Sa araw ng paggawa

Sabihin mo sa aking tamad ang mga obrero
At tiyak na makikita mo ang hinahanap mo
Ang manggagawa ang umuukit ng buong mundo
Ramdam iyon ng lahat, na di matanggap ng tuso
At ganid sa lipunang yakap ay kapitalismo.

Walang pang-aapi't pagsasamantala, pangarap
Ng uring manggagawang nasadlak sa dusa't hirap
Gagawin lahat upang bawat isa'y magsilingap
Pati problema ng masa'y kanilang hinaharap
At gumagawa ng solusyon sa problemang lasap.

Gusto ng obrero'y maging pantay ang kalagayan
Ganap na pagbabagong adhika ng mamamayan
At gabay din ng masa upang matutong lumaban
Wawasaking lubos ang kapitalismong gahaman
At itatatag ang makamanggagawang lipunan.

- gregbituinjr.

Sa bisperas ng Araw ng Paggawa

dapat ay katapusan na ng kwarantina ngayon

petsa Abril a-trenta, nagbago na't may ekstensyon

petsa Mayo a-kinse ang bago nilang suhestyon

kalahating buwan pang kulong sa bahay maghapon

bisperas pa naman ngayon ng Araw ng Paggawa

ng pandaigdigang araw ng uring manggagawa

kahit nasa lockdown man, magdiriwang sa gunita

bukas, alalahanin ang proletaryong dakila

may ekstensyon man, tuloy ang gampanin at pagkilos

sa anumang paraan, gawa'y nilulubos-lubos

na mabago pa rin ang sistemang mapambusabos

at mapagkaisa ang manggagawang dukhang kapos

katapusan na ng buwan, anong nababanaag?

may bagong pag-asa ba o buhay pa rin ay hungkag?

"flatten the curve", sana kurba'y tuluyan nang mapatag

upang madamang ang kalooban na'y pumanatag

- gregbituinjr.

04.30.2020

Torpeng tibak

torpe na mula pagkabata, laging inaalat

bagamat pakikisama'y ginagawa kong lahat

laging tinutukso, kinukulit, may nang-uupat

tatahimik na lang, huwag lang silang mambabanat

bagamat torpe, di ako umiiyak sa sulok

pag naagrabyado, bigla nang iigkas ang suntok

walang sabi-sabi, tiyak nguso nila'y puputok

mensahe ko na iyon sa mayayabang ang tuktok

tumakbo ang panahon, ako'y naging pasensyoso

naging tibak na tapat sa tungkulin at prinsipyo

ako man ay torpe, marunong umiwas sa gulo

ang sistemang bulok na lang ang tinututukan ko

aktibistang torpe, nanligaw at nagkaasawa

ngunit di nawala ang prinsipyo't pakikisama

kumikilos pa para sa panlipunang hustisya

sinong maysabing torpe ang tulad kong aktibista?

- gregbituinjr.

Gaano karaming lupa ang kailangan ng tao?

pamagat pa lang ng aklat, nakakaintriga na

anong sagot sa tanong? ito ba'y pilosopiya?

"How much land does a man need?" ay pamagat at tanong pa

na magandang akda ni Leo Tolstoy mula Rusya

tanong bang ito'y tungkol sa pribadong pag-aari?

ilang lupa ang dapat mong ariin kung sakali?

libu-libong ektarya ba sa puso mo'y masidhi?

dahil ba sa lupa kaya maraming naghahari?

ilan bang lupa ang kailangan ng isang tao?

bibilhin? aagawin? palalagyan ng titulo?

pinalalayas ba ang dukha para sa negosyo?

at kapag yumaman na, sa pulitika'y tatakbo?

di ko pa tapos basahin ang nobela ni Tolstoy

sa pamagat pa lang, mapapaisip ka na tuloy

ilan na bang dahil sa lupa'y lumuha't nanaghoy?

ilan ang naging playboy, ilan ang naging palaboy?

pag wala ka bang lupa, ang buhay mo na'y hilahod?

kaya pribadong pag-aari'y itinataguyod?

ideyang pyudal? magkalupa ba'y nakalulugod?

o lupa'y kailangan mo sa libingan mo't puntod?

- gregbituinjr.

Paglalaba sa umaga

paggising sa umaga ay agad nang maglalaba

tatlong araw na kasing labada ko'y nakatengga

kaysa naman tuluyang bumaho, aba'y labhan na

sino pa bang aasahan mo, may katulong ka ba?

wala, kaya sariling katawan ang aasahan

lagyan ng tubig, sabunin, kusutin, at banlawan

dapat ding iayos ang mga damit sa sampayan

upang di gusot pag natuyo na ang kasuotan

upang di na rin plantsahin, tipid pa sa kuryente

ito'y pagpapahalaga mo na rin sa sarili

pagpapahalaga'y parang pagligaw sa babae

at sa bawat diskarte'y tumatagos ang mensahe

buhay mo ma'y karaniwan, kahit isa kang dukha

basta wala kang inaapi, ginagawa'y tama

sa paglalaba pa lang, mabuti kang halimbawa

pag mahusay sa gawain, maraming nagagawa

- gregbituinjr.

Kalusugan ay isama sa pagbabago ng sistema

higit pa sa Ondoy, Yolanda, o anumang sigwa

ang nananalasang salot kahit di pa tumama

sa pamilya ngunit pangamba'y nakakatulala

higit pa sa tripleng pag-iingat na'y ginagawa

bawal magkasakit, lalong mahirap magkasakit

tila pangmayaman lang ang ospital, anong bait

kung wala kang pera't may prinsipyong bawal mangupit

tiyak na pag nagkasakit ka'y nakapagngingitngit

"Bawal magkasakit" ang nadagdag  na panawagan

sa sarili, pamilya, barangay, samahan, bayan

paano ka nang kikilos kung may sakit ka naman

anong hirap humiga sa banig ng karamdaman

idagdag ang kalusugan sa gustong pagbabago

ng bulok na sistemang kayrami nang pinerwisyo

karapatan sa kalusugan ay dapat iwasto

ospital at klinika'y huwag ding isapribado

di dapat maging negosyo ang kalusugan natin

na kung sino lang ang may pambayad ang gagamutin

kaya ganitong sistema'y dapat nating baguhin

isang lipunang makatao ang ating likhain

- gregbituinjr.

Di sumusuko ang mandirigma

"As a fighter, you don't give up." - Mphathi Rooiland

I

ang mandirigma'y mandirigma't di basta susuko

sabi ng estrangherong nilalakad ay kaylayo

walang pamasahe, gutom, ngunit di nasiphayo

sa adhikaing makasama ang kanyang kadugo

II

huwag susukuan ang kaunti mong suliranin

o kahit marami pa, ito'y may kasagutan din

sa pagharap sa problema, iyo munang suriin

tulad ng puzzle, chess o sudoku'y iyong lutasin

lagi mong isipin, may kalutasan din ang lahat

ng suliraning di mo matingkala't di mo sukat

akalaing daratal, gaano iyan kabigat?

paano't bakit sumulpot, saan iyan nagbuhat?

imbes layuan, gawin mo itong malaking hamon

na kaya mo itong malutas, maging mahinahon

tulad ng mandirigmang sumusuko paglaon

tatawa ka na lang, iyon lang pala ang solusyon

- gregbituinjr.

Gagawin matapos ang lockdown

matapos ang lockdown, maghahanap na ng trabaho

nasisilip na ng biyenan, wala raw asenso

anong kakainin ng pamilya kung walang sweldo?

at naikwento pa sa magulang ko ang ganito

buti't di na umatake ang gallbladder ni misis

wala ring panggastos kung sakaling siya'y matistis

ganito lang daw ba ang buhay, pulos pagtitiis?

ako raw ay pultaym na tibak na di pa umalis

saan hahanap? sinong tatanggap na pagawaan?

kung sa biodata pa lang, kayraming karanasan

na higit kalahati ng buhay, nasa kilusan

susumpa ba akong pag-oorganisa'y tigilan?

masipag bilang tibak lalo na sa pagsusulat

maagang gumising,  gagawin kung anong marapat

naging sekretaryo heneral din ng ilang pangkat

magkatrabaho man, sa tungkulin pa rin ay tapat

matapos ang lockdown, iyan ang una kong adhika

maghanap ng trabahong sa pamilya'y kakalinga

kung kaya, baliin muna ang layuning dakila

magsilbi sa kapitalista, na kahiya-hiya

kahit tagahugas ng plato'y aking papasukin

upang di mapahiya sa umaasa sa akin

sana'y may makatulong sa ganitong suliranin

tanging masasabi ko'y tapat ako sa tungkulin

- gregbituinjr.

04.28.2020

Danggit at hawot

danggit at hawot, parehong tuyo ngayong umaga

ang aming inulam na kahit papaano'y mura

kaysa processed food o junk food doon sa groseriya

mabuti't di na muna isdang kinulong sa lata

pinirito ko sa kawali ang parehong tuyo

basta huwag masunog ay agad kong hinahango

matigas na mantika'y lumalambot sa pagluto

kasabay ng kanin, aba'y anong sarap isubo

pag masarap ang almusal, masigla ang katawan

dama mong sa anumang gagawin ay gaganahan

mahalaga'y di magutom ang tiyan at isipan

maglampaso, magwalis, maglaba, o magdilig man

danggit at hawot, isawsaw sa suka, O,  kaysarap

habang sa isip ay may kung anong inaapuhap

sa pagkatha, wastong salita ang aking hagilap

upang mambabasa'y may bagong pag-asang malasap

- gregbituinjr.

04.28.2020

Ginisang karot at wombok

ginisang karot at wombok ang inulam kagabi

na hinaluan pa ni misis ng tunang Century

sa sarap, pakiramdam ng katawan mo'y iigi

aaliwalas agad ang mukhang di mapakali

kaysarap iulam ng ginisang karot at wombok

maganda sa katawan, di ka agad inaantok

pakiramdam mo'y aktibo ka sa pakikilahok

kaya pagkakain, nilinis ang kawali't sandok

ang kasarapang ito sana'y malasahan mo rin

at di ka magsisising masarap ang iyong kain

subukan mo kayang magluto nito't gagaan din

ang pakiramdam mo kahit ito'y iyong papakin

tila sa nananalasang sakit ay gamot ito

o tingin ko lang pagkat wala nang sakit ng ulo

baka mawala ang kulubot at gatla sa noo

ah, basta masarap ito't sasaya ka rin dito

- gregbituinjr.

04.28.2020

* wombok - ito ang tawag sa petsay Baguio, ayon kay misis

Palaisipan ng makata

pinagninilayan ng makata'y palaisipan

kapara'y krosword at sudokung madalas sagutan

habang ang buwan at bituin ay pinagmamasdan

bukod doon, ano pang mayroon sa kalawakan?

natanaw niya ang bruhang nakasakay sa walis

nakarating na raw sa buwan ang asong may galis

may garapata na sa buwan, mapapabungisngis

agogo'y tinitingalang bituing nakaburles

ang makata'y pangiti-ngiti, mamaya'y luluha

magkano raw kung bilangin ang isang perang muta

tumula ang makatang pinabili lang ng suka

at masigabo pa rin ang palakpakan ng madla

pinangako ng makata sa diwata'y bituin

na kanya raw iaalay kung siya'y sasagutin

anong sarap ng pag-ibig kung iyong daranasin

lalo't kasama mo ang diwatang kayrikit man din

- gregbituinjr.

