Pagsagip

PAGSAGIP
ni Gregorio V. Bituin Jr.
15 pantig bawat taludtod

kailangan nila'y tulong, tingnan ang kalagayan
at dapat lang silang sagipin sa kapanganiban
ngunit tila ang iba'y kayraming tinatakasan
anupa’t di madalumat kung anong kalutasan

may mga pamilyang sa kahirapan nagdurusa
iba'y may magulang na walang paki sa kanila
iba'y batang hamog, adik, sanggano sa kalsada
na dapat masagip bago lumala ang problema

tulad ng sunog, huwag maghintay lang ng bumbero
dapat agad kumilos, magtulung-tulong ang tao
upang apoy ay mapatay, bahay ay di maabo
upang di mawala ang pinaghirapang totoo

paano sasagipin ang bayan sa trapong banô
na pulos mga tiwali, ang gawa'y pawang likô
dapat maagap magpasya, kilos ay walang hintô
kalutasan sa problema'y dapat nating matantô

paano natin sasagipin yaong nalulunod
kung paglangoy pa lang, sinasagilahan ng takot
paano lulutasin ang problema nilang dulot
kung di magsusuri, tutungangang animo'y tuod

maraming delubyong nagdaan, panay ang pagbahâ
sa Yolanda'y libu-libong buhay ang nangawalâ
anong dapat gawin pag dumaang muli ang sigwâ
dapat magkapitbisig, magbayanihan ang madlâ

Paminsan-minsang pitik

PAMINSAN-MINSANG PITIK
ni Gregorio V. Bituin Jr.
13 pantig bawat taludtod

anila, ako raw ay madalas tahimik
ngunit napakadaldal ng aking panitik
sa araw at gabi'y haraya ang katalik
anong nasa ulo'y sa papel isisiksik

mapagmahal nga ba ang mga manunulat
sa akda niya, ang dalaga'y namumulat
manunulat kung torpe'y di nakagugulat
sa diyosang dilag niya'y di nga umangat

tila sibuyas na lumuluha ang akda
gumanda sa salabat ang tinig ng katha
bawang na panakot sa aswang ang nilikha
kamatis ang damdaming walang napapala

tahimik lang sa tabi, subalit kay-ingay
nagsasalimbayan nga yaong naninilay
sinusuri ang lipunan at pamumuhay
nababagabag ang loob, di mapalagay

anila, ako raw ay madalas tahimik
napakadaldal naman ng aking panitik
kinakatha'y tulad ng luyang dinidikdik
nang mapiga ang katas, akda'y may tilamsik

Nakakainip ding maghintay

NAKAKAINIP DING MAGHINTAY
ni Greg Bituin Jr.
8 pantig bawat taludtod

nakakainip ding maghintay
inaasahan ko ba'y wala
bawat segundo'y lumalatay
dini sa katawan ko't diwa
mabuti pa yatang humimlay
sandali pagkat nanlalata
ang pag-asa ba'y nakaratay
sa banig ng pagbalewala

ngunit dapat pa ring maghintay
nang kahit pa'no'y may mapala
pagkainip ay nangangalay
konting tiis pa't maya-maya
naririyan na't ibibigay
na nila ang inaadhika
nagbunga rin ang paghihintay
kaya't labis ang aking tuwa

- kinatha habang naghihintay ma-release ang passport sa DFA Aseana, Aug. 6, 2015, 6pm
- nasa DFA na ng 9:30 am, nakuha ang passport ng 7pm, Aug. 6, na dapat ay July 29 pa ni-release

Babalikan ko ang dilag

BABALIKAN KO ANG DILAG
ni Gregorio V. Bituin Jr.
8 pantig bawat taludtod

babalikan ko ang dilag
may naiwan kasi ako
ang puso kong napapitlag
ay siya ang nakasalo
puso ko'y nababagabag
kung bakit ba naiwan ko
sa napakagandang dilag
yaong puso kong tuliro

ngunit aking naiisip
tila ba nananaginip
noong ako'y makaidlip
saka siya sumisilip

ang puso ko'y tangan niya
kinuha sa kanyang bulsa
aba'y itatago pala
sa loob ng kanyang blusa

