Ka Popoy

KA POPOY

dalawampu't dalawang taon na ang nakararaan

nang bigla kang nawala dahil ikaw ay pinaslang

ng mga salaring kaaway nitong sambayanan

dahil pinalakas mo ang 'yong pinamumunuan

taas-kamaong pagpupugay, lider at kasama

ang mga aral mo'y aming isinasapraktika

upang tuluyang baguhin ang bulok na sistema

at mawala ang pang-aapi't pagsasamantala

sinabi mong dapat class line, di mass line, ang tunguhin

ng uring manggagawang pagkakaisa'y kakamtin

ang pag-oorganisa ng uri ang adhikain

makauring kamalayan ay sadyang patampukin

sa mga aral at karanasan nga'y napapanday

kasama ng manggagawang sosyalismo ang pakay

tanging masasabi ko'y taospusong pagpupugay!

tinutuloy namin ang laban mo, kasamang tunay!

- gregoriovbituinjr.

02.06.2023

Ang buwan

ANG BUWAN

kasabay si misis sa lakaran

nang buwan ay agad na kinunan

naiiba talaga ang buwan

kaysa poste ng ilaw sa daan

nalalambungan ng alapaap

na kapara ng mga pangarap

buti't sa selpon nakunang ganap

ang buwang nagtatago sa ulap

ano kayang kahulugan niyon

o wala, akala lang mayroon

mahalaga, sa paglilimayon

ay may nadidiskubreng kahapon

maya-maya, buwan na'y naglaho

di ko na alam saan patungo

basta huwag maligaw ang puso

at magpatuloy sa panunuyo

- gregoriovbituinjr.

02.05.2023

Tari

KITA

paano makakita ng kita

kung di matanggap ang aktibista

baka obrero'y maorganisa?

sa unyon ay mapagsama-sama?

ang mag-organisa'y karapatan

bakit hindi pahihintulutan?

ayaw magkaroon ng samahan?

baka ba pabrika'y pagwelgahan?

maging matino na kasing sadya

iyang kapitalistang kuhila

lakas-paggawa'y bayarang tama

huwag mang-api ng manggagawa

subalit dupang sila sa tubo

na limpak-limpak kung mapalago

habang obrero nila'y siphayo

upang buhay lang ay maihango

ang kapitalista'y palamunin

ng manggagawang inaalipin

dapat obrero'y makaalpas din

sa kadena ng pagkaalipin

- gregoriovbituinjr.

02.05.2023

Tari

TARI

akala ko'y matigas na ang aking tari

sa sitsit lang ni misis ay agad uuwi

kahit nagpapayo pa'y malibog na pari

kahit kalaban pa'y trapong mapagkunwari

kahit maraming sakit na nararamdaman

kunwari'y wala lang, at bato ang kalamnan

sintigas ng bakal ang tingin sa katawan

sa sitsit lang ni misis, uuwing tahanan

sa kalsada'y tahimik, kung umasta'y astig

kahit pa payat ay matipuno ang bisig

may paninindigan at matikas ang tindig

sa sitsit lang ni misis ay naliligalig

ah, Takusa ba iyan o nagmamahal lang

tulad ng sibuyas, laging nagmamahalan

pag kasama si misis, pag-ibig ay ganyan

pag wala si misis, laging nasa bakbakan

- gregoriovbituinjr.

02.04.2023

Tugon

TUGON

di ko masusunog yaring pakpak sa himpapawid

o sa mga lansangan sa aking bawat pagtawid

sapagkat sunog na ang kilay sa pagmamatuwid

ayokong masunog pa't nangitim na ang gilagid

ano kayang mensahe yaong nais pang ihatid

upang makaiwas na sa dilim ay mangabulid

sa ilang sagupaan, litid ko'y muntik mapatid

muntik mamate ng kalabang di agad nabatid

ano bang tugon sa suliraning sala-salabid

ay, di solusyon ang isabit ang leeg sa lubid

magtanong, makipagtalakayan, huwag maumid

makukuha rin ang perlas kung sa laot sisisid

sa madalas na pagninilay, biglang masasamid

tila may ibinubulong ang hangin sa paligid:

makipagkapwa lagi tayo't huwag maging ganid

magpakatao't kapwa'y huwag itaboy sa gilid

- greggoriovbituinjr.