Ang tanong ng diwata

isang kabig, isang tula ang buhay ng makata

na tinatawag minsang hampaslupang pinagpala

isang kahig, isang tuka man siya't naglulupa

hangarin niyang maalpasan din ang dusa't sigwa

umuulan na, ang tubig ay diretsong alulod

kaya dapat agad maglagay ng timbang panahod

habang pinagninilayan ang saknong at taludtod

binibilang ang pantig nang tula'y di mapilantod

nasa isip nga'y diwatang inalayan ng rosas

na sa handog niyang tula'y kayraming naipintas

bakit daw nais ng makata'y lipunang parehas

gayong naglipana ang sakim, tuso't balasubas

nagpaliwanag ang makatang nais ipagwagi

ang puso ng diwatang may napakagandang ngiti

anya, lipunang nais ay walang dinuduhagi

walang mayaman o dukha, pantay anumang lahi

lipunang pinapawi ang asal-tuso, gahaman,

at pribadong pag-aaring sanhi ng kahirapan

sistemang umiiral ang hustisyang panlipunan

ngumiti ang diwata't sila'y nagkaunawaan

- gregbituinjr.

Maging bahagi ng pagbabago

aanhin mo naman ang isang buhay na tahimik

at walang ginagawa kundi sa sulok sumiksik

habang isyu't problema ng bansa'y namumutiktik

walang pakialam kahit na mata'y magsitirik

bahagi ka ng lipunan, halina't makibaka

at ating ipaglaban ang panlipunang hustisya

maging bahagi ka ng pagbabago ng sistema

at pagsikapang lumaya sa kuko ng agila

pag-aralan ang mga teorya ng pagbabago

maging kaisa sa pakikibaka ng obrero

iwaksi ang pribadong pag-aari't luho nito

at atin nang itayo ang lipunang makatao

masarap maging bahagi ng pangmasang gawain

na pakikipagkapwa'y itinataguyod natin

na pagpapakatao'y isinasabuhay man din

lipunang walang pang-aapi'y ating lilikhain

- gregbituinjr.

Ang sinumpaan

pag sumumpa ka hanggang kamatayan, panindigan

tulad ng pagsumpa ng katapatan sa kilusan

"salita'y panunumpa," ayon nga sa Katipunan

doon sa Kartilyang umugit sa puso't isipan

higit dalawa't kalahating dekada na ako

na niyakap ang bisyon, misyon, adhika't prinsipyo

ng pagkakapantay nitong mga tao sa mundo

walang mayaman o dukha, lipunang makatao

hangarin ay lipunang walang pagsasamantala

ng tao sa tao, nang may panlipunang hustisya

di lang pulos rali pag sinabing pakikibaka

kundi lumulutas din ng samutsaring problema

halina't lipunang makatao'y ating itayo

panghabambuhay na pangarap na di maglalaho

na mula sa kahirapan, uring dukha'y mahango

at maisakatuparan ang lipunang pangako

ito ang sinumpaang tungkuling dapat maganap

na sama-samang itayo ang lipunang pangarap

tutuparin ang layunin gaano man kahirap

hanggang ginhawang pangarap ng bayan ay malasap

- gregbituinjr.

Makating pakiramdam

sumasakit itong puwit, tila may almoranas

nang kinapa ko'y may bilog na balat na lumabas

sa butas, makati ang pakiramdam, anong lunas?

dapat pang umiri upang makalabas ang etsas

kaytagal ko sa kubeta, mag-iisang oras din

di na naisipan pang mag-almusal o kumain

sa kwarantina'y tila nagiging masasakitin

umiikli na ba ang buhay? mamamatay na rin?

saan patungo ang tulad kong isang perang muta

isang kabig, isang tula ang tulad kong makata

isang kahig, isang tuka ang tulad naming dukha

na isang pildoras man ay di mabili, kawawa

isang libo't isang panday ang makatang may husay

subalit sa panahong ganito'y di mapalagay

may sakit ang katawan, malusog ang pagninilay

nais nang magpahinga't sa tula'y huwag mawalay

- gregbituinjr.

Saan patungo ang maghapon?

saan na naman patutungo ang maghapong ito?

na kahit tag-araw, pakiramdam mo'y bumabagyo

nilalagnat ang kalamnan, tumama'y ipuipo

paano ba malulunasan ang sakit ng ulo

nangangatog ang mga tuhod pagkagising pa lang

animo'y pinaglaruan ng sanlibong balang

tila ba nagdedeliryo, diwa'y palutang-lutang

nasa diwa'y paano diligan ang lupang tigang

masakit makitang magkasakit ang kapamilya

di maisugod sa klinika pagkat walang pera

di malaman kung nakabuti nga ang kwarantina

lalo't wala na ngang trabaho ay wala pang kita

"Bawal magkasakit," ayon sa isang patalastas

ito'y isang paalalang dapat kang magpalakas

magpaaraw ka, maggulay ka, uminom ng gatas

at tubig, bakasakaling ito ang makalunas

- gregbituinjr.

Di magla-lie low

pinatitigil na ako't mag-lie low nang tuluyan

nais nilang maging mabuti akong mamamayan

at maging karaniwang walang malay sa lipunan

nais nilang baguhin ang buo kong katauhan

iminomolde nila ako sa kanilang gusto

subalit sa kalaunan ay aking napagtanto

di ako ang kanilang gusto kundi ibang tao

gusto nila'y taong ayon sa kanilang modelo

tila ba ako'y lalaking nawala sa sarili

nawala na ang pagkatao't laman ng kukote

sana ito'y kinatha lang ng aking guniguni

ngunit tunay, sampalin mo man ako, binibini

sampalin mo na ako nang magising sa pagkahimbing

sa bokabularyo ko'y walang "lie low", ow? magaling

di pa hihinto sa pagkilos, di pa ako praning

kahit bayaran pa ng samperang tumataginting

- gregbituinjr.

Nobela na ang nais sulatin

bakit daw ako sulat ng sulat, kanilang tanong

dahil ayokong nakatunganga, baka maburyong

ito ang paraan ko ng pagbahagi'y pagtulong

kaysa naman sa droga't yosi lang ako malulong

pulos tula nga lang at pawang eksperimentasyon

akrostika, unang pantigan, soneto,  de kahon

ang nais ko namang sulatin ay nobela ngayon

lalo na't kwarantina't dinaranas pa ang ambon

paano ba sisimulan ang nobelang hangarin

kung yaong maikling kwento'y di pa kayang sulatin

maikli man ang dagli, mamimilipit ka pa rin

para bang gawaing ito'y sangkaterbang pasanin

subalit kung manunulat ka'y gagawin ang lahat

magplano, magbalangkas, magbanghay, bago magsulat

sa huli mo na isipin kung ano ang pamagat

aba, simulan na bago pa abutin ng alat

- gregbituinjr.

Bandalismo

sa pader, anila, bandalismo'y pagdudumi lang

na gawain ng walang magawa, may pusong halang

ngunit anong istorya sa likod ng mga patlang

bakit isyu ng bayan ang doon ay nakasalang

bakit naman bandalismo'y napiling gawin nila?

may dahilan kung bakit natin ito nakikita

upang mabasa ng madla ang hinaing ng masa

at mabasa ang di binabalita ng masmidya

huwag mong laging tingnan kung bakit ito dumumi

suriin mo rin anong nakasulat na mensahe

bakit nasa pader ang sa masmidya'y di masabi

alamin bakit hibik ng masa'y sinasantabi

bandalismo'y armas ng pinagsasamantalahan,

ng inaapi't ginigipit nating mamamayan

sa pader pinagsasalita ang nasa isipan

na di masabi't maulat ng masmidya sa bayan

- gregbituinjr.

Ang kwarantina'y isang garison

ang lockdown o kwarantina'y parang isang garison

sa sariling tahanan ay bilanggong nakakulong

tingin sa sarili'y walang kwenta, nabuburyong

nabubuhay, ani Balagtas, sa "kutya't linggatong"

nabubusog ang tulad ko sa maraming palagay

habang gutom sa hustisya ang natokhang, pinatay

guniguni'y may binubulong habang nagninilay

dapat kong ituloy ang gawaing basa-talakay

malupit ang pakiramdam sa bahay nakapiit

para bang sa kwarantina lagi kang nakapikit

habang kinukulong din ang vendors na maliliit

sa iba'y munting bagay, sa akin nakakagalit

ramdam ko'y buryong sa kwarantina, sa totoo lang

sa garisong ganito'y nais ko na'y kalayaan

ngunit nais ko pang manatili ang katinuan

kaya tula pa rin ng tula sa kasalukuyan

- gregbituinjr.

Ang buhay ko'y pakikibaka

ang buhay ko'y pakikibaka, alam nila iyan

mamamatay akong adhikain pa rin ay tangan

di mawawala ang prinsipyo sa puso't isipan

mamatay man ako, patuloy na maninindigan

sa parlamento ng lansangan kapiling ng masa

kumikilos pa rin at magtatatlong dekada na

di tumitigil, hanggang kamatayan ang pagbaka

alam nila ito, ang buhay ko'y pakikibaka

sayang ang buhay ko kung mananahimik sa tabi

habang naghihikahos ay parami ng parami

kaya ayokong iniisip na lang ay sarili

kikilos pa rin ako't sa bayan ay magsisilbi

"Be a man for others," ang payo nga ng paaralan

tapos magiging makasarili kang mamamayan?

sayang ang buhay ko kung ganyan ang nasa isipan

para kang buwayang nanggagalugad sa katihan

"Iisa ang pagkatao ng lahat," ang sabi nga

ni Emilio Jacinto, bayaning mapagkalinga

kaya kasama ko'y aping uri, obrero't dukha

pagpapakatao'y tunay na gawaing dakila

- gregbituinjr.

* "Ang Buhay Ko'y Pakikibaka" ang nais kong pamagat ng isa sa mga gagawin ko pang aklat ng mga tula

Matapos ang lockdown

matapos ang lockdown, ako na'y magboboluntaryo

sa mga nangangailangan ng aking serbisyo

kahit walang sahod o kaya'y mababa ang sweldo

ibabalik kong muli ang sigla nitong buhay ko

 masisilayan akong muli sa pakikibaka

at magsusulat pa rin ng artikulong pangmasa

ipaglalaban pa rin ang panlipunang hustisya

at muling sasama sa pagbabago ng sistema

hihiwalay sa mga sagabal sa simulain

lalayuan ang sinumang balakid sa layunin

una lagi'y prinsipyo't niyakap na adhikain

iba'y suporta lang sa sinumpaan kong tungkulin

matapos lang ang lockdown, patuloy ang aking misyon

kikilos para sa adhikaing niyakap noon

ayokong basta na lang mawala sa sirkulasyon

mabuti nang mamatay kaysa mawala ang layon

- gregbituinjr.

Huwag kang lumabas ng bahay, baka barilin ka

huwag kang lumabas ng bahay, baka barilin ka

huwag kang bumili ng bigas, baka barilin ka

huwag maghanap ng pagkain, baka barilin ka

huwag ka nang magsalita, babarilin ka nila

huwag hayaang magutom ang pamilya, ingat ka

- gregbituinjr.