Tulad ng larong Chess

TULAD NG LARONG CHESS
ni Gregorio V. Bituin Jr.
15 pantig bawat taludtod

tulad ng larong chess, bumabalik tayo sa pwesto
pagkatapos ng bawat laro, kahit tayo'y talo
at magsisimula muli sa digmaang kaygulo
pagsulong ng piyesa'y pinag-iisipang todo

manggagawang piyon versus haring kapitalista
dapat pag-isipan ang istratehiya't taktika
paano gagapiin ang naghaharing burgesya
at paano babaguhin ang bulok na sistema

haring kapitalista versus manggagawang piyon
sinong panalo sa sistemang kontraktwalisasyon
kayrami ng manggagawang dapat magtulong-tulong
upang ang hari, reyna't alagad nila'y malamon

sakaling matalo tayo ngayon, huwag manghina
babalik tayo sa pwesto pagkatapos ng sigwa
sa darating pang mga laban ay dapat maghanda
ipakitang kapitbisig ang uring manggagawa

tulad ng larong chess, bumabalik tayo sa pwesto
upang sa susunod na laban, tiyaking manalo
laban sa hari, reyna, obispo, kapitalismo
at itindig ang dangal ng obrero: sosyalismo!

Pitong tanagà kay kasamang Wowie

PITONG TANAGÀ KAY KASAMANG WOWIE

1
di ka malilimutan
sa ngiting panambitan
adhikang katarungan
nawa'y iyong makamtan

2
pagtangan ng bandila
para sa manggagawa
ay sadya mong ginawa
o, kaygandang adhika!

3
sa anumang labanan
iyong pinaglingkuran
ng buong katapatan
ang obrero't kilusan

4
hinanap ka sa SONA
ng maraming kasama
subalit wala ka na
o, dakilang kasama!

5
anak ka ng Bukluran
sa bawat nitong hakbang
nagsilbi ka sa bayan
obrero'y sinamahan

6
ikaw'y aming kauri
at kaysaya mo lagi
ang matamis mong ngiti
saya ngayong kayhapdi

7
hustisyang hinahanap
ay dapat mahagilap
nawa'y kamtin mong ganap
ang hustisyang pangarap

* tanagà - katutubong tulang may tugmaan na binubuo ng isang saknong na may apat na taludtod at pitong pantig bawat taludtod

Dapat malusog tayong tibak

DAPAT MALUSOG TAYONG TIBAK
ni Gregorio V. Bituin Jr.
9 pantig bawat taludtod

pangalagaan ang katawan
pagkat matagal pa ang laban
mahalaga ang kalusugan
na mabuti sa kahandaan

dapat tayo'y pawang malusog
at sa pagkain laging busog
sa rali man tayo'y mabugbog
ay di basta-basta lulubog

tayo'y nakikibakang sadya
upang sa sistema'y lumaya
at itatayo ang adhika
nating lipunang manggagawa

sa laban, di tayo susuko
dapat malusog tayong hukbo
nang di basta maigugupo
ng sistemang dapat maglaho

Magulong mundo

larawan mula sa google

MAGULONG MUNDO
ni Gregorio V. Bituin Jr.
13 pantig bawat taludtod

gulong silang paikot-ikot lang ang buhay
mga gulong na sa pagka-flat nakaratay
at sa malayong pook ngayon nahihimlay
di batid kung magagamit pa silang tunay

wala na, ang buhay nila'y butas-butas na 
silang mga tumanda sa pamamasada
at naglingkod sa masa ng deka-dekada
upang maghatid kung saan dapat pumunta

ang pinakadakilang imbensyon ng tao
at pinakinabangan ng magulong mundo
kapalaran ay gulong ng palad animo
habang binabagtas ang semento't aspalto

kung walang gulong sa mundo'y walang pag-unlad
kalakalan ay tila pagong sa pag-usad
dahil sa gulong, umunlad ang mga syudad
sandali na lang ang di makuha sa lakad

salamat sa gulong, ating mundo'y sumulong
bagamat ang mga dukha'y pagulong-gulong
sa hirap at gulong di sila makaahon
na di pa malutas ng sanlaksang marunong

