Nangitim ang bayan-bayan sa alikabok

nangitim ang bayan-bayan sa alikabok
abot hanggang langit ang maitim na usok
nangangalisaw na ang mga trapong bugok
sa mundong ito'y sadyang nakasusulasok

animo ginawa nila'y isang buhawi
na nagtanim sa mundo ng masamang binhi
dapat walisin ang mga trapong tiwali
na dulot ay kayraming buhay na naputi

baguhin ang lipunang di kaibig-ibig
palitan ang sistemang dulot ay ligalig
walisin ang mga trapong dapat mausig
kilos na't pagandahin ang ating daigdig

- gregbituinjr.

Labanan ang mga hoarder ng bigas

bakit ba nais nilang itago't huwag ilabas?
yaong may apatnapung libong saku-sakong bigas
upang pag nagmahal ang presyo'y saka ilalabas?
talaga namang mga tulad nila'y mandurugas

nais nilang tumubò, tumubò lang ng tumubò
kahit bayan ay magutom, buhay nito'y maglahò
walang pakialam ang kapitalistang maluhò
walang pakiramdam basta limpak-limpak ang tubò

kahit mga lintang tulad nila'y dapat makulong
na bayan mismo'y nais lamunin ng mga buhong
di lang sila lintang maninipsip kundi ulupong
na baya'y sinasagpang pagkat sa tubò nalulong

huwag kayaang mawalan tayo ng isasaing
ang kapitalismo, di tayo, ang dapat malibing

- gregbituinjr.
(batay sa ulat sa pahayagang Tempo na may pamagat na "2 traders arrested for hoarding rice", Oktubre 12, 2018, p. 2, at nasa headline sa unang pahina na may pamagat na "2 rice traders nabbed")

Mylene Durante, Magiting na Guro, Bayani

MYLENE DURANTE, MAGITING NA GURO, BAYANI

kahanga-hanga ang gurong ngala'y Mylene Durante
sapagkat iniligtas ang dalawang estudyante
mula sa kamatayan, tinuring siyang bayani
ng ilang mga magulang at mga residente

isang guro sa Oringon Elementary School
si Mylene Durante'y magiting na ipinagtanggol
ang dalawang estudyante mula sa isang ulol
na agad nanaksak, at ang buhay niya'y pinupol

isang tunay na bayani ang magiting na guro
buhay ng estudyante'y di hinayaang mapugto
nais niyang kasamaan ay mapigil, masugpo
bagamat kapalit nito'y kanyang sariling dugo

nangyari sa guro'y kalapastanganang kaylupit
hustisya kay Mylene Durante, ito'ng aming sambit
dakpin ang mamamaslang, hatulan ito't ipiit
katarungan nawa'y kamtin ng gurong anong lupit!

- gregbituinjr.
(ang tula'y ibinatay sa ulat ng pahayagang Police Files Tonite, na may pamagat na "Napatay na Titser, Bayani sa Pagligtas sa 2 Estudyante", Oktubre 12, 2018, p. 12)

Di ka man nila dinig

mapalad tayong naririnig ang musika
lagaslas ng tubig, pag-angil ng agila
makipagtalastasan, debate't harana

ngunit yabag ba nila'y iyong naririnig
habang ang pagbusina mo'y nakatutulig
tanaw ka man sa pagdaan mo'y di ka dinig

may sariling buhay ang kanilang kataga
may sariling mundo ang kanilang salita
pag-uusap sa daliri'y kahanga-hanga

pagpapahalaga sa kanila'y ihatid
habang sa daigdig na ito'y tumatawid
bagamat di ka dinig ng mga kapatid

- gregbituinjr.

