Halaga ng Rosas

HALAGA NG ROSAS
ni Gregorio V. Bituin Jr.
10 pantig bawat taludtod

kayraming rosas na binebenta
nagbabakasakaling kumita
tila rosas ang magpapasya
at tatanggapin siya ng sinta

magkano ang rosas, ang pag-ibig
habang iwing puso'y nakatitig
sa rosas ba sinta'y maaantig
habang sa presyo'y naliligalig

iwing pag-ibig ay may halaga
pagkat pag-ibig ay walang presyo
may pag-ibig na nakatalaga
sa bawat isa dito sa mundo

pagsinta'y singhalaga ng rosas?
hindi, tanging puso'y nag-aatas
dalawang puso'y aaliwalas
pag pagsinta'y tigib at parehas

Palayain ang isip sa mga haka at kutob

PALAYAIN ANG ISIP SA MGA HAKA AT KUTOB
ni Gregorio V. Bituin Jr.
15 pantig bawat taludtod

palayain ang isip sa mga haka at kutob
kongkretong suriin yaong bagay mula sa loob
anong kalakasan ng problemang nakakubakob
anong kahinaan nitong sa inyo'y nakalukob

kontradiksyon ang batayan ng pag-unlad ng bagay
may tunggalian sa loob nitong sadyang masikhay
dapat unawain ang tunggaliang sumisilay
dahil sa bawat pagsusuri'y naroon ang saysay

di mga kutob at haka ang tugon sa problema
at di rin dahil sa haka't kutob dapat magpasya
paano ba dapat ilapat ang wastong taktika
o sa pangmatagalan ay wastong estratehiya

may tunggalian ng manggagawa't kapitalista
gayundin ang panginoong maylupa't magsasaka
kung ang mga kontradiksyong ito'y mareresolba
magwawakas ang panlipunang pagsasamantala

nilikha ng manggagawa ang yaman ng lipunan
kapitalista'y inaangkin ang nalikhang yaman
manggagawa ang lumikha ng laksa-laksang yaman
na inaagaw nitong kapitalistang gahaman

dapat tapusin ang rimarim na sistemang ito
di ng haka't kutob kundi pagkilos na kongkreto
ibabangon ng manggagawa ang dangal ng tao
wawakasan ang pandaigdigang kapitalismo

Kapatid natin ang bawat manggagawa

KAPATID NATIN ANG BAWAT MANGGAGAWA
ni Gregorio V. Bituin Jr.
13 pantig bawat taludtod

kauri natin sila, kapwa manggagawa
ngunit higit sa lahat, kapatid din natin sila
sa bawat pulso at lagutok ng ating kalamnan
tila baga isang ina ang ating pinagmulan
iisa lang ang pinanggalingan ng ating pusod
kaya isang layunin din ang sa atin nagbunsod
upang magkaisa bilang tunay na magkapatid
bituka'y magkadugtong sa buhay na walang patid
tayong manggagawa'y magkapatid at magkauri
kapwa nagnanasang lipulin na ang naghahari
na ang pribadong pag-aari'y tuluyang wakasan
at isang pamilya'y itayo sa bagong lipunan

Nakatarak na balaraw iyang kapitalismo

NAKATARAK NA BALARAW IYANG KAPITALISMO
ni Gregorio V. Bituin Jr.
15 pantig bawat taludtod

nakatarak na balaraw iyang kapitalismo
sa ating lalamunan, prinsipyo't pagkatao
sa sisikdo-sikdong dibdib ito'y namumuro
at ginagawang lantang-gulay ang mga obrero

pati sa likuran ay balaraw na nakatarak
ang kapitalismong sa dangal natin yumuyurak
ito ang sistemang sa ating kapwa'y humahamak
at sa lakas-paggawa, dugo ang pinaaantak