Wala iyon sa kulay

WALA IYON SA KULAY
ni Gregorio V. Bituin Jr.
10 pantig bawat taludtod

wala iyon sa kulay ng balat
kundi naroon sa pusong iwi
damdamin ma'y magkasugat-sugat
kakamtin din ang nilulunggati

wala iyon sa kulay ng buhok
kahit utak sa ulo'y katabi
kung anong mabuti’y di maarok
at iniisip lang ay sarili

wala iyon sa kulay ng barong
upang igalang ng taumbayan
dahil trapong tiwali'y paurong
at sa kapwa’y walang pakialam

wala iyon sa kulay ng binti
ng dalagang pinakasusuyo
kung pangit yaong kanyang ugali
ay di rin kayo magkakasundo

wala iyon sa kulay ng tinta
upang akda'y kanilang basahin
nasa kathang kahali-halina
itim, asul, pula man ang bolpen

iyon ma'y tulad ng bahaghari
mahalaga'y iwi nitong layon
upang makamit ang minimithi
at magtagumpay sa bawat hamon

Anong nasa isip ng babae sa rali?

larawang kuha ng may-akda sa isang rali sa Mendiola

ano kayang nasa isip / ng babae sa larawan?
papatinding kahirapan / mas matinding kagutuman?
kung makasal na, paano / ang kanyang kinabukasan?
magbuo ba ng pamilya'y / ganoong kadali lamang?
ang binatang iyon kaya'y / anong pinagninilayan?

maraming ibig sabihin / kung anong nasa litrato
yaong hawak niyang plakard / ay tungkol sa ating mundo
sumama sa rali pagkat / ang klima na'y nagbabago
anong dapat gawin nilang / mga karaniwang tao
mga pinuno ng bansa / lahat tayong naririto

may barbwire sa likod nila / ganyan naman pag may rali
sa mga isyung pambayan / ay hindi ka mapakali 
sa kinabukasan namang / nasa isip ng babae
bata pa'y magpapakasal / tila baga atubili
nasa isip kaya niya'y / baka magsisi sa huli

- gregbituinjr.

Halina't magbasa

HALINA'T MAGBASA

16 pantig bawat taludtod

“Hindi mo kailangang magsunog ng mga aklat para lipulin ang isang kultura – ang kailangan lang ay huwag na itong basahin ng mga tao.” ~ Ray Bradbury

Halina't magbasa ng sarili nating mga aklat 

upang kultura ng bayan ay di naman inaalat!

Sa kasaysayan at kalinangan ay dapat mamulat

at matatagpuan ang sarili sa ating nabuklat!

- gregbituinjr.

Pasasalamat

PAGPAPASALAMAT
ni Gregorio V. Bituin Jr.
15 pantig bawat taludtod

hindi madaling bigkasin ang salitang salamat
kung wala ka namang dapat na ipagpasalamat
kung ang bunga ng paghihirap ay di pa masipat
kung balantukan pa rin ang iyong natamong sugat
kung pag-aatubili sa loob mo'y di masukat

pagkat salitang salamat ay kaysarap bigkasin
bilang isang pagtanaw ng utang na loob natin
sa mga nakatulong sa suliranin, usapin
gawa nilang kaybuti’y naukit sa saloobin
ang sukli natin ay salamat na di kayang bilhin

sa mga pinagpipitaganang nanay at tatay
kayong pinagkakautangan niring iwing buhay
salamat po sa maraming panahong ibinigay
ang pakikipagkapwa-tao'y itinurong tunay
upang magandang palad ay aming mapasakamay

Ang Pinoy Manunulat

Ang Pinoy Manunulat
Nananatiling tapat
Hindi man maging sikat
Sulat pa rin ng sulat
Ng akdang mapagmulat
Kahit na laging puyat
Ang Pinoy Manunulat

- gregbituinjr.