02.04.2023

Paghahanap ng kita

PAGHAHANAP NG KITA

ayokong mangutang, ang kailangan ko'y trabaho

ayokong manghingi na lamang kung kani-kanino

kailangan ko ng pampagawa ng mga libro

magkatrabaho kahit tagalagay ng turnilyo

ayoko namang lagi lang nanghihingi kay misis

tangan ko pa ang dignidad ko't ayokong lumabis

aktibistang Spartan na buhay ay binubuwis

upang lipunang makatao'y mabigyan ng hugis

makita kaya ang hanap na trabahong may kita

basta nakakapagpatuloy bilang aktibista

basta di maninikluhod sa bulok na sistema

at basta sa kapwa tao'y di magsasamantala

dapat kumita upang may pampagawa ng aklat

habang nag-oorganisa ng dukha't nagmumulat

habang sa maraming isyu'y may isinisiwalat

habang sa niyakap na prinsipyo'y nanghihikayat

sa aktibistang pultaym na tulad ko'y anong bagay

tiyak mo bang sa ganyang trabaho'y mapapalagay

ang kalooban kong tila sakbibi na ng lumbay

dahil mga gawain ay di matustusang tunay

maaari rin ang trabahong pagsasaling-wika

mula sa wikang Ingles ay Tatagaluging sadya

masipag tumula ngunit walang kita sa tula

na tanging sinasahod lang ay sangkaterbang luha

- gregoriovbituinjr.

02.04.2023

Tiwakal

TIWAKAL

pag niyurakan ninuman ang aking pagkatao 

na sarili'y di ko na maipagtanggol nang todo

mabuti nang magpatiwakal, tulad ng seppuku

sapagkat karangalan na ang nakasalang dito

ako'y makatang laban sa pribadong pag-aari

ako'y aktibistang laban sa mapang-aping uri

ako'y manunulat na laban sa mapang-aglahi

ako'y sepulturero ng sistemang naghahari

huwag mo lang sasagkaan ang aking paniwala

huwag mo lang yuyurakan ang prinsipyong dakila

tanging hinihiling ko lang ay inyong pang-unawa

na tibak ako't makata ng dukha't manggagawa

handa ako sa rali kahit walang pamasahe

propagandistang sa kalaban ay di pahuhuli

ngunit pag dangal ko na'y niyurakan nang matindi

madarama kong tiyak ako baga'y walang silbi

kaya ipagtatanggol ko ang aking iwing dangal

saanma'y dedepensahan, gaano man katagal

ngunit kung di na kaya, buti nang magpatiwakal

tulad ng makatang sa sariling kamay nabuwal

ang makatang Hapones na si Yukio Mishima

si Mayakovsky, sinasalin ko ang tula niya

Sylvia Plath, Ingrid Jonker, Hai Zi, Edward Stachura 

Lucan, Ernest Hemingway, Hart Crane, Misao Fujimura

ako'y nabubuhay, walang pribadong pag-aari

ugat iyan ng kahirapan, di mo ba mawari?

ako'y magpapatiwakal pag nawasak ang puri

sa prinsipyo'y tapat, di kakampi sa naghahari

- gregoriovbituinjr.

02.04.2023

Pagpapatalas

PAGPAPATALAS

magbasa upang tumalas pa

ang kaalaman sa tuwina

lalo na sa literatura

upang mawala ang pangamba

mabuti nang may kaalaman

kaysa wala kang nalalaman

at sa paksa'y di maubusan

paksang nasa kapaligiran

magbasa't ang mata'y igala

titigan ang mga salita

namnamin ang mga kataga

nang di rin mapaso ang dila

parang punyal, pinatatalas

baka salita'y naglalandas

na parang dugong tumatagas

buti kung nagbibigay-lunas

baka sa iyong mga tanong

ay may landas kang sinusuong

sakaling sa aklat magkanlong

baka mahasa pa't dumunong

pagbabasa'y larangang turing

at masusuri rin ang kawing

upang yaring diwa'y magising

mula sa pagkakagupiling

- gregoriovbituinjr.

02.03.2023

Wari sa di mawari

WARI SA DI MAWARI

sa may liblib na pook

may haring nakaluklok

na kung umasta'y hayok

tingin sa masa'y ugok

bakit may naghahari?

panginoon ng uri?

at diyos na pinili?

bakit mapang-aglahi?

dapat nang mawakasan

ang ganyang kalagayan:

paghahari ng ilan

sa kapwa't mamamayan

kahit sa bawat tula,

sanaysay, kwento't dula

sila'y burahing sadya

pagkat mga kuhila

bakit may mayayaman?

laksa'y nahihirapan?

bakit kubkob ang yaman

nitong buong lipunan?

kalabisan na ito!

kailan matututo

na ang sistemang ito'y

kakalusing totoo!

