Narito ang laban sa lunsod, ang pakikibaka

narito ang laban sa lunsod, ang pakikibaka
narito sa sentro ang maraming isyu't problema
dito dapat makamit ang panlipunang hustisya
nasa lunsod ang laban nating mga aktibista

lumalaban tayo upang baguhin ang lipunan
bulok na sistema'y dapat ding baguhing tuluyan
hangga't nasa puso ang prinsipyo't paninindigan
kikilos at lalaban tayo hanggang kamatayan

sayang lang ang buhay mo kung titira sa probinsya
para lang sa tahimik na buhay, aba'y disgrasya
parang naghihintay ka lang ng iyong kamatayan
parang matindi na ang dinanas mong karamdaman

durugin natin ang sa pakikibaka'y balakid
patuloy tayong magsikilos, O, mga kapatid
isang lipunang makatao'y ating ipabatid
na dapat nating kamtin at sa mundo'y maihatid

- gregbituinjr.

Pagkatha habang nagbabawas ng mga kinain

minsan, matapos kumain, sa kubeta tatambay
magbabawas na tangan ang kwaderno't plumang taglay
magpapahinga roong diwa'y nagbubulay-bulay
at inaalagata ang umimbulog na lumbay

bakit tila nakikipagbuno sa pagkasawi
ng pusong inalipin ng pagbabakasakali
habang nakaupo sa tronong tila hubong hari
dapat tulad ng saranggola'y habaan ang pisi

kailangan ng tubig sa timba't mayroong tabo
huhugasan ang puwet habang diwa'y narahuyo
sa diwatang ginunita ng may pagkasiphayo
ngunit bakit ang gripo'y biglang nawalan ng tulo

kaysarap kumatha habang nagsasalsal ng diwa
habang nakikipagniig sa dumalaw na mutya
lalabas sa kubetang pawisan at putlang-putla
tangan ang papel na may nabuong magandang tula

- gregbituinjr.

Bagong salta

galing sa lalawigan
nagtungong kalunsuran
nakikipagsiksikan
nang sa dyip makalulan

binenta ang kalabaw
mangingibang bansa raw
ngunit pera'y naagaw
ng tusong magnanakaw

payapa niyang buhay
nabulabog ngang tunay
ngayon, di mapalagay
sa hahakbanging pakay

siya nga'y nakatikim
ng krimeng anong talim
at karima-rimarim
dinanas niya'y lagim

nawala ang pangarap
di niya maapuhap
kaysakit ng nalasap
sa mga mapagpanggap

nais mangibang bayan
nais niyang lumisan
sa mga naranasang
lumbay at karukhaan

pangarap magtrabaho
bilang O.F.W.
iipunin ang sweldo
ilalagak sa bangko

pambayad sa rekruter
para maging care giver
ay wala na forever
sa mga gang na tirtir

- gregbituinjr.

Bagyong Ursula

BAGYONG URSULA

tulad ni Yolanda'y kinatakutan siya

ngunit di siya si Yolandang nanalasa

tila bagyo'y mapanganib para sa masa

lalo't balita'y tulad siya ni Yolanda

maghahandang lumikas ang maraming tao

nang makaligtas sa parating na delubyo

makikipag-espadahan sa mga santo

upang patigilin ang nagbabantang bagyo

si Ursula'y dumating, laksa ang sinira

may nagsabing bumalik si Yolandang sigwa

pagkat naulit ang sa pamilya'y nawala

lalo't siya'y sakbibi ng lumbay at luha

tumitindi ang klima, bagyo'y bunabagsik

tila galit sa sistema't naghihimagsik

sa delubyo'y danas ang muling mangaligkig

at di mo na malaman kung saan sisiksik

- gregbituinjr.

Ulat: Walong anyos na nene, hinalay bago pinatay

anong lagim ng balitang yaong aking natunghay:
"Walong anyos na nene, hinalay bago pinatay"
at itinapon pa sa damuhan ang kanyang bangkay
tiyak magulang ng bata'y mapopoot ngang tunay

buti't nadakip ang pinaghihinalaang suspek
sa krimeng iyong talaga namang kahindik-hindik
sa galit, dapat siyang ibitin ng patiwarik
pagkat nakakakilabot ang kanyang inihasik

anuman ang kanyang dahilan, droga man o libog
ang magandang bukas ng bata'y talagang lumubog
sa salarin ay di na sapat ang kulong at bugbog
dapat sa kanya'y bitayin at magkalasog-lasog

nawa, may matamong hustisya ang batang biktima
nawa, nangyari sa kanya'y di maganap sa iba
nawa, kamtin ng magulang ang asam na hustisya
at bansa'y maprotektahan ang mamamayan niya

- gregbituinjr.
* headline ng pahayagang Pang-Masa, Enero 8, 2020, pahina 1-2.