Isang dukhang manunulat

ISANG DUKHANG MANUNULAT
ni Gregorio V. Bituin Jr.
13 pantig bawat taludtod

Dukhang manunulat sa mata ng marami
Tila walang alam, namamayat sa tabi
Palagi pang nakatingala sa kisame
Tinititigan yaong kariktan ng gabi
Mukha pang tulala dahil kumain dili

Sinusulat yaong nadamang pagkasawi
Ang kaakuhan niya'y tila bali-bali
Bakit sa puso'y lumbay ang nananatili
Angaw-angaw ba yaong sa kanya'y nalugi
Sa kabiguan ba'y kaya niyang humindi

Dukha man siya'y mayaman sa karanasan
Kahit bawat suot niya'y pinaglumaan
Nakipaglaban pa sa maraming digmaan
Upang palayain ang bansa't sambayanan
Siya'y napilayan, nabalian, duguan

Laman yaon ng mga tala't kasaysayan
At ngayon, nililikha niya ang tagpuan
Sari-saring kabanata, yugto, tipanan
Pinagdaanan, kahirapan, kagutuman
Demokrasya, sosyalismo, kapayapaan

Dukhang manunulat sa mata ng marami
Kakatha habang nakatitig sa kisame
Dudungaw, tatanawin ang tala sa gabi
Tutunganga ngunit kayraming sinasabi
At sa kanyang mga akda, tayo ang saksi

Nilay sa isang pagawaan

NILAY SA ISANG PAGAWAAN
ni Gregorio V. Bituin Jr.
15 pantig bawat taludtod

alin sa dalawa'y nauna: trabaho o sweldo?
tiyak ang sagot dito'y batid ng mga obrero
pagkat alam nila ang galaw ng kapitalismo
di maaring mauna ang kalesa sa kabayo

kahit gutom ka'y trabaho yaong dapat unahin
di maaring bumale ang baguhan sa gawain
baka dapat pagtiwalaan ka munang malalim
bago sisiw ay palimliman sa ibang inahin

nagsisipag sa trabaho, laging kayod-kalabaw
anumang trabaho'y gagawin kahit di malinaw
kung may benepisyo ba, magkano ang bawat araw?
ramdam ba sa sarili'y isang makinang bakulaw?

ilang buwan lamang ang pagkamada mo ng kahon
o pagsuksok ng bawat pyesa sa produktong iyon
sadyang kayhirap umalis pag may pinalalamon
sadyang kayhirap lumipat pag sa utang ay baón

lakas-paggawa'y binarat na, di pa makaangal
di pa makapagtayo ng unyon silang kontraktwal
kayod kalabaw na'y madalas pang hingal ng hingal
mahalin daw yaong trabaho upang makatagal

mga biktima ng kontraktwalisasyon, halina
ang maging regular ay pangarapin sa tuwina
magkaisa kayo't magsianyong tila balyena
kalakaran ay palitan ng matinong sistema

Ilang tula sa SONA

Ilang tula para sa Huling SONA ni PNoy
ni Greg Bituin Jr.

I
(9 pantig bawat taludtod)

sa magrarali'y pakiusap
gawing malinis ang kalsada
ang mga trapong mapagpanggap
ang dapat nating ibasura
dusa na'y di dapat malasap
nitong nahihirapang masa
habang ginagawa’y pangarap
upang mabago ang sistema
sa SONA'y ipakitang ganap
aktibista'y may disiplina
kahit sa simpleng pakiusap:
HUWAG MAG-IWAN NG BASURA!