Ang bago kong tibuyô

ANG BAGO KONG TIBUYÔ

nais kong muli ang mag-ipon sa tibuyô
kaya maraming barya'y muling binubunô
sa isang boteng plastik aking binubuô
puntiryang isang buwan lang ito'y mapunô

sadyang napakahalaga ng pag-iipon
barya-barya man, may malaking matitipon
mga anak ay matuturuan pa ngayon
gawin ang dapat sa harap ng bagong hamon

nagtataasan na ang presyo ng bilihin
kung walang pera'y paano makakakain
lalo sa lungsod kahit paso'y walang tanim
magpapalamon ka na lang ba sa panimdim

sa tingin man ng iba, ito'y gawang hamak
aba'y mag-ipon na't huwag putak ng putak
simula lamang ang paunti-unting patak
makakaani ka rin sa iyong nilagak

- gregbituinjr.
* ang "tibuyô" ay tagalog-Batangas sa salitang Kastilang "alkansya"

Ang Palatungayaw

nasira nga ba ang tiyan sa pagpuputang-ina
ang lumalabas ba sa bibig, sa tiyan nagmulâ
araw-gabi na lang yata'y labis ang pagmumura
tungayaw ng tungayaw sa harap ng batà't madlâ

nakasisira ba ng tiyan ang pagtutungayaw
baka namumuong tae lang kaya nagbuburis
ang tilamsik kasi ng salita'y tila balaraw
nang sumugat sa tiyan bunganga'y di makatiis

subalit natutuwa sa kanya'y kayrami pa rin
pagkat berdugo raw ng mga kriminal at adik
subalit lalong kayrami ng nagagalit man din
wala raw paggalang sa proseso't batas ang lintik

bastos kung magsalita sa masa't kababaihan
pagmumura ba niya'y binunga ng sirang tiyan

- gregbituinjr.
(batay sa ulat ng Inquirer, Possible ‘growth’ seen in Duterte’s digestive tract after test – Palace, October 5, 2018, mula sa https://newsinfo.inquirer.net/1039526/possible-growth-seen-in-dutertes-digestive-tract-after-test-palace)

Pagkabasal

PAGKABASAL
(ibinatay mula sa kolum na Walang Bolahan ni Dra. Margarita Holmes, pahayagang Abante, Oktubre 8, 2018, p. 9)

minsan, nagtanong kay Doktora Holmes ang isang Marie
anya'y "Mahalaga po pa rin ba ang virginity
sa lalaki?" Parang sa gaya niyang binibini
o ginang, mahalaga ito upang di magsisi

nasa animnapung bahagdan daw yaong nagturing
mahalaga sa mag-asawang unang magsisiping,
bakit kaya, pag di ba virgin di na maglalambing?
ngunit iba'y ayos lang, makakatulog pang himbing

may lalaking talagang malalim ang pang-unawa
kung bakit di na birhen ang napangasawang sadya
iba ang nakaraan, ang panahon ng pagluha
ngayon ay may katapatang dapat na sinusumpa

lalo't ang babae'y nais maging ina ng anak
magkaroon ng pamilya ang landasing tinahak
pag sininta'y di na birhen, huwag kang manghahamak
kailangang mag-usap, huwag makitid ang utak

huwag laging nakaraan ang pakakaisipin
pagkat pagsasama'y di lang tungkol sa pagkabirhen
ito'y tungkol din sa pamilyang inyong bubuuin
magsamang maluwat, bawat isa'y pakaibigin

- gregbituinjr.

Lumitaw din ang mithi sa pawis ko't katas

lumitaw din ang mithi sa pawis ko't katas
habang kalooban ay patuloy ang ningas
bumarang plastik sa kanal ay di maagnas
kaya naligalig ang buryong sa kalatas

nang maitanim na ang mabubuting binhi
tumaba na rin ang dating butuhang binti
maiging paminsan-paminsan nagmamadali
ngunit huwag hayaang tuhod ay mabali

kayhirap bunutin sa lungga ang bayawak
aso't pusa man ay nagsisipaghalakhak
huwag pabayaang bahain ang pinitak
kahit na kamay ay punumpuno ng lipak

- gregbituinjr.

