Kung paanong ayoko sa kulungan o ospital

kung paanong ayoko roon sa kulungan,
gayundin naman, ayoko rin sa ospital
mabuti pang mapunta na lang sa libingan
sapagkat naglingkod sa bayan ng anong tagal

ilang taon na, naranasan kong mapiit
dahil sa manggagawa'y tapat na naglingkod
higit dekada na, danas ko'y alumpihit
sa ospital, ulo ko'y tinahi't ginamot

ayoko nang mapiit sa kwartong kaydilim
na tila kabaong, dama mo'y walang hangin
ayoko nang maospital muli't mandimdim
dahil para kang patay, madilim ang tingin

pag ako'y nilalagnat, punta ko'y Luneta
sariwang hangin ay doon ko kinukuha
pag may labanan, minsan nasa Mendiola
at gawa ng trapong kuhila'y binabaka

kulungan, ospital o kaya'y sementeryo
ano kayang aking pipiliin sa tatlo
ayoko sa ospital o makalaboso
nalalabi na lang, libingan ang punta ko

- gregbituinjr.

Bibliya'y istorya lang ng Israel

BIBLIYA'Y ISTORYA LANG NG ISRAEL

Bibliya: istorya lang ng taga-Israel ito
Na nang-aagaw ngayon ng lupaing Palestino
Nahan naman ang istorya ng bayang Pilipino
Wala sa Bibliya, na pulos Irael ang kwento
Kung meron man, winasak ng mga Kastila ito

Kaya sa Bibliya'y di na ako naniniwala
Maigi pa marahil maniwala kay Bathala
Mula sa katutubo, tunay na mapagkalinga
Bathalang ninais wasakin din nitong Kastila
Subalit narito pa rin ito't nangungulila

Ayon sa Bibliya, Israel ang angkang pinili
Na para sa Diyos, sila ang natatanging lahi
Di Ehipto, di tayo, sa Palestino'y namuhi
Palestino'y inagawan ng lupa't dinuhagi
Iyan din ang layon ng simbahang mapang-aglahi

Istorya ng Israel isinusubo sa atin
Na nakabibikig at di naman natin makain
Magsiluhod at pumikit raw tayo't manalangin
Habang unti-unting inagaw ang ating lupain
Balang araw, buong mundo'y kanilang aangkinin

Ang Bibliya ng mananakop ay pang-Israel lang
Diyan nakasulat ang mito nila't kasaysayan
Mabuti pang paniwalaan ang ating babaylan
Na pilit winasak noon ng Kastilang sukaban
Iyan ang aking tindig at nais paniwalaan

- gregbituinjr.

Ang grupong Oriang

ANG GRUPONG ORIANG

itinayo ang grupong Oriang
na may dakilang simulain
samahan ng kababaihang
may puso't gintong adhikain

diwa'y gaya ni Gabriela
prinsipyado tulad ni Clara
ang puso'y gaya ni Lorena
sosyalista tulad ni Rosa

paglaya ng babae'y taos
kaya sila'y nagsisikilos
naglilingkod sa masang lubos
ang pangulo'y si Flora Santos

ipinaglalaban ang buhay
at karapatan nating taglay
taas-kamaong pagpupugay
sadyang dakila kayong tunay

- gregbituinjr.

* Gabriela Silang, Clara Zetkin, Lorena Barros, Rosa Luxemburg
* Ang tulang io'y nalathala sa Taliba ng Maralita, isyung Marso 16-31, 2019, p. 20

Salin ng tulang Spirits of the Dead ni Edgar Allan Poe

SPIRITS OF THE DEAD
by Edgar Allan Poe

MGA ESPIRITU NG PATAY
ni Edgar Allan Poe
Malayang Salin ni Gregorio V. Bituin Jr.

I

Thy soul shall find itself alone
’Mid dark thoughts of the gray tombstone—
Not one, of all the crowd, to pry
Into thine hour of secrecy.

I

Nagisnang mong nangulila ang iyong kaluluwa
Saloobin ay kaydilim sa abuhing lapida
Walang isa man, sa tanang madla, ang nagigisa
Sa iyong napapanahong lihim na nag-iisa.