04.24.2020

Isa akong loner

isa akong loner, anila'y may sariling mundo

lumaking laging nag-iisa, introvert daw ako

mundo'y pagsusulat, diwata ang kahalubilo

sa loob ng panitikan ang buhay ng tulad ko

hanggang napag-isip ko, ganito lang ba ang buhay

lumabas ako sa kahon at aking napagnilay

nais kong mag-ambag sa bayan, buhay ay ialay

hanggang piliin ko nang maging tibak habambuhay

isa akong loner, sanay kumilos nang mag-isa

tungkulin ay ginagawang buong tapat sa masa

kahit paminsan-minsan ay dinadalaw ng musa

ng panitik na naging kaulayaw ko noon pa

isa akong loner, sa bayan ko'y nababagabag

anong tulong ba ang ibibigay ko't iaambag

sabi ko sa musa, prinsipyo ko'y di matitinag

basta ginagawa ko'y tama't walang nilalabag

maraming salamat kung ako'y naunawaan din

inasawa ng magiliw ang loner na patpatin

sana'y maunawaan din ang prinsipyo kong angkin

na kung mamamatay ako'y yakap-yakap ko pa rin

- gregbituinjr.

Mapuputing ulap

pinagmamasdan kong muli ang mapuputing ulap

at muling naghahabi ng mga bunying pangarap

gayong sa lockdown ay pagkalugmok ang nalalasap

tila pati sa sarili, ako na'y nagpapanggap

nagpapanggap na kunwari ako'y malakas pa rin

kahit dama'y panghihina ng katawang patpatin

na ang isang sakong bigas ay kaya pang buhatin

na sampung kilometro'y kayang-kaya pang lakarin

matatag pa rin sa niyakap kong paninindigan

lalo na't ako'y wala namang layaw sa katawan

tumutula upang manatili ang katinuan

nilalaro'y sudoku, inaaliw ang isipan

langit na'y nagdidilim, may paparating  na unos

at ang mapuputing ulap animo'y nauubos

paano na haharapin itong paghihikahos

sa gitna ng kwarantinang sa bayan nakayapos

- gregbituinjr.

Naglalaro ang mga manok

tinititigan kong naglalaro ang mga manok

animo'y nagbibiruan silang di mo maarok

pinagmamasdan silang ang dama ko'y pagkalugmok

tila ba bawat kalamnan ko'y nais magsiputok

kailan ba matatapos ang kwarantinang ito

nang makahanap ng gawaing kumikita ako

mahirap ang walang kita sa sitwasyong ganito

pakiramdam ko sa sarili, ako na'y perwisyo

isa lang akong pabigat sa pamilya ng byenan

walang maiambag upang magkalaman ang tiyan

lagi'y lampaso, linis, laba, maghugas ng pinggan

paikot-ikot na lang, wala nang ambag sa bayan

sana'y matapos na ang lockdown na di na mabata

nais kong muling magboluntaryo't bagong simula

muling gagampanan ang tungkuling mapagpalaya

at muling makibaka laban sa mga kuhila

- gregbituinjr.

Problema'y disiplina, kamatayan ang parusa

Problema'y disiplina, kamatayan ang parusa

problema'y disiplina, kamatayan ang parusa
pasaway kasi ang mga nagugutom na masa
ang sabi ng pangulo, pasaway ay barilin na
at mga trigger-happy'y ginawa ang atas niya

pareho silang sa dugo ng kapwa naglalaway
sa hazing kasi ang mga trigger-happy sinanay
kunwari'y walang alam sa karapatan at buhay
dahil pasaway kaya babarilin nilang tunay

sariling rules of engagement ay binabalewala
anang pangulo kasi, sagot niya ang maysala
sumunod lang sa asong ulol ang mga kuhila
basta sinabi ng boss nila, wala silang ngawa

problema'y disiplina, ang parusa'y kamatayan
solusyon nila'y pagpaslang sa problema ng bayan
solusyon lagi'y E.J.K. imbes na malunasan
ang sakit at kagutuman ng kapwa kababayan

- gregbituinjr.
04.23.2020

Pagninilay sa kawalan

Pagninilay sa kawalan

higit sa isang buwan na ang kwarantinang ito
lampaso, linis, laba, luto, lalo't lockdown dito
nagbubutingting lang sa bahay, solusyon ba'y ano?
mas malabo pa sa sabaw ng pusit ang ganito

gayunman, sa mga frontliners, maraming salamat
sa inyong pagtulong upang virus ay di kumalat
sana lunas sa virus ay matagpuan nang sukat
para sa kinabukasan, kalusugan ng lahat

dahil sa kwarantina, tayo'y sa bahay maglagi
upang di mahawa, sumunod kahit panandali
di tayo habang lockdown sa bahay mananatili
magugutom ang pamilya't magbabakasakali

titigan minsan ang mga bituin sa karimlan
at pagnilayan mo ang hakbang sa kinabukasan
tiyak na mayroon ka ring nais maliwanagan
habang matamang nakatitig doon sa kawalan

- gregbituinjr.
04.23.2020

Soneto: Kapit sa Patalim

Soneto: Kapit sa Patalim

Kwarantina'y higit isang buwan na, walang kita
Ano na bang dapat gawin, tutunganga na lang ba?
Paano na kami kung patuloy ang kwarantina?
Inipong pera'y ubos na, tibuyo'y bubuksan na?
Tibuyo'y may kaunting barya, walang limang daan
Saan ito aabot kung lockdown pa'y isang buwan?
Ang hirap ng baon sa utang na di mabayaran
Pati yata puri'y baka maibentang tuluyan.
Alalay mula sa gobyerno'y sadya namang kapos
Tunay na sa sampung milyong tao, ayuda'y ubos
Ang daming kakapit sa patalim, walang panustos
Lumalalang sitwasyon ba'y kailan matatapos?
Isiping maigi ang solusyon at magmadali
Magbayanihan tayo'y nawa'y wala nang masawi.
- gregbituinjr.
04.23.2020

Pagsipat sa apat na kwento ngayong umaga

PAGSIPAT SA APAT NA KWENTO NGAYONG UMAGA

kumakain man ng dalawang beses isang araw
kumakayod pa rin sa kabila ng pamamanglaw
kumakanta't tutugtog sa youtube kahit mababaw
kumakasa na't sana'y tanggapin, hataw ng hataw

kumindat ang mutyang diwatang kaysarap ng ngiti
kumisig ba ang binatang nagbabakasakali
kumisap ang ningning sa mata't ngiti'y namutawi
kumilos siya't masagot na, agad magmadali

kumulo na ang tiyan, walang laman ang sikmura
kumurot sa puso ang anak na nagugutom na
kumulimlim na naman ang langit ngayong umaga
kumusta na kaya ang nasa malayong pamilya

kumpunihin ko man ang mga sira't magbutingting
kumpulan ay bawal din, dapat may social distancing
kumpas ng kamay nawa'y suriin ng magagaling
kumpay para sa alaga ko sana'y makarating

- gregbituinjr.
04.23.2020

Kulimlim na ang langit sa katanghaliang tapat

Kulimlim na ang langit sa katanghaliang tapat

kulimlim na ang langit sa katanghaliang tapat
kuliglig ba'y dinig ko o tulog pa silang lahat?
kulisap na iba't iba'y naroroong nagkalat
kulit ni bunsong di mapakali'y saan nagbuhat?

kulog at kidlat animo'y naglampungan sa langit
kulob sa munting dampang munting kibot lalangitngit
kulong pa sa dampa pagkat kwarantina'y naulit
kulo pa ang tiyan, sana'y di naman magkasakit

kulang pa ba sa pamilya ang rasyong ibinigay?
kulata pa'y aabutin pag lumabas ng bahay
kulaba sa mata'y tila lumaki't nangangalay
kulag at gutom pa'y dama, buti't di nangingisay

kulti ang tawag sa pabrika ng balat ng hayop
kultibasyon ba'y tinitiyak upang magkasalop?
kulto sana'y tigilan ang pagsipsip at pagsupsop
kultura'y ating linangin nang di basta masakop

- gregbituinjr.
04.22.2020 (Earth Day)

Kasabihan, kasarinlan, kasaysayan

Kasabihan, kasarinlan, kasaysayan

kasalukuyan ngang mayroon pa ring COVID-19
kasador o mangangaso'y hanap din ay pagkain
kasado rin tayong kumilos upang di gutumin
kasaba man, kamote o talbos lang ang kainin

kasama, patuloy tayong makibaka't kumilos
kasapi tayo nitong lipunang binubusabos
kasali man o hindi'y kayraming naghihikahos
kasangkot tayo sa bayan nating dapat matubos

kasalanan sa bayan ang ganid na paghahari
kasakiman nila sa tubo'y pinananatili
kasagwaang pagyakap sa pribadong pag-aari
kasayahan sa tuso't mapagsamantalang uri

kasabihan nga'y tuloy pa rin ang pakikibaka
kasabayan man o hindi, tayo'y may ninanasa
kasarinlan sa pang-aapi't pagsasamantala
kasaysayang ang nagbuo'y ang pagkilos ng masa

- gregbituinjr.
04.22.2020 (Earth Day)

Pagpupugay sa ika-150 kaarawan ni Vladimir Ilyich Lenin

Pagpupugay sa ika-150 kaarawan ni Vladimir Ilyich Lenin
(Abril 22, 1970 - Enero 21, 1924)

sa pangsandaan limampung kaarawan ni Lenin
halina't siyang taas-kamaong batiin
tunay siyang inspirasyon ng rebolusyon natin
pinuno ng Bolshevik, bayaning tunay, magiting

mga aral niya't sulatin ay ating balikan
kunan natin ng aral ang kanilang kasaysayan
paano nanalo sa Tsar at mga gahaman?
anong niyakap nilang prinsipyo't paninindigan?

nagtagumpay sila kasama ang obrero't masa
dahil sa kanya, ang prinsipyo'y di na lang Marxista
Marxismo'y sinabuhay, pinaunlad ang teorya
kaya yumakap doon ay Marxista- Leninista

mabuhay ka, Vladimir Lenin, mabuhay! Mabuhay!
inorganisa'y Bolshevik, proletaryo'y kaugnay
para sa uring manggagawa, buhay ay inalay
sa iyong kaarawan, taospusong pagpupugay!

- gregbituinjr.
04.22.2020

Tula sa Earth Day 2020

Tula sa Earth Day 2020

Earth Day, ating ipagbunyi ang Araw ng Daigdig
Alagaan ang kalikasan at magkapitbisig
Ritmo ng kalupaan ay iyo bang naririnig?
Tao raw ang sumira't tao rin ang nayayanig
Halina't dinggin ang kalikasang bahaw ang tinig.

Dumi sa paligid, basura sa laot at tuktok
Ang upos, plastik at polusyong nakasusulasok
Yinari ng taong siya ring lulutas, lalahok.