Halina't mag-ecobrick

HALINA'T MAG-ECOBRICK

lumaki na tayong kasama na natin ang plastik
tila ba ito na ang buhay, laging nasasabik
halos lahat ng gamit ay plastik, nakakaadik
pag nalunod na sa plastik, baka mata'y tumirik

huwag ilagay ang plastik sa ilalim ng araw
huwag itong sunugin, nakalalason ang singaw
huwag painitan, sa amoy ay tiyak aayaw
huwag hayaang sa init unti-unting malusaw

mga plastik sa ating bayan ay nakalalason
laking epekto sa bayan sa haba ng panahon
di man matunaw ng hangin, bagyo, ulan, o ambon
ngunit pag nainitan, para tayong nilalamon

ang plastik na itinapon ay pilit na bumabalik
anong dapat nating gawin pag ito na'y humalik
sa mga boteng plastik, mga plastik ay isiksik
upang tayo'y makatulong, halina't mag-ecobrick

- gregbituinjr.
- binasa sa harap ng mga dumalo, sa huling araw ng tatlong araw (Oktubre 4-6, 2018) na Ecobrick Certification Training of Trainors, Daila Farms, Tagaytay City

12402 - Ang una kong ecobrick

“I hope the time should NOT come that plastics are rampant in the ocean than fish. Let’s go ecobrick!” - published at https://www.ecobricks.org/12402/

tunay na malaking hamon sa aking kakayahan

bilang mandirigma para sa ating kalikasan

upang luminis at gumanda ang kapaligiran

itong gawaing pageekobrik para sa bayan

dahil hindi dapat mapunta ang plastik sa laot

ngunit paano pipigilan ang ganitong salot

plastik na naglipana'y tunay na katakut-takot

ang ganitong pangyayari'y sadyang nakalulungkot

isang paraang naisip ng marami'y ecobrick

kung saan gugupitin sa maliliit ang plastik

na sa boteng plastik naman ay dapat maisiksik

ang di lang natin magupit ay mga taong plastik

daigdig nating ito'y huwag gawing basurahan

ito'y isang prinsipyong habambuhay tatanganan

mag-ambag tayo't mag-ekobrik din paminsan-minsan

o kung sinisipag ka'y gawin na itong arawan

- gregbituinjr.

Single-use plastic sa Pinoy Henyo

SINGLE-USE PLACTIC SA PINOY HENYO

nag-pinoyhenyo kami matapos ang aktibidad
hinati sa dalawang grupo, talino'y nalantad
kayraming di nakahula, iilan ang pinalad
ngunit kaysaya sa laro kahit iba'y sumadsad

tatlong araw na pagsasanay hinggil sa ecobrick
sa ikalawang gabi'y naglaro ang matitinik
subalit di ko nahulaan ang single-use plastic
nasabi ko lang ay plastik, di sapat ang saliksik

kahit sa pagi-ecobrick, mahalagang magnilay
paano bang mga plastik ay dumaraming tunay
plastik na di magamit, sa basura nilalagay
sa dagat man, kinakain ng isda't ibang buhay

hiling ko na'y huwag sanang dumating ang panahon
na sa tambak-tambak na plastik tayo'y mababaon
at isa itong ecobrick sa nakitang solusyon
halina't magkaisa't harapin ang bagong hamon

- gregbituinjr.
- nilikha sa ikalawang araw ng tatlong araw (Oktubre 4-6, 2018) na Ecobrick Certification Training of Trainors, Daila Farms, Tagaytay City

Sa dagat ng basura

ang dagat bang puno ng basura'y nakita nyo na?
anong namasdan nyo, aba'y kayraming plastik, di ba?
nakakadiring pumunta sa dagat ng basura
hoy, baka magkasakit kayo, aba'y kayhirap na!

huwag sanang dumating ang araw na sobrang dami
ng basura sa dagat, wala nang isdang mahuli
tulungan natin ang dagat, mundo, bayan, sarili
gawin natin ang marapat, gaano man kasimple

- gregbituinjr.
- binigkas bilang bahagi ng Group 3 demonstration of modules sa palihan (workshop) sa ikalawang araw ng tatlong araw (Oktubre 4-6, 2018) na Ecobrick Certification Training of Trainors, Daila Farms, Tagaytay City