II

Be silent in that solitude,
Which is not loneliness—for then
The spirits of the dead who stood
In life before thee are again
In death around thee—and their will
Shall overshadow thee: be still.

II

Maging matahimik ka sa pag-iisa mong iyon
Na hindi naman kalungkutan - at kung magkagayon
Yaong naroroong mga espiritu ng patay
Sa harap mo ay muling nakatayong nabubuhay
Sa kamatayang lumigid - at loob na pinukaw
Nila ang sa iyo'y lalamon: huwag kang gagalaw.

III

The night, tho’ clear, shall frown—
And the stars shall look not down
From their high thrones in the heaven,
With light like Hope to mortals given—
But their red orbs, without beam,
To thy weariness shall seem
As a burning and a fever
Which would cling to thee for ever.

III

Ang gabi, bagamat maliwanag, ay sumimangot-
At ang mga bituin ay hindi dapat yumukod
Mula sa luklukang kaytayog sa langit na banal
Ng may liwanag tulad ng Pag-asang alay sa mortal
Ngunit ang mga pulang globo nilang walang sinag
Ay tila nakikita, sa iyong pagkabagabag,
Bilang siyang nasusunog at yaong karamdaman
Ang mangungunyapit sa iyo magpakailanman

IV

Now are thoughts thou shalt not banish,
Now are visions ne’er to vanish;
From thy spirit shall they pass
No more—like dew-drop from the grass.

IV

Ngayon mga saloobin mo'y hindi mawawala,
Ngayon mga pangitain ay hindi mapupuksa;
Makakatawid sila mula sa espiritu mo
Walang higit pa - tulad ng hamog - mula sa damo.

V

The breeze—the breath of God—is still—
And the mist upon the hill,
Shadowy—shadowy—yet unbroken,
Is a symbol and a token—
How it hangs upon the trees,
A mystery of mysteries!

V

Ang simoy - ang hininga ni Bathala - ay patuloy
At yaong alapaap na naroroon sa burol,
Malabo - malabo - subalit hindi nasisira
Itong isang sagisag at isa rin itong tanda
Paano naisabit sa punong tinitingala
Tunay na kahiwagaan sa lahat ng hiwaga!

Source: The Complete Poems and Stories of Edgar Allan Poe (1946)
Pinagbatayan: aklat na The Complete Poems and Stories of Edgar Allan Poe (1946)

Pangako ng trapo

PANGAKO NG TRAPO

"ipinapangako kong pag ako'y inyong binoto
at nanalo ako't tuluyang naupo sa pwesto
masosolusyonan ko ang mga problema ninyo
kaya iboto ako, hehe, iboto nyo ako"

iyan ang nasa isip ng kandidatong gahaman
nangangako ng nangangako para daw sa bayan
subalit gaya ng ibang naluklok sa upuan
ipinangako nila'y di maisakatuparan

sila ang katibayan ng pangakong napapako
mga kapara nila'y tuso't animo'y hunyango
pag kaharap ang masa, dinig mo'y pulos pangako
pag tumalikod ang masa, pangako'y laway lang po

kada kampanyahan, pangako na'y nakauumay
masaya lang sa una ngunit di ka mapalagay
para bagang nagsalita sila  ng walang saysay
patunay lang na itong trapo'y mga tulo laway

- gregbituinjr.

Pananaw ng tampalasan

PANANAW NG TAMPALASAN

ang pananaw nila'y talagang salanggapang
pagkat nais lagi'y pumaslang nang pumaslang
bakit buhay ng inosente'y isinalang
nagtilamsikan ang dugo sa lupang tigang

nahan ang hustisya para sa inosente
pinaslang ng walang awa ng mga bibe
nakita ng mga saksing di makasaksi
baka balikan sila, at sila'y magsisi

tokhang ay naging karaniwan  sa kalsada
habang ang mga bibe'y nag-aastang bida
salot sa lipunan ay nadurog daw nila
kaya payapa na raw ang bayan at masa

buhay ng mga salot ay dapat makitil
iyan ang pananaw ng tampalasang taksil
ginagawa ba nila'y kaya pang masupil
at hustisya'y magawad sa mga kinitil

- gregbituinjr.