- gregbituinjr.
04.22.2020

Maitim man ang balat

huwag mong hanapin sa akin ang di naman ako
isang taong mayaman, may negosyo, nakapolo
huwag mong hanapin sa akin ang maputing tao
gayong sa simula pa'y alam mong maitim ako
maitim ang balat, di ang budhi o pagkatao

ayaw mong mag-isip ako't sa bayan makialam?
tula'y nang-aagaw ba ng pagsintang di maparam?
imomolde mo ba ako sa iyong inaasam?
papuputiin mo ang kayumangging kaligatan?
babaguhin mo rin ba ang buo kong katauhan?

ako'y aktibistang nais mong maging negosyante
di problema kung nais mong ako'y mukhang disente
ngunit puso't diwa ko ba'y susunod sa diskarte?
mula sa mabuting tibak ay magiging salbahe?
pagkatao'y wala na't sa iba na magsisilbi?

ang maglingkod sa burgesya't kapitalista'y ano?
magpaalipin dahil lang sa karampot na sweldo?
winasak ko lamang ang prinsipyo ko't pagkatao
pag tuluyang nangyari iyan, nakapanlulumo
di na ako ang ako, pagkat pinaslang na ako

- gregbituinjr.

Rebolusyonaryong pag-ibig, ayon kay Che

Rebolusyonaryong pag-ibig, ayon kay Che

“At the risk of seeming ridiculous, let me say that the true revolutionary is guided by a great feeling of love." ~ Argentinian doctor Che Guevara

alam kong may puwang pa sa puso mo ang pag-ibig

ito ang rason bakit tayo nagkakapitbisig

sa ating kapwa't dinadamayan ang walang tinig

pagkat tayo'y magkakapatid sa buong daigdig

kaya huwag kang mainggit na mayaman ang iba

marami sa kanila'y nabubuhay lang sa pera

di nagpapakatao, at balewala ang masa

walang pakialaman, iyan ang prinsipyo nila

puno ng pag-ibig ang nakikibakang tulad mo

nakikipagkapwa, naninindigan, may prinsipyo

tulad mo'y di mukhang pera kundi talagang tao

mabuhay ang tulad mong ang adhika'y pagbabago

rebolusyonaryong pag-ibig ang nagpapakilos

upang magkaroon ng sistemang walang busabos

itatayo ang lipunang walang naghihikahos

adhika'y lipunang pantay na walang dukha't kapos

- gregbituinjr.

Hindi ko ipagdadamot ang aking mga tula

Hindi ko ipagdadamot ang aking mga tula

hindi ko ipagdadamot ang aking mga tula
sa nais magbasa nito o bigkasin sa madla
at kung kailangan, sila pa'y aking igagawa
ng tula, basta magmungkahi lang sila ng paksa

gayunman, salamat din sa mga di nagbabasa
dahil ang mas nais nilang basahin ay nobela
baka tingin nila ginagawa ko'y propaganda
gayong tula'y pagbibigay ng pag-asa sa masa

lumaki na akong nakikibaka't di maramot
pag may pera'y galante, pag walang pera'y kuripot
ngunit aking mga katha'y di ko ipagdadamot
ito'y paraan ko ng pagsisilbing walang imbot

sana'y malathala ang mga ito sa magasin
sa mga dyaryo, libro, o iba pang babasahin
kung mamatay na ako'y daigdig na ang aangkin
nitong mga tulang aking kinatha't di na akin

- gregbituinjr.

Taluktok ay naaabot din ng nakikibaka

Taluktok ay naaabot din ng nakikibaka

talahulugan ay magandang gawin nating gabay
talasalitaan ay gamitin sa tagulaylay
talata o saknong man ay may akibat na lumbay
talastas mo dapat ang paksang iyong naninilay

talindaw ang katha habang bumabaybay sa ilog
talinghaga sa bawat saknong ay damhin mo, irog
talino'y linangin sa mga tulang maalindog
taliwas man sa burgesya'y panindigan ang handog

talos mo naman bakit tinalakay mo ang isyu
talop na talop mo ang buong paksa hanggang dulo
talo man sa debate, isyu'y nalaman ng tao
talon man sila sa tuwa, tumindig kang totoo

talumpati'y atake man sa bulok na sistema
taludtod mo'y patama man sa sukab na burgesya
talukod ka sa sambayanang laging may pag-asa
taluktok ay naaabot din ng nakikibaka

- gregbituinjr.

Ang tagpo'y tagpos man sa takdang panahon

ANG TAGPO'Y TAGPOS MAN SA TAKDANG PANAHON

tagaktak ang pawis sa bawat niyang pagpunyagi
tagal man ng kwarantina'y di nagpapaduhagi
tagas sa gripo'y papasakang may pagmamadali
tagasaan man ay laging nagbabakasakali

tagistis ang pawis sa pagsisipag nilang todo
tagilid kasi ang kabuhayang walang trabaho
tagibang habang iniisip ang kasunod nito
tagisan muna tayo sa paglaro ng sudoku

tagunton ang nililikha ng makata ng buhay
tagulaylay ang kinakatha habang nagninilay
taguyod ang panitikang may mga akdang lantay
taguri sa makata'y isang libo't isang panday

tagpong kung di matingkala'y baka di makaahon
tagpos man o sadyang lampas na sa takdang panahon

- gregbituinjr.

Mag-Bitamina D, panlaban sa sakit

Mag-Bitamina D, panlaban sa sakit

gumising ng maaga, isang oras sa arawan
Bitamina D umano sa sakit ay panlaban
ang init ng araw ay pampalakas ng katawan
upang kurikong at kagaw ay mawalang tuluyan

pagitan ng ikapito't ikawalo ang init
sa umaga'y tamang oras, gawin itong malimit
huwag sa tanghaling tapat, sa balat ay masakit
mag-ehersisyo ka rin, pagpapainit ay sulit

ano ba kung mainitan ng araw sa umaga?
balat mo'y mangingitim? puti mo'y mawawala na?
kung ayaw mong magkasakit, mag-Bitamina D ka
isiping nilalabanan ang virus sa tuwina

kung may sakit ka'y baka unti-unti nang mawala
at papatayin ng init iyang virus na banta
nagbabakasakali, nag-iisip, ginagawa
para sa kalusugan mo, ng pamilya't ng madla

- gregbituinjr.

Tula sa World Creativity and Innovation Day

Tula sa World Creativity and Innovation Day

Maging malikhain sa panahon ng COVID-19
Ang trabaho mo sa labas ay sa bahay na gawin
Gising man ang diwa sa paligid, magsuri pa rin
Inobasyon ng bagay-bagay ay iyong likhain
Naplano mo ba paanong dampa mo'y palakihin?

Guhitin sa isip ang mga inobasyong asam
Magsuri ng kongkreto sa kongkretong kalagayan
Ang sirang gamit ba'y maaayos pa sa tahanan?
Latang walang laman ay maaaring pagtaniman
Ipunin ang mga walang lamang bote't linisan

Kunin ang pluma't papel, magsulat, ano bang plano
Huwag maging kantanod na nanonood lang dito
Abalahin ang sarili't likhain ang kung ano
Isiping sa paligid, may magagawa kang bago
Nawa ang malikha mo'y makakatulong sa tao.

- gregbituinjr.

Kainin mo na lang kaya ang basura mo

KAININ MO NA LANG KAYA ANG BASURA MO

"kainin mo na lang kaya ang basura mo
kung pagtatapon ay di mo kayang iwasto"
ito ang sabi ng isang galit na tao
na minsan pakinggan mo rin ang hibik nito

itapon mo kasi sa tamang basurahan
imbes ikalat ang basura mo kung saan
kumain ng mais sa loob ng sasakyan
itatapon mo ba saan ang busal niyan?

kaya mo bang kainin ang iyong basura
tulad ng kinain nitong isda sa sapa
na ating ikinalat kaya naglipana
sa kanal, sa dagat, sa ilog, kung saan pa

isdang kumain ng basura'y huhulihin
ibebenta, bibilhin, ating lulutuin
mga anak ay masayang ito'y kainin
ulam itong makabubusog din sa atin

sa ganyan natin kinakain ang basura
kaya yaong galit na tao'y tama pala
mauulit muli kung walang disiplina
kung wala kang sakit, baka magkasakit na

- gregbituinjr.

Di tayo tulad ng iba riyang pumapayipoy

Di tayo tulad ng iba riyang pumapayipoy

di tayo tulad ng iba riyang pumapayipoy

dahil tao'y may dignidad, kahit na nagngunguyngoy

di paaapi o pasisindak kahit palaboy

ang tao'y may dangal, kahit sanggol pang inuugoy

di tayo mga asong nangingilala kung sino

na pag sinabihang mangagat, mangangagat ito

tayo'y taong may isip, may dangal, alam ang wasto

di tayo asong bahag ang buntot sa trapo't gago

hayaan ang mga asong sa amo nila'y tapat

na kung nais kang ipakagat, ito'y mangangagat

tayo'y taong alam ang tama, may isip na mulat

batid ano ang hustisya't karapatan ng lahat.

- gregbituinjr.

04.20.2020

* PAYIPOY - paggalaw ng buntot, gaya ng sa aso, mula sa Diksyunaryong Filipino-Filipino, na inedit ni Ofelia E. Concepcion, pahina 152

Singlakas pa ng kalabaw

SINGLAKAS PA NG KALABAW

isang taon na lang ako, nasa isip ko'y lahad

ganito na taun-taon, habang nagkakaedad

may iniinda mang sakit ay sikreto't di lantad

di naman ako nagpapa-check up dahil may bayad

malakas pa ako, malakas pa, ang laging isip

sakit na iniinda'y iiwan sa panaginip

singlakas ng kalabaw, sa rali nga'y di mahagip

ngunit ang manggagamot kaya'y anong nasisilip?

ayokong magpa-check up, ayokong magpaospital

sa pa-check up pa lang, magbabayad ka na ng mahal

check up ay mahal, gamot ay mahal, ako ba'y hangal

di pa Cuba ang palakad sa bansang ating mahal

kaya tama lang isipin kong ako'y malakas pa

at magagawa pang tumindig nitong akin, sinta

tulad ng kalabaw na nag-aararo tuwina

malakas pa't kunwari'y sakit ay di nadarama

- gregbituinjr.

Wastong gamit ng si, sina, sila at kina

Wastong gamit ng si, sina, sila at kina

sina Pedro, imbes na sila Pedro, ang gamitin
kina Ben, imbes na kila Ben, ang wastong sulatin
ang balarila'y unawain at aralin natin
wastong gamit ng mga salita'y ating linangin

ang pangmaramihan ng si ay sina, at di sila
dahil karugtong ng si ay pangalan, si at sina
ang sila ay panghalip, saan ba sila nagpunta
nagtungo sila kay Petra, nagpunta kina Petra

kina dahil marami ang naroon sa tahanan
nina Petra, kay Petra kung isa lang pinuntahan
direkta ang kay at ang kina ay pangmaramihan
at di rin kila kundi kina ang wastong paraan

payak kung uunawain ang balarilang ito
na kung aaralin, makakapagsulat ng wasto
lalo kung nagsusulat ka sa dyaryo o ng libro
aba'y magsulat ka na ng wasto, aming katoto

- gregbituinjr.

