Himagsik ng hukluban

HIMAGSIK NG HUKLUBAN

ni Gregorio V. Bituin Jr.

11 pantig bawat taludtod

nais ng matatandang maghimagsik

sa panghihina ng katawang siksik

            "Puntanyo ng Kabataan" ang hanap

            baka sa pagkabata'y makasagap

nais nilang sariwa'y makatalik

sa pagkabasal ay namumutiktik

            ngunit sagi lang iyan sa hinagap

            gayong sa tunay, puso'y nasa hirap

di na magbabalik ang kabataan

ito'y diyalektika ng katawan

na dapat tanggapin ng kalooban

Pesteng trapik

PESTENG TRAPIK

ni Gregorio V. Bituin Jr.

11 pantig bawat taludtod

dapat bang luwangan ang mga daan?

o sadyang kayrami lang ng sasakyan?

            sa isang lugar lang ba nakonsentra

            ang mga nais puntahan ng masa?

lagi nang trapik sa mga lansangan

ulo'y baka mag-init nang tuluyan

            pag lumubha ang trapik sa kalsada

            konting lamig lang, pare, magpasensya

trapik ay kaytagal nang suliranin

paglutas ay dapat pakaisipin

bago may mamatay muli't barilin

Pila balde

PILA BALDE

ni Gregorio V. Bituin Jr.

11 pantig bawat taludtod

sa basketbol, sinumang matatalo

suot sa bukang hita ng nanalo

            usapan kasi nila'y pila balde

            desisyong ito'y usapang lalaki

kaya laro'y dapat pagbutihin mo

kung ayaw mong mangamoy-bayag dito

            sa laro'y paghusayan ang diskarte

            dapat magplano kayong magkakampi

may "teamwork" dapat ang bawat koponan

dahil pag kanya-kanyang diskartehan

tiyak pila balde silang talunan

Bilin ni ermat

BILIN NI ERMAT

ni Gregorio V. Bituin Jr.

11 pantig bawat taludtod

"mag-aral kang mabuti, aking anak

upang buhay mo'y di maging bulagsak"

            ngunit paano kay inay aamin

            na lagpak ako sa isang aralin

"ayoko kasing ikaw'y mapahamak

di ko kayang gumapang ka sa lusak"

            tiyak sa singit ako'y kukurutin

            pag paglagpak ko'y aking uulitin

magaling na nanay ang aking inay

sa pangaral, binusog akong tunay

dapat lang, magsunog ako ng kilay

Madawag man ang lungsod

MADAWAG MAN ANG LUNGSOD

ni Gregorio V. Bituin Jr.

11 pantig bawat taludtod

Isa akong taal na Manilenyo

Sampaloc ang tinubuang lupa ko

            Kasangga mo sa anumang larangan

            Kahit sa bote't maboteng usapan

Aking minamahal ang lupang ito

Karangalan kong maging Pilipino

            Kahit itanong mo sa barkadahan

            Habang tumutungga't namumulutan

Pabalik-balik man sa Balic-Balic

Matinong buhay, sa isip sumiksik

Ang lungsod man sa dawag ay matinik

Binilog ng numero

BINILOG NG NUMERO

ni Gregorio V. Bituin Jr.

11 pantig bawat taludtod

ekonomya raw ng bansa'y umangat

ibig bang sabihin, dukha'y bubundat?

            o ito'y isa na namang mahika

            sa numerong hindi ramdam ng masa

sa pagkain, aralin, dama'y salat

lima nga'y hati pa sa isang aklat

            karne'y mahal, isda, gulay, delata

            wala nang mabiling ulam na mura

tumaas ma't bumaba ang numero

pag-angat ay dapat ramdam ng tao

kung hindi, binibilog lang ang ulo

Bakit pula ang bandila

BAKIT PULA ANG BANDILA

ni Gregorio V. Bituin Jr.

11 pantig bawat taludtod

"bakit bandila ninyo'y kulay pula

iyan ba'y watawat ng komunista?"

            kulay pula'y tanda ng kagitingan

            sa harap ng maraming kaapihan

"komunismo ba'y yakap-yakap nyo na

kaya bandila'y nais nyong mapula?"

            kung iba'y kulay ng kaalipinan

            dito na kami sa pulang palaban

iba't iba yaong tingin sa kulay

ang mahalaga'y pagtingin sa buhay

nais mo ba'y api o layang tunay?

