Pagsakol ng kanin

"mas nais kong sakulin ang kanin
kaysa naman ito'y kutsarahin"
anang isang matandang ubanin
habang sa labas nagpapahangin

dama ang dulot ng kalikasan
tingni ang tanim at kaparangan
magsasaka'y nagkakapatiran
sa paggapas ng palay, tulungan

ang pagsakol ng kanin ay damhin
at hanging amihan ay samyuin
bawat butil ay ating nguyain
at mumo'y huwag hayaan man din

damhin ang pintig ng magsasaka
at tiyak na iyong madarama
pulso ng buhay ay tangan nila
sila at ang bukid ay iisa

- gregbituinjr.

Ngayong Hunyo, dalawang tula sa Liwayway

Dalawang kaibigan sa pagtula
sa Liwayway ay muling nalathala.
Mabuhay kayo, mga kamakata
sa inyong marurubdob na pagkatha!

- gregbituinjr.

Usapan ng maya at ng agila

ang bulong ng maya sa agilang pilantod:
bakit naman kaybaba niring sinasahod
kailangan ba naming sa iyo'y lumuhod
araw-gabi nga kami'y iyong pinapagod

aba'y sigaw agad ng agilang sukaban:
kontraktwal kasi kayo't walang karapatan
iyang amo ninyo'y kontraktor na gahaman
kaya gutom ng pamilya nyo'y pagtiisan

hilakbot ang maya sa tugon ng agila:
di ka pala agila kundi buwitre ka
na kaysaya sa pinaghirapan ng iba
kayong maypagawa'y sa iba ipinasa

agila'y sinigawan ang mayang tulala:
kami ang may-ari, wala kang magagawa
ari mo lang ay ang iyong lakas-paggawa
pagpaumanhi't isinilang kang kawawa

masama man ang loob, ang maya'y tumugon:
alam mo, di ka nariyan habang panahon
balang araw, kami rin ay makakaahon
lalo't nagkaisa kaming magrebolusyon

- gregbituinjr.

Siyang Tunay, Kamahalan

SIYANG TUNAY, KAMAHALAN

sadya ngang tunay ang pagmamahal
oo, tunay ngang may nagmamahal
pagmamahal sa puso'y nagwarat
nagmamahal na di madalumat

nagmahal ang presyo ng bilihin
pati pamasahe'y nagtaas din
dagdag sa baon, saan kukunin
kung sa munting sahod ay gipit din

kamahalan, anong 'yong pananaw
iyang puhunan ba'y sadyang bakaw
sa manggagawang gutom at uhaw
baka sa kamahalan, papanaw

karapatan ba'y nabubusalan
kaya di makaangal ang bayan
kaymahal ng pangangailangan
oo, siyang tunay, kamahalan

- gregbituinjr.

Sa Lungsod ng Putik

maganda pa rin ba ang lungsod na puno ng putik
na ang kalsada'y lubog agad sa ulang tikatik
lungsod ng kaunlarang sa pag-asa sana'y hitik
ngunit sagana sa dukhang sa gutom humihibik

nasaan na ang pag-asang inaasam ng dukha
mula sa gobyernong animo'y pugad ng kuhila
bakit ang pamahalaan ay nagiging pabaya
hinahayaang mamamayan niya'y hampaslupa

sa danas na kaunlaran, lungsod daw ang gulugod
upang ipakitang ang bansa'y maunlad, malugod
kaya pala maraming bahay kaytaas ng bakod
kaya pala mga obrero'y kaybaba ng sahod

gusali'y nagtatayugan, dukha'y walang matirhan
bawat isa'y nagkanya-kanya bunsod ng puhunan
mundo'y pinaiikot lang sa palad ng iilan
nasa may salapi lamang ba iyang kaunlaran?

- gregbituinjr.

