Pagtahak sa naiibang mundo

maraming araw-araw na lang nag-iinom sila
at pag tumatagay sila, animo'y ang sasaya
naghahalakhakan pag katagay na ang barkada
tila ba tinahak nilang daigdig ay iisa

ngunit pag natapos ang inuman, mag-isa na lang
tila ba bumalik sa dating mundong kinagisnan
walang trabaho, panay problema, pulos awayan
tila di malaman kung anong pagkakaperahan

iba ang mundo ng tagay, doon sila'y prinsipe
doon ay nabubuo nila ang mundong sarili
walang problema, tawanan, animo'y komedyante
paraan ng pagtakas sa problemang di masabi

tagay ng tagay, di na kinakaya ang mamuhay
pagsayad ng alak sa sikmura'y may ibang buhay
nililikha'y sariling daigdig na walang lumbay
nanghihiram ng saya pansamantala mang tunay

araw-gabi na lang ay nasa pantasyang daigdig
at tumatakas sa problemang di nila madaig
marahil kung di sila lango, kulang sa pag-ibig
kaya kung anu-ano na lang ang nasok sa bibig

- gregbituinjr.

Mga Tibok ng Diwa

MGA TIBOK NG DIWA

isipin mo ang mundo

at nagbabagong klima

anong pakiramdam mo

sa iyong nakikita

ang lupa'y iyong damhin

sa pintig ng alabok

mundo'y may tagubilin

kung anong tinitibok

payo'y pangalagaan

itong kapaligiran

huwag pababayaan

ang ating kalikasan

ilog ay umaagos

ang ulan ay tikatik

sa puso'y tumatagos

ang kaysarap na halik

lalabhan ko ang damit

ng diwata ng gubat

pawis na nanlalagkit

sa palad ay kaybigat

basurang nabubulok

ay iyong ihiwalay

sa hindi nabubulok

itapong hindi sabay

sahig ay lumangitngit

pagkat kayraming butas

narinig hanggang langit

ang pagaspas ng limbas

mawawala ang puno

pag laging nagpuputol

pag gubat ay naglaho

ang buhay ay sasahol

- gregbituinjr.

* unang nalathala sa munting pahayagang Diwang Lunti, isyu ng Nobyembre 2019, pahina 20

Pag sinampilong ka ng mutya

minsan, maalam ding magalit ang mga diwata
lalo na yaong kaygandang dilag mong minumutya
huwag mong hahayaang pumatak ang kanyang luha
dahil nadama niyang niloko mo siyang pawa

gawin mo ang marapat upang mawala ang galit
ng sinisintang ang poot ay tila abot langit
baka nadama niya'y karanasang anong pait
sa piling mo't pagsinta pala niya'y nasa bingit

pag sinampilong ka'y agad iwasang kapagdaka
mag-ingat-ingat din, baka ikaw ay masungaba
at tumama sa kung saan ang maganda mong mukha
sa anumang mangyayari'y dapat lagi kang handa

kung iibigin mo ang diwata'y maging matapat
pagkat tila ibinibigay niya'y lahat-lahat
kung magmamahal ka'y dapat ka ring maging maingat
pagkat puso't damdamin ay nasasaktan ding sukat

- gregbituinjr.

Iwas, salag, bigwas

dapat gawin nati'y pag-iwas, pagsalag, pagbigwas
taktika sa pagdepensa sa masang dinarahas
habang kumikilos tayo't masa'y pinalalakas
at mga prinsipyong tangan nila'y pinatitigas

magpalakas tayo't di lang lakas ng katuwiran
nang mapigilan ang anumang bantang karahasan
tuwina'y ipagtanggol ang pantaong karapatan
kaya dapat nating depensahan ang uri't bayan

iiwasan natin ang mga suntok ng estado
kung makatama man sila'y salagin natin ito
at kung mawala sila sa porma'y bibigwas tayo
ng ala-Pacquiao na sadyang kaytigas ng kamao

matutong umiwas, sumalag, bumigwas, tumabi
makipagkpitbisig tayo sa ating kakampi
matuto rin tayong bumigwas pag tayo'y inapi
ngunit ilagan ang suntok ng mapang-aping imbi

- gregbituinjr.