Ahas na trapo

AHAS NA TRAPO

ang pangako nitong mga "dakilang" pulitiko
ay tulad ng pagsagip ng ahas na "maginoo"
sa dukhang isda sapagkat malulunod daw ito
habang kagat sa leeg ang isda, ganyan ang trapo

kaya magtanda na sana tayo't huwag na naman
huwag sayangin ang boto't ihalal ang gahaman
huwag nang ibalik yaong mga trapong haragan
mga datihang walang nagawang buti sa bayan

sa tusong trapo'y huwag sana tayong patutuklaw
lalo't iba ang kanilang asal, uri't pananaw
huwag umasa sa trapong di mo alam ang galaw
baka likod mo'y tarakan lang nila ng balaraw

hangad nila'y boto mo lang, di pagbuti ng madla
ang trapo'y walang pakialam sa buhay ng dukha
sa mga pangako nila'y huwag maniniwala
dulot lang nila sa bayan ay pahirap at luha

- gregbituinjr.

An Ode To Liberty

AN ODE TO LIBERTY

Another fight for the future is at stake
Nefarious pogrom in this country feared indeed
One after another, blood was turned into lake
Due to the rise of another Hitlerian breed!
Enduring the actions of this notorious beast
Towards ending these terrible deeds of terror
On the want for freedom, we rise with clenched fist
Liberty against this tragic acts we longed for!
In the midst of darkness and stupidity
Beneath the eyes of struggle and fearfulness
Entering the years of sorrow and tragedy
Rovolting is just right to repeal this madness!
To the future and this present generation:
You are the hope for another revolution!
- gregbituinjr.

Huwag hayaang magsasaka'y mawalang tuluyan

HUWAG HAYAANG MAGSASAKA'Y MAWALANG TULUYAN

ang magtanim ay di biro't maghapong nakayuko
anang isang awiting Pinoy, tanong ko naman po
paano kung wala nang magtanim, ito'y di biro
paano kung magsasaka'y tuluyan nang maglaho

magsaka'y gawa lang ba ng matatanda sa nayon
pagkat magsaka'y di gusto ng bagong henerasyon?
palipasan na lang ba ng senior citizen ngayon
ang magsaka sa lupa't maputikan man maghapon?

paano na itong bigas sa panahong darating
kung pawang matatanda na ang magsasaka natin?
paa'y ba'y magpuputik kaya ayaw sa bukirin
baka sabihin ng dilag, binata'y marurusing

di ba't mas mabuting ang palad nati'y magkalipak
tanda ng sipag at kayang buhayin ang mag-anak
mabuting magsikap, mag-araro man sa pinitak
di gawaing masama't di gumagapang sa lusak

halina't magsuri't pag-aralan itong lipunan
ang pagsasaka'y sagot pa rin sa kinabukasan
huwag hayaang magsasaka'y mawalang tuluyan
dapat kahit kabataan, ang araro'y tanganan

- gregbituinjr.

Ang halalang ito'y gawin nating makasaysayan

ANG HALALANG ITO'Y GAWIN NATING MAKASAYSAYAN

wala pa tayong Senador na manggagawa
na ilang taong nagtrabaho sa pabrika
elitista't artista ang bumubulaga
nananalo sapagkat masa'y nagpabola

kaya ang sigaw namin: Manggagawa Naman!
iboto ang manggagawang subok sa galing
ang aming kandidato: Leody de Guzman
lider-manggagawa, prinsipyado, magiting

ang mga trapong Senador ay walang nagawa
upang buhay ng masa'y guminhawang ganap
baka lider-obrero'y pag-asa ng madla
upang ipaglaban ang kanilang pangarap

gawing makasaysayan ang halalang ito
at maging bahagi tayo ng kasaysayan
lider-manggagawa'y ilagay sa Senado
kaya ating iboto: Leody De Guzman

- gregbituinjr.