Tungkulin ng propagandista

sumisikdo ang dibdib, utak at dugo'y tumigis
puso'y nalulumpo ngunit umaarteng kaybangis
sa harap ng iba, kabiguan ay nililihis
propagandista pa rin kahit labis ang pagtangis

kahit sariling buhay ng propagandista'y lugmok
luha'y nilalagok at kasawia'y nilulunok
sa tungkuling magpropaganda pa rin nakatutok
upang moral ng masa'y iangat hanggang sa tuktok

kaytalim ng mga katagang kapara ay lintik
kalabang kaytalino'y nilalampaso sa putik
sa bawat sulok, propaganda niya'y natititik
sa diwa't kalooban ng kapwa'y isinisiksik

propagandista'y di dapat makitang isang sawi
kahit na buong buhay niya'y pawang luha't hapdi

- gregbituinjr.

Dinadaan na lang sa tula ang buhay na hungkag

dinadaan na lang sa tula ang buhay na hungkag
pumapalaot sa talampas ng isang lagalag
patuloy ang laban, ayaw maging kahabag-habag
niyayapos pa rin yaong prinsipyong di matibag

lakad ay kilo-kilometro't walang pamasahe
matikas kahit pagod sa harap ng binibini
kahit walang salapi'y ayaw magmukhang pulubi
habang mumunting mumo't latak ay isinusubi

pinanday ng karanasan ang iwing kalooban
kaya nahaharap anumang pagsubok pa iyan
nalalakad kahit na kasukalan ng kawalan
nang makitang matatag sa harap ng kabiguan

kahit na iwing puso'y patuloy na nananangis
malunod man sa luha'y matikas pa rin ang bihis

- gregbituinjr.

Balangis

kaytinding sandata ng mandirigma ang balangis
dalawang patpat na matigas na kapara'y arnis
pag si Sanggre Danaya ang gumamit anong bilis
pananggol laban sa mga kaaway na kaybangis

sintigas yaon ng kahoy na naga o kamagong
pag tinamaan ang ulo'y puputok, balagoong
maaaring pag-isahin pag ito'y pinagdugtong
mapapabagsak sa iglap sinumang dumaluhong

balangis ay ariing asawa o kaibigan
kakampi, kasama, sa pagtulog man o digmaan
hindi ka matitinag ng kalaban mong sukaban
kapag balangis ay kinasanayan mong tanganan

balangis ay sagisag ng mandirigma ng lahi
pag-ibig, katapatan, tagapagtanggol ng puri
uuwing luhaan sinumang makakatunggali
kung sa pagtangan ng balangis nagsasanay lagi

- gregbituinjr.

Tula sa unli-rice

UNLI-RICE

mula nang pangalanang Philippine rise ang Benham rise
saka napabalitang bawal na raw ang unli-rice

malalim ang dagat, puno ng biyodibersidad
masama raw sa kalusugan kung sa kanin mabundat

ngunit yung maypakana ng panukalang iyon
ay may alam bakit bukid ay naging subdibisyon

wala nang mabungkal, wala nang matamnan ng palay
tapos unli-rice pa'y ipagbabawal nilang tunay

hay buhay, tinamaan ba tayo ng mga lintik
masa'y tinatamaan di pa ba tayo iimik

lupa ng magsasaka na nga'y kinuhang tuluyan
pati ba naman sa unli-rice tayo'y babawalan

- gregbituinjr.

Tumbang Preso

TUMBANG PRESO

tinumba na nila bago pa maging preso
tinokbang na nila kahit walang proseso
wala nang magawa, sila na'y binabraso
tila manok ang pinaslang, ito ang uso

di na lata ang kanilang inaasinta
kundi ulo na ang kanilang pinuntirya
dati't tsinelas lang, ngayon ay pulos bala
dahil talagang salot daw pag durugista

kumakalam ang tiyan, bato'y dudurugin
durog na durog hanggang ito na'y singhutin
wala nang katinuan, ang isip na'y praning
mag-ingat baka gahasain ka't patayin

noong bata pa, tumbang preso'y laro lamang
sinasapul ang lata doon sa may bambang
ngayon, bago pa maging preso'y pinapaslang
para raw maging payapa ang bayang hirang

may proseso ang batas pag nagkasala ka
dapat kang managot, dapat ay may hustisya
sa piitan dapat matantong magbago na
mabuti nang maging preso kaysa itumba

- gregbituinjr.