Ako'y mamamayan ng daigdig

AKO'Y MAMAMAYAN NG DAIGDIG

ako'y mamamayan ng daigdig

laging nakikipagkapitbisig

sa dukha't obrerong nilulupig

sila'y kasama kong mang-uusig

laban sa kuhilang mapanlupig

nakikiisa sa manggagawa

sa misyon nilang sadyang dakila

na bulok na sistema'y mawala

kaisa pati nagdaralita

itatayo'y lipunan ng madla

internasyunalismo ang taglay

adhika'y lipunang pantay-pantay

at mundong makatao ang pakay

proseso'y nirerespetong tunay

pati na karapatan at buhay

hangad ang panlipunang hustisya

mawala ang pagsasamantala

baguhin ang bulok na sistema

organisahing tunay ang masa

anumang bansa nanggaling sila

misyong may isusubo sa bibig

ang dalitang winalan ng tinig

sa pang-aapi'y di padadaig

dahilan ko'y dapat n'yong marinig:

ako'y mamamayan ng daigdig!

- gregbituinjr.

04.20.2020

* "Ako'y mamamayan ng daigdig" - ito ang plano kong gawing pamagat ng susunod kong aklat ng mga tula.

Basurang tinapon mo'y babalik sa iyo

Basurang tinapon mo'y babalik sa iyo

sa laot, tila ang mga isda'y nagpipiyesta
sa dami ng kinalat ng tao't ibinasura
upos ng sigarilyo, plastik, walang lamang lata
huhulihin ang isda't kakainin natin sila

paano na ang iyong kalusugan pag kinain
ang mga isdang kumain din ng basura natin
nagkatotoo ang kasabihang atin nang dinggin
basurang tinapon natin ay babalik sa atin

kinakain ng mga isda'y sangkaterbang plastik
na sa buong katawan nila'y talagang sumiksik
tama ba ang nangyaring ito, ngayon ka umimik
disiplina sa basura ngayon ang ating hibik

huwag nang magkalat, disiplinahin ang sarili
sa pagbukod ng basura'y huwag mag-atubili
gawin kung anong wasto, sabihin din sa katabi
para sa kalusugan mo at ng nakararami

- gregbituinjr.
04.20.2020

Bawal ang halibyong

BAWAL ANG HALIBYONG

bawal ang halibyong o fake news na ipamahagi

kahit sinong balasubas ay di dapat bumali

sa panawagang halibyong o fake news na'y mapawi

pagkat totoong balita ang dapat manatili

birtud sa fake news ng haliparot ba'y balewala?

tagapagtaguyod ba ng halibyong na'y luluha?

pagkat kapangyarihan nila'y tinitirang lubha?

ang reyna halibyong kaya'y tuluyang magwawala?

huwag nating kukunsintihin ang mga halibyong

dahil may toyo ang mga nagpapadala niyon

anong mahihita nila kung di man sila gunggong?

pabanguhin lang ang pangalan ng idolong lulong?

paano babango kung iuulat nila'y mali?

kung di katotohanan, kasinungalingan lagi

upang sa kanilang propaganda, sila'y magwagi?

habang mismong katotohanan ang dinuduhagi?

tama na ang halibyong, lumikha'y nakakasuka

anong intensyon nila't inililigaw ang masa?

kung binabayaran sila rito't nagkakapera

marahil, may pakana'y di matino't palamara

- gregbituinjr.

* HALIBYONG, taal na wikang Filipino, na ibig sabihin ay disinformation o fake news. Pagkukwento ng isang pangyayari subalit taliwas sa tunay na nangyari. ~ mula sa UP Diksiyonaryong Filipino, p. 426

Kung ako'y di na aabot sa susunod na taon

Kung ako'y di na aabot sa susunod na taon

kung ako'y di na aabot sa susunod na taon
hiling ko na lamang ay maging maligaya ngayon
at masayang ginagawa ang sinumpaang layon
na nakikipagpatintero man sa pating doon
ay titiyakin kong di niya ako malalamon

di man madalumat yaring buhay sa Enkantadya
habang sinusuyo ang magandang Sangre Danaya
ay patuloy ako sa misyon ko't pakikibaka
upang kamtin ng masa ang panlipunang hustisya
habang nag-oorganisa pa rin ng api't masa

nais ko pa sanang umabot ng sisenta'y kwatro
na inawit ni John Lennon ngunit nabigo ito
pagkat siya'y pinaslang ng di malaman kung sino
sana nasabing edad na ito'y maabutan ko
na tulad ng bilang ng parisukat ng chess ito

kung sa susunod na taon ako'y di na sumapit
ang luksang parangal ay huwag sanang ipagkait
tulain ang aking tula'y di ako namimilit
ako mang tumutula sa dusa'y namimilipit
salamat kung sa isip ninyo ako'y di nawaglit

- gregbituinjr.

Agogo

AGOGO

marami kaming ang kariktan mo'y pinanonood
paggiling ng iyong katawan ay nakalulugod
sa patay-sinding kabaret nawawala ang pagod
sinasambang diwata sa kagubatan ng lungsod
kariktan mo'y sinisipat sa pagitan ng tuhod

tinadtad mo na ng kolorete ang iyong mukha
di ka na makilala kung talagang sino ka nga
habang kami sa paggiling mo'y napapatunganga
habang iba'y naglalaway, iba'y natutulala
sa pag-inom ng serbesa'y napapa-"isa pa nga"

uuwi din matapos iyon, babalik sa dati
pusikit ang karimlan, mananahimik ang gabi
maliligo't tatanggalin ang laksang kolorete
paggising, bibilangin ang kinita't pamasahe
sa pamilya'y may limang kilong bigas na pambili

ganoon ang buhay, kakahig upang may matuka
sisingilin muli ng kasera't mukhang kawawa
malapit na naman ang gabi, siya'y maghahanda
maglalagay ding muli ng kolorete sa mukha
sa kabaret na iyon, siya ang tinitingala

- gregbituinjr.

Sa panahon ngayon, Estremelenggoles

Sa panahon ngayon, Estremelenggoles

Estremelenggoles, nananalasa na ang salot
Sa panahon ng COVID-19, ang tao'y hilakbot
Takot sa kalabang di makita't saan susulpot
Ramdam ang pangamba sa sakit nitong dinudulot

Ewan ba natin bakit ang mundo'y nagkaganito
Makatang Rio Alma'y tinula na noon ito
Estremelenggoles, pamagat ng tula ni Rio
Laman ng istorya'y salot, COVID ang kapareho

Enactment ba ang kanyang tula sa nangyari ngayon
Nananalasa ang salot at pumatay ng milyon
Gawa'y nag-atas sa lahat ng manggagamot noon
Gumamot, maghanap ng lunas sa salot na iyon

O, anong nangyari? Ang sakit ay di rin nagapi
Lunas ay wala rin, buhay ng milyon ay naputi
Estremelenggoles at biglang nagbigti ang hari
Salot ay nawala, at buong bayan ay nagbunyi!

- gregbituinjr.

* Maraming salamat kay Rio Alma pagkat ang kanyang tulang Estremelenggoles ay kailangan ngayon ng mundo at magandang pamawi ng panglaw na dulot ng COVID-19.

Ang proletaryo

Ang proletaryo

Proletaryo, tunay kayong hukbong mapagpalaya
Rebolusyonaryo para sa uring manggagawa
Organisador ng uri't mapagpalayang diwa
Laban sa mapagsamantala't burgesyang kuhila
Edukador upang bulok na sistema'y mawala
Tungo sa lipunang pagkakapantay ang adhika
Ating pasalamatan ang proletaryong dakila
Ramdam na pag nagkapitbisig kayo'y may paglaya
Yinari ninyo'y dangal at ekonomya ng bansa
O, proletaryo, sa kamay ny'o mundo'y pinagpala

- gregbituinjr.

Ang propitaryo

Ang propitaryo

Propitaryo, profit o tubo'y laging isip nito
Rimarim na uri na yakap ay kapitalismo
O kaya'y pinagpala lang daw sila't may negosyo
Pulos sarili'y nasa isip, di magpakatao
Isip lagi'y paano iisahan ang obrero
Tubo lang umiikot ang puso ng propitaryo
At pag di nila kauri'y hampaslupa ang trato
Ramdam lagi'y nanakawan ang tulad nilang tuso
Yamang sa salapi't tubo ang isip nakasentro
Oo, sila'y balakid sa lipunang makatao

- gregbituinjr.

Ang kalabang di nakikita

ANG KALABANG DI NAKIKITA

parang "Predator", ang kalabang di natin makita
pumapaslang tulad ng COVID na nananalasa
tanging magagawa raw sa ngayon ay kwarantina
habang kayraming frontliner yaong nangamatay na

paano ba sasagupain ang kalabang ito
di mo siya makita't nananalasa ng todo
ni di mo nga maasinta ang bungo niya't noo
kahit sanlibong isnayper ay di masipat ito

dahil kakaiba ang kasalukuyang digmaan
di nakikita ang "Predator" sa bahay, sa daan
di masubaybayan kung sila'y nasa pamayanan
o baka sila'y nasa ospital ng bayan-bayan

layuan ang mga ospital, baka naroroon
ang mga "Predator" kaya may namamatay doon
di kaya ng ngitngit mo lang ay mapupulbos iyon
gamitin ang talino laban sa kalabang yaon

di habang panahong mabubuhay tayo sa horror
halina't magtulungan tayo laban sa Predator
tulad ng pagpapabagsak ng masa sa diktador
ang makasama sa pagkilos ay isa nang honor

- gregbituinjr.

Ako'y aktibistang sira-sira man ang sapatos

Ako'y aktibistang sira-sira man ang sapatos

ako'y aktibistang sira-sira man ang sapatos
ay patuloy sa paglalakad kahit nagpapaltos
kaunting barya'y sa kaunting tinapay inubos
nag-iisip saan muli kukuha ng panggastos

mabilis ang hakbang patungo sa isang pagkilos
upang batikusin ang sistemang mapambusabos
na mga naghihirap ay tatangkaing maubos
at sa dibdib ng manggagawa't dukha'y umuulos

malayo man ang lakbayin ay di dapat pumaltos
mararating ang pupuntahan, nawa'y makaraos
habang mga kasama'y patuloy sa pagbatikos
lalo na't ang namumuno pa'y isang haring bastos

na pag napikon ay nagmamaktol na parang musmos
na pag napagdiskitahan ka'y agad mag-uutos
paslangin na ang tarantadong iyang buhay-kapos
wastong proseso't karapatan nga'y dumadausdos

maraming buhay na'y naubos, ah, kalunos-lunos
subalit karamihan ay pawang naghihikahos
pagkat sa bulok na sistema tayo'y nakagapos
habang ang burgesya'y laging piging ang dinaraos

- gregbituinjr.

Sa daang matinik ng buhay

"Sa daang matinik ng buhay, lalaki ang siyang patnugot ng asawa at mga anak; kung ang umaakay ay tungo sa sama, ang pagtutunguhan ng inaakay ay kasamaan din." 

~ mula sa Kartilya ng Katipunan

lalaki ang patnugot ng asawa't mga anak

anang Kartilya upang pamilya'y di mapahamak

ama ang haligi ng tahanan at ng mag-anak

siya't tagaakay upang di malubog sa lubak

ngunit sa ating panahon ngayon, di na lang ama

binigyan na ng malaking papel ang mga ina

tagaalaga ng anak, kusinera, maestra

sila'y ilaw ng tahanan, nasa trabaho'y ama

sa daang matinik ng buhay, dapat magtulungan

upang ginhawa'y kamtin, di gaanong mahirapan 

ito'y payo't bilin sa Kartilya ng Katipunan

basahin at isapuso ang bawat nilalaman

mabuhay kayong aming nagisnang mga magulang

inalagaan ninyo kami mula nang isilang

tumanda na kayo't payo ninyo'y iginagalang

upang sa tinahak na landas, kami'y makinabang

- gregbituinjr.