Hustisya sa hinalay na dilag

grabeng balitang tila ba di ka matutunawan
pag nabasa mo, sarili'y baka di mapigilan
dahil sa galit, nakakapanginig ng katawan
"katorse anyos na dilag ay sex slave ni insan"

anang ulat, ginagapang siya pag lasing ang suspek
ginagalaw, nilalaspag, binababoy ang pekpek
sa dalagita'y takot at lagim ang inihasik
sa loob ng dalawang taon siya'y kinatalik

madalas, dalawa silang naiiwan sa bahay
subalit ang dalagita'y di na napapalagay
pananahimik niya'y di nakatulong na tunay
dahil nagpapatuloy ang nangyaring panghahalay

hanggang di na iyon matiis pa ng dalagita
kaya sinumbong sa kaanak ang nadamang dusa
nagresponde ang barangay, suspek ay dinakip na
at kaso ng panghahalay ay agad isinampa

dusa ng dilag ay kaytagal pang paghihilumin
dapat managot ang suspek, siya'y pinsan pa man din
dahil sa seks pinsang dalagita ang inalipin
suspek ay dapat lang makulong sa ginawang krimen

- gregbituinjr.

Ginawa ko nang titisan ang lata ng sardinas

lata ng sardinas ay ginawa ko nang titisan
nang matipon doon ang titis at upos na iyan
dapat din nating alagaan ang kapaligiran
na kung di mo malinisan ay huwag mong dumihan

ilagay sa titisan ang abo ng sigarilyo
simpleng bagay lang itong hinihiling ko sa iyo
anong paki ko kung sinusunog mo ang baga mo
basta ilagay mo sa tama ang upos mo't abo

ginagawa kong titisan ay ibinabahagi
sa kakilala kong sunog-bagang di ko mawari
di ko sila mapipigilan sa bisyong masidhi
ang payo ko lang ay ayusin ang kanilang gawi

ginawa ko nang titisan ang lata ng sardinas
nang magamit nyo't titis ay di kumalat sa labas
kaya munting payong ito'y aking pinangangahas
upang magandang kapaligiran ang namamalas

- gregbituinjr.

* titisan - salitang Batangas sa ash tray

Di lang kuto o garapata kundi mga kato

di lang kuto o garapata kundi mga kato
ang mga ganid na kapitalistang manananso
sa likod ng manggagawa'y nanininipsip ng dugo
tila mga buto nito sa tubo'y ginagato

tingin nila sa manggagawa'y sampung perang muta
na dapat lang baratin ang angking lakas-paggawa
na kung susuriin animo'y paurong ang diwa
na sa pagsisikap at buhay ng obrero'y banta

nais ng kapitalistang mamuno sa lipunan
na tila pabrika ang pagpapatakbo sa bayan
na dambuhalang kato'y di naman naninilbihan
na manggagawa'y kumakain na lang sa labangan

sa karapatan ng obrero, ito'y isang dagok
subalit palabang obrero'y di dapat malugmok
manggagawa na ang mamahala't dapat maluklok
kaya obrero'y maghanda sa pag-agaw ng tuktok

- gregbituinjr.

* kato - malaking garapata
labangan - kainan ng mga biik

Sinasabuhay natin ang pakikibakang masa

sinasabuhay natin ang pakikibakang masa
dahil sa niyakap nating prinsipyong sosyalista
layunin nating baguhin ang bulok na sistema
kaya ngayon, patuloy tayong nag-oorganisa

ginagawa natin ay di lang simpleng pamumuhay
dahil nakatuntong na ang isang paa sa hukay
kumikilos na sosyalismo'y gabay at patnubay
bagamat niyakap natin ang simpleng pamumuhay

nakatakdang ang manggagawa ang sepulturero
nitong pandaigdigang sistemang kapitalismo
kaya dapat nating organisahin ang obrero
upang mapang-aping sistema'y tuluyang mabago

dapat nating patalasin ang ating pagsusuri
at palakasing tuluyan ang diwang makauri
upang ating madurog ang pribadong pag-aari
at ibagsak ang bulok na sistemang naghahari

ang imperyalistang atake'y di basta huhupa
dahil narito tayong sosyalismo ang adhika
dapat magkapitbisig na ang uring manggagawa
sila bilang nangungunang hukbong mapagpalaya

- gregbituinjr.