Isa man akong animal

isa man akong animal, ay, oo, isang hayop
marunong din akong tumanaw ng utang na loob
lalo na sa tulad nilang sa akin ay kumupkop
sa panahong ako'y nasa dusa at nagdarahop

- gregbituinjr.

Hunyo 12, 1898 - Deklarasyon lang ng kalayaan?

araw ng kalayaan daw dahil bansa'y lumaya
mula sa pagsiil ng mananakop na Kastila
ngunit napailalim sa Amerikang kuhila
naging malaya na nga ba ang tinubuang lupa?

hindi, pagkat nagpalit lang ng bagong panginoon
mula Espanya'y naging Amerika naman iyon
bansa'y binili ng dolyar na dalawampung milyon
iyan ba, iyan ba, ang paglaya nilang nilayon?

nagpalit lang ng panginoon, naging malaya na?
tuwang-tuwa sila't tinanggap nila'y "demokrasya"
kaya marami pa rin ang totoong nakibaka
pagkat bagong poon ang namahala sa kanila

nagdeklara ng paglaya'y isang pangulong sutil
may alam sa Supremo't Heneral Luna'y pagkitil
tinamong “laya” ng bayan ay patuloy na sikil
na tila minana ng mga pulitikong taksil

araw lang iyon ng deklarasyon ng kalayaan
deklarasyon lang kahit di pa lumaya ang bayan
kaydilim pa rin ng kalagayan ng sambayanan
milyon pa rin ay dukha't walang pagkain sa pinggan

- gregbituinjr.
12 Hunyo 2017

Panahon ng ligalig noon at ngayon

noon, panahon ni Makoy, panahon ng ligalig

yurak ang karapatan, laksa'y nawalan ng tinig

lagim ng diktadura'y kayrami nang pinag-usig

maraming nangawala, pinaslang, laya'y nilupig

ngayon, panahon ng ligalig ay muling naulit

bagong namumuno'y diktador palang anong lupit

kayraming mahihirap ang pinaslang, iniligpit

ang bagong lider animo'y nawalan na ng bait

sa pagbabalik ngayon ng panibagong ligalig

ang sambayanan ay dapat muling magkapitbisig

upang tiranya'y labanan hanggang ito'y malupig;

sa prinsipyo, dangal at paglaya tayo sasandig

huwag tayong manghina, patuloy tayong lumaban

ang bayan nating ito'y iligtas sa kasawian

- gregbituinjr.

* ang tulang ito na may 15 pantig bawat taludtod, ay nilikha at binasa sa harap ng mga dumalo sa aktibidad ng People's Campaign Against Tyranny (PCAT) sa Bantayog ng mga Bayani, Hunyo 10, 2017

* maraming salamat sa PCAT sa pagbibigay ng pagkakataon upang makapag-alay ng tula sa nasabing aktibidad

Buwan, buwan, huwag mo silang hulugan ng sundang

buwan, buwan, huwag mo silang hulugan ng sundang
at baka gamitin nila iyon upang manokbang
nagkalat na ang mga dugo sa sabana't ilang
kayrami nang inulila ng patakarang hibang
laksa-laksa’y tinokbang, di na mahapayang gatang

buwan, buwan, huwag mo silang hulugan ng sundang
kung buhay ng tao'y di na nila iginagalang
dapat mag-ingat baka berdugo na'y nakaabang
sa mga nakikibaka para sa karapatang
pantao na dapat lamang nating ipagsanggalang

- gregbituinjr.

