20,322 - 11,103 = 9,219

20,322 - 11,103 = 9,219

dalawampung libo, tatlong daan, dalawampu't dalawa

sa unang labimpitong buwan lang, bilang ng napaslang na

adik, ayon kay Chel Diokno, sa Kongreso'y sinabi niya

panahon ni Digong ay madugong panahon ng hustisya

halos apat na libo sa operasyon ng kapulisan

higit labing-anim na libo'y riding-in-tandem dawnaman

di pa kasama ang natirang apatnapu't tatlong buwan

ng rehimen, baka pag sinama'y lumaki pa ang bilang

ah, sinong mananagot sa mga pagkamatay na ito?

lahat ba sila'y nanlaban kaya pinaslang ng berdugo?

ikumpara mo: labing-isang libo, sandaan at tatlo

halos kalahati ang bilang ng biktima ng martial law

tingnan ang katwiran nila, na dapat lang nating malirip

dahil adik, wala sa katinuan, baka ka mahagip

gumagawa ng masama, dahil di matino ang isip

dapat unahan upang sa krimen nila tayo'y masagip

maganda ang intensyon, subalit mali ang pamamaraan

kayraming inang nawalan ng anak, hingi'y katarungan

hustisya kaya'y makakamit ng mga ina't ng bayan?

sinong huhuli sa utak kung ito'y makapangyarihan?

- gregoriovbituinjr.

06.06.2024

* Ulat mula sa Inquirer.net, June 5, 2024

Ginisang sardinas

GINISANG SARDINAS

niluto ko na naman / ay ginisang sardinas

na sinahog ko'y bawang, / kamatis at sibuyas

pagkain ng mahirap, / kinakain kong wagas

na habang nangangarap / ng lipunang parehas

ay nawiwili namang / makisalo madalas

sa katoto't kasamang / gaya ko'y maralita

kasama sa lansangan / ng uring manggagawa

kami'y nakikibaka / habang kinakalinga

ang kapwa mahihirap / na sangkahig, santuka

ginisang sardinas man / ang aming inuulam 

saya ng kalooba'y / sadyang mararamdaman

habang nagkakaisang / itatayo ang asam

ang magandang sistema't / makataong lipunan

-gregoriovbituinjr.

06.06.2024

*mapapanood ang bidyo sa kawing na: https://fb.watch/swTjeGQ1Cn/ 

Polyeto

POLYETO

isa sa madalas kong / basahin ay polyeto

na pinaghahalawan / ng iba't ibang isyu

na siya kong batayan / ng mga tula't kwento

na inilalathala / sa blog at sa diyaryo

anong paninindigan / ng dukha't manggagawa

sa maraming usaping / apektado ang madla

ang kontraktwalisasyon, / pabahay, gutom, sigwa,

sahod, ChaCha, giyera, / lupang tiwangwang, baha

marapat isaloob / ng abang manunulat

ang laman ng polyeto / upang makapagmulat

paano isasalin / sa kanyang sinusulat

ang tindig at prinsipyong / sa polyeto'y nabuklat

ang polyeto'y basahin, / basahin ng mataman

ang isyu'y isaloob, / isapuso ang laman

upang pag nagsulat na / ng kwento't sanaysay man

ay di ka maliligaw / sa tinahak mong daan

- gregoriovbituinjr.

06.06.2024

Ang tula'y aking tulay

ANG TULA'Y AKING TULAY

ang tula'y aking tulay

sa masang matatatag

sa kanila ko alay

bawat paksang nilatag

halimbawa'y dalita

ramdam lagi ang hirap

di basta kawanggawa

ang dapat na malasap

kundi ang pagbabago

nitong sistemang bulok

sa tula ba'y paano

sa pagkilos mag-udyok

kaya sa adhikaing

baguhin ang sistema

makata'y may tungkuling

pagkaisahin sila

tula'y pagpapatuloy

ng saknong at taludtod

kahit na kinakapoy

pagtula'y aking lugod

tula'y tulay ko't layon

sa dukha't sambayanan

ito ang aking misyon

sa daigdig at bayan

- gregoriovbituinjr.

