Hinubog nina Bonifacio't Lenin itong diwa

Hinubog nina Bonifacio't Lenin itong diwa
Pag-ibig sa sangkatauhan at sa manggagawa
Kaya sa pagpapakatao'y hindi nagpapabaya
Nagpapatuloy sa pagkilos, pakikipagkapwa

Kartilya'y isinasabuhay tungong pagbabago
Panlipunang hustisya at karapatang pantao
Patuloy na pag-organisa sa uring obrero
Pagtaguyod sa diktadura ng proletaryado

Ang pagsasamantala sa kapwa'y ating bakahin
Tulad ng ginawa ng ating Gat Andres at Lenin
Magsikhay para sa proletaryadong simulain
Upang lipunan ng uring manggagawa'y likhain

- gregbituinjr.

 

Pagpupugay sa mga taga-Marinduque State College

animnalibong estudyante at pakuldad
ay nagkaisang maglinis ng tabing-dagat
Marinduque State College, nagsamang lahat
upang kalikasan ay malinisang sukat

aba'y oo, bawat tao'y may karapatan
sa maayos at malusog na kalikasan
kaygandang ulat, tunay itong kagalakan
inspirasyon kayo sa mga bayan-bayan

humayo't magkaisa, huwag manahimik
naging karanasan ninyo'y kahindik-hindik
pagkat Marcopper sa inyo'y nagpatiwarik
tahanan, bukid, naging minahang maputik

ang isinagawa ninyo'y makabuluhan
para sa hinaharap at kasalukuyan
ang Coastal Clean Up sa mga dalampasigan
at Unity Eco-Walk sa apat na bayan

ang halimbawa nyo'y dapat tularang tunay
nang kalikasan ay gumanda na ang lagay
kaya Marinduque State College, mabuhay!
sa inyo'y taospuso kaming nagpupugay!

- gregbituinjr.

(Ayon sa ulat ng Abante Tonite, Abril 22, 2018, pahina 2, aabot sa 6,000 mag-aaral, empleyado at mga guro ng Marinduque State College ang lumahok sa isinagawang Unity Eco-walk at Coastal Clean Up sa apat na bayan ng lalawigan ng Marinduque noong Abril 20, 2018, Biyernes ng umaga, at nilinis ang mga baybayin sa Bayan ng Boac.)

Pulang sambalilo'y suot ng magsing-irog

pulang sambalilo'y suot ng magsing-irog
may mensaheng sa isa't isa'y anong tayog
pangarap na bukas sa pag-ibig nahulog
tila baga dama ang saya, gigil, libog
sa bawat isa, kanilang sarili'y handog

- gregbituinjr.

Huwag mong isuko sa kapalaran ang buhay mo

isinuko na nila sa kapalaran ang lahat
tila wala nang agham sa kanilang pagkamulat
balisa sa sariling anino't mata'y mulagat
di mabatid saan nanggaling ang malaking sugat

bakit di nakita't lumubog sila sa kumunoy
mga anak habang maaga'y turuang lumangoy
ngunit mga itinanim ay bakit nanguluntoy
dahil sa kapabayaan ba'y magiging palaboy

kapalaran ba ng tulad mo ang maging mahirap
o sistema ang siyang dahilan ng dusang lasap
bakit kayrami pa ring naloloko't nagpapanggap
sa isang lipunang naglipana ang mga kurap

huwag mong isuko sa kapalaran ang buhay mo
di tadhana ang dahilan ng palad kundi tao
kaya kung kikilos lang tayo'y ating matatamo
ang ginhawang ninanasa't hangad na pagbabago

- gregbituinjr.