Kataksilan sa bayan

aba'y maituturing nang kataksilan sa bayan

ang gawin pang bayani ang diktador na gahaman

mga aktibista'y dinukot, tinortyur, sinaktan,

pinaslang, gayong ipinaglaban ang karapatan

kayraming winala noong kanyang panunungkulan

at ngayon, diktador pa'y itinuring na bayani

gayong siya sa karapatang pantao'y nameste

siyang kasangga ang mga kapitalistang kroni

siyang nagpayaman sa poder bilang presidente

bilyon-bilyon ang sa kaban ng bayan diniskarte

di bayani ang diktador, libingan ay hukayin

ang puntod ng halimaw ay dapat lang distrungkahin

ang kasaysayan ay pinipilit nilang baguhin

di bayani ang diktador sa kasaysayan natin

kaya ating sigaw: "Hukayin! Hukayin! Hukayin!"

- gregbituinjr.

* pang-apat na tulang nilikha at binasa ng makata sa rali sa paggunita sa ikatlong anibersaryo ng paglilibing sa diktador sa Libingan ng mga Bayani, Nobyembre 18, 2019, kasama ang grupong IDefend, idinaos sa Boy Scout Circle

Nakaw na libing

di bayani ang diktador, iyo bang natatalos

nang inilibing ang mula sa pamilya dorobos

nagnakaw sa kaban ng bayan, dumami ang kapos

dumami ang kroni, dumami rin ang binusabos

mismong likod ng bayan ay pataksil na inulos

ang kataksilan sa masa'y balaraw na tumagos

lumabas sa lansangan pati matatandang tibak

paano naging bayani, paduguin ang utak

maraming winala, pinaslang, mga pinahamak

at ngayon nga'y dignidad pa ng bayan ang yinurak

nakaw na libing, sa likod ng bayan ay tumarak

nakaw na libing ng magnanakaw na ibinagsak

- gregbituinjr.

* pangatlong tulang nilikha at binasa ng makata sa rali sa paggunita sa ikatlong anibersaryo ng paglilibing sa diktador sa Libingan ng mga Bayani, Nobyembre 18, 2019, kasama ang grupong IDefend, idinaos sa Boy Scout Circle

Hukayin ang diktador

Hukayin ang diktador sa Libingan ng Bayani

Upasala sa kasaysayan, ang masa ang saksi

Kinamatayan na ng aktibistang anong dami

Ang hustisyang hinahanap lalo ng mga api

Yinanig ang bansa nang diktador ay inilibing

Ito'y paraang panakaw, kaya masa'y nagising

Nobyembre disiotso'y petsang nagbadya ang lagim

Hustisyang hinahanap ay nagtago na sa dilim

Umuwing nagngingitngit ang mga nakikibaka

Kayraming biktima ng martial law, masa't pamilya

At ngayon, diktador na di bayani'y bayani na

Yaong sigaw nila'y "Hukayin!" para sa hustisya

Isang pagsalaula na iyon sa kasaysayan

Na dapat lang baligtarin ng mismong sambayanan

- gregbituinjr.

* pangalawang tulang nilikha at binasa ng makata sa rali sa paggunita sa ikatlong anibersaryo ng paglilibing sa diktador sa Libingan ng mga Bayani, Nobyembre 18, 2019, kasama ang grupong IDefend, idinaos sa Boy Scout Circle
* nalathala sa publikasyong Taliba ng Maralita, ang opisyal na pahayagan ng Kongreso ng Pagkakaisa ng Maralitang Lungsod (KPML), isyu ng Nobyembre 16-30, 2019, p. 20

Nobyembre disiotso'y huwag nating kalimutan

Nobyembre disiotso'y huwag nating kalimutan

sa petsang ito'y sinalaula ang kasaysayan

pagkat ang diktador ay inilibing sa Libingan

ng mga Bayani, gayong walang kadakilaan

di naman kabayanihan ang gawang diktadura

kundi pawang pananakot at ligalig sa masa

ngunit kayrami'y namatay, nawalan ng hustisya

dinukot, sinaktan, pinaslang, nangawala sial

inilibing ang diktador nang magdesisyon ang Korte

Supremang doon sa Libingan ng mga Bayani

ay dapat lang mailibing ang dating Presidente

gayong para sa madla, mali iyon, di puwede

Nobyembre disiotso, kayrami nang nagprotesta

di makatarungan ang desisyon para sa masa

hanggang ngayon, masa'y nananawagan ng hustisya:

"Hukayin! Hukayin!" sigaw ng masa'y "Hukayin na!"