II

(7 pantig bawat taludtod)

sa darating na SONA

patuloy ang protesta

ngunit tiyakin sana:

"WALANG MGA BASURA!"

malinis ang kalsada

kahit na pulang-pula

ang daan sa protesta

trapo ang ibasura

at bulok na sistema

III

sa huli mong SONA
PNoy, kumilos ka!
ibalik na sa Canada
ang imported na basura

IV

(11 pantig bawat taludtod)

huwag mong katitigan ang basura

baka maduling, lumaki ang mata

sana'y marinig ng bayan sa SONA

na basura'y mabalik sa Canada

sa usaping ito'y manindigan ka!

Pilipinas ay hindi basurahan

ng Canada o ng iba pang bayan

pangulo ka nitong pamahalaan

mamili ka: kumilos kang tuluyan

o ibasura ka ng taumbayan

Ang panawagan sa sambayanan

ANG PANAWAGAN SA SAMBAYANAN
12 pantig bawat taludtod

Sabi niya noong una, Boss daw tayo
Subalit bakit nabusabos ng todo
Ang masang pinanumpaan ng pangulo
Boss ba o busabos ang tingin sa tao?

SAF at Obrero ng Kentex ay namatay
Ngunit pangulo'y huli na kung dumamay
Sadya bang siya'y laging papatay-patay?
Di ba mahalaga sa kanya ang buhay?

Noon, kaytaas ng presyo ng bilihin
Ngunit ngayon, aba'y kaytataas pa rin
Sa mga pangakong ngangata-ngatain
Ay di rin pala nila kayang tuparin

Burgesyang lumpen itong dumadaluhong
Sa mga pamayanang ikinakahon
Sa mga disenyo nila't pandarambong
Na tunay ngang imperyalistang daluyong

Rehimeng Aquino'y dapat nang magdusa
Elitistang paghahari'y tapusin na
O, sambayanan, halina't makibaka
At pawiin na ang pagsasamantala

Wakasan ang elitistang paghahari
Wakasan din ang pribadong pag-aari
Sistemang bulok, di dapat manatili
Sa labang ito, masa'y dapat magwagi

- gregbituinjr.

Wakasan ang elitistang paghahari

WAKASAN ANG ELITISTANG PAGHAHARI
15 pantig bawat taludtod

lipunan itong sadyang hinati sa mga uri
sinadya ng burgesyang may pribadong pag-aari
sistemang ito'y ayaw ng obrerong mamalagi
ang hiyaw: wakasan ang elitistang paghahari

binabagtas ng mga ahas ang daang matuwid
tumuwid sa latigo ng kapitalistang sampid
tinuwid ng demonyong sa impyerno naghahatid
matuwid bang ang masa'y sa kumunoy binubulid

isulong ang tunay na gobyerno ng mamamayan!
iyan ang sigaw ng masang sadlak sa kagutuman
iyan ang nais ng manggagawang nahihirapan
iyan din ang pulso ng mayorya ng mamamayan

dapat nang magtulungan ang naguguluhang madla
dapat nang magkaisa ang ginigipit na dukha
dapat nang magkapitbisig ang uring manggagawa
dapat nang patalsikin ang mga trapong kuhila

subalit katuparan nito'y nasa kamay ninyo
sa nagkakaisang pangarap ng mga obrero
upang magbigkis para sa tunay na pagbabago
upang lipunang pangarap ay mabuong totoo

- gregbituinjr

Basurahan ang tuwid na daan

BASURAHAN ANG TUWID NA DAAN
13 pantig bawat taludtod

tulad ng Canadang ginawang basurahan
ang bansa, ganoon din ang tuwid na daan
pagkat ang pinuno'y sadyang pinabayaang
dapurakin ng dayuhan ang iwing bayan

sa huling SONA'y ano ang daang matuwid
kundi ang bansa'y tuluyang ibinubulid
sa sangkaterbang problema't mga balakid
bansa’y sa daang balikô inihahatid

sa obrero’y kontraktwalisasyon ang salot
sa dukha'y demolisyon ang laging panakot
trapo'y sa anomalya laging nasasangkot
pinuno’y sa puhunan ay naging patutot

bayan na'y pinagtatapunan ng basura
gobyerno'y wala bang magawa sa Canada
kurakutan sa matataas ay lipana
ang mga lingkodbayan ba'y nagsisilbi pa?

mataas ang presyo ng kuryente't bilihin
kalahati na lang ang sampung pisong kanin
buti sa SONA, pulitiko'y busog pa rin
habang mayorya ng masa'y di makakain

sa SONA'y kaysarap ng kanilang nilamon
katas nga ba iyon ng kontraktwalisasyon?
ah, tama nga ang Freedom from Debt Coalition
basurahan ang tuwid na daan ng nasyon!