13 anyos, namatay sa tuli

13-ANYOS, NAMATAY SA TULI

(Ayon sa ulat, namatay matapos magpatuli ang isang binatilyo sa loob ng Histopathology Laboratory ng isang ospital sa Lungsod ng Roxas sa Capiz. Huli na umano nang malaman ng mga kaanak ng biktima na hindi doktor ang nagtuli sa binatilyo. - mula sa pahayagang Bulgar, Abril 20, 2018, p. 2)

kahindik-hindik na namatay lang siya sa tuli
dahil nagtuli umano'y isang doktor na peke
sa mga kaanak, pagkamatay niya'y kayhapdi
kaya katarungan para sa binatilyo'y hingi

nais lang niya'y salubungin ang pagbibinata
sa pamamagitan ng tuli siya'y maging handa
sa pagharap sa mundong puno ng hirap at luha
ngunit pangarap at buhay niya'y agad nawala

di na ba nahabag sa binatilyo yaong suspek
upang sa tumataginting na barya'y humagikhik
pekeng doktor, pekeng tuli, buhay ay tumiwarik
dapat lang tuluyang dakpin iyang huwad na lintik

- gregbituinjr.

Ang mamatay ng tulad kay Archimedes

mas nais kong mamatay tulad ng kay Archimedes
habang sa suliranin sa aldyebra'y nakatanghod
kawal ng kalaban ang sa dugo n'ya'y nagpatigis
espada’y tinarak habang siya’y nakatalikod

- gregbituinjr.

Pag aking naulinig

Pag aking naulinig
Ang puso kong pumintig
Gawin kung anong hilig
Isiping di malupig
Bukluran, kapit-bisig
Igibin ang pag-ibig
Gusto kitang kasandig

- gregbituinjr.

Sa pagtahak sa landas ng pag-ibig na wagas

sa pagtahak sa landas
ng pag-ibig na wagas
dapat laging may bigas
at masarap na prutas

naghahanda sa bukas
na maganda't parehas
problema'y nalulutas
kung bawat isa'y patas

- gregbituinjr.

Sa lungsod man o liblib

sa lungsod man o liblib
sa laot man o yungib
kumunoy o talahib
may halik na sibasib

labi ko'y iyong hagkan
mahal kong kasintahan
ang noo kong pawisan
iyo namang punasan

pawisan mang tulad ko
marunong mag-araro
kakayod hanggang dulo
para lamang sa iyo

siilin mo ng halik
akong humahagikhik
kapara ko ma'y lintik
di ako titiwarik

- gregbituinjr.

Nang dahil sa pagsinta

nang dahil sa pagsinta
bibiling sa higaan
kaysarap ng kutsinta
kaninang umagahan

kaygandang panaginip
nang dahil sa pagsinta
irog ang nasa isip
minumutyang kaysaya

ipaglaban ang masa
pagsilbihan ang bayan
nang dahil sa pagsinta
sistema'y papalitan

nasa diwa ang mutya
natatangi't kasama
sa saya man o luha
nang dahil sa pagsinta

- gregbituinjr.

Ating pagsaluhan ang wagas na pag-ibig

Ating pagsaluhan ang wagas na pag-ibig
Kasalo kita sa ating bawat pagniig
O, sinta, sa hirap man ay di padadaig
Yapusin mo ako't kulungin na sa bisig

Waring ikaw ang diwata ng silanganan
Ako nama'y maglulupa sa araruhan
Langit at lupa man ang kapara't pagitan
Alapaap din ay ating masusulingan

Na rosas ka mang matinik ay natatangi
Gipit man ako'y magsisikap akong lagi
Kahit mahirapan, pagsinta'y maghahari
Ikaw lang ang nasa puso't walang kahati

Buuin nati'y isang magandang pamilya
Oo, mahal ko, magsikap nang di magdusa.

- gregbituinjr.