Si Clara Zetkin, sosyalistang lider-kababaihan

SI CLARA ZETKIN,  SOSYALISTANG LIDER-KABABAIHAN

taas-kamao sa sosyalistang si Clara Zetkin
lider-kababaihan at kaibigan ni Lenin
at Rosa Luxemburg na pawang mga magigiting
na sa kanilang panahon ay bayaning tinuring

sa Stuggart, siya'y kasapi ng Bookbinders Union
naging aktibo rin sa Tailors and Seamstresses Union
at dati ring Kalihim ng Internasyunal noon
gayong ilegal sa babae noon ang mag-unyon

kumperensya ng mga babae'y inorganisa
pagboto ng babae'y ipinaglaban din niya
at nilabanan ang peminismong sumusuporta
sa restriksyon sa pagbotong batay sa ari't kita

mas nakatuon siya sa uri, at di sa sekso
na prinsipyo niya sa panlipunang pagbabago
naniniwala si Zetkin na tanging sosyalismo
ang daan upang lumaya ang babae't obrero

malaki ang inambag ni Zetkin sa kasaysayan
ng daigdig, lalo sa mapagpalayang kilusan
ng mga kababaihan tungo sa kalayaan
at nag-organisa ng Araw ng Kababaihan

kaya muli, isang taas-kamaong pagpupugay
kay Clara Zetkin na talagang sosyalistang tunay
sa manggagawa't sosyalismo, buhay ay inalay
kaya sa iyo, Clara Zetkin: Mabuhay! Mabuhay!

- gregbituinjr.

Ang awiting Heal the World ni Michael Jackson

ANG AWITING "HEAL THE WORLD" NI MICHAEL JACKSON

halina't pakinggan ang Heal the World ni Michael Jackson
sapagkat awiting ito'y isang mensahe't hamon
tila ba sa plastik at usok, tao'y nagugumon
at mga isda sa dagat, upos ang nilululon

halina't awiting Heal the World ay ating suriin
ang mensahe'y sa kapwa tao inihahabilin
sakit nitong mundo'y tulong-tulong nating gamutin
paano ba kanser ng lipunan ay lulutasin

daigdig bang tahanan nati'y sakbibi na ng lumbay
pagkat pinababayaan natin itong maluray
ng usok ng kapitalismong naninirang tunay
sa ngalan ng tubo, kalikasa'y ginutay-gutay

huwag nating ipagwalangbahala't isantabi
kundi damhin natin ang awit, ang kanyang mensahe
ang habilin sa ating kumilos at maging saksi
upang henerasyon nati'y di magsisi sa huli

- gregbituinjr.

Ating pangalagaan si Inang Kalikasan

ATING PANGALAGAAN SI INANG KALIKASAN

* Sinubukan kong magsulat ng tula sa parang pang-huweteng na papel, at nakabuo ng isang tula. Ito yung tinabas kong long bond paper upang gawing short. Pitong pantig bawat taludtod.

ating pangalagaan
si Inang Kalikasan
kanyang sinapupunan
ang ating pinagmulan

di ba't kaibig-ibig
ang buhay sa daigdig
ano't tayo'y natulig
sa plastik na bumikig

ang basura'y nagkalat
pulos plastik ang dagat
kung saan-saan nagbuhat
lamok na'y nangangagat

sinong dapat sisihin
di ba't tayo na nga rin
ang ugaling waldasin
ay tigilan na natin

halina't magkaisa
ayusin ang basura
huwag nang magtapon pa
sa dagat at kalsada

tipunin din ang plastik
subukang i-ekobrik
sa botelya'y isiksik
ngunit huwag idikdik

tanaw ang hinaharap
di malambong ang ulap
at tayo nang magsikap
buuin ang pangarap

- gregbituinjr./02-19-2019

Sino nga ba ang sinungaling

sino nga ba ang sinungaling kundi mga trapo
pag kampanyahan, pangako doon, pangako dito
at nagtungo pa sa iskwater upang maiboto
gayong pag naupo na, dukha'y nalimot na nito

akala mo nga, pag magsalita, ang galing-galing
mga trapong kung pumustura'y bayaning magiting
iyon pala, pag naupo, sa dayo gugupiling
sa kapital nangayupapa silang sinungaling

sadyang sinungaling ang mga trapong elitista
pawang utak-negosyo imbes serbisyo sa masa
huwag iboto ang mga trapong kapitalista
silang nais manatili ang bulok na sistema

mga trapong kuhila'y di naman natin kauri
kandidato ng paggawa ang ating ipagwagi

- gregbituinjr.