Sisisirin ko ang laot

sisisirin ko ang laot upang makita lamang
ang sirenang nagpapahirap sa puso kong hibang
ngunit maraming siyokoy ang doon nakaabang
na pag dumating ako'y kanila nang mapapaslang

nais kong makita ang sirena kong minumutya
na dumadalawa sa panaginip ko't tila sumpa
kung siya ang aking palad, nais ko nang mawala
manirahan kasama niya't iwan na ang lupa

ngunit ako'y manunulat na kakampi ng bayan
na may prinsipyong taglay at tungkuling gagampanan
kaya bakit ko iiwan ang aking sinumpaan
kung kapalit nito'y ang puso kong nahihirapan

pagbabago ng lipunan o pangarap na sinta
minumutyang kaylayo o babaeng aktibista
sirena sa panaginip o isang amasona
kayhirap pang pumili, masa'y paglingkuran muna

- gregnituinjr.

Maligayang kaarawan, O, Klasmeyt Fides

nais kong humabol ng taos na pagbati
maligayang kaarawan sa iyong muli
tulang alay nawa'y salubungin ng ngiti
at anumang pagod ay agad mapapawi

may unos man at walang mga alitaptap
sa panahong munti-munti man ang paglingap
nawa'y kamtin mo ang mga pinapangarap
at kaginhawahan nawa'y iyong malasap

tahak ko ma'y maputik na pampang o libis
bakong talampas o matarik mang dalisdis
diwata kang binabati kong anong tamis
maligayang kaarawan, o, klasmeyt Fides

- gregbituinjr.

Manggagawa, sino ka?

MANGGAGAWA, SINO KA?

manggagawa, kayo ang bumubuhay sa lipunan
mula noon hanggang ngayon, magpakailanpaman
kayo ang bumubuhay sa ekonomya ng bansa
ngunit bakit kayo pa ang mahirap at kawawa
sa inyong butil ng pawis kaya mundo'y umiral
laging kayod-kalabaw sa lipunan ng kapital
suriin ang sarili, kayo'y makapangyarihan
na kayang maglugmok sa katusuhan ng puhunan
bawat kayod, lipunan at pamilya'y binubuhay
sa inyong manggagawa, taas-kamaong pagpupugay

- gregbituinjr.
(nilikha at binasa sa aktibidad ng Bantayog Initiative sa TriMoNa, Lungsod Quezon, Mayo 20, 2017, ang pamagat ay mula sa tema ng aktibidad)

Si Lean at ang Pulitika ng Sinigang

SI LEAN AT ANG PULITIKA NG SINIGANG
ni Gregorio V. Bituin Jr.
15 pantig bawat taludtod

"Apart from that, he tried to explain to us – his dormitory roommates – the politics of sinigang, positing with confidence that he knew the cuisine’s history and why Pinoys loved it. He said it had something to do with the sinigang being “a complete meal.” The veggies and the meat were there, mixed well with spices and the tamarind fruit via a slow boiling of these ingredients, and ramping up the taste further with patis ng (fish sauce of) Malabon." ~ from Patricio N. Abinales' article "Lean Alejandro's tsinelas revolution"

saanman, lagi siyang nakikipagtalakayan
hinggil sa samutsaring paksa sa ating lipunan
at kasama sa dormitoryo'y pinaliwanagan
na sa sinigang man, may pulitikang malalaman

inihahanda ang sangkap tulad sa rebolusyon
ihanda ang kawali o paglulutuan niyon
hiwain ang kamatis, gulay, kung nais, may hipon
o kaya'y bangus o baboy at pakuluan iyon

maraming paraan ng pagluluto ng sinigang
depende sa diskarte mo kung nais ay maanghang
o tama ang asim, sa pagluluto'y malilibang
tila isang bagong lipunan na ang nililinang

hahaluan pa ng sampalok habang kumukulo
lagyan ng patis, timplahing wasto ang niluluto
tulad din ng pagbabagong nasa'y pinapakulo
upang isang bagong lipunan ang ating mahango