Ang maging makata

ANG MAGING MAKATA
ni Gregorio V. Bituin Jr.
12 pantig bawat taludtod

"To be a poet is more than a hobby, more than a profession -- it's a divine calling." - Maria Criselda Santos

ang maging makata'y di gawain lamang
o isang trabahong kinagigiliwan
walang sahod ito't pulos katitikan
pagyakap sa wika nitong buong bayan
ang pagmamakata'y di pangkaraniwan

ang maging makata'y banal na gawain
ang salita'y yakap, diwa'y umaangkin
puso'y nagmamahal, nagtitiis man din
magmakata'y dukha, palad kung palarin
sa mga salita, ikaw'y aaliwin

iba't ibang buhay ang aring itula
kagaya ng dusa ng maraming dukha
isasalaysay din itong manggagawa
habang binibisto ang mga kuhila
sa kanilang ganid na kilos sa madla

tulad ni Balagtas, o Corazon de Jesus
ang pagmamakata'y pagyakap mong lubos
sa tinig ng bayan, sa dukhang busabos
habang ang malupit iyong kinakalos
sa mga tula mong nais mong matapos

Panibagong Banta sa Banlik ng Panatag

PANIBAGONG BANTA SA BANLIK NG PANATAG
ni Gregorio V. Bituin Jr.
13 pantig bawat taludtod

bahagi ng bansa pag muling sasakupin
ano ang dapat nating isipin at gawin
dugo ng bayan ba'y muling padadanakin
nang itong dayuha'y tuluyang paalisin
http://www.philstar.com/headlines/2013/05/31/948591/chinese-general-reveals-strategy-panatag-takeover

* banlik - shoal
* Banlik ng Panatag - Panatag Shoal (Scarborough Shoal)

Dinastiya'y muling nagwagi

DINASTIYA'Y MULING NAGWAGI

ni Gregorio V. Bituin Jr.

14 pantig bawat taludtod

dinastiya'y nagwagi ng nagdaang halalan

pawang mga nanalo'y galing sa isang angkan

iyong pakasuriin, bakit nangyari iyan

magkamag-anak yaong nasa kapangyarihan

nangyari pagkat walang mapagpilian tayo

mga kumandidato'y parehong apelyido

anak ng kongresista o ng senador ito

ipinasa ng ama sa anak yaong pwesto

dinastiya'y nanalo, hoy, wala na bang iba

pulitika'y kanila, pati na ekonomya

ang isang lugar yata'y kontrolado na nila

ang nasa pwesto'y mula sa iisang pamilya

si Senador, Kongresman, pawang nananatili

kina Gobernor, Meyor, hindi ka makahindi

may utang-na-loob ka, sa iyo bumabawi

sa mahabang panahon, ganito na ang gawi

may magagawa pa ba nang ito'y di maulit?

dinastiya’y tanggap ba natin nang nakapikit?

sistema'y isusubo na lang ba nating pilit?

o sa susunod, boto'y atin nang ipagkait?

mababago ba itong kaytagal nang umiral

maari, ngunit dapat natin itong maaral

nang sa sunod, malaman sino ang matatanggal

at ang karapat-dapat ang ating mahahalal

Nag-Hokus-Pcos nga ba?

NAG-HOKUS-PCOS NGA BA?
ni Gregorio V. Bituin Jr.
11 pantig bawat taludtod

halalang iyon, ngayon na'y natapos
ngunit kayrami pa rin ang hikahos
maganap kaya'y pagbabagong lubos
o patuloy tayong mabubusabos
ng mga praning na akala'y diyos

mga dinastiya'y di na nalaos
di na binoto ngunit nakaraos
nagmahika na, at nag-Hokus-Pcos
mga buwitre'y nanginaing lubos
binayarang boto'y pinagtatalbos

Hokus-Pcos ba pagkat boto'y kapos
binabawi ang milyon nitong gastos
pera ba ang sa kanila'y nag-utos
upang ipanalo ang trapong bastos
ganito ba'y kailan matatapos?