06.06.2024

Hunyo 5, 2024

HUNYO 5, 2024

ikasandaan dalawampu't limang anibersaryo

ng pagkakapaslang kay Heneral Antonio Luna

at ikasampung anibersaryo ng kamatayan

ng magiting na kasamang si Ka Romy Castillo

ginugunita'y pang-apatnapung anibersaryo

ng World Environment Day, ito'y isang paalala

kaarawan din ng katotong Danilo C. Diaz

makatang kilala sa kanyang mga tula't bugtong

pagpupugay sa lahat ng mga may kaarawan

ngayong ikalima ng Hunyo, mabuhay po kayo!

di ko man mabanggit sa tula ang inyong pangalan

ang mahalaga'y personal ang pagbati sa inyo

ngayong World Environment Day, isipin ang daigdig

pakiramdaman mo't puso ng mundo'y pumipintig

sa pagprotekta nito, tayo na'y magkapitbisig

at huwag hayaang sistemang bulok ang manaig

- gregoriovbituinjr.

06.05.2024

* Heneral Antonio Luna (Oktubre 29, 1866 - Hunyo 5, 1899)

* Ka Romy Castillo (Marso 8, 1952 - Hunyo 5, 2014), dating bilanggong pulitikal noong panahon ng batas militar at unang pangulo ng Bukluran ng Manggagawa para sa Pagbabago (BMP) (circa 1993)

* World Environment Day - first held in 1974

* mga litrato mula sa google

Pananghalian

PANANGHALIAN

kamatis, pipino't sibuyas ang pananghalian

habang ang inumin ko naman ay nilagang bawang

nagtitipid na'y nagpapalakas pa ng katawan

iwas-karne, at habang walang isda'y gulay naman

mabuti ngang kalusugan pa rin ang nasa isip

bagamat maraming suliranin ang halukipkip

lagi mang sa putik nakatapak ay nalilirip

ang mga pagkilos naming marami ring nahagip

ah, payak na pananghalian ngunit pawang gulay

busog ka na, diwa't kalooban mo pa'y palagay

mabuting pampalusog habang dito'y nagninilay

upang makapagsulat ng kwento, tula't sanaysay

tara, mga katoto, at ako'y saluhan ninyo

tulad ko'y tinitiyak kong mabubusog din kayo

- gregoriovbituinjr.

06.05.2024

Nais ko pa ring mag-aral

NAIS KO PA RING MAG-ARAL

di pa huli ang lahat / upang mag-aral muli

maganda ring tapusin / ang kurso kong pinili

kailangan ko lamang / talagang magpunyagi

gayong ako rin naman / ay di nagmamadali

o kaya'y palitan na / ang aking dating kurso

baka di na interes, / pumurol na ang ulo

di ko natapos noon / ang BS Math kong kurso

dahil agad nagpultaym / yakap ang aktibismo

baka kunin ko ngayon / BS Pilipino na,

malikhaing pagsulat / o pagdidiyarista

hahanapin kung saan / nababagay talaga

na pagtutuunan ko / ng sakripisyo't pwersa

bagamat aktibismo'y / di ko naman iiwan

sapagkat ako'y isang / aktibistang Spartan

adhika ko lang ngayo'y / makapagtapos naman

ng kursong nababatay / sa aking kakayahan

edad ko'y kalahating / siglo na ring mahigit

halos tatlong dekadang / pultaym, ngayon hihirit

taon ng pag-aaral / ay baka isang saglit

habang ipapasa ko / ang bawat pagsusulit

- gregoriovbituinjr.

06.05.2024

* litrato mula sa pahayagang Abante, 05.23.2024, p.8

Buklog

BUKLOG

ayon sa diksyunaryo, may entabladong sayawan

tinatawag na buklog ang estrukturang kawayan

na ang taas ay abot dalawampung talampakan

ginagamit na sayawan kapag may pagdiriwang

nakikinita ko na sa aking imahinasyon

na sa lalawigan ay palasak din ang ganoon

may estrukturang kawayan kapag may selebrasyon

salamat, may buklog, katutubong salita iyon

baka magandang gamitin ang nasabing salita

sa mga kwento, tula't balita kong inaakda

tungkulin ko ring pasikatin ang ganyang kataga

bilang pagpapayabong na rin sa sariling wika

subalit laliman pa natin ang pananaliksik

kung buklog ay wastong gamitin, di basta isiksik

lalo't pag may nasaliksik, ako na'y nananabik

na gamitin ito sa mga kathang sinatitik

sa pananaliksik, ito'y ritwal pasasalamat

ng mga Subanen, katutubo sa komunidad

di lang estrukturang kawayan, kundi kalinangan

ng mga katutubo sa kanilang pagdiriwang

pasasalamat dahil ani nila'y masagana

pagkaligtas mula sa karamdaman o sakuna

sa mga bagong hirang na pinuno'y pagkilala

di lamang estrukturang kawayan kundi kultura

- gregoriovbituinjr.