Nilulumpo ng sukaban

karapatan nga'y nilulumpo ng sukaban
nais pang ulo natin ay kanyang pugutan
sukab na walang paggalang sa karapatan
buhay ng dukha'y tila ipis kung turingan
yapak ba ni Hitler ang kanyang sinusundan

nuong bata ba'y wala sa kanyang gumiliw
kaya patayan sa kanya'y isa lang aliw
mga dukha'y pinapaslang na parang sisiw
pagkamuhi sa dukha'y ano't di magmaliw
o siya'y isinilang na talagang baliw

- gregbituinjr.

Pagmamasid sa piitan

PAGMAMASID SA PIITAN

ni Gregorio V. Bituin Jr.

13 pantig bawat taludtod

“When I saw all those people, I couldn’t help reminding myself that indeed, it is the people themselves, bound together by a common cause and caught up in common struggle, who make history. I thought then that no matter what happens, the people have stood up at a very critical juncture in our history. Nothing can take that away from them, whether politically or morally,” Lean said. 

~ mula sa artikulong "The Quintessential Life of Lean Alejandro (1960–1987)"

habang nasa piitan ng Fort Bonifacio

patuloy ang pagdagsa ng maraming tao

ipinagtatanggol ang kanilang idolo

sa mga nakikibaka'y sumasaludo

maaaninag ang tala sa gabi't araw

na tila medalyong sa dibdib nakasingkaw

ang mga tagasuporta'y nagsisidalaw

upang idolo'y di magutom o mauhaw

nagkakaunawaan sa isang layunin

nagkakaisa sila sa isang mithiin

habang sa dibdib ay yakap ang simulain

at handang ipagtagumpay ang adhikain

masa nga ang tagalikha ng kasaysayan

na pinagsugpong ng layuning kalayaan

tumitindig, nakatindig, naninindigan

upang itayo ang makataong lipunan

X.D.I.

X.D.I.

Ang pangarap na buhay nawa'y may magandang bunga
Para sa samahang patuloy na nagkakaisa
Adhikain ay parang SELDA ngunit walang selda
Habang patuloy na nagtutulungan bawat isa

Nagkaisa mga dating bilanggong pulitikal
Na magpatuloy mabuhay, may gawaing marangal
Lipunan ma'y pinangingibabawan ng kapital
Isang lipunang makatao yaong inuusal

X.D.I. - ang mga kasama'y nagtutulong-tulong
Upang buhay na nadapa'y tuluyang makabangon
Samahang tinayo'y patuloy na pinauusbong
Upang bawat kasapi'y patuloy yaong pagsulong

Isang taas-noo't taas-kamaong pagpupugay
Sa inyo, mga kasapi ng X.D.I., mabuhay!

- gregbituinjr.
- nilikha sa pulong ng X.D.I. (Ex-Political Detainees Initiative) sa tanggapan ng Balay habang katalamitam ang mga estudyante mula sa Unibersidad ng Pilipinas College of Social Work, Mayo 6, 2017

Kayod-kalabaw na kontraktwal

naroong namimitig ang kanyang mga kalamnan
pawisan, kayod-kalabaw, sa trabaho'y puspusan
tulad ba niya'y makinang pinakikinabangan
kaybabang sahod, laksa ang tinubo ng puhunan
bakit matapos ang limang buwan, siya'y luhaan
ineendo't sa trabaho'y may bagong kapalitan
di maregular, trabaho'y walang kasiguruhan
bangungot nga bang maging kontraktwal sa pagawaan?
- tula't litrato ni gregbituinjr.