Pakibalik po ang charger, maraming salamat po

PAKIBALIK PO ANG CHARGER, MARAMING SALAMAT PO

Bakit kayhilig mong manghiram ng charger, tanong ko
Bakit di ka mag-ipon nang makabili ka nito?
Di naman nagdadamot ngunit dapat mabatid mo
Kami ang di makagamit pag kailangan ito.

Payo ko'y huwag kang mahirati sa panghihiram
Lalo't ang hinihiram mo'y lagi mong kailangan
Matuto kang bumili at charger ay pag-ipunan
Lalo't oras-oras mo'y selfon ang katalakayan.

Ayos lang sana kung ang paghiram mo'y isang beses
Subalit kung araw-araw na, ito'y labis-labis
Baka sa susunod, para ka nang taong may galis
Iniiwasan ka pagkat sa iyo'y naiinis.

At kung nakahiram ka'y matuto ka ring magbalik
Kawawa ang hiniraman mong nais ding gumamit
Baka sa kahihintay sa iyo, mata'y tumirik
Nakahiram ka na nga'y nais mo pang may kagalit.

O kaya'y ibigay na namin ang charger sa iyo
At kami na lang ang bibili ng charger na bago
Sana'y masaya ka na't huwag nang mang-iistorbo
Dahil mayroon ka nang charger na solong-solo mo.

- gregbituinjr.

Ipanalo natin sila

IPANALO NATIN SILA

Ipanalo natin lahat ng ating kandidato
PLM party list at Ka Leody sa Senado
Ang Labor Win, mga kandidatong lider-obrero
Na ating kakampi pag naupo na sa gobyerno.
Ating gampanan ng buong tapat ang ating mithi
Lubusang magpalakas, kumilos, at magpunyagi
Organisahin ang uri, palaguin ang binhi
Nang mga kandidato ng masa'y maipagwagi.
Ang mga plataporma't programa'y dapat magawa
Talakayin ang Labor Agenda ng manggagawa
Ito'y ipaglaban pagkat layunin ay dakila
Na adyenda ng ating uri'y dapat maunawa.
Sa Kongreso't Senado'y dapat silang mailagay
Ito'y tungkuling sa puso't diwa'y dapat na taglay
Layuning marangal, may dignidad, hangaring lantay
Ang ating mga kandidato'y ipanalong tunay!
- gregbituinjr.

* Nalathala sa publikasyong Taliba ng Maralita, Pebrero 2019, p. 20

Labor Win sa Senado 2019

Leody de Guzman, pambato natin sa Senado
Arellano, Matula, Colmenares at Montaño
Buong tatag na mga kasamang lider-obrero
Organisador ng uri't sa bayan ay babago.
Rinig natin ang hinaing ng mga manggagawa:
Wakasan ang kontraktwalisasyong kumakawawa!
Iligtas ang bayan sa kapitalismo't kuhila!
Na pagkakaisa ng uri'y mahalagang sadya!
Senador mula sa uri ang babago ng landas
Ang Senado'y hindi na lungga ng batas na butas
Sila ang gagawa ng makamanggagawang batas
Ekonomya't pulitika'y gagawin nilang patas.
Nagmumulat tungo sa ginhawa, hindi sa dusa
Ating kakampi upang bansang ito'y mapaganda
Di na papayag maisahan ng kapitalista
Obrero'y kasama nating babago ng sistema.
- gregbituinjr.

* Nalathala sa publikasyong Taliba ng Maralita, Pebrero 2019, p. 20

Di ako bayarang tibak

DI AKO BAYARANG TIBAK

sabi ko na sa kanya, di ako bayarang tibak
subalit gusto niya'y pera, ako'y nililibak
huwag pulos bayan, baka raw ako mapahamak
magnegosyo raw nang makaipon ng laksang pilak

pagsisilbi sa bayan ang kurso niyang tinapos
kaygandang kursong lumalaban sa pambubusabos
ito sa kanyang puso't diwa'y tila ba di tagos
nais pang oras niya'y sa negosyo inuubos

imbis na magsilbi sa bayan, pera, pera, pera
pulos pera ang pumapaimbulog sa bituka
ako'y aktibista, siya'y utak kapitalista
bakit kami pa itong pinagtiyap ng tadhana

di ko pala siya kauri, natuliro ako
pakiramdam ko tuloy ngayon, ako na'y naloko

- gregbituinjr.