06.05.2024

Pinaghalawan:

UP Diksiyonaryong Filipino, pahina 200

https://en.wikipedia.org/wiki/Buklog 

https://www.facebook.com/PHinFrankfurt/photos/buklog-thanksgiving-ritual-system-of-the-subanennational-heritage-month-2020-par/797641590764517/ 

Pag-aralan ang kasaysayan

PAG-ARALAN ANG KASAYSAYAN

"Matakot sa kasaysayan pagka't walang lihim na di nahahayag." ~ Gregoria 'Oriang' de Jesus, Lakambini ng Katipunan

ating pag-aralan ang kasaysayan

nang maunawaan ang nakaraan

upang pagkakamali'y maiwasan

upang maayos ang tahaking daan

tungo sa inaasam na lipunan

bagamat minsan ay nakayayamot

pag-aralan ito'y nakababagot

kakabisaduhin ang mga petsa

di alam bakit sasauluhin pa

para lang ba sa subject ay pumasa?

pag nakapasa'y kakalimutan na?

mula sa nakaraan ay matuto

ninuno'y binuo ang bansang ito

at ipinaglaban ang laya nito

laban sa mapagsamantalang dayo

at kapitalistang mapang-abuso

na nang-aapi sa uring obrero

bakit mamamayan ay naghimagsik

laban sa dayuhang ganid at switik

laban sa kaapihang inihasik

ng mananakop na sa tubo'y sabik

bakit nakamit natin ang paglaya

laban sa mananakop na Kastila

laban sa Hapon at Kanong kuhila

laban sa diktador na mapamuksa

laban sa nang-api sa manggagawa

laban sa nagsamantala sa dukha

laban sa nandambong sa ating bansa

halina't aralin ang kasaysayan

ng bayan, ng sistema't ng lipunan

hanggang maitayo sa kalaunan

ang asam na makataong lipunan

- gregoriovbituinjr.

06.04.2024

Anong nasa pagitan ng palad at galang-galangan?

ANONG NASA PAGITAN NG PALAD AT GALANG-GALANGAN?

ano bang tawag sa pagitan

ng palad at galang-galangan?

hinahanap kong sadya iyan

upang magamit sa tulaan

para rin sa paglalarawan

ng isport o ng martial art man

matigas na bahagi iyon

dikit sa palad na malambot

pinatatama kasi roon

ang bola ng balibolista

pag kanya nang hinampas iyon

tiyak di palad ang pantira

sa kung fu film napapanood

pantira ay sakong ng palad

kaya di palad na malambot

kundi ang bahaging matigas

gilid ng palad nga'y panagâ

ng karatista at judoka

kung sa boksingero, kamao

iba pag sa balibolista

sakong ng palad ang tatama

hanggang ngayon ay hanap ko pa

sa iba't ibang diksyunaryo

kung isa-isahin talaga

baka nga matanda na ako

ay di ko pa rin nakikita

kaya tulong ang kailangan

ng abang makatang tulad ko

wrist sa ingles, galang-galangan

palm ay palad, at ano naman

ang tawag sa pagitan nila

kung alam mo, sabihan ako

taospusong pasasalamat

agad masasabi sa inyo

- gregoriovbituinjr.

06.04.2024

Pinaghalawan ng litrato:

https://www.facebook.com/TriviaAndFactsPhilippines/photos/a.114199990276994/192280899135569/?type=3 

https://www.facebook.com/TriviaAndFactsPhilippines/posts/ngayong-araw-atin-namang-balikan-ang-minsan-ng-naging-salin-ng-lupon-ng-agham-pa/654524966244491/ 