Magilas pa ring mag-isip nitong utak kong iwi

magilas pa ring mag-isip nitong utak kong iwi
na sa buhay ay lagi nang nagbabakasakali
tutula, tulala, mga tuligsa'y samutsari
sa kalagayang ang hirap ay pinananatili

lumilipad ang lawin doon sa kaitaasan
habang natatanaw ang maralitang mamamayan
gayong nag-aabang din ng malalagay sa tiyan
at baka makakita ng tandang sa kaparangan

maisulong kaya ang piyon sa tabi ng reyna
upang tore'y makaporma't magawa ang partida
labanan ng posisyon, taktika't estratehiya
upang mamate ang hari sa ganap na presensya

isipin ang wasto lalo't karapatang pantao
tiyaking may paglilitis at may tamang proseso
at sa pakikipag-ugnayan ay magpakatao
upang di maging delubyo ang parating na bagyo

- gregbituinjr.

Di mo magigiba ang diwa't prinsipyo ko, sinta

di mo magigiba ang diwa't prinsipyo ko, sinta
na inilaan ko laban sa mga palamara
aralin mo ang lipunan upang iyong makita
ang samutsaring isyu't problema ng uri't masa
kailangan ng bayan ng panlipunang hustisya

nagugumon sa mga pautot ang mga sakim
upang limpak-limpak na tubo'y kanilang makimkim
ang iskemang tokhang ay sadyang karima-rimarim
na sa puso ng bayan ay nagdudulot ng lagim
sa kahit tirik ang araw animo'y nasa dilim

diligin natin ng pagmamahal ang kalikasan
lalo't tayo'y pinatira lamang sa daigdigan
nais ba nating wasakin nila ang kapaligiran
tapon dito, tapon doon, tapon kung saan-saan
daigdig na tahanan ay ginawang basurahan

- gregbituinjr.

Pag-aasawa ba'y katapusan ng pakikibaka?

paglagay sa tahimik ba'y di na makikibaka?

at balewala na ba ang pagbaka sa sistema?

mundo mo ba'y nag-iba pag ikaw ay nag-asawa?

iiwanan na ba sa ere ang laban ng masa?

sa pagkilos ba, pag-aasawa'y isang balakid?

at di na ba sisigaw ng "Sugod, mga kapatid!"?

pag-aasawa'y parte ng buhay, iyo bang batid?

pagtigil sa pagkilos ba'y mensahe nitong hatid?

hindi, hindi, dapat patuloy na mag-organisa!

at uring manggagawa'y gawing malakas na pwersa!

organisahin din pati iyong napangasawa

at maging kasama sa pagbabago ng sistema!

tuloy pa rin ang pagkilos para sa pagbabago

organisahin natin ang dukha't uring obrero

huwag tayong manghinawa hangga't di nananalo

hangga't buhay tayo'y ipagwagi ang sosyalismo!

- gregbituinjr.

Paano ba popondohan ang sariling pagkilos?

paano ba popondohan ang sariling pagkilos?

bakit ba ang maglulupa'y lagi nang kinakapos?

karukhaan pa rin ba ang sa atin umuulos?

dalita'y inspirasyon ba sa pagkilos ng lubos?

sa samahan, di sapat ang tumanggap lang ng butaw

at di nito kayang pondohan ang bawat mong galaw

sa kabila nito, prinsipyo'y di pa rin malusaw

kikilos at kikilos kahit lumubog ang araw

upang may panggastos, dapat pa bang magpaalipin?

matapos ang trabaho saka misyon ay gagawin

sariling kilos ay pondohan, ito ang layunin

upang magampanan ang sinumpaang adhikain

pondohan ang sariling galaw, ito'y ginagawa

hanap ay pagkakakitaang sakbibi ng luha

at magkayod-kalabaw upang kumita ng lubha

dapat walang humpay sa pagkilos ang maglulupa

- gregbituinjr.