- gregbituinjr.

* Unang nilikha at binasa ng makata sa rali sa paggunita sa ikatlong anibersaryo ng paglilibing sa diktador sa Libingan ng mga Bayani, Nobyembre 18, 2019, kasama ang grupong IDefend, idinaos sa Boy Scout Circle
* Nalathala sa publikasyong Taliba ng Maralita, ang opisyal na pahayagan ng Kongreso ng Pagkakaisa ng Maralitang Lungsod (KPML), isyu ng Nobyembre 16-30, 2019, p. 20

Pagbati ko po'y maligayang kaarawan, ama

pagbati ko po'y maligayang kaarawan, ama
nawa'y nasa mabuti kang kalagayan tuwina
maraming salamat at palaging naririyan ka
upang pagsabihan kami't magpayo ng maganda

nawa'y lagi kang nasa maayos na kalusugan
bagamat magkaiba tayo ng prinsipyong tangan
kaiba man itong aking tinahak na larangan
narito tayo't nagtutulungan kung kailangan

dumatal na kayo sa edad na pitumpu't walo
na sinapit na ang tatlong-kapat ng isang siglo
hatid ko'y pasalamat sa buo kong pagkatao
pagkat dinisiplina't hinubog ng aral ninyo

nawa'y manatili kayong malusog, aming tatay
lumakas pa kayo't humaba pa ang inyong buhay
maligayang kaarawan po ang pagbating tunay
taas-noo pong pagpupugay, mabuhay ka, Itay!

- gregbituinjr.

Itataas natin ang bandila ng katarungan

sige, tuligsain mo akong di hari ng lumbay
habang sa mga isyu't problema'y nakatugaygay
dama mo bang dapat ka ring maghimagsik na tunay
upang di magiba ang itinayo nating tulay

di dumadaloy ang ilog sa paanan ng lungsod
dahil pawang putik na't marami roong nalunod
makakapuno rin sa patak mula sa alulod
basta't mayroong malaki kang timbang nakasahod

sinuman ang mag-alay sa bayan ng dugo't pawis
pagkat ang paghihirap ng dukha'y di nila matiis
dapat kumilos upang kapitalismo'y magahis
at sa mga gahamang trapo'y huwag magpatikis

taas-noo tayong kikilos hanggang kamatayan
taas-kamaong makikibaka para sa bayan
itataas natin ang bandila ng katarungan
para sa pagbabago ng kinagisnang lipunan

- gregbituinjr.

Nadarama ng dibdib ang parating na panganib

nadarama ng dibdib ang parating na panganib
habang ako'y patungo sa isang pook na liblib
habang kasabay ang dilag na may pagsintang tigib
habang naaapakan ang malalaking kuwitib

bakit dapat pag-aralan ang galaw ng lipunan?
bakit laksa'y mahirap at mayaman ay iilan?
bakit inaaring pribado ang yaman ng bayan?
bakit mapagsamantala'y sa masa'y hagikhikan?

di ba't para sa lahat ng tao ang mundong ito?
bakit karapatang pantao'y di nirerespeto?
tangan ba tayo sa leeg ng mga pulitiko?
at ang masa'y pinaglalaruan lang ng gobyerno?

parating na panganib ay nadarama ng dibdib
habang nangangati pa ang papagaling na langib
habang may nakaabang sa malalaking talahib
habang trapo'y nagbabantang ang masa'y masibasib

- gregbituinjr.