Kaplastikan

kung galit kang tapunan tayo ng basura
lalo't ginawang basurahan ng Canada
dahil ba sariling bansa na'y mahalaga
gayong sa bahay mo basura'y nagkalat pa

di ba't nais nating malinis ang tahanan
bakit sa paligid ay walang pakialam
di ba't tahanan din natin ang kalikasan
di ba't kalikasa'y marunong ding magdamdam

ituring nating tahanan itong daigdig
lalo't tahanan ay binigkis ng pag-ibig
huwag nating hayaang plastik ang bumikig
sa mga kaplastikan ay huwag padaig

- gregbituinjr.

Pagpapakilala sa isang seminar

ako'y mandirigma para sa kalikasan
nakikibaka upang mapangalagaan
itong daigdig na dapat pakamahalin
ambag sa kinabukasan ng mundo natin

ako'y makata mula Sampaloc, Maynila
aktibista, manunulat, at manggagawa
ina ko'y Karay-a, ama ko'y Batangenyo
payo'y kalikasa'y alagaang totoo

tawag sa akin, makata ng Balic-Balic
na tula'y umuupak sa utak-tiwarik
Greg Bituin Jr. po, ako'y nagpupugay
sa lahat ng nariritong dumalong tunay

- gregbituinjr.
- binigkas sa pagpapakilanlanan ng mga dumalo sa unang araw ng tatlong araw (Oktubre 4-6, 2018) na Ecobrick Certification Training of Trainors, Daila Farms, Tagaytay City

Ayoko ng cake sa kaarawan ko

AYOKO NG CAKE SA KAARAWAN KO

walang cake sa kaarawan ko, sabi ko kay misis
sapat na ang adobo't kanin, walang minatamis

o kaya'y anim na barbekyu't dalawang serbesa
tulad ng hiling ko pag ako'y pinatula nila

kaymahal ng cake upang gawin lang na panghimagas
kaysa mag-cake, aba'y ipambili na lang ng bigas

ang cake na presyo'y apatnaraan limampung piso
ay katumbas ng presyo ng bigas na sampung kilo

bukod pa roon, nakangingilo ang tamis ng cake
hayaang ako'y magdiwang na mag-isang babarik

- gregbituinjr.

Sa mga pinaslang sa Tlatelolco, Mexico

SA MGA PINASLANG SA TLATELOLCO, MEXICO
(OKTUBRE 2, 1968)

sa Tlatelolco'y kayraming estudyanteng pinaslang
naganap kasabay ng araw nang ako'y isilang
ang kanilang mga berdugo'y tila mga buwang
karahasan ang ibinigay, sila'y tinimbuwang

estudyanteng nais malayang makapagsalita
hangad na bilanggong pulitikal ay mapalaya
hangad na mga tiwaling opisyal ay mawala
hangad na matinong lipunan ang sinasagawa

estudyanteng nais magkaroon ng karapatan
estudyanteng nais isatinig ang kahilingan
estudyanteng nais magkaroon ng kalayaan
estudyanteng nais matanggal ang katiwalian

subalit sila pa yaong dinilig ng kilabot
pinagbabaril, lupa'y pumula, isang bangungot
limampung taon na yaong nakaraang hilakbot
hanggang ngayon ay dama pa rin ang lagim na dulot

pagkat estudyante'y di pa nabigyan ng hustisya
walang nakulong dahil sa nangyari sa kanila
hanggang ngayon, katarungan ang sigaw ng pamilya
hustisyang kay-ilap ba'y kailan kakamtin nila

- gregbituinjr. 10/02/2018

Hindi sapat

sa pag-aasawa'y aking nawatas
hindi sapat ang pag-ibig na wagas
kung wala namang pambili ng bigas

sa pag-aasawa'y aking nakuro
hindi sapat ang laging nakasuso
dapat kumayod, magbanat ng buto

sa pag-aasawa'y aking naarok
hindi sapat ang ari'y nakatusok
kung sa pitaka'y walang nakasuksok

sa yugtong ito'y aking naunawa
hindi laging kay misis nakadapa
dapat magbenta ng lakas-paggawa

sa pagpapamilya'y aking natalos
sandata'y hindi laging nakaulos
kung pamilya'y gutom, walang pantustos

sa pagpapamilya'y aking nabatid
hindi sapat ang pagsintang masugid
kung kay misis ay walang sweldong hatid