Namamatay ako tuwing gabi, buong magdamag

namamatay ako tuwing gabi, buong magdamag
nagtutungo sa ibang daigdig, naglalagalag
nagkakaroon ng espasyo ang buhay na hungkag
nabubuhay muli sa bukangliwayway na sinag

at muli't muli tuwing gabi'y muling namamatay
at ako'y nagbabalik sa pinagdaanang hukay
at doon ko sinasariwa ang sugat at lumbay
na humiwa sa aking puso't pagkataong taglay

di mapakali sa buhay na sakbibi ng hirap
di makamit yaong mga gintong pinapangarap
di maisatitik ang mga dusang lumaganap
di matingkala yaring buhay na aandap-andap

mabubuhay muli pag bukangliwayway na'y napit
habang sa dulo ng patalim ay nangungunyapit
sabay tanong: ano, sino, saan, kailan, bakit
at paano, sa iwing buhay na pulos pasakit

- gregbituinjr.

Pagkatha habang naglalampaso ng sahig

patuloy pa rin habang naglalampaso ng sahig
yaong pagkatha ng mga salitang nagniniig
nasa isip kung anong namumutawi sa bibig
habang inaayos ang taludtod, saknong at pantig

tula'y nalikha habang sahig ay pinakikintab
habang naglalampaso yaring puso'y nag-aalab
sa kawalang hustisya, damdamin ay nagliliyab
kaya ang isinasatitik ay naglalagablab

maya-maya, ang basahan ay aking pipigain
at sa paglampaso ng sahig ay muling gamitin
pakintabin ang sahig na pwede kang manalamin
habang kuro-kuro sa isip ay tahi-tahiin

sa paglampaso'y may dapat ka ring sunding sistema
upang di mahirapan at agad makatapos ka
ituloy mo ang pagkatha habang nagpapahinga
at nilampaso mong katha'y iyong mapapaganda

- gregbituinjr.

Soneto sa kaarawan ni misis

maligayang kaarawan sa iyo, aking sinta

nawa sa pagsasama nating dalawa'y sumaya

bubuuin natin ang isang magandang pamilya

at mabubuting anak na kung di lima'y dalawa

maligayang kaarawan sa iyo, aking mahal

sa pagpana ni Kupido, ikaw ang itinanghal

nawa ang ating magandang samahan ay tumagal

habang naghahanda tayong magkaroon ng kambal

maligayang kaarawan sa iyo, aking irog

nawa ikaw ay manatiling malakas, malusog

sa iyo ang iwi kong pag-ibig ay iniluhog

nawa'y dinggin mo ang harana ng puso kong handog

maligayang kaarawan sa iyo, aking giliw

ang aking pagmamahal sa iyo'y di magmamaliw

- gregbituinjr.,01/06/2020

Di pagyaman kundi pagkilos hanggang sa tagumpay

sa edad kong ito'y di na nangangarap yumaman
ako rin naman ay mamamatay sa kalaunan
kaya bakit pagyaman pa'y aking pag-iisipan
ang tanong sa sarili: pagyaman ba'y para saan?

dapat ko bang pag-ipunan ang ataul ko't puntod
ngunit sa ganyan ay di ako magpapakapagod
sa ngayon, sosyalismo'y aking itinataguyod
habang buhay pa'y magwagi't dito na malulugod

maging mayaman sa prinsipyo, dangal at kasama
uring manggagawa'y gawin nating malaking pwersa
paglingkuran ang bayan, organisahin ang masa
ipaglabang mabago na ang bulok na sistema

kahit kalahating siglo pa ang aking bunuin
di sasagi sa isip na sarili'y payamanin
dapat ialay ang buhay sa dakilang layunin
at sosyalismo'y ipagwagi sa panahon natin

- gregbituinjr.

Kailangan ng salapi, ito ang kalakaran

kailangan ng pera, ito ang sabi ni misis
dahil sa kahirapan, ayaw na niyang magtiis
dapat daw akong magtrabaho't mabili ang nais
sumweldo't nang may pambayad sa bayarin at buwis

kailangan naming magbayad ng kuryente't tubig
bayad sa ospital pag nagkasakit o nabikig
pambili ng ilalaman sa aming mga bibig
pulos sa pera na lang umiikot ang daigdig

kailangan ng salapi, ito ang kalakaran
upang mabuhay ka'y dapat ka ring maging bayaran
lakas-paggawa'y ibebenta hanggang masahuran
ilang taon bang ganito ang iyong katauhan

kailangan ng kwarta, dapat lagi kang may sweldo
kung di man limpak na tubo pag ika'y nagnegosyo
ganyan ang palakad sa lipunang kapitalismo
binibili na rin ng pera pati pagkatao

- gregbituinjr.