Huli kitang nakatitig

Huli kitang nakatitig
Ikaw na kaibig-ibig
Nais kitang makaniig
At maikulong sa bisig

Puso ko'y napapapikit
Pagkat mutya kang kayrikit
Habang tayo'y magkalapit
Kunin natin bawat saglit

- gregbituinjr.

Bayan ang lumilikha ng kasaysayan

BAYAN ANG LUMILIKHA NG KASAYSAYAN
ni Gregorio V. Bituin Jr.
15 pantig bawat taludtod

His fight continued when they were released two months after. In 1986, he was able to lead 10,000 to Mendiola before Marcos’ escape. This rally was memorable for him because he thought it was his end. The loyalists’ soldiers fired guns at them, yet fortunately, no one died.

“When I saw all those people, I couldn’t help reminding myself that indeed, it is the people themselves, bound together by a common cause and caught up in common struggle, who make history. I thought then that no matter what happens, the people have stood up at a very critical juncture in our history. Nothing can take that away from them, whether politically or morally." ~ Lean Alejandro

dalawang buwang napiit, sadyang kalunos-lunos
ang kalagayan ng bayan lalo ang dukhang kapos
lumaya sina Lean at ilang buwan matapos
ay pinatalsik ng bayan ang diktador na Marcos

sampung libong katao'y pinangunahan ni Lean
Mendiola'y niralihan ng galit na taumbayan
akala ni Lean, iyon na'y kanyang katapusan
sundalo'y nagpaputok, buti't walang tumimbuwang

nang libu-libong masang nagmartsa'y kanyang nakita
napagtanto niyang tunay ngang sa pagkakaisa
ang taumbayan nga ang lumilikha ng historya
ang kumakatha ng kasaysayan mismo'y ang masa

kaya anuman ang mangyari'y nagkakapitbisig
ang mamamayang kapwa sa hustisya pumapanig
sa sistemang bulok at tiwali'y di padadaig
hustisyang panlipunan pa rin ang dapat manaig

29 Abril 2017

Ang LOTR at ang TGLR

ANG LOTR AT ANG TGLR
ni Gregorio V. Bituin Jr.
15 pantig bawat taludtod

nais kong itulad ang bagay sa isa pa, minsan,
halimbawa'y ang Lord of the Rings sa The Great Lean Run
na sa biglang tingin natin ay magkaiba naman
ngunit pareho palang may kaugnayan kay Lean
para bagang pinagtiyap ang kwento't kasaysayan

ang una'y kwento ng digmaan at kapangyarihan
bakit dapat madurog ang singsing ng kasamaan
ang ikalawa naman ay di lamang simpleng takbuhan
kundi paggunita sa naganap sa nakaraan
at paghahanda sa kasalukuyang tunggalian

kapwa pagtatanggol ng api ang tuon ng isip
dignidad at panlipunang hustisya'y nalilirip
nasa diwa na buhay ng kapwa nila'y masagip
na halos ikamatay sa panganib na gahanip
minsan, mga bagay na ganito'y kahalukipkip

- 27 Abril 2017

* Lean - ito ay si Lean Alejandro (Hulyo 10, 1960-Setyembre 19, 1987)

Di pa matitiklop ang aklat ng buhay ni Lean

DI PA MATITIKLOP NA AKLAT ANG BUHAY NI LEAN
ni Gregorio V. Bituin Jr.
15 pantig bawat taludtod

di pa matitiklop na aklat ang buhay ni Lean
nakabuklat itong lagi para sa sambayanan
upang hanguan ng aral ng mga nakaraan
upang hanapin ang pag-asa sa kinabukasan

kailangan ng masa'y inspirasyon at kakampi
lalo't sila'y sa kawalang-katarungan sakbibi
at ang buhay ni Lean ay may aral na may silbi
sa lahat ng nakikibaka sa araw at gabi

sa aklat ng buhay ni Lean ating mabubuklat
ang diwa't pilosopiya ng isang taong mulat
dapat makipagkapwa tao sa kapwa't kabalat
ang ipagtanggol ang api't dukha'y karapat-dapat

di pa maititiklop ang aklat ng kanyang buhay
hangga't maraming api't pagkatao'y niluluray
ng sistemang bulok; si Lean na napakahusay
ay lalaging inspirasyon ng sambayanang tunay