Magiging anak na ating pinapangarap

Magiging anak na ating pinapangarap
Anak na mapagmahal at di naghihirap
Habang kita'y patuloy pa ring magsisikap
At magandang bukas yaong hinahagilap
Lagi kitang maghahanda para sa bukas
Kahit tayo'y kapwa napapagal madalas
O, sinta, tahakin natin ang tamang landas
Nang anak ay lumaking patas at parehas
Gabi may ay dumatal, karimlang pusikit
Liwayway ay nariyang talagang sasapit
Iwing anak ay palalakihing mabait
Bawat araw ma'y punong puno nang pasakit
Ang ngiti ng anak ay tanda ng pagsuyo
Yayapusin nating higpit mula sa puso

- gregbituinjr.

ang kandidato ay sintunog din pala ng sindikato

ang kandidato
ay sintunog din pala
ng sindikato

Udyok ng nasang lumaya sa pagsasamantala

Udyok ng nasang lumaya sa pagsasamantala
Rebolusyon ay hinahangad laban sa sistema
Itinatag nila’y isang makauring alyansa
Na layunin ay pandaigdigang pagkakaisa
Gugugol ng buong lakas sa pag-oorganisa
Makikibaka para sa layuning makauri
Ang hangad ay mawala ang burgesyang paghahari
Na dapat nang pawiin ang pribadong pag-aari
Galing sa sinapupunan ng proletaryong mithi
Gugunawin nila ang sistemang mapang-aglahi
Atin nang pagbigkisin ang hukbong mapagpalaya
Gapiin ang mga hukbo't sistema ng kuhila
Ang pagwawagi ng obrero'y mahalagang sadya
Walang pangingimi sa pagputol ng tanikala
At sosyalismo'y itatatag sa lahat ng bansa

- gregbituinjr.

Pagkawalay

kumikislot sa kalooban ko ang larawan mo
habang pabiling-biling sa hinigaan kong sako
habang pinapapak ng lamok ay natutuliro
nagdidilim na ang langit, parating na ang bagyo

ang kisame ko'y langit, walang anumang talukbong
sumapit na rin ang pagkainip at pagkaburyong
sa gubat, dapat mag-ingat sa ahas na lumusong
sa lungsod, dapat mag-ingat sa naglipanang buhong

gagamba'y di makabitag ng kakaining lamok
ang nasusunog na basura'y nakasusulasok
habang pakuya-kuyakoy sa upuang marupok
di na malaman kung saan ang tungki'y itututok

naglakbay sa malayo ang inaasam na mutya
habang ako'y nagbalik muli bilang maglulupa

- gregbituinjr.

Mga Nawawalang Tula ni Fidel Castro

Mga Nawawalang Tula ni Fidel Castro 
tula ni Michael Philips
malayang salin ni G. Bituin Jr.

Mula sa itaas, ang mesa ay may tahanan
sa isang hilera ng magkatulad na mga mesa,
nasa gitna ang lumang taunang aklat panghayskul
at isang de-makinang lapis.

Mapapailalim tayo,
niluluhuran ang mga bomba
subalit handang makipaglaro,
na mga mata'y magkasabay magmasid
sa mumunting yungib.

May mga malalabong pilat kami
na magpapatunay ng aming paghihirap
at malalabong tanawing maaaninaw
sa mga lumang durungawan
upang ngumiti sa lungkot o balewalain
ang mga bagong awitin.

Ang makasaysayang balbas at luntiang sambalilo
tulad ng isang bagay mula sa munting silid sa kisame
tulad ng mga Stones at mga Kennedy
o babala ng isang malamig na kaharap na nanghihimasok.


The Lost Poems of Fidel Castro - Poem by Michael Philips

From above, the desk has a home
in a row of identical desks, 
an old high school yearbook rests in the middle, 
and a mechanical pencil.

We would be underneath, 
kneeling for bombs
but ready for games, 
eyes synchronized in little caves.

We've only the faintest scars
to show for our suffering, 
and ghostly scenes reflected in old windows, 
to smile in sorrow or ignore for new ballads.

The iconic beard and green hat, 
like something from the attic, 
like the Stones or a Kennedy, 
or a warning of a cold front moving in. 