- gregoriovbituinjr.

02.03.2023

Pambihirang pagkakataon

PAMBIHIRANG PAGKAKATAON

bihira ang nabibigyang / pagkakataong bumaka

upang tuluyang palitan / iyang bulok na sistema

mabuti't sa akin noon / ay mayroong nag-anyaya

maging kasapi ng unyon, / hanggang maging unyonista

may plano akong tumakbo/ bilang pangulo ng unyon

subalit aking tiyuhin / ay agad napigil iyon

assistant manager siya / sa kawaksing institusyon

nang matunugan ay agad / ang tindi niyang reaksyon

at bago ko maipasa / ang aking pagkandidato

ay sinundo ng kasamang / doon din nagtatrabaho

pinatatawag daw ako / nitong butihin kong tiyo

kinausap, pinakain, / at pinatagay pa ako

ako'y talagang nilasing / hanggang sa kinabukasan

di na naabot ang deadline / noong papel sa pasahan

ng aking kandidaturang / sa aking buhay ay minsan

lang mangyari kaya ako'y / lubos na nanghihinayang

at tatlong taon matapos / sa pinagtatrabahuhan

sa pabrika't katrabaho'y / talaga nang nagpaalam

may separation pay naman / matapos ang isang buwan

at muli akong nag-aral / ng kurso sa pamantasan

at doon ko naramdaman / ang isang bagong simula

sa panulatang pangkampus / ay nag-aambag ng akda

naging kasapi ng dyaryo't / nagsulat ng kwento't tula

naging features literary / editor, kaysayang sadya

hanggang aking makilala / sa pahayagang pangkampus

ilang mga aktibistang / katulad ko rin ay kapos

pinakilala ang grupo / nila't tinanggap kong lubos

niyakap ang aktibismo, / kolehiyo'y di natapos

umalis sa paaralan / at nakiisa sa dukha

nang maging organisador / ay nakibaka ring lubha

at minsan ding naging staff / ng grupo ng manggagawa

nag-sekretaryo heneral / ng samahang maralita

sumulat at nag-layout din / sa pahayagang Obrero,

Taliba ng Maralita, / Ang Masa't iba pang dyaryo

at naging propagandista / ng tinanganang prinsipyo

upang matayo ang asam / na lipunang makatao

nasubok ang katatagan, / maraming isyu'y inaral

minsan ding nakulong dahil / sa gawaing pulitikal

tatlong dekada nang higit, / dito na ako tumagal

hiling ko lang pag namatay, / alayan din ng parangal

- gregoriovbituinjr.

02.03.2023

Ulam na kamatis at sibuyas

ULAM NA KAMATIS AT SIBUYAS

kamatis at alahas, ay mali, sibuyas pala

ang aking pananghalian, at kaysarap talaga

lalo na't magkarne ay sadyang iniwasan ko na

lalo't manok na kadiri na sa aking panlasa

kamatis, bawang, sibuyas, ang naging pampalakas

talbos ng kamote, sayote, sili, at sibuyas

isinasabuhay na rin ang pagkain ng prutas

mga bungangkahoy na kaysarap na panghimagas

sa ngayon, iwasan ang anumang uri ng karne

sa pangangatawan ko'y tila ba naging mensahe

magkalaman ang kalamnan ang adhika't diskarte

upang tumatag sa lakad, wala mang pamasahe

sa ganito ko niyakap ang simpleng pamumuhay

at puspusang pakikibakang may prinsipyong taglay

- gregoriovbituinjr.

02.02.2023

Taliba

TALIBA

ako'y propagandista nitong maralita

pinagsusulatan ay ang dyaryong Taliba

ng Maralita, na publikasyon ng dukha

dalawang beses sambuwan nalalathala

doon nilalagay ang mga isyu't tindig

hinggil sa mga usaping dapat marinig

binibigyang-buhay ang mga walang tinig

panawagang bawat dukha'y magkapitbisig

di dapat balewalain ang mahihirap

pagkat sila'y kauri, dapat nililingap

bagamat ang buhay nila'y aandap-andap

kaginhawaa'y nais din nilang malasap

bilang propagandista'y aming adhikain

kapwa dukha'y maging kaisa sa mithiin

isang makataong lipunan ay likhain

makataong mundo'y maging tahanan natin

- gregoriovbituinjr.