Ganito ko nais malagutan ng buhay

GANITO KO NAIS MALAGUTAN NG BUHAY
ni Gregorio V. Bituin Jr.
13 pantig bawat taludtod

ganito ko nais malagutan ng buhay
buong pagkatao'y ginagalang na tunay
makatang marangal at sa dangal namatay
puso't diwa'y payapa sa aking paghimlay

kung sakaling hininga ko'y agad malagot
sa harap ng digma't kayraming mga gusot
ay propagandista pa ring kayang masagot
ang anumang suliraning prinsipyo'y sangkot

patuloy pa rin sa kabila ng libingan
sa pagpopropagandang mataman sa bayan
maraming maghahangad sa akdang naiwan
upang kumilos ding baguhin ang lipunan

Pamana ni Ka Popoy

PAMANA NI KA POPOY
ni Gregorio V. Bituin Jr.
11 pantig bawat taludtod

lumipas ang labing-apat na taon
ngunit aral mo'y sa diwa bumaon
habang namamahinga ka na roon
patuloy kaming nagrerebolusyon

kaya, Ka Popoy, hindi ka nawala
nariyan pa ang mga manggagawa
pinagpapatuloy ang iyong diwa
diwang hindi nailibing sa lupa

haligi ka ng sambayanang api
ng mga obrero't simpleng kawani
pagkat naiwan mong akda'y nagsilbi
sa manggagawang sa mundo'y kayrami

nasa langit ka man, buwan, o laot
malalalim na tanong ay nasagot
katwirang sa salapi'y bumaluktot
mga trapong may sakit na kurakot

pagkat mga akda mo kung basahin
pamana mo'y madaling unawain
sinliwanag ng araw ang sulatin
paliwanag mong kaysarap namnamin

saan ka man naroroon, Ka Popoy
binhing inihasik mo'y di naluoy
nag-ugat, nagbunga itong patuloy
at sanga-sanga itong sumusuloy

mga akda mo'y walang kamatayan
ikaw na lingkod ng sangkatauhan
gabay sa pagbabago ng lipunan
ang sosyalismong iyong tinanganan

6 Pebrero 2015

Maiibig mo kaya ang tulad kong aktibista

MAIIBIG MO KAYA ANG TULAD KONG AKTIBISTA
ni Gregorio V. Bituin Jr.
15 pantig bawat taludtod

maiibig mo kaya ang tulad kong aktibista
ngunit kayraming agad-agam at tanong tuwina
kakayanin mo bang mamuhay kapiling ng masa
sa uring manggagawa ba'y kaya mong makiisa

o marahil, sinta, di mo ako kayang ibigin
kayrami mo ring tanong na di maubos-isipin
sa mundong ito'y paano ba kita bubuhayin
tanong mo pa, plakard at polyeto ba'y makakain

alam mo bang kayrami ng gabing lungkot ay lasap
pagkat di man lang kita nakita o nakausap
tigib sa puso kong ikaw ang tanging pinangarap
aktibista man ako'y lubos akong nagsisikap

marahil ay di mo ako iibigin, tanong ko
sa sarili, dahil ang isip lagi'y pagbabago
ng sistema't pagkaisahin ang mga obrero
sana, sana, aktibista man ako'y ibigin mo

Ang hangin, ang tubig, at ang bato - salin ng tula ni Octavio Paz

ANG HANGIN, ANG TUBIG, AT ANG BATO
Tula ni Octavio Paz
Malayang salin ni Gregorio V. Bituin Jr.
10 pantig bawat taludtod

Inuuka ng tubig ang bato,
ikinalat ng hangin ang tubig,
pinigilan ng bato ang hangin.
Ang tubig, ang hangin, at ang bato.

Inuukit ng hangin ang bato,
ang bato'y isang tasa ng tubig,
naubos ang tubig at yaong hangin.
Ang bato, ang hangin, at ang tubig.

Umaawit ang hangin pag-ikot,
lumalagaslas naman ang tubig,
payapa ang batong walang tinag.
Ang hangin, ang tubig, at ang bato.

Isa'y ang isa, o kaya'y hindi:
sa kanilang ngalang walang laman
ay tumatahak sila't nawala,
ang tubig, ang bato at ang hangin.