Mga OFWs, may HIV / AIDS

sadya bang kay misis sila'y sabik na sabik
ngunit trabaho'y kaylayo't di makahalik
ilang buwan pa bago sila makabalik
kaya naghanap ng ibang makakatalik

nais lang ba talaga nilang makaraos?
ang pangungulila ba nila'y lubos-lubos?
kahit ba ang pag-ibig nila'y kinakapos?
ngunit ngayon kinapitan sila ng virus

silang mga nagsakripisyong magtrabaho
malayo sa pamilya, nasa lupang dayo
sila'y may pangangailangan ding totoo:
ang pakikipagtalik, paano na ito?

di sapat na libog ay ikuskos lang sa dingding
o tanging palad lamang ang laging kapiling
pagkat sarili lamang ang humahalinghing
minsan, ang mapalayo ka'y nakakapraning

ano ang dapat upang ito'y malunasan?
libo na'y apektado ng sakit na iyan
paano ba natin sila matutulungan?
silang napalayo na sa sariling bayan

di lang sakit na ito ang dapat magamot
ang magtamo lang nito sa pamilya'y kirot
pangungulila'y paano rin magagamot
upang kapayapaan sa puso'y idulot

- gregbituinjr.

* Ayon sa ulat, "Sa 52,280 migrant workers, umabot na sa 5,537 OFWs ang may HIV / AIDS dahil sa sex (pahayagang HATAW, Abril 9, 2018)

Kahinahunan

KAHINAHUNAN

dapat maging mahinahon
at huwag padalus-dalos
sa mga pagdedesisyon
upang wastong mairaos
ang ating buong maghapon

mahirap kung basta na lang
sa bagya-bagay mainis
na anumang nakaharang
ay agad lang pinapalis
na para bang isang hunghang

maging mahinahon lagi
sa sarili'y iyong bilin
bakit ka ba namumuhi
ang kahinahunan man din
ay pagbabakasakali

huwag kang matutuliro
sa problemang kinaharap
lamigan lagi ang ulo
maging mahinahong ganap
maaayos din ang gulo

- gregbituinjr.

Di ko lubos maisip na ikaw'y magiging akin

Di ko lubos maisip na ikaw'y magiging akin
Idinuduyan sa diwa ang iyong larawang angkin
Kulog man at kidlat ay di matingkalang isipin
Tayo na pala'y magkaniig ang puso't damdamin

Ating liparin ang bundok at laot ng pangarap
Daraan ang panahong di tayo sisinghap-singhap
Uunawain natin bawat isa't magsisikap
Ramdam kong lagi tayong magkatuwang sa paglingap

Yayapusin kita, mahal ko, pagkat inibig mo
Ang tulad kong hampaslupang makatang naririto
Nais kitang dalhin sa aking lungga't paraiso
Gagawin natin ang pagbuo ng pamilyang gusto

Pangarap kong kita'y makasamang nakikibaka
Rinig ko ang daing ng puso ng kawawang masa
Oo, dahil iyon ako, damhin mo ako, sinta
Lagi tayong magkatuwang pagkat tayo'y iisa

Espesyal ka sa buhay ko kahit di mo dalumat
Talulot mo'y kayganda't ako'y napapamulagat
Aking sinta, sabihin mong ako'y irog mong tapat
Relasyon nati'y dinidilig ng pagsuyong sapat

Yanigin man tayo ng sangkaterbang suliranin
At pagdurusa't sakripisyo'y ating kaharapin
Di tayo mauuga pagkat tapat ang layunin
Oo, sa langit nakamasid ang mga bituin

- gregbituinjr.