Tunay bang Amerika'y pakialamerong bansa?

tunay bang Amerika'y pakialamerong bansa?

dahil bansang Iran naman ang puntirya't sinira

terorista nga ba ang Amerika't anong sama?

na pag di niya kakampi'y binibira ng kusa?

ang North Korea'y di mabira't wala itong langis

ang Iran ay may langis kaya pagbira'y kaybilis

makapangyarihang Amerika'y nagmamalabis

pag nagkadigma't di napigil, kayraming tatangis

di dapat maganap ang imperyalismong digmaan

lalo't nais kontrolin ng Amerika ang Iran

ibang bansa'y damay pa sa kanilang kalokohan

na maaaring magdulot ng laksang kamatayan

barbarismo ng Amerika'y dapat lang mapigil

lalo na't sa Iran talagang sila'y nanggigigil

pananalasa ng Amerika'y dapat masupil

at mapigilan ang maraming buhay na makitil

mag-usap sila sa lamesa at magnegosasyon

sa kaibahan nila'y pag-uusap ang solusyon

imperyalismong digmaan ay di magandang tugon

nang iba'y di madamay sa alitan nila ngayon

- gregbituinjr.

Pag inedit ang tula

pag inedit ang tula'y di tanggap ang kamalian

lalo't pinuna ang bilang ng pantig at tugmaan

magdadahilang iyon ay malayang taludturan

kaya huwag mo raw punahin kung pantig ay kulang

gayong kita mo namang tugma't sukat ang ginamit

isang saknong, tatlong may impit, isa'y walang impit

itinama lang ang tugmaan, aba'y nagagalit

magbasa na lang daw ako't huwag nang mangungulit

masama bang mamuna't nanlalagkit na ang mukha

tila tutulo ang uhog, malalaglag ang muta

ganyan yata ang sa kapwa makata'y nahihiya

kulang na lang ay magngalit at punitin ang akda

minsan di mo matanggap na di punahin ang mali

upang sa malaon ang mali'y di na manatili

mabago agad ng makata't ang mali'y mapawi

upang nagbasang estudyante'y tama ang iuwi

- gregbituinjr.

Kaylakas ng bagyo'y kumakatha

kaylakas ng bagyo'y kumakatha
habang naglalaro yaring diwa
habang tinititigan ang baha
habang paligid ay basang-basa

palutang-lutang ang mga plastik
at naglaglagan ang bungang hitik
mga basurang puno ng putik
ang sa isipan ay tumititik

basang-basa ang buong sampayan
luray-luray ang nasa isipan
kinatha'y di mo basta matingnan
baka mabasa'y sinapupunan

kaytindi ng bagyong nagngangalit
pati diwa ng mamang makulit
kinakatha ang mga pasakit
upang sa papel ay ibunghalit

pagkabagyo'y puno ang alulod
habang lumilikha ng taludtod
sa saknong ay itinataguyod
ang kaisahang di naaanod

- gregbituinjr.

Pagkatha habang naghuhugas ng pinggan

kaysarap magsulat sa isipan
habang pinggan ay hinuhugasan
maya-maya'y maglalaba naman
habang tumutula ng anuman

dapat matanggal ang mga sebo
kayurin ang uling sa kaldero
punasan ang nahugasang plato
at ikamada ang mga baso

mga buto'y agad pagbuklurin
mga tinik ay ibasura na rin
isama pati balat ng saging
habang kinakatha ang pahaging

pag natapos na'y agad maghinaw
ng kamay, kahit na giniginaw
gubat ma'y marilim at mapanglaw
magsusulat sa tabi ng tanglaw

at ititipa agad sa selpon
yaong naganap buong maghapon
isasalansan sa mga saknong
ang mga titik ng rebolusyon

- gregbituinjr.

Manibalang

huwag kunin ang manibalang

hintayin mo munang gumulang

huwag hayaang walang muwang

ay agad nilang tinotokhang

- gregbituinjr.