-
-
-

WIND AND WATER AND STONE
by Octavio Paz (1914 - 1998), Mexican poet

The water hollowed the stone,
the wind dispersed the water,
the stone stopped the wind.
Water and wind and stone.

The wind sculpted the stone,
the stone is a cup of water,
The water runs off and is wind.
Stone and wind and water.

The wind sings in its turnings,
the water murmurs as it goes,
the motionless stone is quiet.
Wind and water and stone.

One is the other and is neither:
among their empty names
they pass and disappear,
water and stone and wind.

Isang punong nakalalason - salin ng tula ni William Blake

ISANG PUNONG NAKALALASON
Tula ni William Blake (1757-1827)
Malayang salin ni Gregorio V. Bituin Jr.
11 pantig bawat taludtod

Galit ako sa aking kaibigan:
Galit ko'y sinabi't agad nawala.
Galit ako sa aking nakalaban,
Di ko sinabi't galit ko'y lumubha.

At sa pangamba, ito'y diniligan
Sa araw at gabi ng aking luha;
At may ngiting ito'y pinaarawan
At nang may lambot, sadyang pandaraya.

At lumago ito araw at gabi
Hanggang binunga'y kaygandang mansanas.
At kaaway ko'y masid 'yong maigi
At yaon ay akin, kanyang natuklas.

At sa aking hardin bumalabal
Nang gabing nalambungan ang haligi
Sa umagang kaysaya kong minasdan
Ang kaaway ko sa puno'y duhagi.

-
-
-

A POISON TREE
Poem by William Blake (1757-1827)

I was angry with my friend:
I told my wrath, my wrath did end.
I was angry with my foe:
I told it not, my wrath did grow.

And I watered it in fears,
Night and morning with my tears;
And I sunned it with smiles,
And with soft deceitful wiles.

And it grew both day and night,
Till it bore an apple bright.
And my foe beheld it shine.
And he knew that it was mine,

And into my garden stole
When the night had veiled the pole;
In the morning glad I see
My foe outstretched beneath the tree.

Republikang Trapo

REPUBLIKANG TRAPO
ni Gregorio V. Bituin Jr.

Republika baga itong busabos tayo ng trapo?
Ang tingin sa tanikala'y uliran ng pagbabago?

Kasarinlan baga itong ang trapo ang naghahari
Habang inaapi naman ang hindi nila kauri

Ang buhay ng dukha'y laging naroroon sa hilahil
Mga ibinotong trapo sa bayan ay nagtataksil.

Kalayaan! Republika! Naghahari'y dinastiya!
Kalayaan lamang ito sa naghaharing burgesya

Pagmasdan mo't dinastiya'y naglipana sa gobyerno
Bayan ba'y may napapala sa paghahari ng trapo

Namamahala sa tao'y bakit iisang pamilya
Ganito ang nangyayari sa iba’t ibang probinsya

Ang tatay ay kongresista, ang anak niya'y senador
Asawa'y siyang alkalde, kapatid ay gobernador

Kada eleksyon na lamang ay wala nang pagbabago
Kilalang apelyido lang ang lagi nang nananalo

Wala kasing pagpilian pag dumatal ang halalan
Pulos kasi mayayaman ang nagsisipagtakbuhan

Ang dukha ba dahil dukha'y di maaaring tumakbo
May puso sa paglilingkod, wala ba silang talino

Ang mga trapong may pera, dahil ba nakapag-aral
Dadalhin na tayo nito sa kaunlarang pedestal

Ngunit hindi, dukha pa rin iyang mga mahihirap
Pangarap nilang pag-ahon, nananatiling pangarap

Subalit laging pangako ng trapo pag kampanyahan
Iboto sila'y aahon ang dukha sa kahirapan

Pag-ahon na ba sa hirap kung di binayarang tama
Ang pinagpagurang sahod nitong mga manggagawa

Pag-ahon na ba sa hirap kung ang dukha'y tinataboy
Winawasak ang tahanan, dukha'y nagiging palaboy