Kung ikaw ang aking magiging kabiyak

KUNG IKAW ANG AKING MAGIGING KABIYAK
12 pantig bawat taludtod

alay kay klasmeyt Fides

kung ikaw ang aking / magiging kabiyak
ay bibigyan kita / ng maraming anak
pagsinta ko ikaw / ay makatitiyak
pagkat sa puso ko'y / tangi kitang galak

kung ikaw ang aking / magiging asawa
iyong madarama / tunay kong pagsinta
sa araw at gabi'y magkasama kita
hanggang kamatayan / ay kaulayaw ka

ibigin mo ako / O, sinta kong Fides
pagkat hangarin ko / sa iyo'y malinis
sa dusa't ginhawa / tayo'y magbibigkis
sa ligaya't hirap / kahit na magtiis

gagawaran kita / ng sanlibong halik
pagkat pag-ibig mo / sa puso ko'y siksik

Boss vs. Lider (isang tanaga)

BOSS VS. LIDER (isang tanaga)
ni greg

ang boss ay palautos
pero ang lider partner
hindi tayo busabos
dahil di boss ang lider

Kaymahal na naman ng presyo ng edukasyon

KAYMAHAL NA NAMAN NG PRESYO NG EDUKASYON
ni Gregorio V. Bituin Jr.
14 pantig bawat taludtod

anak na nais mag-aral, anong gagawin nyo?
edukasyon ay nagtaas na naman ng presyo
tiyak na tuliro ang magulang na obrero
O, Kistel, wala sanang sumunod sa yapak mo

Boto ko, walang presyo

BOTO KO, WALANG PRESYO
ni Gregorio V. Bituin Jr.
7 pantig bawat taludtod

sabi ng aking amo
ito ang iboto mo
at yayaman ka dito
sa aming kandidato

subalit isang trapo
ang kanyang nirereto
kapal ng pisngi't noo
siya ba'y walang modo

binibili'y prinsipyo
at aking pagkatao
kaya ang sinabi ko:
boto ko'y walang presyo!

ilang taon sa pwesto
iyang kandidato
babawi pag nanalo
kawawa ang bayan ko

Sa matandang bahay

SA MATANDANG BAHAY
ni Gregorio V. Bituin Jr.
12 pantig bawat taludtod

masarap balikan ang matandang bahay
di sumasaisip ang anumang lumbay
mga alaala'y laging kaagapay
dito nanirahan ang mamay at nanay

naririto lagi noong kabataan
na pawang kasama'y aking mga pinsan
sa mga kapatid, ito'y bakasyunan
kayrami kong aral ditong natutunan

sa mamay, magsibak ng mga panggatong
sa isa kong tiyo'y araro't kariton
kay ama'y araling aking napagdugtong
sa ilan kong pinsan, maglaro't limayon

sa bahay na ito lumaki si ama
kayraming tinuro ditong aral siya
at sa akin, dito umukit ang pluma
sa pagsulat yata'y dito nag-umpisa

sa pagdalaw namin ng mahal kong inay
sa mamay at nanay ay kaysayang tunay
inang maalaga, kasama sa lakbay
ang siyang umukit sa dangal kong taglay

ang mamay at nanay, sila'y nawala man
ang matandang bahay ngayon pa'y nariyan
na sa pagkatao'y tunay na pandayan
ng ugali't danas nitong katauhan

Pulitikong Santa Klaws

PULITIKONG SANTA KLAWS
ni Gregorio V. Bituin Jr.
13 pantig bawat taludtod

iyang kampanyahan tuwing Abril at Mayo
sa mga nasa iskwater tunay ngang pasko
dinadalaw sila ng mga pulitiko
nagbibigay ng kung anu-anong regalo

ang pulitikong santa klaws pulos pangako
bababa sa iskwater ang mga maluho
mga dukha'y liligawan, di dinuduro
iyang kampanyahan nga'y paskong liku-liko

bagong taon naman ang araw ng halalan
imbes paputok, polyeto ang nagsabugan
punumpuno ng papel ang mga lansangan
papel na nakasulat ang trapong pangalan

iyan ang pasko't bagong taon ng halalan
tuwing Abril at Mayong sadyang kainitan
pag trapo'y wagi, sila'y ipagtatabuyan
silang nabusog sa pangakong walang laman

Ang pangako ng balota

ANG PANGAKO NG BALOTA
ni Gregorio V. Bituin Jr.
13 pantig bawat taludtod

nangangako ang balota ng pagbabago
pakiramdam ito ng mga dukha rito
ngunit balota'y papel lang, sulatan ito
upang piliin sinong susunod na trapo

utak ng trapo'y magkano ang bawat dukha
bibilhin nila ang kaluluwa ng madla
habang dukha'y patuloy na nakakawawa
dahil walang pagbabago silang mahita

pagbabago ang pangako nitong balota
ngunit pag nanalo'y trapo, ito'y wala na
babawiin lang nito ang nagastos nila
di na naiisip paglingkuran ang masa

balota'y may silbi sa naghaharing uri
upang sa kapangyarihan ay manatili
balota'y walang silbi sa inaaglahi
ang pangakong pagbabago'y nalulugami