Alay sa panitikan

ALAY SA PANITIKAN

Agila mang hari ng kalawakan ay lumipad
Lawin mang mandaragit ng sisiw ay biglang sibad
Alipin mang nais umalpas sa dusa'y kaykupad
Yagit man ay naghihirap sa lungsod ng pag-unlad

Sa pagtahak sa landas ng panitikang sarili
Ang panulat sa bayan at kapwa'y dapat magsilbi

Panitikan ay pagsikapan nating paunlarin
Ang bayang may panitikan ay bayang maunlad din
Na nakaukit sa dambana nitong kasaysayan
Inaalay sa salinlahi ng kinabukasan
Tuwirin natin ang mga baku-bakong lansangan
Ibigay kung ano ang maganda't makatarungan
Kahit kaharap man ay panganib o kamatayan
Ating bigkisin ang bawat isa sa panitikan
Na karugtong ng puso't kaluluwa nitong bayan

- gregbituinjr.

(tulang akrostika - o yaong simula ng letra ng bawat taludtod ay bumubuo ng isang salita o parirala)

Metapisika sa mga biktima ng tokhang

METAPISIKA SA MGA BIKTIMA NG TOKHANG

buti pa si Hesus, nabuhay muli, dahil Poon
yaong mga tinokhang, patay pa rin hanggang ngayon

buti pa si Lazaro, muling binuhay ni Hesus
ngunit patay pa rin ang dukhang buhay ay tinapos

buti pa si Hesus, nabuhay dahil pinagpala
subalit patay pa rin ang dukhang ibinulagta

ang mga tinokhang ng walang proseso'y pinatay
ngunit sa tatlong araw ay di naman mabubuhay

buti pa ang mga Bathala'y may kapangyarihan
kaya may takot ang lumalabag ng karapatan

ngunit kung karaniwang tao'y kaydaling labagin
ng karapatan nilang dapat lang pakamahalin

hustisya sa mga pinaslang ng walang proseso!
hustisya sa mga biktima ng tokhang na ito!

- gregbituinjr.

Dadalhin kita sa paraiso

DADALHIN KITA SA PARAISO

"Dadalhin kita sa paraiso," anang makata
sa nililigawang dilag na animo'y diwata
na ang kagandahan sa iwing puso'y nagpapala

animo'y Eden ang paraisong pinapangarap
walang pang-aapi, pagkabigo o pagpapanggap
paraisong silang dalawa lang ang magkausap

dadalhin ka sa paraisong puno ng pag-ibig
pupupugin ka ng halik, kukulungin sa bisig
maglalapat ang ating katawan at magniniig

dalawang magnanakaw ang nakapako sa kalbaryo
isa'y taos-pusong nagsisi sa ginawa nito
sabi ni Hesus, "Dadalhin kita sa paraiso!"

- gregbituinjr.
(Biyernes Santo 2018)

Uulitin ko ng ilang ulit sa iyo

Uulitin ko ng ilang ulit sa iyo
Ramdam mo ba ang pagsintang inaalay ko?
Ikaw ang tanging mutya ng buhay kong ito
Na laging pinupukaw ang puso't diwa ko
Galing sa kaibuturan, ikaw ang sentro

Malayang tatahakin ang kinabukasan
Ang bawat hakbang ay tungo sa kaalwanan
Nang mabuong pamilya'y saya ang magisnan
Ginhawa't ligaya'y pangarap na makamtan
Gagawing magkatuwang ang makakayanan

Atin mang danasin ang pagdurusa't hirap
Gawin ang lahat ng uri ng pagsisikap
At  nang pamilya'y araw-gabing nalilingap
Wari'y dulo ng bahaghari ang hagilap
Asahan mong ginhawa'y ating malalasap

- gregbituinjr.

Humanap ka ng panget - mula sa survey

HUMANAP KA NG PANGET - MULA SA SURVEY

Ayon sa ulat ng Abante Tonite, sa isinagawang pag-aaral ng Florida State University, mas mahaba umano ang pagsasama ng isang magkasama kung ang napili ng babae ay hindi guwapo, at panget ang lalaki (Abante Tonite, Marso 26, 2018, p.3)

"humanap ka ng panget", ang pamagat ng balita

at umano'y pag-uusisa ng mga banyaga

sa unibersidad, ito raw ang nakitang tigib

tatagal daw ang pagsasama ng magkaisang-dibdib

aba'y inaawit na ito ni Andrew E. noon

higit na dalawang dekada nang lumipas ngayon

o baka napakinggan din ng banyaga ang awit

at ito ngayon ang kanilang saliksik na bitbit

sabi, "humanap ka ng pangit, ibigin mong tunay"

saliksik na tila payo, di kaya ito sablay?