Pag-ahon na ba sa hirap kung pamasahe't bilihin
Ay patuloy sa pagtaas, lalo't presyo ng pagkain

Pag-ahon na ba sa hirap ang mahal na edukasyon
Bata pa'y manggagawa na, walang aral, walang baon

Ngunit trapo'y naroroon, sa masa'y ngingiti-ngiti
Lalo't apelyido nila't pamilya'y nabotong muli

Kung trapo ang pinagpala, tao ba'y may napapala
Ang trapo'y tusong kuhila, serbisyo'y di ginagawa

Ngunit tao'y malaya daw, depensa ng mga trapo
Paglayang iyan ay iyo, bahala ka sa buhay mo

Ngunit paglaya ba yaong wala kang pagpipilian
Iboboto'y mga hangal, kandidatong mayayaman

Sa kasaysayan ng bansa, ang masa'y anong napala
Karukhaan ba'y naibsan, ano't kayrami pang dukha

Pagdating ng kampanyahan, trapo'y kayraming pangako
Sa hirap, ang mga dukha'y kanila raw mahahango

Parating ganito na lang, ganito bawat eleksyon
Pangako'y pinako't dukha'y sa dusa ibinabaon

Pag-aralan ang lipunan, bakit trapo'y nahahalal
Dukha'y naghihirap pa rin, at naghahari'y kapital

Kunwari tayo'y malaya sa halalan ng burgesya
Pinipili'y ang papalit, bagong magsasamantala

Kung ganito ang sistema, masa'y walang pakinabang
Republikang trapo'y bulok kaya't dapat nang palitan

Kaya manggagawa, kayong sa lipunan bumubuhay
Magkaisa pagkat kayo'y may lakas na tinataglay

Ang maso'y inyong hawakan, doon sa trapo'y ipukpok
Durugin ang tanikala, lalo ang sistemang bulok

Halina't ating wakasan itong republikang trapo
At sama-samang itayo ang lipunang makatao.

Kayrami pang dapat mamulat

KAYRAMI PANG DAPAT MAMULAT
ni Gregorio V. Bituin Jr.
13 pantig bawat taludtod

kayhirap talagang masdan ang kahirapan
matindi man ang titig mo sa karukhaan
mapupuwing ka sa sadyang katotohanan
may kahirapan sa gitna ng kaunlaran

dapat bang maawa, kaawaan ang dukha?
habang ngingisi-ngisi ang mga kuhila
sistemang bulok ba'y kailan isusumpa?
kailan kikilos ang laksang manggagawa?

ang pagdurusa ng dukha'y kaytinding danas
malabo pa rin ang mata ng matataas
lango sa kapangyarihan ang mararahas
aasahan ba silang sa dukha'y magligtas

ngunit sadyang magkaiba sila ng uri
yaong nasa taas, sa dukha'y nandidiri
panahon nang wakasan iyang paghahari
nilang mapagsamantalang nakamumuhi

delubyo kung manghawi ang sistemang bulok
ipu-ipong mapangwasak ang nasa tuktok
sa unos nila, mga dukha'y nilulugmok
araw ng paglaya'y kailan maaarok

o, talagang kayrami pang dapat mamulat
paanong dukha'y maghimagsik, maging dilat
manggagawa, papel mo'y pangunahang sukat
ang pagtayo ng lipunang para sa lahat

Sana'y makasama kita, sinta, ngayong Pebrero

SANA'Y MAKASAMA KITA NGAYONG PEBRERO
ni Gregorio V. Bituin Jr.
15 pantig bawat taludtod

sana'y makasama kita, sinta, ngayong Pebrero
ikaw na diwata kong sa puso'y nagpasilakbo
ikaw na sinusuyo ng pagsintang hanggang dulo
ikaw na kasama sa pakikibaka't prinsipyo
ikaw na dahilan bakit ako'y nagiging ako

ikaw na hangad kong makasama sa buong taon
pagkat di lang Pebrero tayo nagrerebolusyon
pagkat nananatili kang tunay kong inspirasyon
nagkapira-piraso man ang kaysidhing kahapon
ay atin pa ring mabubuo itong bagong ngayon