https://promova.com/english-vocabulary/parts-of-the-hand-vocabulary 

https://loveenglish.org/parts-of-the-hand/ 

Dapithapon, dapit-tanghali, dapit-umaga

DAPITHAPON, DAPIT-TANGHALI,  DAPIT-UMAGA

noon pa man, dapithapon na'y batid

at sa kwento't tula na'y nagagamit

oras ng pag-aagawdilim iyon

bandang mag-iikaanim ng hapon

mayroon pa palang dapit-tanghali

oras bago ang ganap na tanghali

bandang alas-onse na iyong sadyâ

sa pananghalian na'y naghahandâ

at nariyan din ang dapit-umaga

o nagbukangliwayway nang talaga

mga salitang ngayon lang napansin

na sa kwento't tula na'y gagamitin

magagandang salitang natagpuan

na dagdag sa kaalaman ng bayan

sino pa bang diyan magpapasikat

bukod sa makata'y ang masang mulat

di namimilosopong masasabi

o salita'y inimbento lang dini

pagkat ito'y nalathalang totoo

sa iginagalang na diksyunaryo

- gregoriovbituinjr.

06.04.2024

* nasaliksik mula sa UP Diksiyonaryong Filipino, p. 265

Kaawa-awa ang bansang...

KAAWA-AWA ANG BANSANG...

ni Lawrence Ferlinghetti

malayang salin ni Gregorio V. Bituin Jr.

Kaawa-awa ang bansang ang mga tao'y tupa,

at inililigaw sila ng kanilang mga pastol.

Kaawa-awa ang bansang ang namumuno'y pawang sinungaling,

na pinatahimik ang kanilang mga pantas,

at kung saan ang mga bulag na alagad ay namumugad sa ere.

Kaawa-awa ang bansang hindi nagsasalita,

maliban sa pagpuri sa mga mananakop at tinuturing na bayani ang  mang-aapi

at nilalayong pamunuan ang daigdig sa pamamagitan ng pwersa't pagpapahirap.

Kaawa-awa ang bansang walang ibang alam kundi ang sariling wika

at walang ibang kalinangan kundi ang kanila lamang.

Kaawa-awa ang bansang ang hinihinga'y salapi

at nahihimbing tulad ng tulog ng mga bundat.

Kaawa-awa ang bansa — ay, kawawa ang mamamayang hinahayaang winawasak ang kanilang karapatan at maanod lang ang kanilang kalayaan.

Aking bayan, ang iyong luha'y kaytamis na lupa ng kalayaan.

PITY THE NATION 

by Lawrence Ferlinghetti

Pity the nation whose people are sheep,

and whose shepherds mislead them.

Pity the nation whose leaders are liars, whose sages are silenced,

and whose bigots haunt the airwaves.

Pity the nation that raises not its voice,

except to praise conquerors and acclaim the bully as hero

and aims to rule the world with force and by torture.

Pity the nation that knows no other language but its own

and no other culture but its own.

Pity the nation whose breath is money

and sleeps the sleep of the too well fed.

Pity the nation — oh, pity the people who allow their rights to erode

and their freedoms to be washed away.

My country, tears of thee, sweet land of liberty.

* Si Lawrence Ferlinghetti (Marso 24, 1919 - Pebrero 22, 2021) ay isang makatang Amerikano, pintor, at kasamang tagapagtatag ng City Lights Booksellers & Publishers.

* Litrato mula sa google

Halik

HALIK

paano daw hagkan ang sinisinta?

idikit ang labi sa labi niya!

inyong pusong magkausap tuwina

at inyong damdamin ang mapagpasya

halik ba'y patungkol lang sa pagdampi

ng labi mo sa anumang bahagi

ng katawan ng iyong sintang mithi

na dama mo'y pag-ibig na masidhi

sa tahanan pag dumating ang mahal

o saang lugar nagtagpo't dumatal

pupupugin ng halik na kaytagal

maging asam ninyong pagsinta'y bawal

O, halik, halika sa aking tabi

ako'y pupugin sa noo ko't pisngi

- gregoriovbituinjr.

06.04.2024

* litrato mula sa app game na Word Connect

Hapunan

HAPUNAN

matapos ang aming maghapong gawa

ay kailangang maghapunan na nga

upang lamnan ang tiyan, puso't diwa

may nilagang itlog, tilapyang prito

may talbos ng kamote pa't pipino

tanging maybahay ang aking kasalo

animo'y may paruparo sa tiyan

tila nadama ko'y katiwasayan

gayong nasa makauring digmaan

maya-maya lang ako'y napadighay

ang loob ko'y tila di mapalagay

buti't si misis ay nakaalalay

tinagay ko'y dalawang basong tubig

ramdam ang ginaw sa gabing kaylamig

kaya hinalukipkip yaring bisig

pagkatapos kong hugasan ang pinggan

ay nagtungo na kami sa higaan

ngunit diwa ko'y naglakbay na naman

- gregoriovbituinjr.