Pagbabago'y di makikita sa balota

PAGBABAGO'Y DI MAKIKITA SA BALOTA
ni Gregorio V. Bituin Jr.
8 pantig bawat taludtod

nangangako ang balota
ng pagbabago sa masa
ngunit ilang eleksyon na
pagbabago'y di makita

namamayagpag ang trapo
sila raw ang pagbabago
dati pa ring apelyido
sila uli'y kandidato

mahirap pa rin ang dukha
dukha pati manggagawa
di nagbabago ang bansa
balota'y anong adhika

pagbabago? ows, talaga?
pag-asa ba ang balota?
trapo ba'y mawawala na?
pagbabago'y kanino ba?

ilang eleksyo'y nagdaan
ang pagbabago'y nasaan
pulos trapo ang halalan
wala nang pagpipilian

nais naming pagbabago
ay sistema, di lang tao
baguhin mismong gobyerno
pati ang lipunang ito

kilanlin ang karapatan
ng lahat ng mamamayan
edukasyon, kalusugan
dapat lahat, libre iyan

sa lipunang makatao
serbisyo, hindi negosyo
nagsisilbi ang gobyerno
sa Pilipino, di sa dayo

Kapara niya'y salot

KAPARA NIYA'Y SALOT
ni Gregorio V. Bituin Jr.
9 pantig bawat taludtod

yumaman sa pangungurakot
pulitikong kunwa'y bantulot
nang magkapera'y nagmaramot
buhay niya'y nakalulungkot

isa siya ngayong kilabot
kahit kanino'y nanghuhuthot
aba, bakit binabaluktot
prinsipyong dati'y abot-abot

kapara niya'y isang salot
sa kanya'y tila walang gamot
pag nahuli'y ano ang sagot
siya kaya'y makalulusot

Matinong gobyerno't maayos na pananaw

MATINONG GOBYERNO'T MAAYOS NA PANANAW
ni Gregorio V. Bituin Jr.
13 pantig bawat taludtod

matinong gobyerno't maayos na pananaw
ang adhika nitong bayan sa gabi't araw

di tingin sa babae'y manikang magaslaw
na animo'y laruang parang mananayaw

di tingin sa manggagawa'y makinang tungaw
na sahurang alipin ng mga halimaw

di tingin sa magsasaka'y isang kalabaw
kayod ng kayod, tila tinimping balaraw

di tingin sa dukha'y isa nang magnanakaw
na pataygutom, mga bituka'y naglisaw

sa matinong gobyerno'y sino ang aayaw
gayong pangarap ng bayan sa gabi't araw

paano mangyayari kung sa diwa'y litaw
ang kaisipang kinalawang, naninilaw

kaya dapat baguhin ang sistemang hilaw
upang bukas natin ay di maging mapanglaw

Puro salita, walang nagawa

PURO SALITA, WALANG NAGAWA
ni Gregorio V. Bituin Jr.
13 pantig bawat taludtod

sadya bang puro salita, walang nagawa
para sa ating manggagawa't maralita
ang kasalukuyang rehimeng pulos dada
di naman pala kakampi ng manggagawa

wala daw magawa sa kontraktwalisasyon
nakabubuti raw ito sa ating nasyon
anong klaseng pangulong ganito ang tugon
lohikang kapitalista ang nilalamon

manggagawa, dangal mo'y niyuyurakan na
iyang pangulo mo'y isip-kapitalista
sa isang tabi'y mananahimik na lang ba
ipakita mo ang lakas ng iyong pwersa

sanay tayong kumayod sa pagtatrabaho
sanayin nating kumayod ng pagbabago
obrero'y kaysipag pakainin ang mundo
magsipag din tayong ang sistema'y mabago

halina't baguhin itong sistemang bulok
na sa kaibuturan nati'y umuuk-ok
iparanas sa kapitalismo ang dagok
at uring manggagawa'y ilagay sa tuktok

1 Mayo 2013

Nakita kitang muli sa rali

NAKITA KITANG MULI SA RALI

ni Gregorio V. Bituin Jr.

10 pantig bawat taludtod

nakita kitang muli sa rali

ikaw na kaygandang binibini

na kasama-sama ko pa noon

katuwang sa isang gintong layon

kaytamis pa rin ng iyong ngiti

na nagmarka sa puso kong sawi

aktibista kang muling nagbalik

dama ko bawat iyong hagikhik

sa pandinig ko'y tila musika

ang tinig mo'y nakahahalina

nawa'y magbalik ka nang tuluyan

di ba't sabi mo'y walang iwanan

kasama, narito pa rin ako

handang umalalay hanggang dulo

kamatayan man ang makaharap

asahan mo ang aking paglingap

Wakasan ang dinastiyang pulitikal!