Ang gawain ng maglulupa

nababatid mo ba ang gawain ng maglulupa

tulad ng organisador na kasama ng dukha

na pag-aralan ang lipunan at buhay ng madla

at ipaalam ang papel ng uring manggagawa

ani Bonifacio, dapat guminhawa ang bayan

ani Marx, mas mahalaga'y baguhin ang lipunan

sapagkat di sapat ang ito'y ipaliwanag lang

ani Lenin, mahalagang may teorya't kilusan

iisa ang pagkatao ng lahat, kay Jacinto

sinabi noon ni Che Guevara kay Fidel Castro:

tagumpay ang Cuba, Bolivia nama'y ipanalo

kay Ka Popoy: organisahin ang uring obrero

ating suriin ang buhay nila, pamana't aral

at bilang maglulupa, huwag magsawang magpagal

tiyakin nating laging malusog upang tumagal

sa laban lalo't sistemang bulok ang sumasakal

- gregbituinjr.

Aktibistang maglulupa

di tayo aktibistang nakaupo lang sa silya

nagsusulat, nanonood, di nag-oorganisa

mas malaking trabaho'y mag-organisa ng masa

oo, mag-organisa, kahit tayo'y walang pera

mga masisipag na aktibista'y naglulupa,

nagsusuri at sa laban ay laging naghahanda

lalo't yakap ng taimtim ang prinsipyo't adhika:

organisahin ang laban ng uring manggagawa

estratehiya'y iniisip ng organisador

taktika upang manalo'y kanilang minomotor

mga isyu'y nailalarawan tulad ng pintor

palaban, marangal pagkat may palabra de onor

halinang maglupa't mga dukha'y organisahin

ang uring manggagawa'y dapat nating panalunin

organisador tayong gagawin ang simulain

hanggang mamatay o magtagumpay ang adhikain

- gregbituinjr.

Bagong taon, dating rehimen

Bagong taon, dating rehimen

ang palakad ay gayon pa rin

nagmahal ang mga bilihin

na epekto ng batas na TRAIN

aktibista'y taas-kamao

obrero'y kaybaba ng sweldo

sistema'y walang pagbabago

at tiwali'y nasa gobyerno

salot na kontraktwalisasyon

ay patuloy pa hanggang ngayon

ang manggagawang mahinahon

ay mag-aaklas pag naglaon

kayraming batang walang muwang

ang naging biktima ng tokhang

kayraming sa dugo lumutang

na pawang buhay ang inutang

tanikala'y dapat lagutin

elitista'y dapat gapusin

wakasan ang pang-aalipin

ng rehimeng dapat tigpasin

- gregbituinjr.

Mushroom ay di pa nila kayang tawaging kabuti

mushroom ay di pa nila kayang tawaging kabuti

ang wikang dayo pa rin ang sa kanila'y mabuti

nais daw magtanim ng kabuti sa tabi-tabi

bakasakaling naroon daw ang kanilang swerte

hilig nila'y mushroom burger kaya mushroom ang tawag

sa wikang Filipino'y tila di sila panatag

sa pagyakap sa wikang Ingles sila'y di matinag

sa bokabularyo nila kabuti'y di madagdag

mushroom ba'y wika ng sosyal at may pinag-aralan

kabuti ba'y katawagan ng dukhang mamamayan

wikang Ingles ba'y mas matimbang sa mga usapan

kaya wikang Filipino'y di mapahalagahan?

bakit kaya ginagamit nila'y wikang banyaga

gayong katutubo silang lumaki pa sa bansa

wikang Filipino'y atin, di ito wikang bakya

ugali ba nila'y paano dapat maunawa

- gregbituinjr.

Huwag kinisin ang tanikala, lagutin ito

huwag asahan ang reporma sa kapitalismo
ito'y pagtanggal lang ng kalawang sa tanikala
kahit maging ginto ang tinanikala sa iyo
dapat putulin ito't tayo rito'y makawala

kaapihan at pagsasamantala'y may solusyon
mapapawi rin natin itong dustang kalagayan
magkaisa't magsikilos para sa rebolusyon
ng manggagawang may misyong baguhin ang lipunan

huwag nang kinisin ang tanikala't maging manhid
sa bulok na sistemang tuloy ang pananalasa
lagutin ang tanikalang ito, mga kapatid
palayain ang uri't bayan sa hirap at dusa

mag-organisa, mag-organisa, iyan ang bilin
ng mga rebolusyonaryong bayani ngang tunay
magkaisa tayo't magsikilos sa adhikain
upang uring manggagawa'y tunay na magtagumpay

- gregbituinjr.