06.03.2024

Kasaysayan (tula sa baybayin)

KASAYSAYAN (tula sa baybayin)

kasaysayan ng bansa

ay ating pag-aralan

nang di tayo mawala

sa tatahaking daan

tula ni gorio bituin

06.03.2024

Paalam, Carlo

PAALAM, CARLO

nabalitaan ko roon sa socmed

na namatay si Carlo J. Caparas

habang si Carlo Paalam ang hatid

ay dangal sa boksing sa labang patas

dalawang Carlo silang hinangaan

na nagkasabay minsan sa balita

ang isa sa kanila'y namaalam

at ang isa'y sa laban naghahanda

di ko sadyang mapitik sa kamera

ang dalawang Carlo sa isang ulat

nagawa ko'y maghandog sa kanila

ng tulang sa puso'y isiniwalat

paalam, Direk Carlo J. Caparas

mga nagawa mo'y di mapaparam

at sa boksingerong palos sa dulas

mabuhay ka, boxer Carlo Paalam

- gregoriovbituinjr.

06.03.2024

* ulat noong huling linggo ng Mayo 2024

Paglahok sa rali

PAGLAHOK SA RALI

kami'y lumalahok / madalas sa rali 

sapagkat tungkuling / di maitatanggi

tibak na di dapat / bulag, pipi't bingi

na isyu'y di dapat / isinasantabi

halimbawa, isyu'y / kontraktwalisasyon

isyung demolisyon, / pati relokasyon

nagbabagong klima, / init ng panahon

isyung Palestino, / at globalisasyon

ang utang panlabas, / pabahay ng dukha

itaas ang sahod / nitong manggagawa

gera, ChaCha, isyung / magsasaka't lupa

mga karapatan / ng babae't bata

bente ang sangkatlo / ng kilo ng bigas

pagpaslang sa adik / ay gawang marahas

paano itayo / ang lipunang patas

kung saan ang lahat / ay pumaparehas

ah, kayraming isyu / upang ta'y lumahok

at magrali laban / sa sistemang bulok

punahi't ibagsak / iyang trapong bugok

na sa pwesto nila'y / di natin niluklok

- gregoriovbituinjr.

06.03.2024

Anaan, pakakak at umok

ANAAN, PAKAKAK AT UMOK

sa isang palaisipan, kayrami kong nawatas

aba'y UMOK pala ang tawag sa uod ng bigas

ANAAN naman ay punongkahoy na balingasay

nang sa isang diksyunaryo'y saliksikin kong tunay

dati ko nang alam na ang tambuli ay PAKAKAK

na batay sa mga ninuno'y gamit na palasak

iyan ang matitingkad na salita kong nabatid

mula sa krosword sa puso't diwa'y galak ang hatid

habang may mga salitang dati nang nasasagot

na sa palaisipan din naman natin nahugot

ang ALALAWA ay gagamba, SOLAR ay bakuran

TALAMPAS naman ay kapatagan sa kabundukan

salamat, muli'y may natutunang bagong salita

na magagamit natin sa pagkukwento't pagtula

- gregoriovbituinjr.

06.02.2024

* krosword mula sa pahayagang Pilipino Star Ngayon, Hunyo 2, 2024, p.10

* anaan - balingasay, punungkahoy (Buchanania arborescens), mula sa UP Diksiyonaryong Filipino (UPDF), p.50 at p.112

* pakakak - malaking kabibe na hinihipan at ginagamit na panghudyat, UPDF, p.884

* umok - maliliit na uod na nagiging sanhi ng pagkakaroon ng masamang amoy ng bigas o tinapay, UPDF, p.1301

Mabuhay ang ALAS Pilipinas!

MABUHAY ANG ALAS PILIPINAS!