Salamisim sa Pebrero

SALAMISIM SA PEBRERO
ni Gregorio V. Bituin Jr.
15 pantig bawat taludtod

Pebrero, di lang ito panahon ni Valentino
panahon din ito ng pakikibaka't prinsipyo
napalaya ang diktadura noong Edsa Uno
nadeklara ring pambansang buwan ng sining ito

ngunit sa isyung panlipunan, tila di makinig
itong madla pagkat sila'y di rito kinikilig
pagkat Pebrero'y alala lang dahil sa pag-ibig
pagkat sa pagsinta't kaya nilang magkapitbisig

Agos ng mga luha

AGOS NG MGA LUHA
ni Gregorio V. Bituin Jr.
9 pantig bawat taludtod

tinatangay ako ng agos
ng mga luha, nauubos
ang angking lakas, inuulos
ang damdaming nabubusabos
payapa bang makararaos
yaring buhay na tinutuos

nilulunod ng mga luha
ang pusong nilandas ng sigwa
nagsaya ang mga kuhila
habang lugmok ang manggagawa
habang ang madla'y nagluluksa
bayan pa ba'y mapapayapa

Harana

ako'y narahuyo
sa sintang sinuyo
nawa'y di malabo
ang tugon sa puso

dungawin mo, sinta
ang aking harana
dinggin ang pagtipa
sa aking gitara

tinig ko ma'y paos
ngunit puso'y taos
pag-ibig na lubos
sa iyo'y yayapos

nawa puso'y dinggin
at ako'y ibigin

- gregbituinjr.

Ang nasasaisip pag nagkakape

ANG NASASAISIP PAG NAGKAKAPE
ni Gregorio V. Bituin Jr.
11 pantig bawat taludtod

ang nasasaisip pag nagkakape
mga trapo'y talagang walang silbi
mga dukha'y parami ng parami
habang trapo'y para lang sa sarili

kapitalismo ang sanhi ng dusa
at kahirapang nagsadlak sa masa
dapat nang kumilos habang maaga
kung di kikilos ngayon, kailan pa

kape'y masarap ngunit di ang buhay
sistema'y inaamag na tinapay
dukha'y kayhaba pa ng paglalakbay
upang kamtin ang asam na tagumpay

di dapat magsulong-urong sa laban
lalo't nasang baguhin ang lipunan

Trapong kuhila at ang Santo Papa

TRAPONG KUHILA AT ANG SANTO PAPA
ni Gregorio V. Bituin Jr.
8 pantig bawat taludtod

nang humalik ang buwaya
sa kamay ng Santo Papa
animo'y maamong tupa
pag sila'y iyong nakita

tila maskara ang mukha
nawala ang mga gatla
naging tupa ang kuhila
animo'y kaawa-awa

sana maskara'y matanggal
nang di na sila magtagal
malantad ang trapong hangal
sa harap ng Papang banal

* ang litrato ay editorial cartoon ng Manila Times, Enero 15, 2015; hinggil ito ng pagdalaw ni Pope Francis sa bansa

http://www.manilatimes.net/trapos/155732/

Ang Bilin ng Santo Papa

ANG BILIN NG SANTO PAPA
ni Gregorio V. Bituin Jr.
13 pantig bawat taludtod

matalas, malalim ang bagong Santo Papa
si Francisco'y nananawagan ng hustisya
katarungan sa dukha, sa inaping masa
hustisyang panlipunan, hustisyang pangklima

mabunying lider ng Simbahang Katoliko
malumanay magsalita, kapara'y santo
ngunit nakahihiwa pag iyong natanto
payak na kataga kung mauunawa mo

ang tao'y tao, ang tao'y hindi kalakal
ngunit ngayon, ginamit sila ng kapital
na upang mabuhay, kakapit ka sa punyal
sa sistemang bulok ay nagpapakahangal

pati pakikipagkapwa-tao'y nawala
di na kinilala ang mga manggagawa
lalong dumarami yaong nagdaralita
pati kalikasan na'y nasisirang lubha

anang Papa, huwag sambahin ang puhunan
bayaran ang mga utang sa kalikasan
igalang ang dangal, lahat ng karapatan
ang bilin ng Santo Papa'y ating tandaan

