang diktador

na sumira sa buhay ng marami

na bumaboy sa karapatang pantao

na nagwasak sa dignidad ng kapwa

na nangutang ng nangutang

hanggang sa di ito mabayaran

at ngayon, nais ng maraming kongresista

na gawing bayani ang diktador

sa anong mga dahilan

upang matapos na ang kaguluhan?

upang burahin ang kanyang kamalian?

upang tuluyang baguhin ang kasaysayan?

o mga kongresistang ito'y nabayaran?

bakit ihahanay ang diktador

sa pagkilala kina Rizal?

Bonifacio at Ninoy Aquino?

nasaan na ang kanilang talento?

nasaan na ang kanilang puso?

nasaan na ang kanilang budhi?

wala ba silang aral sa kasaysayan?

binabastos nila ang sambayanan

o nais nilang tayo ay pagtawanan

ng mga kalapit bansa sa silangan

ng mga kapitalistang bansa

ng mga dating pangulo ng bayan

o nais nilang tayo'y maging luhaan

dahil wala pa ring katarungan

dahil di pa makita ang mga desaparesidos

dahil buburahin ang gunita ng bayan

di dapat pumayag ang mga matitino

di dapat sumang-ayon ang sambayanan

di tayo dapat pumayag, mga kababayan

na bayani na pala

ang nangurakot sa kabangbayan

ang dahilan ng kamatayan ng marami

ang dahilan ng pagkawala ng marami

ang sumira sa buhay ng masa

ang bumaboy sa karapatang pantao

ang nagwasak sa dignidad ng kapwa

di bayani ang diktador

di bayani si Marcos