02.02.2023

* ang Taliba ng Maralita ang opisyal na publikasyon ng Kongreso ng Pagkakaisa ng Maralitang Lungsod (KPML)

Kape muna

KAPE MUNA

tara, igan, kape muna tayo

nang kalamna'y sumiglang totoo

may kaunting tinapay pa rito

at may balita ako sa iyo

ang sikmura'y painitin muna

mula sa mahamog na umaga

mabuti nang may laman, handa ka

sa mga daratal na problema

tiyak tayo'y mapapasagupa

sa nakaamba pang mga digma

ang mahalaga'y gising ang diwa

at katawan, di natutulala

kapag tayo'y magsisipag-sipag

kayrami nating maaatupag

ipakita ring tayo'y matatag

at ang loob ay mapapanatag

- gregoriovbituinjr.

02.02.2023

Talambuhay

TALAMBUHAY

i

talambuhay ng personaheng tanyag noon

ay naisipan kong basa-basahin ngayon

ano ang sa pagkatao nila'y mayroon?

o pinaggagawa sa kanilang panahon"

ang buhay kaya nila'y isang inspirasyon?

mga katanungang sa diwa'y nadalumat

kaya tinyagang basahin ang mga aklat

bakit talambuhay nila'y dapat mabuklat?

anong bang aral ang dito'y mabubulatlat?

sambayanan kaya sa kanila'y mamulat?

ii

talambuhay ng limang banyaga'y nilibro

sa tindahan ng murang aklat nabili ko

sa BookSale ay nakatipid kahit paano

bakasakali lang may matutunan dito

- gregoriovbituinjr.

02.01.2023

Tulang bakal

TULANG BAKAL

"Poetry should also contain steel and poets should know how to attack." ~ Ho Chi Minh, lider-rebolusyonaryo ng Vietnam

isa iyong magandang payo sa mga makata

dapat may bakal at sintigas ng bakal ang tula

makata'y batid din kung paano ba sumagupa

sa mga kalabang mapagsamantala't kuhila

isa iyong magandang payo sa mga tulad ko

upang tanganan habambuhay ang diwa't prinsipyo

kasangga ang mga maralita't uring obrero

upang itayo ang isang lipunang makatao

magandang payo iyong aakma sa minimithi

laban sa ugat ng kahirapa't mapang-aglahi

laban sa pag-aangkin ng pribadong pag-aari

ng kasangkapan sa produksyon at ng naghahari

magandang payo ng rebolusyonaryong Ho Chi Minh

na sa araw at gabi'y tatanganan at tutupdin

isa sa umuugit sa diwa ko't saloobin

upang ipagtagumpay ang misyon at adhikain

- gregoriovbituinjr.

02.01.2023

Pagkilos

PAGKILOS

ako'y makatang laban sa pribadong pag-aari

ng kagamitan sa produksyon ng mapang-aglahi

sa sistemang kapitalismo't masasamang budhi

kumilos upang madurog ang naghaharing uri

pribadong pag-aari ang ugat ng kahirapan

at sanhi rin ng pagsasamantala't kaapihan

dapat nang tanggalin iyan sa kamay ng iilan

nang maging pag-aari iyan ng buong lipunan

pagkakapantay sa lipunan ang panawagan ko

na walang pagsasamantala ng tao sa tao

adhika'y pakikipagkapwa't pagpapakatao

at ilagay sa tuktok ang dukha't uring obrero

sinasabuhay ko ang prinsipyong iyan at mithi

ayokong maging kaisa ng mapang-aping uri

pag ako'y nagkaroon ng pribadong pag-aari

lagyan ako ng tingga sa ulo, kung maaari

di iyan pakiusap, iyan ay katalagahan

dahil lumaban sa mapagsamantala't gahaman

iyan ako, ako'y iyan, para sa uri't bayan

taasnoo akong kikilos hanggang kamatayan

- gregoriovbituinjr.