Halina't patuloy na kumilos

wala raw nagrerebolusyon, sabi ng kasama
di naman daw tayo manalo sa pakikibaka
subalit patuloy akong kumikilos sa masa
kaysa magmukmok lang sa paghahanap ng hustisya

patuloy pa rin ang salot na kontraktwalisasyon
sa lugar ng dukha'y nagbabanta ang demolisyon
sa mga lupang ninuno'y may militarisasyon
niyuyurakan ang karapatang pantao ngayon

dapat lang kumilos sa maraming isyu ng bansa
dapat nating mapakilos ang uring manggagawa
sa maraming isyu'y di tayo dapat tumunganga
kundi ang mag-organisa, mag-organisa pa nga

huwag tayong padadala sa mga negatibo
tulad ng ibang tila ba nagsawa na sa isyu
huwag tayong bibitaw sa niyakap na prinsipyo
pagkat sa sama-samang pagkilos lang mananalo

halina't kumilos pa rin, tayo'y magrebolusyon
sa punang di naman manalo'y huwag magpakahon
sa pakikibaka'y magsuri't maging mahinahon
huwag hahayaang maihi na lang sa pantalon

- gregbituinjr.

Paglalakad ng kilo-kilometro para sa isyu

makakapaglakad pa ba ang mga aktibista
ng kilo-kilometro para sa isyung pangmasa
naglakad nang itaguyod ang hustisya sa klima
at naglakad din para sa laban ng magsasaka

sumama noon mula Luneta hanggang Tacloban
mula Lyon hanggang Paris sumama sa lakaran
mula klima'y tinuloy sa pantaong karapatan
at mula C.H.R. hanggang Mendiola'y naglakaran

sumama sa laban ng mga katutubo noon
Lakad Laban sa Laiban Dam ang aming nilayon
magsasaka'y kasama mula Sariaya, Quezon
upang ipaglaban naman ang CLOA nila noon

paraan ng pagtindig sa isyu ang paglalakad
sa bawat madaanan ay aming inilalahad
ang mga isyung pangmasa't problemang matitingkad
nang mapag-usapa't baka malutas ito agad

ang paglalakad ay bahagi ng pakikibaka
maliliit at naaaping sektor ang kasama
kung naglalakad man kami'y upang maipakita
sa madlang nadaraanan ang isyung mahalaga

- gregbituinjr.

Nais ko'y ibang paraan ng pagkatha

sa pagkatha ng tula ako'y di na nalulugod
lalo't sa isang estilo na ako napupudpod
napako sa labinlimang pantig bawat taludtod
animo tugma't sukat na ito'y nakalulunod

nais ko ng mga bagong estilo ng pagtula
dapat ko itong pag-isipan, maging mapanlikha
balikan ang kasaysayan ng dalit at tanaga
o kaya'y mag-eksperimento sa bawat pagkatha

haynaku! hay naku, naku! gagawa ba ng hayku
di ko nagawa noong hayskul ang ganyang estilo
kinahiligan ko na noon ang Balagtasismo
o susundan ko ang soneto't iyang Modernismo

patuloy kong minahal ang pagkatha't panitikan
kahit saan sumusulat, kahit sa palikuran
nagbabasa, nag-aalay ng tula kaninuman
pati ang kaharap na isyu't problema ng bayan

ikaw, aking mutya, ay malugod kong kakathain
sa aking puso't isipan, kaisa sa hangarin
kasama sa paglalakbay, malayo man sa akin
pagkat ikaw ang panitikang aking kakatasin

- gregbituinjr.

Bukod sa aktibismo'y may iba pa akong mundo

bukod sa aktibismo'y may iba pa akong mundo
anila'y di nila maunawaan ang mundo ko
bukod sa aktibismo, mundo ko'y tula at kwento
mga sanaysay hinggil sa lipuna't pagbabago

di naman pinid ang pintuan ng aking daigdig
kung saan sa aking haraya'y kayraming tinig
kahit pipi'y nagsasalita, dinig mo ang pintig
bulag ay nakakakita, bingi'y nakakarinig

nagniniig ang mga salita sa daigdig ko
pinasasayaw ko ang nagbabagang alipato
nakakaligtas pa ang mga api sa asunto
na dulot ng mga sakim at mayayamang tuso

naglalakbay ako sa daigdig ng panitikan
isinusulat ko ang literatura ng bayan
pasensya kung minsan, di mo ako maunawaan
doon sa mundo ko'y may dignidad ang mamamayan

pagkat sa aking mundo'y ako ang manlilikha
isang inspirasyon ang maging ganap na malaya
minsan, mayaman ako, at madalas ako'y dukha
mahalaga'y kumakatha ako ng kwento't tula

- gregbituinjr.