WAKASAN ANG DINASTIYANG PULITIKAL!
ni Gregorio V. Bituin Jr.
10 pantig bawat taludtod

isang trapo ang kanilang ama
pumalit dito'y kanyang asawa

nang matapos ang panunungkulan
anak ang papalit sa magulang

isang pamilya ang namumuno
sila-sila yaong nakaupo

sa isang bayan sila ang hari
bayang animo'y kanilang ari

laging sila ang nasa pedestal
silang dinastiyang pulitikal

di na ba nagsasawa ang masa
sa mga trapong magkapamilya

masa lang ba'y hanggang sa pagboto
gayong di naglilingkod ang trapo

trapo't dinastiyang pulitikal
ay bakit ating pinatatagal

kailangan ng tunay na lingkod
na tao'y unang tinataguyod

dinastiya ng trapo'y wakasan!
mga trapo'y dapat nang palitan!

Ang Pobreng Alak

ANG POBRENG ALAK
ni Gregorio V. Bituin Jr.
14 pantig bawat taludtod

iyang pobreng alak ang lagi nang sinisisi
pag may hindi magandang nagawa at nangyari
pag lasenggo'y nanyansing, nagalit ang babae
ikakatwiran ng lasenggo, ang alak kasi

sa maraming insidente, sinisisi'y alak
sa mga aksidente, alak ang nanunulak
kaya marami yaong gumagapang sa lusak
dahil sa pobreng alak, maraming napahamak

ang alak ay nariyan lang, walang ginagawâ
ngunit espiritu niya'y babago ng diwâ
may kasabihan nga, anumang sobra'y masamâ
pag lumaklak ng alak, ilagay mo sa tamâ

ang alak ay inilalagay lamang sa tiyan
pag sa ulo inilagay ay kapahamakan

Doon po sa aming maralitang bayan

DOON PO SA AMING MARALITANG BAYAN
ni Gregorio V. Bituin Jr.
12 pantig bawat taludtod

i

doon po sa aming maralitang bayan
mga pulitiko ay nagdadagsaan
mahirap ay muling pinangangakuan
pagagandahin daw ang kinabukasan

ngunit bakit kaya silang pulitiko
nakaupo na ng kung ilang termino
ngunit wala pa rin yaong pagbabago
na ipinangako nang sila'y manalo

at nangangampanya muli sila ngayon
ang muling manalo ang kanilang layon
serbisyo kunwari ang kanilang tuon
gayong nang umupo'y tadtad ng korapsyon

ii

doon po sa aming bayang naghihirap
di matupad-tupad ang aming pangarap
mga pulitiko'y di mo makausap
problema ng masa'y di maharap-harap

kahit alam nilang masa'y nagdurusa
ginagawa'y panay pamumulitika
mga dukha'y walang pagkain sa mesa
walang katiyakan ang trabaho nila

iyang mga trapo'y sadyang mapagpanggap
pag muling nanalo'y di mo mahagilap
serbisyo sa bayan ay aandap-andap
kaya ang ginhawa'y di man lang malasap

iii

doon po sa amin, may halalan muli
ang masa'y di dapat magbakasakali
mga kandidato'y dapat lang masuri
kung sino ang tapat at kapuri-puri

ilan sa kanila'y kilalang balimbing
iba't iba yaong partidong kasiping
naroon kung saan may kumakalansing
at pera ng bayan ang kinukutingting

ating bayan dapat tuluyang mabago
ang mga kurakot, huwag nang iboto
ang mga balimbing, tanggalin sa pwesto
nais nami'y tapat, totoong serbisyo

Salamat sa Makakalikasang Kilusan

SALAMAT SA MAKAKALIKASANG KILUSAN
ni Gregorio V. Bituin Jr.
17 pantig bawat taludtod

salita lang ang salamat, ngunit mahalagang salita
na dapat mamutawi sa labi o maisulat kaya
taos-pusong dapat ihandog sa kapwa tao't kilusan
upang matiyak lamang gumanda ang mundo at lipunan
makakalikasan silang inspirado, iminulat ang madla
kayrami rin nilang nagsakripisyo, kayraming nagluksa
salamat ay salita lamang, ngunit napakahalaga
pagkat bukas at buhay ng uri't bayan ang naalala
kilusan sa kalikasan, bayanihang di maikubli
sadyang katangi-tangi kayo't hindi dapat isangtabi
salamat ng marami sa kilusang makakalikasan
sa inyo ang pagpupugay ko't bayani kayo ng bayan