- kinatha noong Enero 14, 2015, sa Bantayog ng mga Bayani
binasa sa aktibidad na Fossil-Free Vatican na inorganisa ng 350.org at dinaluhan ng iba't ibang samahan

Hiling ng mga dating napiit

HILING NG MGA DATING NAPIIT
ni Gregorio V. Bituin Jr.
15 pantig bawat taludtod

hiling sa Santo Papa ng mga dating napiit
kalayaan ng bilanggong pulitikal ang giit
panawagan nila'y maaring dinggin kahit saglit
upang bigyang pag-asa ang tinig ng maliliit
pati na pamilya nila't mga anak na paslit

hiling sa Santo Papa ng mga dating bilanggo
makatulong siyang ang nakakulong pa'y mahango
mula sa piitang deka-dekadang sumiphayo
sa mga bilanggong pulitikal na nagdurugo
yaong puso sa paglayang nais nilang matungo

ang mga bilanggong pulitikal ay aktibista
ikinulong dahil ipinagtatanggol ang masa
ikinulong dahil sa prinsipyo't pakikibaka
ikinulong dahil lumaban para sa hustisya
ikinulong dahil nais baguhin ang sistema

ang pangulo ba'y maaari niyang habilinan?
bilanggong pulitikal na'y palayaing tuluyan!
di ba't siya'y Santo Papang para sa katarungan?
di ba't siya'y para rin sa hustisyang panlipunan?
at kaya iyong gawin, siya'y may kapangyarihan

kailangan lang, panawagang ito'y makarating
sa Santo Papa upang ito'y agad niyang dinggin
upang makakain, kailangan tayong magsaing
upang may matamo, pagsikapan ang bawat kusing
upang magwagi, sa pansitan dapat laging gising

* Isinagawa ang pag-aayuno para sa pagpapalaya ng mga bilanggong pulitikal noong Enero 13, 2015, araw ng Martes, mula sa Morayta, nagmartsa patungong Mendiola at nagprograma doon, at nagmartsa muli patungo naman sa UST sa España, at doon ipinagpatuloy ang ayuno; pinangunahan ang pagkilos na iyon ng grupong XDI (Ex-Political Detainee Initiative) at UATC (United Against Torture Coalition)

Ayuno para mapalaya ang mga bilanggong pulitikal

AYUNO PARA MAPALAYA ANG MGA BILANGGONG PULITIKAL
ni Gregorio V. Bituin Jr.
13 pantig bawat taludtod

kayrami nilang bilanggong senior citizen
nakapiit silang deka-dekada na rin
marami nga sa kanila'y naging sakitin
mga tulad nila'y dapat nang palayain

kayrami ring bilanggong biktima ng tortyur
na pag nabatid mo'y masasabing "que horor!"
nawawala yaong tinatawag na balor
pagkatao nila'y tinanggalan ng onor

palayain silang bilanggong pulitikal
sila'y aktibista, hindi mga kriminal
lumaban sa kapangyarihan ng kapital
nilabanan ang mga trapong pusakal

hindi sila kriminal, sila'y aktibista
ikinulong dahil sila'y nakikibaka
naghahangad ng pagbabago ng sistema
at maging pantay ang kalagayan ng masa

kami'y nag-ayuno, isa ang panawagan
preso silang dapat palayaing tuluyan
bilanggong pulitikal na nakipaglaban
may adhika't prinsipyong laban sa gahaman

* Isinagawa ang pag-aayuno para sa pagpapalaya ng mga bilanggong pulitikal noong Enero 13, 2015, araw ng Martes, mula sa Morayta, nagmartsa patungong Mendiola at nagprograma doon, at nagmartsa muli patungo naman sa UST sa España, at doon ipinagpatuloy ang ayuno; pinangunahan ang pagkilos na iyon ng grupong XDI (Ex-Political Detainee Initiative) at UATC (United Against Torture Coalition)