Mabuhay ang ALAS Pilipinas. mabuhay!

na naka-bronze medal sa nilahukang tunay

sa AVC Challenge Cup for Women, tagumpay

inukit nila'y kasaysayan, pagpupugay!

hinirang si Jia De Guzman na Best Setter

si Angel Canino, Best Opposite Spiker

sa sunod na torneo sana'y maging better

pagbutihin pa ang laro nila'y mas sweeter

mabuhay din ang iba pang balibolista

Eya Laura, Vanie Gandler, Sisi Rondina,

Cherry Nunag, Dawn Catindig, Del Palomata,

Ara Panique, Fifi Sharma, Jen Nierva, 

Julia Coronel, Faith Nisperos, Thea Gagate,

coach Jorge Souza de Brito, tanging masasabi

buong koponan ay kaygaling ng diskarte

pagpupugay sa inyo ang aming mensahe

- gregoriovbituinjr.

06.02.2024

* ulat mula sa pahayagang Pilipino Star Ngayon, 05.31.2024, p.12

Balibolista

BALIBOLISTA

huwag kang hahara-hara sa daan

pag silang mga kababaihan

ay naririyan at dumaraan

mabuti pang sila'y saluduhan

para bang boksingerong walang glab

imbes mukha, bola'y hinahampas

lalo sa laro't nagpapasiklab

kamay nila'y tingni't kaytitigas

tiyak pag tumama sa ulo mo

daig pa nila ang boksingero

pag bola nga'y pinalong totoo

kaytindi, paano pa pag ulo

tiyak na kalaban ay tutumba

pag nakalaba'y balibolista

animo'y martial arts din ang tira

pagmasdan mo't kayhuhusay nila

- gregoriovbituinjr.

06.02.2024

* litrato mula sa pahayagang Pilipino Star Ngayon, 05.30.2024, p.12

Sa pagsalubong ng bukangliwayway

SA PAGSALUBONG NG BUKANGLIWAYWAY

sumikat ang araw / na dala'y pag-asa

na may kalutasan / ang bawat problema

kinakaharap na / ang bagong umaga

tulad ng pag-ibig / ng minutyang sinta

aking gugugulin / ang buong maghapon

upang pagnilayan / bawat mga hamon

nasa isip lagi / ang layon at misyon

na baka magwagi / sa takdang panahon

maraming kasama / sa bukangliwayway

kay-agang gumising / na di mapalagay

agad nagsiunat / at muling hinanay

ang mga gawaing / dapat mapaghusay

may bagong pag-asang / dapat madalumat

ng sanlaksang dukhang / sa ginhawa'y salat

sa bukang liwayway, / maraming salamat

ang pagsalubong mo'y / pag-alay sa lahat

- gregoriovbituinjr.

06.02.2024

Madali bang sabihin...?

MADALI BANG SABIHIN...?

madali bang sabihin ang nararanasan

mong kahirapan sa buhay mo't sa lipunan?

madali bang sabihing naghihirap ka man

ang mga pangarap mo'y pinagsisikapan?

madali mo kayang nasabing "mahal kita"

sa nililigawan mo o sa sinisinta?

biyenan ba'y madaling natawag na ama

o nanay pagkat mahal mo ang anak nila?

madali bang sabihing tayo'y maghimagsik

laban sa kapitalismong takot ang hasik?

madali bang sabihing tanggalin ang plastik

na sa kapaligiran ay nagsusumiksik?

madali bang sabihing ilagay sa tuktok

ang dukhang pinatibay ng laksang pagsubok

madali bang sabihing iyong naaarok

bakit lipunang nasa'y dapat mapatampok?

maraming dapat masabi tulad ng trapo

na pulos pangako upang sila'y iboto

madaling sabihing itaas na ang sweldo

ng obrero ngunit paano ipanalo?

- gregoriovbituinjr.

06.01.2024

* litrato mula sa app game na Word Connect

Huling umaga ng Mayo 2024

HULING UMAGA NG MAYO 2024

ginising ako ng alarma

ng relo, umaga na pala

ang haring araw sa silangan

ay unti-unting nagpakita

tila baga nangungumusta

akong antok pa sa higaan

ay nag-inat na ng katawan

kaylamig pa upang maligo

hinanda muna ang agahan

pandesal at kape na naman

sa talakayan patutungo

sapagkat may isyung di biro

na dapat pag-usapan namin

baka bansa'y biglang gumuho

at kalayaan ay maglaho

kaylamig, ako'y nababahin

habang isyu'y dapat basahin

dapat handa sa sigwa't gera

bago pa sa baha lubugin

bago pa sa luha lunurin

- gregoriovbituinjr.