Walang "Chosen Few"

WALANG "CHOSEN FEW"
ni Gregorio V. Bituin Jr.
13 pantig bawat taludtod

i
masasagip lang ay ilan, sabi ng hula
ligtas lang ang nananampalataya
para bang gumawa ng tao si Bathala
para sa kanya ay sumamba't maniwala

laruan ka lang ba ng kanilang Bathala
upang sa kanya ikaw'y maniwala
upang maligtas ka sa impyernong bunganga
na panakot nila sa bayan at sa madla

tagatala ng mabuti't masama
ganito ba ang papel ng Bathala
gayong ang sabi, ikaw ay nilikha
tanggap niya, mabuti o masama

ii
ang tawag na impyerno'y inimbento
upang ang kapwa'y ating irespeto
isang Bathala'y nilikha ng tao
upang matugunan ang tanong nito

sa kwento'y likha ng Bathala'y tao
habang Bathala'y likha rin ng tao
tulad ng Araw sa patag na mundo
namali ang husga kay Galileo

minamahal ni Bathala ang tao
di man maniwala sa kanya ito
Bathala'y makatarungang totoo
ligtas ka sa inimbentong impyerno

bakit ba meron pang mga "chosen few"
at itsapuwera ang iba pang tao
mapamili ba ang Bathalang ito
iba'y matino, iba'y sa impyerno?

di makatarungan itong "chosen few"
ganito'y makasariling konsepto
anang bayaning Emilio Jacinto:
"Ang lahat, iisa ang pagkatao."

walang "chosen few", lahat mahal kayo
ng Bathalang lumikha nitong mundo
ng Bathalang nilikha nitong tao
wala rin ang panakot na impyerno

Elehiya kay Samantha Jane

PAHIMAKAS SA ISANG ANGHEL
(elehiya kay Samantha Jane)
ni Gregorio V. Bituin Jr.

minsan ka lang naming nakasama
sa pangangampanya ngayong halalan
isa ka sa itinuring na anghel
na nangampanya para ipanalo
ang ating kandidato
bata ka pa
parang anak ka na namin
o parang kapatid naming bunso
may kinabukasan pa sanang
naghihintay sa iyo
ngunit wala ka na
kay-aga mong nawala
sa mura mong gulang
na labimpito
di namin lubos-maisip
bakit kay-aga mong nawala
di ka lang anghel ng kandidato
anghel ka rin sa marami
sa aming bagong kakilala mo
sa mga kaklase't kaibigan mo
na ayon sa kanila
ikaw ay napakabait
kinukuha nga ba ng maaga
ang tulad mong mababait
o ito'y sadyang aksidenteng
idinulot ng tadhana
o sadyang walang ingat
ang  tricycle driver ng sinasakyan mo
marami kayong nakasakay dito
at nakasabit ka sa likod nito
dahil marahil sa kawalang ingat
o marahil ay kawalan
ng pag-aalala sa kanyang pasahero
ikaw ay tumilapon
humampas ang ulo sa semento
na naging dahilan upang
maaga kang mawala
sa ibabaw ng mundo

ang maganda mong kinabukasan
ang mga mithiin mo sa buhay
ang iyong mga pinapangarap
ay di na magkakaroon ng katuparan

minsan ka lang naming nakasama
sa pangangampanya
ngunit ikaw ay anghel
na umukit  na sa aming puso’t diwa

ramdam namin ang sakit
at pait ng maaga mong pagkawala
dahil minsan ka naming nakasama

paalam, aming kaibigan
paalam, Sam

paalam

* Si Samantha Jane Sanorias, 17, ay isang kabataang namatay sa aksidente matapos ang pangangampanya para sa isang kandidato, nang humarurot ang tricycle kung saan siya nakasabit sa likod ay nakabitaw siya sa biglang pagliko ng tricycle at humampas ang kanyang ulo sa semento, na sanhi ng kanyang kamatayan; Abril 7, 2013 nangyari ang aksidente, nadala sa ospital, at namatay kinabukasan; libing niya ay Abril 17, 2013

Nagbigti sa kulungan

NAGBIGTI SA KULUNGANni Gregorio V. Bituin Jr.
7 pantig bawat taludtod

nagbigti ang kawatan
sa loob ng kulungan
budhi'y di nalinisan
sarili'y tinuluyan