Ilang likhang kasabihan 2

ILANG LIKHANG KASABIHAN 2
ni Gregorio V. Bituin Jr.
9 pantig bawat taludtod

naliligaw ang di marunong
magtanong ng simpleng direksyon

ang nais na magandang barong
bumabango pag sinasabon

anong tigas man ng balatong
napapalambot din paglaon

sakaling ikaw ay magutom
aba'y kasalanan mo iyon

pag pikolo ang pasalubong
may disgrasya sa Bagong Taon

Ilang likhang kasabihan 1

ILANG LIKHANG KASABIHAN 1
ni Gregorio V. Bituin Jr.
7 pantig bawat taludtod

pag malibag ang suot
di marunong magkusot

kayganda ng pakipot
natapat sa kuripot

pag daw nakasimangot
lagi raw nauutot

yaong kamot ng kamot
galis ang kinukutkot

nakatitig sa laot
may binaon sa limot

tumatamis ang pulot
pag pagsinta'y malapot

pag sa ulo'y kumamot
may gawaing nalimot

suliraning nasambot
dapat agad masagot

pag dama'y tila kurot
baka kagat ng surot

sa bayan na'y managot
ang sinumang kurakot

Pagkakaisa sa Bagong Taon ay mahalaga

Pagkakaisa sa Bagong Taon ay mahalaga
Ito ang susi sa asam nating kapayapaan
Ang hinahangad na ginhawa nawa'y matamo na
Maliit man ito'y isang tagumpay pag nakamtan
Oo, di yaman ng mundo, dami ng kotseng angkin
Nakapagpapasaya sa puso'y angking pag-ibig
Tanging sa pagsinta madarama ng puso natin
Ang pangarap na mahigpit na pagkakapitbisig
Lingunin natin ang nakaraan at maninilay
Buhay natin pag nagkakaisa nga'y mabubuo
Ating pagsikapang protektahan ang bawat buhay
Nang kapwa natin dukha sa luha't dusa'y mahango

- gregbituinjr.

Panagimpan

PANAGIMPAN
ni Gregorio V. Bituin Jr.
12 pantig bawat taludtod

isang panagimpan, diwa'y pinupupog
ng pusong may luha ng bigong kahapon
pagkakaibigang dulot ng lambanog
na naumpisahang kasabay ng alon
matatanggihan ba ang dulot ng hamog
sa bawat umagang tila umaambon

Salamisim

SALAMISIM

mag-isang nakatitig sa kawalan
naroong nag-aapoy ang kalamnan
habang sinisipat sa kalangitan
nagbunga na ba ang pinagpawisan

- gregbituinjr., 12/26/14

Basura

BASURA

tambak-tambak ang plastik
sa kanal nakasiksik
basura'y inihasik
ng mga walang imik

sa Pasko'y pulos barik
sa tagay na'y naadik
hanggang mata'y tumirik
tuluyan nang naghilik

- gregbituinjr., 12/26/14

Hangga't di sentensyado

HANGGA'T DI SENTENSYADO
ni Gregorio V. Bituin Jr.
15 pantig bawat taludtod

hangga't di sentensyado'y inosente pa rin sila
kailangang "beyond reasonable doubt" ang sentensya
ngunit sa dukha'y mayaman, ang batas ay kaiba
kulong agad ang dukha, mayaman ay malaya pa

"beyond reasonable doubt" dapat, sabi ng pangulo
nang kanyang alipores ay masangkot na sa gulo
ngunit pag oposisyon ang tinatadtad ng kaso
nais ng rehimeng maikulong na agad ito

sentensyado na sa masmidya ang inakusahan
ngunit akusado, sarili'y kayang depensahan
kaya pang magtalumpati sa harap nitong bayan
dahil di pa sila sinentensyahan ng hukuman

dukha'y kulong agad nang mang-umit ng kilong tuyo
walang "beyond reasonable doubt", sila na'y naluto
pag nang-umit sa kabang bayan ang trapong hunyango
sila pa'y inosente't dakila ang balatkayo

dapat pantay-pantay ang batas, dukha o mayaman
subalit hangga't kapitalismo pa ang lipunan
batas ay para lang sa mayaman at sa iilan
kaya pagbabago nitong sistema'y kailangan