Nobyembre disiotso'y huwag nating kalimutan

Nobyembre disiotso'y huwag nating kalimutan
pagkat petsa ito ng pagyurak sa kasaysayan
ang petsang inilibing ang diktador sa Libingan
ng mga Bayani, gayong walang kabayanihan

ikalabingwalo ng Nobyembre'y bakit naganap
sampung araw bago pa iyon ang Korte'y nangusap
na pwede nang malibing ang "bayaning" mapagpanggap
sa libingang  sa madla'y di naman katanggap-tanggap

"Hukayin! Hukayin!" sigaw ng marami: "Hukayin!"
ilipat na sa ibang libingan ang labi't libing
"Libingan iyon ng mga bayaning magigiting!"
"Diktador ay di bayani, dapat iyong tanggalin!"

diktador ay nilibing doong parang magnanakaw
ang bituka yata nila'y sadyang ganyan ang likaw
Nobyembre disiotso'y petsang tumatak ang araw
ng muling pagtaksil sa bayang sa hustisya'y uhaw

kaya kumilos tayo sa Nobyembre disiotso
gunitain ang petsa't dinggin ang hiling ng tao:
sa Libingan ng mga Bayani'y maalis ito
Di bayani ang diktador, di siya para rito!

- gregbituinjr.

Di ka matino pag di ka tumupad sa usapan

"6. "Sa taong may hiya, salita'y panunumpa." (To a [person] that respects, his/her word is a pledge.)" ~ mula sa Kartilya ng Katipunan

di ka matino pag di ka tumupad sa usapan

nasaan na ang dangal mo kung walang katapatan

balewala ang usapan? ang OO'y salita lang?

di yata inaral ang Kartilya ng Katipunan:

sa ikaanim na talata, "Sa taong may hiya"

ay tinapos na nito sa "salita'y panunumpa!"

nakasulat na ito'y dapat nating maunawa

kaakibat ng pagkatao ang bawat salita

pag nagbitaw ka ng salita, aba'y tuparin mo

huwag gagaya sa sinungaling na pulitiko

kaakibat ng binitawang salita'y dangal mo

lalo't karugtong din nito'y prinsipyo't pagkatao 

di ako nangongonsensya kung sadyang ganyan ka na

sa akin lang, salita mo'y unawain mo sana

maganda ang usapan, umoo ka, nariyan ka

bumiyahe ako, dumating, kumatok, wala ka

anong nangyari, mga salita'y binalewala?

o baka tingin mo, isa lang akong hampaslupa?

na di dapat bigyang pansin ang mga sinalita!

o baka wala ka nang dangal? di ka na nahiya!

- gregbituinjr.

Bakit nang-iindyan ang lider kong kinikilala

bakit nang-iindyan ang lider kong kinikilala
kanina'y ayos lang pumunta ako sa kanila
upang mapag-usapan ang mga isyu't problema
bakit ba biglang nang-indyan ang lider kong kilala

nais ko lang namang tuparin ang napag-usapan
kung di pala tuloy, bakit di ako sinabihan
kanina, sabi niya'y "sige", aking pinuntahan
at nang nasa lugar na ako, siya'y wala naman

tineks ko siya't tinawagan, sarado ang selpon
kahit sa messenger sa fb, wala siyang tugon
siya'y lider kong kinikilala, noon at ngayon
tumutupad sa usapan, tila ako'y nakahon

sayang ang pamasahe, panahon ko't ipinunta
subalit dapat tuparin ang usapan kanina
sana kung ako'y nasabihan niya ng maaga
di sana tumuloy nang panaho'y di naaksaya

magaling siyang lider, ako sa kanya'y saludo
kahit mga salita'y pinapako pala nito
mahusay siyang lider, sadyang tapat at totoo
kahit salita'y pinako tulad ng pulitiko

- gregbituinjr.