* Lean - ito ay si Lean Alejandro (Hulyo 10, 1960-Setyembre 19, 1987)

Nay Lilia Nacario, Lider-Maralita

NAY LILIA NACARIO, LIDER-MARALITA
(9 Nobyembre 1946 - 19 Abril 2017)

siya'y nanay-nanayan namin sa kilusan
lider-maralita, matatag at palaban
sa pakikibaka'y maraming karanasan
sa kanya'y kayrami naming napag-aralan

ipinaglaban ang makataong pabahay
naging tagapayo, dalita'y kaagapay
karapatan ng dukha'y pinaglabang tunay
sa maraming maralita'y nagsilbing nanay

ang Samahan ng Walang Tahanan - SAWATA
ay sadyang pinamunuan ng buong sigla
mabuting pinunong aming tinitingala
ipinaglaban ang kapakanan ng dukha

mabuhay ka, Nay Lilia, di ka malilimot
pagkat nakibaka ng walang pag-iimbot
maraming salamat, di mo ipinagdamot
sa kapwa dukha ang payo mo, saya't lungkot

mabuhay ka! mabuhay! Nay Lilia Nacario
sa iyong pamumuno kami'y taas-noo
sa puso'y taglay namin ang alaala mo
kami po'y nagpupugay ng taas-kamao

- gregbituinjr.
- nilikha at tinula sa luksang parangal sa bahay ng namayapang Nay Lilia Nacario sa SAWATA sa Lungsod ng Kalookan, Abril 25, 2017

Pinoy tayo

PINOY TAYO
ni Greg Bituin Jr.
11 pantig bawat taludtod

Pinoy tayo, may sariling kultura
mula sa ninuno'y ating minana
dumanas man ng sigwa't pagdurusa
Pinoy pag sama-sama, may pag-asa

subalit dapat maging positibo
yaong kaugaliang negatibo
di ningas-kugon kundi ningas-bao
ang plano'y tinatapos ng pulido

kinaugaliang mañana habit
ang katapat nito'y handa na habit
ginagawa ang kayang gawin ngayon
di bukas kung matatapos maghapon

ant mentality, di crab mentality
sama-sama tayong nagpupursigi
huwag maghihilahan ng pababa
kundi magtulong-tulong sa adhika

Pinoy ay di laging huli sa oras
kundi maaga sa maraming antas
mahirap na magsasaka'y kaysipag
nasa bukid na bago magliwanag

mga negatibong kaugalian
ay marapat lang na ating palitan
na kung atin lamang pagsisikapan
ay malaking tulong sa sambayanan

25 Abril 2017
nilikha sa aktibidad ng Bantayog Initiative sa TriMoNa, Lungsod Quezon

Kay-ilap na pagsinta

may mga gabing tigib sa pagluha
uhaw sa pagsinta ng minumutya
biglang babalikwas, matutulala
kirot na dama'y di pa nawawala

sadyang kayhirap kapiling ang lumbay
tila buong katawan ko'y nangingimay
ngunit may kung anong nais lumuray
sa aking pagkataong nananamlay

ano't sa nangyari'y di makasulong
tila mangga'y nawalan ng bagoong
ang kuwago na ba'y nagmamarunong
kaya ako'y inahas ng ulupong?

nagwala ang kay-ilap na pagsinta
habang pisngi ng mutya'y pulang-pula

- gregbituinjr.

Hampas ng alon

humahampas ang alon sa dalampasigan
tila humahaplos sa buo kong katawan
humahaginit sa balat yaong amihan
na dulot sa puso't diwa'y kapayapaan

- gregbituinjr.