Tiwali

TIWALI
ni Gregorio V. Bituin Jr.
13 pantig bawat taludtod

balimbing ang mga pulitikong tiwali
subalit kailangang magbakasakali
aasahan ba sila sa bukas ng lahi?
pagkat pinuno ang sa kanila'y taguri?

kailangan din ng pinuno, kailangan
upang pamunuan ang kanyang mamamayan
dalhin sila sa magandang kinabukasan
gampanang mabuti ang tungkulin sa bayan

subalit kung tiwali na't di naglilingkod
at ang masa'y di na nito tinataguyod
ganitong pinuno'y wala palang gulugod
patalsikin ang walang silbi't mga tuod

katiwalian nila'y sadya nang palasak
at ang buong bayan ang ipinahahamak
sa lipunan sila'y tunay na mga latak
tiwaling trapo'y dapat lang nating ibagsak

Ang Baha sa Sampaloc

ANG BAHA SA SAMPALOC
ni Gregorio V. Bituin Jr.
15 pantig bawat taludtod

I
Musmos pa lang danas ko na ang baha sa Sampaloc
Naglulutangan ang mga bagay, di ko maarok
Habang mahal kong ina't ama'y panay yaong ligpit
Itataas yaong mga mahahalagang gamit
Di ako makapaglaro sa butas na lansangan
Di ako makatawid sa pagbili sa tindahan
Bilin kasi ni ina, huwag dumaan sa baha
Dahil marumi raw ito't inihian ng daga.

II.
Kaylaki ko na, binabaha pa rin ang Sampaloc
Baha sa daang España'y di ko pa rin maarok
Dulot ba ito ng climate change o kawalang paki
Kayrami ng administrasyong di yata nagsilbi
Bakit di masolusyunan, wala bang laang pondo
Kung hindi nila kaya, may magagawa ba tayo
Sa ambong tikatik, babahain na ang kalsada
Habang mga trapo'y nagsisitabaan ang bulsa.

III.
Nagbagyo muli, Sampaloc pa rin ay binabaha
Mga basura sa kanal ay tila nagwawala
Naglipana kung saan-saan ang basurang plastik
Bumara sa daluyang tubig, doon nagsumiksik
Bakit hanggang ngayon problema'y di malutas-lutas
Ang solusyong tagpi-tagpi ba'y naging butas-butas
Tatanda akong binabaha pa rin ang Sampaloc
Sana sa paglaon, pagbaha'y akin nang maarok.

Korina at Ruby

* Apat na kasabihan o salawikain ang nalikha ng inyong lingkod hinggil sa sinabi ng mamamahayag na si Korina Sanchez na umano'y dapat pumunta na lang ang malakas na bagyong si Ruby sa Japan imbes na sa Pilipinas. Dahil doon ay itinuring ni Japanese Prime Minister Shinzo Abe si Korina Sanchez na persona non grata sa Japan. Walang personalan po, sariling pananaw lamang sa mga nangyayari sa lipunan. - gregbituinjr

KORINA AT RUBY
ni Gregorio V. Bituin Jr
11 pantig bawat taludtod

ang sa kapwa'y naghangad ng di tama
ang siyang tinatamaan ng sigwa

ang mag-asam sa kapwa ng di wasto
kung di masamang tao'y sadyang bobo

ilipat daw ang problema sa iba
di na nakatulong, namerwisyo pa

kung bagyong hilahil nga'y di mapigil
dilang sutil pa kayang anong tabil

nagmamalasakit lang sa sarili
iniirapan naman ang katabi

(balita mula sa http://sowhatsnews.wordpress.com/2014/12/08/japan-declares-korina-sanchez-persona-non-grata/)