- gregbituinjr., 10/02/18

Patalastas sa isang liwasan

sa isang malawak na liwasang pasyalan
kailangan pa nila tayong pagsabihan:
"Halina't protektahan ang kapaligiran.
Huwag nating sirain ang mga halaman.
At tayo'y magtapon sa tamang basurahan."

sa taumbayan ay talagang tagubilin
bilin itong kung diwa't puso'y aangkinin
ay magpapaganda nga ng paligid natin
panawagan itong dapat lang balikatin
upang makahingang may malinis na hangin

sa kakilala't kaibigang matitisod
bulungan natin sila sa harap o likod
makiisang buhayin ang gubat sa lungsod
ang gawaing ito kahit nakakapagod
ay gaganda ang paligid, nakalulugod

- gregbituinjr.

Bakit po nila pinatay si Itay?

tanong ng anak, "Bakit po / nila pinatay si Itay?"
nang makitang ama niya'y / duguang nakahandusay
gayong kanina'y tahimik / lamang itong nagninilay
nang may pumasok sa bahay / at ama niya'y binistay

may hikbing tugon ng ina, / "Di ko alam, di ko alam
iyan na ba'y katarungan, / wala silang pakialam
dapat ay nilitis muna / kung sadyang may kasalanan
nang maipagtanggol naman / ang sarili sa hukuman"

"Ano po bang kahulugan / ng katarungan, O, Inay?
kung si Itay hinusgahan / na lang ng kung sinong kamay?"
"Ama mo'y may karapatang / magtanggol at magsalaysay
kung may nagawa ngang sala / ay ipagsakdal kung tunay."

"Dapat dumaan sa tamang / proseso, anak, due process
may dudulugan kang batas, / dadaan sa paglilitis
at di agad parusahan / ng kung sinumang herodes
sa hukuman ang pasiya," / anang inang tumatangis.

"Ngunit ang nangyari, anak, / basta lang siya binaril
extrajudicial killing daw, / isang klaseng paniniil."
"Inay, hustisya kay Itay," / tinig niya'y gumagaril
"Parusahan ang pumatay / at nag-utos ng pagkitil."

- gregbituinjr.

Huwag paslangin ang kapaligiran!

"Huwag paslangin ang kapaligiran!"
Ito'y isang seryosong panawagan.
May karapatan din ang kalikasan
na ito'y huwag sirain ninuman.
Ingatan natin ang kapaligiran
at mapanira'y duruging tuluyan!
Dapat magkaisa ang buong bayan
upang ating mundo'y maprotektahan!

- tula't litrato ni gregbituinjr.
(Kuha sa paglulunsad ng kampanyang "Rights of Nature" sa Arroceros Forest Park sa Maynila, Setyembre 29, 2018.

Pagbati kay Ms. Joan Carling

Lifetime achievement award ang alay kay Joan Carling
Na ang gobyerno sa kanya'y terorista ang turing
Champion of the Earth Award sa tulad niyang magiting
Pangangalaga sa kalikasa'y sadyang masining
Sa karapatan ng katutubo'y doon kumiling

Pinagtanggol ang kalikasan, ang puno, ang lupa
Katutubo'y di hinayaang magdusa't lumuha
Laban sa mga mapag-imbot, mga dambuhala
Aktibistang tunay, congrats po sa iyong nagawa
Mabuhay ka, Ms. Joan Carling, tunay kang dakila

- gregbituinjr.