Ako'y bato tulad ni Vasily Zaitsev

AKO'Y BATO TULAD NI VASILY ZAITSEV

ako'y bato tulad ni Vasily Zaitsev
matang apoy kung sa largabista'y sumilip
puntirya n'ya'y kalaban, di siya nadakip
habang si Tanya ang sa puso'y halukipkip

si Vasily Zaitsev ay kawal na Rusyan
noong ikalawang daigdigang digmaan
asintadong sumipat pag riple na'y tangan
ang puntirya'y ulo ng kalabang Aleman

iyon sa "Enemy at The Gates" ay istorya
batay sa kasaysayan yaong pelikula
sa simula'y tinuruan ng kanyang ama
mabangis na hayop ang kanyang inasinta

"ako'y bato", sabi ni Vasily Zaitsev
habang mabangis na lobo'y naninibasib
"ako'y bato", sabi ko sa pook na liblib
habang nag-iingat din baka may panganib

siya'y idolo ng katulad kong makata
may puntirya siya't ako ring tumutula
asintado siya't ako rin sa pagkatha
target n'ya'y kalaban, ako'y puso ng madla

- gregbituinjr.

* Vasily Grigoryevich Zaitsev was a Soviet sniper during World War II. Prior to 10 November 1942, he killed 32 Axis soldiers with a standard-issue rifle. Between 10 November 1942 and 17 December 1942, during the Battle of Stalingrad, he killed 225 enemy soldiers, including 11 snipers. Wikipedia

Gunam-gunamin mo ang sakit na kasumpa-sumpa

Gunam-gunamin mo ang sakit na kasumpa-sumpa

Gunam-gunamin mo ang sakit na kasumpa-sumpa
Gustong madalumat pagkat di iyon matingkala
Guniguni'y tila baga may asam na adhika
Gugulin ay di na mawari pagkat walang-wala

Gutom at di makapagtrabaho ang nangyayari
Gugupuin ang kalusugan nating di mawari
Gulo ito kung namumuno'y tila walang silbi
Gutay-gutay na pamumuhay sa dusa'y sakbibi

Guhong mga pangarap sa dibdib na'y halukipkip
Gubat na ang lungsod na animo'y di na malirip
Gunggong ang tusong trapong sarili lang ang inisip
Guwang sa polisiya nila'y ating nahahagip

Gulat man ang masa sa sakit na nananalasa
Gulantang man ang bayan sa biglaang kwarantina
Gulilat man tayo sa aksyon ng trapong paasa
Gusot ay maaayos pag nalutas ang pandemya

- gregbituinjr.

Giliw, ikaw ang mutya niring pusong sumisinta

Giliw, ikaw ang mutya niring pusong sumisinta

Giliw, ikaw ang mutya niring pusong sumisinta
Gitling man ay di namagitan sa ating dalawa
Giikin natin ang palay nang may buong pag-asa
Gilik sa palay ay iwasang mangati sa paa

Gipit man ngayon ay patuloy kitang nagsisikap
Giti man ang pawis sa noo'y laging nangangarap
Gitata sa sipag nang kaalwanan ay malasap
Ginhawang anong ilap ay atin ding mahahanap

Giray-giray man sa daan, tutupdin ang pangako
Giyagis man ng hirap ay di rin tayo susuko
Giwang sa adhika'y suriin nang di masiphayo
Ginisang anong sarap ay atin ding maluluto

Gising ang diwang di payag mapagsamantalahan
Giting ng bawat bayani'y kailangan ng bayan
Giit natin lagi'y wastong proseso't karapatan
Gibik na kamtin ng masa'y hustisyang panlipunan

- gregbituinjr.

Garapalan na ang nangyayaring katiwalian

Garapalan na ang nangyayaring katiwalian

I
Garapalan na ang nangyayaring katiwalian
Gahaman at tuso'y napaupo sa katungkulan
Ganid na pawang pahirap sa laksang mamamayan
Garapata silang nasa likod ni Kalakian
Garote'y dapat sa tulad nilang taksil sa bayan

II
Gawa ng magulang upang anak ay di bumagsak
Gagapang upang mapagtapos lang ang mga anak
Garantiyang pag napagtapos ay labis ang galak
Ganansyang may kinabukasan, di naging bulagsak
Gantimpala na itong nagbunga rin ang pinitak

III
Gaygayin ang laot tungo sa pulo ng mabuti
Gaod sa balsa'y gamitin mong wasto't magpursigi
Gampanan ang misyon habang bawat mali'y iwaksi
Gagayak tungo sa islang walang mga salbahe
Galak ang madarama sapagkat wala ring peste

IV
Garalgal na ang pananalita't di makangawa
Garil ang tinig sa isyu't problemang di humupa
Gamol man siyang laging sakbibi ng dusa't luha
Gatla sa noo'y tandang marami pang magagawa
Gawin lagi sa kapwa kung anong mabuti't tama

- gregbituinjr.

Ngumiti ka rin, huwag laging magmukmok

Ngumiti ka rin, huwag laging magmukmok

minsan, kailangan ding ngumiti, huwag magmukmok
sa isang tabi, dinanas mo man ay isang dagok
may magagawa ka pa kung ramdam mo'y pagkalugmok
dahil bawat umaga'y may pag-asang nilililok

halina't buong umaga'y punuin mo ng ngiti
matagal man ay maghihilom din ang bawat hapdi
lutasin ang suliranin mula ugat o sanhi
at sa puso't tanggalin ang ngitngit at pagkamuhi

salubungin mong nakangiti ang bagong umaga
isapuso mo't isadiwang may bagong pag-asa
at damhin ang hanging amihan kasama ang sinta
malulutas din ang kaharap mong isyu't problema

di laging sa likod mo'y nakatarak ang balaraw
di ka laging nasa dilim, may darating ding tanglaw
problema mo'y matatapos pag ikaw na'y gumalaw
manganak man muli ng problema'y may bagong araw

- gregbituinjr.

Magugutom ka ngunit gagawa ka ng paraan

Magugutom ka ngunit gagawa ka ng paraan

magugutom ka ngunit gagawa ka ng paraan
anumang mga ginagawa'y tiyak mong iiwan
maghahanap ng makakain, lalamnan ang tiyan
laking gubat man, gutom ay kaya nilang iwasan

"matter over mind", pag naramdaman mong kumakalam
ang sikmura'y tiyak hahanap ng kanin at ulam
laging nakaplano ang pagkain, ito na'y alam
kahit taong grasa'y di payag sikmura'y kumalam

mag-isip ng paraan nang di magutom ang anak
walang namamatay sa gutom, igalaw ang utak
maraming namatay dahil tinokhang o sinaksak
subalit sa gutom, di namatay o napahamak

ang epekto ng gutom ay di kamatayan agad
magkakasakit muna, ulser? kanser? malalantad
baka buong panahon mo'y sa ospital bababad
mamamatay ka sa ospital sa laki ng bayad

mga ibon nga sa himpapawid, nakakakain
ikaw pang taong may isip, alam mo ang gagawin
aso o pusang gala, taong gubat man, kakain
sa tusong matsing, gutom ay napaglalalangan din

di pwedeng "mind over matter", isipin mong busog ka
sa panahon ng lockdown ay isipin mong busog ka
aba'y magugutom ka pag di ka kumain, tanga
"matter over mind", pagkalam ng tiyan, kumain ka

- gregbituinjr.

Marami nang namatay sa sakit, di sa gutom

Marami nang namatay sa sakit, di sa gutom

marami nang sa COVID ay namatay nang tuluyan
namatay sa gutom ay wala pang nabalitaan
dahil ba likas sa taong gumawa ng paraan
upang pamilya'y di magutom, may laman ang tiyan

may namatay dahil binaril ng mga halimaw
nagprotesta dahil sa gutom, ito ang malinaw
tagtuyot sa Kidapawan, walang ani, malinaw
at sila'y binaril, tatlong magsasaka'y pumanaw

gayong lehitimo naman ang panawagan nila
ngunit iba ang COVID na tao'y na-kwarantina
walang sakit, walang ring trabaho, may paraan pa
laban sa gutom, bayanihan ang mga pamilya

wala pang namamatay sa gutom, kahit pa dukha
dahil likas sa taong may paraang ginagawa
subalit sa COVID, baka di sila makawala
nananalasang sakit na ito'y nakakahawa

frontliners na doktor, nars, kayrami nilang namatay
upang sagipin nila sa sakit ang ibang buhay
sa mga frontliner, taos-puso pong pagpupugay
salamat! nawa'y di kayo magkasakit! mabuhay!

- gregbituinjr.

Preskong umaga

Preskong umaga

sa umaga'y kay-agang gumising
mula sa masarap na paghimbing
lalo't sa iyo'y may naglalambing
na tila bituing nagniningning

salubungin natin ang umaga
na sa puso'y may bagong pag-asa
na sa kabila ng kwarantina
ay di pa rin tayo nagdurusa

lasapin mo ang hanging amihan
damhin sa puso't nakagagaan
kayganda pa nito sa katawan
at nakalilinaw ng isipan

gigising na bandang alas-sais
at sa paligid na'y magwawalis
mag-eehersisyo, maglilinis
at kung may kalat ay mag-iimis

magsasaing na ri't magluluto
ng gulay, itlog, hawot na tuyo
at matapos nito'y maliligo
preskong umaga, walang siphayo

- gregbituinjr.

Magtanim sa latang walang laman

Magtanim sa latang walang laman

halina't kita'y magtanim sa latang walang laman
upang binhi'y di malunod, atin munang butasan
ang ilalim ng lata, nang tubig ay may labasan
saka lagyan ng lupa ang latang ating tatamnan

kaygandang gamitin ang latang di na binasura
kundi ginawang paso, pinagtaniman ng okra
petsay, talong, sitaw, alugbati, munggo, mustasa
magandang ilipat sa malaki kung lumago na

minsan, maging magsasaka tayo kahit sa lungsod
habang simpleng pamumuhay ang itinataguyod
kung kailangan, may mapipitas ka't makakayod
masarap ang may sariling tanim, nakalulugod

- gregbituinjr.

Munting payo para sa kapaligiran

Munting payo para sa kapaligiran

paghiwalayin mo ang basura
sa di mabulok, nabubulok na
bote, plastik at lata sa isa
ang di nabubulok, mabebenta

dahong tuyo at pagkaing panis
ibaon sa lupa't di magtiis
sa amoy, paligid na malinis
ay kayganda, di na maiinis

disiplinahin din ang sarili
pamilya, kaibigan, kaklase
itapon lang ang balat ng kendi
sa basurahan at di sa kalye

ito'y munting payo, kababayan
bansa'y ituring nating tahanan
nang luminis ang kapaligiran
huwag itong gawing basurahan

- gregbituinjr.

Kung may disiplina

Kung may disiplina

kung may disiplina
kalat sa kalsada
na mga basura
ay pulutin muna

ang balat ng kendi
ang plastik sa kalye
nagkalat na bote
huwag lang ang tae

gawin ang marapat
pulutin ang kalat
ngunit mas marapat
huwag kang magkalat

ang masasabi ko
kung nagawa ito
salamat sa iyo
sa munting tulong mo

- gregbituinjr.