Dapat baguhin ang sistema't tigpasin ang bugok

tambak pa ang mga ulol dito sa daigdigan
di pa maubos-ubos ang kanilang kasamaan
nakakairita bakit ba ganyan ang lipunan
dahil lang sa pribadong pag-aari'y nagkaganyan

pribadong pag-aari'y ganap na pribilehiyo
lang ng iilan, habang laksa'y mahirap sa mundo
kung sanlibong ektarya'y ari lang ng isang tao
magsasakang walang lupa'y tiyak kayrami nito

dahil sa lintik na titulo, kayraming mahirap
di na maari ang lupang sinaka nilang ganap
ang umalis sa lupang ninuno'y nasa hinagap
kung nais mabuhay, kahit di iyon ang pangarap

halina't bakahin ang ganitong sistemang bulok
na sa salinlahi ng tao'y sadyang umuuk-ok
subalit di wastong magmukmok lang sa isang sulok
dapat baguhin ang sistema't tigpasin ang bugok

- gregbituinjr.

Pagbati sa UATC!

moog na ang United Against Torture Coalition
upang karapatang pantao'y matamasa ngayon
ngunit dinaranas sa kasalukuyang panahon
may banta pa rin ng tortyur sa ating henerasyon

kaysa tortyur, mas mabigat ang nangyayaring tokhang
na ang biktima, matapos saktan, ay pinapaslang
naninibasib pa ang rehimen ng mga halang
na di mo malaman kung ang pinuno nila'y hibang

nabalita noon, may lihim na detensyon pala
buti na lang, may naglantad ng kalokohan nila
gumawa ba'y dinisiplina't naparusahan ba
upang napiit ay may asahang bagong umaga

ang batas laban sa tortyur ay gawin nang palasak
may wastong proseso nang bilanggo'y di mapahamak
taas-kamaong pagpupugay, puso'y nagagalak
sa pansampung anibersaryo ng Anti-Torture Act

- gregbituinjr.

* nilikha at ikalawang tulang binasa ng makata sa pagtitipon ng United Against Torture Coalition (UATC), Nobyembre 11, 2019

Tama na ang tortyur, tigilan na ang pananakit!

sinasaktan ba ng pusa ang nahuhuling daga

kakagatin ba ng aso ang matanaw na pusa

at kinakagat ba ng tagak ang malansang isda

nangyayari pa rin ba ang mga tortyur sa bansa

paano bang mga pinuno'y nagpapakatao

paano bang mundo'y maging payapa't walang gulo 

paano pinapuputok ng aspile ang lobo

paano bang ang tortyur ay mawala na sa mundo

nadarama nyo ba ang sakit ng bawat kalamnan

naririnig nyo ba ang daing ng mga sinaktan

paano ba nirerespeto bawat karapatan

upang wala nang tortyur sa piitan o saanman

ayaw na naming sumigaw ng laksa-laksang impit

tama na ang tortyur, tigilan na ang pananakit

dapat namumuno'y may respeto't sariling bait

sana'y wala nang tortyur, karapatang pinagkait

- gregbituinjr.

* nilikha at una sa dalawang tulang binasa ng makata sa pagtitipon ng United Against Torture Coalition (UATC), Nobyembre 11, 2019

Inhustisya

“Injustice anywhere is a threat to justice everywhere. We are caught in an inescapable network of mutuality, tied in a single garment of destiny. Whatever affects one directly, affects all indirectly.” ~ Martin Luther King Jr., Letter from the Birmingham Jail

ang kawalang hustisya saanmang panig ng mundo

ay banta sa hustisya sa iba pang lugar dito

kung may kawalan ng katarungan sa kapwa tao

apektado rin ang katarungang para sa iyo

binato ang langit, nang matamaan ay nagalit

binato kasing paitaas. at sadyang kaylupit

kaya sa mukha bumalik, umiyak parang paslit

nawa sa biktima, hustisya'y huwag ipagkait

leron, leron sinta, sa hustisya'y may nagbabanta

buhay daw ay barya lang, kaylupit ng pinagpala

bata, bata, isang perang muta, may bumulagta

kaya mahal sa buhay ay naroong lumuluha

kung may nabalitaang walang prosesong pinaslang

baka sa susunod, ikaw naman ang matamaan

kaya marapat lang, sa nangyayari'y makiramdam

huwag mong balewalain, dapat kang makialam

- gregbituinjr.