01.31.2023

Sa paglalakad

SA PAGLALAKAD

samutsari ang nakikita sa paligid

karetelang hila't babaeng tumatawid

ang nagliliparang ibon sa himpapawid

mensaherong may mga sobreng ihahatid

kagagaling ko lang noon sa isang rali

nang sa paglalakad ay may napagmumuni

nasa isip ang bayan imbes na sarili

kaya patuloy ang pagkilos araw-gabi

may isang metrong inilaan sa bangketa

upang ang tao'y may malakaran talaga

may sangmetro ring inilaan sa kalsada

para naman sa mga nagbibisikleta

nakapinta sa pader ay kaygandang mural

at sa pinanggalingan ko'y kayraming aral

pakikibakang masidhi't ano't kaytagal

dapat tanikala'y lagutin na ng punyal

kayraming paksa sa aking harap at likod

mga nagalugad ay may lungkot at lugod

may unat at baluktot, tuwid at pilantod

na nais kong ipinta sa mga taludtod

- gregoriovbituinjr.

01.31.2023

Salamat, nakabigkas din ng tula

SALAMAT, NAKABIGKAS DIN NG TULA

mabuti't sa solidarity night ng manggagawa

ay nabigyang pagkakataong bumigkas ng tula

sa pagitan ng pulutan at alak nakakatha

wala mang binabasa'y agad akong nakatula

marahil dahil kabisado ko ang mga isyu

ng mga kauri kaya isip ay di nablangko

di ko man naisulat ang nasa diwa't loob ko

ay may tugma't sukat pa ring bumigkas nang totoo

kaysaya ng buong gabi't punong-puno ng awit

nakabigkas lang ng tula nang makata'y mangulit

nagkakatagayan na kasi kaya nakahirit

at nasabi rin ang sa kapitalismo'y parunggit

masaya nang nakatula sa kanilang harapan

kaya pinagbuti ang pagbigkas nang may tugmaan

sa pumalakpak, nais ko kayong pasalamatan

makata'y di binalewala't inyong pinakinggan

- gregoriovbituinjr.

01.30.2023

* ang makatang gala ay nakatula sa solidarity night ng ika-9 na Pambansang Kongreso ng Bukluran ng Manggagawang Pilipino (BMP), Baguio City, 01.28.2023

Ang masasabi

ANG MASASABI

mananatiling tutula

kahit laging walang-wala

sa langit nakatingala

sa kisame'y tutunganga

gawain mang walang sahod

kaya buhay ay hilahod

yaring pluma'y hinahagod

marahil hanggang sa puntod

patuloy na inaalam

ang lipunang inaasam

magsamantala'y maparam

bagamat may agam-agam

patuloy sa adhikain

at sa atang na tungkulin

tutupdin bawat layunin

lalo't dakilang mithiin

iyan lang ang masasabi

upang tuluyang iwaksi

yaong sistemang salbahe

at talagang walang silbi

- gregoriovbituinjr.

01.30.2023

Niloloob

 

NILOLOOB

“There is no greater agony than bearing an untold story inside you.” 

~ Maya Angelou, I Know Why The Caged Bird Sings

animo'y nagsisukob

dini sa niloloob

bawat isyung marubdob

sa kung saan nalublob

ibon ay umiiyak

doon sa hawlang pilak

ramdam ay napahamak

laya'y asam na payak

nababahaw ang tinig

tila may nakabikig

ayusin na ang katig

kung maglayag ang ibig

patuloy ang pagsuyo

bagamat walang luho

pagkat sinta'y kasundo

kapanalig, kapuso

patuloy man ang digma

sa gahama't kuhila

lagutin nating sadya

ang gintong tanikala

- gregoriovbituinjr.

01.30.2023

Di pansarili lang

DI PANSARILI LANG

minsan lang tayo mabuhay tapos

isip lang ay pansarili, kapos

dapat ay isang lipunang lubos

ang matayo nang walang hikahos

di pamilya lang, di bukas mo lang

di sa pansariling pakinabang

di rin para sa trapo't iilan

kundi para sa bukas ng bayan

wala tayong ipagmamalaki

kung nabuhay lang na pansarili;

sa ating uri, tayo'y magsilbi

at sa higit na nakararami

buong lipunan ang babaguhin

sistemang bulok ay palitan din

lipunang makatao'y likhain

para sa kinabukasan natin

- gregoriovbituinjr.