Mga boteng walang laman

Mga boteng walang laman

kayraming boteng wala nang laman, ito'y ipunin
pagkat di nabubulok, mabuting ibenta na rin
at mapaglagyan ng anumang produktong naisin
tulad ng sariling gawang toyo, patis, kakanin

di ito recycle kundi reuse, paggamit muli
gamitin din ang gamit na't di ka magkakamali
kalinisan ng paligid pa'y mapapanatili
baka magkapera pa't kumita ka rin sakali

- gregbituinjr.

Itapon ng wasto ang basura mo!

Itapon ng wasto ang basura mo!

O, kaygandang masdan ng malinis na basurahan
lalo na kung kapaligiran ay ating tahanan
paano pa kung ang bansa ang ating dinumihan
para mo na ring dinumihan ang iyong tirahan

ituring natin ang buong bansa'y tahanan natin
pag bahay mo'y marumi, di ba't naiinis ka rin
kaya ang agad mong gagawin, ito'y lilinisin
lalo ang maruming paligid, nakakadiri din

kung bansa ay tahanan, di mo dudumihan ito
kung itatapon ko ang basura ko sa bahay mo
di ba't magagalit ka, dahil ito na'y insulto
kaya basura'y itapon sa basurahang wasto

huwag sa kalsada itapon ang busal ng mais
balat ng kendi'y ibulsa, huwag basta ihagis
pinagkainan mo'y dapat malinis na maimis
at huwag hayaan sa langaw ang mga napanis

ang nabubulok at di nabubulok na basura
ay dapat alam mong paghiwalayin sa tuwina
lalo na sa panahong tayo'y nasa kwarantina
may naghahakot ng basura, tulungan na sila

- gregbituinjr.

Pagmumuni sa paglalakbay

Pagmumuni sa paglalakbay 

naglalakbay pa rin ang isip doon sa malayo
na ang pakiramdam sa tuwina'y pagkasiphayo
hinabol ang minumutyang diwata, hapong-hapo
subalit sa aking paningin ay biglang naglaho

madalas pa rin akong naglalakbay sa kawalan
laging dinaranas ang nagbabagang kalagayan
kumusta na ba ang nilalagnat na daigdigan
na sa panahong ito'y kaya pa bang malunasan

nais kong makarating sa pangarap na daigdig
kung saan walang pagsasamantala't pang-uusig
lipunang pantay na lahat ay nagkakapitbisig
imbes kumpetisyon ay kooperasyon ang tindig

madalas ding maglakbay ang diwa sa alapaap
magtatagumpay ba sa patuloy kong pagsisikap
lipunang pantay ba ang nasa kabila ng ulap
na pag nilakbay ko'y makakamit na ang pangarap

- gregbituinjr.

Bihira akong magkape, di rin nagyoyosi

Bihira akong magkape, di rin nagyoyosi

di ko sinanay ang sarili kong laging magkape
tulad ng di ko sinanay ang sariling magyosi
naisip ko na bilang tibak at lagi sa kalye
gastos lang ito, wala na ngang pera, aking sabi

imbes kape, mas nais kong mag-Milo o mag-Nido
nakalimbag sa pakete ang bitamina nito
pag may nagbigay lang, napapakape na rin ako
nakakahiyang tanggihan ang inalok sa iyo

lalong mahirap naman ang malipasan ng gutom
kaya bibili ng saba na maraming potasyum
kakain ng isda't gulay na may protina't kalsyum
minsan ay limang ensaymadang pang-alis ng gutom

ngunit huwag naman yosing ang bibilhin ko'y usok
sobra-sobra na ang polusyong nakasusulasok
dapat malusog sa pagbaka sa sistemang bulok
magpalakas din pag sa kilusang masa'y lumahok

- gregbituinjr.

Panahon na nga ba ngayon ng hikbi't sawimpalad

Panahon na nga ba ngayon ng hikbi't sawimpalad

panahon na nga ba ngayon ng hikbi't sawimpalad
na pesteng sakit ay parang ipuipong lumantad
di agad nakatugon yaong pagong kung umusad
habang marami'y sa sariling pawis nakababad

panahon na ba ng pagdurusa, hibik at hikbi
marami nang nagugutom at di na makangiti
dahil sa nanalasang sakit ay di makauwi
habang iba'y nagkasakit at tuluyang nasawi

oo, nasa panahon na tayo ng hikbi't hibik
rumaragasang sakit ay buhawing anong lintik
paano pipigilang mga mata'y magsitirik
sa sitwasyong ang sakit ay sa mundo dumidikdik

dukha't panggitnang uri man ay dapat magkaisa
upang maiwasan ang sakit ay mag-kwarantina
ngunit dapat gutom ay solusyunang kapagdaka
kung wala'y kunin ang yaman ng mapagsamantala

kung burgesya noon, dukha't obrero'y tinitiris
at ngayon, mamamayan sa gutom ay nagtitiis
dapat maglabasan ang kapital ng mga burgis
at pagkaisahang sistemang bulok na'y mapalis

- gregbituinjr.

Bagong Taon: Una ang Taal, sunod si Kobe, ngayon ay COVID

Bagong Taon: Una ang Taal, sunod si Kobe, ngayon ay COVID

Bagong Taon ay sinalubong nating walang patid
ang mga balitang pawang sakuna yaong hatid
una ang Taal, sunod si Kobe, ngayon ay COVID
taon doble bente'y sa dilim tayo binubulid

bumagsak ang ashfall, naapektuhan ang marami
bumagsak ang eroplanong sinasakyan ni Kobe
na kinasawi ng iba't anak niyang babae
ngayon naman ay COVID ang sa mundo'y pumepeste

pawang sakuna ang unang sangkapat nitong taon
marami nang namamatay, naligalig ang nasyon
baka frontliners pa'y maisahan pag nagkataon
huwag naman sana't kayrami nang namatay ngayon

dapat magamot din ang daigdig na nilalagnat
dapat mapaghilom ang nagnanaknak nitong sugat
dapat maiwasang ang COVID ay lalong kumalat
nang maiwasan ding magkahawaan tayong lahat

- gregbituinjr.

Pagpupugay sa ika-400 taon ng Letran (1620-2020)

Pagpupugay sa ika-400 taon ng Letran (1620-2020)

Alma mater namin, tunay kang bunying paaralan
Letran, mabuhay ka, sa apat na siglong nagdaan
Mga nag-aral sa iyo'y dapat kang pagpugayan
At naabot ang anibersaryong apatnaraan.

Masarap damhing ikaapat na siglo'y sinapit
Alma mater, Letran espledente, ang aming awit
Tinig ng bawat isa'y nagkakaisang mahigpit
Edukasyong inalay mo'y tunay naming nagamit
Respeto sa kapwa't maging marangal bawat saglit.

Letran Squires, Letran Knights, sa isports ay magagaling
Emblema'y kalasag at kabalyerong anong giting
Tunay na matatag at matagumpay kung ituring
Red and blue ang kulay ng kasuotang nagniningning
Ang tagumpay sa iba't ibang laranga'y narating
Nagmamalasakit sa kapwa, man for others pa rin.

Edipisyo'y anong tatag, kaysarap pang mag-aral
Sikat nitong mga alumno'y tunay na nagpagal
Pang-apat na siglo'y narating, gayon nga katagal
Lalo kang hahanga, may alumno pang santo't banal
Ehemplo ng karunungan ang Letran naming mahal
Dito sa Letran ay nag-aral kami't nagsumikap
Espesyal sa puso't diwa naming mga nangarap
Nawa, Letran ay maraming tagumpay pang matanggap
Tunay kung magkawanggawa't sa kapwa'y lumilingap
Eto't naririto kaming nagpupugay ngang ganap!

- alay na tula ni Gregorio V. Bituin Jr., 04.14.2020
Letran High School Batch 1985, Intramuros, Manila

Karanasan ko't Pagpupugay sa Iyo, Arriba Letran!

KARANASAN KO'T PAGPUPUGAY SA IYO, ARRIBA LETRAN!

apatnaraang taon na ang aming paaralan
siyam na taon ang tanda ng U.S.T. sa Letran
na pinangangasiwaan ng mga Dominican
eskwelahang humubog sa pagkatao't isipan
institusyong umugit sa aming kinabukasan

kayrami ring naranasan sa paaralang iyon
naging kinatawan sa dalawang pagkakataon
ng paaralan sa Rizal Memorial Coliseum
kinatawan ng Letran sa taekwondo competition
noong second year, track-and-field naman sa huling taon

buong hayskul na walang babae kaming kaklase
hanggang naranasang maging opisyal ng C.A.T.
siyamnapu't anim na porsyento sa N.C.E.E.
nagtapos kami't nagmartsa doon sa P.I.C.C.
nais kong magkolehiyong may mataas na degri

ngunit nais ni Ama na ako'y mag-engineering
walang engineering doon, napahiwalay na rin
sa alma mater na matagal ko ring nakapiling
maraming salamat, Letran, na humubog sa akin
sa ikaapat mong siglo, ako'y muling darating

pagpupugay din sa lahat ng naging kaklase ko
sa samahan at frat na aking nakahalubilo
sa mga nakasama sa track-and-field at taekwondo
sa nasa gym, dyanitor, pari't guro namin dito
pagpupugay po, Arriba Letran! Mabuhay kayo!

- alay na tula ni Gregorio V. Bituin Jr., 04.14.2020
Letran High School Batch 1985, Intramuros, Manila

Sa pagsikat ng araw

Sa pagsikat ng araw

halina't mag-ehersisyo pagsikat nitong araw
upang tayo'y mainitan sa panahong maginaw
matapos nito'y hihigop ng mainit na sabaw
habang aalmusalin naman ang natirang bahaw

patutukain muna ang mga alagang sisiw
habang kaysarap pang nahihimbing ang ginigiliw
habang naninilay ang pagsintang di magmamaliw
habang nagsusulat ay may awiting umaaliw

di makapag-text, mahalaga'y unahing madalas
imbes na load, binili muna'y tatlong kilong bigas
unahin muna ang tiyan, wala mang panghimagas
imbes na load, binili'y dalawang latang sardinas

gigising at sasalubungin ang bagong umaga
bago pagkat sa kalendaryo'y iba na ang petsa
ang alay ng bukangliwayway ay bagong pag-asa
para sa masa, para sa bayan, at sa pamilya

- gregbituinjr.

Magbasa-basa habang nasa lockdown

Magbasa-basa habang nasa lockdown

magbasa-basa habang tayo'y nasa kwarantina
magbasa ng tula, kwento, sanaysay at nobela
magbasa ng akda ni Edgar Allan Poe't iba pa
magbasa rin ng mga pilosopiya't teorya

mag-ehersisyo muna sa umaga pagkagising
at pagkatapos ng gawaing bahay ay magsaing
mag-sudoku muna bago o matapos kumain
sunod ay magbasa ng dyaryo, aklat o magasin

huwag sayangin ang oras sa walang katuturan
tulad ng inom, at pamilya'y napapabayaan
magbasang tila may himagsikang paghahandaan
patalasin ang isip ng maraming kaalaman

magbasa rin ng iba't ibang nobelang klasiko
basahin mo rin ang iba't ibang kwento't soneto
mga tula ni Shakespeare ba'y nauunawaan mo
magbasa-basa pagkat nasa lockdown pa rin tayo

- gregbituinjr.