Kung wala kang maitulong

nais na tanungin ako sa aking karamdaman
gusto lamang palang mag-usisa, wala din naman
tutulong? iyon pala, siya ang may kailangan
kwentuhan muna, maya-maya, sinong mautangan

naroroon lamang akong dinaramdam ang sakit
nagpapagaling sa dumapong sadyang anong lupit
ramdam ko'y parang busog at palasong binibinit
tila mukha'y binabanat, buhay ay nasa bingit

tapos, nariyan kang nangungusap ng anong pakla
habang ako'y naliliyo't sa kwento'y napapatda
nababarat tuloy ang niyakap na panimula
habang nakikinita ko na ang aba kong lupa

kung wala kang maitulong, huwag ka nang magtanong
manahimik na lang, kung walang perang pasalubong
anong paki mo, kung buhay ko'y wala nang karugtong
ang itulong mo na lang ay pambayad sa kabaong

- gregbituinjr.

Lugi raw ang negosyo

lugi ang negosyo, ito ang laging bukambibig
ng mga kapitalistang animo'y masigasig
matiyagang durugin ang obrerong kapitbisig
at masipag posasan ang sa manggagawang tinig

lugi raw ang negosyo, di dahil lugi talaga
kundi di naabot ang tubong nasa plano nila
kung dalawampung milyong pisong tubo'y plano nila
lugi na kahit sampung milyong piso ang kinita

ang pinapakita ng kapitalista sa unyon
huwag magtaas ng sahod, pagkat di pa panahon
pangangatwiran ng kapitalista'y nakakahon
dahil magsasara raw ang kumpanya pag naglaon

kaya mumo lang kung sweldo ng obrero'y itaas
barya lang bawat araw dahil ito raw ang patas
ngunit para sa unyon, katwiran nito'y gasgas
magkaiba kasing uri't iba ang nilalandas

para sa kapitalista, pangunahin ang tubo
at gastos lang ang manggagawa, nakapanlulumo
di pantay na lagay sa pabrika'y dapat maglaho
at obrero sa adhika'y magtagumpay ng buo

- gregbituinjr.

Sa paglaya

kahit kami'y mga dating bilanggong pulitikal
ay pagsisilbi pa rin ang sa diwa'y nakakintal
lumaya't ang pagsasama pa rin ay nagtatagal
pagkat nagkakaisa pa rin sa prinsipyo't dangal

nais pa rin naming labanan ang bayang tiwali
at nais pa ring bulok na sistema'y matunggali
pag may problema ang bayan, di kami humihindi
patuloy na kikilos, di papayag maduhagi

aaralin pa rin bakit ganito ang lipunan
kongkretong pagsusuri sa kongkretong kalagayan
bakit kayrami pa ring pinagsasamantalahan
bakit laksa'y naghihirap at maykaya'y iilan

nagkakaisa pa rin kami ng inaadhika
oorganisahin pa rin ang uring manggagawa
dedepensahan pa rin ang bayan at mga dukha
mula sa kuko ng mapagsamantala'y lalaya

- gregbituinjr.
* sinulat habang nagpupulong ang XD Initiative, Nobyembre 10, 2019

Ako'y Leninista, tagapagtaguyod ni Lenin

Ako'y Leninista, tagapagtaguyod ni Lenin
Pinag-aaralang mabuti ang kanyang sulatin
Kasaysayan niya sa kapwa'y tinuturo man din
Upang lider na ito'y mas kilalanin pa natin

Siya'y magaling na lider ng partidong Bolshevik
Mga nagawa sa rebolusyon ay natititik
Sa mga manggagawa't dukha'y duminig ng hibik
Tinulungan ang mga ito upang maghimagsik

Nagtagumpay ang mga Bolshevik sa rebolusyon
Kaya't aral ni Lenin ay inaaral din ngayon
Tinawag na Leninismo ang diwa niyang iyon
Kaya ang tagumpay nila't nagawa'y inspirasyon

Nais nating itayo ang lipunang manggagawa
Kaya aral ng Leninismo’y aralin nang kusa
Halina’t aralin ang kanyang mga halimbawa
At durugin na ang kapitalismong dala’y sigwa

Kaya manggagawa, halina’t maging sosyalista
At buuin ang mga Buklod sa bawat pabrika
Ang Marxismo’t Leninismo’y aralin sa tuwina
At tayo’y sumumpa bilang ganap na Leninista

- gregbituinjr.