Bakit malupit ang mag-yosi break?

BAKIT MALUPIT MAG-YOSI BREAK?

yosi break na rin ang tawag ko sa munting pahinga
di naman nagyoyosi't tunganga lang sa kalsada
naroong nagninilay habang namamalikmata
na may naglalakad na isang magandang dalaga

kailangang mamahinga sandali't mag-yosi break
lalo't napakabanas at araw ay nakatirik
di man nagyoyosi, sa pamamahinga na'y sabik
pagkat panahon ng pagkatha, ilantad ang hibik

ang iba'y nagyoyosi't nasasarapang humitit
ramdam nila'y ginhawa habang upos nakadikit
sa labi, habang nagkukwento siya't nangungulit
sa kausap, at baka may kung anong hinihirit

anong lupit mag-yosi break, humihiram ng alwan
kahit man lang sumandali, ginhawa'y maramdaman

- gregbituinjr.

Alay sa unang dekada ng Partido Lakas ng Masa

ALAY SA UNANG DEKADA NG PARTIDO LAKAS NG MASA

Sa unang dekada ng Partido Lakas ng Masa,
taas-kamaong pagpupugay sa mga kasama!
Matatag na naninindigang sosyalista
sa sampung taon ng patuloy na pakikibaka.

Tuloy ang pagkilos tungo sa lipunang pangako
upang lipunang sosyalismo'y itatag sa mundo
nang laksang paghihirap nagdulot ng siphayo
sa ating mga pagkilos ay tuluyang maglaho

kapitbisig tayong ipagtahumpay ang layunin
sama-samang ipagwagi ang ating adhikain:
lipunang pantay, pribadong pag-aari'y tanggalin
upang lahat ay makinabang sa daigdig natin

halina't ating itayo'y lipunang makatao
na walang pagsasamantala ng tao sa tao
ngayong anibersaryo'y muling sariwain ito
Partido Lakas ng Masa, pagpupugay sa inyo!

- gregbituinjr./30 Enero 2019

Ang buhay ba'y tulad ng mobius strip?

ANG BUHAY BA'Y TULAD NG MOBIUS STRIP?

ang buhay ba'y tulad ng mobius strip?
hinehele't tila nananaginip
na lagi nang buhay ay sinasagip
habang patuloy na may nililirip
hinggil sa kung anumang halukipkip

tila dinugtong na magkabaligtad
ang mga dulo ng gomang malapad
madaraanan lahat pag naglakad
pabalik-balik ka kahit umigtad
ganito ba ang anyo ng pag-unlad?

paikot-ikot ka lang sa simula
hanggang maramdaman mong matulala
mabuting patuloy na gumagawa
kaysa naman magpahila-hilata
bakasakaling tayo'y may mapala

ang mobius strip ay pakasuriin
sa matematika'y alalahanin
baka may problemang mahagip na rin
masagip ang pinoproblema natin
upang sa baha'y di tayo lunurin

- gregbituinjr.

Napulot man ako sa tae ng kalabaw

NAPULOT MAN AKO SA TAE NG KALABAW

napulot man ako sa tae ng kalabaw
ako'y isang tao rin sa mundong ibabaw
na maagang gumising sa madaling araw
upang agad magtrabaho kahit maginaw

mapalad naman ako't may mga umampon
at itinuring akong anak nilang bugtong
mag-asawang walang anak, sa utang baon
ngunit kaysisipag, sa bukid lumulusong

silang nagisnan ko nga'y mapagkawanggawa
mula pagkabata ko'y mga nag-alaga
binihisan, pinag-aral, lahat ginawa
upang ako nama'y makadamang ginhawa

kaya ako'y labis na nagpapasalamat
sa kanilang naglunas sa pusong may sugat
may ligaya sa diwa kong maraming pilat
pagkat sila'y dakila't tunay na alamat

- gregbituinjr.