- gregbituinjr.

Anak ba'y nais maging kontraktwal

ang mahal nyo bang anak ay inyong pinapag-aral
upang sa kalaunan sila ay maging kontraktwal

kontraktwal ay walang katiyakang pagtatrabaho
may kontrata, palipat-lipat, walang benepisyo

sa ekonomya'y manggagawa ang nagpapaandar
subalit sila pang kawawa, di na maregular

kapitalista nama'y panay tubo't tuwang-tuwa
bayarang makina lang ang tingin sa manggagawa

regular na pagtatrabaho'y laban ng pamilya
laban ng manggagawa, ng anak, at ng asawa

sistema'y palitan na't tumahak sa tamang landas
salot na kontraktwalisasyon, dapat nang magwakas

- gregbituinjr.

Mabuti pa'y tutong kaysa panis na kanin

MABUTI PA'Y TUTONG KAYSA PANIS NA KANIN
13 pantig bawat taludtod

sino kayang matino pa yaong kakain
kung batid naman niyang panis yaong kanin
kahit na pulubing marahil walang kain
di gaganahan, di nila iyon kakanin

tanungin mo kaya, bakit ka napanisan
kaning kaysarap ay bakit pinabayaan
dahil maraming bigas na maisasalang
o dahil ito'y di mo naman pinaghirapan

marami nga riyan, sa gutom nagtitiis
kung may kanin man, kakainin kahit panis
di ba't ang gayon ay nakapaghihinagpis
lalo'y may anak pang sa gutom nananangis

huwag magpabaya, ang kanin man ay tutong
pagkat sa kalusugan, malaki ring tulong
sa oras ng kagipita'y lunas sa gutom
kaysa anak mo'y ang kamao'y nakakuyom

- gregbituinjr.

Kung hari'y walang bait

matinding magparunggit
ang maghapong kaypait
tila ba nasa bingit
ang lumuluhang paslit

o, mahabaging langit
ang hari'y anong lupit
karapatan mong bitbit
ay di mo maihirit

buhay na pinagkait
anong dulot na sakit
ilan pang bubunghalit
sa buhay na inilit

tadhana ba'y ginuhit
na hari'y walang bait

- gregbituinjr.

Anak nawa'y laging ingatan

ANAK NAWA'Y LAGING INGATAN

Kahindik-hindik ang balitang namatay ang isang magdadalawang-anyos pa lang na bata nang mapabayaan ng ama. Abalang naghahanda noon ang ama ng pananghalian. Nakarating sa ilog ang bata at nilamon siya nito. Ayon sa balita, aksidenteng nahulog sa ilog at nalunod ang bata. (Pilipino Star Ngayon, Marso 24, 2018)

ang pangyayari'y nakabibigla
nakaiiyak yaong balita
magdadalawang-anyos na bata
ay nalunod, buhay ay nawala

ang ama'y naghahanda pa naman
ng masarap na pananghalian
nang bata'y nagtungo sa pampang
tila naglaro sa katuwaan

subalit aksidenteng nahulog
ang bata sa malalim na ilog
namatay ang batang iniirog
sa puso'y sadyang nakadudurog

anak sana'y di napabayaan
siyang bunga ng pagmamahalan
anak sana'y dapat nabantayan
lalo't siya'y nasa kalikutan

O, Kamatayan, kaybata niya!
ngunit bakit agad mong kinuha?
magandang bukas niya'y wala ba
at siya'y iyong kinursunada?

- gregbituinjr.