* mula sa ulat ng ABS-CBN na may pamagat na "Activist tagged 'rebel' by Philippine gov't wins UN award", Setyembre 27, 2018
- mula sa kawing na https://news.abs-cbn.com/news/09/27/18/activist-tagged-rebel-by-philippine-govt-wins-un-award

Huwag kitang tamarin sa gawaing dakila

huwag kitang tamarin sa gawaing dakila
na para sa bayan at uring manggagawa
huwag makasarili't magdusa't lumuha
gawin ang para sa bukas ng mga bata

gawin ang tama't wala namang mawawala
kalikasa'y dapat laging inaalaga
dalhan ng pag-asa ang kapwa't naulila
diligan ng pag-ibig ang duguang lupa

- gregbituinjr.

Ayon sa isang pahayagang Pranses

di ako nakakaunawa ng salitang Pranses
bagamat nakapunta na roon ng isang beses
ngunit madali kong naunawa ang paninikis
nasa Pranses subalit may bahid ng wikang Ingles

sa kanilang dyaryo'y mababasa agad sa kober
"Rodrigo Duterte: Le president serial killer"
na nagsasabing ang pangulo'y kayraming minarder
na animo ginagawa niya'y nag-ala-Hitler

mabigat ang paratang, kung iyon ay paratang man
at mabigat din kung iyon nga ang katotohanan
ang tulad ba niya'y walang galang sa karapatan
at maraming kababayan ang nagtitimbuwangan

iyang dyaryong Pranses ba'y nagsasabi ng totoo
o mas makapagsasabi'y Pilipino't di dayo?
kahiya-hiya sa bansa kung iya'y panggugulo
mas kahiya-hiya sa bayan ang ganyang pangulo

- gregbituinjr.

* Mula sa ulat sa pahayagang Philippine Daily Inquirer na pinamagatang French paper banners Duterte as ‘serial killer president’, Oktubre 9, 2016
mula sa kawing na: http://globalnation.inquirer.net/146418/french-paper-banners-duterte-as-serial-killer-president

Isang sulyap sa kamatayan

ISANG SULYAP SA KAMATAYAN
(batay sa isang sikat na litrato hinggil sa EJK)

hindi siya pinaslang dahil siya'y pasahero
na nilabag yaong babala sa batas-trapiko
gaya ng pinahihiwatig doon sa litrato
na yakap ng babae ang duguang mahal nito

sa lansangan ba ang tulad niya'y isang balakid?
siya ba'y itinumba dahil sa maling pagtawid
o maling pagbaba o pagsakay? bakit hinatid
sa kamatayan ng kung sinong sukab na di batid?

kung may sala sa batas, bakit di muna nilitis?
bakit ang tulad niya'y tiniris na parang ipis?
nasaan ang proseso't di ginalang ang due process?
bakit sa kapangyarihan sila'y nagmamalabis?

hustisya'y gigil na hiyaw ng kanilang pamilya
anila'y dapat munang nilitis ang mahal nila
kung may pagkakasala nga'y sa piitan magdusa
at huwag basta hatulan ng punglo sa kalsada

- gregbituinjr.

Nakaratay ang kalikasan

Ang kalikasan
sa karamdaman
ay naparatay.

May kagagawan
ay mapag-imbot
sa gandang taglay

nitong daigdig
na pilit sinira
ng mga sakim.

Kaya ialay
natin ang lakas,
isip, sarili,

upang ingatan
ang kalikasang
dugtong ng buhay.

Poprotektahan
ito upang di
masirang tunay.

- gregbituinjr.

Mga ligaw na tanim

MGA LIGAW NA TANIM

Maraming naglipanang ligaw na tanim sa syudad
Gayong tanim ay doon sa semento nakalantad
Animo'y sinaka itong sadya't namumukadkad

Ligaw man silang mga tanim na napadpad dito
Imburnal man ay natirahan ding nilang totoo
Gagawin lahat kahit buhay man dito'y magulo

Ang tanim mang laking gubat, saan man mapadako
Walisin man ng masamang damo'y kusang tutubo
Ningning ng kapalarang papawiin ang siphayo

Ating masdan, bakit tumubo ang ligaw na tanim
Tinahak ang kagubatan ng lungsod at sinimsim
At tiniyak mabubuhay sila kahit sa dilim

Nakikipagkarerahan sa kay-init mang lungsod
Iniinda ang banas kahit nadarama'y pagod
Makita lang buháy ang pamilya'y nakalulugod

- gregbituinjr.