Batang bilanggo, edad siyam?

BATANG BILANGGO, EDAD SIYAM?

tama bang sa edad siyam, ang bata na'y mapiit?
hustisya na ba sa bansa'y ganito na kalupit?
sa murang gulang, karapatan niya'y pinagkait
kinulong dahil sindikato sa kanya'y gumamit

batang edad siyam ay dapat na raw maikulong
panukalang ito sa Kongreso'y isinusulong
pag bata'y gumawa ng krimen at agad sinuplong
kulong agad habang laya ang nag-atas na buhong!

ano nang nangyari sa ating mga mambabatas?
krimen ba'y di na kaya ng kapulisang malutas?
di na mapigil ng maykapangyarihan ang dahas?
mga sakit ba ng lipunan ay wala nang lunas?

mga magulang ba ng batang bilanggo'y pabaya?
bakit magulang ay kayod ng kayod ngunit dukha?
mga bata ba'y inabandona na't isinumpa?
o problema'y ang sistemang nagdulot ng dalita?

bakit nais makulong ang bata, ano ang sanhi?
halina't pag-isipan, patuloy tayong magsuri
dulot kaya ito ng pagkakaiba sa uri?
o baka mambabatas ay hungkag ang mga budhi?

- gregbituinjr.

Ang una nating tungkulin

ANG UNA  NATING TUNGKULIN

“The first duty of a revolutionary is to be educated.” ~ Che Guevara

noong ako'y bagong tibak, laging ipinapayo

pag-aralan ang lipunan, kalagayan ng mundo

makipamuhay sa masa, alamin ang siphayo

ng mga dukhang kayraming pangarap na gumuho

bakit kapitalismo ang sistemang umiiral

bakit lipunan ay pinatatakbo ng kapital

bakit obrerong kayod kalabaw ang nagpapagal

bakit ang karapatan sa edukasyon ay mahal

ang mga aktibista'y nakikibakang totoo

upang malubos-lubos ang karapatang pantao

hanggang sa mag-pultaym na't maging rebolusyonaryo

na unang tungkulin sa pakikibaka'y matuto

aralin ang lipunan, makipagbalitaktakan

aralin bakit may mahirap, bakit may mayaman

suriin bakit pribadong pag-aari'y dahilan

ng paghihirap ng mayorya sa sandaigdigan

sa gayon, magkaisa sa paghahanap ng solusyon

pagwasak sa pribadong pag-aari'y ating layon

bakit obrero'y dapat mamuno sa rebolusyon

bakit sa pagbabagong hangad tayo nakatuon

- gregbituinjr.

Tita Portia Ariesgado, Ikalimang Nominado ng PLM

TITA PORTIA ARIESGADO, IKALIMANG NOMINADO NG PLM

Portia Ariesgado, ikalimang nominado
ng Partido Lakas ng Masa, ang ating partido
matinding manindigan, palaban at prinsipyado
halina't siya'y ating paupuin sa Kongreso

sa pabrikang Gelmart ay dating lider-manggagawa
higit apatnapung taon sa pabrika'y gumawa
sa Association of Displaced Workers namahala
sa Partido Lakas ng Masa'y katuwang ng madla

siya'y lider ng unyon at lider-kababaihan
magaling magtalumpati, mahusay manindigan
kasama ng dukha sa mga rali sa lansangan
at mahusay magsuri ng mga isyu ng bayan

magaling sa debate, mahusay pang makisama
kaisa ng masa sa pagbabago ng sistema
halina't iupo sa Kongreso si Tita Portia
ating ipanalo ang Partido Lakas ng Masa

- gregbituinjr.
* ang tulang ito'y nalathala sa pahayagang Taliba ng Maralita, opisyal na publikasyon ng KPML, isyung Enero 2019, p. 20