- gregbituinjr.

Huwag itapon ang basura sa kalsada

kapag ikaw ay nasa biyahe
nakasakay sa dyip, bus o taksi
aba’y huwag itapon sa kalye
ang basura, balat man ng kendi

noong bata ka pa'y tinuruan
na itapon mo sa basurahan
ang basura mo't kalat na iyan
di sa daan o kung saan-saan

subalit ngayong malaki ka na
natutuhan mo'y tanda mo pa ba?
kalat mo'y iyo munang ibulsa
huwag pagtapunan ang kalsada

nawa paalalang ito'y dinggin
para sa kabutihan din natin

- gregbituinjr.

Bawasan natin ang polusyon

bawasan natin ang polusyon
gawin natin ng mahinahon
magsikilos sa bagong hamon
huwag basta tapon ng tapon
sa ilog, dagat, o kalyehon
maaring magresiklo ngayon
magaganda iyang solusyon
lalo’t bawat isa’y sang-ayon
at lahat ay magtulong-tulong

- gregbituinjr.
9 pantig bawat taludtod

Durugin si Haring Pader!

DURUGIN SI HARING PADER!
ni Gregorio V. Bituin Jr.
11 pantig bawat taludtod

diktadurya ang sistema ng hari
kayrami ng pribadong pag-aari
bawat atas niya'y di mababali
ang sumuway, buhay ay madadali

pader siyang di basta magigiba
totalitaryarismo'y kanyang likha
tingin sa kanya'y anak ni Bathala
sa bayan nga'y pangunahing kuhila

kung may Harry Potter na anong bait
siya'y Haring Pader na anong lupit
biyaya'y kanyang ipinagkakait
sa masang sa gutom ay alumpihit

ang tulad nila'y kapara ni Hitler
tinitingala pagkat nasa poder
kahit bayan ay kanyang minamarder
tingin sa masa'y laging kanyang ander

dapat mawala ang pinunong ganyan
pati na pagkaapi sa lipunan
balang araw, mag-aalsa ang bayan
at bubuwagin iyang kaharian

papalitan ang pyudal na sistema
ipapalit ay isang republika
ng burgesyang puno ng elitista
sistemang di naman gusto ng masa

mula pyudal naging kapitalismo
mahalaga'y pag-aaring pribado
kinakawawa ang mga obrero
lalo't bayang nagugutom ng todo

si Haring Pader, sadyang anong lupit
pulos tubo ang laging nasa isip
ang kapitalismo'y wakasang pilit
kung katarungan ang nais malirip

kwento ni Haring Pader ay wakasan
lipunang bulok ay dapat palitan
walang magsasamantala sa bayan
walang masang aapihing tuluyan

di na iisipin ay pulos tubo
kapitalismo'y dapat nang maglaho
o, manggagawa, magkaisa na po
bagong lipunan na’y ating itayo

Huwag magtapon ng basura kung saan-saan

HUWAG MAGTAPON NG BASURA KUNG SAAN-SAAN
ni Gregorio V. Bituin Jr.
15 pantig bawat taludtod

huwag kang magtapon ng basura kung saan-saan
dahil baka balikan ka nito sa kalaunan
baha na ang lungsod sa kaunting patak ng ulan

di ba't malaki ka na’t di na dapat pagsabihan?
sakali mang di ka makatulong sa kalinisan
ang pagdumi nito'y huwag mo na sanang dagdagan

pakiusap: alagaan natin ang kalikasan
nang sunod na salinlahi’y mayroon pang magisnang
isang daigdig na di pa sira’t may kaayusan