Sa mga manhid

"This world is dangerous not because of many evil but because of those who do not do anything and just watching while others are suffering." ~ Albert Einstein

SA MGA MANHID

nakatunganga lang, di baleng maraming mamatay
di man lang kumilos at pahalagahan ang bùhay
nakatanghod lang kahit kapwa na'y nakahandusay
ngingisi-ngisi kahit mga dukha'y pinapatay
tuod na animo kalooban nila'y palagay

ang natokhang ay di isang sineng pinanonood
na dapat palakpakan habang iba'y nakatanghod
nakadudurog ang pangil ng buwaya sa tuod
tumatagos din ang kuko ng lawin sa gulugod
sa sariling bayan kayraming sa dugo nalunod

sa kababayang pinapaslang, walang pakiramdam
basta di sila ang ginalaw, walang pakialam
sa karapatang mabuhay ng dukha'y nang-uuyam
tingin pa na tokhang sa dukha'y tama at mainam
ganyang baluktot nilang katwira'y kasuklam-suklam

kayraming inosenteng sa karimlan ibinulid
wala nang paglilitis, ang hininga pa'y pinatid
walang awang pinaslang ng kung sinong di mabatid
katarungan ba'y kilala ng isipang makitid
kung karapatang mabuhay nga'y di dama ng manhid

- gregbituinjr.

Magulang na Nanggulang ng mga Anak

MAGULANG NA NANGGULANG NG MGA ANAK
(mula sa ulat na "Anak 4, 6, 10, at 12, Gamit sa Live Show", 
pahayagang Bulgar, Setyembre 21, 2018, p. 2)

kaylulupit ng mga magulang ng mga batang ito
ginagamit sila sa internet para sa live show
katwiran ng inang suspek, siya'y walang trabaho
kaya binugaw ang anak nang kumitang totoo

bata'y edad apat, anim, sampu't labindalawa
anang ulat, malalaswang palabas sila
artista sa operasyon ng walanghiyang ina
walang muwang na pinagkakakitaan na pala

nang dahil sa gutom, mga anak ang pinahamak
magulang pa ang nagsipitas sa mga bulaklak
nang dahil sa hirap, niluray ang mga pinitak
kawalang dangal na di pa madalumat ng anak

nahan na ang liwanag, bakit nawalan ng bait
na upang kumita'y ginamit ang sariling paslit
ginawa nila sa anak ay sadyang anong lupit
walanghiyang magulang ay dapat lamang mapiit

- gregbituinjr.

Pagpapatawaran

matingkad na nagkukulay-dugo ang puso
tatalbog-talbog lang na parang bolang bungo
naroon ang binata sa kanyang pagsuyo
sabik marating ang kanyang pinipintuho

"mahal kita", sabi niya sa iniibig
"galit ako", tugon sa kanyang nang-uusig
pakikipag-ugnayan sa kanya'y kaylamig
dapat nang magkasundo upang magkaniig

may mga sumusugat sa kaibuturan
may mga pagdurugo rin ng kalooban
subalit may daan sa pagpapatawaran
kung mag-uusap lang sila't mag-iibigan

balang araw, makakamit din ang pagsinta
malilipad ang ulap, tulad ng agila

- gregbituinjr.

Ang payapang langgam

ANG PAYAPANG LANGGAM

ako'y isang langgam
doon sa kantina
ang iba pang guyam
ay kasa-kasama

hanap ay matamis
tulad ng asukal
masipag magtiis
kahit sa masukal

nagsisipag kami
at nagtutulungan
sa araw at gabi
walang kapaguran

kami'y walang puknat
sa pagtatrabaho
ngunit mangangagat
pag iyong ginulo

- gregbituinjr.

litrato'y kuha ng makata