Ikaapat na nominado ng PLM: Tita Flor Santos

IKAAPAT NA NOMINADO NG PLM: TITA FLOR SANTOS

ikaapat na nominado si Tita Flor Santos
ng Partido Lakas ng Masa, kakampi ng kapos
manggagawa't dukha'y ayaw niyang binubusabos
pagbabago ng sistema'y prinsipyo niyang talos

sa Sapat Sambayanan pangunahing namahala
sa Metro Manila Vendors Alliance nangasiwa
sa Sanlakas, lider na mahusay, mapagkalinga
sa Oriang ay pangulong matatag, laging handa

tagapayo siya ng manininda sa bangketa
sa parlamento ng lansangan ay laging kasama
mahusay pang magpaliwanag ng isyu ng masa
saanman naroon, patuloy na nakikibaka

Tita Flor Santos, taos-puso kaming nagpupugay
ang tulad mo sa bayan ay maglilingkod na tunay
tiyak marami ka pang labang ipagtatagumpay
pag PLM partylist sa Kongreso'y mailagay

- gregbituinjr.
* ang tulang ito'y nalathala sa pahayagang Taliba ng Maralita, opisyal na publikasyon ng KPML, isyung Enero 2019, p. 20

Di na kumapit sa baywang ni misis sa dyip

di na ako kumapit sa baywang ni misis sa dyip
baka mapagkamalang pitaka ang hinahagip
lalo na't katabing pasahero'y nananaginip
kaysarap ng hilik habang bag niya'y halukipkip

isang dahilan yaon bakit ayokong kumapit
sa baywang ni misis lalo't suot niya'y di hapit
gayon kasi'y modus operandi ng mangungupit
laking lungsod akong saksi sa gawaing kaylupit

kaya mabuting mag-ingat ka sa dyip na masikip
dapat maging listo kang lagi't mababaw ang idlip
kung kakapit kay misis sa dyip, gamitin ang isip
huwag sa baywang, baka pagkamalan ka't madakip

ang kumapit sa baywang ni misis ay kanyang giit
subalit dahil sa sitwasyon, di ako napilit
kung dahil sa pagkapit sa baywang niya'y mapiit
maiging sa bisig na lang ni misis mangunyapit

- gregbituinjr.

Daigdig ba'y basurahan?

Kung saan-saan siniksik
ang mga basurang plastik
na sa lupa't dagat hasik!
Di pa ba tayo iimik?

Daigdig ba'y basurahan?
Pilipinas ba'y tapunan?
Dapat tayong magtulungan
nang ito'y masolusyunan!

Tayo lang ba'y tatahimik
at magpapatumpik-tumpik?
Baka plastik na'y magputik
na sa bansa'y magpatirik!

- gregbituinjr.

Inaaliw tayo ng kanyang pagmumura

inaaliw tayo ng kanyang pagmumura
habang may ginagawa pala silang iba
pananakot at pagpaslang ang nakikita
habang Konstitusyo'y binabago na pala

batbat ng balita sa mga radyo't dyaryo
pawang paglabag sa karapatang pantao
madalas mapansin ang kawalang proseso
habang di napapansin ang pederalismo

inaaliw tayo ng kwentong sari-sari
nitong pangulong manyakis at astang hari
noon daw ay kinalikot siya ng pari
pati atsay nila'y kanya raw dinaliri

habang tayo'y naaaliw o naaasar
di napapansin ang kanyang mga paandar
balakin sa ChaCha'y pilit inilulugar
pederalismo'y unti-unting pinupundar

aba'y magmasid tayo't huwag lang magtiis
ang mga joke joke niya'y pakunwaring mintis
baka bulagain tayo ng bagong hugis
na bansa'y pederalismo na itong bihis

- gregbituinjr.

Patuloy lang

PATULOY LANG

patuloy akong magsusulat
ng mga tulang walang puknat
na kadalasang nagbubuhat
sa harayang di ko masukat

patuloy ako sa paglikha
ng sangkaterbang mga tula
magpapatuloy sa pagkatha
hinggil sa samutsaring paksa

patuloy hanggang kamatayan
sulat ng sulat sa aklatan
sulat ng sulat ng aklasan
susulat hanggang katapusan

magpapatuloy lang sa mundo
ang manunulat na tulad ko
susulatin ang kahit ano
susulat kahit di na uso

- gregbituinjr.