Pagyakap sa matandang puno

nais kong yakapin ang isa nang matandang puno
sa panahong di maganda ang aking pakiramdam
bakasakaling manumbalik ang sigla ng puso
pag nadarama kong sakit ay tuluyang maparam

nakaraang binaón ba'y maaaring mahango
nang di na manariwa ang kanilang pang-uuyam
pait ng mga danas ba'y ating mapaglalaho
habang nariyan ang bagong umagang inaasam

nanalasa ang bagyo't bubungan na'y tumutulo
baha ang paligid, naligo't ang mata'y nahilam
gusaling nagkalamat na'y nagbabantang gumuho
hayahay pa kahit nanganganib, di mo ba alam

ayaw kong yapusin ang nararanasang siphayo
na kapara'y alapaap sa maghapong kaylamlam
ginhawang sa pangarap ko nawa'y huwag maglaho
na bawat tagumpay ay kaytamis na mananamnam

- gregbituinjr.

FDC Pasyon 2018

FDC Pasyon 2018
ni Greg Bituin Jr.

Freedom from Debt Coalition
kasangga ng masa't nasyon
kayganda ng nilalayon
sadyang matatag ang misyon
sa lungsod man at sa nayon

misyon nilang ipagtanggol
ang bayan sa mga pulpol
lalo't namumuno'y ulol
kayraming dukhang nilipol
kinapos nga ang ataul

laksa ang isyung dumatal
na sadyang nakangangatal:
namaslang ang mga hangal
nambaboy ng mga dangal
pangulo'y samâ ng asal

buhay na kalunos-lunos
pagkat dukha'y laging kapos
masa'y di na makaraos
sa bayang naghihikahos
babae pa'y binabastos

ang pangulong mapanlinlang
karapatan di ginalang
pananalita'y maanghang
sa babae'y walang galang
Digong pala'y isang hunghang

pinauso ang pagpatay
ang pagkatao'y niluray
umiyak ang mga nanay
nang anak ay naging bangkay
wala sa korte'y binitay

dukha'y ipis kung turingan
gayong kapwa tao naman
tila ba pamahalaan
animo'y nabubulunan
sa usaping karapatan

walang galang sa proseso
patay doon, patay dito
pag kaharap ang negosyo
bahag na ang buntot nito
di na matanggal ang endo

kontraktwalisasyon, salot
kasalut-salutan, salot
ngunit pangulo'y bantulot
pagkat bumahag ang buntot
at sa negosyo'y natakot

sabi ng pangulong tuso
tatanggalin daw ang endo
di magawa ang E.O.
kaytapang naging maamo
bahag-buntot sa negosyo

sa TRAIN masa'y nagtitiis
pagkat nagtaas ang buwis
negosyo'y bumubungisngis
habang masa'y tinitiris
sa kanyang sariling pawis

kuryente nga'y nagtaas na
pinakamahal sa Asya
tubig nga'y nagmamahal pa
laksa-laksang pagdurusa
ang dulot ng TRAIN sa masa

ang bigas na'y nagmamahal
dagdag buwis sa asukal
dagdag presyo sa kalakal
ang tao pa ba'y tatagal
sa sistemang sumasakal

isyu pang dapat tumutok:
kayraming batang lumahok
sa iwas-kagat ng lamok
ngunit namatay sa turok
at sa dengvaxia'y nalugmok

bakuna'y lagim ang dulot
mga nanay na'y natakot
pangkalusugang hilakbot
sinong dito'y mananagot
dating pangulo ba'y sangkot

sa TRAIN, alta-presyon ka na
tokhang, patay kang bata ka
may kontraktwalisasyon pa
dagdag pa iyang dengvaxia
isyung nakamamatay na

kaya sigaw namin ngayon
tara't tayo'y magsibangon
harapin ang bagong hamon:
Freedom from Debt Coalition
ipagpatuloy ang misyon

O, babae't aktibista
mga estudyante't masa
manggagawa't magsasaka
panahon nang magkaisa
at baguhin ang sistema!