05.31.2024

Tibuyo upang makaipon

TIBUYO UPANG MAKAIPON

napili ko'y labing-anim na aklat

pampanitikang nakahihikayat

basahin kaya pag-ipunang sukat

upang nagustuha'y mabiling lahat

presyo nito'y dalawang libong piso

na aking pagsisikapang totoo

iyong tingnan ang listahan at presyo

kung bakit nais ko ng gayong libro

di lang iyan pandagdag sa aklatan

kundi higit pa'y dagdag kaalaman

pagsuporta na rin sa panitikan

na naging buhay ko ring kainaman

tibuyo'y pupunuin ko ng barya

sampung piso o bente pesos muna

kakayod ako't kakayod talaga

sa pagkayod lang ako umaasa

- gregoriovbituinjr.

05.30.2024

Mga pinag-iipunan kong balak bilhing aklat sa Komisyon sa Wikang Filipino (KWF):

1 - ANG APAT NA HIMAGSIK NI FRANCISCO BALAGTAS - P100

2 - INTRODUKSIYON SA LEKSIKOGRAPIYA NG FILIPINAS - P200

3 - KAPAYAPAAN SA ILANG WIKA NG FILIPINAS - P100

4 - KASAYSAYAN NG MGA PAMAYANAN NG MINDANAO AT ARKIPELAGO NG SULU - P150

5 - LAPAT: ANTOLOHIYA NG MGA KONTEMPORANEONG KUWENTONG FILIPINO - P165

6 - MGA LEKTURA SA KASAYSAYAN NG PANITIKAN - P150

7 - POETIKA: ANG SINING NG PAGTULA NI ARISTOTLE - P100

8 - TALUDTOD AT TALINGHAGA - P150

9 - TESAWRO NG BATAYANG KONSEPTO SA KULTURANG FILIPINO - P200

10 - KULINTANGAN AT GANDINGAN: TUNOG SA PAG-USBONG NG PANITIKANG BANGSAMORO - P87

11 - MGA KUWENTONG BAYAN: TIMOG CORDILLERA - P78

12 - MGA TUMBASANG SALAWIKAING PAMPOLITIKA - P48

13 - PATNUBAY SA KORESPONDENSYA OPISYAL - P150

14 - PROBLEMANG MINDANAO: UGAT AT PAG-UNAWA - P45

15 - SERYE NG MGA PANAYAM SA DISKORS PANDMIDYA AT LITERATURA - P160

16 - SINSIL BOYS: 13 MAIKLING KUWENTO - P111

Labing-anim na aklat, nagkakahalagang P1,994.00 sa kabuuan.

Bardagulan sa walwalan

BARDAGULAN SA WALWALAN

muli nating natunghayan sa dyaryo

yaong pabalbal o salitang kanto

pagkat bumungad agad sa titulo

pamagat: "Bardagulan sa walwalan,

katropa nategi", iyo bang alam

kung ano ang ibig sabihin niyan?

nagkabugbugan habang tumatagay

isa sa kasamahan ang napatay

salita ng mga maton at tambay

umuunlad ang wikang Filipino

nagagamit pati salitang kanto

sa balita o pag-ulat sa dyaryo

sa partikular na lugar ay wika

na minulan ng tagapagbalita

na tiyak unawa ng mga siga

sa bokabularyo'y maidaragdag

sa glosaryo'y mga salitang ambag

na sa ating wika'y di naman labag

- gregoriovbituinjr.

05.30.2024

* ulat mula sa Abante Tonite, Mayo 26, 2024, p.3

Ano nga bang silbi ng 4PH?

ANO NGA BANG SILBI NG 4PH?

ano nga bang silbi ng 4PH
kung di sinasama ang ISF
may pabahay para sa iskwater
ngunit kung mayroon kang Pag-Ibig

pabahay na pang-underprivilege
at pang-homeless sang-ayon sa batas
ngunit para pala sa may payslip
na kayang magbayad ng regular

4PH ba'y may silbi sa dukha
o pinaaasa lang sa wala
dukha'y nais nang magpasalamat
kung iskemang ito'y walang lamat

pabahay palang ito'y negosyo
at di pala serbisyo sa tao
pag tatlong buwang di makabayad
sa bahay mo'y tanggal ka raw agad

dapat dukha'y magbigkis na tunay
nang may sosyalisadong pabahay
itatayo'y kanilang sistema
ng lipunang mayroong hustisya