Tulad din ng bagyo

TULAD DIN NG BAGYO
ni Gregorio V. Bituin Jr.
10 pantig bawat taludtod

tulad ng bagyong di mapipigil ninuman
di rin mapipigil ang himagsik ng bayan
lalo na ang manggagawang nahihirapan
sa ilalim ng sistemang makapuhunan

ang rebolusyon ay bagyong di mapipigil
pag manggagawa'y patuloy na sinisiil
ng sistemang sa pagpapakatao'y sutil
at sa kabutihan ng mayorya'y inutil

di nga mapipigil ang pagdatal ng bagyo
lalo na't nagkaisa ang uring obrero
dadaluyong silang kapara'y ipu-ipo
at sa sistemang bulok sila ang delubyo

pag nagkaisa na ang uring manggagawa
mananalasa silang kapara ng sigwa
sistema'y papalitan ng inaadhika
ititindig ang lipunang bago't dakila

salin ng tulâ sa punò ni Joyce Kilmer

MGA PUNÒ (1913)
ni Joyce Kilmer
translated into Filipino by Gregorio V. Bituin Jr.
15 syllables per line

Palagay ko’y hindi na ako makakakita pa
Ng tulang ang rikit animo’y punò ang kapara

Sa nagugutom nitong bibig yaong puno'y handâ 
Laban sa kaytamis na agos ng dibdib ng lupà;

Sa araw-araw ay punong sa Diyos nakatingin,
Angat ang malabay na bisig upang manalangin;

Isang punong maaring sa tag-init ay isuksok
Ang pugad ng mga ibong robin sa kanyang buhok;

Na sa sinapupunan ang niyebe’y nakahimlay;
Kapiling ang ulan ay matapat na namumuhay.

Tulad kong hangal ang lumilikhâ ng mga tulâ 
Ngunit tanging Diyos ang sa puno'y makalilikhâ.

TREES (1913)
by Joyce Kilmer

I think that I shall never see
A poem lovely as a tree.

A tree whose hungry mouth is prest
Against the earth's sweet flowing breast;

A tree that looks at God all day,
And lifts her leafy arms to pray;

A tree that may in summer wear
A nest of robins in her hair;

Upon whose bosom snow has lain;
Who intimately lives with rain.

Poems are made by fools like me,
But only God can make a tree.

Pagtatalakupan sa gawain

PAGTATALAKUPAN SA GAWAIN (networking at work)
ni Gregorio V. Bituin Jr.
15 pantig bawat taludtod

talakop yaong gawang sadya ngang sala-salabat
nang kita'y makagamit ng tinatawag ding lambat
pukot din yaon, panghuli ng isda sa dagat
o anumang makakain mula tabang o alat

mula dito'y uminog ang salitang talakupan
na sa salitang Ingles ay networking pala naman
ah, ito pala'y wika ng pakikipag-ugnayan
nagtatalakupan ang maliit nilang samahan

mahalagang magtalakupan ang magkakasama
marapat lang sa samahang ang adhika'y kayganda
palalawakin ang kanilang naoorganisa
pararamihin ang kasama sa layunin nila

mahalaga ang talakupan sa gawain natin
lalo't pagbabago ng sistema ang simulain
yaman ng ilan, dusa ng marami'y babaguhin
magtalakupan hanggang magtagumpay sa hangarin

*network - talakupan, mula sa tagalog-Batangas na talakop o net, at talakupan o network

Buhay na masaya, di naaksaya

BUHAY NA MASAYA, DI NAAKSAYA
ni Gregorio V. Bituin Jr.
15 pantig bawat taludtod

naaaksaya lang daw ang buhay ko sa kilusan
itong saad ng ilang kakilala't kaibigan
na imbis daw na magtrabaho ako't magpayaman
niyakap ko'y simpleng buhay ng dukhang mamamayan
masaya daw ba sa buhay na pawang karukhaan?