01.29.2023

* kinatha sa ikalawang araw ng ika-9 na Pambansang Kongreso ng Bukluran ng Manggagawang Pilipino, Baguio City, Enero 28-29, 2023

Diwang hatid

DIWANG HATID

nakagagalit ang awit at talumpati

lalo't tinatalakay ay isyu ng uri

patuloy na yumayaman ang naghahari

bulok na sistema'y sadyang kamuhi-muhi

makinig sa kanila'y nakapanginginig

dama mong napakainit kahit malamig

ibang-iba ang hagod ng kanilang tinig

talagang sa mga buktot na'y nang-uusig

pasasalamat sa pahatid ninyong diwa

talagang dama ito naming mga dukha

dapat nang itayo ng uring manggagawa

ang lipunang makataong tunay na pita

aming napakinggan ay isinasapuso

kahit sa mahabang paglalakbay ay hapo

tuloy pa rin ang pakikibaka't pagsuyo

kamtin ang pangarap na di dapat maglaho

- gregoriovbituinjr.

01.29.2023

* kinatha sa ikalawang araw ng ika-9 na Pambansang Kongreso ng Bukluran ng Manggagawang Pilipino, Baguio City, Enero 28-29, 2023

Kauri

KAURI

isa akong manggagawa noon, inyong kauri

na tagagawa ng floppy disc, Hapon ang may-ari

sa kumpanyang PECCO ang pinag-ugatan ng binhi

sa pagkamanggagawa'y doon nagmula ang mithi

ngala'y Precision Engineered Components Corporation

sa Alabang, at machine operator ako roon

unang trabaho, talubata pa lang ako noong

taon nang isinabatas ang kontraktwalisasyon

tatlong taon doon, nag-resign, umalis, nag-aral

sa kolehiyo ay naging aktibistang marangal

kalahati ng buhay sa aktibismo nagtagal

tatlong dekada nang ang kauri'y itinatanghal

niyakap ko ang prinsipyo ng pagpapakatao

ang Kartilya ng Katipunan ay sinusunod ko

niyakap ang makauri't sosyalistang prinsipyo

nang lipunang makatao'y itayo ng obrero

sulong, kauri, kamanggagawa, tuloy ang laban

bakahin ang mga mapagsamantala't gahaman

upang kamtin ng bayan ang hustisyang panlipunan

at itayo ang asam na makataong lipunan

- gregoriovbituinjr.

01.28.2023

* isinulat sa unang araw ng ika-9 na Pambansang Kongreso ng Bukluran ng Manggagawang Pilipino (BMP) sa Lungsod ng Baguio, Enero 28-29, 2023

Pagpapatuloy

PAGPAPATULOY

patuloy ang pagsama sa rali

kahit gaano tayo ka-busy

lalo't sa isyu'y di mapakali

matapos na ito'y mapaglimi

lumaki sa ganitong lipunan

na may pinagsasamantalahan

lalong yumayaman ang mayaman

at dukha'y nananatiling ganyan

kaya huwag mo kaming sisihin

kung patuloy sa aming layunin

matugunan ang mga usapin

na pawang lumalamon sa amin

takot man, nagiging walang takot

upang maituwid ang baluktot

upang tuligsain ang kurakot

mapalitan ang sistemang buktot

- gregoriovbituinjr.

01.27.2023

* litratong kuha ng makatang gala sa pagkilos sa harap ng DOLE Intramuros, Maynila, 01.19.2023

Pagpapakatao

PAGPAPAKATAO

pawiin natin ang sistemang di makatao

pagkat iyan ang dahilan ng maraming gulo

hindi na ba iiral ang pagpapakatao?

aanhin ba natin ang kayamanan sa mundo?

manghihiram lang ba lagi tayo ng respeto

sa kayamanan kaya nang-aangkin ng todo?

wala na bang puwang ang pagiging makatao

kaya nais lagi'y may pag-aaring pribado?

dinadaan lagi sa digmaa't kayamanan

ang mga usapin, tingnan mo ang kasaysayan

na dulot, imbes kaunlaran, ay kamatayan

imbes magpakatao'y nakikipagdigmaan

di na makuntento sa kung ano ang mayroon

aanhin mo ang yaman? para maghari ngayon?

para lamang tawagin kang isang panginoon?

at mamamatay ka lang pagdating ng panahon!