Nasa laban

ayokong mabagot, nais ko'y laging nasa laban

di ang umuwi ng probinsya't manahimik na lang

nais kong sa laban masalubong si Kamatayan

kaysa payapang buhay na isip ay sarili lang

para lang sa mga maysakit ang pamamahinga

di mo mababago ang lipunan pag nasa kama

kung laging nananahimik imbes nasa kalsada

di kakamtin ang asam na panlipunang hustisya

kabagot-bagot ang buhay na pulos telebisyon

pulos drama sa buhay at pulos paglilimayon

walang prinsipyong taglay at walang misyon at layon

kundi magpalaki ng bayag, lumaklak, lumamon

mabuti pang sumama sa mga pakikibaka

kaysa manahimik sa isang tabi't nakatanga

- gregbituinjr.

Bagong Taon, Lumang Sistema

Bagong taon, bagong petsa, dating pakikibaka

Bagong taon, dating kalagayan, lumang sistema

Nariyan pa ang pang-aapi't pagsasamantala

Adhika pa rin ng masa'y panlipunang hustisya

Bagong taon na, patuloy pa rin ang tunggalian

Dukha pa rin ang sangkahig, santukang mamamayan

At lalong yumayaman ang dati nang mayayaman

Ah, dapat lang baguhin ang ganitong kalagayan

Tuloy ang laban sa pagsapit nitong Bagong Taon

Isang bagong sistema ang dapat maganap ngayon

Lipunang makatao ang adhika't nilalayon

Na maipapanalo lang sa pagrerebolusyon

Halina't sama-samang kumilos at ipagwagi

Ang lipunang walang kapitalismong mapanghati

Dapat lang ipagwagi ang lipunang walang uri

Walang pagsasamantala't wala ring naghahari

- gregbituinjr.

Pag naputukan sa Bagong Taon

nakatingin ako sa kawalan

habang doon ay nagpuputukan

mawawalan ng daliri'y ilan

dahil sa labintador na iyan

sa ospital ba'y sinong tututok

iyon bang binilhan ng paputok

at sinong magbabayad sa turok

at gamot kung walang naisuksok

hahayaan ka ng pinagbilhan

wala raw silang pananagutan

di raw naman nila kasalanan

pag daliri mo na'y naputukan

aba'y nabentahan ka na nila

masaya na't tumubo na sila

walang paki pag nadisgrasya ka

nang maputol ang daliri, huwaaa!

- gregbituinjr.

Maghalo man

maghalo man ang balat sa pinagtalupan

maghalo man ang laway sa pinaghalikan

maghalo man ang tamod sa pinagsalsalan

maghalo man ang bala sa pinagbarilan

maghalo man ang damo sa pinagtabasan

maghalo man ang buhok sa pinaggupitan

maghalo man ang alak sa pinagtagayan

maghalu-halo tayo't Bagong Taon naman

- gregbituinjr.

Doble Bente

DOBLE BENTE

(tulang akrostiko)

Dumatal ang Bagong Taon na animo'y pag-asa

Oo, sinalubong ito ng dukhang nagdurusa

Bagong umagang nawa'y may panlipunang hustisya

Lalo't naglipana pa rin ang mapagsamantala

Eto'y simula ng panibagong pakikibaka

Bagong taon ba'y pag-asa o bagong petsa lamang?

Espesyal na petsa o tayo lang ay nalilinlang

Ng komersyalismo ng mga tuso't salanggapang

Tubong limpak ng kapitalistang nakikinabang

E, tayong maralita'y sa hirap pa rin gagapang

- gregbituinjr.

Noon, tinagurian akong makata ng lumbay

noon, tinagurian akong makata ng lumbay

dahil tinula'y pawang katotohanan ng buhay

dahil pulos kasawian ang kinakathang tunay

dahil sa kawalang hustisya't sa bala nabistay

dahil maraming inakdang pahimakas sa patay

minsan, tinaguriang makatang proletaryado

dahil inilalahad ang niyakap na prinsipyo

dahil tinutula ang buhay ng dukha't obrero

dahil katha'y laban sa sistemang bulok sa mundo

dahil akda'y tumutuligsa sa kapitalismo

ang karaniwang taguri'y makatang aktibista

dahil tula karaniwa'y nagsisilbi sa masa

dahil nananawagang baguhin na ang sistema

ngayon, makata'y ikinasal, nakapag-asawa

kaya naging makata ng puso sa sinisinta

ang makata'y patuloy pa rin ngayong kumakatha

para sa kalikasan at kilusang lunting diwa

para sa manggagawa, ang hukbong mapagpalaya

para sa ipinaglalaban ng kilusang dukha

araw-gabi'y may akda, tumutula, kumakatha 

- gregbituinjr.