tugon ko: hindi ba't sabi nyo'y kung saan masaya
doon ako pagkat iwing buhay ko'y may halaga
kung saan sa pagtatrabaho'y dama ang ligaya
kung saan di ka nang-aapi't nagsasamantala
buhay ko ba'y naaksaya pag kapiling ang masa?

pag may krisis sa bayan, masaya bang nakatanghod?
sa naghahari-harian, tama bang manikluhod?
sa masa't obrero'y masaya akong naglilingkod
masayang tanganan itong prinsipyo kahit pagod
di naaksaya ang buhay na masaya, may lugod

Huwag magbayad ng buo

HUWAG MAGBAYAD NG BUO
ni Gregorio V. Bituin Jr.
11 pantig bawat taludtod

sa bus, huwag kang magbayad ng buo
isang aral ito't tapat na payo
karanasan na itong nagtuturo
upang di mabiktima't masiphayo

sakaling buo ang iyong salapi
tiyaking maibibigay ang sukli
kung sabihin ng konduktor, "sandali!"
wala bang panukli o sadyang gawi?

tingin yata'y iyong malilimutan
pagbaba’y saka mo matatandaan
ang sukli mo pala'y iyong naiwan
wala na, di mo na mababalikan

ako po’y mamamayang nagtatanong
pagkat sandaan lang ang aking baon
ang nangyaring iyon ba'y nagkataon?
o modus operandi nila iyon?

Kung sa baro lang nakasulat

kung sa baro lang natin nakasulat
ang prinsipyo't adhika nating lahat
totoong ito’y nakapagmumulat
ngunit baro lang ito't hindi sapat
dapat prinsipyo'y naukit sa balat
tagos sa buto, sa puso'y bumakat
di huhubarin, kahit magkasugat

di hanggang damit lang ang adhikain
na pinakitang dama ang layunin
di sapat ang damit sa tumitingin
kundi ano bang ginagawa natin?
paano tutupdin ang simulain?
lipunan ba'y paano babaguhin?
sa puso ba prinsipyo'y anong lalim?

- gregbituinjr.

Dukhâ man, may karapatan ding angkin

DUKHÂ MAN, MAY KARAPATAN DING ANGKIN
ni Gregorio V. Bituin Jr.
13 pantig bawat taludtod

mga basura yaong turing sa kanila
wala raw alam sa buhay at ekonomya
mga basurang sa mundo'y nananalasa
dukha sa ilalim ng ganitong sistema

kasalanan ba nilang sila'y naging tao
na kahirapan ang nakagisnan sa mundo
nagkataong nabuhay sa kapitalismo
na kahit masipag ay di umaasenso

hampaslupa, mga basura, batang hamog
sa kagutuman, tiyan nila'y nabubugbog
sa karukhaan, katawan pa'y nalalamog
sa nangyayari'y kanino sila dudulog?

lumalaki silang walang pinag-aralan
inaaral lang ay sariling karanasan
sa magiging anak, anong kinabukasan?
kung ang nangyayari'y palagi na lang ganyan

buong buhay nila'y dinaanan ng sigwa
minsan masaya, kalakhan ay pulos luha
pangarap din nila ang buhay na marangya
upang makaalpas naman sa pagkadukha

mga anak sana'y di danasin ang hirap
wala mang edukasyon, sila'y nagsisikap
pilit ginagagap ang karanasang lasap
pilit inuunawa ang lipunang ganap

mga basura yaong turing sa kanila
wala raw alam sa buhay at ekonomya
ngunit alam nila yaong buhay ng masa
at bakit dapat lumahok sa pulitika

itatakwil nila ang tusong pulitiko
pangarap nila ang totoong pagbabago
matitinô lang ang kanilang iboboto
makikipagkaisa sa uring obrero

mga basura man ang sa kanila'y turing
sa bilang nila, ang mundo'y babaligtarin
sila'y dukha man, may karapatan ding angkin
upang lipunan ay tuluyan nang baguhin