- gregoriovbituinjr.
05.30.2024

* litratong kuha ng makatang gala sa isang rali sa harap ng DHSUD

* 4PH - Pambansang Pabahay Para sa Pilipino Program

* ISF - informal setller families, bagong pangalan sa squatter

Tatlong buwang sanggol ang biktima

TATLONG BUWANG SANGGOL ANG BIKTIMA

pamagat ng ulat ay nakapukaw ng atensyon 

"Unthinkable": isang batang tatlong buwan lang ngayon

ay nabiktima na ng online sexual exploitation

mga nambibiktima'y dapat mahuli't makulong

aba'y paglabag na ito sa batas na OSAEC

bakit sanggol pa lang ay inaabuso na ng lintik

magulang ba ang maygawa o sila ang humibik

na anak nila'y biktima kaya sila'y umimik

bago iyon ay edad onse ang pinakabata

sa nabiktima ng ganyang kasong di matingkala

subalit ngayon ang sanggol na batay sa balita

naku, bakit ba ang ganyan ay nangyayaring sadya?

bakit bata pa lang ay biktima na sa internet?

dahil ba sa hirap kaya pati bata'y ginamit?

kahirapan ba ang rason ng naranasang gipit?

hanap ay pagkakakitaan, nakita'y kaylupit?

- gregoriovbituinjr.

05.30.2024

* OSAEC - online sexual abuse and exploitation of children

* ulat mula sa pahayagang Tempo, Abril 26, 2024

Dalawang sagot sa palaisipan

DALAWANG SAGOT SA PALAISIPAN

tanong sa Pahalang ay Nota sa musika

tanong sa Pababa: Pangalan ng babae

ang sagot sa Pababa ay MINA o TINA

ang sagot naman sa Pahalang ay MI o TI

parehong tama kahit ano ang isagot

baligtarin man ang Pahalang at Pababa

parehong tama kaya di ka manlalambot

sa ganyang kaiga-igayang larong diwa

ang ganito'y ngayon ko lamang naengkwentro

alinman sa dalawa ang iyong itugon

ay tumpak, makuha man ang sagot sa dyaryo

bukas ay walang alinlangang tama iyon

salamat sa anong sayang palaisipan

at diwa animo'y kinikiliti lamang

- gregoriovbituinjr.

05.29.2024

* 21 Pahalang at 21 Pababa

* palaisipan mula sa pahayagang Pilipino Star Ngayon, Mayo 29, 2024, pahina 14

Paghahanda sa hapunan

PAGHAHANDA SA HAPUNAN

kahit mag-isa man sa tahanan

ay naghahanda rin ng hapunan

ganyan ang aktibistang Spartan

nasa isip lagi'y kalusugan

binili'y dalawang kilong bigas

kamatis at lata ng sadinas

sampung okra't dahon ng sibuyas

gulay na dapat lang pinipitas

nais ko sa hapunan may gulay

na maganda habang nagninilay

dapat loob ay napapalagay

upang makapag-isip na tunay

ulam upang diwa'y di maglaho

tarang kumain pag nakaluto

- gregoriovbituinjr.

05.29.2024

Pagsisikap sa pagkatha ng kwento

PAGSISIKAP SA PAGKATHA NG KWENTO

dapat pagbutihin ang pagkatha ng kwento

upang mabasa ng masang dukha't obrero

lalo't malalathala ito sa diyaryo

publikasyon ng mahihirap na totoo

na daluyan ng pahayag hinggil sa isyu

kaya binabasa pati mga polyeto

nagsikap na mag-ipon upang makabili

ng mga aklat ng kwento nina Tagore,

Irving, Austen, Jack London, F. Sionil Jose,

Lovecraft, Mark Twain, upang sanayin ang sarili

sa pagkatha ng kwentong sa masa'y may silbi

na balang araw ay maipagmamalaki

salamat at may Taliba ng Maralita

na natatanging diyaryong naglalathala

ng aking kwento't tula, na kung ito'y wala

walang lalagakan ng aking mga akda

- gregoriovbituinjr.

05.29.2024

* Taliba ng Maralita - opisyal na publikasyon ng pambansang samahang Kongreso ng Pagkakaisa ng Maralitang Lungsod (KPML)