- gregoriovbituinjr 

01.26.2023

Huwag ninyong hanapin sa akin ang hindi ako

HUWAG NINYONG HANAPIN SA AKIN ANG HINDI AKO

huwag ninyong hanapin sa akin ang hindi ako

at ako'y hubugin sa kung anong kagustuhan n'yo

hinahanap ninyo sa aki'y ibang pagkatao

ang matagumpay na negosyante o asendero

nagpapatakbo ng kumpanyang limpak kung kumubra

na tingin sa obrero'y hanggang kontraktwal lang sila

masipag na kalabaw ang tingin sa magsasaka

na bigay ninyong sahod ay mumo lang, barya-barya

na ang trato sa mga maralita ay alipin

na ang tingin sa mga dukha'y pawang palamunin

di kaya nitong budhi ang inyong mga pagtingin

ang hindi ako'y huwag ninyong hanapin sa akin

tanggap kong isa lang akong hamak na mamamayan

ngunit prinsipyado't may taglay na paninindigan

nahanap ko na ang aking lugar sa ating bayan

landas kong pinili sa harap man ni Kamatayan

kumikilos akong tibak ng uring manggagawa

at isang mandirigma ng hukbong mapagpalaya

ito ako, iyan ako, sana'y inyong unawa

di n'yo mababago ang pagkatao ko't adhika

- gregoriovbituinjr.

01.25.2023

Ang hanap

ANG HANAP

hinahanap ko kung saan ba may silbi sa bayan

sa kapwa dukha, uring manggagawa, mamamayan

ngunit di hanap ang pansariling kaligayahan

na kakain lang, tutulog lang, pulos pahinga lang

pagkat di ako tamad, anong sipag kong totoo

isang araw isang tula ay masaya na ako

tumangan ng bandera o plakard sa parlyamento

ng lansangan o magsulat ng pahayag sa isyu

di ko maisip bakit ang mata'y pinapupungay

kung saan matapos ang gawain ay laging tagay

mas nais ko pang sa aklatan o bukstor tumambay

bakasakaling may matututunang maging gabay

ah, napakapayak lamang ng aking hinahanap

na lipunang makatao'y maitayo nang ganap

mapuno man iyon ng mga sakripisyo't hirap

masaya nang makapagsilbing walang pagpapanggap

- gregoriovbituinjr.

01.25.2023

Dalawang aklat

DALAWANG AKLAT

dalawang aklat itong pambihira

hinggil sa isang lider-manggagawa

na naitago ko pala sa takba

nakita ang akala'y nawawala

oo, noon nga siya'y naabutan

ako pa'y nasa grupong Kamalayan

at napuntang Sanlakas at Bukluran

at sa mga pagkilos sa lansangan

sulatin niya'y pag-ukulang pansin

upang ilapat sa panahon natin

o marahil ito pa'y paunlarin

nang muling maipalaganap man din

basahin muli yaong counter-thesis

at namnamin ang anghang nito't tamis

nang manggagawa'y magkabigkis-bigkis

nang maralita'y di na nagtitiis

- gregoriovbituinjr.

01.24.2023

* Ang una'y nabili ko noong Agosto 11, 2006 sa pambansang opisina ng Partido ng Manggagawa (PM), 300 pahina.

* Ang ikalawa'y aking sinaliksik, tinipon at isinaaklat noong 2009, at muling nilathala noong 2017, 112 pahina. Inilunsad sa UP Bahay ng Alumni noong Pebrero 6, 2009, sa ikawalong anibersaryo ng pagpaslang kay Ka Popoy.

Alaga

ALAGA

nakatulog na ang aming alaga

na dalawang kuting at inang pusa

matapos nilang manghuli ng daga

at nabusog sa twalya'y nagsihiga

nakatitig lang akong di mainip

sa kanilang anong sarap ng idlip

ano kayang kanilang panaginip

o kaya'y ang mga nasasaisip

matutulog na rin ako't antok na

sa panaginip kaya'y magkikita

silang tanging bigay ko'y mga tira

aba'y babalitaan na lang kita

- gregoriovbituinjr.

01.24.2023

Pahinga

PAHINGA

minsan, di ko maisip ang gagawin

baka diwa muna'y pagpahingahin

animo'y maysakit at suliranin

at di magawa-gawa ang balakin

madalas kinakapoy ang katawan

baka loob ay pinanghihinaan

magpahinga lang ba ang kasagutan

o may inspirasyong dapat tanganan

pati mga salita'y di mahagod

nasungaba pati pananaludtod

pantig at saknong ay napipilantod

nanghihina ang tuhod at gulugod

may kung anong nakadagan sa dibdib

sa mga laman may naninibasib

magpahinga muna kaya sa liblib

o magkampo kaya sa isang yungib

- gregoriovbituinjr.

01.23.2023