Mag-jumping jack sa umaga, tayo'y mag-ehersisyo

Mag-jumping jack sa umaga, tayo'y mag-ehersisyo

mag-jumping jack sa umaga, tayo'y mag-ehersisyo
tumalon upang kalamnan ay tumatag nang husto
paminsan-minsan, mag-isangdaang push-up din tayo
maggulay at magbitamina, pampalakas ito

magpainit sa arawan pagsapit ng umaga
uminom ng kape nang mainitan ang sikmura
halina't sabay tayong mag-ehersisyo tuwina
palakasin ang katawan at kutis ay gumanda

mag-ehersiyo hanggang sa tumagaktak ang pawis
bakasakaling mga mikrobyo'y agad mapalis
tumakbo-takbo ring marahan, di naman mabilis
at habang nag-eehersisyo'y huwag bumungisngis

dapat magpalakas sa panahon ng kwarantina
at mag-ingat laban sa sakit na nananalasa
lalo ang kalusugan ng katawan at pamilya
halina't tayo'y mag-ehersisyo tuwing umaga

- gregbituinjr.

Magandang kalusugan ay isa nang alas

Magandang kalusugan ay isa nang alas

ayokong magkasakit at kayhirap magkasakit
anong pambayad sa ospital kung pera'y maliit
pag iyon ay nangyari, sa sarili na'y nagkait
tila ba karanasang iyon ay sadyang kaylupit

nanaisin ko pang mamatay kaysa maospital
at pahirapan ang pamilya sa presyong kaymahal
ng gamot, ng bayad sa ospital, nakasasakal
pag ganyan ang nangyari'y di na ako magtatagal

kaya kalusugan ko'y aking inaalagaan
pinatitibay kong kusa ang bawat kong kalamnan
umiinom ng gatas nang lumakas ang katawan
isda't gulay naman upang lumusog ang isipan

"Bawal magkasakit", sabi sa isang patalastas
sinusunod kong payo upang ako'y magpalakas
kumain ng tama, bitamina, gulay at prutas
aba, magandang kalusugan ay isa nang alas

- gregbituinjr.

Kung bakit ba palaging maaga akong gumising

Kung bakit ba palaging maaga akong gumising

kung bakit ba palaging maaga akong gumising

aba'y nakakagutom kaya maagang magsaing

itutula rin ang ulat mula sa pagkahimbing

kakathain ang diwa ng bayaning magigiting

nagigising sa madaling araw upang kumatha

hinggil sa samutsaring isyu't problema ng madla

itong bayan ba'y paano kakamtin ang ginhawa

kundi sa masisipag na kamay ng pinagpala

mabuhay ang lahat ng manggagawa't magsasaka

sila ang totoong bumubuhay sa ekonomya

mabuhay din ang maralitang marunong magtinda

na nabubuhay ng marangal para sa pamilya

sila ang karaniwang paksa ng katha kong buhay

pati sinelas, saging, sisiw, karaniwang bagay

sa tuwina, diwa'y kung saan-saan naglalakbay

upang mahanap ang sagot sa bawat naninilay

- gregbituinjr.

Taumbayan ang mapagpalaya - Che Guevara

TAUMBAYAN ANG MAPAGPALAYA

“I am not a liberator. Liberators do not exist. The people liberate themselves.” ~ Che Guevara

wala raw liberador o taong nagpapalaya

ng pinagsamantalahang alipin, uri't bansa

kundi nagpalaya sa kanila'y sila ring madla

sabi iyan ni Che, rebolusyonaryong dakila

walang isang superman o isang tagapagligtas

oo, walang isang magaling na tagapagligtas

kundi tao'y nagkapitbisig, tinahak ang landas

ng paglaya tungo sa asam na lipunang patas

totoo, di si Bonifacio kundi Katipunan

at di rin si Aguinaldo kundi ang sambayanan

di si Jose Rizal na binaril sa Bagumbayan

kundi ang mamamayan ang nagpalaya ng bayan

pinag-alab lang ng Katipunan ang mitsa't puso

nang bayan ay lumahok sa pagbabagong madugo

ang pagpaslang kay Rizal ay nagpaalab ding buo

sa madlang ang pang-aalipinin ay nais maglaho

di si Enrile't Ramos ang nagpatalsik kay Marcos

kundi mamamayang ayaw na sa pambubusabos

di si Gloria ang nagpatalsik kay Erap na Big Boss

produkto lamang siya ng pag-aalsang Edsa Dos

kaya tama si Che, mamamayan ang nagpalaya

sa kanilang sarili, pagkat nakibakang sadya

mabuhay ka, Che, walang isang tagapagpalaya

walang isang taong tagapagligtas kundi madla

- gregbituinjr.

04.12.2020 (Easter Sunday)

Anong nais natin sa Buwan ng Panitikan?

Anong nais natin sa Buwan ng Panitikan?

Buwan ng Panitikan ang Abril, anong gagawin

Upang panitikan ng masa'y lalong payabungin?

Wastong pagsusulat na may prinsipyo't adhikain

Ang kwento, tula't nobela sa masa'y pagsilbihin

Nagnanais bang panitikan ay maging kakampi?

Naghahangad ba itong sa manggagawa'y magsilbi

Gutom ang dukhang anong sipag sa araw at gabi

Panitikan ba'y tutula ng kanyang pagkaapi?

Anong resultang hangad para sa bawat babasa?

Nobela kaya'y magkwento ng pagsasamantala?

Itutula mo ba ang manggagawa't magsasaka?

Tulay mo bang tatahakin ay sanaysay ng dusa?

Isipin natin anong makabubuti sa madla

Kung ito ba'y magsisilbi sa mga hampaslupa?

Ang panitikang nais natin ay di ngawa't luha

Ngunit patungo sa tagumpay ng anak-dalita

- gregbituinjr.

04,12,2020

* Sa pamamagitan ng Proklamasyon Blg. 968, s. 2015, ang Abril ay pinagtibay bilang Buwan ng Panitikan. Marahil ay dahil tuwing Abril 2 ang kaarawan ng dakilang makatang Francisco Balagtas, na kinikilala sa kanyang walang kamatayang Florante at Laura.

Sa kabilugan ng buwan

Sa kabilugan ng buwan

kailangang lumabas upang makita ang full moon
subalit kayginaw sa labas, baka magkapulmon
saglit lang lumabas upang mapiktyuran ang full moon
bago pa isang bakunawa ang dito'y lumamon

masarap tumigil sa labas, titigan ang buwan
huwag lamang magkasakit, sakaling maambunan
suutin ang balabal kung lalabas ng tahanan
upang di sipunin, maingatan pa ang katawan

O, kaysarap pagmasdan ng buwang bilog na bilog
tila ba abot mo na ang pangarap na kaytayog
may diwata kaya roon, na dito'y papanaog
umaawit habang alpa'y kanilang tinutugtog

noong isang gabi lamang nang lumitaw ang buwan
na tila bagong pag-asa ang kaharap ng bayan
nananalasang sakit sana'y ating maiwasan
umaasam na isang bagong umaga'y daratnan

- gregbituinjr.

Sabi nila'y "Presente"

Sabi nila'y "Presente"

"Presente", ang sabi nilang may hawak na larawan
sa taunang Kalbaryo ng Kawalang Katarungan
patunay na ang mahal nila'y di nalilimutan
na winala noon, di na makita ang katawan

sila'y iwinala gayong pinaglaban ang tama
pagbabago ang adhika, bayan ay mapalaya
mula sa kuko ng mapagsamantala't kuhila
hanggang ngayon, ang hinahanap na hustisya'y wala

"Presente" para sa lahat ng desaparesidos
ito rin ang sigaw kong nakikibaka ng lubos
sigaw rin ng ibang ang pakikibaka'y di tapos
na sa masa'y patuloy pang naglilingkod ng taos

tuloy ang paghahanap sa katawan at hustisya
ng mga nagmamahal at naulilang pamilya
hiling na kahit katawan sana'y matagpuan na
"Presente", hustisyang asam nawa'y kamtin na nila

- gregbituinjr.

Ang ulam namin kagabi

Ang ulam namin kagabi

sardinas na may talbos ng kamote at kamatis
simpleng ulam kagabi upang gutom ay mapalis
sa panahon ng lockdown ay magtipid at magtiis
di lumalabas ng bahay, animo'y dusa't hapis

talbos ng kamote na may kamatis at sardinas
talbos na tanim, sa bakuran lang namin pinitas
habang nasa isip ay paano na kaya bukas
habang kakaunti na lang ang nariritong bigas

kamatis na may sardinas at sa kamote'y talbos
ulam itong pang-relief, pang-survivor, at pangkapos
walang trabaho, walang kayod, wala ring panggastos
gayunman, pasalamat na rin kami't nakaraos

sardinas na may kamatis at talbos ng kamote
ito lamang ang payak na ulam namin kagabi
nakakabusog na rin, kahit kaunti'y mabuti
pampalipas ng gutom, pampalusog din, ang sabi

- gregbituinjr.

Bala, Bale, Bali, Balo

BALA, BALE, BALI, BALO

ang pasaway, babarilin, mamamatay sa bala
kaya sumunod ka na lang daw kung ayaw magdusa
nagutom ang tao kaya lumabas ng kalsada
krimen na bang magutom at pagpaslang ang parusa?

ang turing lang sa buhay ay balewala, di bale
di baleng pumatay, hilig kasi ng presidente
naglalaway sa dugo ng "pasaway" na kayrami
na sa gutom ay nagprotesta't daing ay sinabi

ilan sa kanila'y pinalo, likod ay may bali
natutunan yata'y hazing ng namamalong hari
hazing nila'y disiplinang pagbabakasakali
bastos sa karapatang pantao, nakakamuhi

batas ng pangulo'y lumikha ng maraming balo
E.J.K. dito, E.J.K. doon, ano na ito?
solusyon lang sa problema'y pagpaslang, ano ito?
halimaw na pamamaraan ng sukab at gago!

- gregbituinjr.

Mahirap maging alagain

Mahirap maging alagain

Magpalakas tayo ng katawan upang magtagal
Ang buhay, uminom din ng bitamina't mineral
Habang nasa lockdown pa'y alamin din itong aral:
Iwasang magkasakit, sa isip natin ikintal
Ramdam mo ang sitwasyon, kayhirap nang maospital

Ang malipasan ka ng gutom ay huwag gagawin
Pagkain ng tama sa oras ay wastong tungkulin
Maghinaw ng kamay bago at matapos kumain
At walong basong tubig kada araw ay inumin
Gumising lagi ng maaga't mag-ehersisyo rin

Ingatan lagi ang iyong katawan at pamilya
Na hangad mapabuti pa ang kalusugan nila
Gawin lagi'y tama't palakasin ang resistensya
At magluto ng gulay, kumain ng masustansya
Layuan na ang junk food at baka magkasakit pa

Anong hirap magkasakit at maging alagain
Gayunman, tulungan ang kapwang nagiging sakitin
Ayokong magkasakit, sa iba'y maging pasanin
Ito'y ating pakaiwasan hangga't kakayanin
Ngayon pa lang, kalusugan ay alagaan natin

- gregbituinjr.